رواية دخيله الشيخ زين العابدين الفصل الواحد الثلاثون بقلم أوتار حزينه
هيله
دشيت الحمام اجر بدلتي الثكيله ورايه وخرت الگبع مني رحت للمغسله دحكت لروحي الحزن تارس وجهي وگلبي يوجعني....
شهم سيطر على تفكيري بهاليوم يروح ويجي بين عيوني صوت صاح بداخلي
يااهيله حرااام الكاعد تفكرين به انتي هساع صرتي حرمه الزين ومايجوز لج تفكرين بغيرو
نزلت راسي بجيت بشهكه مخنوكه وسندت روحي على المغسله بلحظه مر علي شريط حياتي كلو
كبرت اشوف شهم چدامي واسمع انا له وهو لي شفت روحي معه بنص الزرع يتكلم معي ووجهه يضحك ويكلي يا املي
غمضت عيوني ودموعي طفرت زين اجه جدامي
كرهه اليه وعدواته الي تحولت بين ليله ويوم حب جبير بس من طرفو هو وبس
درت راسي دحكت للباب واحس بروحي ضايعه وتايهه ومااعرف شلون افكر زين تغير عن الاول وهذا التغيير اعرفو صار من ورايه
اعرف هو تغير حتى ارضى به والسواه لي ولاهلي اكبر دليل عن حبو لي
سريت بالحمام رايحه جايه دايخه ومااعرف شلون اتصرف بهالليله هو كلي مااگضبج بس انا جنت خايفه اظل معه اعرفو زلمه وصعبه علي بهاليوم يگضب روحو مني
وانا اسري مااعرف شنو بالارض تزحلگت ووكعت بقوه راسي انضرب بالحايط
عطت من الالم
مااشوف غير الباب ينفتح بقوة دش عليه اريد اكوم تليشت بالارض
الله الله وش بلاج شنو تزحلكتي
ماكدرت ارد بسرعه شالني من خصري ووكفني تكلم بقلق وخوف
تاذيتي
لاا مابيه شي
تجنبت ادحك له جان گريب كلش ماتحرك ولا طلع عيوني صارت على صدرو
يتنفس سريع رفعت راسي وجهو احمر دم صافن على جتوفي وصدري غطيتو بايدي ودرت روحي منو كلت بصوت طلع گوة
من رخصتك اريد اغسل
اخذي راحتج
رد وطلع من يمي جسمي كلو كام يرجف من شفت نظراتو تمالكت روحي گوة ذبيت البدله لبست
دشداشه مستوره،،،،،،،،
غسلت وجهي
اريد اوخر المكياج لان ضجت منو كلش فليت شعري وسويتو گصيبه صفح
شلت البدله وطلعت بيها للغرفه هو كاعد يدخن وصافن حس بيه
دحك لي وهم شفت
النظرات الي تخليني اتوتر واخاف منو تكلمت بتردد
اعلك البدله
مارد رحت للكنتور علگتها الباب اندك كام راح فتحو وطلع بره رجع بصينيه عشه خلاها على الارض وكال
يله تعالي تعشي تره جتلنا الجوع
مااشتهي اكل انت
رديت وسريت للجربايه كعدت هناك وانا اتجنب ادحك له سمعتو ذب حسره گرب وكعد اگبالي وخله مسافه بينا تكلم
ياهيله انا مااريد نعيش بنفس الغرفه واحد مجافي اللخ
رفعت راسي كمل
انا عند جلمتي ماالزمج الا تطيب نفسج مني ويحبني گلبج مثل ماگلبي يحبج لجن يبنت الناس ماايجوز ولا يرهم انا وياج بغرفه وحده وماناكل سوه او يصير بينا كلام عادي
ردد
انتي حرمتي هساع وانا اريدج معي تجلسين
وتاكلين تفتحين نفسي للاكل وانا هم افتح نفسج للاكل
صفنت علي ابتسم وكمل
عوفج من اخر وحده يجوز انا ماافتح نفسج للاكل لجن انتي تفتحين نفسي
واحب شوفتج حدي
ماعندي كلام اردو كام لحيلو وكمل
كومي يله تره انهفينا من الجوع
كمت ويا راح كعد وتربع اخذ خبزه اشرلي اكعدي
سريت له بتردد كعدت مسافه عن الصينيه دفعها
عليه كلت بسرعه
لاا خليها يمك
لاا تجيج وانا معها
رد مبتسم كربها وهو وياها كمل بضحك
خلي نضرب ونسند افادنا لان الجوع ذبح المعده وخلاها تطلع اصوات
عجيبه غريبه
انا هم جنت جوعانه لان كطعت الزاد من گرب عرسنا اكل شويه من تلح امي عليه
لف لفه مشاوي وقدمها لي كال
هاج اكلي تره اذا تظلين جافيه ايدج من الزاد ما راح تكدرين تحصلين لگمه لان زلمتج عظام ويسحك الاخضر واليابس
صفنت علي يتكلم مرتاح واشوفو فرحان رغم ماصار شي بينا اخذتها منو من اشر بيها سال
ببسي لو سفن
سفن
فتح قوطيه وخلاها يمي اكلت من اللفه عيوني
علي يلف وياكل تكلم
