رواية ذاري النجوم الفصل الخامس العشرون بقلم زهراء السراي
لا البوحُ يُطفئُ ما في القَلبِ مِن وجعٍ
ولا الدُّموعُ تُسلّيني فَتنهَمِرُ
علِقتُ ما بينَ كِتمانٍ يُؤرّقني
وبينَ قلبٍ مِن الخِذلانِ ينصهِرُ
:
:
:
:
:
:
ليل
✥━━━༺✦༻━━━✥
گاعدة لوحدي عالمكتب بزاوية الغرفة
اللي صاير عبارة عن جبل من الورق والملازم
الضوه مالت التيبل لامب المنضدي مسلط بحدة على كتاب نيلسون الضخم وصفحاته الناعمة المليانة
بالتفاصيل الطبية چنت أحسها كاعد تستهزئ بية
لأن احس نفسي مراح اگدر اكمل
وبصفه كتاب ليسوار Lissauerبصوره الملونة
صور أطفال يضحكون وأطفال يعانون من نقص فيتامينات
وأطفال كاعد ينمون بسلام
چنت أباوع للصور وجمال الاطفال
فتحت فصل النمو والتطور
عيني وگعت على سطر يگول
(الطفل بالشهر السادس يبدأ يميز الوجوه المألوفة يبتسم انعكاساً لمشاعر المحيطين بيه)
وگفت ايدي القلم الفسفوري اللي چنت أخطط بيه شخط شخطة قوية على الورقة
كأنما گلبي هو اللي انشخط
لو ما قراري اللي سميته مهني
وجان هو قمة الأنانية چان هسة ببطني طفل
يكمل اشهرة الأولى
چان هسة هاجس مو بهاي الحالة
بسسس حتى لو حملت هم القرار مراح يكون
عن قناعة
قرار لمجرد ارضي هاجس بلا اعتبار
لوضعنا هو ويا الترقية ورتبتة الجديدة
وانشغالة اكثر واني وية طموحي
مشوووووشة بشكل ماااعرف
شفكر
مرة احس نفسي غلطانة
ومرة احسة هووو مبالغ بردة فعلة
شهرين ونص مرو وهاجس عبارة عن كتلة ثلج تمشي بالبيت
صح تعاملة وياي مبي اي خلل
بس لا اني احس واعرف
بذاك اليوم من عرف بية مانعة الحمل
وطلع عصبي رجع من برة بنص الليل
لا صيح لا عاتب لا باوع بوجهي
يمر من يمي كأنما أني فراغ كأنما قطعة أثاث مالها داعي بعدها رجع طبيعي
يحچي يطلع ويرجع يسولف عن كل شي
بس لمحة الحنية اختفت من عيونة
گام يطلع الفجر بـقيافته العسكرية
والرتبة الجديدة اللي زينت اكتافة
هيبته ورتبته اللي تملي العين
واحتفل بيهة بعيد عني وكلمة مبروك
من عندي واجهها بكلمة الله يبارك بيچ
الهدية اللي جبتها بقت بعلبتها ومشافها
ولا فتحها
گام يروح لدوامه ويرجع
وبالبيت كلامة عادي بس اغلب الوقت اتصالات
وسوالف تخص الدوام
وكلامنا روتيني معتاد
الاكل جاهز
محتاجة شي من السوگ
انتهت سهراتنا الطويلة وحواراتنا صرنا بنص الروتين
وكأنما صار واحد غريب مو شريك عمري
انتبهت للكتاب الكدامي وية فتحة الباب
ودخولة
وگفت عيني منة سلم
-السلام عليكم
-هلو حبيبي الله يساعدك
-ويساعدچ
-اسويلك عشا
-لا تعشيت ويا ابو صعبة
كملي قرايتچ
گالها ببرود وهو يشيل حزامة ومسدسة يخليهم بمكانهم
رجعت عيني للملزمة
جان مكتوب عن فشل النمو
عند الأطفال بسبب نقص الحنان
حسيت بي يفتح دگم قميصة وواگف
فوگ راسي يباوع
صدرت منة ضحكت بمرارة وعدم اهتمام
-شگد سخرية بالموضوع الدكتورة اللي كاعد تدرس شلون ينمون أطفال الناس
وعلاقتها بالرجل اللي يحبها كاعد تموت
ويا بسبب طفل
التفتت مصدومة من كلمتة وگفت
عيني بعينة ودموعي بمحاجري منتظرة
كلمة لخ حتى توگع
مشيت تاركتة ووگعت دموعي وهاي اول
مرة من بعد شهرين ونص يعيد فتح الموضوع
طلعت للحمام شگد حاولت اسكت مااگدر
ربع ساعة مرت اندگت الباب اجاني
صوتة قلق بس متردد يبينلي اهتمامة
-ليل بيچ شي
-لا بس جاي اغسل ثواني
طلعت امسح بوجهي بالمنشفة حتى
ميشوفني
-ليل اگلچ مو .........
افهم يريد يگول مقاصد
شي بس اني مااتحمل
صعب تكون بنص الدفووو
بعلاقتك وفجاة يحاوطك ثلج عاصف
يغير كل شي
طلعت تاركتة وراية واختفى نص
ساعة ودخل الغرفة تلفونة بيدة ويحچي
والساعة داخلة عالوحدة
-لا عمو مو گتلچ اني اخذكم ليش مستعجلييين
تمام يلة نامي عليمن البچي اني هم مشتاقلة
هاي هي عگب باچر
الغصات تتابعت بصدري وهو يحنو بكلماتة
وصوتة وية روان اللي لازالت بلا خجل بأي
وقت يعجبها تخابر وهو رجع
يرد نكاية بية او هيج اعتقد
مسحت وجهي ورجعت
ملازم الـ Primary Exam تارسة الميز وملاحظاتي الجانبية اللي جانت قبل شهرين كلها حماس
هسة صارت جامدة بلا روح
عگب باچر المفروض اروح للامتحان اقنع بنفسيتي
المتحطمة اني واثقة راح أكعد بقاعات الامتحان
راح أجاوب على كل الـ MCQs بذكاء
وراح آخذ درجة كاملة بتطور الطفل
بس يا قانون طبي يرجعلي هاجس
يا ملزمة تكدر تگلي شلون أخلي عيونه تلمع من يشوفني مثل قبل
سديت الكتاب بقوة
لدرجة التفتت علي عيونة ناحيتي
يتسائل شكو ابتسمت كان ماكو شي
طفيت الاضوية وگفت امشط شعري
اللي طول زيادة واطرافة تعبت ضفرتة
رطبت ادية خليت نظاراتي الطبية بمكانها
واتجهت للسرير
شعور غريب راودني بأني أريد احضنة
اباوعلة فاتح ايدة
يمكن هالشي الوحيد اللي مابرد بينة
الحضن اللي هو تعود علي واني
غمضت عيني حتى أنام
مسحت ادي على اكتافي
-تعبانة
-اي
ماخسر كلمة لخ وياي واني هم على
هدوء الغرفة نمت للصبح گعدت على
صوت تلفونة
تستمر القصة أدناه
فزيت ويا للصلاة
-صباح الخير
-صباح النور عندي صداع
سويلي چاي
-تمام
اول موگفت اجتني الدوخة
ترنحت وايدة سندتني
رجعني للسرير
-بيچ شي
-لا بس دوخة
-جاي تاكلين لو لا
-اكل
-اني اغلب وقتي مااگدر
اجي من انت بالبيت اكلي
ومن بدوامج وخفاراتج اكلي
ترة ضعفانة
مسح خدي وابتسم كأنما يجاملني
كزوجة بسسس
-جاي احضن عظام من انام
وگفت وسندت نفسي علي
-حتى ابقى رشيقة
دفعني بين ادي ممشيني
وساندني
-الچاي
طلعت وهو رجع يرتب بنفسة
سويتلة الچاي وركضت للحمام
معدتي تاذيني
-شبيج
استفرغت وغسلت وطلعتلة
-معدتي متوترة عگب باچر
الامتحان
صفن
-عگب باچر
-اي تروح وياية مو
عدل قميصة ويلبس بساعتة
سحبت ايدة اضبطها الة
-مو نوح وياچ
-اي بس ......
