رواية حرم الاسود الفصل الثالث بقلم بتول ابو الليل
اريانا : حسيت اليان مو علئ بعضها بس ما ضغطت عليها هواي
يمكن يڪون الموضوع خاص بيها هيه وعائلتها رجعت للبيت وصلتني هيه وراحت
دڪيت الباب فتحه اخويه مسلم عندي 2 اخوان واحنه 3 بنات بيرلين متزوجه ونسرين هم متزوجه واني الوحيده الي بعدني ممتزوجه مسلم اخوي متزوج وعنده ولد وخالد هم متزوج وعازل بيت وحده يعني عائلتنه موو ڪلش جبيرة
مسلم : وين جنتي؟
_جنت بيت اليان
مسلم : شو مادري شوڪت رحتي
_من لبارحه گلت لماما ماكالت الكم
مسلم : والله مادري طلعين هواي هل ايام وماتاخذين رأيي
_هسه شنوو عندك تحقيق ويايه متخليني ادخل لوو شنوو
مسلم : ادخلي يابه
دخلت للبيت شفت امي بالمطبخ هيه و عفاف مرت اخوي رحت عليهم
_مرحبا
عفاف : مراحب عيني الحمدالله ع سلامتج زين ماصارلج شي
_الله يسلمج
جميله : شلونهم بيت خالتج شعجب اجيتي من وڪت
_هيج ماحب ابقه هواي شمسوين ع غده
عفاف : بعدني ممسوين شيء اصعدي بدلي وتعالي ساعديني بالطبخ موو مخليه كل الشغل علي اني
تأففت بضوجه مرت اخوي هيه حبابه بس تغث بالكلام وتغار مني هوواي لازم من طلع هيه هم تطلع ومن اشتري شي هيه هم واذا تسوي شغل او تطبخ لآزٍمٍ اني وياها ايد بايد.
عفتهم وصعدت للغرفه مالتي بدلت ملابسي لبست تراك سود اخذت ملابس،
م̷ـــِْن اليان اني وياها عادي نلبس من بعض وجسمي مثلها يعني نتلابس
نزلت جوه اندك الباب رحت فتحته جان بابا دخل للبيت وجهه ضايج
تذكرت كلام تيمور عن شغل ابوي معقوله يطلع صدك بابا جاي يخسر بشغله وميحجي حته منزعل.
_الله يساعدك حجي
حازم : ويساعدج باباتي
_اجيبلك شيء تشربه
حازم : اي جيبلي ماي
_حاضر
رحت للمطبخ صبيتله كلاص مي واخذته اله اخذه من ايدي وشرب ڪعدت يمه علئ القنفه.
_بابا اڪو موضوع اريد احجي بيه وياك
حازم : اي بويه ڪولي
_انتَ صدك خسران بشغلك
باوعلي بستغراب بلعت ريڪي بتوتر وبقيت اباوعله منتظره جاوب منه
حازم : منوو وصلج هل حجي ؟
_موو رحت ويه اليان لبيتهم وسمعت اخوانها يحجون موضوع شغلك
حازم : شگالو
_هوه شسمه كالو خسران شغل مهم وبيه هوواي خساير.
حازم : ماڪوو هيج حجي بابا تغرمنه من الحڪومه علئ مكان المعمل لأن ماخذنه رخصه اول وهسه كلشي تمام.
_اڪيد
حازم : ايي بويه
_الحمدالله ڪلش خفت من سمعت بالكلام
حازم : لاتخافين وهسه كومي صحيلي اخوج اريده موضوع مهم
_اي
عفته ورحت لغرفة اخوي كتله بابا يريدك طلع وراح كعد وياه رحت للمطبخ اني ساعدت عفاف بالغده.
