رواية الوجه الاخر للرحمة الفصل الخامس والعشرون بقلم عبير إدريس
فارس ركض عليه ، وهذاك بدون ما يلتفت مشى خطوات سريعة للسيارة ، وكف يم الباب ناطيه ظهره ....
فارس وصل للسيارة واحد من الكاعدين بداخلها وجه سلاح بوجهه خلاه تراجع خطوتين ليورا ، والشخص اللي جان واكف كبال البيت صعد براحتة للسيارة ثواني وانطلقوا بسرعة تاركين وراهم اثر التراب بالمكان ...
وكف صافن مصدوم يتسائل منو هذولة وشنو رايدين ؟ واكيد متقصدين يوسف ..
مشى للبيت فتح الباب ودخل لكى شهم منتظره بالأستقبال باوعله وكال
شهم : شبيك ؟ ليش وجهك مخطوف ؟
فارس : ما اعرف شكولك
كامله وعكد حاجبه
شهم : احجي شكو ؟
فارس : الظاهر الشخص اللي شافه يوسف يم شباك الحديقة صحيح و ما جان يتخيل حسب ما كلت
شهم : شلون يعني ؟ انت مو كلت ماجان احد موجود من طلعت ؟
فارس : اي دورت كلش زين الحديقة فارغة والكراج فارغ بس من رحت للأسواق تأخرت شوية بعدها رجعت اتمشى واشوفلك واحد واكف كبال البيت بالظلمة ، واكو سيارة منتظرته ، صحت عليه كلتله شعندك هنا ، ما التفت سرعت خطواتي دار ظهره ومشى للسيارة لحكته ، جانوا بيها اكثر من واحد ، واللي كاعد يسوق رفع مسدس علية وانه تراجعت ليورا ، واللي جان واكف كبال البيت صعد بالسيارة وحركوا ..
شهم : شفت شكلهم ؟ رقم السيارة ؟
فارس : لا ما شفتهم زين لأن الشارع اظلم والسيارة مشت سريع وكبت العجاجة ما لحكت اشوف رقمها
صفن شهم يفكر ، فارس تقرب منه وكال
فارس : تتوقعهم جايين على يوسف ؟
شهم : مو اتوقع اكيد
فارس : وشنو يريدون منه ؟
شهم : اكيد من شافوني داومت عبالهم يوسف صحى وكام منها كلولك هذا سممناه وما فاد ، نخلص عليه اسهل
فارس : يمكن عبالهم وحده بالبيت ؟
شهم : اتوقع جايين يشوفون كم واحد وياه بالبيت حتى يحسبون حساب لجيتهم مرة ثانية
فارس : يعني الهم رجعة ثانية ؟
شهم : اكيد
فارس : وبرأيك شنو نسوي ؟
شهم : نترك البيت
فارس : اي افضل نطلع منه انه هم هيج فكرت
شهم : كوم ساعدني ننقل الاشياء الضرورية بسيارتي وناخذ كم حاجة بسيارتك ونطلع يوسف منا
فارس : هسه ؟ ليش ما تخليها باجر ؟
شهم : احتمال يرجعون بأي وقت ما اريد اجازف
فارس : يلة نتوكل ؟
شهم : اي
كاموا على السريع جمعوا الأغراض الخاصة بيوسف من علاجات وملابس وشغلاته المهمة من اوراق وغيرها حطوهن بسيارة شهم ، كعدوا ضحى من النوم وبلغها شهم باللي صار تفاجأت بس ما حجت لمت اغراضهم ، سندوا يوسف وطلعوا بيه صعدوه للسيارة حطوه على الكشن بوضعية النوم ، وضحى صعدت ورا ، رجع للبيت قفل الابواب الداخلية وطلع السيارة بعدها صعد بسيارة يوسف دخلها للكراج ، ونزل قفل الباب ومشى لسيارة فارس ...
شهم : راح احرك وانت ابقى راقب الوضع اذا ما شفت سيارة تحركت وراية ، خابرني واكولك وين نتلاكه
فارس : متفقين اتوكل بالله
رجع شهم لسيارته صعد بيها وحرك مشى بالسيارة ويباوع بالمرايات الجانبية ما جانت اي سيارة تتبعه ، اتصل بفارس ...
شهم : الوضع تمام مو ؟
فارس : اي ماكو اي سيارة حركت وراك
شهم : خليني ابتعد شوية والحكني
فارس : صار
شهم : دير بالك على نفسك حبيبي
فارس : لا تخاف علية الأمان بالله
مشى بالسيارة ابتعد عن بيت يوسف مسافة واتصل بفارس حتى يحرك
شهم : يلة تعال انه واكفلك على الشارع العام
فارس : دزلي موقعك لو اروح للبيت كبل ؟
شهم : لا راح ادزلك الموقع حتى نروح سوا
فارس : تمام
حرك فارس ومشى بالسيارة طلع من الفرع لاحظ سيارة تتبعه رجع اتصل بشهم
فارس : الشهم هاي سيارة وراية
شهم : تحجي صدك ؟
فارس : اي والله
شهم : شلون هسه ؟
فارس : روح انت للبيت وانه راح اتيههم اذا جانوا فعلاً متقصديني
شهم : وشلون اعوفك وحدك؟
فارس : اكيد ما رايديني رايدين اخوك
شهم : وشنو راح تسوي ؟
فارس : افرهم بغداد خاف ضايجين
شهم : انت بعدك تمشي لو وكفت ؟
فارس : لا دا اسوق
شهم : بعدهم وراك ؟
فارس : اي
شهم : نفسها السيارة ؟
فارس : اتوقع هي نفسها
شهم : معناها عرفوا بينا طلعنه يوسف من البيت ؟
فارس : شلون عرفوا وانت دخلت السيارة للكراج يلة صعدته بيها
شهم : اكيد شافوني من اجيتك للسيارة واحجي وياك
فارس : اي عبالهم يوسف طلع بسيارته ما اتوقع انتبهوا عليك بس شعجب ما لحكوك ولحكوني ؟
شهم : يعرفون يوسف نبه لهيج شغلات لهذا ما تبعوني
فارس : قصدك يعني انه غبي وممكن ما انتبه عليهم مو ؟ خلف الله عليك
شهم : مو هيج القصد يمعود ، المهم انه توجهت للبيت وانت حاول تضيعهم واذا ما كدرت لا توصل للبيت ابد ابقى بمكان بيه ناس بين ما أأمن على يوسف وضحى واجيك
فارس : لا تخاطر بنفسك وتجي انه ادبر نفسي هالمرة يصكوك ويبقى يوسف الاصلي ويطلعلهم من جديد يصير فلم هندي مو حياة
ضحك شهم وكال
شهم : يلة يا بطل دير بالك على نفسك وابقى وياية لا تسد الخط
فارس : تمام
شغل اغاني صعد الصوت وداسلها مشى سريع والسيارة تتبعه من فرع لفرع ومن شارع عام لشارع ثاني الى ان وصل لكهوة جانت مفتحة صف سيارته ونزل كعد بيها بلغ شهم وسد الخط ، نزل نركيلة وطلب من ابو الكهوة يبدل الاغنية ...
_ شنو حابب تسمع ؟
باوعله مبتسم تنهد وكال
فارس : اريد اسلطن
_ انطيني اسم اغنية اشغلها الك
فارس : ممممممم هل رأى الحب سكارى مثلنا ؟
كم بنينا من خيال حولنا
ومشينا في طريق مقمر
وضحكنا ضحك طفلين معاً
وعدونا فسبقنا ظلنا
_ حرام اذا فهمت شي هسه شنو اكتب بالبحث ؟
فارس : اغنية الأطلال للست ام كلثوم اكو واحد ما يعرفها وسفة عليك..
_ ما سامعها ويني وين ام كلثوم
طلع فلوس من جيبه وحطهن بيده
فارس : هاك هاي بخشيش
ضحك الولد آخذهم منه وراح شغل الأغنية ..
تربع على الكرويت يسحب نفس ويسلطن على انغامها ويدندن وياها نسى شهم ، ونسى موبايله ، جان يدك وما منتبه صوت الاغنية عالي ...
شهم نزل يوسف للبيت نيمه ورجع للسيارة نقل اغراضه وطلب من ضحى تبقى عنده ...
طلع للشارع يتصل بفارس مايرد، رجع للبيت فات لضحى وجهه مخطوف ..
