رواية تسجيل خروج الفصل الثاني بقلم جمانه السعيدي
طارق....اجيت اتخبل مجاي افهم ليش نرجس تتهرب مني
اني ما مقصر وياها بااي شي
اتصل عليها ماترد لازم اكو شي خلاها تبتعد عني
يومين واني اضرب المحاضرات وابقى انتظرها
اريد بس افهم ليش تتهرب مني حتى ارتاح
حتى نوم مجاي اكدر انام اني متأكد ما مقصر وياها بشي
الحد ما شفتها واكفه بلمرر ويا صديقتها
طارق...صباح الخير
ردت عليه من ورا خشمها صباح الخير
طارق...اريد احجي وياج
نرجس...خير شكووو
طارق...ممكن تجين نحجي بلحديقه هنا مااكدر احجي وياج هوسه
نرجس.....ولو ماعندي اي موضوع احجي وياك بي
بس اني هم ارؤد اخلص من هذا الإلحاح الزايد
طارق...استغربت من ردها علبه
طلعنا اني وياها للحديقه
طارق...ممكن افهم شصار اني بيش قصرت وياج
شنو الشي الي اني سويته ونزعجتي مني
نرجس...اسمع طارق كلشي بينا انتهى
طارق....ليش ممكن افهم انتي طلبتي شي واني قصرت
طلع مني كلام مزعج اي تصرف اذيتج بي
نرجس....انت شنو كل شويه وكلت ماقصرت انت حاسب هاي التفاليس الي تصرفهن عليه فلوس
انت صدك فكر بعدين اني ماجبرتك انت تريد تبين كريم كدامي
طارق...لا اني موقصدي هيج بس ردت افهم شنو المشكله حتى احلها
نرجس....ماكو اي مشكله تقدملي واحد ابن ناس ومحترم
بيت وسياره ووشركه وأهلي موافقين علي
طارق.. هو ابن حلال واني ابن حرام لو لان عنده فلوس .شنو تقدملج واحد شنو اهلج موافقين علي
وهذا الحب صار اكثر من سنتين وهاي المشاعر
شنو جنتي تتسلين تضحكين عليه
نرجس....كلشي قسمه ونصيب واني وياك مامقسومين البعض اني ياما لمحتلك اريد واحد واصل
وواحد غني يوفرلي كلشي اطلبه منه
وانت عبالك ما تفهم اني ماازوج واحد فكر
ولا واحد نفس مستواي ليش اقبل اعيش حياة
الفكر والتلزيك واني حلوه ومثقفه وماناقصني اي شي
طارق....قابل اني راح ابقى على وضعي هذا بس اتخرج
راح اشتغل واكون نفسي
بعدين محد يعرف الخير والرزق وين
ولانسان الي يباوع ليفوك تنكسر ركبته
جمانه السعيدي
نرجس...لا تكعد تسفط عليه كلام اني اريد فعل
اريد بيت وسياره وفلوس هواي فلوس مالها عدد
تكدر تحققي هاي الطلبات لو لا
طارق...والحب
نرجس...اي حب هذا الي تحجي عنه الحب هذا بس بلافلام بلحقيقه ماكو حب اكو مصالح
اكو فلوس اكو حياة مرفهه الحب شنو يوكل خبز
انت من كل عقلك نزوج بيت اهلك
وابقى منتظره كل يوم بلكت تشتغل هاي اذا لكيت شغل زين واني اكعد خدامه بيت اهلك
علمود اكل واشرب وبس بابا العالم وين وصلو وانت
بعدك تفكر بلتفكير القديم
عندك امكانيه تخليلي بيت وحدي
عندك امكانيه تشتريلي سياره
تنطيني الف دولار للشهر مصرف
هااا سكتت اذا ماتكدر تحققلي طلباتي
لا توكف بطريقي وتكعد تحجيلي عن الحب وهاي الخرابيط
طارق...هسه الله كريم ايجوز ناخذ الطابق الثاني ونسكن وحدنا واني اشتغل ايجوز رب العالمين يرزقني
نرجس....الطابق الثاني هاااا اي ليش لا
الطابق الثاني واني اتعلك فوك انت واحد فكر
واني ماازوج واحد فكر
اني اريد واحد.شبعان مستوى ينقلني من وضعي الهذا
المستوى اعلى
طارق...انتي تعرفين وضعي من الاول ليش بقيتي كل هاي الفتره وياي
اني ماضميت عليج وضعي انت تعرفين مستواي المعيشي كلش زين ليش كملتي وياي
