رواية حرم الاسود الفصل الثاني بقلم بتول ابو الليل
ماعرفت شنوو احجي من المنظر بقيت صافنه اخوي تيمور ديبوس ببنيه حاصرها علئ باب الغرفه وبوضع يفشل.
ومنوو هاي البنيه ماعرفها وليش جابها للبيت هم ماعرف وضعهم ولمساته الهاا خلاني اكرهه اخوي حييل وتلعب نفسي منه.
صعدت للغرفه اركض ماحجيت ولاخليته يحس عليه دخلت بالغرفه وضربت الباب حيل كمزت اريانا من النوم باوعتلي بنعاس وكالت
اريانا : شبيج ؟
_مـ ماكو ماكو شيء ارجعي نامي
اريانا : شنو ماكو شيء شوفي وجهج بالمرايه صاير اصفر والخوف مبين بعيونج وين جنتي انتِ
_كتلج ماكو شيء عطشت ورحت شربت مي او خفت لأن البيت ضلمة.
اريانا : اي خوش يلا تعالي نامي
هزيت راسي بأي رجعت لفت نفسها بالحاف ونامت رحت توضيت وكعدت اصلي بقيت كاعده ودايخه بالمنظر الشفته
لهل درجه اخوي وصلت وياه يدخل بنات لبيتنه ويلعب وياهن اايع بابا من يعرف شيكول.
لازم احجي وياه الصبح واخلي يعوف هل تصرفات الطايشه بنات العالم موو لعبه عنده عباله كلشي يكدر يسوي بالفلوس مستحيل اسمحله يشوه سمعتنه وسمعت بابا بهل تصرفات.
لميت السجاده ورجعت لمكاني ونمت.
ڪعدت ثاني يوم علئ صوت اريانا تكعد بيه فتحت عيوني بنعاس
_وخري اريد انام
اريانا : كومي كاافي نوم صار الظهر عفيه متت جوع شنوو ليوم مناكل شيء
_روحي اكلي لأ اني شنوو مستحيه منه انتِ
اريانا : غير اني وياج شبيج
_بس شويه عوفيني عفيه نعسانه
اريانا : تمام رايحه تعالي وراي.
عافتني وراحت لفيت نفسي بالحاف زين ورجعت نمت.
...
اريانا : نزلت جوه قليل اجي علئ بيت خالتي لأن ماعندي احد اجي عليه اليان وجانت مسافره
مرات تصير عدهم عزيمه او فد مناسبه عيد او شيء اسلم عليهم ورجع بتت عدهم لأن اصرت عليه اليان ما اجيهم لأن تصرفات تيمور وحركاته تضوجني
يمڪن تفڪيري غلط وجاي اظلم هل انسان بس تصرفاته حيل تغث
متكبر مغرور ميحب شخص ابد احسه مختلف عن اخوانه جذرياً
المهم نزلت جوه حته اتريك مجان موجود شخص غير المساعده بالمطبخ تنظف بالكاونتر
_صباح الخير
اسينا : صباح النور
_اريد ريوك
اسينا : جاهز الريوك اخلي الج علئ طاولة الاكل لوو هنا تتريكين
_لا عادي بالمطبخ احب ڪعدات المطبخ اني
خلت الاكل علئ الطاوله هم اڪوو ميز طعام بالمطبخ ڪعدت اتريك شويه ودخل تيمور للمطبخ كاشخ وعطره تشمه من بعيد ماباوعلي ولا اصلاً انتبهه لوجودي.
تيمور : گهوه بسرعه
هزت راسها بـ أي وراحت تسوي گهوه اني مدنكه اكل طلع جهازه وخابر.
تيمور : هسه دقايق واكون بالشركه لااا اسمع ماتسوي أي شيء منا لحد ماجيكم اني اششش انجب مالي خلك سوالفك يلاااا
سد الجهاز ماعرف ويه منوو جان يحجي وشنوو هل اسلوب اليحجي بيه ويه الناس كبر شكد ماعنده ذوق
دار وجهه شافني كاعده واكل ابتسم تك خد واجه نحوي سحب الڪرسي وڪعد مقابيلي وكال
تيمور : صباح الخير يحلوة شو كاعده وحدج
_صباح النور عادي اليان بعدها نعسانه ونايمه اصلاً بعد وكت
تيمور : ساعه بـ 11 ياصباح خلص الصبح اصلاً دنيا الظهر يابه
مجاوبته شربت جاي يباوعلي بنظرات مستفزه ڪلش رجع راسه علئ الكرسي خله رجل علئ رجل سحب جكاره من الكوبي الكبار مادري شلون يشربها ويخلصها اني من يمي اختنك ..
