رواية الوجه الاخر للرحمة الفصل الرابع والعشرون بقلم عبير إدريس
شهم دخل من الباب الخارجي لقسم الطوارئ ، خطواته سريعة وثقيلة بنفس الوقت ، صوت انفاسه متقطعة لاهثه ، لابس معطفه الابيض ازراره مفتوحة وعليه بقع دم ، التعب والخوف تارس ملامحه ، عيونه تدور بخوف على اي شخص يسأله عن حالته يوسف ..
تلكته ممرضة جانت طالعة من الغرفة ، رفعت راسها شافته وتغيرت ملامحها ...
_ دكتور شهم خير ؟ بيك شي ؟
شهم : يوسف وينه ؟
_ يا يوسف ؟
شهم : المريض اللي دخل بالاسعاف قبل نصف ساعة
_ والله دكتور ما شفته
تركها ومشى سريع اشبه بالركض ، دخل لغرفة الطوارئ شاف الدكتور يريد يطلع منها راحله وكف كباله ويسأله مخبوص ، طمنه ورجع دخل للغرفة ورا نصف ساعة طلع ، توجه عليه شهم وسأله بلهفة ...
شهم : شلونه اخوي دكتور ، الله عليك طمني برد گلبي شبيه شنو صاير وياه ؟
_دكتور اهدأ على كيفك مو هيج الأمور تنحل
التفت عليه عصر عيونه وهمس بتعب
شهم : وينه ؟ شنو صايرله ؟ احجيلي ماظل عندي صبر واتحمل اكثر
_حالة تسمم
شهم : تسمم ؟
_ اي
شهم : شلون يعني وليش ؟
_ من وصل جان عنده انخفاض واضح بالوعي ، وتباطؤ بالنفس والنبض غير منتظم اشتبهنا فوراً بتسمم...
شهم : يعني من الأكل لو شنو ؟
_ احتمال يكون دوائي او غذائي بعده ما مبين
شهم : كمل كمل وشنو صار ؟ شنو سويتوا ؟
_ أمنا مجرى التنفس ، وكنا جاهزين للأنبوب اذا ساء الوضع اكثر
شهم : زين
_نطيناه أوكسجين عالي التركيز ، وسوينا غسل معدة لأن الوقت اللي نقلتوه للمستشفى جان مناسب يعني تكدر تكول تلاحكنا حالته
شهم : يعني هسه زين؟ استقر؟ طمني الله يخليك
_بدينا وياه محاليل وريدية قوية حتى ندعم الجسم ويتخلص من السموم ...
شهم : گلبه شلونه ؟ نفسه ؟
_ راقبنا القلب والتنفس بشكل مستمر شبه مستقر
شهم : استجاب للعلاج لو لا ؟
_ استجاب وهذا اللي انقذه الصراحة
سكت بعدها كال تعال وياي نجيب باقي التحاليل
مشى وياه لباب المختبر انتظره برا والدكتور فتح
التقرير يمشي ويقرأ بيه وصل لشهم باوعله وكال
_ التسمم واضح عن طريق شي شاربة
شهم : يعني مو أكل ؟
_ لا المادة السامة بينت عندي بأثناء غسل المعدة مذابة بسائل لو اكو بقايا اكل بالمعدة جان حللناها بس هو اصلاً معدته فارغة
شهم : احتمال لأن تقيء
_ حتى لو تقيأ بس تبقى بقايا اخوك اصلاً ما ماكل شي بهذا اليوم
شهم : لا حول ولا قوة الإ بالله العلي العظيم..
_ بس اكو شي ثاني اكثر خطورة لازم تعرفه
شهم : شنو دكتور احجي
_ طلبت يسووله تحاليل كاملة لجسمه
سكت وبعدها تقرب من شهم وهمس
_ بس للأسف النتائج طلعت مو طبيعية
عكد حاجبه وهمس
شهم : شلون يعني ؟ شنو الشي الموطبيعي بتحاليله ؟
_ طلع عنده نسب عالية بالدم من المهدئات ، وآثار مواد مخدرة بنسب مختلفة ، يعني مو جرعة وحدة لا استخدام بشكل متكرر
جانت كل كلمة يسمعها تنزل مثل الضربة على راسه فتح عيونه يريد يستوعب اللي سمعه ، ضحك ضحكة خفيفة وهمس...
شهم : مدمن ؟ يوسف مدمن ؟ مستحيل
_ للأسف اي وحسب معرفتي بأخوك استشاري شاطر ، يعرف شلون ياخذ الجرعات ويعرف الحدود اللي تخليه يبقى صاحي ومسيطر على وضعه
شهم : دكتور انت شدا تحجي ؟ يوسف اعرفه اكثر من نفسي واكثر واحد بالدنيا يخاف على صحته وما يسوي شي اذا انه ما ادري بيه
_هذا اللي طلع عنده بعد ما اعرف
شهم : منو يعرف بنتيجة التحاليل غيرنا انه وياك ؟
_ ابو المختبر واني وهسه انت
رجع شهم بالذاكرة وبدأ يجمع التفاصيل الصغيرة ويربطها ببعض ، رجفة ايده توتره المفاجئ ، تغيير مزاجه وتقلبه ، قراراته الغريبة ، انزرع الشك بگلبه بس مو اتجاه يوسف لا بالمستشفى اللي يشتغل بيها
_ واضح صارله فترة يتعاطى لأن دمه مو نظيف
شهم : وشنو المطلوب مني اسويله حتى انقذه من هذا السم وبنفس الوقت احافظ على مكانته المهنية
سكت بعدها تنهد وكال
_اذا تريد تنقذه تبدأ فوراُ بعلاجه
شهم : منين ابدي وجهني عقلي ما جاي يستوعب اللي سمعته ، دكتور دليني على الطريق الصحيح بدون ما اسبب ضرر لأخوية ولمهنته ...
_ اول شغلة نسويها برنامج سحب السموم (Detox) داخل المستشفى + مراقبة مستمرة لأن اعراض الانسحاب ممكن تكون خطرة بعدها علاج نفسي وتأهيلي يتبع المرحلة الأولى ، وصدكني اذا تجاهلتوا الموضوع ممكن تخسروه وما يطول هواي ...
لزم راسه بقوة وسند ظهره للحايط باوع للدكتور بيأس وكال ..
شهم : الله يخليك دكتور الموضوع بيناتنا ما اريد احد يعرف بيه ...
_ دكتور من يمي تطمن ما راح اخلي مخلوق يعرف
شهم : ربي يبارك بيك
_ هذا واجبي
حك راسه ونظراته ضايعه سأله بفكر تايه
شهم : شنو ممكن تصيرله من مضاعفات ؟
_فقدان او ضعف بالوعي ، بطء او توقف التنفس ، اضطراب بدقات القلب ، دوخة شديدة او هذيان ، وممكن يوصل لغيبوبة ...ترة الموضوع ابداً مو سهل
شهم : يارب سترك بس هاي الأعراض الداتحجي عنها اغلبها صارت وياه ، تقيء على اضطراب بدقات القلب وجان هواي يدوخ واعصابه ترجف ، جنت متصور هذا من التعب والأرهاق الجان يعيشه بسبب دوامه
_ لا هاي الاعراض اعراض ادمان مو تعب
شهم : اكدر اشوفه ؟
_ اي اكيد
مشى ورا الدكتور للغرفة الموجود بيها يوسف ، دخل بخطوات ثقيلة ..باوعله
نايم على السرير ، وجهه شاحب بشكل مخيف ، شفايفه باهته ، وجهاز المراقبة يرسم خط حياته بشكل منتظم ...
إيده مربوطة بأنبوب المحاليل ، وعلى صدره لواصق الأجهزة تقرب منه وكف كباله نزلت دموعه وهمس ...
شهم : شنو سويت بنفسك ؟ وين وصلتها ؟ منو يستاهل توصل نفسك لهيج مرحلة ؟ ليش هيج صار وياك ليش ؟ هالكد جنت بعيد عنك وكل هذا صاير وياك وما حاسس بيك ؟
مد إيده لزم كف يوسف البارد ضغط عليه بقوة وكأنه يحاول يعيده للحياة نزل راسه وهمس بأذنه ..
شهم : منو وصلك لهاي المرحلة ؟ منو ؟ اجيب حقك منهم لو على موتي ...
باس راسه وكام مشى للشباك الموجود بالغرفة كتف ايده ناطي ظهره للدكتور وهمس بصوت تعبان...
شهم : دكتور اذا انتشر الخبر يوسف ينتهي ، سمعته منصبه كلشي بناه وتعب عليه راح ينهدم بلحظة اليعرفون بيها الخبر
_ صحيح كلامك ممكن حتى يسحبون منه رخصة مزاولة المهنة
شهم : بس انه ما راح اسمح بهذا الشي
_بشنو تفكر ؟ علاجه ضروري وصحته اهم من مهنته
شهم : أريده يتعالج بس مو هنا ولا بأي مركز تأهيلي
الدكتور عكد حاجبه وكال ...