ضحى : خير شبيك ؟
شهم : رايح اشوف فارس
ضحى : ليش شنو صار ؟
شهم : ما اعرف آخر شي فات لكهوة وسدينا الاتصال وهسه اتصل عليه ما يرد
ضحى : معقولة اذوه ؟
شهم : ما ادري اكيد صاير وياه شي والإ ليش ما يرد على اتصالاتي ؟
ضحى : والله حيرة المهم دير بالك على نفسك وطمني لا تخلي بالي
شهم : ان شاءالله عينج على يوسف ما اتأخر
ضحى : تمام بس طمني عنك شهم اكيد
شهم : تمام تمام
طلع من البيت صعد سيارته وهو يتصل بفارس
فارس : يا بابا ليش تلعب بأشياء مو الك دكعد ، مممم نسيت اغيرلك حفاظتك ، تعال وياي للسيارة نغيرها ونرجع نكمل نركيلتنا ، تنركل لو بعدك صغير كتكوت
شال القرد ويضحك وياه ، باوع لأبو الكهوة اشرله ييجي
فارس : بس عدل الفحم بين ما اجي
_ صار
آخذه وطلع بيه للسيارة ، باوع منا ومنا ماكو آثر للسيارة الجانت تتبعه ، فتح الباب غيرله الحفاظة بهاي الاثناء دك موبايله باوع شهم ، آخذ القرد شاله ، قفل باب السيارة ورد على شهم
فارس : ها شهم ؟
شهم : وينك ابن ال .........ما تكولي موبايلك وين حاطة ؟
فارس : ابجيبي وصوت الأغاني عالي ما سمعته
شهم : هسه انت وين ؟
فارس : بعدني بالكهوة مو كلتلك ؟
شهم : عبالي صايرلك شي نعله على
فارس : شبيك مو كلتلك نازل للكهوة وبيها هواي شباب ، ما يكدرون يسوولي شي بعد شكو ، وهسه جنت برا ما شفت سيارتهم
شهم : شوكت ترجع ؟
فارس : بعد خليني امللهم يلة ارجع
شهم : اجيك ؟
فارس : لا ابقى يمهم بالبيت انه ادبر روحي واذا بقوا لاحكيني ما اجي اليوم احتمال اطلع بوجهي للقرية
شهم : وين راجع محتاجك
فارس : اقدم الاسئلة وآخذ اجازة واجيك ما اتأخر
شهم : بس طمني لا تغفل عن موبايلك وتخبلني مثل قبل شوية
فارس : اطمنك لا يظل بالك
شهم : محروس بالله حبيبي
فارس : وانت هم صديقي
بعدها رجع شهم للبيت وبات الليلة عند يوسف ، ورا ساعة تقريباً رجعتله نوبة القلق مرة ثانية بس عرف شهم شلون يتدارك الموضوع ...
صار الفجر طلع من الغرفة واتصل بفارس ، جاوبه
شهم : ها ابو الفوارس وينك ؟
فارس : ما بقى شي واوصل للبيت
شهم : والسيارة الجانت تراقبك ؟
فارس : طلعت من الكهوة ما لكيتها بس شنو دستلها بانزين وطرت حتى مصيول خاف لطش بالكشن فد لطشة
شهم : اهم شي مصيول عينك عليه
فارس : اي شلون لعد
شهم : ترجع اليوم مو؟
فارس : اي بس اروح للمدرسة واشوف شكو ماكو واجيكم ان شاءالله العصر انه عندك
شهم : خوش
فارس : شنو راح تسوي اليوم ؟
شهم : باقي بالبيت ما اكدر اعوف يوسف وضحى وحدهم من انت ترجع اكمل البديته
فارس : ان شاءالله الله يسهل
شهم : ان شاءالله
فارس : انه وصلت افوت اسبح واطلع للمدرسة
شهم : يلة ماشي حبيبي الله وياك
سده منه وصف السيارة بالكراج شال مصيول ونزل باوع للكشن الورا اغراض يوسف وياه باقيات ما نزلهن ، سد الباب ومشى للبيت ، تلكته طيبة
طيبة : فارس وينك ابوي گلب الدنيا علينا
فارس : اشوفكم اتصلتوا سألتوا علية
طيبة : نقالي مخلص رصيده ونت ما عندنا شلون اتصل ؟
فارس : من ارجع من المدرسة ذكريني اجيبلج رصيد
حجاها وكرض خدها..
طيبة : ان شاءالله ، اسويلك ريوك ؟
فارس : اي والله ميت جوع
طيبة : يلة هسه اسوي ، صاعدة احضرلك ملابس
فارس : افديج بروحي انه يبعد اخوج وهروش گلبه
آخذ مصيول للحمام سبحه وطلعه بدون ما يلبسه ، وهو فات يسبح طلع سمع صوت جدته تصيح بالهول ، وكف اباب الهول يعاين عليها وينشف بشعره بالمنشفة
صدمة : ولج طيبة هذا القرد شامط على روحه وراح ينچس البيت
فارس راحله شاله ودنك على راس بيبيته باسها جانت متمددة عاينتله وكالت ...
صدمة : طكه للجلب هذا وعلمه ما ينچس بكل مكان
فارس : لا جدة الفرخ ما ينطك حرام
صدمة : يا فرخ ولك داكولك على هذا ابو سنون ابو كشرة
فارس : اي فريخي هذا انه ابوه معناها ابني وابني ما اربيه على الطك من هو وصغير...
صدمة : فدوة لأسم الرضا شلون شور بيك وخلاك مسودن
فارس : ياهو هذا التسودن ؟
صدمة : انت
فارس : صدك عود تحجين جدة ؟
صدمة : وعلي ابو الحسن تسودنت انت ولو ناخذك نشدك بشباج شريفة بنت الحسن سلام الله عليها هم ما تعقل بعد وما منك جارة وان شاءالله رايحتلها وادعي هناك كون ما يعقلك وتبقى مسودن بنص عقل..
فارس : ليش هيج تدعين عليّ وانه ادعيلج بكل صلاة واكول ربي يحفظها من الحريچ والغريچ وكطاع الطريچ وانتِ ترديني اتسودن ؟
صدمة : دخذه آخذه غسله شماطة نجس البيت بقذارته
آخذه للحمام غسله من جديد وطلع لبسه حفاظة وتراك مال اطفال ، فات للهول كعده كباله يمشطله فاتت طيبة بصينية الريوك حطتها كبال فارس ، عاينتلها صدمة وكالت
صدمة : جدة هذا الفراش كله يحتاجله غسل ابن المسودن نچسه
عاينت للمكان مصدومة و عاينت لفارس اعاتبه
طيبة : صدك فارس ؟
صدمة : شمط هنا على الفچة
طيبة : ليش فارس تركته بدون حفاظة يعني والله تعبت من الشغل وكله براسي ليش هيج ؟
فارس جان يمشط لمصيول عاينلي وكال
فارس : تصدكين بيها ؟ شوفي المكان نظيف صدك سواها على نفسه بس ما نزلت على الفراش
صدمة : جذاب انه شفته يفتر بشماطة على الفراش
طيبة : مو نصلي هنا صدك جذب
عاينلي وكال
فارس : هاي جدتي جذبها جوا باطها تسلت وتذب على العالم لا تصدكيها
صدمة : شيكول هذا ما سمعته ؟
طيبة : ماكال شي ، تريك تريك وانه انظف وراكم امري لله
فارس : مو راح اجيبلج رصيد مو بعينج ؟
طيبة : شسوي بيه ماريده لا تجيب
فارس : زعلتي ؟ جدتي تفرق بينا ؟ ها طماطة
طيبة : انت خليت بيها طماطة مو بزعتوني بعيشتي..
زعلت وطلعت من الهول من صدك تعبت ومحد حاسس بية النوب علية مصيول قهر جديد طلعلي ، فات ابوي من الحصاد تعبان عاين لفارس وكام يصيح
عبد الملك : وين جنت ؟ شايل هالقرد وتفتر بية ما تكول عندي اب ام يظل بالهم علية ؟
فارس : اشوفكم خابرتوني سألتوا
عبد الملك : ياهو الينطي خبر كبل لا يسج مو المفروض انت ؟
كامله فارس باس راسه وحضنه
فارس : بوية حقك علية ما تنعاد ان شاءالله
صدمة : لا تچيسه هذا نجس
فارس : جدة خليج محضر خير ولا تضوجيني منج من صباحيات الله
عبد الملك : يابه هذا القرد شوفله صرفة مو صح يبقى ويانا بنفس المكان
فارس : زوجوني وابيعه
عبد الملك : خوش والله
فارس : اي شسويلكم لا راضين اسوي الاريده ولا راضين تزوجوني
عبد الملك : يابة طيبة استكان جاي راسي راح يطك
فارس : سلامتك
طيبة : صار يابة هسه اجيبلك
بعدها فارس طلع من البيت للمدرسة ، اتفق وية مدرس الكيمياء للصفوف الثانية حتى يمتحن طلابه ، وراح للمدير قدم اجازته ، صار رفض لأن وقت امتحانات بس فارس شوفه تقرير يوسف وكاله ماعنده احد غيري يهتم بيه بهاي الفترة واكو مدرس راح يسد بمكانه ..