بلعت كلماتي من تذكرت كلامة لروان
-تمام وية نوح اروح
مشيت خليت كوب الچاي
عالميز وطلعتلة اجبان وخبز
-اني عندي طلعة مو متعاجز منچ .........
راد يكمل قاطعتة
-اي سمعتك بس نسيت رايح للنجف
وية روان وعمتها
عادي نوح موجود وبيبي تروح وياية
وهيچ هيچ احنة رايحين يم بيت خالو علي
نوديها ونرجع للامتحان وبعدها نخلص
ونرجع
-خير ان شاء الله
تركتة ودخلت للغرفة الرجفة اللي
صابت عظامي خلتني ارتجف بشكل
غريب غطيت بالفراش تاركتة
وراية ربع ساعة واني اسناني مصطكة
ومعدتي مثل النار تغلي بيهة
احس بشفافي مثل النار مشتعلة
حسيت علي دخل للغرفة يحاجيني
-ليل ......ليل
ادعيت النوم ومارديت
تقرب مني وهزني فتحت عيوني
-اني رايح بشغلة خاف اتاخر
-وين رايح
-لبغداد وية مصعب يراجع
-تمام
سد الباب ورا
بخفة وطلعت
ورا بدقايق للحمام استفرغت القهر
والحزن اللي صابني ومگدرت انام ل٨
تجهزت من كل الجوانب اوراقي كتبي
مراجعي اي شي ممكن يسهل علية
الامتحان
لليل رجع من وقت على غير العادة
وقبلها اتصل بية مارديت
-السلام عليكم
-وعليكم السلام
-ليش اتصل متردين
باوعت للجهاز عالميز صامت واني متعمدة
اخلي صامت
-صامت چنت اقرة
-شلون صرتي
-الحمد لله احسن
التلفون واني اخلي عالوضع العام اتصلت
أديان اللي صارت كل فترة نتصل او نتراسل
-هلاااا بالتلميذة
-هلووو حبيبتي ام جود شلونچ
-اسأل عن اخبارچ اسبوع مختفية
-باچر الامتحان والتوتر يقرة مليون
-كم يوم امتحانكم
-ياريت لو أيام هو يوم واحد
-وين
-بقاعات كلية الطب بباب المعظم
يبدي الساعة تسعة الصبح
ويستمر لمدة ٣ ساعات متواصلة
-امتحان مكثف
-بشكل عدد الاسئلة بين ال١٠٠ وال١٢٠
معدتي من هسة اعلنت علية الحرب بسبب
الخوف
-نااااجحة مييية بالمية
ضحكت على كلامها المشجع
-ماااريد مية بالمية كافي علية خمسين او ستين
بالمية حتى ادخل ضمن قائمة المفاضلة
-مووووفقة حبيبتي وعليچ
الله اذا تحتاجين شي ادزلج اختي مناك
-متقصرييين ام جود ماااريد اتعبكم
بس اطلبچ جدر دولمة بعد النتيجة
-عيوووني الچ
ودعتني وراحت وهوو عينة مني
ويغير ملابسة
-محتاجة علاج دكتور
-لا سلامتك تتعشى
-شي خفيف ويا الچاي
سويت چاي وكيك واجاني للمطبخ
يتراسل
خلة التلفون عالميز صورة ابو روان عالحساب
عرفتها روان
-هم چاي مر
-حسب حلاوة الكيك
-متوسطة
-خليلي شوية شكر
خليلتلة وانطيتة رجع يتراسل اخر
شي دگ التلفون بأسمها
وهاي اول مرة
يسويهة گام يريد يطلع برة
لزمتة من ايدة واشرتلة يگعد
-اني طالعة اخذ راحتك
نزل التلفون من اذنة وصوتها يصدح واصلني
واني ماشية
-عمو عموووو تسمعني
دخلت الغرفة واختفت اصواتهم
طلعت ملابس دافية شوية الجو شهر ١٢وبرد
قوي رتبت الملابس اللي اريد البسها
اتصلت بالبنات اتصال جماعي
-تعالو يمي
صاحت غيد
-تخلووون معطر ليمون بالبيت واني
اكره المعطرات وتلعب نفسي
-واني يم ماما
-ياحقيرات متوترة باجر امتحاني
-ولچ اني انهزمت من نوووح شوية
بعد ويكفخني راشدي
-شسووويتيلة هو بيا حال
-يقرة واني اگشر حب واشمر يمة
راد ينتحر اتصل بماما كاللها اخذيهة من وجهي
هي وكرشها
سكتن شوية وردت غيد
-انت بطلة ليل والله عديتي الست
سنوات دراسة ببغداد بوحدج
واثنين اقامة وسنة تنسيب بقت على
هاليوم راح تتفوقين وتذكري كلامي
-والله اني هم نفس احساس غيييد
بطلة انتِ
-احبكم بنات روحو ياحوووامل ارتاحو
-ليوووولة
-هااااا يمنى هذا الدلع ورا مصلحة
-الله عليچ ارررريد كرزات من ال.........