_ بس هذا مو قرار بسيط شلون تعالجه اذا مو مستشفى وبعدها تاخذه مركز ؟
شهم قاطعه وكال
شهم : اعرف خطورة الموضوع وفاهم تفاصيله بس
_ بس شنو ؟
شهم : اذا دخل مركز تنعرف حالته بكل سهولة خصوصاً هو عنده اعداء هواي ويدورون وراه ، في حال انكشف موضوعه الهم ينتهي يوسف
_ والحل ؟
شهم : انه اعالجه بالبيت
الدكتور تنهد ومشى لشهم خطوتين يفكر بالعرض
شهم : شنو رأيك ؟
_ العلاج المنزلي ممكن بس بشروط قاسية جداً
شهم : سولف اسمعك
بدأ الدكتور يشرح بصوت هادئ ورسمي
_احنا تقريباً أنهينا المرحلة الأخطر ، وبالنسبة لسحب السموم الأولي نستمر بيه هنا كم يوم لحد ما تستقر حالته تماماً بعدها من يطلع تمشون بهاي الخطوات
شهم : وهي ؟
_ العزل التام ، اي مصدر للأدوية لازم ينشال من المكان الراح يكون بيه ، اي وصفات طبية غير اللي اكتبها ما تنطي أله ، وتضمن عدم احتكاكه بأي شخص ممكن يوفرله شي من الجان ياخذه
شهم : هاي يمي لا تخاف انه اضبط الوضع وبعد ؟
_ مراقبة مستمرة لازم تخلي شخص متفرغ يظل وياه ٢٤ ساعة ما يتركه لحظة وحدة
تراقبون اكله ، نومته ، وتصرفاته ، لأن ممكن بأي لحظة تجيه أعراض انسحاب ...
شهم : مثل شنو ؟
_ قلق حاد على عصبية ، أرق ، او حتى نوبات مفاجئة ما جنتوا محسبين الها حساب
شهم : تمام وبعد ؟
_علاج دوائي بديل للجان ياخذه (تحت اشرف طبي ) راح انطيك أدوية محددة وبجرعات دقيقة تضمن ما تغلط بيها لأن روحه راح اصير بين إيدك
شهم : وشنو تسوي هاي العلاجات ؟
_ تخفف أعراض الانسحاب ، وتساعده يستقر
بس انتبه اي زيادة او نقص ممكن يرجعنا لنقطة الصفر
آخذ نفس اتنهد وكال
شهم : الله المستعان ، وبعد ؟
_الدعم النفسي بهاي الفترة ضروري جداً
شهم : يحتاجله دكتور نفسي قصدك ؟
_اي
شهم : ما راح يقبل اخوي واعرفه
_ حتى لو ما وافق بالبداية ، ضروري تجبروه على جلسات علاج نفسي تدريجياً
شهم : لا حول ولا قوة إلا بالله العلي العظيم
_ اهم شي المتابعة الطبية ، ضروري اشوفه بشكل دوري ، بالبداية كل يومين بعدين تصير اسبوعياً
شهم : شكد راح ياخذ وقت حتى يتعافى ؟
_ المرحلة الأولى من 7 الى 14 يوم حتى يتخلص الجسم من التأثير المباشر ، المرحلة الثانية راح تكون الأطول والأصعب
شهم : شكد تستمر ؟
_من شهر الى 3 اشهر ، هاي المرحلة نسميها مرحلة السيطرة على الرغبة والانتكاس
شهم : تمام و التعافي الكامل شكد ياخذ وقت ؟
_ممكن ياخذ 6 اشهر واحتمال أكثر تعتمد على استجابة المريض
شهم : هواي والله
_ اي لهذا اني افضل العلاج يكون بين المستشفى والمركز
شهم : مستحيل اخليه يتعالج بالمستشفى او بمركز ما اكدر اجازف وهو ما راح يقبل متأكد
_ دكتور خليني اكون صريح وياك ، العلاج بالبيت ممكن ينجح بس نسبة الانتكاس بيه أعلى
شهم : واذا انتكس ممكن يرجع اقوى من قبل ؟
_ ممكن اي وممكن لا
سكت شهم يفكر افتر بالغرفة بعدها وكف كباله وكال
شهم : ما راح ينتكس انه ما اسمح بهالشي
_ ما تكدر تضمن
شهم : اضمنه
_ الصراحة اني ما مقتنع
شهم : بس انه مقتنع ومؤمن راح اطلعه منها ويرجع احسن من قبل ..
_ تمام راح امشي وياك بهالقرار ، بس من اقل غلطة تصير تبلغني ونوقف كلشي وننقله للمستشفى
شهم هز راسه ساكت همس بينه وبين نفسه وكال
شهم : مو بس اعالجه راح اعرف منو خلاه يوصل لهاي المرحلة واحاسبه عليها ...
ظل عنده للصبح صارت الساعة سبعة طلع من الغرفة ترك يوسف نايم ، راح للمدير قدم اجازة لمدة اسبوع ، مدير المستشفى رفض بالأول ينطيه اجازة بس شهم كتب بالطلب اجازة مرضية ومستعجلة وحجى وياه هواي بعدها وافق عليها تشكر منه ورجع لغرفة يوسف ..
الغرفة هادئة فقط اصوات الأجهزة بالمكان سحب كرسي وكعد يباوعله ، مرت ساعة ، اصبع يوسف بدأ يتحرك ، اول ما حس علية رفع راسه باوعله تقرب منه وهمس بصوت حنين ..
شهم : يوسف
جفنه ارتجف ، فتح عيونه ببطء ، نظرته ضايعة مشوشة ، حاول يركز بعدها همس
يوسف : انه وين ؟
صوته ضعيف ومكسور ، تنهد شهم وكال
شهم : بالمستشفى بس انت بخير الحمدلله
يوسف : شنو صار ؟
حجاها بلسان ثكيل رد عليه شهم والغصة مالية صوته
شهم : تعبت ونقلناك للمستشفى
يوسف : مي
مد ايده بسرعة فتح البطل وساعده يشرب ، رفع راسه وشربه ، يوسف ثبت نظره على شهم وهمس
يوسف : شهم
شهم : وياك حبيبي گول اسمعك
يوسف : لا تخليهم يعرفون
شهم : منو ؟
يوسف : عدنان وربعه
شهم : بحالتك تقصد ؟
هز راسه بأي
شهم : لا تخاف محد عنده علم لحد اﻵن
هز راسه ، حاول يتحرك بس ضربة الألم من جديد ، رجع راسه على المخدة تأوه وغمض عيونه
شهم : ارتاح لا تحجي شي هسه
دخل الدكتور مبتسم باوع ليوسف تقرب منه وكال
_ الحمد لله على السلامة دكتور
يوسف : الله يسلمك
بدأ يفحص الضغط والنبض ، تأكد من مستوى الوعي والتركيز عنده ، راقب التنفس واستجابته ، باوع لشهم وكال
_ راح بنقيه تحت المراقبة من 24 الى 48 ساعة إضافية ، اذا استمر بهذا الاستقرار تكدر تطلعه
هز راسه شهم ساكت بعدها كمل
_ بس قبل الخروج لازم تسويله عدة اجراءات
آخذه شهم وطلعوا خارج الغرفة ، التفت عليه يسأله
شهم : مثل شنو دكتور ؟
_ نعيد تحاليل الدم حتى نتأكد من السموم نزلت من جسمه ، وتحليل تقييم وظائف الكبد ، ونتأكد ماكو مضاعفات ، ونثبت خطة علاج للأيام الجاية
شهم : تمام دكتور عاشت ايدك
اجاه اتصال باوع للموبايل فارس يتصل
شهم : دكتور من رخصتك ارد على الأتصال
_ اي تفضل آخذ راحتك اني راجع ليوسف
هز راسه وجاوب
شهم : الو ها فارس
فارس : انت وينك ما تكولي ؟ خبلتني اتصل موبايلك مغلق لا نطيتني مكان المستشفى الأخذت اخوك الها لا كلت هذا الجلب وين ينام ؟ اسأل عليه اشوفه وينه وصل ؟ لو مات بالطريق
شهم : اعتذر منك نسيتك والله وموبايلي خلص شحن جنت تاركة بالغرفة قبل شوية فتحته
فارس : صدك تحجي ؟
شهم : وين انت ؟
فارس : بالسيارة كبال بيت يوسف
شهم : تعال للمستشفى
فارس : بعدكم هناك ؟ شنو صار ؟ يوسف شبيه ؟