وافق ينطينه اجازة بس بشرط يرجع يكمل تصحيح الدفاتر ، آخذها فارس ورجع لبغداد بعد ما بلغ اهله بروحته عند شهم كم يوم حتى يغير جو ...
وصل جانت الدنيا عصر ، دك الباب فتحتله ضحى فات سلم عليها ردتله السلام قبل لا يدخل جوا صاحته تحجي وياه
ضحى : فارس الله عليك احجيلي شهم متعارك ؟
فارس : لا ليش ؟
ضحى : شبيه وجهه ؟
فارس : شبيه ؟
ضحى : مجروح بخده من الطول للطول
ضرب على كصته وكال
فارس : اي نسيت اسأله ، انتِ سألتيه شكالج ؟
ضحى : دافنيها سوا مو فارس ؟
فارس : لا يابة شنو السالفة ، هسه افوت واسأله كدامج
ضحى : بس هو يكول انت جرحته من غير قصد
فارس : هو هيج كال ؟
ضحى : اي
فارس : ها يمكن ما ادري
ضحى : شنو يمكن ما ادري فارس دا تكذب ؟
فارس : مرت اخوي صايرة محقق ؟ كدرتلج على الفقير ؟
عافها ودخل جوا صاح لشهم بصوت عالي
فارس : ابو فطم انه اجيت
طلع من غرفة يوسف يأشرله ينصي صوته ، سد الباب ومشى إله
شهم : اسكت شبيك نسيت اكو مريض نايم جوا
تقرب فارس منه يهمس
فارس : شكايل لضحى عن الجرح كعدت تحقق وياي واحنا ما اتفقنا على جذبة نحجيها
شهم : حجيتلها شي ؟
فارس : لا بس اتوقع لصتها
شهم : ما عليك انه احاجيها
تقربت ضحى منهم وكتفت ايدها لصدرها تباوعلهم
شهم : ها دكتورة خير ؟
ضحى : اسلوب اللف والدوران ما يمشي وياية احجولي شنو مسوين ؟
شهم : كلتلج الصار بعد ليش الملحة
ضحى : ما فاتت بعقلي السالفة ابد
شهم : مافتت بعقلج ؟ زين شنو عبالج مسوي؟
ضحى : ماكو غير متعارك
شهم : واذا متعارك جاهل كدامج ؟
ضحى : ويامن تعاركت ؟ وية اعداء اخوك مو ؟
شهم : كلتلج ياحبيبتي انضربت بحافة الحديد ما شفتها همزين ما طيرت عيني
فارس باوعلهم وكال
فارس : همزين يعني مو انه جرحتك من غير قصد ، هيج يا زوجة اخي تريدين تذبيها براسي ؟ كدرتج على الفقير ؟ اخ اخ ياحظك يفارس حتى وي ضحى ما كعد
شهم باوع لضحى هز راسه ما راضي على تصرفها ، تركهم ودخل ليوسف لكاه كايم من فراشه واكف بوسط الغرفة ويسولف وية نفسه وكف وراه يسمع بدون ما يسوي صوت
يوسف : اي لأن اكو تلاعب
عيونه تروح لزاوية الغرفة ويكمل كلامه
يوسف : انت موجود من البداية لا تنكر
رجع التفت للجهة الثانية وصاح بصوت
يوسف : كافي انتو دا تصدكوه وتجذبوني ؟
عن يا ادلة تحجون ؟ دا اكوللكم مزورة كلها مزورة
تقرير طبي باسمي مستحيل انه اللي سويت بيهم تقرير
يحجي ويمسح العرق عن وجهه ، وشهم واكف يباوعله دموعه تنزل ويمسحها وترجع تغرك وجهه من جديد
يوسف : اي هو دا يكولي راح يخلوك تصدك ، والمشكلة دايحجي وياي انه اشوفه انتم ما تشوفوه واكف هناك معقولة ؟
سكت لحظة يباوع لإيده يگلب بيها بعدين كال
يوسف : انه مو حقيقي ؟ انه ؟ هياتني واكف كبالكم ودا احجي طبيعي بس انتم رافضين تسمعوني ، عليش أأذيها انه احبها واحبها بجنون صدكوني أأذي نفسي وما أأذيها
شهم تركه وطلع من الغرفة راح لفارس حضنه بقوة ويبجي ، فارس رفع ايده وحضنه مستغرب همس بصوت هادئ
فارس : شبيك يمعود يوسف بيه شي ؟ لا تخبلني
شهم استمر بالبجي ، بعدها وخر من حضنه باوعله وكال
شهم : فوت يمه بس لا تحاجيه راقبه بين ما اتصل بالدكتور واسأله عن شغلة
فارس يباوعله باهت هز راسه وراح لغرفة يوسف ، شهم مسح دموعه وطلع موبايله اتصل على الدكتور وحجاله الحالة اللي شافها وشلون يوسف يحجي وية نفسه كأنما يحاجي مجموعة من الناس
_ بحالة دكتور يوسف ممكن تصير وياه هلوسة +حجي وية نفسه ، خصوصاً هسه هو بحالة انسحاب من مهدئات بمعنى مواد مخدرة الشغلة مو سهلة ابد..
شهم : دكتور حاشاه بس صعبة علية احجيها اخ ياربي اخ ، حسيت يعني اخوية اتخبل رسمي
_ لا لا تخاف هاي الحالة طبيعي تشوفها ليش كلتلك علاجه صعب يكون بالبيت ، ويحتاجله ناس مختصين لأن يكونون متعودين على هيج حالات ويعرفون شلون يتصرفون وياها وما ينصدمون بيها مثلك
شهم : طيب دكتور تكدر تشرحلي اكثر او شنو ممكن يصير بعد غير الحالة اللي شفتها قبل شوية حتى اعرف اتعامل وياه..
_ هسه هو بحالة هلوسة (يشوف اشخاص ما موجودين ويحجي وياهم طبيعي مثل المشهد اللي شفته هسه ، مرات يحس اكو احد يراقبه ، بس هو ماكو احد مجرد يشوف ظلال او حركات سريعة منكم وانتم تمشون يفسرها شي ثاني
شهم : شلون يعني يفسرها ؟
_ يعني يعتبرها اذية لان راح يشك بكلشي
شهم : وسالفة الحجي هاي ليش تصير وياه يعني حسسني فعلاً دايحجي وية ناس موجودين عنده..
_ الحجي وية نفسه وارد مرات ممكن تشوفه يحجي بصوت ناصي بدون ما تحس عليه ومرات يحجي بصوت عالي هنا دايجاوب على أصوات براسه ، يصير كأنما حوار ، هاي شغلات بعقله يفكر بيها دائماً وباقية بدون اجابة لهذا يكوم هو يجاوب حتى عقله ما يتعب اكثر بالتفكير ...سالفة العلاج طويلة وتفرعاتها اكثر ليش كلتلك انت ما راح تكدر تعالجه وحدك
شهم : لا ان شاءالله اكدر بس سؤال دكتور ليش هيج يصير وياه بعد ما تسمم ؟ اخوية جان انسان طبيعي ويحجي وياية بكل عقلانية ويداوم ويعالج مرضى يعني فجأة يتحول لشخص عاجز ويحجي وية نفسه والله ما اكدر اصدك واتقبل هذا الشي
_ دكتور انت اعرف من غيرك بالعلاجات البيها مواد مخدرة شلون تدمر الانسان خصوصاً جهازه العصبي وعقله ، الدماغ يكون متعود على مادة معينة وفجأة تنقطع عنه فيصير خلل باﻹدراك والتفكير
شهم : بس هاي اول مرة تصير وياه بعد ما طلعته من المستشفى ..