من ترحوووون لچ جااااي اموووت عالموالح
-وانت غيوودة امريني
-مايأمر عليچ عدوووو اني كارهة
الاكل اذا تگدرون اخذو وطن شمرو باقرب
شط هووو وعطوووورة كرررهتة
-مسألة عااادية ولچ هسة تخلص ويا
نهاية الشهر الرابع
بقينة نسولف شوية
ودعوني وراحو وهو دخل للغرفة
طلع ملابسة كشخة عادية
-تكدرين تكويهن
-تمام
-طلعيلي وياچ قمصلتي الجلد السودة
اخذتهن وطلعت للهول اكويهن
اجة وراية اكو كلام
بين شفافة بس يحوس وميحچي
دگ التلفون غلقة وگعد فتح التلفزيون
يباوع خلصتهن وخليتهن بالتعلاگة
-هاي كويتهن
-تمام عاشت ايدچ عندي طلعة
مهمة باچر
يريد يفتح حديث وياية من شافني
مختنگة مارديت بس بكلمتين
-توصل بالسلامة
كل شي صار مهم الا آني
اتصلت بماما اريد بيبي يمي
بسسس هي تفهمني
-ماما اگدر اجيب بيبي يمي ونطلع
منا
-انتظري اكللها يلة
شوية وردت بيبي
-ها ليلة
-حبيبتي خل اجي اخذچ ونطلع
منا
-خاااايبة لويلة گلاب الدنيا انا ابات
ببيت الحيايا شمالني تعاي منا اخذيني
اسمعها تگل لماما
-روحي يمة جيبيلي مصلاتي اصلي هنا
نافلة الليل
-هاااا عذابي وين وديتيهة
-ماطول راحت سمعيني
الليلة هدي روحچ يابعد روحي
واقري على گلبچ آية الكرسي
وانسي كل شي محلولة يايمة
مادام تحبينة تنحل السالفة
خلي الصار على صفحة وحطي
روحچ بحضنة ونامي مأمنة
-بيبي ميقبل يجي وياي رااااح ياخذ بنت
صديقة للزيارة
-اجت امچ اسمعي هذا نفل وماتفوتة الزينة
-مفهمتچ بيبي
-معدل ولو هو مسودن بس معدل
هسة تلگينة ياكل بروحة
بين كرامتة وبينچ انت هدي روحج
ولا تحجين ولا تلومين هو وحدة
يفك خووووش ونامي بحضضضنة
-ليييش الا بحضنة
-هسة اخذيهة مني لاتبردين حضنة
منج زعلانة راضية ضلي يمة خووووش
-تمام
سمعت صوت ماما وردت
-يلة ليلة روحي ونامي
بعد روحي الله يوفقچ
سدت الخط ودخل هو للغرفة
حاچاني
- نامي ارتاحي
نزل على جهتة من الفراش شافني هادئة
جامدة بمكاني يعرف ان مشاعري
متضاربة من كل النواحي من مشكلتنا
لكلامة البارحة لتوتر الامتحان
فتح ايدة تسللت بخفة وضمني
بين ادي يلعب بخصل شعري
بس القهرة لسة بگلبي حاولت
ان مااحچي بس طلع صوتي مهتز
متوتر
-هااااجس
-گولي
-بيش الساعة تطلعون للنجف
-بالخمسة
دموعي نزلت لااراديا واني واثقة
حس بية التفتت منة مبتعدة ودرت وجهي عنة
-توصلون بالسلامة
ادي تسللت حضني وسكت وكأنة
مستمع بعذابي وحزني وخذلاني بهالمرحلة
الصعبة
غفيت بتعب والمنبه مسويتة عالاربعة ونص
فزيت بخوف قبل المنبه هو حس علية
وگام وياية
-بعد وقت نامي ارتاحي
-لا مااااگدر
احس كأنما گلبي مخلوع من الفزة
مشيت شوية ورجلية خذلتني شمرت نفسي
عالطابورية بصف الميز
-بيچ شي
-مااااعرف رجلية تخدرت من فزيت
بقة واگف يمي سندني ومشيت ويا
ثبتت مشيتي وگدرت اخطي الحمد لله
دخلت الحمام اتوضى وطلعت
دخل وراية توضى ودخلنا يصلي
صليت ورا الى أن صارت بالاربعة
بديت البس كوت زيتوني
وبنطرون وبلوز هاينك بيجي
والحجاب بسيط وجنطتي
وحذاء فلات لبست اريح ملابس
عندي
هو كذلك تجهز ولبس كل
خطوة وحركة يسويها
گلبي يأذيني واحس اريد اصرخ
علي واعصب واطلع حق برودة وياي
هسة بس كرامتي مانعتني وتوتري
الحالي يكفي عشر اشخاص
أراقبه من طرف الغرفة وهو واگف
گدام الكنتور حركاته مدروسة
عسكرية بامتياز
شفتة مد ايده ويسحب صندوك
الهدية اللي قدمته اله قبل شهر
الصندوگ اللي مفتحة ولا حتى شافة
طول ايام الخلاف
گلبي صار هالگدة الحقييييير
يلبس هديتي وهو يستعد للطلعة وياهة
ويا رووووان الحقيرة
اللي ماتترك ثغرة إلا وتسللت منها حتى
تحوز على انتباهه هديتي اللي صممتها
حسب رتبتة اسمة محفور عالساعة
وبداخلها النسر الجمهوري
تقدملي مدلي ايدة
-عاشت ايدچ زين شكلها سديهة بالله
اقتربت أصابعي المرتجفة من معصمه سديتها وطلع اسمع صوتة يتصل وكفت اسمعة
-اييييي سوية نروح تمام تمام
گعدت بتعب عالكرسي بالهول منتظرة
نوح يتصل بية ونروح لبيبي
سندت راسي بتعب والافكار تتلاطم
براسي مثل اموووواج ضخمة
قربت تبتلعتي مو معقولة نبقى هيچ
اني مااااتحمل احس كلبي يريد يطگ
اتصل بية نوح رفعت الخط
-ها نوح وينك
-طلعت لجماعتي غير متفق ويا
الشباب اخذهم ويانة
-واني وبيبي
-هاجس گال اجرتلهم تكسي ماقبل
ترحين وياي ووية الشباب
-تمام اخذ راحتك
گمت واحس هاي هي گلبي انملى
قهر
واگف يلبس جاگيتة الجلد الحقير
طالع يجنن وراح يروح وية
رووووان العيااااااارة
وكفت بباب الغرفة اعصابي منهارة
- وين التكسي المأجرهة تأخرنا
-يم بيت أهلچ وصيت أبوچ يأجرها وتنتظرچ هناك
-تمام اتصل ببابا يخلي يجيني لهنا ما أگدر أطلع وحدي هسة
- لا أني أوصلچ يم أهلچ ومناك طلعي وية الحجية
لأن أني هم تأخرت عالجماعة
هزيت راسي وطلعت
بس واحد يتنفس بوجهي أبچي
الطريق ظلام وهدوء برد يضرب العظام
رافع جامات السيارة ويسوق براحة
وفجأة دگ تلفونة
انتبهتلة داس دگم الصوت بسرعة
وكأنه ينهزم من فضيحة وميريدني
اسمع ورد بنبرة دافية
مسامعتها من فترة
-أممممم إي أخذتلها اللي تحبه
أدري بيها مريضة لا شنو القضية
قابل توصوني عليها