كملنه غده سوينه برياني دجاج ودولمه اخوي ميحب الدولمه ابد ولا يذوكها واحنه كلنه نحبها
خلصنه غسلت وصعدت لغرفتي سبحت وبدلت ونزلت صار بيه ريحة طبخ وبصل
صبينه الغده وكعدنه تغدينه سويه ريان ابن اخوي عمره 3 سنوات مدلل البيت
ريان : بابا عمه ماطيني زونه
_ياا والله يريد ياخذ بزونتي ويموتها مثل هذيج
مسلم : مايسويلها شيء مو بابا بس تلعب وياها
ريان : هيه ماتي اريدها
_ههههه من شوڪت صارت مالتك غير اني اشتريتها خلي بابا يشتريلك وحده مانطيك بزونتي.
عفاف : عوفها ماما وصخه تلوثك اني اشتريلك بلبل واخلي الك بقفص والعب عليه
ريان : ما مااا
جميله ; هسه نخلص غده ونروح اني وياك وجدو لمدينة الاعاب ولحديقة الحيوان
ريان : مالوح ويانه عمه
_ههههه ياخبيث ليش متخليني اروح
عفاف : هههه ضايج علئ البزونه ويريد ينتقم منج هل شڪل
_يلا عادي اروح وحدي اني
ريان : ماا مالوحين بيبي ماتلوح
_اروح
حازم : ولج كافي تتعاندين وياه خلي ياكل
اموت علئ سوالف ريان احب اعانده واخلي يضوج ويحجي عليه ويعصب ينكرط.
خلصنه اكل شلنه الصحون اني ومرت اخوي غسلناهم وكل واحد راح لغرفته بابا وماما اخذو ريان وطلعو واخوي ومرته هم طلعو للمول يشترون ملابس.
صعدت اني لغرفتي وبقيت اصور بجهازي واكلب بالانستا تطلع كدامي حساب تيمور بالاقتراحات لأن اني ضايفه اخته اليان ومخليه رقمي دخلت علئ صفحة
بقيت اباوع بيها اله صور هوايه ممخلي دوله مرايح عليها مصور بافخم الاماكن احسه يحب يتفيك بفلوسه ومنصبه
دخلت علئ الاشخاص الي متابعهم قليلين بس 20 شخص.
دخلت اباوع بيهم كله رجال اعمال وناس اجانب ماعرفهم.
خرجت من صفحته بسرعه شعندي ابحوش الي يشوفني شگول
شمرت الجهاز وطلعت ماسكات وجهه وبقيت اسوي عناية بشره اتصلت عليه اليان جانت ايدي ملوثه ماكدرت اجاوبها.
نظفت وجهي ورحت غسلت نزلت للحديقه اجت عليه صديقتي جيرانه بقينه نسوالف سويه صار المغرب رجعو كل اهلي للبيت وصديقتي راحت.
ريان : عمه ثوفي جبت
_بلاا اشوف
جان جايب بزونه من گطن وفرحاان بيها مكيف عود يعاندني.
_انطينيها ريان حباب
ريان : ماا عدج زونه
جميله ; عوفي مالته يلا روحي ماننطيج شيء هاي بس اله
_ما ما ءء اريدها.
بقه يضحك عليه لان اسوي نفسي ابجي شلته وبوست خدوده الحلوات بقينه كاعدين اني وياه بالصاله نلعب بالبزونه مالته.
ساعه بـ 7 صارت اندك باب بيتنه طلع بابا احنه بقينه كاعدين شويه ودخل بابا وجهه مكلوب كلاب.
مسلم : ها يابه منوو؟
حازم : هذا ابو اليان
جميله : ها شعجب جاي علينه
حازم : يگول بنته مخطوفه وخلي بتكم لاتطلع هل فترا لأن حياتهم بخطر.
_شنووو ؟ ؟
......
دايخه واحس راسي مسطور سطر وجع موو طبيعي براسي احسه يريد ينفجر.
فتحت عيوني بهدوء ماشوف عدل مغوشه عيوني واحس نفسي ممركزه بحلم اني لوو حقيقه
بلعت ريڪي بتوتر مسحت عيوني اباوع حواليه الغرفه ضلاااام ماشوف شي منهاا غير ضوئ خفيف يدخل من الشباك الموجود مقابيلي والهوئ يركع بالشباك
وين اني ومنوو جابني لهنا وشصار وياي مجاي افهم شيء
تذڪرت اخرر شيء صاار ويايه سيارتين تلاحكني وجان سويت حادث ونضرب راسي بالاستيرن.