شهم : تعال واحجيلك مو مال تليفون
فارس : المهم طمني عليه وضعه شلونه زين ؟
شهم : زين الحمد لله تعال منتظرك
فارس : دزلي الموقع حتى اجي
شهم : يلة ثواني يكون عندك
دزله الموقع ورجع لغرفة يوسف لكاه نايم ، كعد يمه ، اتصل بضحى
شهم : الو صباح الخير حبيبتي
ضحى : صباح النور وينك شهم ظل بالي عليك
شهم : انتِ وين عمري ؟
ضحى : بالدوام
شهم : تكدرين تاخذين اجازة ؟
ضحى : ليش ؟
شهم : آخذي اسبوع محتاجج
ضحى : خير شنو صاير ؟
شهم : بعدين افهمج يوسف تعب فجأة وانه عنده هسه
ضحى : بالبيت يعني ؟
شهم : لا بالمستشفى
ضحى : ليش ياستار شنو صار ؟
شهم : تعرض لحالة تسمم ؟
ضحى : صدك ؟
شهم : اي
ضحى : وهسه شلونه ؟
شهم : الحمد لله عبر مرحلة الخطر
ضحى : الحمدلله على سلامته
شهم : الله يسلمج بس ضحى محد يدري من اهلي بس فارس خاف امي تتصل بيج لو ابوي لا تحجيلهم شي
ضحى : تمام
شهم : آخذي اجازة وامرلج للبيت آخذج
ضحى : وين تاخذني ؟
شهم : نبقى عند يوسف هاي الفترة
ضحى : هاي شنو
شهم : محتاج رعاية وانه ما اكدر اعوفج وحدج بالبيت وبنفس الوقت احتاجج
ضحى : بعيوني تدلل ، احضر ملابس يعني ؟
شهم : اي جهزي جنطة بيها ملابس الي والج واذا احتاجيتي شي آخذج للبيت نجيب
ضحى : تمام هسه اروح اخذ اجازة واشوف شيصير ابلغك
شهم : تمام انتظرج
ضحى : يلة باي
شهم : الله وياج ، ضحى
ضحى : ها حبيبي
شهم : انتِ زينة ؟
ضحى : الحمد لله بس ضل بالي عليك خفت صايرلك شي ومانمت زين بقيت انتظرك لأن ما كلت عندي خفارة وما ادري بايت عند يوسف بالمستشفى
شهم : التهيت وياه وموبايلي خلص شحن اعتذر ما بلغتج
ضحى : الحمد لله مابيكم شي
شهم : الحمدلله ، يلة روحي شوفي موضوع الاجازة ورديلي خبر انتظرج
ضحى : تمام
سده منها اتصل فارس
شهم : الو ها فارس
فارس : انه كبال المستشفى اطلعلي
شهم : يلة جاييك
طلعله تلكاه من الباب دخلوا سوى يسولفون بوضع يوسف
فارس : شنو صاير ؟
وكف كباله آخذ نفس عميق وزفره
شهم : الوضع ما يسر
فارس : خير احجي شكو ؟
شهم : يوسف تعرض لحالة تسمم واتوقع بل متأكد السالفة مقصودة
فارس : قصدك مسمميه ؟
شهم : اي
فارس : لا تحجي صدك ؟
شهم : اي
فارس : وهسه شلونه زين ؟
شهم : احسن
فارس : زين منو أله مصلحة بأذيته ؟
شهم : سالفة طويلة بعدين احجيلك عنها بس اكو شغلة اصعب
فارس : خير ياستار شكو ؟
شهم : يوسف مدمن
فارس : مدمن ؟ مدمن شنو لا تخبلني
شهم : هاي اللي ما اعرفها
فارس : شنو مدمن يمعود يوسف ما يسويها
شهم : اخ اخ ما ادري خايف اسأله وخايف ابقى ساكت
فارس : وهسه هو وينه زين لو لا ؟ وديني عليه يمعود
شهم : هسه آخذك لغرفته بس ممنوع تبين كدامه شي
فارس : لا طبعاً ما احجي
شهم : والأهل شنو كلتلهم من اجيت ؟
فارس : لحد اﻵن محد فاكدني وسائل عني تكول جلب مو ابنهم
شهم : لا حشاك ، بس اذا اتصلوا بيك كوللهم اجيت لشهم معزوم يمه وراح ابقى فترة
فارس : فترة شنو ؟ عندي دوام يمعود
شهم : آخذ اجازة ما نكدر نعوف يوسف وحده الفترة الجاية كلش ضروري نتواجد يمه بالبيت
فارس : ولك ما ينطوني امتحانات آخر السنة واربع شعب لازم امتحنهم
شهم : مو مشكلة روح امتحنهم وارجعلي
فارس : تمام اشوف شلون ارتبها
شهم : هسه اوديك تشوف يوسف وراها نروح لبيته نحضرله غرفة جوا قبل لا يطلع من المستشفى
فارس : هاهي متفقين
راحوا لغرفة يوسف جان بعده نايم ، تقرب منه فارس وكف فوك راسه وتخصر ، هز راسه وباوع لشهم
فارس : هذا شصاير بيه ؟ ليش هيج شكله مصفرج ؟
شهم : غير متسمم قابل جان بحفلة
فارس : منو مسممه حتى ارجعه لبطن امه
شهم : غير اذا اعرفه دقيقة ما ابقيه عايش
فارس : وشلون تعرفه ؟
شهم : اكو فكرة ابالي بس اتطمن على وضع يوسف اباشر بيها
فارس : يصير خير انه وياك بكل خطوة تخطيها
هز راسه شهم وكال
شهم : نروح للبيت ؟
فارس : يلة
شهم : نحتاج نشتري كم شغلة ونجيب جرباية ام النفر نحطها بالغرفة الجوة
فارس : يلة امشي بس شلون نعوفه وحده ؟
شهم : ادري وين عايفيه غير بالمستشفى وبدل الواحد عشرة موجودين
فارس : اي بس وصيهم عليه
شهم : طبعاً اوصيهم ، يلة امشي
طلعوا وراح شهم لغرفة الدكتور بلغه بطلعتهم وصاه على يوسف وطلعوا ، شهم باوع لفارس وكال
شهم : وين سيارتك مابية اسوق
فارس : بالكراج
مشوا للكراج وصلوا للسيارة فتح الباب حتى يصعد باوع لفارس وضحك
شهم : هاي شنو جايبه وياك ؟
فارس : اي وين اعوفه غير يموتوه جوع
فتح حزام الأمان ودنك يشيله
فارس : تعال بابا اصعدك ليورا لأن عمك يريد يكعد بمكانك نتحمله شنسوي
صعده ورا وثبته بحزام الأمان ورجع صعد ، باوعله شهم يضحك
فارس : شبيك تضحك ؟
شهم : يعني هسه انه صرت عمه لهذا القرد ؟
فارس : مصيول اسمه مو قرد
شهم : ها يعني اذا كلت قرد دا اهينه ؟
فارس : اي طبعاً تهينه ، ابني هذا
التفت شهم ليورا يباوعله ، القرد ضحك طلعت اسنانه ، فارس جان يباعله بالمرايا التفت لشهم وكال
فارس : شفت شلون يضحكلك؟ عرفك
شهم : اي عرفني ابن الكلب
فارس : مؤدب شوفه شلون كاعد عاقل
شهم : اي على كولتك مؤدب
فارس : غير مربيه ومعلمه على الأصول
شهم : اي طالع على ابوه متربي مرتين دسوق سوق
فارس : ما يعجبكم العجب
شهم : آخذنا لشارع المغرب حتى نشتري جرباية ام النفر
فارس : اي بس دليني ترة ما اندل هواي ابغداد
شهم : اطلع كبل هسه وبعدين آخذ يمنى
وصلوا لأهل الأثاث واشتروا سرير ونطوهم العنوان حتى يوصلوه للبيت وراهم ، صعدوا السيارة راحوا تسوكوا مخضر على لحوم وجابوا كراتين مي ورجعوا للبيت دخلوا السيارة بالكراج ونزلوا نظفوا البيت غسلوه وعقموا الارضية بديتول مال مستشفيات ، ورتبوا الغرفة الجوا ، وصل السرير نصبوه بيها ..
شهم شال كل الأدوية اللي بالبيت ، حتى المسكنات الخفيفة ، صعد لغرفة يوسف يدور بيها اذا جان اكو دوا غريب او شي ثاني ممكن ياخذه وهو ماعنده علم بيه ، بس ما لكى شي ادوية عادية للفلاونزة ووجع الراس ..