بهاللحظة حسيت الهوا نفذ من الكرة
الارضية كلها واختنگت
مهتم لمشاعرها يسأل عن مرضها
يشتريلها اللي تحبة
وأني أني اللي يدعي حبي
كاسر گلبي ومأذيني ببروده
نزلت الجامات بقوة تركت هوا
الفجر البارد يصفع وجهي
بلكي اوعى من هالكابوس
-باردة عليچ ليل سديها
نطق بهدوء وقلق
شهگت وكتمت أنفاسي بيدي
أحاول تنظيم دگات گلبي المضطربة
رديت
- مختنگة خليها
مشينا نص المسافة مد يده ورفع الجام ببطء
ورجع مدها لوجهي لمس خدودي بأطراف أصابعه الدافية
- ثلجتي راح أشغل التدفئة
دفعت أيده بخفة مرددة ببرود مصطنع
- ماكو داعي
قبل منوصل لفرع اهلي طلبت منه يوگف
- نزلني هنا روح لا تتأخر عالناس بابا
يطلعلي ويتصل بالسيارة تاخذنا
وگف براس الركن الدنيا ظلام دامس
والكهرباء طافية فجأة امتدت ايده لخصري
وسحبني الة بقوة لدرجة حسيت بألم لذيذ أجتاح أضلاعي دفعت ايدة مستنكرة
- نزلني هاجس تأخرت
بلا كلام سحب وجهي ناحيتة
وباسني بسرعة وقوة
بوسة جارفة المشاعر
تحمل كل جوع الشهرين الفاتو
مستغل ظلام الشارع وسكون الفجر
ماگدرت ارد ولا أقاوم
انفجرت باكية بحرگة
كأن كل سدود صبري انهارت بلحظة
حاوطني بذراعة شدني لصدره
مهديني
-يا غبية تعتقدين إنو مثل هيچ يوم مهم بحياتچ أخليچ تروحين وحدچ
منووووو يستحق اهتمامي غيرچ
واساساً منووووو يستحق ازعلچ
علمودة
رفعت راسي بصدمة وسط دموعي
تابع كلامة وهو يمسح وجهي بطرف أصابعه
-شلون تعدي دموعج اللي بللت صدري
بالليل واخليچ ترحين وبگلبچ ذرة
حزن مني
-والتكسي وبابا
ضحك بصوته الحلو وباس جبيني
- كلها تمثيلية وها للعلم نووووح ويمنى
شاركوني وهاي يمنى الغبية
اتصلت توصيني عليج ويلة تركي كل شي هسة
وامشي عذبة منتظرتنا
خلل اصابعة بأصابعي ضاغط على
كفي يبثلي شعور أمان منطيني
دفعة معنوية لهاليوم المهم
بس دگيت التلفون طلعت ماما
وبيبي وياهة سلمت عليها وهي
تدعيلي
واخذنا بيبي وطلعنا بسم الله
سميت وانطلقت بگلب مرتاح وراضي
للخطوات الاولى نحو الاختصاص
نزل لبيبي صعدها
صبحت عليها والتفتت ابوسها
شاورتني
-ها اليغبرة مو گتلچ ما يعوفج زعلانة
ضحكت وسكتت اول ممشة الطريق
وشغل اضاءة السيارة ردت
افتح الكتب والملازم باوعلي
-نزلييييهن لتشوشين على نفسج
قارية وحافظة وفاهمة نامي
گالهة ومد ايدة للكشن رجعة ليورة
وايد بيبي الدافية امتدت تمسح على وجهي
-حوطتج بآية الكرسي
يابيبي وعين الله الماتنام
تهديج وترضيج وترجح عقلج
وماتطلعين الا راضية وفرحانة
والله موفقج ياليل يا بت ريحانة
-واني مالي نصيب من هالدعاء
-ولو انت مسودن بس ادعيلك
انت واخيوانك بكل فرض
-معدلة عذبة
-دلزم لسانك لاادعي عليك مگلوبي
ياالله
واستمرت السالفة هاية عرك وضحك
واني هادئة اقرأ ويا الدعاء اللي مشغلة
هاجس الى أن وگفنا بباب بيت خالو
علي طلع لبيبي بس سلمنا علي
ودخلو جوة چانت الساعة بالسبعة ونص
طلع بينة هاجس
وتوقف گدام مطعم
-مااالحگ هاجس والله
-مستحيل لازم تتريگين
-اخاااف تتخربط معدتي
-امشي نص ساعة تدفي
باووووعي صوووبات داخل المطعم
نزلني غصبا علية نزلو الريوگ
احس نفسي مسدووودة
سوالي لفة صغيرة وكوب الچاي خلا بيدي
-شربي ويلة اكلي وتدفي عالصوبة
ساعة عدنا
وبالفعل دفيت ومعدتي ارتاحت للچاي
رجعت شربت
طلع علاج لمعدتي من جيبة
وبنادول شربتهن وفهمت اتصالة بالسيارة
ويمنى توصي عليه
صارت ثمانية وربع طلعنا
بين ازدحام الطريق والاشارات وصلنا
وية الوقت جهزت جنطتي لزم كفوفي
-منتظرچ وادري بيچ راح تبدعييين
بالامتحان يلة حبيبي سمي بسم الله
سميت بسم الله ونزلنا
وبقة وياية الى ان وصلني قريب
القاعات وطلع بعد ماگال منتظرج
برة
دخلت وبلشت بالحلول لمدة ساعتين
ونص خلصت ورجعت اشوف
اجوبتي وخلصنا وبدت القاعات
تفرغ طلعت لهاجس اللي لگيتة
اساساً منتظرني مقابيل القاعة
وممتزحزح من مكانة
-ابد لتحچييين ولتفكرين هسة
اعتبري الامتحان خلصصصص
وامشي
لزم كفي بدفو ومشى بية
بسرعة للسيارة
-لتصفنين ليل
-خاف .........
-لا خاف ولا غيرها لازم تنامين
-اي نعسانة
گلتها بتعب وغمضت عيوني
وكأن عيوني متتظرة هاللحظات
غمضتهن براحة وهو يمشي
وتوقف بعد مسافة
گبال فندق
-نزلي
فتحلي الباب ونزلت حجز وصعدنا نزل
جاب جنطة صغيرة بيهة ملابس
استغربت منين جابهة
-لتصفنين بين ماغسلتي وتجهزتي حضرتها
وشمرتها بالسيارة
فتحتها بيهة تراك الية والة ومنشفة
والفرش ومعجون الاسنان
دخلت الحمام غيرت ملابسي
وهو كذلك غطيت بالفراش جامدة
هادئة غمرني مثل دب باندا عملاق
دااااافي وغطيت بالنوم لوقت غير معلوم
اسمعة يرد على نوح
-حبيبي ارجع براحتك لا بايتين هنا
غلق الاتصال ورجعلي
فتحت ادية الة شمر نفسة
علية جعصني
-مشتاقتلك
همستها واني حاضنتة
-وشنو دواء الاشتياق
-النوم بعدني نعسانة
ماگال لا نام وياية الى
ان حسيت كافي فزيت دنيا
عصر والشمس مقبلة عالغروب
هو متمدد وشكلة هادئ المنظر
راسم لوحة خيالية من الجمال
گعدت يمه والغروب بدة يلون الغرفة
بدفو والشمس انصبت بذهب
اشعتها على وجهه وهو غافي
باوعتله وكلبي دگ معقولة الانسان
يوگع بالغرام بكل مرة يلقي نظرة