اديه مربطه علئ كرسي وحلكي رابطين عليه وصله حته ماصرخ بقيت اهز بالكرسي اريد افلت نفسي.
يالله دخيلك ساعدني منوو هذول الناس وليش خاطفيني وابوي وينه عرف مكاني لوو بعده يدور عليه.
بقيت هواي بالغرفه خايفه وكلبي احسه علئ شويه يوكف ادعي بداخلي واصبر بنفسي اخاف حيل من الظلمة ومن اكون وحدي احس برعب.
اتخيل شغلات مموجوده عقلي يألف وحده اتخيل يلزمني جني او تطلع ڪدام عيني مصاص دماء.
مرت ساعتين تقريباً واني علئ وضعي انفتح الباب ودخل شخص غمضت عيوني حييل واني خاايفه بس ماريد يشوفوني ضعيفة.
سحب كرسي وكعد مقابيلي فتحت عيوني صرخت بس ماطلع صوتي لأن هوه جان لابس قناع اسود وبس عيونه طالعه يخوف.
بقيت ارجف وابجي احس جسمي صاار مثل السعفه.
:: اشش لاتبجين ولاتخافين ماسويلج شيء مجرد عندي حساب ويه ابوج واريد اخلصه انتِ مالج ذنب ولا راح أذيج رتاحي تمام .
بقيت اهز براسي اريده يفتح حلكي تقرب يمي فتح حلكي صرخت بصوت عالي
_ساااااااعدووووني يااااانااااس ياااعاااالم ساعدوووووني،
جان واكف وراي خله ايده علئ حلكي وسكتني نزل راسه يمم ركبتي وهمس قريب من اذني
:: اششش خليج هادئه لاتجبريني اتصرف وياج بأسلوب ثاني
صوته سامعته بس منوو هذا اعرفه اني معقوله يطلع واحد من اقاربنه متاكده موو غريب عليه
رفعت راسي اباوعله عيني ركزت بعينه منوو اريد اعرفه عيوني كلها دموع بقه هوه يباوع لعيوني فجأه كال
:: لاتخافين گتلج ماسويلج شيء ليش تخليني طول الوقت مربطج
ملت راسي علئ صفحه بعد ايده عن حلكي سحبت نفس قوي احس نفسي مختنكه
_منووو انتَ منوووو وليششش خاطفني احجي بشنووو مأذيتك اني شتريييييد منييي
تمشه بكل هدوء وصار كدامي سحب الكرسي وكعد گبالي وكال
:: مامأذيتني بشي ولا اني مأذيج هسه بس عندي حساب ويه الوالد وانتِ بنته الوحيده وعزيزه حيل عليه فأ شفتج حيل مناسبه تكونين نقطة ضعف اله
_شمسويلك بابا عمره مامأذي انسان شتريد من عنده فلووس اني انطيك والله بس طلعنييي منااا
:: ههههههه والله تصدڪين ضحكتيني بهذا كلامج مال مامأذي انسان ابوج لج بابا ابوج واحد جذاب مخادع ياكل حرام اصلاً شوصله لهل مرحله وهل فلوس والرفاهيه غير فلوس الحرام بس حقج انتِ متدرين كلشي متوفرلج وعايشه احسن عيشه.
_احترررم نفسسسك ولاتحجي علئ باباااا احسسسن مـنك يانذل انتم الي تاكلووون حرام
:: ابوج واخوانج النذاله همه أكبر حراميه وقفاصين وقريباً راح تعرفين كلامي ڪله صحيح.
_تحجي هسه لأن موو يمك بيك خيرر روح واجهم لاتطلع بطولاتك كدااامي ياجبااان فكنييييي يلاااا طلعنييي مناااا
:: هوه منتظر هل يوم ساعه ساعه الي اواجهم بيه واخذ ڪلشي ڪدام عيونهم واندمهم علئ ڪل تصرف غلط سوو بحقي.