_ اي لأن بلشت وياه بمرحلة سحب المواد من جسمه
شهم : ويستمر يحاجي نفسه يعني طيلة فترة العلاج ؟
_ مو طول الوقت بس تجيه على شكل نوبات ، تروح وترجع ، احياناً يكون واعي ويحجي وياك طبيعي واحياناً يستغرب حتى من نفسه ...
شهم : صار معلوم
_ اي شي تحتاج اتصل واني ما اقصر بأي معلومة او مساعدة تحتاجها
شهم : تمام دكتور آخذت من وقتك هواي
_ لا حبيبي تدلل انت بأي وقت واليوم باليل امر عليه اشوفه ان شاءالله
شهم : هلة بيك دكتور بالانتظار ممنون منك ..
_ حبيبي انت بس اكو شغلة اريد انبهك عليها قبل لل اروح من تشوفه يحجي وية نفسه مرة ثانية حاول تقطع سلسلة افكاره واسأله عنها او احجي وياه بأي موضوع حاول ترجعه للواقع حتى ما يتعب
شهم : ها هيج
_ اي
شهم : صار دكتور انتظرك اليوم
_ مع السلامة
شهم : الله وياك
سده منه وراح لغرفة يوسف دخل لكاه متمدد وصافن بالجهة البعيدة ، فارس واكف يباوعله فاتح عيونه وحلكه باهت ...
يوسف : كلتلك لا لا تسويها
فارس جامد بمكانه راحله شهم سحبه بهدوء وكعدوا على القنفة يراقبوه بدون ما يحس عليهم ، فارس همس وعيونه على يوسف
فارس : ويامن يحجي ؟
شهم : وية نفسه
سكتوا من يوسف حجى
يوسف : هسه انت ليش ترجع كل مرة انه شنو كلتلك ؟ ها ؟ كلتلك لا تتقرب مني ترة صبري بدأ ينفذ
فارس ضرب على رجله بقوة وعض اصابعه حتى ما يطلع صوت
يوسف : مو كلتلك لا ، خلص انهي الحوار بعدني تعبان ، لا تتقرب لا تتقرب كلت
فجأة التفت لناحيتهم على الصوت السواه فارس وين ما جانوا كاعدين ، باوعلهم وصاح
يوسف : هاي شكو شبيكم ؟
شهم : ويامن جنت تحجي ؟
حك ركبته وجاوبه
يوسف : ما دا احجي
شهم : بس انه سمعتك تحجي احد مضوجك ؟
يوسف : لا
كام وكعد كباله باوعله سحب نفس وحجى
شهم : يوسف حبيبي واخوية وصديقي هنا بالغرفة ماكو احد غيرنا انه وانت وفارس حبيبك ماكو شخص ثاني..
يوسف : لا جانوا اكو مجموعة وشوف هذاك بعده واكف
التفت للزاوية الجان يباوعلها جر نفسه ورجع يباوعله وكال
شهم : هذا فارس اخونا مو شخص غريب ولا جاي حتى يأذيك
لزم إيده بقوة
شهم : ركز هاي إيدي تحس بيها ؟
تردد بالجواب بعدين هز راسه بخفة بمعنى اي
يوسف : همممم
شهم : زين ، إحنا وين ؟
يوسف : بالبيت
شهم : وية منو ؟
يوسف : وياك
شهم : تمام هذا الشي حقيقي بس اللي حجيته قبل شوية ما جان حقيقي
يوسف : هممم
شهم : هسه الاريده منك تاكل وتاخذ علاجك وتنام شوية حتى ترتاح
هز راسه ساكت ، اشر لفارس يجيبله اﻷكل ، طلع جاب الصينية ورجع للغرفة كعد شهم يوكله اكل شوية ونطاه علاجه ، كعد يم راسه يمسد بشعره الى ان ارتخى جسمه ونام ، تركه وطلع للحديقة بجة بجي بعمره ما باجي هيج ، فارس واكف يمه وبعده مصدوم ما مصدكين اخوهم الانسان المثقف الراقي التعبان على نفسه هيج يصير بيه ، شهم مسح وجهه باوع لفارس وكال
شهم : رايح اجيب نتيجة التحاليل طلعت
فارس : مال العلاج والمي ؟
شهم : اي
فارس : اجي وياك ؟
شهم : لا ماكو داعي
فارس : تكدر تسوق ؟
شهم : اي اكدر خليك يمه على ساعة يكعد وما يلكانه ،ما راح اطول
فارس : دير بالك بس افضل تاخذ تكسي لان انت تعبت هواي اليوم والله مو مال تسوق
شهم : لا ما يحتاج
طلع يمشي وظهره محني ، صدك لو كالوا الأخ وكعته تكسر الظهر ، وصل للمختبر صف سيارته نزل منها ودخل من الباب سلم على الموظف وصافحه
شهم : شنو النتيجة ؟
الموظف طلعله الورقة باوعله بنظرة غريبة وكال
_ والله ما اعرف شنو اكولك الصراحة ، بس النتيجة ما تسر
شهم : شلون يعني ؟
_بالنسبة للمي مو تلوث عادي اكو مادة سامة بتركيز معين بحثت عنها وسألت دكتور صاحبي مختص بهاي الأمور كال هاي المادة ما تسمم بنفس اللحظة وانما تسوي ضعف بالجهاز العصبي+دوخة مستمرة وفقدان توازن ، هاي بالنسبة للمادة اللي جانت بالبطل المتروس اما البطل البيه مي قليل طلعت نسبة تركيز السم اعلى من الأول ...
شهم ساكت بس ايده ترجف والورقة تهتز باوعله وكال
شهم : وبالنسبة للدوا شنو طلع ؟
_ انت كلتلي هي فيتامينات صح ؟
شهم : المفروض تكون هيج
_الصراحة الحبوب شكلها أبيض / مصفر ، وصغيرة يعني تشوفها عادية وتشبه المكملات الغذائية ، بس نتيجة التحليل بينت هاي الحبوب عبارة عن تركيبة دوائية مهدئة ذات تأثير عصبي مركب ومسويها طبق الاصل من شكل الفيتامينات ...
شهم اهتز جسمه صابته رجفة لزم الميز حتى ما يفقد توازنه ، طلع الموظف ولزمه..
_الله الله دكتور تفضل اكعد
سحب كرسي وساعده يكعد آخذ نفس شوية ارتاح و سأله بصوت ضعيف
شهم : شنو ممكن تسوي هاي الحبوب اذا انأخذت بشكل يومي ؟
_ كتبتلك كلشي بالتقرير ، الحبوب تحتوي على مواد تعمل كمثبطات للجهاز العصبي
هز راسه شهم وحجى بتعب
شهم :يعني تسوي عنده بطء بالاستجابة العصبية ورجفة بالأطراف وارهاق شديد ومستمر وضعف بالتركيز والذاكرة قصيرة المدى ودوخة متقطة وعدم اتزان صح ؟
_ صحيح
شهم : كل هذا صار وية الشخص الاعرفه
_ الله يكون بعونه ويشافيه بأسرع وقت بس اذا تريد اكدر ادليك على دكتور شاطر ممكن يساعد بهذا الموضوع..
شهم : لا ممنون حبيبي ، شكد تأمر
_خليها علينا
شهم : تعبان وعيونك مابية حيل احجي كول شكد ؟
_مو والله ما تسوى
شهم : تزعلني ؟
_ لا كلشي ولا زعلك
كاله المبلغ شكد ، دفعه ، تشكر منه وطلع صعد السيارة واتصل على الدكتور حجاله كلشي موجود بالتقرير...
_ اوووو علبة الحبوب + المي المسموم ، تقريباً الصورة اكتملت عندي ، اخوك ما جان يتعاطى او تمرض صدفة ، للأسف كان مستهدف بشكل تدريجي ومدروس ، الجماعة استخدموا وياه اساليب خلوه يُنهك جسدياً وذهنياً بدون ما ينهار فجأة بس شغلة السم جانت القاضية الظاهر جانوا يريدون ينهون حياته
شهم : بالضبط اتوقع وصلتهم سالفة التقرير اللي قدمه للنزاهة ورادوا يخلصون منه بأي طريقة
_ بس شكد مجرمين ما حطوله سم مباشر وقتلوه بسرعة لا جانوا ينطوه مادة تخليه يتعب بشكل تدريجي ويكون عقله مشوش طول الوقت ، حتى يبين هو مريض او مرهق يعني ما يخلوه يشك بنفسه هو متعاطي او ممكن مغيريله العلاج ولا اهله يشكون بأحتمالية ممكن شخص يأذيه يكولك هو اصلاً تعبان واتركوه يرتاح الى ان يموت بفراشه بهدوء بس قدرة ربنا اعظم واجت العواقب سليمة..
