رواية دخيله الشيخ زين العابدين الفصل السادس والعشرون بقلم أوتار حزينه
مالك
طبيت للبيت شايل تاليا رحت للمطبخ
انطيتها لامي ورجعت جبت الغراض من السياره رجعت خليتهن على الميز حجيت
هذا الجبن حجيه وجبتلج لبن عرب اصلي مو مزور
ابتسمت وردت
تسلم يمه بس ماهو مثل اليم اهلي ذاك اصلي من صدك
اي والله كلشي هناك طيب ويختلف طعمه عن هنا
هزت راسها بأي كعدت يمها سألت
ها يمه شرادو بيت حجي مصطفى
والله يايمه يريدون اختك لأبنهم
عكدت حواجبي وهزيت راسي كملت
أجتي أمه وأخته وكالن نريدها لوسيم وأحنا حاضرين لأي شي تريدو
مااعدنا مره الو رجعليهم خبر يمه وكولي لهم مانريد نزوجها هسه
والله يايمه الولد صح اذاك بذاك اليوم بس شفتو شصار به وشسو هو واهلو ظلو رايحين جايين عليك وماعافوك ابد يعني الي اريد اكله الك الولد خوش ولد واهله بعد خوش ناس
اي واخته سمعتها زفت وجابتلهم العار
امي جانت تعرف هاي مكسورة الرگبه شسوت
بيهم كملت
يمه اعرف كلش زين هم خوش ناس ووسيم ورده مال الله شاب علي الاعتماد واعرفو راح يخاف الله بنوار
بس السمعه يمه العالم كلها عرفت اختو شسوت
نزلت راسهم بالوحل ووي منو وي رجل اختها
ااوف يمه والله من شفتها لاختو گلبي انمرد عليها شبيها ياحظي تخبل چنها
لعابه حلوه ونازكه وعبالك انكليزيه
صورتها اجتي بين عيوني العيون والشعر ثوره بركان من وره لونه الحلو بس طبع نار وجلمتها توجع من تحجي كملت
حظها وحظ امها وابوها لو اكو وحده تنام وي رجل اختها وعرسها ويا بعد جم
يوم....!!
هذا الصار يمه وجابت السمعه المو حلوه لاهلها
واذتهم جثير
استغفر الله ياربي الولد مابي عيب لجن هالسالفه الرديه هي القطعت نصيبو من يمنا
كمت لحيلي شفت نوار واكفه يم باب المطبخ
الداخلي سمعت الحجي كلو دارت وجهها وراحت
ثاني يوم العصر كاعد وحدي بالمكتب داشتغل بشير راح يودي مرته للدكتورة مال اسنان وسيم طب سلم بصوت مخنوك دحكت
عليه صافن عليه ووجهه مطعون كال
مالك اكدر اعرف ليش رفضتني ؟ شنو السبب الي يخليك ماتقبل تنطيني اختك
ماردت اكله السبب ماردت اجرحه اعرفو بس يسمعها مني راح تذبحو رديت
هي مو مفكرة بالزواج ولا تريد تزوج
صفن عليه بقهر رد
موو هو هذا السبب احجي الصدك كلي غير شي ولا تجذب عليه
كمت لحيلي رديت
وسيم كتلك هي ماتريد تزوج اختي بعدها زغيره ومو مال زواج
هز راسو بلااا وجاوبني
زغيره مالك وهي شايله بيتك وبنتك
سكتت تقدم خطوه وجهه صار دم كمل بغصه
اختي السبب موو
يااخت شجاي تحجي اانت
صاح بيه بغضب
تعرررف تعرف مالك لاتسوي نفسك غشيم الكل يعرف المنطقه تعرف شصار بينا لاتكولي انت الي بصفنا ماعرفت اختي شسوت بينا وشلون خلت راسنا بالطين
مارديت ادحك علي عيونه غوركت ابتسم بألم
كول هذا السبب ماريد انطيك اختي لاتظل تلف وادور كول من وره سمعتنا الزفت انت رافض تنطيني نوار
ووسيم اانت مابيك شي وو
مااكملت كلامي دار وجهه وطلع من يمي بسرعه
ااستغفر الله ياربي ولك والله لو ما اختك الا اكلك گبع واخذ
🌿🌿🌿🌿
ليان
رحت اني وماما حجينه وي ام نوار وطلبناها لوسيم المره ماحجت شي بس انتبهت الها وجهها تغير
ماما ماانتبهت رجعنا للبيت ومااعرف ليش صار عندي احساس هم راح يرفضون من وره الصار بينا من تعابير وجه امها كلت هاي تعرف وماراح ينطوها لاخويه واحساسي طلع صدك رفضو...وسيم سمع ووجهه انطعن صفن عليه بجمود
ماحجه شي اخذ السويج وطلع من يمنا امي صاحته ماارد ابويه بين بوجهه القهر
امي رجعت مخنوكه من وره حجت
ليش رفضو شبي ابني ورده مال الله ومو ناقصه شي
كمت ورديت بقهر
السبب مو وسيم ماما
صفنت عليه افتهمت وجهها انطعن باوعت لابويه