شفتي ساريه وريهام طالعات يخبلن بهاليوم
ابتسمت لاراديا لان صدك طلعن يخبلن
ساريه لبست بدله بيضه هو جابها لها وريهام حمرة انتبهت صفن عليه رديت بسرعه
اي
ابتسم وكال
جوعانه موو
دحكت لايدي ماكله اللفه كلها ومدري شوكت
خلصتها مارديت سوه لفه اللخ مد ايدو بيها وكال
هاج اكلي اللخ
مااريد اكل انت
بس هاي يولي اكليها وانا عليه الباقي اسحكه كلو وادزلهم بس العظام
يحجي ويمزح معي وانا صافنه علي وساكته
كملت قبله وكمت رحت غسلت رجعت شفتو ماكو شايله الصينيه وطالع
دورت على جنطتي شفتها على الميز رحت جبتها وعگبت للجربايه كعدت طلعت جهازي مثل كل مره من افتحو اصفن على صورتي والكلام الكاتبو
الباب انفتح دش يفرك برگبتو تكلم
هساع الواحد ينام وهو تارس بطنو ومرتاح
فزيت من الجربايه ورديت بسرعه
تعال نام هينه اني اروح انام على هاي القنفه
صفن عليه وعلى الجربايه رد
غير تتكسرين ويفين حظج وتكعدين تمشين مثل العجوز نامي يابه بمجانج انا افرش بالارض واانام
لاا يازين ماايصير تعال هينه نام
دحك لي بنظرات خلت گلبي يدك بسرعه رد
هي ظلت على النومه ياهيله تراها جثير شغلات المفروض ماتصير وصارت هساع
خدودي اشتعلت نار وخفت منو كمل
بهيده وي روحج يبنت العرب انا على عهدي معج چلمتي عكال مااراح اگرب منج الا وانتي تهذين باسمي
درت وجهي منو ذب حسرة وراح طلع فراش من الملحق الفوك فرشو بالارض تمدد وكمل
طفي الضوه خل نام
ظليت واكفه بمچاني غطه
وجهو بايدو سريت للضوه طفيتو وعگبت الجربايه
كعدت تكلم
انا اخذتج يااهيله
فزيت من مچاني كمل
اليسألج وهم مايسالون بهل الشي بس خاف احد يسال امي جدتي كولي ليلتنا تمت على خير
ماكدرت ارد دار روحو مني جتف ايدو لصدرو وماتغطه
🌿🌿🌿🌿🌿
زين العابدين
تمددت بفراشي هيله وياي بنفس الغرفه وهذا يكفيني هساع فرحان بيها وبنفس الوقت مقهور لان حبي الجبير والسويتو لها ماشفع لي وخلاها تلين من يمي
سمعتها تحوص فوك الجربايه ظلت مدري شكد تتحرك بعدين هدأت عرفتها غفت درت روحي
عليها
متغطيه ونايمه كمت من مچاني ورحت ليمها ذابه روحها من التعب وخاله
ايدها جوه خدها
صفنت على گصيبتها ووجهها وگلبي يدك
بجنون تذكرت ذاك اليوم من شفتها مفرعه بنص
الگصب وتجذل بشعرها
حجيت وي روحي
تمنيت هساع انا نايم حدج ومتغطي بشعرج اشم ريحتو واغفى على دكه گلبج
غمضت عيوني بتعب رددت
اخ ااخ ياهيله لو تگضبين گلبي هساع الا يچوي ايدج تحركج ناري يولي بس اكرب منج
درت روحي من شفت نفسي راح افقد سريت
للبلكونه فتحت الباب بهدؤ وسديتو ورايه وكفت بهالبرد اريد اطفي نار گلبي المشتعله
ورثت جكاره وصفنت للسما ادحك لها رددت
انام ياهيله وفي گلبي من الشوگ رجفه
واصحى وفي الضلوع
منج حريق
🌿🌿🌿🌿🌿
ليان
بابا ماراد يتأخر وسيم بزواجه استعجل هو وماما بكلشي جابو غرفه نوم فخمه وغاليه اله هديه زواجه واني اشتريت اله
شغلات هوايه واخذت سوار
ذهب لنوار كلت اهدي الها ثاني يوم عرسهم
العمال كملو شد غرفه اخويه وراها بديت انظف ارؤى وياي ملتهيه تحجي وي خطيبها وتضحك ذبيت حسرة لان تذكرت ذيج الايام الجمعتني وي ايهم
رفضت اتذكر اي شي يخصه ،،،بسرعه حجيت
راح انزل الوصخ لجوه
ااي روحي
نزلت بالكيس امي واكفه تكوي البردات مال غرفته وبابا كاعد يمها يحجون
على تفاصيل عرسه
طلعت لبره كيتي ورايه تمشي فتحت الباب بسرعه رگضت وراحت لبيت مالك
ووج تعااالي وين رايحه
ذبيت الكيس بالحاويه ورحت بسرعه عليها بس الوكحه طبت من جوه الباب وراحت
عفتها يمهم رجعت باب انفتح انداريت جان مالك شايلها حجيت بسرعه
ضوجتكم موو
مارد باوع عليه من فوك ليجوه بنفس نظراته بيوم مهر اخويه جنت لابسه تراك رياضي وخاله على شعري بوند عريض دار راسه باوع لشباب واكفين يم بيت عامر