اخذ ملابس ونزلهم جوا بالغرفة ، وفارس رتب المسواك بالثلاجة وراح لشهم
فارس : انه خلصت
شهم : وانه هم
فارس : تتغدا ؟
شهم : هسه نوصي وناخذه ويانا للمستشفى هناك ناكل
فارس : ديلة
طلع موزة فتحها وكل القرد وكال
فارس : يلة بابا اتغدا
باوعله شهم هز ايده
فارس : شبيك غير اوكله ، جبتله عثك كامل وخلصه بالطريق تكول حب شمس ويكرز بيه ابن الكلب
شهم : مصرف اضافي هذا
فارس : نفس هاي شلون ما اداريها ؟
شهم : اصعد اصعد وعوف القرد هنا لا تاخذه وياك
فارس : وين اعوفه ؟
شهم : بالحديقة
فارس : لا عيني غير ينهزم
شهم : مو على اساس مربيه
فارس : اي بس يبقى ماعنده عقل
شهم : حطه بغرفة واقفل عليه
فارس : لا عيني لا
شهم : ليش لا ؟
فارس : يستوحش وحده
شهم : ولك رايحين للمستشفى وين ماخذه وياك ؟
فارس : اعوفه بالسيارة واروح وارجع عليه
شهم : ياربي صبرك كلشي ما اريد
صعدوا السيارة ورجعوا للمستشفى بالطريق اتصلت بيه ضحى
شهم : ها حبيبي شنو صار وياج ؟
ضحى : وافق المدير على الأجازة
شهم : اي زين بس باعي لا ترجعين للبيت هسه ، خلي الخط ياخذج لبيت اهلج
ضحى : مو على اساس نروح لبيت يوسف ؟
شهم : اي بس خل اشوف شوكت اطلعه ، وراها امر آخذج
ضحى : تمام انتظرك
شهم : ديري بالج على نفسج
ضحى : وانت هم
شهم : مع السلامة
ضحى : الله وياك
سده منها ونزلوا للمستشفى اتوجهوا لغرفة يوسف ، للعصر عادوله التحاليل كلها وتطلب الوضع يبقى يومين بالمستشفى ، ثالث يوم سمحوله يطلع ، وقع شهم على اوراق الخروج وآخذوه للبيت بسيارة شهم ، الطريق كله ساكت ، ميل راسه على الجامة ، هادئ بس واضح عليه التعب والمرض ، وصلوا للبيت نزلوه على كيف ودخلوه للبيت ، يمشي ببطء كل خطوة يخطيها كأنما شايل ثكل فوك ظهره ، يوكف يرتاح شوية ويرجع يمشي مستند على اخوانه ..
دخلوه للغرفة مدد وشهم غطاه بعدها طلع لفارس جان كاعد قريب من الباب شافه وكف
فارس : ها شلونه ؟
شهم : شلونه يعني؟ مددته
فارس : شكد ويكدر يوكف على حيله ؟
شهم : الظاهر مطولين
فارس : لا بشرفك ؟
شهم : اي والله ، المهم عينك عليه رايح اجيب ضحى واجي
فارس : شتسوي ضحى تجيبها ؟
شهم : تسويلنا أكل ، و ساعة الاطلع بيها من البيت تبقى وياك تدير بالها على يوسف وعلاجه
فارس : هم فكرة انه ما افتهم كلش بسالفة الأدوية
شهم : عينك عليه ، ما تفاركه لحظة وتليفونك بيدك اي شي يصير تبلغني بيه
فارس : صار
شهم : ما اتأخر
فارس : تمام
طلع راح لضحى آخذها من اهلها ورجعوا للبيت اخذوا احتياجاتهم من ملابس وغيرها ورجعوا لبيت يوسف ، دخلت ضحى تطمن على يوسف وراحت للمطبخ سوتلهم أكل ، خلصت صاحت عليهم كعدوا على الطاولة يتغدون ، باوعلها شهم وكال
شهم : حبيبتي راح نتعبج ويانا هاي الأيام
ضحى : شهم لا تكمل ترة ازعل منك ، قابل غريبة اني ؟
شهم : لا والله مو غريبة بس يوسف يحتاج وكفة على الرجل طوال اليوم
ضحى : شنو بيه ما فهمتني ؟
حجالها حالته وهي صافنة مصدومة
ضحى : يوسف مدمن ؟ مستحيل
شهم : هذا اللي صار المهم هسه ننتبه على حالته ونرجعله صحته بأقرب وقت بعدها نعرف التفاصيل
ضحى : زين شنو المطلوب مني ؟
شهم : اول شغلة نوعية الأكل ، حالياً عنده نقص بعناصر غذائية ومعدته حساسة ، فالأكل لازم يكون خفيف + مغذي
ضحى : و شنو الأكل اللي يفيده ؟
شهم : اول ايام شهيته راح تكون معدومة ، نعتمد على الشوربات الخفيفة او مرك ، واذا تمن تكون كمية كلش قليلة وبدون زيت ....
ضحى : بس لازم انوعله بالأكل
شهم : ممكن ياكل توست ربع او نصف وحدة ، وضروري ندخل اللبن بوجبة من الوجبات يكون وية التوست ، بالنسبة للفواكه الموز مهم ، والمي لازم يشرب بكثرة + عصائر خفيفة تفاح او برتقال ويكون مخفف بالمي
ضحى : تمام ، زين شنو الممنوعات عنه في حال طلبها ؟
شهم : الكهوة الجاي ممنوع يزيد عنده القلق والرجفة ، الأكل الدسم بكل انواعه ممنوع عنه ، سكريات زايدة هم ممنوع واي منبهات ...
ضحى : لا يضل بالك ان شاءالله اسويله جدول اسبوعي وانوعله بالأكل يبقى العلاج علمني عليه في حال داومت وتركتنا..
شهم : تمام هسه شوية شوية اعلمكم شنو تسوون بالبداية خلوا بالكم وياي شنو انطيه وشلون اتصرف وياه تمام فارس ؟
فارس : صار معلوم
خلصوا أكل كامت ضحى سوتله شوربة بالخضار ، آخذها شهم ودخل عليه حتى يوكله ، التفت لضحى طلب منها تجي وراه
شهم : الحبيب صار وكت الأكل
جاوبه بتعب
يوسف : ما مشتهي كلشي
شهم : ما يصير لازم تاكل حتى تاخذ علاجك
يوسف : انطيني العلاج آخذه بدون اكل
ضحى : ما يصير تاخذ علاج بدون أكل لو ما انت دكتور وتعرف بأضرار هذا الشي ؟
تقرب شهم كعده وخلاه يرتاج على الوسائد ، غصبه ياكل لكمتين ودفع الخاشوكة بخفة
شهم : حبيبي لخاطري اذا تحبني تاكل شوية
يوسف : والله ما مشتهي واذا غصبتني راح اذبه
شهم : ميخالف المهم يدخل شي لجسمك
يوسف : الله يخليك لا تلح
ضحى : بس الأكل مهم يا يوسف علمود جسمك ما تنهار قوته
باوعلها والتفت لشهم همس بتعب ..
يوسف : افتحوا الشبابيك اختنكت اريد هوا
كامت ضحى فتحت الستائر والشبابيك دخل ضوء خفيف من الحديقة ، جان وقت غروب
شهم : يلة گلبي بس هاي اكلها راح نخلص
يوسف : شهم ما اريد لا تلح
همست ضحى بصوت هادئ بعد ما كعدت قريب منهم
ضحى : ما نريدك تاكل وجبة كاملة بس كم لكمة اكل
ظل يباوع للشوربة لعبانة نفسه منها ، شهم قرب الخاشوكة من حلكه ، وجهه تغير لونه ، فجأة بدون مقدمات دفع الخاشوكة بعيد عنه وكع الأكل على الفراش لزم بطنه ، انفاسه تسارعت ، ركض شهم جابلة سلة النفايات وحطها قريب منه ، دنك راسه تقيء بيها ..
شهم انخبص كام وكف فوك راسه ويفرك بظهره ...
ضحى : لا تخاف خليه يتقيء الدايصير وياه طبيعي
اشر لشهم ياخذه للحمام ، سنده ومشى بيه للمغسلة ، فتح البوري وكام يغسل بوجهه ، يوسف ساند ايده الأثنين على المغسلة ، يتنفس بصعوبة ، بعدها رفع راسه باوع لوجهه بالمرايا تنهد ومشى للغرفة سانده شهم ، ضحى غيرت الشرشف بسرعة ساعدها فارس ، ورجعوه يمدد ...
همس بقهر ...
يوسف : انه الجنت اسيطر على المرضى وعلى علاجاتهم وأكلهم هسه صرت عاجز عن مساعدة نفسي ؟
شهم : شكد ركضت وراك تروح لدكتور يشوف حالتك ، شفت الأهمال بصحتك وين وصلك ؟
ضحى : شهم مو وقته هذا الكلام
باوعلها وسكت ، غطا يوسف وطلع من الغرفة يغلي ، ضحى طلعت وراه وتركوا فارس عنده ...
ضحى : مو الأفضل نوديه للمستشفى ترة حالته كلش تعبانة
جان كاعد ومدنك راسه ، رفع عيونه باوعلها وكال
شهم : مستحيل اوديه
ضحى : تعوفه يموت ؟
شهم : ما يموت انه اعالجه
ضحى : بس هذا مو اختصاصك مو كلشي انت تكدر تسويه
شهم : شنو فائدة شهادتي التعبت عليها سنين وآخذت عمري كله اذا اخوي ما اكدر اساعده ولا افيده
ضحى : لو الحجي هيج سهل ما جان كل واحد بينا تخصص بشي معين ، شهم كلمن يعرف اختصاصه وحالة اخوك بعيدة عن اختصاصك
شهم : انتِ تساعديني
ضحى : اني طبيبة نسائية مو معالجة لحالات الأدمان ، اقل خطأ مني او منك يروح بيها لا سامح الله
شهم : كلشي اتعلم ماكو شي صعب ولو اعرف اجيبله كادر كامل يعالجه هنا في حال عجزت عن علاجه ولا اخليه يخسر مستقبله تعرفين اذا عرفوا بيه مدمن شلون يدمروه خصوصاً عنده اعداء هواي بشغله
ضحى : شنو سبب هاي العداوة صاير شي اني ما ادري بيه ؟
شهم : قصة طويلة بعدين احجيلج عنها المهم هاي اخطر مرحلة يمر بيها ، اسمها مرحلة الانسحاب ولازم ندير بالنا عليه كلشي زين
ضحى : وشكد تطول ؟
شهم : من اسبوع ل ١٤ يوم تعتبر اخطر مرحلة اذا عديناها الباقي سهل ان شاءالله..