غمض عيونه بتعب ووجهه مثلها بين بي القهر
حسبي الله بيها حتى اخويه ماسلم من فضيحتها
حجيت بخنكه وطلعت من يمهم رحت للمشتل خابرته بالطريق مارد عفته كلت خلي براحته يهدا واحجي ويا
وصلت المشتل فتحت والتهيت بالشغل روان اجتي هي وامها اشترن كم سندانه كعدن شويه يمي وبعدين راحن خابرت
وسيم مارد دزيت رساله
على الواتس
هلو وسيم وين انت ظل بالي عليك رد عليه اريد اطمن عليك
شافها رد
عوفيني هسه ليان
ذبيت حسره وعفته براحته المغرب صار واني ملتهيه بالشغل والزبائن الي تروح وتجي كاعده ارتب بسندانه لزبونه طلبت تشكيله نباتات بيها جرس اندك رفعت راسي واحد طب بزي عسكري صفنت علي واختنگت من شفت بيه ايهم نزلت راسي بسرعه تقرب وحجه
مساء الخير
اهلا وسهلا تفضل رايد شي
والله اريد سندانه مرتبه بس ورد يعني هيج شي حلو وياريت بي ريحه طيبه
اكو هوايه ورد عطرة طيب
مثل شنو
تفضل شوف هذا الممر كله ورد وبي ريحه
راح للممر ظل يتفرج ويشم العطور شال اثنين واجه عليه خلاهن على الميز
وكال
هذني ريحه عطرهن تخبل
هذا ياسمين شامي متسلق يعني لازم تزرعه بالحديقه
اي عادي ازرعه وهاي الحلوه
هاي رزاقي هم بالحديقه ينزرع
تمام اريدهن اثنينهن بلا زحمه
ادلل هسه اجهزهن الك
احجي ويا بدون مااباوع اله
شكد تأمرين
عشره
انطاني الفلوس مديت ايدي ماعافهن رفعت راسي صفن بوجهي ورفع حواجبه خزرته
بضوجه وعفت الفلوس حجه بسرعه
اسف بس ردت اسالج يحتاجن سماد
لااا
رديت بنترة وعفته كلت
خلي الفلوس على الميز
لهيت روحي بالسندانه مااباوع اله شكله والزي
الي لابسه ذكرني بواحد اني مو ناسيته ولا نسيت السواه بيه
اثره بعده بگلبي وروحي واذيته هو وذيج وصلت حتى لاخويه الي مااعرف شلون راح يكدر يتجاوز رفض بيت نوار اله من وراهم
سمعت جرس الباب رفعت راسي طالع وخال الفلوس على الميز ماكدرت اظل بالمشتل من وره وسيم امي خابرتني كالت رجع وحاله حال
سديته وطلعت بسرعه اريد اروح اشوفه ركبت سيارتي رجعت للبيت اسوق وافكر
بي خايفه علي من القهر خايفه لايصير بي شي
اخويه من النوع الكتوم مايحجي شي يخلي قهره بگلبه ويكتمه اعرفه مقهور من وره الصار واعرفه گطع اي صله وي ولد منطقتنا من وره لارا والسوته عزل نفسه عن الكل حتى ولد خالتي كام مايطلع وياهم
ولا يروح سفرات او عزايم
رفعت راسي باوعت بالمرايه شفت سياره بيضه مضلله ورايه طبيت شارعنا وصلت
والسياره البيضه وكفت براس الفرع نزلت من سيارتي باوعت الها
مشتغله ومايتحرك
مااعرف ليش اجاني احساس هذا ايهم گلبي نغزني وكام يدك بجنون
اني واكفه سياره اجتي عرفتها سياره مالك وكف نزل باوع عليه درت وجهي منه ردت اطب حجه
مسااء الخير
وكفت باوعت علي مبين علي التوتر رديت مختصر
هلااا
سال
وسيم موجود
اي ليش تسال
هاا لا هيج بس
تريد تطمن علي بعد ماعرف ليش انت رفضته مووو
صفن عليه كملت بغضب
شوف ااستاذ مثل مااحنا عدنا ماضي،انت هم عندك ماضي،وانت تعرف كلش زين اني على شنو جاي
احجي
عكد حواجبه كملت
الفرق بينك وبين وسيم جبير كلش
انت،، اشرت علي باصبعي وكملت بحقد
انت كتلت نفس بريئه من وره سوالفك التعرفها كلش زين بس اخويه ما اذى احد بالعكس هو تأذى يعني هو الضحيه مو الجلاد
ااني
انت شنو ومنو حتى تحكم علي او علينا.. منو انتو حتى تباوعون النا بااستصغار گلي
شلون تريد الله يغفر لك السويته بمرتك اذا انت هسه ماتكدر تنسه الصار بينا واخذت ذنب اخويه بذنب غيره
هااي مو مثل هاي
رد بخنگه ابتسمت بألم
قنع روحك بهل الحجي جذب عليها مالك حتى يرتاح ضميرك
مارد دار وجهه مني عفته وطبيت لبيتنا روحي ممروده ومقهوره على اخويه جان كاعد بالصاله وجهه مطعون وصاير دم