عكدت حواجبي من شفت نظراته حجه بنتره
هااج ااخذيها
صفنت علي من حجه بلهجه امر اخذتها منه كمل بنفس اللهجه
طبي جووه
رفعت تك حاجب ورديت
نعم
انعم الله عليج شبيج ماتسمعين داكلج فوتي
جوة مااجاي تشوفين اكو زلم بره
وانت شعليك بيه وليش تحجي وياي هيج
يولي فوتي جوه وبلا لغوه زايده
ماالك ماااسمحلك تحجي وياي هيج انت منو حتى تامرني اطب جوه
خزرني بغضب وخزرته هم حجه وهو يكزكز من اعصابه
يولي دشي جوه وخليهن راگدات تره من يگبن
عندي تشوفين شي ماايسرج
ااحجي عربي حتى افهم عليك
ااي موو اني كاعد احجي هندي شكي ماراا بارا
بارا
كاعد تصنف حضره جنابك
بابا طلع سكتنا اثنينه بس واحد يخزر باللخ درت روحي وطبيت جوة ادردم علي بگلبي واحجي
هذا بس خطبنا اخته كام يامر وينهي لو صايره اله من صدك واقبل بيه جان شسووه
وكفت بنص الكراج من سمعت صوته العالي
لاااا ياعم بطلت ازرعها خليها هيج ترابات احسن
درت روحي علي واكف كدام ابويه الي ظهره عليه عيوني صارت بعيونه عاكد حواجبه ويباوع عليه بضوجه
الهدنه الصارت بينا هو خربها من تدخل بشي ما يخصه درت وجهي منه ورحت للمطبخ طبيت ذبيت كيتي بالكاع وسديت الباب حجيت بغضب
ماما بعد لاتخلين كيتي تروح لبيت مالك
خير ليان صاير شي
لاااا مو صاير بس اني مااريدها تروح لهناك
رديت باعصاب صفنت عليه مو مفتهمه اي شي رحت غسلت،،، وطلعت للمشتل جان عصر التهيت بالشغل ووي،،،، حظي والتعب التعبته بيت اهلي اجوني هوايه زبائن وكلهم يريدون طلبات مستعجله كملت ساعه عشره بليل
اني بعدني بي جرس الباب اندك رفعت راسي عكدت حواجبي من شفته طب
🌿🌿🌿🌿🌿
مالك
كاعد بالمكتب وصافن للحاسبه
احب ليان واحتلت كل تفكيري بس مااكدر احجيلها الي بگلبي اعرف كلش زين هي ماخذه
نظره عليه مو حلوه من سمعت اني السبب بموت مرتي وهم السبب الثاني هو الصار بيها من وره ذاك لعار خله عقده بيها وخلاها تكره جنس اسمو رجال ،،،
ردت وي الايام راح تحبني من تشوف اهتمامي بيها ردت هالشي تحس بي
واقرب منها شويه شويه وبدون مااحجي واكول الها احبج خفت لا ترفض وتوجع گلبي
بس ااخ مني ومن طبعي النار طبع ماايغير طبعو واعصابي فلتت بيوم مهر اخوها واختي من شفتها شلابسه وشلون دحك عليها ابن عمي يسر... وزيد ناري وشعلني من ظل يسال عليها ماانطيتو نشده
بس هو ماجاز سال امي عليها من فرغ البيت عرف تصير اخت وسيم كلت هذا خلاها براسو وهالشي خبلني كلت بس يحجي بيها اكولو انا رايدها
الخبال دك بالراس وزاد من طلعت الظهر ،،،،
شفت كيتي طبت علينا سمعت صوتها تصيح
عليها شلتها فتحت الباب ومااعرف شصار بيه من شفتها لابسه تراك رياضي ضيق وهي صاحبه جسم حلو والشعر منثور بفوضى
حلوه داير مداير وجهها
سمعت كلام درت وجهي شفت شباب واكفين يم بيت ابو عامر ويدحكون عليها وهي ولا يمها
گبن عندي وتلاطشت وياها وهي ماسكتت جلمه بجلمه ،،،اريد اعرف لسانها المنشار هذا ليش ماتهدو على ذاك العار ليش مكدارها بس عليه
مااالك
انتبهت بشير يحجي وياي
هااا
شبيك يمعود وين صافن صارلي ساعه احجي وياك وانت بغير عالم
ماكو شي احجي اسمعك
كلت مادام صفت القلوب ووسيم صار نسيبكم خلي يرجع للحسابات لان دحنا على الكتلوك وصارت خربطه بكلشي رجعت ليوره سندت ظهري على الكرسي ورديت
اي من ارجع احاجي بهل السالفه
بيك شي
دحكت له صافن عليه
عاكد الحواجب
مابيه شي
كام من مچانو واجه ليمي كعد ورث جكارتين انطه وحده اليه اخذت نفس طويل وذبيتو سال
احجيلي شبيك داشوفك مو على بعضك
سكتت اخذت نفس اللخ
تحب مالك
صفنت علي ذبيت حسره
اوف والله عاشك ومصخم ولك منو هي الي كدرت تروض ابو انس