على وجه حبيبة
چانت ملامحه هادئة لدرجة
خفت يسمع انفاسي ويفز
أشعة الشمس جانت تمشي على بشرتة
السمرة لونت بشرته بلون برونزي يجنن
ورموشه الحلوة جانت ترسم خيال على جفونه
تزيدة وسامة
شعرة الخفيف وشواربة بين لونهم البني
الطبيعي من تحت الاشعة بلون ساحر
مديت ايدي لمست ذراعة وعضلاتة
ضحكت على تصرفي المراهق همست
وانا اتقربلة وابوسة بخفة
-هيبة حتى وهو نايم
حسيت ان هاللحظة لازم تتوثق
فتحت التلفون التقط صورة تزين
خلفية جهازي فز على صوت طكطكة
كامرة الموبايل بيدي وأنا أصوره
فتح عيونه بنعاس
وذيج الابتسامة المحبوسة
بزوايا شفته بدت تظهر
باوعلي بنظرة ذوبت روحي
وبصوته المتغير من أثر النوم همس
-حتى واني نايم ماخلصان من المعجبات
ابتسمت وجاي اگوم
مد إيده وسحبني من معصمي بسرعة بلمسة دافية خلتني أفقد توازني وأوكع بين أحضانه
جان صدره دافي وأنفاسه تضرب
مسامي من سحبني مسحب بس جسمي
سحب كل ذرة وعي بية
وگعت بحضنه وكأنما وگعت
بحفرة من نار وثلج بنفس الوقت
ملمس جلدة الدافي
اللي خلة مسامات جسمي كلها تفز
قشعريرة ناعمة بدت تسري من رگبتي وتنتشر
بأعصابي مثل تيار كهربائي رقيق يحيي
الحواس
حسيت بنبضه نبض هادئ وثگيل
عكسي اني اللي توتري خلا نبضي
يتسارع بجنون فبعد شهرين جفاء
المشاعر على أوجها
أطراف أصابعه الدافية
مشت على فكي وصعدت لورا أذني
أحس بدفو أصابعه وكأنها تذوب بجلدي تخترق الطبقات وتوصل لاعمق نقطة
بأحساسي كلما يقترب اكثر
أنفاسه الدافية والمثقلة بريحة النوم
والعطر الهادئ اللي مزين بشرتة
تضرب بمجرى نفسي تدوخني
تخليني أفقد القدرة على الرد
حسيت بشفايفه من تلامس جبيني
وتنتقل لوجهي
جلدي صار حساس لدرجة
أحس حتى بمرور الهوى بيناتنا
بذيج اللحظة جوة اشعة الشمس اللي قربت تختفي
اللي جانت تصبغ أجسادنا بلون الذهب
انمحت كل الحواجز المادية
ماكو اني ولا هو صرنا جسد واحد
يتنفس بلهفة ومشاعر تفيض اشتياق
بعد ايام زعل وابتعاد
لمسة إيده اللي استقرت بنعومة
على ظهري وضغطتني لحضنة
خلتني أحس بقمة الأمان والهدوء
ذبنا سوة والكون كله صار عبارة عن نبضة وحدة ونفس واحد وضوه غروب الشمس
غسل ايام الزعل والبعد ونهى كل
لحظات الغضب بينة
بعد ماغابت خيوط الشمس وحل الظلام
ماخذني لحضنة يعتذر بطريقتة ويعرفني
غلطي
الغرفة ظلام والاضوية
مطفية وبس ضوة جاي من حديقة الفندق
يعكس خيالنا واحنا غرگانين ببعض على شاشة
التلفزيون الطافية
متمسك بية ومحاوطتة
كأنما خايفين نبتعد والبرد يرجع يتسلل بينا
نايمة على صدرة محاوطني بيدة باس راسي
شم شعري وضحك
-بالله اني زعلان وياچ زاعلتي الحنة وياي
ليش
-منو يغسلي شعري وانت گوة تحاجيني
ذب نفس وبدة يشرحلي بطريقتة بهدوء
-ليل ذيچ الليلة من گلتيلي
الدنيا صارت سودة بعيني
مو لأن ما ردتچ تدرسين
بس لأن حسيت نفسي غريب عنچ
مو شريكچ اللي المفروض يشاركچ بقراراتچ الجبيرة انقهرت لأن ما وثقتي بية
وضميتي عليه موضوع يخصنا ثنينا
ردت احجي بطرف اصبعة غلق شفافي
-لتتوترين حبيبتي
قرب وجهه من وجهي
ولمس خدي بطرف أصابعه
بلمسة ناعمة تمحي أثر كل برود الشهرين اللي فاتو
-رغم غلطتي بس هالمدة
وأني أشوفچ تذبلين فوگ الكتب
والمصادر اللي صارت متفارگ إيدچ
فهمت البارحة من نزلت دموعج واني اعتذر
عن حقارة كلامي
فهمت إنچ چنتي خايفة تضيعين حلم
تعبتي عليه ست سنين
عرفت أن تفكيرچ چان مصبوب على
هالسنة ترتبين وضعج بيهة
ونبلش نبني عائلة فهمت أن السنة
لاشيء گدام تعبچ اللي جاي اشوفة
رفعت راسي وباوعت بعيونه
اللي جانت تلمع بالضوة الخافت مسح خدي وابتسم
-أني أسفة والله العظيم چان خوفي أكبر مني
اني اسفة لأن گلتلك هسة مو وكت طفل
عبالي تفهمني محسبتها صح واني
اعترف غلطت من ضميت عليك
وغلطت من مشيت بطريق وحدي
وهو الطريق لازم نمشي اثنينة
- لذلك حزت بخاطري
أني سندچ مو غريب حتى تخافين من ردة فعلي وتضمين عليه
زعلي چان من عدم الثقة مو من مسألة
التأجيل
نزلت دموعي وهو ابتسم وشدد قبضته عليه
وقربني اله اكثر
- مسحي دموعچ وانچبي
يااااابة اني الغلطان واني الاعتذر
وخليهة ببالچ اني وياچ هالسنة
لحد ما تگولين هاجس هسة صرت مستعدة نصير ثلاثة
ضحكت وهو كمل يعدل بخصلات
شعري المحاوطة وجهي
-وهسة يازعلانة نطلع نحتفل بهالانجاز
-يلة
گلتها وصوتي مليان فرح
وأخيراً انطوت صفحة الخلاف المرة
وبلشت حياتي ترجع لمسارها الصحيح
رغم روان وسوالفها بقت مثل نغزة صغيرة بگلبي
بس قررت ما أنطيها قيمة ولا أخليها تاخذ حيز بتفكيره
طلعنا بهالليلة وبغداد چانت غير
چانت لابسة أحلى ما عندها
طلعني لوقت متأخر
فرينا شوارعها شارع شارع
والهوا اللي يجي من دجلة چان يطرد كل هموم الشهرين اللي فاتوا
باوعت من شباك السيارة
شارع أبو نؤاس والناس كاعدة تضحك
المسگوف وريحته تملي المكان
بغداد بالليل مو مجرد مدينة
بغداد قصيدة أبوذية حزينة بس نهايتها دافية
رغم البرد بس متعة والسيارة تمشي بينا بهدوء
على نغمات أغنية كاظم وهو يغني
لبغداد
صفنت عالاجواء مرتاحة مستمتعة
قاطع تفكيري صوتة
-ها حبيبتي شو صفنتي