ضحى : زين هسه شنو راح تنطيه ؟
شهم : مهدئات خفيفة ..
ضحى : بشنو تفيده المهدئات ترة اخوك منتهي
شهم : تقلل القلق والرجفة وبعدها انطيه منوم بسيط حتى ينام حتى لو ساعات قليلة ، ومسكنات في حال تعب ومحاليل على فيتامينات ..هي بلغني الدكتور وماشي على خطواته..
تركها ورجع للغرفة نطاه العلاج بصعوبة قبل ياخذه ورا ساعة دخل بنوم عميق ، وبقى سهران فوك راسه ، للفجر كام صلى وطلب من فارس يناوب عنه وهو راح نام ساعتين وكعد ..رجع للغرفة
فحص ضغطه والنبض ، وانطاه جرعة مهدئ خفيفة ، وضحى سوتله اكل خفيف ، غصبه شهم ياكل ، أكل لكمتين وتركه ما كدر يكمل ...
طلع من غرفته وصاحلهم يحجي وياهم على صفحة
شهم : انه طالع بشغلة ما اتأخر اللي اريده منكم اتابعون اعراض الرجفة والقلق عنده ، وتنطوه جرعة من العلاج هذا اذا احتاجها ، وامشوا حسب التعليمات اللي كلتلكم عليها ، ضحى صار واضح ؟
ضحى : تمام
شهم : فارس ما تتحرك من مكانك وتتركه لحظة وحدة بين ما ارجع
فارس : صار ، خليها يمي لا يظل بالك
شهم : ما اتأخر
طلع ضحى تبعته
ضحى : شهم شهم لحظة
التفت عليها تعبان وروحه بخشمه
شهم : كولي
ضحى : وين رايح ؟
شهم : شغلة عندي اكضيها وارجع
ضحى : شنو هاي الشغلة غير اعرف
شهم : شغلة تخص يوسف بعدين تعرفيها
تركها وطلع صعد سيارته توجه للمستشفى اللي يداوم بيها يوسف ، لبس كمامة ونزل دخل من الباب الرئيسي سلم على الشخص المسؤول عن البصمة ، باوعله وكال ..
_ اهلاً دكتور وين هاي الغيبة ظل بالنا عليك
شهم : جنت بالمستشفى تعرضت لحالة تسمم
_ سلامات دكتور حبيبنا والله اني كلت غيبتك اكيد وراها شي
شهم : الحمد لله على كل حال
_ الحمد لله على سلامتك ، تبصم ؟
صفن عليه يفكر بعدها جر نفس وكال
شهم : اي ابصم ليش لا
طلع جهاز البصمة حط اصبعه عليه ، الجهاز رفض بصمته ، رجع حط اصبعه مرة ثانية وهم رفضها
_ دكتور جرب اصبعك الثاني
هز راسه وحط اصبعه ورفضه الجهاز
شهم : شنو اليوم اكو خلل بالنظام ؟
_ لا كل الموظفين بصموا عادي
شهم : انطيني اوقع بالسجل بين ما تعالجون المشكلة
_ اي
فتح السجل وكتب اسمه الثلاثي وقدمه لشهم وياه قلم جاف ، وقع كدام الاسم بنفس توقيع يوسف مدله الدفتر ، وراح للغرفة فتح الباب ودخل قفلها وتوجه للمكتب كعد وراه فتح الجرارات يدور اذا اكو علاج غريب ياخذه يوسف او وصفة طبية او اي شي ممكن يخليه يعرف السبب اللي وصل يوسف لهذا الحال..
ما لكى غير اوراق وملفات تخص المرضى بالمستشفى
شهم : مستحيل ما الكى شي ، العلاج وين ضامة راح اتخبل بالبيت ماكو هنا ماكو وين ممكن الكاه ؟
يدور ويحجي وية نفسه ، توجه للثلاجة ، فتحها دور بيها ما لكى غير مي وعلب فيتامينات ، آخذها بإيده يكلب بيها ، فتحها حبوب عادية ، اخذها وراح كعد فتح الجنطة طلع كيس نايلون منها و فرغ الحبوب بيه وكام رجع للثلاجة حط العلبة بمكانها ...
باوع على المي ، علب قليلة آخذ واحد منهن وحطه بالجنطة وية الدوا ، سد الثلاجة ومشى ببطء يدور على آخر شي ماكلة او شارب منه يوسف ما لكى شي الغرفة فارغة ونظيفة ...
التفت لسلة المهملات باوع بيها اوراق وبطل مي فارغ باقي بيه شي قليل آخذه وحطه بكيس نايلون بداخل الجنطة ، آخذها قفل الباب وطلع من المستشفى ، صعد سيارته وتوجه لمختبر خاص يعرف اللي يشتغلون بيه وعنده علاقة طيبة بيهم سلم على الموظف وحط كدامه الأكياس ...
شهم : اريد تحليل دقيق لهاي الحبوب
الموظف لبس كفوف وآخذهم منه باوع على الكيس وكال ..
_ ليش تريد تفحصهم ؟
شهم : شاكك بشي واريد اتأكد منه
_ تمام
شهم : شكد اتطول النتيجة وتطلع ؟
_ النتيجة تحتاج تقريباً بين ٢٤ ساعة الى ٤٨ ساعة
شهم : تكدر تحاول تطلعها بوقت أسرع من هيج ؟
_ ان شاءالله احاول
بعدها طلع قناني المي على الميز وكال
شهم : اريد تحليل للمي بهذا البطل ، والمي الباقي بهذا
الموظف باوع باستغراب وكال
_ المي هم تريد تحلله ؟
شهم : اي اريد اعرف شنو بيه بالضبط
_ تمام
شهم : شكد تطول وياك نتيجتة ؟
_ هم ٢٤ ساعة
شهم : انتظرك بفارغ الصبر
_ اتصل عليك من اخلص
شهم : تمام
طلع من المختبر راح للصيدلية وطلب علبة فيتامينات جديدة نفس اللي ياخذها يوسف ، اشتراها ورجع للمستشفى دخل للغرفة وقفل الباب ، فتح العلبة الجديدة وطلع منها حبايات نفس العدد اللي آخذها من العلبة القديمة وعباها بيها ، والعلبة الجديدة حطها بجنطته ...