بعدني محاجيه دخل شخص ثاني هم ملثم بلعت ريڪي واني اباوعلهم.
:: هاا شصاار وياك "!
جون : الكل يدور عليها وحته مقدمين ابلاغ للشرطه لازم ننتظر ليوم منخابرهم حته مايتعقبون الاتصال ويحددون موقعنه خلينه نصبر لباجر ونشوف شلون نتصرف
:: ماشي انتَ راقبلي كلشي من بعيد
_طلعوني منااا عفيييه خلوني ارجع لبيتي انطيكم شڪدد متردون فلووس بس طلعوني
جون : تسمع خلينه نهدد ابوها ونطلب منه فلووس ونعوف شغلة الانتقام والتنازل متاكد مراح يتنازل عن القضية ابوها من نستلم الفلوس نتصرف بيهن ونطلعه
:: اخلي يتنازل غصباً ماعليه انيي ماصدڪت صار عندي سلاح ضده تريد اضيع هل فرصه من ايدي مستحيييل
جون : عدهم منصب قوي واخاف يوصلون النه ونروح بيها اني وياك.
:: جون اني اتفقت وياك من الاول ڪتلك اذا موو كدها انسحب ولاتجازف وانتَ دكيت صدرك وڪلت وياك شبيك هسه اذا خايف روح انيي اتصرف كلشي وحدي.
جون : ماخايف والله بس علمودك
:: خلص كافي تعال برا نحجي
_وييين عايفيني ورايحين عفيه طلعوووني لاتخلوني هنااا والله اخاف من الظلمة
ولاڪانو يسمعوني طلعو وسدو الباب وقفلو عليه بقيت ابجي ورجف من الخوف منوو هذول وشنوو يريدون من ابويه
شمسويلهم ليش هيج حاقدين عليه وعن شنوو لآزٍمٍ يتنازل احس عقلي وڪف عن التفكير
مجاي افهم أي. شي من الي ديصير ياربي دخيلك خلصني منهم واحمي بابا
.....
ساهر : بابا اهدء هسه نلكاها وين تروح
جاسر : وييين الكاهااا ويييين احجولي ماخليت مكان مادورته سيارتها بنص الطريق موجوده وهيه مالها اثر
لاڪامرات. موجوده وتدليني علئ مكانها ولاشرطه تكدر تطلع اله يمر علئ غيابها 24 ساعه
شصايرر بيها هسه أذوها ضربوها جاعت عطشت يالله راح اتخبل ماضل حيل بيه بنيتي.
تيمور : منوو تتوقعون يڪون خاطفها.
جنان : عدڪم عداوه ويه شخص معين ؟
جاسر : هووواي عندي منافسين بس ماتوقع توصل وياهم يخطفون بنتي ولوو واحد منهم جانو اتصلو هددوني بنتي طلبو فلوس عليه كلشي ماكوو سكته.
قصي : يخابرون اذا موو ليوم باجر همه من خطفوها اڪيد بالهم شيء اخذوها كـ سلاح ضدنه
تيمور : كلام قصي منطقي.
جنان : ياربي سترك خايفه يسوولها شيء
تيمور : انتِ هم بعد لاطلعين لاتنخطفين اوك
جنان : يمه بعد فلا اطلع الباب اخلي تجيني الكوافيره للبيت.
اندك باب البيت راحت المساعده فتحته دخل ابو اريانا واخوها وهيه.
حازم : سلام عليكم
الكل : وعليكم السلام
مسلم : بشرو شصار وياكم ماعرفتو شيء
تيمور : تتخيل لوو عارفين مكانها نبقه گاعدين هل كعده؟
حازم : ماتصلو عليكم
جاسر : ماتصلو ولا اكوو اي نقطه توصلنه الهاا لكينه سيارتها بنص الطريق بس هيه مالها اثرر.
اريانا : ياربي دخيلك معقوله قتلوها؟
جاسر : شنووو يكتلونها اڪيد لاا بعدها عايشه اكيد ماميته ماتموت بنتي ماتمووت.