تيمور : ايي ابوج شلونه كالو خاسر شغل كلش جبيره وبيه هواي خساير.
_شنوو ؟ مادري شوڪت هل حجي
تيمور : ههههه حقجن انتنٍ ملتهيات بالتسوق والمولات شعرفجن بهيج أمور.
_لاا عفيه صدوك تحجي شنوو خساير محجالنه شيء بابا عن الموضوع
تيمور : اي طبعاً ميحجي شيء ميريد يخوفكم.
_شنوو قصدك ؟
تيمور : لادوخين راسج بهيج امور تعبانه تريكي عافييات يحلو ... يمعوووده وين صاارت الكهوه وراي شششغل اريد اطلع
جابت الكهوه خلتها ڪدامه اني بقيت بس اصفن شنوو بابا خسران بشغله شديحجي هذا وليش محجالنه بقه يشرب بالكهوه ويباوعلي ويتبسم بخبث.
_شبيك انتَ
تيمور : شبيه
_ليش تباوعلي هل شكل؟
تيمور : انتِ كدامي اغمض عيوني يعني بعدين حرام نباوعلج تخافين مني لو شنووو
ضوجني حيييل عفته وطلعت من المطبخ صعدت لغرفة اليان لكيتها هستوها كاعده تتمغط.
اليان : هاا تريكتي
_أي
اليان : اي بالعافيه
_الله يعافيج
اليان : شبيج ضايجه
_اريد ارجع للبيت عفيه
اليان : ليش شكوو احد ضوجج جنان حجت شيء عليج؟
_لأ والله بس جنت اتريڪ واخوج تيمور ڪلي انو بابا خسران شغل مهم وبيه خساير هوواي واني كلشي مادري اريد ارجع وافتهم الموضوع شنوو بالضبط
اليان : تيمور گلج هل شي !"
هزيت راسي بأي تغيرت نظرات اليان وڪامت علئ حيلها راحت علئ المرايه رفعت شعرها بقراصه وجانت تريد تنزل
_ويين
اليان : ابقي هنا عندي موضوع ويه تيمور اريد احجي وياه
_خليني اجي وياج
اليان : لا حبيبتي انتِ ابقي هنا اني شويه واجيج
_تمام
عافتني وطلعت من الغرفه ڪعدت علئ السرير واني افڪر بكلامه.
..
اليان : وين تيمور
اسينا : شرب كهوه وطلع للشغل
طلعت اركض للحديقه جان يريد يصعد سيارته صحت عليه بصوت عالي
_تيمووور لحظه
دار وجهه مستغرب رفع حاجب معنئ شڪوو رحت عليه واني متوتره وماعرف شنوو احجي بخصوص الموضوع الشفته بس اذا مانبهته يعوف هل شغله راح يستمر عليها.
تيمور : خيرر شڪوو؟
_تعال شويه عندي موضوع وياك
سحب نفس قوي رفع ايده يباوع للساعه رجع باوعلي وكال
تيمور ; تأخرت من ارجع نحجي ماعندي وقت حالياً
_لااا هسسسه نحجيي
تيمور : احجي عددددل شو تعلين صوووتج ووولج
_كتلك ارريد احجي وياك شبيك متفهم
تيمور : ووولج ڪضي لسانج لاكصه شو ماتعرفين تحجين شنوو مافهم ..!
_خلينه نحجي لاتخليني احجي كلشي لبابا وافضحك ڪدام الكل
تيمور : اليان لاطلعين خبالي عليج شنوو تفضحيني ڪدام الكل شمسوي اصلاً
_تعال منا الحرس
سحب نفس بقوه وكانو يكتم غضبه مشه كدامي للحديقه وكف وكال
تيمور : يلا ست اليان اتحفينه بموضوعج المهم شنوو احجي
_منوو البنت الجانت وياك ليوم الفجر بالبيت ؟
خزرني بغضب سحبني من ايدي بقوه وعصرها غمضت عيوني بألم وصحت عليه
_اووووي ايدي عوفني وخررر دتوجعني.