- أحس روحي هسة يله بدت تتنفس
تمسك بيدي وكمل الطريق
عبرنا من يم المنصور بحيويتها
والناس والضحك
بغداد بذاك اليوم چانت رائعة
والكهرباء من تطفى ببعض المناطق
وتشتغل بغيرها تسوي لوحة من الضوه
والظل تشبه مشاعري
لحظة ظلام ولحظة ضوة بي امل
سندت راسي على كتفه وأني
أباوع لمنارة جامع أم الطبول وهي تلوح من بعيد
وجمال المجسرات اللي مليانة
سيارات وناس تمر مسرعة من گدامنا
بغداد الليلة چانت شاهدة على عودة الروح
لجسدين تعبوا من الزعل بذيچ
الايام بقينة نحچي ونسولف
كأنما نريد نعوض صمت ذيچ الأيام
للفجر الى أن هدأت الشوارع
بس داخلنا جان اكو ضجيج من المشاعر الدافية
رجعنا بعدها للفندق وبسبب نومنا
بقينا سهرانين للفجر گاعدين
نتابع افلام الى ان صارت بال٥
طلعنا راجعين للبيت
وصلنا اني رجعني لبيتنا نمت
وهو غير ملابسة حتى يطلع
للدوام
غمرت نفسي بالبطانية الدافية
وهو يعدل الرتب مالتة
-جعل محد غيييرك يلبس نسر
رفع ايدة ضربلي تحية ضاحك
اجاني نزل راسة باسني
-اليوم ثواب سنوية امي
ماااوصيج مدام مجازة ايدچ
بيدهم حبيبتي
-من عيوني
-وصيت وطن عالمسواگ
وكل شي ينقص تگلولة
-يمتة ترجع
-العصر لأن الكل يجتمع
وعازم بيت ابو صعبة
-وروان وعمتها اكيييييد
گلتها بأنزعاج
-اكيييييد عازمينهم
بس احب اگلچ شغلة
باوعتلة صفح وهو گعد بصفي
-بعيدا عن حركة العين بعدين اطيح حظج
علمودها بس هالعين ماتمليها بس
وحدة بربوگ
جر وجهي حيل عضني من خدي
وگام
-ااااااي هسة مافهمت غزل كتل
-الاثنين طلعي كل الظنون من بالچ
النسوان وووين منروح موجودات
بس طير گلبي حط بسطح الاعداء
ضحك وطلع وگلبي الغبي رفرف
لكلامة
نمت ووقتت الجهاز للعشرة ونص گعدت
لبست شي مستور وانداريتلهم
من باب الترك
جدو واگف بالمطبخ يوجه بيهم
-بوووووية لا تفشلنا نهاد شني بوية
لحم قليل شووو خير من الله
كبري الوذرة ززززحمة من الناس
-هاي هي بوية انت ارتاح
-صباح الخيير
گلتها والتفتو ام يمنى
ويمنى وزوجة عمو كمال
رد جدو واشرلي
-صباح النور جدي تعاي
باس راسي وسألني
-شلونج بالامتحان
-الحمد لله جدو على الله
طلع جدو من المطبخ ورفعت راسها نهاد باوعتلي
-شنو توازيتي بسرعة قدمتي
مو هاي يمنى اجلت
يمنى انحرجت وردت بخجل علمودي
-ماما اني علمود الحمل
-وشنو هي صغيرونة
التفتتلي كملت كلامها
-شنو عمة انت صغيرونة لو هاجس صغير
هم سوي طفل
-الله كريم
ماعرت لكلامها اهمية نزلت
غيد وهي ذبتلها كلمة
-شنو عمة شدعوة هالنوم
-معدتي عمة الليل كلة سهرانة
اتقيأ مااگدر
-هاي بس انتن حبلتن شدعوة
ويلة تريگن بلا جرجرة خل نخلص
خليت ايدي وياهن اشتغل والحمد
لله اعرف كل شي بديت
وياهن شيسون اشارك الى
أن صار موعد الغدة اكلنا شي بسيط
وطلعنا بقية الطبخ صار بگراجنا لأن
عازمين رياجيل جيرانهم ويوزعون منة
زوجة عمو كمال هادئة
تشتغل بسكوت باوعتلي
-روحي ارتاحي اني موجودة
-لا خالة اني ماعندي
شي روحي انت ارتاحي
ابتسمت ونطقت بهدوء
-هي اللي نهاد محاوطتها تشوف
راحة
مشت وعيني بقت معلگة
وراهة هادئة مؤدبة احسها غااامضة
كذلك طفينة كل شي وبقت الحلاوة
باوعت شو كمية قليلة گلتلها
-عمة اني اسويها
-لتخربينها ترة عزيييمة وخطار
-لا ميرادلها شي
جابتلي المواد وبديت احمس
المواد بالزيت نشا وطحين
تمن الى أن صار احمر رشيت الهيل
وشوية ڤانيلا وضفت الشيرة اللي
سويتها على جهة للخليط
وبلشت اخلط حتى متتكتل ضفت
الجوز واللوز وطفيتها دخلت
علية بيدها السفريات ووياهة
جدو ابتسم
-شني هالريحة الطيبة جدي
-جدو انطيك شوية
نطت نهاد
-لتنطي سكرة مو زين
-جدو ماخذ علاجك
-اي جدي صبيلي گد خاشوكتين ثلاثة
صبيتلة وهي تناوشني صحون
واصب اخدتلها خاشوكة اكلت
-ها عمة شلونها
-زينة
-على طريقة بيبي سويتها
-اگول كلش مو طييييبة
ابتسم جدو بعد مااكل خاشوكتين منها
-طيييبة ياجدي كلش طيبة لوما
السكر جان كملت الصحن
طلع جدو وهي انكبست الحقد متأصل بدمها
للمغرب اجة هاجس
دخل للبيت تركتهم ودخلت ورا
-الله يساعدك حبيبي
باوع لوجهي وتقربلي لزم جبيني
-ليش وجهج أحمر
-من حرارة الطباخات
-تعبتي
-تعبك راحة عيوني
گويتلك ملابسك
طلعتلة الدشداشة النيلي
وطلعت الساعة والسبحة
والشحاطة بين ماسبح وطلع
لبس ووگفت ارشلة عطر
دگ تلفونة
-ياالله اجو الجماعة عليكم مرت مصعب
والبقية
فهمت علي لبست كلابية قديفة
مرتبة ولفيت حجابي
وررحت مناك
سلمت على أديان وعمة روان
وهي وگفت مدتلي كفها صافحتها
گالت
-هلو خالة
-هلوو
بس گعدت وياهم شوية خلينة
يمهم غيد ويمنى
ورجعنا نصب بگراجنا لأن
نصبو الميوزة برة
اني وام يمنى وميعاد
وزوجة عمو كمال
وطن وهاجس يشيلون الاكل
خلصنا
اخذنا عشا النسوان ورحنا
سفرة بالصالة گعدنا مجتمعين
اني بصفي اديان ندستني
-سمعتي اخر موديل
-شنووو
- روان مسوية گروب ثلاثي وياهم
-ههههههههه شفتة وشفت رزالة هاجس
ومصعب
-الله عليچ
-والله ليش مشفتي
-لا حالفة ماالمس تلفونة
-لا اني سمعتة وهو يدز رسالة صوتية
-يمتة ولچ
-بالليل قبل خمس ايام هيچ
-شلووون سمعتي لو هو سمعچ
-هوووو بالهول عادي فاتح الصوت