حازم : اذڪر الله ابو تيمور انشالله مابيها شيء وترجع سالمه من خوفها اريانا تحجي هيج
اريانا : احميها ياربي خليها ترجع سالمه.
حازم : قدمتو ابلاغ للشرطه
جاسر : قدمت ومايكدرون يطلعون حالياً منا لحد ماتمر 24 ساعه علئ اختفائها من البيت.
مسلم : هم شاڪين بشخص معين؟
تيمور : الناس كلها حاقده علينه ومانكدر نحدد شخص واحد ولانكدر نحاسبه بدون اثباات قوي.
حازم : كلامه منطقي.
جاسر : شسوي هسه فهموني ابقه كاعد ومربط ومادري بنتي شصار ماصار بيها.
مسلم : اني رايح ادور واشوف كامرات الشارع الجانت متواجده بيه سيارتها.
ساهر : اني جاي وياك.
طلع مسلم وساهر من البيت بقه جاسر يخابر بمعارفه وبالحكومه حته تطلع دوريات تبحث عنهاا.
جاسر : رايح اشوف العقيد
حازم ; يلا امشي وياك اروح
هز راسه بأي طلعو سويه من البيت الكل خايف ويدور من عدا تيمور الكاعد بكل هدوء ورياحيه
قصي : شهل برود العندك اختنه الضايعه اختنه ماعندك غيره ولا تتحرك انسانيتك شووويه.
تيمور : خلصت؟
قصي : خليك يوم واحد من العائله وبين خوفك عليها عوف هل غرور والتڪبر علئ صفحه
تيمور : شتريد مني اسوي هاا؟ دورتو دورت وياكم بحثتو بالكامرات هم رحت وياكم قدموا ابلاغ حاجيت سلطات بغداد والضباط شتريد اسوي اكثرر ماوصلنه لنتيجه نكعد ونسكت وننتظر اتصال منهم.
قصي : اييي اڪعد اڪعد خلي الكعده تفيدك
عافه وطلع من البيت طلع جكاره ودخن اريانا كاعده علئ القنفه وتبجي وتباوعله بقهر.
....
اريانا : انصدمت حيل من عرفت بـ اليان مخطوفه اليان موو بس بنت خالتي لأ اختي واعز من اختي هم.
رحت ويه بابا بالكوه لبيتهم اريد اسمع شيڪولون عرفو مكانها لأ
راحو يدورون عليها الي صدمني برود تيمور ممهتم ابد لخطف اخته ولاعبالك مخطوفه اصلاً
تعارك هوه وقصي طلع قصي بقه بس هوه كاعد وامه واني
اباوعله بصدمه يوم عن يوم جاي يثبت انوو هوه انسان حقير وماعنده ذرت مشاعر واحساس.
جنان : اسينا جيبي مي
تيمور : عليمن تبجين انتِ الثانيه
رفعت راسي اباوعله هذا شبيه من كل عقله يحجي
_انتَ ماتحس اليان ضايعه اختك مختفيه ومنعرف شيء عنهاا عايشه ميته منعرف شتريد منييي اضحك
تيمور : ترجع لاتخافين عليها
جنان : وشبيج تصيحين عليه عبالك هوه الكايل الهم يخطفونها.
تيمور : عوفيهاا يووم مقهوره علئ صديقتها حقها
مسحت عيووني من الدموع واني بداخلي ميته قهر خايفه حيل علئ اليان منوو ممڪن يڪون خطفها وليش شمسويه مصارلها بس 3 ايام من رجعت من الخارج لوو تدري باقيه هناك احسن الهاا.
صارت الساعه بـ 11 بليل وماكوو أي خبر عنها ابوي واخوي يدورون عليها اني كل 5 دقايق اتصل علئ واحد منهم وماكوو.
بقيت كاعده بالحديقه واني ابجي خسرت صديقتي بعد مترجعلي شصاار بيها وينهاا ليش مالها اثر ليش الخاطفين ماتصلو.