شهم : الحمد لله على كل حال
_هسه دا اقرا بالصور اللي دزيتها تدري مستخدمين مثبطات اللي هي عبارة عن مواد تقلل وتبطئ نشاط الجهاز العصبي
شهم : اي لأن هدفهم يتعبون دماغه وجسمه ويخلوهم يشتغلون ابطأ من الطبيعي وانه جنت الاحظ عليه هذا الشي بس هو جان يعاندني يكولي مجرد تعب مابية شي
_ للأسف الدكتور يوسف هيج يصير وياه
شهم : اي والله
_ ان شاءالله يتشافى بأسرع وقت لا يظل بالك
شهم : ان شاءالله بس دكتور سؤال
_ تفضل
شهم : من جان ياخذ هاي الحبوب شنو تسوي وياه بالضبط غير الاعراض الظاهرة عليه وجنت اشوفها ؟
_يعني هواي والله
شهم : مثلاً
_ تسوي عنده بطء بالتفكير والحركة ونعاس يصاحبه خمول ، ضعف بالتركيز ، يكوم ما يركز مضبوط ، وردود فعله تكون بطيئة ، واكيد تعرف انت الرجفة والدوخة هاي هم اعراض وانت ذكرتها كلت صارت وياه هواي
شهم : اي صارت وياه وانه اللي وصلته لهذا الحال ، كله بسببي انه المذنب الجبير بهاي حالته
_ قابل انت غيرت علاجه ومرضته لا تحجي هيج بالعكس انت دا تساعده بكل امكانيتك و وكفتك كلش حلوة وياه وراح يشكرك عليها بعدين
شهم : تدري ليش اكولك انه مذنب ؟ المفروض ما اتهاون ولا اسمع كلامه واسايره بأذية نفسه ، جان لازم اجره من ايده وآخذه حتى لو بالقوة اسويله فحص شامل او اوديه لدكتور مختص ليش تركته ليش تهاونت بحالته ليش ؟
_الصبر ياحبيبي عليك بالصبر ، احنا بعدنا بالبداية ورانا وقت طويل ولازم نكون اقوى من هيج مو بأقل موقف ننهار ونتوجع
اختنك جاوبه بصوت مبحوح
شهم : صعبة والله صعبة
_ اعرف وحاسس بيك بس اللوم ما يفيدنا ، الاهم نركز بالجاي وشلون نعالج يوسف ونرجعه لطبيعته ، تدري طلعت وجاييك هسه غيرت رأيي
شهم : هله بيك حبيبي دكتور
ظلوا يحجون الى ان وصل الدكتور لبيت شهم ، دخلوه على يوسف فحصه وقاس ضغطه والنبض وأكد على مواعيد العلاجات وبقى يراقبه ويراقب نفسه بعدين تعشا وياهم وطلع ....
ثاني يوم شهم اتصل على دكتور علي من موبايل يوسف جاوبه بلهفة ...
شهم : الو صباح الخير دكتور
علي : حبيبي دكتور ياهله هاي وينك ظل بالي عليك
شهم : موجود بس شوية تعبان
علي : سلامتك والله
شهم : الله يسلمك
علي : البارحة اجيتك للبيت دكيت الجرس ما فتحتلي
شهم : انه بالقرية مو بالبيت ورحت وي اخوي
علي : خير بيك شي ؟
شهم : تعبان جداً وحالتي رجعت انتكست اريد منك تاخذلي اجازة اسبوعين لان منهار من التعب
علي : لا حول ولا قوة الإبالله والله ما تستاهل ، صار اليوم اقدمها وابلغك شنو يصير
شهم : هسه ادزلك تخويل من دكتور داخل المستشفى اللي تعالجت بيها تثبت حالتي الصحية شلون ساءت حتى يوافق على الاجازة وما يعرقلها
علي : تمام دزلي صورتها على الواتساب واني اتصرف
شهم : شكراً جزيلاً
علي : تدلل دكتور وسلامتك الف سلامة
شهم : الله يسلمك مع السلامة
علي : الله وياك
سده منه ودزله التخويل ، وافق على الاجازة لمدة اسبوعين ، بهذا الوقت شهم اتفرغله تماماً حتى من دوامه ، وبلش يكمل علاجه ...
اللي صار وية يوسف بالايام الاولى تعبهم هواي خصوصاً هو كلش تأذى ...
اللي صار وياه رجفة جسم ، صداع مستمر ، قلق وتوتر بدون سبب واضح ، نوم متقطع و ارق ، وعدم الاحساس بالجسم ، الثلاث ايام اللي تلتها صار عنده تعب شديد حتى بدون ما يسوي مجهود ، دوخة وعدم اتزان ، تعرق وخفقان بالقلب ، ضعف تركيز ، نسيان وتشتت ، مزاجه عصبي وصارت عنده عدوانية خفيفة صاحبتها بداية شكوك وافكار مشتتة ، الايام الاربعة اللي وراها صار عنده ارهاق نفسي وجسدي قوي ، رجفة وثقل بالأطراف ، احساس وكأنما اكو ضباب بداخل الدماغ + اضطراب بالنوم (كوابيس او سهر ليلة كاملة بدون نوم ) ضعف بالقرار وتفكير غير متزن ...
آخر ثلاث ايام سماها الدكتور بداية الاستقرار البطيء ، الرجفة قلت عنده ، النوم بدأ يتحسن بشكل بسيط ، لكن بقى عنده تعب وتشوش خفيف وضعف بالتركيز وجسمه بعده ما رجع طبيعي ١٠٠%..
بهاي الأيام ماجانوا ينامون بيها غير ساعة وحدة ، شهم ينام ويكعد فارس يناوب عنه ، تعبوا تعب لحد الهلاك ...
شهم هواي ضعف جسمه صار مثل جسم يوسف ، اللي يشوفهم يكول اثنينهم يعانون من نفس المرض ، هو جان يريد يسوي رجيم حتى ما يفرقون بينه وبين يوسف اذا داوم بمكانه بس التعب والسهر وقلة الأكل خلته يضعف بدونه ...
بعد مرور ١٤ يوم الساعة ١٢ بالليل جان شهم متمدد ورافع راسه ليفوك يفكر ، دك موبايل يوسف ، فرح ، تأفأف و باوع لفارس متململ
شهم : هاي ما تمل ما تكول كافي لزكت هواي ولازم انطيهم مفكة..
فارس : منو ؟
شهم : فرح
فارس : جاوبها خطية اكيد ظل بالها عليك
شهم : علية ؟ وتريدني احاجيها بهالليل وتلزمني ضحى
فارس : حاجيها بالسيارة شتسوي على ما تفرج ويوسف يكوم لحيله
شهم : لا ما اجاوبها خليها اتدك
فارس : رد عليها يمكن صاير شي مهم يخص دوام يوسف
بقى شهم متردد ، بالاتصال الثالث آخذ الموبايل وطلع برا صعد بالسيارة وفتح خط عليها
شهم : الو
فرح : حبيبي عمري وينك ظل بالي عليك ليش هيج تسوي بية ليش؟ انت زين احجي الوو يوسف
شهم : هسه غير تنطيني مجال احجي آخذتيني حاصل فاصل شبيج
فرح : شبية غير خايفة عليك وظل بالي
شهم : يسلم بالج انه بعدني تعبان وكاعد ابيت اهلي
فرح : ها يعني انت بالقرية ؟
شهم : الف رحمة على والديج اي بالقرية
فرح : وشوكت تداوم ؟
شهم : ليش؟
فرح : شنو ليش غير اشتاقيتلك
شهم : هالايام ان شاءالله
فرح : ياعمري ان شاءالله ، حبيبي
شهم : هممم
فرح : اويلي بحة صوتك اموت عليها
شهم : احم احم اي
فرح : اشتاقيت لريحتك
شهم : يا قوي
فرح : ولحضنك
شهم : يا علي صارت بيها احضان انه اترخص نحجي بعدين..
