رواية تسجيل خروج الفصل الثالث بقلم جمانه السعيدي
طارق....رجعت اطلع شويه شويه
بديت ادور شغل بس ماعندي نفس الواهس القديم
عبالك اشتغل غصبا عليه
ازوجت نجوى وبدت تصير علاقه بيني وبين زوجها
الولد محترم بشكل
وعنده قابليه فضيعه على الشغل وواهس رهيب
الافكار عنده ما تخلص
كل يومين اتلاثه اشوفه ونكعد نحجي اني ويااا
الحد ماعرض عليه اشتغل ويا
هاي كانت نقطة التحول العجيبه بحياتي
هذا العرض كان البدايه الجديده الحياتية
اسلام....انت تشتغل
طارق...اي ولله اشتغل بس مجاي الكه شغله تناسبني
اسلام...شنو رائيك تشتغل وياي
طارق...اشتغل وياك شلون يعني
اسلام....يعني بكيفك تستلم المكتب تثبت الحجوزات
لو تطلع ويا الوفود رحلات شغلنا بسيط وسهل
طارق...بس اني كلشي مااعرف بشغلك
اسلام...اني اعلمك شغله بسيطه وماكو أسهل منها
طارق....موافق بس اذا شفت نفسي مااكدر
اعوف الشغل مو تزعل
اسلام....لا ماازعل تعال باجر الساعه عشره الصبح
جمانه السعيدي
طارق...الصراحه كنت متردد حيل احس هاي الشغله مو شغلتي يمكن افشل بيها
اني ليش محضر الفشل ليكدام
اجرب واشوف
طلعت ثاني يوم للمكتب مكتب الشركه
وصلت لكيت اسلام واصل قبلي
سلمت وكعدت جابلي جاي
بعدين كال تعال هنا كبال الحاسبه
شوف هاي الحجوزات كدامك
اذا اجاك الحجز عن طريق التليفون تثبت الاسم
وتطلب الجواز
وتطلب فلوس الرحله وتثبت كلشي
اما اذا اجاك واحد يحجز
نفس الاجرائات اول شي تطلب جواز السفر
شوف هسه اني راح اعلمك
طارق...كعد يعلمني شلون اثبت الحجوزات
بعدين علمني شلون اتواصل ويا شركة الطيران
طبعا هو متفق ويا شركات ثنيين ويشتغل وياهم من زمان
ماكان الشغل صعب عليه
تعلمت بسرعه
اجاني اهس عجيب للشغل
بعد شهر واحد من شغلي استلمت مفاتيح المكتب
كنت ادير العمل بحترافيه
العمل كان سهل وحلو بي متعه
اصراري انجح بهذا العمل خلا اسلام يتمسك بيه اكثر
بلاضافه امانتي
كنت حريص على كل فلس يدخل للمكتب
بهاي الفتره كانت السياحه حيل مزدهره بلعراق
احجي على سنة ٢٠١٣ والرواتب عاليه والناس متلهفه
للسفر وخاصه احنا العراقيين
جنا محرومين من السفر
بعدها كمت اطلع رحلات ويا الوفود
هنا شفت عالم ثاني عالم بعمري ما كنت متوقع اشوفه
رحلات ما تخلص
تركيا لبنان مصر السعوديه ايران ماليزيا الهند
عبالك جنت بقفص وطلعت منه
حتى شكلي كله تغير صرت واحد ثاني غيرت تسريحة شعري وجسمي تغير ولبسي صار كله ماركه
اكيد لازم نكون بكامل اناقتنا واحنا نشتغل بهيج مجال
جمانه السعيدي
اشتريت سياره بالاقساط سياره حديثه
شغلنا جان ماشي خير من الله
امي....يمه طارق اريدك تزوج
طارق...ازوج لا ماازوج بعد وكت
امي...شنو بعد وكت عمرك صار ٢٥ وشغلك خير من الله
بعد شمنتظر
طارق...لمن اكون نفسي واستقل بشغلي
امي... اي هسه شغلك خير من الله ليش ماتزوج
اريد افرح بيك
طارق....بعدين امي مو هسه
كلما امي تفتح موضوع الزواج اسده
اني مااريد ارتبط حاليا اريد استقل بشغلي وبعدين الزواج الله كريم
بهاي الفتره اخو اسلام طلب ايد اختي الثانيه ندى
طبعا العلاقه بين العائلتين اطورت وصرنا اهل مو بس
نسايب
وافقنا وتم الزواج ولله ولحمد