غمضت من اجتي بين عيوني بشعرها الجنا نار وعيون البزون التبرج بلمعه وماخذه گلبي
رديت
اخت وسيم
رفع حواجبو وصفن عليه كال
اوف ولك هاي شلون حبيتها وهي مو صلح
وياك
حجيتلو الصار بينا وشلون ساعدتها من اجاها
العار للمشتل وخليت عم شعلان يگطع رجلو منها وشلون صارت هدنه بينا
بعدين خربتها من انهديت
بيها من ورة غيرتي
يسمع الحجي ومركز وياي رد مبتسم
وانت وافقت على وسيم لخاطرها موو
سكتت ضحك وكمل
ولك صدك لو كالو من بعد العدواه محبه شفته بيك والله
زفرت الدخان بضوجه ورديت
اي بس من يمي
خرب حظك اي والله هسه اريد افتهم البنيه شويه
لانت من يمك تجي انت وتنهد بيها ليش وتخرب كلشي
يول هو ماكو شي هالبنيه ماتكدر تحب ولا تكدر
بعد تسلم گلبها لواحد فقدت الثقه بجنس اسمو رجال العار واختها الساقطه عدمو ثقتها بينا وخلوها تخاف وتتعقد من شي اسمو حب
سكتت وكملت بقهر
بشير ليان مريضه وهالعصبيه الي بيها والتشوفها منها كلها حاجز خلتو حتى محد يگرب منها
مالك اعرف هذا كله بس انت كلت هي لانت من
يمك يعني اكو راحه بالموضوع من جانبك
كلت صعدت وياك بسيارتك وصار حوار حلو بينكم
سكتت هو كمل بلوم
ااي اريد اعرف انت ماكدرت تسكت الا تجفص بطنها وتنهد بيها اسكت اجيبها بلطف وكلام حلو تظل خبل وماعندك اي لغه حوار حلوه وي الجنس الناعم
يول مااعرف شصار براسي تخبلت منا ابن عمي
خله عيونو عليها من طبت بالمهر وشافها
ومنا ذوله طلعت اشوفهم
يدحكون لها باعجاب ويريدون ياكلوها بعيونهم الخبال دك بالراس وكمت اجفص بالحجي وياها
هههه الغيرة وماتفعل راح يطيح حظك مالك وتاگل تبن
اكلت يابه وتصخمت وهساع مااعرف شلون اصلح السويتو وياها
ههه اخذ باقه ورد وروح اعتذر منها
كاعد تصنف حضرة جنابك
ههه لا والله بس هو هيج الشغل اليغلط وي بنيه يحبها يروح يعتذر منها ويراضيها بورد علبه شكولاته
اي وافضح روحي موو بس اسوي هيج راح تعرف اني احبها
سكت للحظه وبعدين كال
مالك صارحها كول الها انت تحبها
راح ترفضني من وره الصار بيها والسمعتو مني
عكد حواجبو وسال
شنو السمعته منك
حجيتله الصار بينا وشلون سمعتني احجي وشايل ذنب لميس صفن عليه ورد
خرب حظك اي والله اذا نست الصار بيها ماراح
تكدر تنسى السمعته منك
شفت حظي شلون اسود ومصخم
لااا لاتحجي هيج كول ياالله باوع عليه انتو صرتو نسابه يعني اهل وبيتهم بصف بيتك واختك راح تروح وتجي عليك وبنتك يمها
راح تظل بلكي هالطفله تجمعكم لان انت كلت هي تحبها وتموت عليها وبنتك هم تحبها
رديت
قادر ربك يجمع النار والثلج
ههه منو النار اكيد انت موو بس هي هم نار بشعرها الاحمر وعصبيتها
سالمين يابه اشو كمنا نجفص بالحجي
هههه ها ولك شبيك راح تعاركني اني هم من وراها
سكتت مبتسم كام ودعى اليه
الله يجمعك وياها بيت واحد
امين
رديت واني رايد هالامنيه من الله كملنا شغل
وطلعنا سوه ساعه تسعه رجعت للبيت ازدحام ولعبان نفس وصلت وره وين للمنطقتنا دحكت لمشتل بعده مفتوح
ترددت للحظه بعدين وكفت سيارتي يمو نزلت
مشيت ،،،،وكفت اريد ارتب الكلام
الي اريد اكله الها رتبت جم
چلمه وطبيت
وكفت من شفتها يم الميز رفعت راسها عيونها
صارت بعيوني الملامح تغيرت بسرعه وعكدت حواجبها تقدمت خطوه
وحجيت بسرعه
اسف ليان
ردت احجي الحفظته بعقلي قبل شويه ماكو فقدتو كلو وتبخر من راسي رددت
يعني اعرف نفسي تجاوزت حدودي وياج وكلامي وياج جان غلط بغلط
🌿🌿🌿🌿🌿
ليان
اباوع على مالك واشوفه مرتبك ومتوتر كلش اعرفه يحبني وتصرفاته فضحته اكثر من مره بس ماحجه ولا كال هالكلمه وماكدرت
احجي اي شي ويا ولا ارفضه
خاف افشل واطلع متوهمه
بهل الشي
تقدم عليه كمل
ليان اكرر اسفي الج واعرفي اني تصرفت
هالتصرف لان يهمني امرج