اندك الباب جمد بمكانه ، همس
شهم : مو وقتكم ابد
كام فتح الباب جانت ممرضة واكفة باوعتله مبتسمة
_ صباح الخير دكتور
شهم : صباح النور
_ دكتور عدنان يريدك بغرفته
شهم : تمام هسه اجي
دخل للغرفة طلع تقرير المستشفى اللي يخص حالة التسمم ، وطلع متوجه لغرفة عدنان ، دك الباب ودخل ، المدير من شافه كام من مكانه ووكف يباوعله من فوك ليجوه عكد حاجبه وكال
عدنان : وين جنت دكتور بالأيام اللي فاتت ؟
شهم يباوعله وداخله يغلي ، المدير كمل كلامه
عدنان : غياب بدون تبليغ وتأخير بالتقارير هذا مو اسلوبك المعتاد دكتور
شهم حط التقرير كدامه على الميز ورجع وكف حاط ايده بجيوب البنطرون
شهم : هنا تلكى الجواب
سحب الورقة فتحها وعيونه تتحرك بين السطور ، ملامح وجهه تغيرت بس حاول يسيطر همس
عدنان : تقرير مستشفى هذا ؟
شهم جاوبه بهدوء
شهم : تعرضت لحالة تسمم يادكتور والمفروض منكم تتصلون تسألون علية مو صح ؟
عدنان : بلغنا خطيبتك وكالت متصلة عليك اكثر من مرة وجهازك مغلق وحتى جايتك للبيت وما فاتحلها الباب
شهم : يكولون جنت بين الحياة والموت يعني الشغلة مو بيدي
ضحك ضحكة خفيفة وكال
عدنان : مبين عليك دا تمر بضغط واضح يمكن تكون محتاج راحة ؟
شهم جاوبه بدون ما يبتسم
شهم :لهذا السبب داومت اليوم ، حتى اطلب اجازة
عدنان كعد وسند ظهره للكرسي وكال
عدنان : بس موضوع الأجازة بالوقت الحالي صعب شوية
شهم : ليش ؟
عدنان : المرضى محتاجيك
شهم : بس صحتي اهم
عدنان : مممم وكم يوم تريد ؟
شهم : لحدما اصير زين وصحتي تسمح اباشر بعملي راح اقطعها واداوم
عدنان : اشوف موضوعك وارجعلك خبر
شهم : بس رايدها هاليومين ما اكدر اطول اكثر صحتي تعبانة
عدنان : من اقرر ابلغك
شهم : من تقرر شنو ؟ هسه راح اقدم اجازة وضروري توافق عليها
عدنان : قدمها ومن اقرر ساعتها تكدر ترتاح بالوقت اللي تحبه
اندار حتى يطلع وصل للباب وصاح عدنان
عدنان : بالنسبة للتقرير شو عفته ؟
بدون ما يلتفت كال
شهم : احتفظ بيه حالياً
حجاها بصيغة تهديد وطلع من الغرفة تلاكه وية دكتور علي بالممر ، ابتسمله وتقرب فاتح ايده ، حضن شهم وكال
علي : دكتور ظل بالي عليك وينك من يوم الحادثة وانت اختفيت
بعده شهم بهدوء وكال
شهم : من طلعت منا تعرضت لحالة تسمم وجنت بالمستشفى البارحة طلعت
عكد حاجبه ضيق عيونه وكال
علي : غريب زين ليش داومت جانت اتصلت بية آخذلك اجازة
شهم : ما جنت بوعي يسمح اتصل ، حالة تسمم شديدة غيبتني عن الحياة ،و مجرد ما حسيت بتحسن اجيت آخذ اجازة
علي : وافق عليها المدير ؟
شهم : لحد اﻵن لا
علي : ليش ؟
شهم : ما اعرف يكولي قدمها وداوم من اوافق عليها ابلغك
علي : حلو انت داوم وابقى بغرفتك ارتاح واني اشتغل بمكانك بس انت اكتبلي التقارير وامشي عليها
باوعله شهم تنهد وكال
شهم : ان شاءالله
ابتسم دكتور علي وربت على كتف شهم ، الاخير باوعله وكال
شهم : في حال آخذت اجازة منو يكتب التقارير بدالي ؟
علي : موجود دكتور حازم
شهم : بس انه ما اثق بيه
علي : اني موجود ما يكدر يتلاعب بشي
ربت على كتفه ، هز راسه وكال
شهم : بارك الله بيك ، انه بغرفتي في حال احتاجيت شي بلغني
علي : ماكو شي بس اذا تكدر تمر لريحانة اكلت راسنا تريد تحجي وياك
شهم : بخصوص ؟
علي : دكتور بعد اللي صار بينكم ما رجعت الها ولا بررت الصار
صفن عليه ما يدري شكو جر نفس وكال
شهم : يعني انت ما تكدر تحلها ؟ والله تعبان وماعندي طاقة للحجي
علي : الصراحة بعد ما انكص شعرها ما رجعت ذيج ريحانة الهادئة ، وحتى الأكل تركته والعلاج ننطيه الها منا تتقيأه وابشرك رجعت تضرب بالبنات من يريدون يساعدوها
شهم : يعني رجعت للعدوانية ؟
علي : اي بالضبط
شهم : وسالفة شعرها شنو صار وياكم بعد ما طلعت ؟
علي : نحجي بغرفتك يكون افضل
شهم : اي اي تعال نحجي ما عندي شي
دخلوا للغرفة وكعدوا ، باوعله علي وكال
علي : دكتور سويت اللي كلتلي عليه ودورت بالموضوع ما وصلت لحل ايوكعنا على العلة
شهم : شنو سويت ؟
علي : يعني اول شغلة سويتها رحت لمهند علمود تسجيل الكاميرات وبيوم الحادثة لكيت اكو قطع جزئي بالتسجيل من ساعة خمسة الفجر للسبعة الصبح..
شهم : قصدك محذوف وما لكيته ؟
علي : اي بالضبط
شهم : وشلون دخلت المكص لغرفتها ؟ اكيد احد ساعدها او والله ما ادري ضاع الكلام مني
علي : قصدك الاشخاص اللي كصوا شعرها لأن ردة فعلها وصدمتها من شافت بيدك المكص مو مال وحدة كصت شعرها بيدها
شهم : هممم
علي : وسألت الممرضات محد حجى شي ممكن نستفاد منه
شهم : وريحانة ؟
علي : شبيها ؟
شهم : بعدها شاكة بية ؟
علي : الواضح من تصرفاتها والعنف اللي تتعامل بيه ويانا ، اي ..
شهم : وتريدني حتى تفهم مني انه ليش هيج سويت ؟
علي : بالضبط
شهم : تمام امرلها ونشوف شنو يصير
بهاي الأثناء انفتح الباب دخلت فرح ، علي استأذن وطلع ، تقربت من الميز وكفت كباله والخوف تارس ملامحها
فرح : يوسف صحيح اللي سمعته ؟
شهم : شنو سمعتي ؟
فرح : يكولون متسمم ؟
شهم : قدر ولطف
اتقربت منه ومدت جسمها عليه تريد تحضنه هو ابتعد
شهم : وين جاية ؟ ما تشوفيني مريض ؟
فرح : اسفة بس خفت عليك
شهم : اللي يخاف يسأل ، اطلعي زعلان عليج
فرح : اتصلت واجيتك للبيت اكثر من مرة ادك الجرس والباب وانت ما تفتح رغم سيارتك جانت صافة بالباب والله سألت عليك وخواي خفت..
شهم : ما جنت بالبيت جنت بالمستشفى
فرح : ياعمري سودة علية وهسه شلون صرت ؟ ومنين اتسممت ؟ اكلت شي من برة كالعادة مو ؟
شك بطريقة كلامها وخوفها المبالغ بيه باوعلها وكال
شهم : اي أكلت من برا
فرح : بأي مطعم أكلت ؟ ترة ضروري تشتكي عليهم وتحاسبهم
شهم : احاسبهم مو من عادتي اترك حقي يم واحد وتعرفيني كلش زين..
تراجعت خطوتين ورا ، لمت شعرها بگيتر جان بيدها وهمست
فرح : اي ضروري تحاسبهم اكيد لازم نحاسبهم
رفع راسه باوعلها وكال
شهم : شلونه دوامج ؟
فرح : زين
شهم : وانتِ شلونج ؟
فرح : معليك مني المهم انت طمني عليك
شهم : انه زين لا يظل بالج
فرح : يوسف ضروري نتزوج ما يصير تبقى وحدك ، هسه لو اني زوجتك جان عرفت شنو صاير وياك او على الأقل اداريك انت هنا ماعندك احد اهلك بعيدين عنك وماكو غيري يكدر يساعدك بمثل هيج حالات
تقريت تريد تلزم ايده سحبها من على الميز ، باوعتله بنظرات تريد تستعطفه بيها
فرح : حبيبي ما اريد ابتعد عنك بعد الصار اريد اكون قريبة منك وبحضنك ، صايرة هواي اشتاقلك ومن انام احلم بيك ...
ابتسم وهز راسه ساكت
فرح : ما عجبك الحجي كالعادة
شهم : تشوفين هذا الوقت الصحيح تفتحين بيه مثل هيج موضوع مهم بالنسبة الية ؟
صفنت عليه ابتسمت وبعدها كالت
فرح : يعني بعدك تفكر بموضوعنا ؟
شهم : وليش حتى ما افكر بيه ؟
فرح : ما اعرف بالأيام الأخيرة حسيتك هواي متغير وحتى متجاوب على اتصالاتي مثل قبل
قاطعها وكال
شهم : فرح جنت ولا زلت تعبان صحتي ما تسمح لأي شي اسويه خارج العمل وانتِ بدورج لازم تصبرين علية شوية
سحبت نفس تنهدت وكالت..
فرح : اصبر ليش حتى ما اصبر
شهم : روحي لشغلج مو حلوة كعدتج كبالي وهذا وقت عمل
فرح : فدوة الك كلشي المهم اتطمن عليك
شهم : وتطمنتي مابية شي تكدرين تاخذين راحتج
فرح : بس الله عليك من اتصل تجاوبني
شهم : صار
اول ما طلعت ، آخذ غراضه وطلع من المستشفى صعد سيارته ورجع للبيت ، اول ما دخل سأل عن يوسف فارس جاوبه
فارس : تعب كلش وما قبل ياكل لكمتين وتقيء بس ضحى نطته علاجه ونام
شهم : اي زين
فارس : انت شنو صار وياك ؟ وين رحت ؟
شهم : رحت للمستشفى
فارس :مو آخذت اجازة ؟
شهم : اي شغلة عندي فضيتها ورجعت
طلعت ضحى من المطبخ كاملها ، وكف كبالها مسد على خدها ، فارس طلع من الغرفة وتركهم
شهم : حبيبتي تعبتي مو ؟
ابتسمت وباست بطن كفه الجان حاطها على خدها
ضحى : عادي التعب الوياك راحة بالنسبة الي
شهم : وكفتج هاي ما انساها ابد واعتذر اذا جنت فض وياج الصبح ، واني احبج هواي تدرين بية مو ؟
ضحى : ماكو داعي تعتذر
تقربت منه لزمت قميصه من صدره وحجت بدلال
ضحى : بس اذا تريد تثبتلي حبك صدك ، تعرف شنو اريد منك
نزل ايده منها وبعد ايدها عن صدره ، تنهد وكال
شهم : تعبان مو وقتها
ضحى : بس ترة هي زايدة بحياتنا على شنو امخليها على ذمتك بصفتها شنو ؟ اريد اعرف
شهم : شنو تريدين يعني ؟
ضحى : طلكها
شهم : ما اكدر اطلكها مطلكها مرتين قبل ، الثالثة تحرم علية
ضحى : واذا ما تحرمت عليك بصفتها شنو باقية على ذمتك ؟
شهم : بصفتها مرتي و ام بنتي واتصور حجينا هواي بهذا الموضوع وتعاركنا لحد ما ملينا
ضحى : انت مليت بس اني ما مليت
شهم : يعني بشنو ضارتج ؟ اريد افهم ، اشو حتى علاقة فراش ما بينا باقين على كد السؤال والجواب
ضحى : واذا عرفت صايرة بينكم علاقة ؟
باوع بعيونها آخذ نفس وكال
شهم : تعرفيني ما اتهدد ، والشي الثاني انه بيا حال وانتِ بشنو تفكرين ..