ابجي ورجف من البرد حسيت شخص غطاني درت وجهي جان تيمور خله جرجف علئ كتافي وكال
تيمور : برد الجو تغطي وكافي تنوحين وتبجين ترجع والله
لفيت الجرجف عليه بردانه كعد مقابيلي مسحت دموعي وسحبت نفس بقوه.
_تيمور ترجع اليان موو؟
تيمور : ترجع
_والله
تيمور : والله ترجع شبيج
_مامرتاحه ڪلبي يوجعني خايفه حيل عليها.
تيمور : عود ليش هل ڪد حساساات انتن وتتأثرن بابسط الامور
_وانتَ تشوف هل موضووع بسيط؟
تيمور : اني داحجي بصورة عامه موو بس علئ هذا الموضوع علئ ڪل سالفه تنوحن وتبجن كبرن عقولجن شويه
_كل بنيه هيج حساسه وتتأثر بكلشي وتبجي علئ كلشي اني معتبره اليان اختي موو بس بنت خالتي شلوون تريد مني ما ابجي عليها خايفه يسوولها شيء يقتلوها
تيمور : هنيالها عدها هواي ناس تحبها وتخاف عليها
_لأن هيه حبابه ويه الڪل ومتأذي اي بشر شلون منحبها ونخاف عليها.
تيمور : اييي واضح
سكتت عنه نزلت راسي واني لافه الجرجف حيل عليه خله هوه رجل علئ رجل وطلع جهازه يباوع بيه ولايد الثانيه مادها علئ القنفه عنده برود اعصاب موو طبيعي الناس بهيج مواقف تنخبص وتعصب ألا هوه مانطه أي ردت فعل
شويه ودخل اخوي مسلم هوه وساهر اخو اليان كمت بسرعه ورحت عليهم
_هاا شصار
ساهر : ماڪو مالكينه أي شيء لازم ننتظر لباجر بلڪي يتصلون علينه.
مسلم : يلا اريانا خلينه نرجع للبيت كلشي يصير وياكم خابروني ماشي
ساهر : انشالله
مسلم : يلا مع السلامه
مشيت ويه اخوي تيمور علئ كعدته ماتحرك ولا سأل وكالهم شصار وياكم صعدت ويه اخوي بالسياره ورجعنه للبيت بالطريق كال اخوي.
مسلم : شعندج كاعده ويه تيمور؟
_جنت كاعده وحدي هوه طلع وكعد مقابيلي وهوه بيته شعليه بيه اني
مسلم : ابتعدي عن هل انسااان حيل وديري بالج منه ترا شيطان وافكاره ابليس مامفكرهن ابد لاتحجين وياه ولا تنطينه مجال
_شقصدك
مسلم : ابتعدي عنه وبس
_تمام
كمل سياقه خلاني اصفن ماعرفت شنوو قصده وشبيه تيمور وهوه صح اناني اخته مختفيه ومالها أي اثر وهوه ولا هامه الموضوع.
.......
بقيت اليل كله ڪاعده مادري شوڪت دخت ونمت
ڪعدت الصبح علئ صوت جلاب تنبح فزيت خايفه بعدني علئ ڪعدتي واديه مربطه بالكرسي
رگبتي متشنجه ماڪدر حته احركها بلعت رڪي بتوتر واني اباوع يمين يسار علئ المكان الي بيه اني
غرفه وصخه وكراتين مشمره علئ الارض وحديد وبيسكلات خربانه وتراب بكل مكان جلاب تتنابح قرب الباب احس جمد الدم بجسمي
وين اني شهل مكان هذا وين راحو هذول ليش خلوني وحدي هنا بابا وين عني ليش لحد هسه ماطلعني
_ويييينكم طلعووووني منااااا ساااااعدوووني ياااااناس ياعاااااالم طلعووووني الله يخليكم
صيحت هواي وماكوو اي فائده محد يجاوب تعبت من الصياح بقيت اباوع علئ المكان ادورلي شيء افك ايدي بيه
احرك بالكرسي مايهتز رابطين الكرسي علئ حديد وراي واني مربطيني بيه بحيث الكرسي مايتحرك من اهزه ولا يوكع
_اووف ياربي دخيلك ساعدني طلعني من هل مصيبه شسوي شلون اطلع نفسي منا هسه
مرت ساعه كامله واني علئ وضعي حاولت شكدد ما اكدر افك ايدي ماكدرت متت عطش.