ابويه يمه هو وامي سلمت
ردو وهو لاا
صفنت علي گلبي انمرد من شفت حاله رفع راسه باوع عليه عيونه حمر وكاتم قهره بگلبه حجه بغصه
شفتي ليان مو بس انتي تأذيتي اني هم تأذيت مثلج اخوج صارت علي سمعه من وره ذيج الي ماخافت الله بينا
كام لحيله كمل بصوت مخنوك
البنيه الي ردتها وحبيتها اهلها رفضوني من وره سمعتنا رفضوني لان اني مااشرفهم ولا اهلي يشرفون بعد اي احد
امي كامت تبجي ابويه مايباوع علي مقهور وصاير فد مرة
شاريد احجي شلون اريد اواسيه واني اعرف كلامه كله صح احنا بيت حجي مصطفى صارت علينا سمعه من ورة اختي الي فضحتنا بالمنطقه وصرت
اني وياها سالفه بالحلوك
الكل يعرف هي خانتني وي رجلي وعرسنا بعد كم يوم اباوع لاخويه
انهيار بداخله وقهر قوي بگلبه صافن علينا ويكرر
حسبي الله عليج لارا وعلى السويتي بينا انتي وذاك الگواد حسبي الله ونعم الوكيل اذيتونا كلنا وخليتوني امشي وماارفع راسي بين الناس
رديت علي بصوت مخنوك
وسيم اانت ماعليك ليش تنزل راسك الخطأ منهم هم،،،،هم الي ينزلون راسهم مو انت
منووو هي ليااان
صاح بيه وكمل بقهر وعيون مغوركه
موو اااختج وااختي مووو بنت هذا البيت مو كاعده بهل الشارع الي سمعو
كل الجيران هي شسوت وشصخمت وي ذاك العار شلون تريديني ارفع راسي بعد السوته ولكم ااخ والله من اطب للشارع احس
كل الجوارين تحجي عليه
بابا كام لحيله وانسحب من يمنا راح لغرفته هو سكت وكعد لازم راسه ماما ماحجت شي بس تبجي
البيت دخل بحاله حزن من وره وسيم الي التزم الصمت بس صافن وما يحجي اي كلمه حتى اكل كام ماياكل وترك الشغل بالشركه والمكتب كعد بغرفته وعزل نفسه عن الكل
حجيت ويا اريد اطلعه من هاي الحاله لان خفت لا
القهر يأذيه ويسويله شي
مافاد كلامي لا اني ولا ماما وبابا ظل عازل روحه
بغرفته والاكل يروح ليمه يرجع مو ماكل شي
وره كم يوم رجعت من المشتل بليل افكر بي وشايله همه كلت راح يصير بي شي من قله الاكل
والتفكير
وكفت سيارتي يم بيتنا نزلت باب بيت الافندي انفتح ماباوعت علي سمعت صوته
عم اكرر اعتذاري الك وياريت ماتزعل مني
لا ابني مو زعلان منك
رفعت راسي جان بابا جاي من يمه عكدت حواجبي من شفت وجهه صاير دم ومبين علي القهر عرفته راح يحجي ويا بموضوع
اخويه ونوار وهم رفض
ظليت واكفه الما تقرب بابا وعيوني على ذاك الي تجنب يباوع عليه طب لبيته وسد الباب
بابا ما حجه شي طب منزل راسه مشيت ويا وحجيت بغضب
بابا ليش رحت علي ليش نزلت نفسك اله
طبينا للمطبخ امي هناك كاعده وصافنه كملت بقهر
موو كالو لااا مو رفضو اخويه ليش رحت مره
اللخ ياابابا
رررحت لخااطر اخوج كلت بلكي يقبل اذا شافني
اجيت برجلي علي كلت راح يخجل مني ويقبل ينطي اخته لوسيم
رد علي بخنكه وكمل
ااخوج مو زين ليان وراح يوكع علينا من ورة القهر
وقله الاكل
سكتت كعد يم ماما تعبان ردد
وسيم انكسر ولكم ابني مكسور والقهر راح يقتله رفضهم اله فتح جروح بعدها تنزف وماطابت
غمضت عيوني بقوه ماما ردت وهي تبجي
شاسويله ياربي اروح مرة اللخ عليهم اتوسل بامها تقنعهم يرضون بي كولو اليه شاسوي اله حتى يرتاح ويطلع من هالسجن الي حبس روحه بي
لااتروحين ولا تجين الكلمه لمالك وهو الي رافض وسيم من وره اا
سكت وردد بقهر وغصه
ااخ يااربي لو ميته ولا مسويه السوته نزلت راسي وراسنا كلنا وماخلت النا قدر بين الناس من حسبي الله ونعم الوكيل عليها هي وذاك
🌿🌿🌿🌿🌿
ايهم
دخلنا انذار من وره داعش الي احتل مناطق واسعه من العراق والاخبار وصلت النا صار على مشارف بغداد