ليش يهمك امري
صفن بعيوني درت وجهي منه رد
احنا صرنا اهل يعني انتي صرتي مو غريبه عليه هم جيران وهم اخوج صار زلمه اختي
يحجي شي وبگلبه هم اكو شي ثاني احساسي ابدا ماخطا لان رفعت عيوني اله صافن عليه بنظرات فاضحته وفاضحه حبه اليه
خليت الزين السواه اليه ولاخويه واهلي بين عيوني رديت بروده
اعتذارك مقبول مالك
وجهه ضحك بسرعه رد
يعني مو زعلانه عليه
لاااا مالك انت كلت احنا صرنا اهل ونسابه والزعل بهيج ايام حلوه ماايصير بينا
قصدت عرس اخته واخويه افتهم ورد
اي الزعل مو حلو وعرس وسيم ونوار گرب
سكتت هو هم سكت ماجنت اباوع علي كال
اترخص
الله وياك
سمعت جرس الباب اندك رفت راسي طلع اني هم ماظليت قفلت وطلعت وراه رجعت لبيتنا
🌿🌿🌿🌿🌿
هيله
كلت ماراح انام من وره الخوف والتوتر ولان هم مچاني تغير بس الصار انا نمت نومه اهل الكهف كعدت امد بروحي وعبالي نايمه بفراشي بيت اهلي دحكت للسگف والمچان الي انا بي فزيت صفنت وتذكرت انا بيت زين وعرسنا جان البارحه
دحگت لفراشو ماهو الساعه صارت گبالي
بالتسعه فزيت من فراشي لان حتى صلاه الفجر ما كعدت ولا صليتها رحت بسرعه توضيت عگبت للغرفه اخذت ازاري من
فوك سجادتي لبستو فرشتها ووكفت اصلي
كملت كعدت استغفر واسبح بااصابعي باب غرفتي
انفتح درت روحي جان هو كمت على حيلي تكلم
مبتسم
صباح الخير
صباح النور
ترددت شويه بعدين سالتو
اجوي اهلي
لا بعد وكت هساع على بالهم حنا نايمين وبسابع نومه
مارديت علي نزعت الازار بخجل لان جان يدحك لي صفطتو هو والسجاده وخليتهن بمچانهن
رحت لميت فراشو ووديتو للملحق اريد اخلي فوك ماكدرت عالي كلش حجه
ميلي انا اخلي
وخرت بسرعه من گرب عليه وصار گريب اخذو
مني وخلاه فوك رجعت للجربايه رتبت الفرشه وعدلتها
احس به عيونو عليه وما ادحك له متوتره منو واخاف اشوف منو نفس النظرات
سرى للبلكونه وكف يمها تكلم
الجو هينه ثلج وبارده كلش
اي
رديت اندار عليه وسال
تتريكين هينه لو جوة
جاوبتو بخجل وتردد
موو لازم ننزل جوة
ابتسم وگرب ليمي
اي الشيخ سال عليج واشوفو فرحان بيج جثير رتبي حالج خلي ننزل
اي هساع
سريت للكنتور طلعت كلابيه لونها كريمي
وشال نفس اللون طبيت للحمام بدلت طلعت اعدل
بالشال كلما اسحبو يرجع ليوره
ادحك له مبدل وكاشخ بدشداشه بيضه رش من عطرو ردت ابدل شالي لان ضوجني اخذت غير واحد حجه
عوفي هذا حلو عليج
درت وجهي علي يدحك لي بالمرايه رديت
مو ضوجني كل ساع يتزحلك ليوره
خلي ماعدنا احد غيري انا وابويه يعني اخذي راحتج بالبيت ولاتظلين لابسه الشال جدام احد
مايصير يازين عيب اكعد مفرعه جدام عمي الشيخ
يولي ابويه ابوج وانتي هساع حرمتي يعني صرتي من اهل البيت ومايحتاج تظلين مربطه روحج بهل الشال طول النهار
ماارتاح اذا ذبيتو
صفن عليه بنفس ذيج النظرات الي تخربط كلشي بيه ورد
لجن انا ارتاح ياهيله من اشوف شعرج الاسود
خله عيونو بعيوني وكمل بصوت متغير
مغرما انا ياهيله
بشعرج الاسود
واهوى سمارج
وعيونج الحلوه
ويول گلبي اذا شعرج تسلسل على جتفي
خدودي اشتعلت نار من تغزل بيه درت وجهي وانا مرتبكه وخجلانه منو
گرب خطوه رفعت عيوني له كمل
احبج يبعد حي وميتي واموت بيج
صار گريب نزلت عيوني منو ادحك للارض ومااعرف ليش ماتحركت ولا درت روحي منو
گلبي كام يدك بجنون اشتميت عطرو وحسيت
بحضوره الطاغي ماتكلم بشي ولا حاول يلزمني رفعت عيوني له مبتسم ويدحك عليه بنظرات زادت من دكات گلبي شالي زحف ووكع على جتفي دحك لشعري نزل بعيونو تفرس
بملامحي والشوك فاضحو مركز على شفايفي وتكلم بصوت مخنوك
لبي الجمال والشامه
حدر الشفه
ولبي العيون الي سبت العقول بقلوبه
گلبي هبط ومعدتي وجعتني درت روحي منو بسرعه سريت من يمو احسو يدك