تيمور : تتجسسين عليه انتِ لوو شنوو بالضبط
_عووف ايدك احسلك والله احجي كلشي لبابا واخلي يطردك من البيت كله متستحي علئ نفسك مدخل بنات ليل لبيتنه وانتَ سڪران ماڪلت شخص يشوفني العالم تحجي عن ابوووي شهللل تصرفاااات.
لزمني من حلكي بقوه احس فكي انكسر اول مره بحياتي شخص هيج يعاملني طول عمري ماتعاملت بشكل عنيف.
تيمور : شووووفي لج اشك حلكج اذا تحجين حرف عن الي شفتي قسم بالله اسوي الي يعجبني البيت بيتي والاملاك كلهاا بيدي اني يوم يومين واخليج تزوجين وتنڪلعين عاد خليني متحملج هل فترا احسلج لاتخليني اخليج براسي واشمرج شمره ماتتوقعينها بعمرج كله
_اذا ماندمتك علئ هذا التصرف ماطلع اليااااان اعلمك شلوون هيج تعامليني.
تيمور : هههههه نشوف شلوون تعلميني يلا بيباي يحلووة.
دفعني وراح بقيت اتنفس بقوه واني شفتي ترجف احاول اسيطر علئ دموعي ماڪدر نزلت حيل انهضمت ونڪسر كلبي ماتخيلت يطلع اخوي نذل لهل درجه.
مسحت دموعي بحركت گلب ودخلت للبيت اذا ماخليتك تتندم اني مو اليان.
صعدت لغرفتي ارڪض دخلت للغرفه جانت اريانا كاعده من دخلت كامت
اريانا : هاا
_يلا جهزي نفسج حته اوصلج لبيتكم.
اريانا : شصارر افتهمتي شيء منه كالج ليش ابوي خسر شغله
_لاا محجالي شيء
اريانا : شبيه خدج احمر وليش عيونج مدمعه هيج
_طلعت بالشمس وتحسس وجهي
اريانا : باوعيلي اليان ليش احسج تجذبين عليه احجي شڪو
درت وجهي عنهاا دمعت عيوني ماڪدر اضم شيء عليها رحت للكنتور اطلعلي ملابس واني احاول اغير الموضوع.
_شبيج كتلج ماكوو شيء شنوو اجذب يلا تعالي اختاري لبس يناسبج حته نطلع.
اريانا : تمام
اخذت ملابس اني ودخلت للحمام سبحت وبدلت وطلعت لكيتها مبدله خلينه مكياج وشسورنه شعرنه ونزلنه جوه.
اخذت سيارة وطلعت وصلتها لبيتها ورحت لشركة بابا اتصلت عليه قبل لا أوصل
_الوو
جاسر : هلا باباتي
_شلونك حبيبي
جاسر : الحمدالله زين من سمعت صوتج الحلوو
_اني جايتك للشركه موجود انتَ مو
جاسر :اي باباتي موجود بس شنوو ليوم منين طالعه الشمس غيرتي رأيج راح تشتغلين هنا مو
_اوصل ونحجي بالموضوع
جاسر : ماشي اني هسه عندي مقابلات ويه العاملين من اخلص نحجي
_تمام.
سديت من عنده وركزت بالطريق اني اعلمك تيمور اذا ماخليتك تتحسر ع فلس واخذ كلشي. من ايدك واعلمك اليان منوو وشنوو تڪدر تسوي عباله يزوجني ويخلص مني
وصلت للشركه نزلت وانطيت السويج للعامل يركنها بالڪراج دخلت للشركه رحت للسكرتيره.
_صباح الخير
سكرتيره : اهلاً وسهلاً تفضلي؟
_المدير موجود
سكرتيره : اي موجود بس حالياً عنده مقابلات ويه العاملين منوو حضرتج حته انطي علم
_بنته اليان
سكرتيره : اهلاً وسهلاً بيج تفضلي للمكتب منا.
هزيت راسي بأي مشيت وياها للمكتب بعدنه مواصلين تلاكه ويانه تيمور عقد حواجبه بستغراب وخزرني ابتسمت بكل هدوء وتعديته اني والسكرتيره.
فتحتلي باب المكتب مال ابويه دخلت للمكتب وتشكرت منهاا عافتني وطلعت بقيت افتر بالمكتب اباوع عليه
صارلي سنين مجايه لهنا وشايفه التغيرات حيل حلوو المكتب مالته وفخم الئ درجه.