كاعد بالصاله يمي امي تقتنع بيه ابطل من هالوظيفه لان انقتل كم واحد من الشرطه واني رافض.. لارا اجتي شايله الجاي بطنها كبرانه وبشهرها الاخير درت وجهي منها
كلما اشوفها روحي تختنك ويصير ظلام بعيوني
حجت وياي
الجاي ايهم
رديت باعصاب
خلي هنا وولي من كدامي
خلته على الطبله وحجت بخنگه
ايهم تره تعبت من هاي القسوه والمعامله مو لخاطري اني لخاطرك ابني الي راح يجي انسه الصار وخلينا نعيش مثل باقي المتزوجين
لاراا روحي وخلي هادئ بهل كم يوم الينزل بيهن يمنا
عمه اني ماحجيت شي يخلي يعصب كل الي
اريده نعيش حالنا حال
غيرنا
كمت لحيلي اخزر بيها امي فزت بخوف ذيج رجعت ليوره ولزمت بطنها رديت اكزكز من اعصابي
ووولج ااني وياااج ابدا ماراح نصير مثل ماتريدين ااانتي مستحيل احسبج زوجه اليه انتي خدااامه هنا خدامه لامي واليه غير هالشي مااتصيرين
لييش ايهم ليش مو اني احبك وسويت السويته لان حبيتك حب جبير
صحت بجنون
وااااني مااحبج ااكرهج واموت منج گلبي هذااااا
ضربته بقوه امي لزمتني
اياد نزل بسرعه واجه عليه كملت بجنون
يختنك وووولج من يشوفج
دكيت علي مرة اللخ اخويه لزمني كملت بجنون
هذاااااا حب بس ليااان هي وبس ااي حبيتها وللموت راح اظل احبها لموووت ولج احب ليان سمعتتيني
وووابنك شنو ذنبه بهل الكره
صاحت بي وهي تبجي رديت بصياح
ذنبه ااااابنج اانتي ذنبه انطاه ام ساااقطه ضحكت على ابوه وخلته يصير مضحكه للكل
كااافي ايهم كافي تصيح واانتي امشي من كدامه كلما يجي تلحين عليه
بهل السوالف شبيج مااا تعرفين شسويتي بيه
وشصخمتي بأختج
اخويه انهد بيها مشت من يمنا تبجي كعدت مهدود حيلي امي كعدت يمي تردد
بقهر
شلون راح تفض وياك ووياها فهمني راح تظل هيج اعصاب وقاهر روحك
من وراها
رديت بخنگه
ادعيلي يمه اااموت واخلص
اسم الله عليك يمه ليش هيج تحجي وتقهرني
جاوبتني كمت راسي ثكيل ويوجعني كلش اياد لزمني من شافني اريد اطلع
وين رايح
اريد اطلع اشم هوه اذا اظل هنا راح اگبرها لهاي الساقطه
طلعت وامي لحكتني للباب لزمتني من ايدي وبتوسل ودموع حجت
لاتشرب يمه لاتغضب الله عليك لاتقهرني يااايهم بهل الشي
مااشرب يمه وعوفيني رحمه لاهلج
سحبت ايدي منها ورحت لسيارتي صعدت وطلعت من يم بيت اهلي امي
بالباب واكفه وتباوع عليه بقهر
ااخ ااخ ياايايمه شسويت بحالي ذبحت روحي بايدي اني الي كتلت نفسي من دنت على هيج وحده دايحه وساقطه اي ذره خجل ماعدها
مثل كل اجازه اروح واوكف يم مشتل ليان غيرت السياره حتى ماتعرفني
واكثر من مرة امشي وراها وااوصلها لبيت اهلها
وصلت وكفت مسافه على
الجهه الثانيه
سندت راسي ليوره وصفنت على المشتل الذكريات
اجتي كدامي كمت اشوف روحي يمها اتغزل بيها تضحك بخجل والعيون
تلمع غمضت رجعت
بالذاكره ليوره مرة طبيت مالكيتها بالمشتل صحت
ليونه وينج
هيااني اايهم جوه
سمعت صوتها من اخر المشتل
مشيت الها ادور عليها لمحت حركه بين اشجار
عاليه حجيت بضحك
اميره الغابه وينها
ههه بنص الاشجار
جاوبت وطلعت من نص اشجار عاليه
وكلها ورق ابتسمت وگلبي كام يدك بجنون بس شاف الخلقه الي عشگتها بموت
هااا شنو شجايب عشه
اي
رديت وصفنت على شعرها هوسه حلوه وكله ورق اشجار مديت ايدي وخرت كم ورقه
عيوني صارت بعيونها خجلانه والخدود حمر
لزمت گلبي بقوه وعصرته فتحت صفنت بجمود على المشتل رددت بقهر وبغصه
هناك روحي وحياتي الي بعتها من ورة وحدة رخيصه ماتسوالها فلس
سندت راسي على الستيرن مخنوك والهم والقهر
كاتلني رددت بقهر وبغصه وحرگه گلب
ااخ يابه ااخ شسويت بروحي وشلون راح اكدر
انسى غلطت يارب وغلطتي كسرت ظهري وخلتني ميت واتنفس الهوه موو عايش اني ياربي ولا جاي احس