بجنون ومااعرف شصار بيه
تكلم
يله خل ننزل ابويه ينتظرنا
ااي
رديت بصوت طلع گوة درت روحي دحكت له مبتسم ومبين علي مرتاح تحرك
انا وراه فتح الباب واشرلي
اطلعي
🌿🌿🌿🌿🌿🌿
زين العابدين
بذيج الليله غفيت متاخر لان ظليت كاعد وادحك لهيله جثير مشاعر حسيت بيها بس اكثر شي سيطر عليه هي مشاعر الفرح
مبتسم وادحك لها غافيه ونايمه هالنومه خلتني اعرف هي امنت على روحها يمي يعني نامت مو خايفه مني وعرفت انا عند چلمتي الي كلتها لها
هالاحساس خلاني احس بالفرح وحسيت وي الايام كلشي راح يتغير بها وگلبها راح يميل لي
كمت ورة ساعه سريت ليمها صفنت عليها وحبها جبير بگلبي اول مره احس بشعور وطعم الحلال وما مسوي شي مايغضب رب العالمين هالشعور مااعرف شسوه بيه
هي حبها خلاني اتحول لشخص ثاني تغيرت والتغيير خلاني اقارن بين العشته من قبل وبين
هاللحظه صح انا ما گضبتها ولا اخذتها بس من شفتها نايمه بغرفتي وبجربايتي وحلالي صارت عرفت الحلال اطيب ومابي شعور الذنب الي تحس به وره مااتفرغ شهوتك ونزوتك
تكلمت بهمس
ياهيله عهد الله عليه مااگرب للحرام ابد
يشهد عليه ربي ماامشي بعد بهالدرب مادام
اخذتج وصرتي حلالي
تنهدت ورحت لفراشي بس تمددت غفيت مرتاح هي حدي وبداري كعدت من وكت شبعان نوم وجسمي مرتاح كمت ادحك لها غافيه وبسابع نومه ابتسمت
وكلت خل اطلع انزل يم
الشيخ واخليها نايمه
نزلت من فوك محد كاعد سريت للمجلس شفتو
كاعد بالمجلس يقره قران وحدو جدتي هم تقره بكتاب الله
شافوني اابويه صدق مبتسم خله القران على صفحه وكام رحت له كلت
صباح الخير شيخ
هلا صباح الخير يازين
حظني لصدرو بقوه وبارك لي
مبروك ياولدي وشايف كل الخير والله يرزقك الذريه الصالحه الي تفرح گلبك انت وهيله
امين يابه
رحت لجدتي حبيتها من ايدها وراسها حبتني
من عيوني وكالت
مبروك يالزين وشايفين كل الخير
الله يسلمج ياجده
كعدت حدها سالت
عجل امي وين ماكعدت
لا كعدت بس مدري وينها يمكن بغرفتها
ظليت جالس معه هو وجدتي امي اجتي شافتني تكلمت
هاا كعدت يازين
اي يمه
عجل وين حرمتك ماحدرت معك عش نايمه لحد هساع مادكول راح يجون اهلها بعد شويه
عكدت حواجبي من تكلمت بضوجه جدتي انهدت بها
باااركي بالاول للولد يافضه وش بلاج نزلتي حدر ونص بالكلام على البنيه ،،
تره شفناج من عرستي
انتي وشعلان ماكعدتي للظهر وظليتي عروس شهر مخدره بدارج والاوادوم
تخدم بيج
مااحجيت شي ياعمه
ياافضه
ابويه صاح بغضب وكمل
سوالف العمه والچنه ما اريدها وي هيله الي يكدر بنت حميد يشوف مني شي مايسرو وهالكلام الكم كلكم منج لولدي للبنات هيله خط احمر الي يگرب منو اشوفو شي ماصاير
يبو زين انا ماكلت شي
لا كلتي وخاابرج يافضه وش بيج لا عبالج انا غشيم ما اعرف شكاعد يدور من ورايه لااا فكي عيونج واذانج زين وااسمعيها مني
للمره الثانيه هيله مااريدن
احد يغثها بچلمه ويويلو الي يغثها خل يقره على روحو السلام اليفكر يطخها او يغثها بچلمه
امي سكتت دحكت لابويه بعتب بعدين عليه ماتكلمت بشي اعرف امي ماتحب هيله وجانت تريد لي من خواتها او اخوتها وتكلمت معي اكثر من مرة وجنت ارفض لان جنت ماردت اتزوج مره اللخ واربط روحي بحرمه
هي سرت من يمنا
كمت لحيلي جدتي تكلمت
كدرت الولد بمصباح عرسو من كدر الله حالج يافضه كبرتي لجن عقلج بعدو عقل عصفور
ابتسمت ورديت
مااتكدرت ياجده
ااش ولك تعلمني بك وجهك تكدر وظليت ادحك
لها بقهر خابر امك ماتحب هيله لاتسوي نفسك ماتعرف
سكتت ابويه تكلم عاكد الحواجب
تحبها غصب بنت حميد غاليه عليه هي وابوها وما اريد احد يزعلها وخصوصا انت يازين
رفعت حواجبي من تگبل عليه بالكلام رديت