ليش خليتني اتعلق بيج وارضيج على حساب نفسي
نرجس...تريد الصدك اني بقيت وياك لان شفتك ذابح نفسك عليه
والدنيا فرص حبيت استغل هاي الفرصه
واخليك تصرف عليه منا لمن احصل وااحد شبعان
طارق.. هيج بكل صراحه تكولين جنتي اضحكين عليه
نرجس .هذا الواقع ليش اجذب عليك
طارق... بس اني حبيتج
نرجس.... مشكلتك اني ماكتلك احبك
انت كتلت نفسك عليه
طارق.. هيج صار الحجي جنتي ترديني معبر
تعبرين علي منا لمن توصلين الواحد ثاني
نرجس....فسر الكلام براحتك مايهمني وبعد لا تتواصل وياي خاف خطيبي يشوفك ويزعل مني
طارق...عافتني وراحت بقيت واكف بمكاني عبالك واحد وكفخني على راسي
معقول كلشي سويته علمودها ضاع بكل هاي السهوله
معقوله كل هذا الوقت ماكدرت اوصللها احساس الحب
الي جاي احس بي
ضاع كلشي مني الحب والجهد والفلوس والوقت
على وحده استغلاليه
حرامات لو مجمع فلوسي الي صرفتها عليها
جان فتحت مشروع بيهن
اني غبي وهيه استغلاليه
شلون عفتها تضحك عليه كل هذا الوقت
الله ينتقم منج نرجس وما تشوفين يوم واحد راحه
على حركة كلبي على قهري
رجعت للبيت ماكدرت ابقى اكثر بلجامعه كمت مااشوف كدامي من القهر
اجرت تكسي مااكدر انتضر الخط
ورجعت للبيت
امي...هااا يمه شو رجعت
طارق... عندي محاضره وحده وخلصت
امي....وشبي وجهك اسود
طارق... مابيه شي تعبان
امي....تعبان خاف مريض
طارق...لا بس انام شويه واصير زين
دخلت غرفتي تمددت بملابسي حتى الحذاء ما نزعتها
هلكد ما مقهور احس كلبي يوجعني
اول مره بحياتي تزل دموعي شكد مقهور من كلامها
باريت لو ما واجهتها
ياريت لو ماسامع هذا الكلام وباقي انطيها اعذار
انصدمت من كلامها
شكد وقحه شلون تحجي بكل برود
وما حسبت حساب مشاعري وهيه متاكده اني احبها اموت عليها
ليش تقهرني هيج ليش ضيعت تعبي والايام الي راحت
لو كايله اهلي جبروني لو كايله الضروف تجبرني ابتعد عنك
ليش هيج شمرت الكلام عليه وابد ماراعت مشاعري وحبي الها
بكل بساطه تكول اريد واحد غني وانت فكر
لا والنوب الي اقوى منها تكول اني ما كتلك حبني
اذا اني مااحبج ليش طلباتج كانت ما تخلص
اني اذا مااحبج مامجبور اضيع فلوسي عليج
يمكن هيه مابيها صوج اني الي جنت هايم بيها
ومااشوف عيوبها الي واضحه
مبينه وحده استغلاليه ليش جنت أعمى وماشفتها على حقيقتها
جمانه السعيدي
بقيت ابجي دموعي تنزل نار على وجهي
اول مره بحياتي ابجي واول مره اكون مقهور الهلدرجه
ماكدرت انام كلبي مشتعل نار
اول مره انغدر هيج غدر
بقيت بلغرفه للمغرب ابد ما طلعت
رغم امي كل شويه ادك الباب وماارد عليها
امي حست اكو شي مو طبيعي بلموضوع
لليل طلعت
امي...شكو ليش هيج ضايج
طارق.. لا مو ضايج
امي....قابل اني مااعرفك وخاصه انت كلشي يبين عليك بسرعه
طارق... صدكي ماكو شي
ماكدرت احجي الامي اي شي
اني مثل الي راجع من المعركه مهزوم محمل بلخيبه
والفشل
شلون راح اكول حبيبتي الي كل يوم اوعدها بلزواج
وجنت اصرف عليها كل فلس احصله
تكول انت فكر اني مااحبك ومااريدك
راح ابقى اكول على نفسي غبي واعمى
منا لمن اموت مستحيل الشي الي صار وياي
اسبوع واني ماواصل للجامعه
وامي اكلت كلبي ليش ماتروح للجامعه
ليش مااداوم وانت جنت ذابح نفسك على الدوام