تركها وراح ليوسف ، دخل عنده لكاه نايم ، دنك باس راسه ورفع الغطا على صدره بعدها طلع جانت ضحى واكفة بالباب تنتظره باوعلها راد يتعداها لزمت ايده
ضحى : اسفة صحيح الوقت مو مناسب واني تماديت وياك بالكلام
شهم : زين من حسيتي
ضحى : تتريك ؟
شهم : ما مشتهي
تركها وراح لفارس اخذه وطلعوا من البيت صعدوا السيارة ...
فارس : خير وين رايحين ؟
ساقها ابتعد كم فرع عن البيت ، صف السيارة ، فتح الجكمجة طلع منها سجينة صغيرة باوع لفارس وكال
شهم : اشخط وجهي منا
اشرله على المكان ، فارس عقج حاجبه وكال
فارس : وليش تريد تشوه وجهك ؟
شهم : سويلي نفس الأثر الموجود بوجه يوسف
فارس : وليش يعني غير افتهم ؟
سحب نفس رجع راسه للكشن غمض عيونه بنفاذ صبر وكال
شهم : محتاج اداوم بمكانه كم يوم وما اريد ابقى لابس الكمامة وافتر بينهم..
فارس : وليش تداوم بمكانه ؟
التفت عليه وصاح
شهم : يعني هو تحقيق ؟
فارس : ما تجرح نفسك شكو جاي علية اذا ما تريد اتفهمني ؟
شهم : جان سويتها بس هذا المكان بيه شرايين وخايف ادوس زايد
فارس : تريد تقنعني اللي يشرح جثث ما يسطير وانه اللي على اساس اعرف خارطة وجهك اسيطر شلك بيها هاي
شهم : تسويها لو لا ؟
فارس : وليش ما انت تجرح نفسك ؟
شهم : ولك غبي افهم تعبان وايدي ترجف ما راح اسيطر ؟
فارس : وانه العندي گلب اجرح اخوي ما تعوفني لخاطر الله
شهم : وخر انه اسويها ما احتاجك
حرك المرايا وثبتها على جهة وجهه اللي يريد يرسم بيها الجرح فتح السجين وعقمها غمض عيونه ومشاها على وجهه ، نزل الدم يتدفق على وجناته من الجرح ،
فارس آخذ كلينكس وحطه على وجهه وصاح
فارس : مخبل وعلي ، اريدلي واحد صاحي بيكم ماكو
دفع ايده فارس عن وجهه وثبت ايده على الكلينكس الموجود فوك الجرح ، ورجع راسه على الكشن غمض عيونه دقايق وبعدها باوع بالمرايا مسح الجرح ولزك عليه شاش وبلاستر
فارس : اكو واحد صاحي يشوه وجهه ؟
شهم : اي انه
فارس : وليش هيج سويت ؟
شهم : لعيون اخوي كلشي اسوي
فارس : جنت تكدر تداوم بدون ما تأذي نفسك واصلاً ما راح يعرفوك هو انه ما افرق بينكم ومرات اشتبه بينك وبين يوسف تريد الغريب يركز وينتبه؟
شهم : خطيبته الغضب حافظة وجهه حفظ ، هي على الصوت دققت تريد ما تدقق على الجرح الموجود بوجهه
فارس : النوب علينا خطيبته
شهم : هاهي لعبة ودخلني بيها اخوك غصب عني ولازم اكملها واذا جنت اسوي اللي يريده مني علموده هسه اسويه انتقام أله حتى ارجع حقه واكشف لعبتهم القذرة
فارس : ترة انه مثل الأطرش بالزفة يعني اذا تتفضل علية وتحجيلي حتى افهم شنو كاعد يصير لأن راسي افتر اكون ممنون منك..
شهم : اخوك دخل بلعبة قذرة وية روس كبار
وحجاله كل القصة ، فارس بهت بقى صافن ما يعرف شنو يحجي
شهم : انصدمت مو ؟
فارس : يا انصدمت هاي احنا وين عايشين ؟ بربك كل اللي سواه علمود وحدة مخبلة
شهم : من راح تسأله يقنعك مثل ما قنعني
فارس : شلون بلة ؟
شهم : لأن السواه من باب مبدأ انساني ومهني وهاي اللي تكول عنها مخبلة هي اللي فتحت عيونه على ابواب جهنم
فارس : عمي نقنعه يترك المكان لو يبطل احسن من دوخة الراس هاي
شهم : عود اقنعه من يصحى...
فارس : وانت ليش مكمل وليش تجازف ، يعني من تداوم بمكانه اكيد لازم تنطي علاجات وتفتر على المرضى وانت ما تعرف بشغل يوسف ، ولهناك فجأة طب وتنكشفون
شهم : انه مكمل اريد اعرف منو سممه ومنو خلاه يوصل لهيج مرحلة من الأدمان مو لأجل عين واحد..
فارس : وليش ما تبلغ عليهم ؟
شهم : من اجمع ادلة ماراح اقصر
فارس : انه وياك شنو تحتاج بلغني حطني على يمناك
شهم : ما تقصر ابو الفوارس
فارس : هسه شنو نرجع للبيت لو وين ناوي تروح ؟
شهم : راح ارجع للمستشفى اكمل دوام يوسف وارجع للبيت
فارس : دير بالك
شهم : ان شاءالله ، اوصلك للبيت ؟
فارس : لا نزلني هنا انه ارجع مشي وانت توكل
شهم : عينك على يوسف واي شي يصير بلغني
فارس : تمام
نزل من السيارة وشهم انطلق للمستشفى ، صف سيارته ونزل منها دخل للبناية وبعدها راح لغرفة يوسف بقى كاعد بيها لنهاية الدوام ...
وقع وطلع ما صار اي شي وياه ، رجع للبيت ، آخذ الأكل وكل يوسف ونطاه علاجه ونام ...
لحد هاي اللحظة ماصار وياهم شي يخوف غير سالفة التقيء من الأكل ، اتصل بالدكتور وبلغه ، كاله هذا الشي طبيعي لأن معدته بعدها تعبانة وباجر بعد الدوام امر اشوفه...
للعصر كعد يوسف ، آخذله عصير ودخل للغرفة كعده وسند ظهره على الوسائد وبدأ يشربه ..
يوسف : لشوكت تبقون تعاملوني معاملة المريض ؟
شهم : لحد ما تتحسن حالتك
يوسف : هو شنو عندي بالضبط ؟
باوعله شهم تنهد وكال
شهم : تعرضت لحالة تسمم ، آخر اتصال وياية تتذكر شنو صار وياك ؟
يوسف : اي حسب ما اتذكر تعبت فجأة وتقيأت بس جنت احس ألم يموت بمعدتي وراها فقدت الاحساس بكلشي
شهم : اللي صار غبت عن الوعي وانه جبتلك اسعاف ونقلتك للمستشفى
يوسف : كم يوم صارلي على هاي الحالة ؟
شهم : هسه احنا باليوم الرابع
يوسف : تحجي صدك ؟
شهم : اي
يوسف : ودوامي شلون ؟ ضروري باجر اداوم
شهم : رحت اليوم داومت ابدالك وقدمتلك اجازة بين ما تصير زين
يوسف : اجازة شنو ما اريد آخذها عندي مرضى محتاجيني
شهم : ما تكدر تداوم وانت بهذا الحال
يوسف : لا اداوم مابية شي
شهم : هسه عوفلي نفسك واعتمد علية اللي تريده يصير بس ارتاح
سكت ، سحب نفس بعدها التفت لشهم وكال
يوسف : شنو صار وياك بالدوام ؟
حجاله من اول ما دخل و وية منو حجى وبشنو دار الحديث بينهم الى ان طلع من المستشفى ، بس ما حجاله عن سالفة العلاج والمي اللي اخذهم للمختبر ..