كعدت علئ القنفه خليت رجل علئ رجل منتظرة جيت ابوي فجأه اندك الباب ودخل ولد شاب يصير بكد تيمور حلوو حيل حلوو ماعرف ليش لفت انتباهي من اول نظره اله شافني هوه ستغرب
آرون : مرحبا
_مراحب
آرون : منوو حضرتج وليش كاعده بالمكتب وحدج ؟
_اني بنت الاستاذ جاسر مديركم.
آرون : هاا اهلاً بيج تشرفنه
_الي الشرف
ابتسم وهز راسه بأي بقه ساكت وصافن بوجهي تحمحمت وسألته
_اممم انتَ شنوو شغلك هنا؟
آرون : شغلي اثبت العقود والمستندات وادخل العاملين الجدد للمقابلات.
_هاا حلوو الله يوفقك
آرون : اشكرج
_تفضل اڪعد ليش واكف
آرون : عندي شغل بس جبت هل اوراق اريد الاستاذ يتاڪد منهم.
_اي هوه كلي هسه عنده مقابلات يمڪن بعده ممكمل بس يخلص خلي يشوفهم
آرون : اي
ابتسمت مجامله ودنكت راسي كلامه محدود وبحت صوته كلش حلووه اول مره يعجبني ولد من اول نظره اله مد ايده الي وكال
آرون : اسمي آرون
رفعت راسي جان ماد ايده الي يعرفني عن نفسه ڪمت وصافحته ابتسمت بهدوء وكلت
_تشرفت بيك آرون اني اليان
آرون : اهلاً بيج مره ثانيه
هزيت راسي وابتسمت سحبت ايدي عنه رجعت شعري ليورا تقدم خله الاوراق علئ المكتب وكال
آرون : بس لوو سمحتي من يجي الاستاذ تكوليله يتاڪدلي من الاوراق.
_انشالله
عافني وطلع من المكتب كلبي يدكك بسررعه وهيج احس اريد احجي وياه بعد اتعرف عليه اڪثرر.
تمشيت وڪفت ڪدام بلكونة المڪتب كتفت اديه واني اباوع علئ البيوت والبنايات
تبين ڪلش صغيره لأن عاليه الشركه غمضت عيوني بتأمل
شويه ودخل ابوي للمڪتب درت وجهي اباوعله جان وياه تيمور وساهر.
ساهر : اليان؟ شتسوين هنا
تيمور : جايه تتفقد امور الشركه الحسابات تعرف بعد اختك
جاسر : اهلاً وسهلاً باباتي نورتي الشركه
_انتَ اصل النور حبيبي
جاسر : شتحبين تشربين جاي كهوه
_كلشي ماريد بس عندي موضوع وياك اريد نحجي بيه علئ انفراد اذا ممكن
تيمور : ليش يابه احنه غربه متحجين كدامنه لوو شنوو بالضبط؟
ساهر : يمڪن الموضوع خاص بيها اخذو راحتكم اني عندي شغل رايح
عافنه وطلع ساهر تيمور يباوعلي بغضب ويخزرني عود حته ماحجي شيء عن الصار بينه.
جاسر : تيمور ارجع لشغلك
تيمور : هوه رايح اخذو راحتكم عيني
عافنه وطلع من المڪتب علئ اعصابه باوعلي بابا بنظرات حنينه اجه يمي لزم ايدي وكعدني علئ القنفه وڪعد مقابيلي وهوه لآزٍمٍ ايدي.
جاسر : احجي حبيبتي شنوو الموضوع؟
_راح اشتغل وياكم بالشركه.
جاسر : عفيه هاي بنتي الاعرفها متاڪد مراح تتندمين علئ قرارج هذا
_انشالله
جاسر : وين تحبين اخلي مكتبج
_وين ماكان بس اريد بلكونه تكون اطلالتها مثل مكتبك كلش حلوو المنظر منا.
جاسر : موو تدللين راح اخلي مكتبج باحلا مكان بالشركه.
Thank you_
جاسر : ولو شعدنه غير ليونه.
_بابا اكو موضوع ثاني.
جاسر : شنوو الموضوع؟
جنت اريد احجي اندك الباب كال تفضل ابوي دخل آرون.
آرون : طلبتني
جاسر : أي وين الاوراق الطلبتهن منك ليوم
آرون : موجودات علئ المكتب كلت للانسه انو تنطيك علم بيهن
_ءءء أ هوه هسه جنت اريد احجيله عنهم.