اكيد نوافق لان نجوى حيل مرتاحه ويا اسلام
اصلا هما عائله راقيه بشكل
واحسن العوائل تتمنى تناسبهم
بهاي الفتره شغلنا كان برو ماكس كنا ما نلحك على الحجوزات والرحلات مستمره
بليوم الواحد نطلع اكثر من رحلتين مرات اتلاثه واكثر
شغل ليل نهار مانعوف المكتب اله الساعه ثنتين بليل
بعد خمس سنوات شغل قررت تكون عندي شركه خاصه بيه بعد ما اكتسبت خبرة العمل الي احتاجها
شركة سياحه وسفر
بعدما عرفت الشغل اكدر أدير هاي الشركه وحدي
اجيب اخوي يساعدني بيها
قررت افاتح اسلام بلموضوع
طارق...اني محرج منك
اسلام.. اخوي ضلعي حزام الضهر ليش محرج كووول
طارق...اريد افتح شركه وحدي
اسلام....ولو يعز عليه تعوفني بس من حقك
اذا اضوج راح اضوج لان مااشوفك كل يوم
لان مراح اكدر الكه واحد بأمانتك
طارق...مهما كبرت ومها صرت مستحيل انسى وكفتك وياي
هاي صار خمس سنوات
اشتغل هنا بعمرك ماسمعتني كلمه موحلوه
بلعكس كنت مسلمني كلشي وبعمرك ماحسبت وراي
ولا دققت بشغلي
اسلام...غير انت ذهب اكو واحد يدقق بلذهب
جمانه السعيدي
طارق....مراح نتفارك اعتبرني فرع الشركتك واذا تحتاج اي شي راح تلكاني كدامك
اذا تحتاج عيوني تاخذهن
اسلام...سلامات عيونك اخوي العزيز
طارق...بعد خمس سنوات شغل ليل نهار صرت محترف بشغلي
ااجرت مكان وخليت اسمي علي
شركة طارق للسفر والسياحه
جبت اخوي خليته على الحجوزات
وانطلقت بشغلي رب العالمين وفقني وزقني
اكثر ما كنت متوقع
شكد مااكلكم خير مااوصف حجم الخير الجنت عايش بي
نعمه من رب العالمين
اشتريت قطعة ارض وبديت ابني بيتي
كل سنه اخذ امي وابوي رحله للعمره
ومره ثانيه للمزرات بايران
بعد سنه وحده من استقلالي بلشغل وحدي
كلشي بحياتي تغير للافضل حتى شكلي تغير
صرت واحد ثاني شكلي كله تغير من اقارن صوري
بلجامعه ويا شكلي الحالي الفرق واضح
صرت انسان ثاني وواحد قوي وعنده شخصيه
عكس طارق القديم
المهم اجانا حجز رحله للعمره
من ضمن العوائل عائله راقيه ناس واصلين
ناس أصحاب مركز
الي سجل ويانا بلرحله الام وبنتها وولد شاب
بلبدايه اجا الولد سجل وقدم الجوازات
بيوم الرحله جان التجمع كدام شركتنا حتى تنطلق الرحله
اني الي راح ارافق الرحله
اجت هاي العائله الام ام عامر
البنيه يصيحولها شموسه الولد علاء
هاي العائله من اللحظه الي وصلت بيها كان شكلهم مميز
يختلفون عن باقي المعتمرين
البنيه جانت لابسه ثوب ابيض وحجاب الاميره ابيض
حذاء فلات ابيض
طالعه عبالك ملاك مو بشر
خدودها وردي عيونها لونهن عجيب شكله ناعم
مميزه
اني ماكنت متقصد اخلي عيني عليها
بس هيه شكلها مميز حتى الاعمى يخلي عينه عليها
هلكد ماشكلها مميز
من تحجي صوتها ناعم عبالك موسيقى مو صوت
اخوها وامها شكلهم لطيف
محترمين راقين كلشي باستئذان حتى المكان الي يكعدون بي يستئذون قبل
مع انو احنا نواجهه انواع بشر غريبه عجيبه
مو عبالك صاعد وياك رحله
تكول مشتريك يتأمر ويصيح عليك
واذا ماعجبه شي يبقى يحجي حتى كرسي الحافله
اذا ما عجبه يسوي مشكله
كلمه والثانيه وكال اني دافعلك فلوس لازم ارتاح
حبيبي ارتاح اني لازمك
الناس كلها ساكته بس هو يبقى يصيح
عود شوفوني اني شخصيه
كل يوم نواجهه مثل هذا النموذج التحفه