يوسف : وما شفتها لريحانة ؟
شهم : لا لأن ما اعرف انتم شنو حاجين و شنو صار بينكم
سولفله التفاصيل اللي صارت ، صفن عليه شهم بعدها كال
شهم : بس الحركة هاي مقصودة
يوسف : اكيد لو ما مقصودة ليش يحذفون تسجيل الكاميرات لمدة ساعتين
شهم : مممممم وشنو مطلوب مني اسوي ؟
يوسف : لا تسوي شي انه باجر رايحلها
شهم : عوف عنك العناد وخليني انه اتصرف
يوسف : اكيد لا انه اريد اروحلها وافهمها اللي صار واكعد كبالها اشرحلها لحد ما تقتنع
شهم : ان شاءالله تتحسن منا لباجر وآخذك الها وانتظرك اباب المستشفى لحدما تكمل وياها هيج زين ؟
هز راسه ساكت ، وراها رجع نام ، طلع شهم كعد وية ضحى وفارس تعشوا وشربوا جاي بعدها ضحى فاتت للغرفة تنام ، وشهم وفارس مددوا على القنفات بالأستقبال ، شهم بيده جدول الأدوية يقرأ بيه ويأشر بالقلم على الفقرات الخاصة بعلاجه لليوم الثاني ..
فارس : اليوم بديت وياه بعلاج الانسحاب ؟
شهم : اي
فارس : شنو صار من نطيته العلاج ؟
شهم : بالبداية جسمه صار مشدود وانفاسه بدأت تهدأ ، دكات گلبه شبه انتظمت من قستها ، والرجفة خفت نوعاً ما بعدها حس بالنعاس بعدها مددته وتركته ينام وما اعرف همس بكلمات متقطعه كال ، حسيت الهوسة اللي براسي خفت وراها غمض عيونه ونام..
فارس : بلكت يرتاح
شهم : ان شاءالله
بقوا كاعدين للساعة 1:40 دقيقة بعد منتصف الليل
البيت هدوء ، الاضوية مطفية ، والكل حاول ينام ، شهم ما كدر يغمض عيونه باله يم يوسف خصوصاً هاي الليلة تعتبر الأهم بالنسبة أله لأن بداية العلاج..
كام من مكانه فتح باب الغرفة بهدوء ودخل ، ضوء التيبلام عاكس ملامح يوسف التعبانة ..
متمدد على السرير مغمض عيونه ، جسمه مشدود عرفه من قبضة ايده جان مكورها والإيد الثانية فوك بطنه ، سحب الكرسي كعد كباله يراقبه ، شوية شوية إيده بدت تشد على الفراش ويغمض عيونه بقوة ، تقرب من اذنه وهمس
شهم : يوسف تحس بألم ؟
فتح عيونه انفاسه بدأت تتسارع ، همس بتعب
يوسف : دا احس بشي غريب ياكل بجسمي
شهم : ألم ؟
يوسف : لا احس اكو فراغ بداخلي ينهش بية
فجأة سكت و باوع لجهة الشباك ، عكد حاجبه اشر بأصبعه وكال
يوسف : منو واكف هنا ؟
التفت شهم وين ما أشر عباله فارس بالغرفة ، رجع باوعله وكال
شهم : ماكو غيرنا انه وياك
يوسف : لا هسه جان واحد واكف كبال الشباك يباوعلي..
سكت شهم بلع ريكه والتفت ناحية الشباك ماكو غير الاشجار تتحرك ...رجعله وكال
شهم : هذا ظل الشجر ماكو شي ؟
ابتسم يوسف بتعب وهمس
يوسف : ترة بعدني ما اتخبلت ، متأكد شفت واحد واكف يباوعلي مستحيل اتخيل ..
شهم وكف محتار ، طلع موبايله دز رسالة لفارس كتبله بيها
شهم : اطلع برا للحديقة شوف اذا اكو احد دخل للبيت
فارس : منو يعني ؟
شهم : ما اعرف يوسف شاف واحد يباوعله من شباك الغرفة
فارس : تمام هسه اطلع اشوف
رجع موبايله لجيبه ورجع كعد كبال يوسف يراقب حركاته
شهم : شنو دا اتحس ؟
يوسف : راسي فارغ
لزم راسه بإيده وهمس
يوسف : احس اكو شي غلط دايصير وياي
شهم : هذا طبيعي من أثر العلاج
هز راسه بالنفي وهمس
يوسف : لا مو سالفة علاج
زادت رجفة إيده ، خلال ربع ساعة طلب منه يكعده ، ساعده ، نزل رجليه بالكاع وكعد بصفه يسنده
يوسف : اريد امشي
شهم : يلة
سنده وكام وكف بس ظهره محني
يوسف : اتركني وحدي
شهم : اخاف توكع ؟
يوسف : لا اريد اعتمد على نفسي
تركه يمشي بس خطواته ما منتظمة ، مرة يمشي سريع ومرة يتعب ورجله ما تعينه ، التفت لشهم وكال
يوسف : احس جلدي مو إلي
شهم : شلون يعني ؟
يوسف : ما اعرف احس اريد اطلع من جسمي دا تفتهم شنو اقصد ؟
صفن عليه شهم ما يعرف شنو يجاوبه
شهم : ركز وياي واوصفلي الحالة
وكف فجأة لزم صدره ودنك..
شهم : شنو يوجعك ؟
يوسف : گلبي دا يدك بسرعة
شهم : تعال اكعد ارتاح موزين عليك الحركة الزايدة موزين
وكف باوعله لشهم وكال
يوسف : اللي دايصير بية مو سالفة تسمم وبس
شهم : لعد ؟
يوسف : اعراض ادمان هاي انه اعرفها
بهت شهم وبقى يباوعله ما يعرف شنو يحجي وياه ، بعد دكتور واعرف بهاي الحالات منه ومايكدر يكذب عليه بحالته وقرر يحجيله كلشي بس بالوقت المناسب ...
شهم : لا طبيعي جسمك بعده تعبان
يوسف : لا مو طبيعي الدايصير وياي شايفة بهواي مرضى ومعالجهم بيدي
بعدها صاح
يوسف : شهم مدا اكدر اتنفس شهم الحك..
راحله لزم وجهه مخبوص وكال
شهم : آخذ نفس عميق
يوسف : ما اكدر اختنكت
شهم : شبيك يمعود شنو دايصير وياك ؟
يوسف : راح اموت
تركه وراح لضحى كعدها من نومها واجت وياه للغرفة تساعده لزم يوسف وهو يوجهها ..
شهم : بسرعة انطيه مهدئ خفيف
وكع يوسف منه على الكاع ولزم بطنه يتلوى ، رجفة قوية وتعرق غزير والوجه شاحب لونه ...
ضحى جابت الإبرة وكالت
ضحى : ثبته حتى اضربه الإبرة
ثبته ويوسف يصيح
يوسف : لا تضربوني شي انه ما احتاج اكدر اساعد نفسي ، دا تأذوني انتم بدون ما تدرون
شهم : ساعدنا ياعيني
ثبته ، مقاومته خفت ، ضربته الإبرة ، ثواني ونفسه صار اهدأ ، مدد على الكاع عيونه مفتوحة يباوع للسكف ، دموعه نزلت بهدوء ، دنك شهم حضنه واكتافه تهتز
يوسف : ليش هيج صار بية ؟ ليش ؟
شهم مسح دموعه وحجى بصوت مبحوح
شهم : لأن جسمك دا يرجع طبيعي
يوسف : شهم
شهم : حبيبي عيوني اسمعك
يوسف : تعبان
شهم : اعرف والله بس شبيدي عليك ما تكولي شبيدي ياربي دخيلك..
سنده بعد ما ارتاح شوية ووصله للسرير نيمه وغطاه
شهم : تكدر تاخذ نفس طبيعي ؟
يوسف : شوية احسن بس اكو ثكل بصدري
شهم : هسه شوية وترتاح ..
غمض عيونه ، شهم التفت لضحى وطلب منها تظل عنده وهو طلع خارج الغرفة اتصل بفارس
شهم : شنو صار وياك ؟ لكيت احد ؟
فارس : من كلتلي طلعت للحديقة ماكو احد والكراج فارغ
شهم : الظاهر يبدأ يهلوس
فارس : يمكن
شهم : وين انت ؟
فارس : رحت للأسواق اجيب كم شغلة واجي
شهم : تمام لا تتأخر
فارس : شعندي متأخر بس احاسب وارجع
شهم : تمام انتظرك
فارس : باي
سده منه حاسب الرجال وطلع من الأسواق متوجه للبيت ، وصل للفرع البيه البيت ...
انارة الشارع ضعيفة وحركة الناس خفيفة ، مشى بأتجاه البيت وكلما يتقرب اكثر كلما تتوضح عنده الصورة ، وكف بمكانه يحاول يركز ويتأكد من اللي شافه ..
شخص ضخم واكف كبال البيت لابس ملابس بلون غامق ورافع كاب البلوز مغطي راسه ، ركز وياه اكثر واكف بمكانه ويباوع على بيت يوسف ، ما تحرك ابد وعلى صفحة واكفة سيارة مشتغلة مبين منتظرته ، مشى فارس سريع وصل قريب منه وصاح بصوت عالي
فارس : لك شعندك هنا ؟