ماتغيب يوم واحد على جامعتك
ماكدرت ارد عليها شكوول جنت اروح للجامعه علمود نرجس وهسه نرجس عافتني
ولله حتى استحي احجي هيج كلام
اتصلو عليه جماعتي ليش مانشوفك
رجعت للدوام وهلمره اني الي جنت اتهرب منها
مااريد اشوفها لا اريد اسمع اي شي عنها
بس بيتي وبين نفسي اكول اكيد راح ترجعلي
مستحيل تلكه واحد يحبها بكدي. مهما يكول الحب
مايجي بسهوله
بعد عشر ايام من رجعت للدوام واني ابد ماشفتها
بطلت اروح القسمها مثل قبل حتى اشوفها
اصلا هيه اداوم بقسم غير قسمي
الضاهر ملتهيه ويا زوج المستقبل وماتجي للدوام
واني طالع من المحاضره بطريقي الكافتيريا اريد اشرب جاي
سمعت صوتها وهيه تكول للبنات باركولي انخطبت
شكد جانت الأصوات عاليه وهوسه تعرفون من نطلع من المخاضره تصير هوسه
بس صوتها جان وواضح
عبالك اذني فلترت صوتها من دون الاصوات
بدون وعي التفت عليها
جانت رافعه ايدها للبنات حتى يشوفون الحلقه
والضحكه شاكه وجها
مامصدكه نفسها اخذت الانسان الي تريده
اما اني كنت مضحكة القسم كلها اتاشر عليها وتكول
عافته ضحكت علي ماتريده
كنت اسمع الشباب والبنات يتهامسون عليه
جمانه السعيدي
الحد مااجت حفلة التخرج
اجت لابسه فستان عبالك عروس والتسريحه والمكياج فول
جابها خطيبها بسيارته
بس شافتني زادت حركاتها وضحكها حتى تقهرني
متت متت قهر حرفيا كاعد اتكطع من داخلي بسببها
عندي حاله نفسيه بسبها
وين ماادير وجهي اشوفها
عفت حفلة التخرج وطلعت مااكدر اتحمل اكثر
طاقتي خلصت من القهر
اجتني حاله مرضيه بطني تتقطع من الالم
والصداع مايعوفني ابد
دخلت مستشفى امي وابوي وأهلي تخبلت عليه
لان اني ابد مااتمرض صحتي تمام
بس هلمره كنت احس الموت قريب عليه
شكد اخذت علاجات ومجلي اتحسن
جسمي ضعف ووجهي اصفر حتى مااكدر اوكف على طولي
اسبوعين يله تحسنت شويه بس مااكدر اكل مثل قبل
اكلي كلش قليل
ونفسي تلعب ومالي خلك الاي شي
بصعوبة جنت اروح الامتحانات اخير السنه
من بعدها حبست نفسي بلبيت
حتى ماطلعت ادور شغل رغم اني جنت كلما الكه فرصه
اطلع للشغل
قبل اشتغل بواهس لان افرح من تطلب مني شي واشتري الها
هسه المن اشتغل مااريد اشتغل ومااريد فلوس
ومااريد اشوف اي واحد
شهرين واني ماطالع من باب البيت
وكلامي كلش قليل وياا اهلي
امي خطيه تفتر عليه ليش حابس نفسك وليش ضايج
الحد مااجو خطابه على نجوى اختي
نجوى اكبر وحده
وولد عنده شركة سفر وسياحه
أخته مدرسه وياها وهيه الي رشحتها اله
ابوي....بابا طارق اختك اجو عليها ناس
اريدك تسئل عنهم لان هذا زواج يعني ارتباط طول العمر
طارق...مااكدر اطلع
ابوي...شنو ما تطلع انت مره وما تطلع حابس نفسك بلبيت
قابل اني الرجال الجبير اروح اسئل
هاي اختك امانه بركبتك انت الي تسئل عنهم
طارق...جبرني ابوي اطلع رغم احس نفسي حتى مااكدر امشي هلكد ماصرت هزيل
احس نفسي تعبان ومالي خلك
رحت سئلت طلعو خوش ناس والعالم كلها تحمد بااخلاقهم
وهنا بدت مراسيم المهر والزواج
بسبب هاي الحركه بلبيت طلعت شويه
وبيتنا صار بي سوالف وواهس عرس
اما نرجس ابد ماحاولت ادور أخبارها ولا اعرف اي شي عنها
ولا اريد حتى اسمع اسمها
طاحت من عيني والي يطيح من عيني
ابد ماارجع اشيله مره ثانيه