جاسر : ماشي تڪدر تروح
هز راسه بأي طلع وسد الباب حيل خجلت عباله تجاهلت كلامه ومكلت الابوي عمداً رجع باوعلي ابوي اني دنكت وصافنه
جاسر : اي كملي بابا شنوو الموضوع
_هااا
جاسر : شنوو الموضوع الي جنتي تردين تحجيلي عنه
_هيج ماكو شي او جنت اريد اكلك عن آرون جابلك الاوراق
جاسر : منين تعرفين اسمه انتِ
_من جابلك الاوراق اني جنت كاعده بالمكتب وتعرفنه علئ بعض
جاسر : هاا ماشي
_يلا اني رايحه
جاسر : وين راح اخابر السكرتيرة دليج علئ المكتب الي راح تشتغلين بيه وشوفي شنوو لازمج اشتري ورتبي علئ ذوقج وراح اخلي المحاسب يدزلج كل الاوراق تتاڪدين منهم.
_ههههه يعني شنو تشغلني من اول يـوم. ؟
جاسر : لأ بابا بس رتبي امورج ومن باجر ابدي بالشغل.
_بس هاا نسيت لازم نتفق علئ شغله قبل لا ابدي
جاسر : شنوو هيه
_راتبي حالي حال العاملين الموجودين هنا وماكوو أي تفرقه ولا اريد شخص يكول بنته ويعاملها احسن من عدنه تعتبرني مو بنتك هنا.
جاسر : صارر
Thank you, Dad, may God_ protect you
حضنته واني مرتاحه ضمني عليه باس راسي، وكال
جاسر : شعندي غيرج اني غير انتِ روحي من الدنيا فرحتي انتِ
_عمري انتَ الله لايحرمني منك
جاسر : ولايحرمني من هل وجهه العسل
_ههه يلا رايحه. انتَ شوف الاوراق يريدهن الولد.
جاسر : أي هسه اشوفهن هوه انتِ شغلج راح يكون اغلبيته وياه لأن هوه هم تقريباً مثل شغلج يصحح الاوراق والمقابلات.
ابتسمت وبداخلي حيييل فرحت انو راح اشتغل وياه ونڪون سويه بمكان واحد اتعرف عليه اڪثرر.
_تمام
عفته وطلعت من المكتب واني مرتاحه بقيت افتر بالشركه جان آرون مخلي ايده علئ طاوله كدام شخص ويباوعون ثنينهم بالاورق علئ المكتب الكدامهم الولد كاعد وهوه واكف ويسوالف وياه ويأشرله علئ الورقه.
اباوع عليهم ماحس غير انسحبت من ايدي بقوه درت وجهي جان تيمور اخذني للمكتب مالته دخلنه بالمكتب دفعته بقوه واني منزعجه.
_وحق الله ياتيمور اذا تمد ايدك بعد احجي كلشي الابوي عنك اعرف حدك احسن مافضحك كدام العالم كله
تيمور : شتسوووين اجيتي هنااا تشڪيني الابوج تخلينه يطلعني من الشركه موو
_ههه لهل درجه خايف مني؟
لزمني من ايدي وسحبني عليه بقوه احس اصابعه نبتت بزندي
تيمور : اليييييااان ابتعدي عنيي حييل ابتعدي ترا اخوج واحد شيطان مايعرف لاقريب ولا بعيد الڪل متساوي عنده
دفعته بقوه واني متوجعه وعيوني مدمعه
_كسر انشالله بايدك حقير ماحجيت الابوي شيء كلت خطيه بس هسه راح احجيله كلشي واخلي يطلعك من حياتنه ياااامريض.
عفته وطلعت بسرعه من المكتب واني متوتره وعيوني مدمعه امشي سرييع واسوالف ويه نفسي ارتدمت بشخص بقوه لزمني من كتافي يثبتني رفعت راسي جان آرون.