افا يابه المن ازعل هيله مثل ماهي غاليه عليك هم غلاتها جبيرة بگلبي
جدتي دحكت لي مبتسمه نغزتني بس بحنيه
يااشعلان لاتوصي ولدك وصي هيله علي
ابويه ابتسم وانا هم بس مارديت سريت من يمهم وصعدت لفوك شفتها كاعده مليت عيوني بصباحها الحلو ونسيت نفسي وتغزلت بها،،، شفت الخدود غدت نار گربت
ما ابتعدت مني وهالشي خلاني احس بالفرح عيوني تفرست بخلقه ربي الحلوه
حدرت للشفه والشامه
ضعت وتغزلت بها مرة اللخ حسيت بها ارتبكت كلش سرت من يمي ادحك لها
مبتسم
نزلنا سوه انا وياها خواتي شافنا كامن يهلهلن لنا گربت من يمي دحكت لها خجلانه وماتعرف شلون تصرف
حبني انا وياها وباركن لنا رحنا للمجلس ابويه
شافها وكام لحيلو تكلم بحنيه وبوجه يضحك
هلا بالغاليه مرت الغالي
كلامو شفت اثرو بوجهها خجلت منو جثير راحت له حبتو من ايدو وهو حبها
من راسها وتكلم
مبروك ياهيله وشايفين كل الخير
تسلم ياعم
ردت بصوت ناصي ابويه اخذ علاكه من جنبو وكال
هاي هديتي لج
مااريد شي منك ياعم ماقصرت معنا بشي
اش مااريد اسمع هالكلام منج انتو اهل لي وابوج بحسبه اخ لي اذا تظلين تحجين هالكلام ازعل عليج ياهيله
لا ياعم ماايهون عليه زعلك انت غالي عليه جثير وبحسبه ابويه
ابتسم ورد
عجل بعد لا دكولين عم كولي يابه حالج حال زين وبنواتي
دحكت له الهنوف تكلمت بضحك
صرنا خمسه يااابه
لا يالهنوف صرتن تسعه لاتنسن خوات هيله هم بحسبه بناتي
هيله صفنت علي بتاثر دحكت لي ابتسمت بوجهها وكلت
بخت يابه عمج يحبج جثير وراح احسب للجمله الف حساب يله احجيها معج
خاف من زعل الشيخ وغضبو
هههه وحنا وياك يازين
هاجر ردت بضحك
الجو جان حلو صافن لها رددت وي روحي
جانت امنيتي اشوفج
كاعده بلمه هلي
وصارت مدري بخت مدري حظي يم الله جبير
🌿🌿🌿🌿🌿
ايهم
كمت ماانزل اجازه حتى رجلي وگلبي ماياخذوني ليان وصلت لنقطه الصفر بكلشي وماردت اوصل للحضيض من يفصلوني واظل عاله على ابويه واخوتي ابتعدت بجسدي بس عقلي وگلبي ظلو يمها
اني كاعد بمكتبي امي خابرتني فتحت الخط رديت
هلا يمه
هلا ايهم هلا بالغايب الي مايسأل على امه وابوه
سكتت من سمعت عتبها كملت
ليش هيج يمه احنا شنو ذنبنا بالصار اعرف ماتطيق البيت من وره لارا بس اني امك وهذا ابوك والنا حق عليك زين ابنك ماتسأل علي وهو مريض ومحتاجك
حقج حجيه بس والله ملتهي بالشغل وماعندي
مجال حتى اخابر من ورة الانذار الي احنا بي
لا يمه لاتجذب اعرف شنو بيك واكول حقه بس احنا النا حق عليك ليش كاطع يبعد امك ابوك مقهور ويسال عليك يوميا ماخابر
ماسأل واني مااعرف شارد علي
بليل اخابره
اي خابره واسال علي وهم يعني اا
افتهمت ورديت بضوجه
يمه مااسأل لا على ذيج ولا على ابنها
هذا ابنك يمه طلع من ظهرك هو شنو ذنبه
بالصار طفل بريء وخطيته يم ربك جبيره اذا قصرت ويا بشي
مو مقصر اني وكاعد تشوفين اصرف علي ولأحسن دكتور وديتو بعد شاسوي
ولك يمه اعرفك تصرف ومو مقصر لا ويا ولا وياها بس الاهتمام وينه انت سؤال ماتسأل علي ولا عليها ذابهم علينا ولا مهتم بيهم اصلا
حجيه من الاخير سؤال مااسأل عليهم لا هي ولا ابنها وكتلكم الف مرة اني مو حاسبها مره اليه ولا حاسب انس ابني والي كاعد اصرفه هو واجب بس لان هم من مسؤوليتي
ااستغفر الله ياربي انت الحجي ضايع وياك ايهم
مايفيد الحجي بعد كمت تمشي بشور عقلك بس ونسيت انت عندك ام واب
واهل
مارديت ورثت جگاره اخذت نفس هي كملت
خابر ابوك ظل باله عليك
ان شاء الله ،،،مع السلامه حجيه
الله وياك
سديت الخط
صفنت على جهازي عيوني راحت للاستديو فتحته ملف خاص بليان مثل كل يوم اطلع صورها واحاجيها وبليل اعيش وياها مثل مااريد واتخيل
🌿🌿🌿🌿🌿
شهم