ضحكت بقهقهة بعدها كالت
فرح : يوسف اموت على شخصيتك اللي تظهر ورا ساعة ١٢
شهم : ها حبيتي هذا الجانب مني ؟
فرح : الصراحة ؟
شهم : بس بدون وقاحة
فرح : اي متت عليك
شهم : شوكت الدفنة ان شاءالله
فرح : شنو ؟
شهم : مو كلتي متت عليك
فرح : وصاير تحشش هم والله متطورين دكتور يوسف
شهم : لا اعجبج من بالي يرتاح اصيرلج غير واحد
فرح : زين شوف شنو دزيتلك
شهم : شنو دزيتي ؟
فرح : شوف اول
شهم : يعني افوت على المحادثة ؟
فرح : اي
همس بينه وبين نفسه
شهم : دخيلك ربي شلون ورطة هاي ربي لا تخبلني وتكشف ستري حتى على اخواني ، مافتح المحادثة طلع منها ورجع حجى
اكولج شنو دازة انتِ
فرح : فتحت يمك ! شعجب ما شفتها ؟
شهم : لا مافتحت بس استلمتها
فرح : زين خليني افتحلك كاميرا وشوف
شهم : يمعودة ششوف ما تكعدين راحة
فرح : هاي شبيك كلما اكولك على شي ما تقبل
شهم : بابا استحرم هي مال كاميرات وسوالف مراهقين
فرح : ليش انت وين راح بالك ؟
شهم : للصين
فرح : ترة ردت اشوفك هديتك
شهم : هديتي ؟
فرح : اي اشتريتلك هر
شهم : هر ؟
فرح : اي حتى نزاوج بزونتي
شهم : ها خير ان شاءالله والجهال يمج يمي ؟
فرح : يمي طبعاً
شهم : وان شاءالله ترديلهم نفقة ترة ما ادفع
ظلت تضحك بصوت عالي
فرح : سوالفك تجنن صايرة
شهم : يلة همزين ضحكتج ، اروح انام تعبان
فرح : تداوم باجر ؟
شهم : ما ادري اشوف
فرح : اجازتك خلصت
شهم : احتمال اجي امددها واطلع
فرح : المهم نشوفك
شهم : ان شاءالله تصبحين على خير
فرح : يوسف
شهم : ها
فرح : احبك
شهم : ان شاءالله
فرح : شنو ان شاءالله ؟ سمعت شنو كلتلك ؟
شهم : لا الصوت قطع
فرح : احبك
شهم : الله يحبب خلقه بينا
فرح : آمين تصبح على خير وانتظرك باجر مو ما تجي
شهم : الله كريم منا لباجر
فرح : تطلعني تغديني بهاي المناسبة
شهم : الله كريم ، راتب ما مستلم
فرح : العزيمة علية
شهم : الله كريم
فرح : الله كريم الله كريم شبيك ما تكولي ؟
شهم : اي الله كريم مع السلامة
فرح : الله وياك
سده منها ونزل جان فارس واكفله بالباب ويتلفت
شهم : شبيك ؟ عليش واكف هنا ؟
فارس : لو ما انه جان صارتلك مصيبة
شهم : ليش خير ؟
فارس : ضحى جانت واكفة قريب من السيارة وشافتك تحجي تليفون
شهم : لا والله وتالي شنو صار وينها ؟
فارس : اخوك حلها
شهم : شلون ؟
فارس : حطيت الموبايل على اذني وتقربت من السيارة وكفت وراها على اساس احجي وياك و انت دازني بشغلة ، من سمعتني باوعت وكالت
ضحى : هاي بعدك كاعد ؟
فارس : لا نمت بس شهم خابرني يريد اجيبله التقرير حتى يدزه لدكتور ثاني يشوف حالة يوسف
ضحى : ها
فارس : تريدين تحاجيه هاج احجي وياه
ضحى : لا ما اريد بعدين ، سد الخط واصعد يمه احجي بعد عليمن فاتح اتصال
فارس : مالي خلك ميت نعس انطيه الورقة وافوت انام
ضحى : تمام تصبح على خير واذا شهم كمل كوله يصعد ينام مادام يوسف حالته استقرت شوية
فارس : اي اي ابلغه
شهم : ابليس ما يفكر مثلهن بلة لو كابستني جان فادتني فرح ؟ لو انزللها الكتب السماوية واحلف بيهن ما تصدكني
فارس : مو كلتلك حطني على يمناك ما اقصر
شهم : والنعم من حبيبي ابو الفوارس
فارس : والنعم من الشهم
شهم : يلة روح نام وارتاح حتى نكعد الصبح من وقت عندي دوام وانت وبقى يم يوسف
فارس : ان شاءالله تصبح على خير
شهم : وانت من اهله
ثاني يوم يوسف كعد من النوم لزم راسه بقوة يفتح ويغمض عيونه ، باوع لفارس نايم على القنفة ، كام يريد يفوت للحمام ، حس عليه باوعله مبتسم
فارس : صباح الخير الحبيب ؟
يوسف : صباح النور
فارس : شلونك اليوم ؟
حجاها ومشى يسنده
يوسف : خليني اعتمد على نفسي ارتاح انت
فارس : يلة اذا تكدر براحتك بس طمني انت زين ؟
يوسف : نكول ان شاءالله
فارس : يارب العالمين
يوسف : شهم وين ؟
فارس : اتوقع بعده نايم
يوسف : كعده وكوله اريد اداوم اليوم
فارس : بس انت بعدك تعبان
يوسف : سوي مثل ما كلت
فارس : تدلل ، اروح هسه لو انتظرك اباب الحمام ؟
باوعله نظرة معناها روح ، هز راسه وطلع اتصل على شهم نزل من فوك وكعدوا بالأستقبال
فارس : يوسف يريد يداوم
شهم : شلون بلوة هاي مو وكتها ابد وضعه مو مال دوام وتعب وانه عندي دوام وضروري اروح اليوم يردوني بالمستشفى..
فارس : معاند واصلاً قافل ما يريد يتناقش
شهم : خليني اتصل بالدكتور واشوف شنو رأيه بالموضوع
اتصل عليه جاوبه وحجاله عن قرار يوسف برجوعه للدوام
_ تريد رأيي ؟
شهم : اي طبعاً
_ ما انصح يداوم
شهم : وانه هم وجنت ناوي اروح اجدد اجازته
_ تدري هسه هو بعده بالبداية يعني ممكن تنتكس حالته
شهم : معاند يريد يداوم
_ اذا جان عنده اصرار على الدوام خلوه يداوم بس مو دوام كامل لا جزئي ساعة الى ساعتين فقط ..
شهم : بعده تعبان وخايف عليه ينتكس ، دوامه جداً متعب وهو من النوع كلش ملتزم
_ اكيد راح ينتكس لأن التركيز عنده بعده مو ثابت ، وخلي في بالك القرارات الطبية اللي يكتبها بخصوص المرضى ممكن تكون غير دقيقة وتفوته بأشكالات هو بغنى عنها خصوصاً انت تكول عنده اعداء بدوامه ومترصديله ، وغير هيج سالفة اﻹرهاق ممكن ترجعله بأي لحظة لهذا كلتلك ما انصح تسمحله يداوم
شهم : يادكتور هو مو صغير حتى املي عليه اوامر وينفذها كعد وناوي يجهز روحه للدوام
_ خليه يداوم بس واحد منكم يرافقه
شهم : هو هم هيج
سده منه رفع اكتافه بعدم حيله وكال
شهم : سمعت الدكتور شنو كال ؟
فارس : اروح وياه شنسوي
شهم : بس عينك عليه فارس لحظة وحدة ما يغيب عنك
فارس : اكيد
شهم : روح ساعده يغير ملابسه وانه راح احضر الريوك حتى ياكل وياخذ علاجه ..
فارس : ضحى وين ؟ عندها دوام اليوم ؟
شهم : اي و طلعت من الصبح
هز راسه ودخل ليوسف يساعده يلبس ملابسه وشهم جهزلهم الريوك ، التموا لأول مرة على الميز يتريكون من بعد وكعة يوسف بالفراش ما التموا تلاثتهم على سفرة وحدة ...
اكلوا بهدوء ، يوسف اكل شوية واكتفى ، شهم راح جابله العلاج حطه كدامه وصبله مي بالكلاص ، آخذه بهدوء بدون ما يحجي كلمة وراها ، شهم صعد غير ملابسه وطلعوا بسيارة وحدة للدوام ، وصلهم كبال المستشفى وكثر من التوصيات ليوسف واكد هواي على فارس يدير باله عليه ..