آرون : علئ كيفج
_العفو مشفتك
آرون : بيج شيء
_بابا موجود ؟
آرون : عنده مقابلات حالياً احجيلج وياه
_شوڪت يخلص
آرون : ساعتين هيج ويخلص
تيمور : خيررر شعندك وياها
_معليك انتَ
تيمور : الياااان
آرون : سألتني عن الاستاذ جاسر كتلها عنده مقابلات حالياً
تيمور : ارجع لشغلك
هز راسه بأي عافنه وراح باوعت علئ تيمور بغضب عفته وطلعت من الشركه بسرعه اجه يركض ورايه لزم ايدي دفعت ايده وصحت بوجهه
_وخرر ايدك عنيي
تيمور : خلص اهدي شوفي صح غلطت اني ومجان لازم اتصرف هيج وياج اعترف بغلطي عوفي هل موضوع لاتحجينه الابوي راح يضوج وينقهر وهوه عنده ضغط تردين تأذين ابوج انتِ ؟
_ليش انتَ مافڪرت بأبوي قبل لاتصرف هيج تصرفات هسه صاار يهمك ..!
تيمور : باعي هسه احنه بالشركه وعيب هل تصرفات تصير بينه احنه خوان نرجع للبيت ونتناقش بكل شي تمام .
_ايي وشرط يڪون الحجي كدام ابوي
تيمور : اليان احنه شحجينه كتلج عوفي هل موضوع واني اسف لان مديت ايدي عليج ماتنعاد وعد
_مراح تغشني بهذا كلامك راح احجي لبابا عن تصرفاتك وياي وعن الموضوع الشفته بعيني.
تيمور : استغفرالله هسه شتردين انتِ بالضبط
_تفهمني ليش جبت البنت لبيتنه وليش أذيتني من حاولت افهمك عن الموضوع.
تيمور : أذيتج لأن عصبت وماڪدرت اتحكم بنفسي اوو لبنت يعني لشنوو جبتها عيب خويه شنوو هوه سؤال هذا؟
_تدري انتَ واحد مريض لازم تتعالج مع كل الاسف انتَ اخوووي وابونه واحد مع الاسف
تيمور : استغفرالله ياربي.
عفته ورحت اتمشه علئ الرصيف جان اكو كفتريا قريبة علئ الشركه دخلت وطلبت كهوه بدون ريوك ومن الصبح مغثه ولعبان نفس. .
خلصت وطلعت من المطعم بقيت اني اتمشه علئ الرصيف طلبت من الحارس يجيبلي سيارتي بقيت واكفه باب الشركه شويه واتصل جهازي جان بابا
_الوو
جاسر : وينج شو اجيت للمكتب مالگيتج
_رايحه للسوك اشتري كم غرض لازميني للمكتب ومناك ارجع للبيت
جاسر : ماشي حبيبتي اشتري الي يعجبج ورجعي للبيت اكو مشروع لازم احجي بيه وياج وشراكه بين تجار جدد.
_تمام
سديت الجهاز وركبت سيارتي ورحت للسوك اشتريت لابتوب واشياء تفيدني بالمكتب خليت كلشي بالصندوك.
اتصلت علئ اريانا مجاوبت ماعرف وين وليش متجاوب رجعت للبيت تقريباً بـ 3 العصر
ركنت سيارتي بالكراج ودخلت جان راجع ابوي واخواني من الشغل دخلت جانو كاعدين بالصاله
_سلام عليكم
الكل : وعليكم السلام
جاسر : غيري ملابسج ورتاحي وتعالي للمكتب مالتي
هزيت راسي بأي عفتهم وصعدت لغرفتي بدلت ملابسي ونزلت جوه تيمور كاعد ويباوعلي بنظرات مستفزه عفتهم ورحت علئ مكتب بابا دكيت الباب كال تفضل
جاسر : تعالي باباتي
رحت كعدت بالكرسي المقابل للمكتب طلع اوراق من الجراره وخلاهم كدامي
جاسر : دققيلي بذول الاورق ليوم وصلوني علمود نعقد شراكه بينهم
اخذت الاوراق من ايده وبقيت اباوع بيهن بيهم غلط بقيت اراجع بيهن مستغربه معقوله هذول اوراق شراكه بين تجار. ؟
_اكو غلط بالاوراق
جاسر : شنو الغلط احجيلي
_حسب القانون العراقي والمشاريع الخدميه والصناعيه يكون للشركة مبدأ خاص وشروط تنفيذيه وعقود وتوقيعات من صاحب الشركه هل اوراق مابيها غير شكد المبلغ الي راح يندفع وشنوو اسم الشركه الي راح نعقد وياهم الشركه وتوقيع مو واضح كلش احسهن مو قانونيات او بيهن شيء غلط
ابتسم بابا من سمع كلامي سحب نفس وكال
جاسر ; الاوراق صح كلهن غلط بغلط واني سويتهن حته اختبر معلوماتج واشوف مهارتج بالشغل طلعتي ذيبه وماتمر عليج هيج سوالف.