شويه ودخل نفس الشخص الي خطفني هم مغطي وجهه بس عيونه تبين.
:: ها يحلوة كاعده عبالي الطبقات المخمليه تبقه نايمه للظهر ماتڪعد هيج وقت.
_حقييير كلب طلعني مناااا طلعنيييييي والله اذا ماخليتكم تتندمون بسيطه
:: ههههه هاي شنو ليوم صايره قويه وتهددين شتغير لبارحه تتوسلين نعوفج ؟
_انتَ شترييييد مني شمسويتلكم انييي طلعوووني حرررام عليكم ماعدكم خوااات
:: كتلج ماعدنه شيء وياج شغلنه كله ويه ابوج اول مايخلص ترجعين لبيتج سالمه فأ الاحسن الج هسه تكعدين وتسكتين
_خابر بابا هسه واطلب شتريد منه بس عوفني اديه ورمن وركبتي تشنجت ماكدر حته اتحرك
:: اووف رقيقه ماتحملين حقج يابه مايعه بنت منوو بعد انتِ بس يلا تحملي هل كم يوم اعتبري اختبار الج
_ناس جوعيه كل همكم الفلوس تموتون قهر اذا تشوفون انسان ناجح بحياته ومستقر حسبي الله عليكم
:: جؤ جؤ غلطانه بالنسبه الي اني موو مهم عندي الفلوس واذا مثل ماتكولين جان شفتيني هسه بايعج باغلئ سعر هواااي اعداء الابوج يتمنون ياخذونج ويستخدمونج سلاح ضده
بس اني مو هيج عندي شغل ويه ابوج اريد اخلصه وارجعج اله اول مايوافق عليه
_فدوة فك ايدي والله توجعني حيل
:: تحملي يلا ميخالف
_والله ماشرد اقفل الباب او افتحلي ايد وحده بس يخف الوجع رجع ربطني ورمت ايدي
بقه واكف ويباوعلي سحب نفس قوي واجه صار وراي لزم اطارف اصابعي حركهن بايده مثل الي يدلكهن الي.
_شدسوي انتَ ؟؟
:: اخفف الوجع عنج
_ءأ وخر عفيه هيج توجعني اكثر ايدي بس فكها.
لزم ايدي وفك الرباط عنها انفتحت وحده والثانيه لا صار كدامي بسرعه
حركت ايدي بوجع احسها منمله وتوجعني بقه كاتف اديه ويباوعلي.
_فك ايدي الثانيه شبيك
:: ڪلتي بس وحده
_زين اريد مي عطشانه فدوة
:: تردين اكل؟
_لأ بس مي
هز راسه بأي عافني وطلع وسد الباب احاول ادير وجهي وافك ايدي الثانيه ماكدر كل ايد رابطها حيل
دنكت افك رجلي فتحت قليل من الربطه انفتح الباب رجعت علئ وضعي وكانو ممسويه شيء.
دخل شايل بايده بطل ماي سد الباب واجه وكف يمي.
:: هاج
_ماكدر الزم البطل بايدي توجعني عفيه شربني.
كلشي بالي اريده يتقرب يمي حته اكشف القناع عن وجهه واكشفه واعرفه منوو هوه متاكده شخص اعرفه صوته سامعته وحافظته.
فتح البطل واجه تقرب يمي يشربني شربت شويه واني اباوع لعيونه هوه هم مركز بعيوني
ايدي ترجف خايفه اشيل القناع من وجهه وانصدم شجعت نفسي حييل وسحبت القناع عنه بسرررعه.
رجع خطوات ليورا فتحت حلكي بصدمه من شفته ...