اني مثل باقي البشر ضعت واني الضيعت روحي اني الي صخمتها من رگضت
وره شهوتي ورغبتي
عيوني راحت ليان واكفه
يم المشتل قفلته تمشت ليم الاسواق طلعت وره
مشوار تضحك وي الحجي الي طلع وراها
ذبيت حسره من شفت ضحكتها ظليت اراقبها
وروحي هايمه يمها صعدت لسيارتها ماراحت لبيتهم مشيت وراها عيوني عليها ماتفاركها ولا لحظه راحت
للداوودي عرفتها رايحه لروان صديقتها لان ساكنه
هناك طبت بشارعهم وكفت بعيد عن عيونها
اخذت روان ووياها تماره رجعت باتجاهي حركت بعيد وظليت اراقبها بالمرايه طلعت للشارع العام لحكتها من بعيد امشي وراها وصلت لمول
طبت للكراج مالته طبيت وراهن وكفت مسافه هن نزلن واني ظلت عيوني
بالمرايه وكفت صفنت على سيارتي تماره حجت وياها من راحن قبلها مشت وراهن وطبن جوه
سندت راسي ليورة حاجيت روحي وگلبي
شكاعد تسون بيه ليش ماتخلوني انسى ليش كاعدين تعذبوني واني متعذب وميت قهر ااوف يابه ااوف ياقهري
ماكدرت اظل هناك رجعت للبيت ممرود بعد اكثر حتى اجازه ماكملتها يمهم التحقت واني ادعي على روحي بالموت
🌿🌿🌿🌿🌿
هيله
ابويه عكب ما سمع بيه موافقه على زين كعد وياي وسالني
ياهيله وش صار وليش غيرتي رايج وانا اعرفج انتي مو صلح معه
يبو هيله شافتو شسو لنا وتغيرت نظرتها له
امي ردت اشر لها بايدو سكتت كمل
ردي يابنتي شصار حتى بين ليله ويوم تغيرين رايج به
ذبيت حسره ورديت بدون جذب
يابه اريدو سند لي ولكم
صفن عليه كملت
زين گوي ومايهاب احد زلمه حگ وشجاع وانا وانتو نريد الي نسند روحنا على واحد مثلو نتحزم به بهل الوكت الاغبر
يعني شنو قبلتي به لخاطرنا حنا
سالني وامي ردت
يابو هيله كاعده ادكلك تريد تسند علي هي هم
سكت دحك الي بوجهه مطعون ومقهور تكلمت اريد اطمنو
يابه لاتشيل هم تراه والله رضيت به عن اقتناع انت مو تعرف بنتك ماتسوي شي وهي مو راضيه
يابنتي مااريدج تغصبين روحج على شي انتي مو راضيه به
سكتت رديت وره لحظه
راضيه يابه لاتشيل همي
سأل ورة لحظه
ومهرج ياهيله نص الدين موو
مارديت وجهو انطعن بعد اكثر كلت راح يصير به شي تكلمت بسرعه
يابه زين ماقبل كال عطيه كريم لكريم وكلي مهرج يجي ليمج احنا صرنا اهل وعيب تحجين بهالشي
هو كلج هيج
امي سالتني رديت
اي يمه كلي هيج وماقبل نحجي بالدين
ابويه سكت وجهو اختلف عن الاول رد
اردو لهم بس الزم شغل كاعهم مااخليه برگبتي
ابدا
ان شاء الله يابه
رديت وانا مااريدو يظل يفكر ويقهر روحو خايفه عليه لايصير بي شي من وره
القهر والصار بينا
زين بعد ماسمع الموافقه مني استعجل كلش وراد يعقد ثاني يوم
الحجيه اجتي هي وامه وخواته انتبهت لها منفوخه وضايجه ولا فرحانه اله هي
ورهيفه وامنه نفس الخلقه بس الهنوف وهاجر فرحانات كلش هن وجدتهن
امه ماحجت شي الحجيه هي تتكلم وتفصل وتاخذ شور الهنوف
عمي الشيخ جاب مشايه جبيره وخطبني من ابويه ووبنفس اليوم عقدنا كاعده بالهول لابسه قفطان مغربي لونو كريمي ومسرحه شعري على طوله الهنوف ماخلت شي ماسوته لنا
هي تكفلت بكلشي من ملابس ومكياج حتى ام صالون جابتها للبيت،،،
ورتبت كعده المهر ووياها هاجر..رهيفه وامنه ما شفتهن غير من جني اول مره وهاي الثانيه بالعقد
عيوني مغوركه وكاتمه دمعتي بالگوة مااريد ابجي وافضح روحي جدام الاوادم
اسمع الشيخ يحجي مع
ابويه لان وكلتو حتى يعقد العقد
وره دقائق سمعت عقدلنا
غمضت بقوه دمعتي طفرت من سمعت هوسه الشباب
مبروووك وشايف كل الخير
صرت له مرتو للزين كالها انتي لي وصرت له
مبروك يايمه
امي حظنتني ختلت بحظنها اريد ابجي اريد اطلع نهده گلبي الممرود بس ماكدرت
بلعت غصتي وتماسگت