_حلوو يعني جاي تختبرني
جاسر : هههه اي
_وهسه شنو تبين؟
جاسر : شاطره
I know_
جاسر : عفيه هاي بنتي الاعرفها
_طالعه عليك غير
جاسر : اكيد
بقيت كاعده ويه بابا بالمكتب نسوالف ونضحك شويه واندك الباب جانت المساعده
اسينا : الاكل جاهز
جاسر : جايين بابا
هزت راسها بأي كمنه سويه ورحنه كعدنه علئ طاولة الطعام بدينه بالاكل اكل وباوع لتيمور احجي لبابا عن تصرفاته لو ابقه ساكته
اخاف اسكت ويتماده اكثر واخاف احجي وبابا يطرده من البيت والشركه بابا بهيج مواضيع ابد ميتفاهم.
احسن شيء انطي وقت هسه واشوفه يتغير او لا اذا بقه علئ هذا اسلوبه احجي كلشي لبابا واخلي هوه يتصرف وياه
كملنه عشه كعدنه بالصاله كل واحد لازم جهازه ويكلب بيه
شويه وجابت النه اسينا الكهوه اخذت فنجاني وصعدت لغرفتي ارتاح شويه
خليت الكهوه علئ المكتب مالتي فتحت الابتوب وبقيت اتصفح بيه راسلت صديقاتي بالمانيا.
اخر شيء مليت فتحت البلكونه وبقيت كاعده برا بيتنه كلش ممل ومابي روح ولا فرحه ابد كلمن ملتهي بنفسه وكل شخص يمشي وياك علئ مصلحه
الشخص الوحيد الي ميدور مصلحه وياي هوه ابوي اما البقيه كلهم ع كد المصلحه
تأخر الوقت كلش دخلت للغرفه سديت البلكونه تمددت علئ فراشي ونمت.
كعدت ثاني يوم متاخره وهوه اول يوم شغل الي بالمكتب كمت بسرعه اباوع للساعه بـ 11 الصبح
غسلت وجهي وبدلت ملابسي شسورت شعري وكويته علئ السريع خليت مكياج خفيف لازم ارتب شكلي راح يعرف عني ليوم بابا كدام الموظفين واكون وياهم بالشغل.
لبست جارلس وجاكيت بالون الاسود و وجوه قميص ابيض طقم رسمي يعني.
خليت عطر باوعت علئ نفسي واني اتبسم
_كمرر هههههه
اخذت جهازي خليته بالجنطه ونزلت جوه ماتريكت طلعت كبل من البيت
بالطريق ستوقفني ازدحام كلش قوي بقيت منتظره يخف اباوع للساعه تاخرت كلش ياربي شوكت تطلع
الدنيا صارت ظهر و بدأ يأذن المؤذن تأففت بضوجه
بقيت هوواي منتظره يخف الازدحام اتصل ابوي عليه
_الوو
جاسر : اليااااان وين انتِ باباااااا بسررررعه ارجعي للبيت بسرررعه
_شكو. باباا شصاير
جاسر : وين انتِ هسه وييين
_بالطريق جايه للشركه ليش تصيح صاير شيء
جاسر : ارجعييييييي بسرررعه ارجعيييي
توترت كلش وخفت بعدني محاجيه مشه السير وصارت السيارات دك هورن حته اتحرك سديت الجهاز ومشيت سريع خوفني بابا حيل ماعرفت شنوو الموضوع
بعدني هستوني طلعت من الازدحام لاحكتني سيارتين وعكسن عليه من الجهتين احس قطرت دم مابقت بيه احاول اطلع نفسي منهم من كل جهه يعكسون عليه ويحاولون يوكفوني
اباوع عليهم واسووق سريع صارت كدامي سيارة صرخت بصوووت عاالي ولزمت بريك حته اوكفهاا وكفت وضربت راسي بكل قوه بالاستيرن.
دخت وعيوني غوشن ماشوف زين افتح واغمض شويه و انفتح باب سيارتي اباوع منوو هذا مخلي لثام علئ وجهه ولازم بايده قماش ابيض خلاه علئ خشمي اول ماشميته فقدت وماحسيت بأي شيء بعد ..