نزلوا من السيارة ودخلوا للمستشفى وشهم انطلق لدوامه ، يوسف توجه على الاستعلامات شافوه الموظفين سلموا عليه ، بصم وراح لغرفته فتح الباب ودخل سحب اللابكوت الطبي لبسه و وكف يباوع على اسمه المكتوب على اللوحة فوك الميز
(الدكتور يوسف عبد الملك )
مد إيده ومررها على الاسم بخفة ، مسح التراب عن اسمه جر نفس تنهد ، فتح الباب وطلع متوجه لغرفة ريحانة وكف كبالها مغمض عيونه وإيده على المقبض متردد يفتحها او يمكن خايف من المواجهة او ما مستعد الها ، فتحها باوع للغرفة بيها نزيلات اثنين وريحانة ماكو ، گلبه خفق بقوة ، سد الباب وتوجه لغرفة الأطباء ، شافوه كاموا سلموا عليه وهو يهز راسه ساكت حتى ما ابتسم الهم ، ملامحه عابسه ، همس بصوت ضعيف وسرت رجفة بجسمة واضحة ..
يوسف : دكتور علي وين ؟
_ بالجناح الفوك
هز راسه ومشى بالممر ، طلع موبايله اتصل عليه اول ما جاوب سأله عنها
يوسف : ريحانة وين ؟
سكت رجع كرر عليه السؤال
علي : دكتور انتظرني بغرفتك هسه جاييك بس انطي العلاج للمريض واجي
يوسف : بس بسرعة لا تتأخر
علي : صار
رجع لغرفته وفارس يتبعه مثل ظله ، استند بإيده الاثنين على الميز ، ناطي ظهره للباب ، دقايق ودخل دكتور علي ، تسالموا ويوسف يباوعله منتظر على نار حتى يحجي ..
علي : دكتور صارت هواي شغلات وآخرها جانت جبيرة شوية وحتى صار بيها تحقيق
يوسف : احجيلي شنو صار ؟
نفسه تسارع ودكات گلبه خفقت بقوة وايده ترجف ، انتبه عليه دكتور علي وكال
علي : دكتور افضل نكعد ونحجي لأن السالفة طويلة شوية ...
هز راسه ومشى كعد على القنفة وعلي كعد على الكرسي الكباله التفت لفارس وطلب منه يسد الباب
علي : تتذكر من حجيتلك قبل اسبوعين كلتلك صارت عنيفة وتضرب بالكادر وتتهجم عليهم بسبب وبدون سبب واضافة لهذا صوتها ما سكت ابد بس تصرخ وما تنام الإ على إبر المهدئة
يوسف : زين كمل
علي : وراها كطعت الأكل والعلاج رفضت تاخذه وطلبتك بالأسم اكثر من مرة وانت جنت ما موجود ، عبالها انت تخليت عنها وتركتها او ما ألك عين تجيها بعد اللي سويته بيها
يوسف : كمل
حجاها ورجله كامت ترجف يحاول يثبتها قدر المستطاع بس الرجفة تزيد اكثر ..
علي باوع لرجله واسترسل..
علي : قبل خمس ايام دكتور حازم دخل لغرفتها حتى يكتب تقرير عن حالتها ، وما نسمع غير صياحها بشكل هستيري ، تراكضنا لغرفتها دخلت ومنعت احد يدخل وراية ، انصدمت باللي شفته ، ملابسها متمزقة ووجهها بيه دم ، ودكتور حازم جان يحاول يلزمها ما كدرلها ، كامت تصيح وتتهمه على اساس حاول يعتدي عليها ، الموضوع كبر بينهم وطلع من ايدي، تدخل دكتور عدنان وجمعهم بغرفته وبعدها حول ريحانة لمجلس تحقيق وأمر بحبسها بغرفة انفرادية ومنع اي واحد يوصلها خصصلها شخص يفوتلها الاكل من الباب وتنسد عليها بدون ما يحاجيها او يدخل عندها ...
يوسف : بيا غرفة محبوسة اريد اشوفها
علي : الصراحة ما اعرف بأي غرفة وممنوع نسأل عنها
يوسف : قصدك خفوا أثرها واحتمال ما تكون بداخل المستشفى اصلاً
علي : الجواب تلكاه عند دكتور عدنان
يوسف : مداوم اليوم ؟
علي : اتوقع اي بس ما شفته
تركهم وطلع متوجه لغرفة عدنان فتح الباب بدون ما يدكها ، ماجان وحده اكو عنده ناس ، باوعلهم يوسف وكال
يوسف : اريد احجي وياك على انفراد
عدنان : منو سمحلك تدخل ؟ ما تشوف عندي اجتماع خاص
يوسف : ما يهمني طلعهم عندي كلمتين احجيهم واطلع
استأذنوا وطلعوا بدون ما يطلب منهم عدنان
عدنان : تفضل احجي
يوسف : شنو نوع التحقيق اللي مسويه وية ريحانة ؟
عدنان : رجعنا لريحانة ماعندنا شغل وعمل غيرها المستشفى فارغة وهي المخبلة الوحيدة بيها
يوسف : سألتك بأحترام المفروض منكم تجاوبني بأحترام
عدنان : حققت وياها وسويت للازم هيج يكون جاوبتك ؟
ضرب على الميز بإيده وحجى بصوت بيه نوع من الحدة
يوسف : ماكو مستشفى بالعالم كله يصير بيها تحقيق وية مريض بدون آخذ رأي دكتورها المعالج ما شفت ولا سمعت هذا الشي غير هنا عندك
عدنان : اني مديرها واني الأقرر مو انت
يوسف : هذا منصب اداري دكتور ما يحقلك تسوي شي بدون ما يكون عندي علم
عدنان : وحضرتك وينك حتى استشيرك ؟ صارلك ٣ اسابيع ما مداوم اوقف العمل لحد ما حضرتك تداوم حتى آخذ الأذن منك شلون اتصرف بالمستشفى اللي هي بكادرها تحت ادارتي من جبيرها لأصغر واحد بيها
يوسف : مو بكيفك ، وممنوع تسوي شي وما تاخذ قرار الا اكون موجود المفروض تعوف الأمور كما هي لحد ما ارجع واقرر حالتها يلة تجي تحاسبها احنا بمستشفى المفروض تكون رحيم على المرضى احنا مو بسجن دكتور خاف الله بيهم لا بعدين يعابيك بأحبابك
عدنان : جداً تأثرت ، المهم تفضل برا خلص الحديث
يوسف : لا ما خلص ريحانة وين وديتها اريد اشوفها
عدنان : اتمنى تبتعد عن هاي المريضة وتتركها افضل ، نحجيها طك بطك بعد
يوسف : يعني شنو ؟
عدنان : يعني دكتور حازم راح يشرف على حالتها منا وجاي مو انت
يوسف : آسف ما راح اسمحلكم تتلاعبون بيها او تلغون اشرافي على حالتها واذا صار شي من وراية صدكني ما راح اسكت
عدنان : اعرفك واعرف شنو تكدر تسوي ماكو داعي تهدد وبعدين انت اجيت وطلبت مني اجازة مطولة واني وقعتها ، صار تكدر تاخذها وتروح
يوسف : بطلت ما اريدها الغيها
عدنان : مو لعبة هي تريد وما تريد تمشينا بكيفك ، توقعت وخلص
يوسف : وانه ما محتاجها وراح اداوم ماكو قوة بالدنيا تمنعني امارس عملي واذا بيدك شي تسويه سوي و لا تقصر
عدنان : بعدك تعبان جسمك كله يرجف وكفة ما تكدر توكف ، نفسك ما كادر تسيطر عليها تسيطر على المرضى ؟
يوسف : ما يخصك و للمرة الأخير اسألك ريحانة وين ؟
عدنان : روح دورها بالمستشفى واذا لكيتها سوي اللي تريده لا تقصر ...
هز راسه متحلف وطلع من الغرفة مشى بالممر وكف لزم گلبه بتعب ، راحله فارس سنده ، دور الغرف بالطابق الأول تعب راد يغمى عليه ، آخذه فارس وجبره يرجع لغرفته يرتاح ، ما كدر يرفض لان جسمه مابية طاقة يقاوم أكثر بعد..
مدد على القنفة غمض عيونه ولزم راسه ، ضايع تايه بأفكاره ، مرت نصف ساعة واندك الباب ، فتح عيونه جان نايم ، اشر لفارس يفتح الباب ، فتحها دخلت ممرضة باوعت ليوسف وكالت
_ دكتور ، دكتور عدنان يريدك بغرفته
يوسف : تمام شوية واروحله
طلعت سدت الباب باوعله فارس وكال
فارس : خليني ارجعك للبيت وجهك صار اصفر والعرگ كام يصبصب منك
يوسف : مابية شي ما اطلع اذا ما اشوفها
كام مشى للباب دخل دكتور علي باوعله وكال
علي : دكتور طالع ؟
يوسف : اي رايح لعدنان
علي : عندي معلومة كلت اكولها الك يمكن تفيدك
يوسف : شنو ؟ احجي
علي : تتذكر البنية اللي حجيتلي عنها المحامية نسيت اسمها ..