بالگوه
خواتي حواليه يدحكن لي بفرح بس ريمه صافنه عليه ومبين عليها القهر امي هم حست بي لجن ماحجت شي
عماته علكنها بالهوسات والدبج الحجيه كامت تهوس وياهن الهنوف وجم وحده من كرايبهم علكوها بالهلاهل
هو ماقصر بشي جاب كلشي غالي هو وعمي اشوف النسوان فرحانه وتركص لجن اشوفهم ضباب ما اميز الوجه
بس وجه لاح لي يدحك بعتب وزعل شهم شفتو بين عيوني يعتب عليه
ومقهور غمضت اكثر من مره اريد ابعدو عن نظري
لجن عصره گلبي وخنگه صدري ماخلتني ارتاح امي انتبهت لي اجتي ليمي
عدلت الشال ،،، وحجت بهمس يم اذني
يمه افرحي وفرحيني لا تظلين قاهره روحج على الراح الله عوضج بولد يريد
بس رضاج لو تطلبين
عيونو ينطيها لج
مارديت ريمه جابت مي وكالت هاج اشربي مي
اخذته منها شربت شويه
مر وعلقم نزل بزردومي
اجتي جم وحده من گرايبهم باركن لي
من فرغ دارنا من النسوان وظلن بس عماتو
امه والحجيه وخواتو كالو راح يجي حتى نلبس الحلقات گلبي انقبض ولزمت الورد بگوة نزلت راسي مااريد اشوفو ولا المح نظره النصر والشماته
بعيونو سمعت الهلاهل علگت بالهول وهوسات
عررس الزين هيل وطش بالولايه
فصوص روبه يااكفاها
وين دورها ولكاها
امي كومتني هي والهنوف صار جدامي مارفعت راسي شفت طرف دشداشتو والبشت الاسود وريحه عطرو ترست المچان
مبروك يمه وشايف كل الخير
امه تكلمت وحبتو رد
الله يبارك بيج يمه
امي باركت له
مبروك يازين وشايفين كل الخير والله يرزقكم بالذريه الصالحه الي تفرح گلبكم
امين ياخاله امين
خواته باركن له وانا ولا رفعت راسي سمعتو وره لحظه تكلم بصوت متغير
مبروك ياهيله
رفعت راسي له شالي زحف ووكع ليوره صفن علي بنظرات مفضوحه ابتسم والعيون تغيرت
نزلتو الهنوف حجت بضحك
اخويه ضيع علومه بس شاف حسن هيله
ساريه اجتي وكفت بيني وبينا تفر براسها علينا سالتو
يازين انا هم طالعه حلوه موو
جانت لابسه بدله حمره وطالعه جن لعابه دنك نزل ليمها حبها من خدها
تكلم طالعه احلى من هيله
رفع راسو اليه مبتسم ماحسيتها نظره انتصار ولا گلبي حس هاي النظره هي شماته منه شكله عيونه صوته كلها ادكول هو فرحان بيه فرحه جبيره
اعرفو يحبني حب جبير وذبح رحو حتى اقبل بي لجن كلت راح اشوف زين ذاك الي راح يدحك لي بنظره شماته وانتصار لان نزلت روحي له وقبلت بي
ماشفتها ولا حسيت بيها يدحك لي بلهفه وحب
وكف يمي والهنوف جابت علبه فتحتها صفنت على تخم ذهب مبين تگمه
وثكيل دحكت له مبتسم
افتهم نظراتي ماتكلم
شي ولا انا
يله زين لبسها الحلقه
اخذها منها امي لزمت ايدي وخلتها
بايدو خله الحلقه صفنت عليها بعيون مغوركه
سحبتها منو ولميت ايدي بگوة
يله ياهيله لبسيها له
خلت بايدي حلقته مد ايدو اليه خليتها باايد ترجف وگلبي معصور جان المفروض البس حلقته لشهم واخلي حلقتي بأيده جان لازم هو يوكف جدامي مو زين
رفعت راسي له صافن عليه
شاف عيوني مغورگه عكد حواجبو درت وجهي منو اسمع الهلاهل جن مو
صوت فرح لاا صوت
صراخي بذاك اليوم من جاني خبره لابن عمي
🌿🌿🌿🌿🌿
زين العابدين
واكف حد هيله ومو مصدك هي صارت لي اخيرا ادحك لها باعجاب وگلبي يدك بجنون
تمنيت بذيج الساعه اخذها لحظني اضمها بي اتنفس الهوه الي تشمو واترس
صدري به
فرحان بيها كلش واريد اطش فرحتي بكل مچان لجن من شفت دمعتها تلالي بعيونها عرفت ذاك اجه بالها عرفت وش
كاعده تفكر
رادتو الو بمچاني روحي انمردت من حسيت هالاحساس
عگبت من يمها ورحت للديوانيه ابويه هناك هو وابوها وعمها الي حضر عقد المهر
ابويه دحك لي كعدت يمو مال عليه سال
خير يازين بك شي
لاا شيخ مابيه شي
صوتي طلع،،، مخنوك عمها