وسمعت الرسالة الصوتية
-شگاللهة
-هاجس گاللهة عيب عمو شنو
احنة بنات بعمرج ولامتنا وتدزين
ملصقات قلوب
-كذببببببب ياعديمة الكرامة
ورجلي الشفية
-گاللهة حذفي عمو زحمة
-كلف رووووحة ابو خشم
-ههههههههههههههه
اجتنا حچاية ميعاد
-متضحكونا وياكم بنات
گالتها بغل وحقارة
ردت اديان
-ليل تريد توكل زهورة
گلتلها بعدها صغيرة هاي عود
انت الدكتورة ومتعرفين
ابتسمت على سرعة بديهتها
ونهاد استغلت الكلام
-اذا هيج تحبين الجهال سوووويلچ طفل
مارديت ولا نفهتلها
لحد مخلصنا جمعنا الصحون وچانت كلها سفريات
راحت للزبل
سوينا چاي طلعت للمطبخ اصبلهم
حتى للرياجيل برة اسمع صوتة
داخل ناحية المطبخ
فجأة اختفى عبالي راح لغرفتة
القديمة مديت راسي
من باب المطبخ شفتة واگف بنص
الممر وروان واگفة گبالة وتحچي
بحرگة
تقدمت ناحيتهم وهي رفعت صوتها
ووگعت دموعها
-لا عمو براحتك احنة هم
ثقلنا عليك بكل شي
-بابا شبيچ شو تشمرين حچي
وگفت يمهم سألتة
-عيوني تاخذ صينية الچاي
-دقيقة حبيبتي بس افهم
هي انخبصت
-لا عمو هاي هي بعدين نحچي
-گتلج عمو وعمتج وافقت ياخذكم
السايق ابو الخط مالتج
-ماكو داعي عمو اني هم مو صغيرة
اعتمد على نفسي بعد
الحياة بدت تتغير والناس هم
دارت وجهها ومشت هو رجع وياية
للمطبخ
-شكو
-شو هي وعمتها مسويلهم زعلة لأن اعتذرت
عن الزيارة للنجف واجرتلهم سيارة
ودفعت الاجرة
سكتت مگلت شي خلي هو يحل
الموضوع لأن هو اللي انطاهة وجه زايد
ثواني اخذ الصينية وطلع
رجع مدلي راسة من الباب
- جايين ولد عمي جمال لتطلعين للگراج
-تغار ياحلو
-احتررررررگ
گالهة وشمرلي بوسة وطلع
شلت صينية الچاي وطلعت
وديتها للغرفة روان ماكو
ثواني ودخلت للغرفة گعدت
بصف عمتها وجهها احمر وعيونها
ناطة بچي
مجاي افهم هالبنية شتريد بالضبط
أديان گامت وياية
-حبيبتي خل ارضع زهورة
-تعاي يمي بغرفة هاجس
دخلت غرفتة بعدها على حطتها
گعدت عالسرير باوعتلي
-روان طلعت بالكراج لمصعب
-الله عليچ
-والله چانت تحجي ويا شفتها
من الشباك بالصالة
-وحتى ويا هاجس حچت
-اليوووم اشوووف شنو مرضها هالبنية
گالتهة وفتحت تلفونها اتصلت بمصعب
فتحت سبيكر وقللت صوت الجهاز
-ها عيوني
-ها ال......
حچة كلمة سخيفة وهي ضربت جبينها
-لسانك عيب ناس يمك
-لا بالسيارة رايح اجيب جگايري
گولي حبيبتي
-روان شرادت منك بالگراج
-مو گتلچ رادت اخذهم للنجف
وگلتلهم بسبب الترقية هواي امور
تغيرت وشغلنا ثگل عاتبتني
تگول بعد ماازعجكم وراح اعتمد
على نفسي شو حتى عمتها حسيتها مثگلة
وجهها بالسلام
-عيارة نسوووان
-متتعايرين علية شبيج ......
ماخلتة كمل كلامة السخيف غلقتة
-عذراً عالكلام ال+18
زوجي فاسد
-زووووجي افسسسسد بس تركي
المووووضوع
والله الكلام الگالتة لزوجج نفسة
گالتة لهاجس قبل شووووية
-گتلج مررريضة أهتمام ياعيوني
تلعب بمشااااااعرهم والله
واحنة نحچي صدى صرخة صدح
طلعنا نرررركض للصالة لگيناهم مخبوصين
روان فاقدة الوعي بحضن عمتها
والكل حواليهة نهاد تضرب بخدها
والبنات يفركون بايدها يمنى من الهبطة
مگادرة تگوم تفحصها
نزلت راسي على صدرها
وسألتهم
-شبيييييهة شصار
عمتها تبچي
-ماااادري شو گالت گلبي
يوجعني وخلت راسها على
كتفي وهمدت فد مرة
رحت للمشتمل جبت جنطتي الطبية
ورجعت لگيت هاجس وياهم
وعمتها تبچي خبصت الدنيا
-شوية عيوووني خل اشوف شبيهة
علاماتها الحيوية طبيعية
نبضها طبيييعي
واني احچي نوح دگ الباب ودخل
صاحتة ام يمنى دخل وسألني
-شبيهة ليل
-نبضها طبيعي
نوح طلع الجهاز من يمك افحص سكرها
عيني تشخصت على اجفانها بس چك
ايدها للفحص جفنها تحرك ابتسمت
وفهمت
-نوح سكرها شلونة
-طبيعي جدا
-وهذا ضغطها هم طبيعي ومنازل بس درجتين
فحصت حدقة عينها طبيعية وفهمت اللعبة بسرعة
انسابت من ايد عمتها ووگعت عالقنفة
مسنودة انفتحت العباية والتوب ابو الفراولة
بين وكتفها طلع والحجاب مفتوح والشعر
مرتب
عمتها صاحت مرعوبة مدري تتعاير
-رررررررراحت البنية يممممة
-شيلوووهة للسيارة خل ناخذها للمستشفى
هاجس گال لبنات عمتة
اشرت لنوح
-دقيقة هاجس بس يشوفوها فاقدة
وعيها گبل للانعاش
نوح ركز وياية بس گتلة كلمة وحدة فهمني
-مأجوسة نوح
ابتسم طلع سرنجة من الجنطة فتحهة
وتقدملها عمتها خافت
-شبيهة يمة
-لا سلامات بس نتأكد من ردة
فعلها العصبية
لزم نوح اصبعها وجگها بقوة نزت
وكف نوح
-مبيهة شي ليل غسلي وجها
شوية يجوز فقدت الوعي لأن مماكلة
هو شگد ضغطها ليل
-نازل درجتين
مو هواية
اشر نوح لهاجس وطلعو واني
فهمت علتها وفعلا تحب تثير
الاستعطاف لزمت المي وهي
سوت نفسها تأن وبدت تستعيد
وعيها
كلاص مي كامل بعز البرد طشيتة
عليها وهي فتحت عينها
-شو حبيبتي مدام صحيتي لازم
ترفعين رجليج شوية
-عممممة
-سوووودة على عمتچ
-عليمن خالة سهلة بس رفعي
رجليها ترة ماكو شي
ردت نهاد
-شلون ماكو شي وهي فقدت الوعي
ردت يمنى بفهاوة وهي تاكل حب
مثل الفارة ميفارگها تكرز
-ماما احنة اطباء ونفهم ترة
صدگ مبيهة شي خير ان شاء الله
اديان مصدومة من قوة التمثيل
وتباوع ويمنى
سألتني بالانجليزي وابتسامة هبلة