يوسف : تقى ؟
علي : اي هي
يوسف : شبيها ؟
علي : جابوها قبل اسبوع للمستشفى
يوسف : متأكد ؟
علي : اي دكتور وحتى اشرفت على حالتها وجانت مستقرة مابيها شي
يوسف : وبيا غرفة ؟
علي : غرفة رقم ٢ بالطابق الثالث
يوسف : يعني حجر ؟
علي : اي مثل ريحانة
يوسف : يصير خير ، بعدين نكمل حديثنا هسه انه رايح لغرفته دز علية بلكت يخليني اشوفها
علي : انتظرك كاعد بغرفتي
يوسف : تمام
طلع من غرفته وتوجه لغرفة المدير فتح الباب ودخل جانوا كاعدين ثلاث اشخاص والمدير على مكتبه ، وكف يوسف بوسط الغرفة يباوعله ...
واحد من الكاعدين سأله
_الدكتور يوسف ؟
التفت عليه هز راسه وكال
يوسف : نعم انه دكتور يوسف منو حضرتك ؟
_ احنا لجنة واجينا بأمر شكوى رسمية من إدارة المستشفى ضدك
يوسف : ضدي ؟ منو مقدمها ؟
_اﻹدارة
يوسف : على أي أساس ؟
_ هسه تعرف
حجاها وهو يفتح الملف البين إيده
يوسف باوع للمدير ابتسم ابتسامة خفيفة مليانة سم ، سحب نفس ورجع باوع للموظف عكد حاجبه وكال
يوسف : ممكن اعرف بخصوص شنو ؟
_ يتهمك بعدم الأهلية المهنية ، والتلاعب بالتقارير الطبية ..
ابتسم يوسف ابتسامة قصيرة وجاوبه بثقة
يوسف : قصدك تلاعب وتزوير ؟
بدون ما يرفع راسه من الملف جاوبه
_هذا اللي راح نتحقق منه
يوسف : زين خلينا نوضح اكثر ، اي تقرير تقصد ؟ اي حالة ؟ لأن هذا اتهمام جبير بحقي وضروري اعرف
جاوبه عدنان مستهزء
عدنان : دكتور لا تصعبها انتظر وراح تفهم كلشي
التفتله وكال
يوسف : ما مصعبها دا اطلب توضيح لا اكثر وهذا من حقي
رجع التفت عليهم بعصبية وكال
يوسف : اتهمتوني ومن حقي اعرف التفاصيل
واحد من اللجنة گلب صفحة الملف الموجود بيده باوعله وكال
_اكثر من تقرير بيه ملاحظات عليك
يوسف : مثل شنو ؟
_تضارب بالمعلومات وتوصيات غير منطقية
قاطعه مد إيده الهم وكال ..
يوسف : انطيني واحد من الملفات خليني اطلع عليه
سد الملف باوعله وكال
_ راح ينعرض عليك رسمياً بعد الفحص
يوسف : فحص ؟
_ اي نعم
يوسف : يعني تتهموني وما تسمحون حتى ادافع عن نفسي وهم تريدون تحيلوني للفحص وين صايرة هاي ؟ انت تعرف انه منو ؟ حاجيلك عني وعن كفاءتي بالعمل ؟ لو لا
_هو احنا ليش هنا ؟ حتى نتحقق من صحة الشكوى اللي وصلتنا ونعرف مدى نزاهتك بالعمل
تصاعدت الاحداث بينهم يوسف توتر ، آخذ نفس حاول يهدأ بعدها كال
يوسف : زين اذا اكو ملاحظات عني نراجعها سوا مو مباشرة تحقيق ما صايرة هاي اول مرة اسمع بيها الصراحة
_الموضوع تعدى المراجعة
يوسف : شلون يعني ؟
_عندنا شكوك بسلوكك العام
ضيق عيونه وحجى
يوسف : شنو تقصد ؟
_احتمالية تتعاطى مواد
يوسف : عفواً
التفت للمدير باوعله وخزره ، الأخير لف بالكرسي وهز راسه متحلفله وكال
عدنان : احنا قلقانين على وضعك الصحي وما بيها شي اذا نتطمن
يوسف : قلقانين عليك حبيت اهتمامك دكتور عاشت ايدك
حجاها وصفك بإيده الأثنين..
واحد من اللجنة حجى بحدية موجه كلامه ليوسف
_ رجاءً خلينا ضمن الموضوع لا تطلع منه
يوسف : انه ضمن الموضوع اساساً ، دا اتُهم بصريح العبارة بأني مدمن بدون دليل واضح
حجاها وصوته ارتفع
_صوتك دكتور احنا بمكان محترم
يوسف : وانه دا احجي بكل احترام وية حضراتكم ما متجاوز
_حلاً للأشكال نسوي التحليل
صفن يوسف عليه وبقى ساكت ، حجى المدير
عدنان : شتكول دكتور ؟
يوسف :ماعندي مشكلة بالتحليل بس عندي مشكلة بطريقة التعامل ، تعرضت لاتهام بدون دليل وضغط بهالشكل واتعامل على اعتباري مذنب ويتحقق وياي بشكل مفاجئ ما اتوقع هذا اجراء قانوني
واحد من اللجنة وكف كباله وكال
_إحنا دا نتبع اﻹجراءات
يوسف : اﻹجراءات تبدأ بإعلامي بالتفاصيل ، مو تجيبوني وتتهموني بدون دليل رسمي
واحد منهم جاوبه
_خلص نعوف الفحص هسه ونفتش غرفتك الشخصية
يوسف : ليش ؟
_حسب الشكوى الأمامي تشير لاحتمال وجود مواد تعاطي بداخل غرفتك
يوسف : احتمال ؟ يعني ماكو دليل
_إحنا هنا نتحقق
سكت يوسف لزم راسه يفكر بعدها كال
يوسف : تمام تتفتش ماعندي شي اخاف منه
عدنان : أكيد
يوسف : أكيد دكتور
طلعوا من غرفة المدير متوجهين لغرفته فتحلهم الباب ودخلوا وكف بوسط الغرفة يراقبهم
واحد فتح المجرات ، والثاني گلب بالأوراق ، والثالث واكف يباوع
مالكوا شي بعدها واحد منهم فتح الثلاجة طلع علبة وسأله عنها يوسف جاوبه بهدوء وبكل برود
يوسف : فيتامينات
مد إيده يأشر عليها
_متأكد ؟
يوسف : تحب تجربها ؟
_ مكملات غذائية هاي
يوسف : اكيد مكملات غذائية لعد انه شنو كلت انصحك تاخذ منها كلش راح تفيدك
المدير واكف على صفحة مبتسم
_ناخذها للتحليل
يوسف : وين بالضبط تاخذها ؟
_للمختبر
يوسف : ومنو يثبتلي هي نفسها راح تتحلل ؟
_شنو قصدك ؟
يوسف : انه بطبعي انسان شكاك واذا تاخذوها حتى تحللوها نوديها لمختبر بمستشفى حكومي وبقرار رسمي وانه اكون وياكم من لحظة تسليمها الى لحظة استلام النتيجة غيرها ما اقبل
_ حلو ومنو يكول ما انت تتفق وية المختبر التريد تاخذنا عليه
يوسف : اكو جهة اعلى منا هي اللي تحدد وين يصير التحليل
_هذا نعتبره اتهام بمصداقية التحقيق
يوسف : مثل اتهامي بدون دليل بس قسماً بذات الله اذا طلعت النتيجة من صالحي راح احاسبكم واحد واحد وآخذ منكم تعويض على تشويه سمعتي بداخل المستشفى
_ تمام كملت ؟
يوسف : اي
_ هسه راح يوصل الموظف حتى نسحب عينة دم من حضرتك ونحلها.
يوسف : ماعندي مشكلة بس من نحدد المختبر الراح يسوي تحليل للحبوب نفسه يحلل دمي
_ بس راح نضطر نحجزك بداخل المستشفى ، و ممنوع تطلع لحد ما نقرر بأي مختبر نسوي التحليل
يوسف : وانه ماعندي مشكلة انتظركم