وعم مهنا ترخصو وطلعو من يمنا ابويه تكلم مع عم حميد
يبو هيله هالاسبوع ناخذ لان مانعرف الظروف
شلونها ولا نعرف شراح يصير بهل الجم يوم
براحتك ياشيخ
اي شي تحتاجو هيله احنا حاضرين له وبيها خير وتدلل
تسلم ياخويه ماقصرت لا انت ولا ولدك
ادلل ياحميد انت غالي عليه وبنتك هم غاليه عليه جثير
يعزك غاليك ياشيخ والله يفرحك بولدهم عن گريب
اللهم امين
ابويه رد وكام كمت ويا كال
انت ظل واكعد مع حرمتك شويه
مارديت رجعت جلست بمچاني سرى وي عم
حميد لبره ظليت وحدي جالس وبين عيوني دمعتها وحزنها رددت اريد اهدي روحي الي تلوب من القهر
هدي يازين انت تعرفها بعدها مچويه من ذاك ونارها بعدها مابردت هدي يبن ابوك وخل الايام تثبت لها انا وين وذاك وين
تعالي ياهيله
درت وجهي من سمعت صوت جدتي دشت وهي وراها ،،،صفنت عليها والگلب مو هو ولا انا نفسي
اضيع بس اشوف خلقتها
انتبهت جدتي ادحك لي مبتسمه ابتسمت لها تكلمت
مبروك يالزين
الله يبارك بيج ياجده
تعالي ياهيله وگربي يم زلمتج
ترددت للحظه بعدين گربت وكفت مسافه عني مارفعت راسها ابدا ولا دحكت لي
صافن لها وهايم بها والشوگ لها بس الله يعرف شكبرو بگلبي
جدتي سرت من يمنا سدت الباب وراها عيوني على هيله غمضت عيونها وتنهدت
طالعه حلوه يابعد حي وميتي
هيله
سمعت كلامو ودحكت له صفنت علي كاشخ وطالع من صدك شيخ دشداشه بيضه بشت اسود يشماغ احمر والعگال اسود
نظراتو خلتني انزل راسي لان ضجت وروحي ختنكت منها تگرب ووكف مسافه
تكلم
مبروك يبعد العمر كلو
مارديت
شالي زحف ليوره لزمتو تكلم بصوت متغير
عوفي وخل العين تتكحل بسواد شعرج
رفعت راسي له صافن علي وملامح الوجه تغيرت اعجابه بي مفضوح وخلاني اخجل منو
عدلت شالي ونزلت راسي هو كمل
لو الگلب ينشاف جان شفتي حالو بهل اللحظه جان شفتي شكثر يحبج ودكات گلبو فاضحتو
رديت بخنگه
يازين ااناا ماا
اعرف ياهيله ماتحبين تسمعيني ابوح بحبي لج لجن انا احب اكلج البيه اريدج تعرفين شكثر احبج واموت بيج
تگرب صار گريب مني دحكت له عيوني بعيونو كمل
تمنيتج من الله ياهيله وصرتي لي وتمنيت هالوكفه وانتي حلالي وصارت ولله الحمد وهساع اتمنى يجي يوم واسمع
منج جلمه احبك يازين وذيج الساع من صدك اعرف انا عندي بخت جبير
يم الله
نزلت راسي كمل بضحك
بس راح ينعل گلبي يله اسمع هالجلمه موو
ذبيت حسرة ورديت
اروح يازين
رووحي يبعيده المسافه يگريبه الگلب
تكلم هل الكلام مبتسم وصافن عليه
سريت من يمو وطلعت لغرفتي محد بالهول
طالعين لبره،،،،،رحت كعدت
هناك ادحك للجنط والهدايا الي تارسه غرفتي
غمضت عيوني دمعتي حدرت شهكت بصوت
قوي وكمت ابجي ما مصدكه ولا مستوعبه انا صرت له مرتو للزين وراح اصير معه بغرفه وحدنا
اسبوع الجاي
خفت وروحي انمردت هي وگلبي كلت هذا ماله عهد شراب العرك مالو عهد وراح يخلف وعدو ويتگرب مني
🌿🌿🌿🌿🌿
زين العابدين
جالس بغرفتي مبتسم ومرتاح كلش هي بين عيوني عروسي وفرحتي الجبيره حلالي وشحلات هالجلمه ردتها وصارت لي
جهازي دك صعب متصل فتحت الخط كلت
هلا والله بسباح گلبي وعرج العين
ااي واضح من دكتك هااي
هههه ها وصلت الاخبار
اي وصلت بس تره زعلت عليك شلون تخطب وتعقد وانا مدري
ولك كلش صارت بسرعه بسرعه
سكت كملت
ماكو مبروك لاخوك
مبروك وشايف كل الخير لجن انقهرت كلش من ماانطيتنا خبر لا انا ولا حمد بهل الخبر الحلو
حكك انت ويا بس والله صارت هيج بسرعه وما لحكت اخابر اي واحد بيكم وبعدين ياخويه وين تجون وهي الطرق كلها انسدت من وره ذوله الجلاب
السود
ااي ماتجون عااد شكو ظالين بالديره
شلون تريدنا نهدها وبيها اهلنا اكو واحد يهد كاعو
وينهزم من غريب...