انرسمت على وجها
(هي تحب تكون محط الاهتمام )
-She likes to be the center of attention
گوة كتمت ضحكتي ورديت
(ادري من اول دقيقة شفتها بيهة)
-I knew it from the very first moment
ردت عمتها
-عيوني ليش تحچن بالانجليزي بيهة شي
-لا خالة تسألني عن حالة طبية عدنا
بالمستشفى
طلعت واديان وياية تدردم
-ولچ شلون لكطتيها
-اووووه تجي الاف الحالات مثلها
للمستشفى والله يملون الاسرة ويربكون
عملنا بس لمجرد اثارة التعاطف
-تعااااي ولچ شرطنتي ويا يمنى جوة
-هههههههههههه لچ گالت هاي تحب
تكون مركز الاهتمام گلتلها فهمتها من اول لحظة
-والله سالفة الانجليزي تفييييد بالقشب
تقشبين ومحد يفهم
-ههههههههههههه دخلي دوووورات
عاد نقشب ازوووواجنا براحتنا
خلصت الزيارة وراحو
وهي طلعت گوة تمشي ومسنودة
على عمتها بالگراج صاحلي هاجس
راح اوصلهم سويلنة عشا ترة مااكلت
وصلهم احسها ارتاحت من اخذهم
يجوز صاااارت مثل الصل وصحت
رجعت للبيت ساعة ورجع هاجس
غير ملابسة واجاني واني بالمطبخ
اسوي عشا لأن هو ممتعشي
واني بس گعدت يمهم مااكلت
التفتت بس برمودة وتشيرت نص
ردن وتلفونة بيدة وصلي طير خدي
ببوسة عالماشي سد التلفون
والتفتتلي واني اخلي الصحون
عالميز
بثواني طرت بالهوا ورفعني مكعدني
عالكاونتر
-شيرررريد سيادة الرائد
-مأجوووسة شنوو والقرد
نوح ليش ضحك وفهم بسرعة
عليچ ونگر البنية نيدل بأصبعها
خلاهة صحت
-هههههههههههه هذا ياحلوووو
مصطلح نستخدمة للمتمارض
اللي يجي للمستشفى حتى يثير
تعاطف اهلة او غيرهم
-فسررري اكثررر يابربوگ
شلون عرفتي
-المووووضوع سهل
مراقبة العلامات الحيوية المقياس الحقيقي
للمرض مثلا
المريض الفاقد للوعي اما عندة تسارع نبض
او تباطؤ وهي نبضها طبيعي
بحالات المرض الحقيقية
حدقة العين تكون متسعة وهي حدقتها مستقرة
التعرق وشحوب الوجه ملازمات لحالات
الفقدان هي خدودها احمر من الطماطة
ضحك ولكزني بخصري يستفسر
-كملي دكتورتي
-اييييي يا حلو نكمل
مثلا بحالات فقدان الوعي الحقيقية
المريض يوگع بحركات غير متناسقة
واحيانا يتعرض لأصابات مثلا يوگع
على حافة كرسي او بالگاع
وهي وگعت بهدوء بحضن عمتها وهذا نسمي
سقوط متناسق يعني متعمدة الوگعة بس بنفس الوقت تحمي جسمها خاف تنضرب وشفتها
شلون وگعت تمايلت عالقنفة تشوفكم
التوب الصلوخ المرسومة علي فراولة
جوة عبايتها ماعرفنا عدها حالة
اغماء لو اغراء
ضحك ولمني بين ادي عض خدي
-ياتوب يافراولة ياااابة
علوة الفوووواكه كلها هنااااااا
-هاجس البنية مو طبيعية والله
-فاهمچ ملاحظ هووواية
تصرفات بعدييين نسولف
بيهة عشيييني
يگووولون انت مسوية الحلاوة
-اييييي على طريقة بيبي
-هههههههههههه لو گايلة لعماتي
چان طيرنچ انت والجدر
-والله گلتلهم اصلا وعمة نهاد
گالت اگول مو طيبة جدو گال
اطيب حلاوة ماكلها
-ايييييي جدي يطبل لعذبة حتى
لو تحطلة زرنيخ بالاكل
-وحفيدة
-حفييييدة عاشق
للحلاوة
گالها ونزلني للگاع گعدنا ناكل وكل شوية
ضاحك
- طلعتي موووو هينة
شلون لگطتيهة
مديت إيدي سحبته من ياخة تيشيرته حيل
لحد ما صار وجهه مقابل وجهي تماماً
انصدم باوع لإيدي المظبوبة على ياخته
ورفعت عينه لعيوني وهو يضحك ضحكة استهزاء حلوة گال بصوت متلاعب
-باعي التحدي ولچ أنتِ گد هالحركة
تدرين هاي الياخة كم رتبة مرت عليها
رفعت راسي بتكبر وشمرت ضفيرتي ليورة
-گدها ونصين اسمع زين سيادة الرائد
لا عبالك عضلاتك تخوفني
ارررريد اوضحلك شغلة
أني مو بس ألگف المأجوسيين
أني الخاين أشمه من بعيد
فكيف بيك وانت عاااايش وياي
اياااااك تخووووني حذرررتك
وقد اعذر من انذر
نزلت إيدي بنعومة وبديت أعدل بياخة تيشيرته وأطبطب على كتافه
باوع لادية وهي تتحرك على كتافه
منا ومنا وعيونه بدت تلمع بمكر
قبل لا أستوعب فز من مكانه مثل الأسد
وأني خفيت رجلية للريح ردت أنهزم
بس وين
بلمحة بصر شالني من خصري ورفعني عن الگاع
صرت بالهوى ورجلية طايرة
صرخت وضحكتي ترن بالمطبخ
-أسفة والله أسفة
ثبتني وهو رافعني وگال
-لااااا وين الآسفة شو قبل شوية جنتي بطلة وتلگفين الخاين وتهددددين
- يا بطلة أصلاً أني أكبببر جبانة بالتاريخ
-والسحلتني من ياختي قبل شوية
وين راحت
بده يهز بية يمين ويسار مثل اللعابة وأني متمسكة بكتافه وأضحك من كل گلبي وهو يلح عليه
-احچيييي والسحلتني من ياختي شتسميها
-وحددددة غبية والله غبية وما تعرف مصلحتها
-تعترفين يعني
-أعترف وأبصم بالعشرة
حضنت خصرة ونزلت رجلية
للگاع باوعلي مستعد للهجوم
صفن بوجهي واني احاوط
رگبتة وعيني بعينة وادي حاوطت
خصري مثل قيد داااافي
ايدي مشت على رگبتة وخلف اذنة
و انصهرت كل دفاعاتة
همست بصوت يادوب ينسمع
- أعترف
ابتسامة دافية نورت وجها وتقرب
واختلط نفسة بنفسي
-بشنووو
- اني وگعت بغرام العدو
واعترف هاي اول معركة أخسرها
وأحلى هزيمة جربتها بحياتي
ضحكته اختفت وحلت بمكانها نظرة حب عميقة سحبني لحضنه وادي غاصت بخصري
وهو يدندن لرياض أحمد
- حبيتك حبيتك وانه أدري
بدربي ويه أدروبك ما يتلاگه
بس حبك قدري المكتوب
تدري شكد حملني ذنوب