الموصل خربت من احتلوها،،،ذوله الانجاس خلو قوانين صارمه على الاوادم وبطشو بكل واحد عارضهم ووكف بوجههم ماسلم منها لا جبير ولا صغير ولا حرمه جبيرة
ولا صغيره
ادحك لام احمد دايخه بريتاج وماتعرف وين توديها من عيونهم سمعنا اخذو جم بنت من اهلها بالگوة وزوجوها لواحد من جماعتهم
احمد مايعرف شيسوي اشوف الحال ضعيف لان بيتهم شبه خرابه وتعبان كلش
هو يشتغل عامل بناء ومن صار الصار وكف كل الشغل وانگطعت ارزاق العالم
كاعد وياهم بغرفه مسويها مال كعده عالكين منقله فحم لان ماكو لا نفط ولا
بنزين واذا اكو فهو غالي كلش ومحد يكدر يشتري كال
يمه صارلي كم يوم افكر نطلع من هنا لان الوضع
صار مايتحمل واخاف ذوله يعرفون عندي اخت ويجون ياخذها بالقوه من عدنا
وين نروح يمه وشلون نطلع واحنا مانعرف احد باي مكان وذوله الجلاب منتشرين بكل مكان بس يلزمونا نروح بيها ويجوز يقتلوك انت والولد وياخذون اختك سبيه
لازم نطلع منا مانكدر نظل راح يكتلنا الجوع اذا ظلينا هنا دشوفين الوضع حتى فلوس ماظلت حتى نصرفها
نزلت راسي وزفرت بهم هم گوة شايلين همهم والنوب انا صرت معهم بهمي تكلمت
ياخويه اطلع اشتغل وانت معي نشوف شغله عمله حتى نسد حاجه البيت
هو اكو شغل ومااشتغلت الناس كلهم مبسطه
وكاعده وراح يكتلهم الجوع من وره ذوله المايخافون الله نطلع وانت ويانا مانظل هنا
ولك فكر باختك خاف ياخذوها من عدنا شااصخم
اني بالطلعه اذا هي راحت من ايدنا
احمد رد واشوف الهم والقهر جاتلو
لو مزوجه جان ماشلت همها جان اخذناها هي
ورجلها ويانا
قسمتها بعد مااجاها ابن الحلال الزين الي شفناه ابن اوادم وراح يخاف الله بيها
اخوها سكت وامها بعد ماحجت
ظلينا جم يوم داخين بسالفه العيشه والمصرف كتلو اكثر من مره خل نطلع نشتغل ماقبل خايف عليه لا يعرفوني منتسب ويذبحوني وهم هو اصلا ماكو شغل
بليل حنا كاعدين
سمعنا عياط نسوان احمد فز طلع وانا وراه وكف باب الحوش اشر لي ارجع وكفت بمچاني اسمع عياط مره تتوسل
عوفو بنتي الله يخليكم ولكم صغيره شلون تريدون تزوجوها لواحد مانعرفه
دحكت لريتاج ختلت ورة امها خايفات والوجه غده نوميه احمد رجع بسرعه وسد الباب نسمع صياح ابوها وجسره عليهم صار رمي ريتاج صرخت هي وامها
احمد طلع بسرعه وكف بالباب مصدوم وفاك عيونو عگب يرجف واسمع عياط الحرمه شك ستار الليل مفجوعه وجن كتلو
زلمتها
حجه بصوت مخنوك
كتلو عم قاسم
انهار بالارض وكام يبجي امه واخته هم انهاروا ويا يبجون واسمع صراخ الحرمه ومحد يكدر يسوي لها شي
العجز حسيت بي بذيج الساعه حنا ولد الملحه والغيره براسنا ومانهاب احد يجونا غرب يدوسون ارضنا وعرضنا وحنا مانكدر نسوي شي لهم
باطل ياارب الموت ولا هاي الذله
دورت بعيوني على شي اذبحهم به شفت بوري مي مرجي على الحايط رحت بسرعه شلتو وهديت عليهم احمد من شافني فز ولزمني بقوه وصاح بصوت مكتوم
وولك وين رايح
عوووفني ولك الموت ولا هلذله
جتفني وامه اجتي بسرعه عليه سدت حلكي وصاحت بصوت مخنوك
ولك يمه راااح يقتلوك ويقتلون ابني وياخذون ريتاج
هي هم اجتي تبجي وتتوسل بيه
عفيه ااسكت راح يسمعوك وياخذوني
ااخ يابه ااخ ولكم باطل حنا يصير بينا هيج
انهاريت واختنگت من الجاي اسمعه واشوفو
بلعت غصتي وقهري كعدت بالارض انهد من الغضب واسمع الحرمه تصرخ وتنوح
مانظل هنا بالقران مااظل اجوي قتلو عم قاسم واخذو عبير بالقوه باجر يجون هم
ياخذون اختي
ادحك لاحمد يفتر مثل الطير المجروح عيونو مغوركه كل ساع يدحك لاختو الخايفه وكاعده على الدرج تبجي هي وامها
شاسوي ولج وين اضمج من عيونهم
اطلع بيج خاف يشوفوج ويعرفوج مو مزوجه
وياخذوج من عدنا ابقيج هنا هم نفس الشي شاسوي ياربي ووين الحل
كمت لحيلي وكتلو
احمد انا اتزوج اختك