باطل اذا سويتها
ولك كلها هجت بس انتو ظليتو شتريد يجوون
يذبحوكم انت وابوك واهلك اطلعو يازين قبل لا يكع الفاس بالراس
اگلب هااسالفه ياخويه تراني فرحان بهل اليوم
ومااريد اتضايك بشي يكدر حالي
هذا حمد يتصل خل اضيفو
سمعت حمد تكلم بصوت متغير
شلونك يازين
هلا ياحمد شلونك انت وشخبار جدتي ذهب
هي والاهل
بخير والحمد لله
سكت للحظه بعدين كمل
مبروك وشايف كل الخير
تسلم ياخويه ويوما الك انت وصعب
رديت وذاك سال
زين اسالك
كول ياصعب
صدك انت خذيت بنت العرب
ابتسمت ورديت
اي
صدك تحجي يول
ههه اي صدك
عجيب ولك مو جنتو مثل الديج والجاجه واحده ناتف اللخ
هههه جنا فعل ماضي
سكت وانا هم سال
تحبها يازين
مارديت صاح بضحك
وولك من شوكت عشگتها للدعسه وشلون من
سمعت ماصدگت كلت هو يكرهها شلون حبها وشوكت
يول بعد لادكول دعسه هاي صارت حرمتي ومااحب اي احد ينتقص منها
هههه اوف يابه اوف من كاعد يتكلم ماعرفتو والله
صعب رد سكتت تكلم مع حمد
ولك سمعتو شيحجي بنت العرب گسرتو لوت الذيب وخلتو جوه ايدها
ابتسمت حمد سال
من شوكت يازين
عكدت حواجبي من سمعت نبره صوتو رديت
وش تقصد ياحمد
سمعتو ذب حسره رد
ماكو شي اترخص انا
ماانتظر نرد علي سد الخط وراح سالت صعب
وش بلاه هذا صاير شي معه
لاا ماسمعت صاير شي
هزيت راسي سالني
شوكت راح تعرس
هالاسبوع اخذ
هلا والله مستعجل ابو شعلان ويريد يعرس بسرعه
ابتسمت ورديت
يوم الك صعب واوكف بعرسك
هههه فال الله ولا فالك مخبل انا حتى اتزوج
واربط روحي بمره طول العمر
يجيك يوم تحب وتربط روحك بوحده بس الگلب
يميل لها
ههههه ابداا ياخوي ماراح احب ولا اكع وكعتك
هااي ولك من يصدك انت زين الذيب تحب ومن ولك بنت عم حميد الي جنت انت وياها مثل النار والبنزين بس تلتقون تگب
ناركم
ضحكت ورديت
هاي انت وكلتها جنا نار وبنزين والله جمعنا مو بعيده يجمعك بوحده وتصير من نصيبك
ااي نعم نعم اخابرك في ما بعد
طااح حظك يول شتريد تظل وجهه البومه وحدك
بهل البيت الجبير حالك هساع شلونو باربيل ماكاعد وجه الارمل وتصوع
هههه لا راح تجيني زوزه
سكتت هو سال
زين اسالك
كول خير وش تريد
يول ماحنيت لكعدتنا وودلع وسوالفها
خيال السمرة اجه بين عيوني ابتسمت ورديت
العندي تسوى الكعدات ودلع والي خلفها
اوف اوف يابه ولك انت غير مجفي على وجهك ذيج الجفيه الزينه تولعت يازين
وعشگت وراح يطيح
حظك
وانا راضي انت وش خصك
هههه هم صدك گلبك لو گلبي بالعافيه ياخي بس لاتكطع بينا من تزوج لااتاخذك منه حرمتك
محد ياخذني منكم لجن ماارجع بعد لذاك الدرب
ههه تحن تحن له تعلمني بك
يول روح وولي من يمي
رايح لان ام الزوز كاعده تخابرني
طاح حظك انت وياها
مقبوله منك ياااعريس
ضحكت سديت الخط وره دقائق باب اندك هاجر طبت مبتسمه وشايله جهازها
كاعد يازين
هههه لا نايم بسابع نوم مااتشوفيني متربع على الجربايه وكاعد هي مطفيه
هههه هم صدك
كربت واجت كعدت يمي ادحك عليه ووجهها يضحك تكلمت
خير ولج اشوفج تتبسمين
ااحم يعني سالت روحي اخويه شعجب ماطلب
نطك صور الو هو وهيله
تصدكين راحت من بالي
ههه بس انا ماراحت من بالي واخذت الكم جم صورة
فتحت جهازها شوفتني صوره من
واكف يمها اول مادشيت هي منزله راسها وانا صافن عليها
حلوه موو
بس هاي اخذتي
الاا اخذت جثير شوف
اخذت الجهاز منها ثاني وحده لبستها الحلقه
والثالثه هي الرابعه صفنت
بيها والگلب اختلفت
داكاتو
صافن بعيونها وهي هم ملامح وجهها باينه بوضوح العيون تلمع بالدمع والي
خلتني اسري من يمها واعكب للديوانيه
حلوه موو
ااي
زين ماسويت ياازين
ابتسمت ورديت
ااي زين ماسويتي يااهاجر
🌿🌿🌿🌿🌿
هيله
خواتي فرحانات لي وساريه وريهام اكثر لان يحبن زين جثير تفتر يمي بالغرفه سالت
ياهيله اكدر اجي عليج انتي وزين من ترحين لهم
اي ياساريه
رديت كوة وانا صافنه عليها هي وريهام الكاعدت يلعبن يمي بلعبات جابهن لهن زين هن وجثير شغلات كمت اريد اطلع بره لان روحي اختنگت وصلت
نص المطبخ مااحس الا شي انهبد بالارض وصارت دويه
هزت الدار هز قويه
