رواية دخيله الشيخ زين العابدين الفصل الثالث الثلاثون بقلم أوتار حزينه
شهم
انهذلت من الصار اسمع عياط امو وريتاج وصراخ الجهال ونوح الزلمه صعدت بسرعه للبنيد وخرت احمد منها مفجوعه وتصرخ بصوت عالي
شفتو مضروب بشضيه برگبتو وينزف دم بعدو طيب دحك لي من خليت ايدي على جرحو تكلم وهو ينازع والدم تارس حلگو
ااا مي وواختي امانه برگبتك
لاتتكلم هالكلام انت مابك شي راح تطيب
فريت راسي على الاوادم وصحت بخبال
وولكم ياااهل الرحم وينكم الحكو علينا
ماكو احد يرد او يجي علينا كلها مفجوعه وتصرخ امو ملخت روحها هي وريتاج
حسيت به گضبني من ايدي
دحكت له دموعي تسف علي وعلى الشفتو بهاليوم تكلم گوة
لا تقهر اختي
غمض عيونو وسلم الامانه امو ملخت خدها وشگت ثوبها ريتاج زحفت له اخذتو من ايدي تهز بي وتصرخ بفزع
ااكعد احمد لاتمووت ولك منو اليه من بعدك ااكعد وفتح عيونك لاتموت وتخلينا وحدنا
حظنتو تصرخ بجنون
يااابه يمممه اخويه مااات ولكم لييش كتلتو لييييش والله ماااعدنا شي
اموه زحفت له دكت على وجهها ولطمت تحبو وهي فاقده تصرخ
يمممه احمد ااكعد لاتفجعني بيك ولك يمه باوع عليه
تمسح بالدم من وجهو وريتاج تهز بروحها وحاظنتو فاقده وتصرخ
زلم اجوي علينا صرخو
تحركو بسرعه مااكو امان هنا هسه هم يرجعون يقصفونا
الزلمه رغم مصابه ومصابنا راح بسرعه شال مرتو من يم جهالو اليصرخون وجابها يمنا مددها الدم يفلت من راسها وغطها بعبايتها يبجي وينوح عليها حرك بينا وام احمد حاظنه ابنها لصدرها
تبجي ومصدومه هي وريتاج
من الصار يصرخن صريخ المفجوع بغالي بجيت علي لان وكف وياي وكفه اخ لاخوه شالني وامن عليه بيتو وماقصر معي بشي
وصلنا سيطره تابعه للبشمركه شافو وضعنا
والجثث الي بسيارتنا وبغير سيارات فتحو طريق ودخلونا لكركوك
هناك اهل الرحم وكفلونا اخذو الجثث وقاموا بيها
دفنوهم بمقبره كركوك ادحك لامو نامت على كبرو هي وريتاج ناحن نوح يبجي
الصخر كعدت يمو كهدت بالبجي واون علي ونين الاخ على اخوه
🌿🌿🌿🌿🌿
هيله
ثاني يوم كعدت بالسبعه مالتي لابسه بدله ماروني قصيره لان مالبست بالعرس بدله حنه
الهنوف رتبت كلشي مثل كل مره وسوت اجواء
حلوه لأخوها واليه لان راح يلتحق ثاني يوم بالحشد العشائري
كاعده بالاستقبال ادحك للنسوان گرايبهم اكلني بعيونهن ،، جنت طالعه حلوه كلش وام الصالون سرحت شعري على طولو
وهو طويل كلش كعد وياي مكياجي جان طوخ بلون البدله اجرها لجوه مااخذت راحتي بها وضجت منها وخجلت.. ردت بس تخلص السبعه حتى اروح اذبها
ساريه واكفه حدي ادحك
لي باعجاب وترمش بعيونها
ابتسمت لها ورمشت
بعيوني ضحكت ومالت عليه هاجر وكفت اخذت صور جثيره لي انا وخواتي
وامي وهي والهنوف وجده لجن امو للزين ورهيفه
وامنه ابدا مااخذن صور معي
امي جانت تحس بالجو لجن ماحجت اي شي ساكته وبالعه غصتها من وره العوز الي حنا به من فضت السبعه والنسوان راحن
سألت بقلق
شلونج يمه مرتاحه
ابتسمت بوجهها اريد اطمنها
اي يمه مرتاحه لاتشيلين همي
ترددت للحظه كملت
انا اعرف الزين يحبج جثير لجن كاعد ااشوف امو
گطعت كلامها بسرعه
يمه لاتشيلين همي عمه وي الوكت راح تحبني اذا مو اليوم باجر من تعرف انا من وتربيتي شنو
سكتت بعدين كالت
يمه،،، اكسبيها لعمتج بلسانج اعرفج عاقله
وتفتهمين شتحجي لاتردين كولي اي وحقج ياعمه
هزيت راسي بأي الحجيه دشت هي والهنوف
امي كامت هي وخواتي كمت وياهن
تكلمت
ياريت تتفضلون باجر على الغده عدنا انتو وزين وهيله
لاتكلفين نفسج ياام هيله ترانا بيت واحد وزادنا زادكم
كلامج صح ياشيخه لجن حنا نريد نعزمكم معاهم وياريت ماتردون طلبنا
لا افا شلون نرد طلب الكريم نجي وناكل من زادكم ياام هيله بس هاا اريد من هالحلاوه ام الشعريه الدزيتها قبل جم
يوم تسويها لي
ادللي شيخه من عيوني اسويها لج
ما انا شيخه يابنيتي كولي يمه
دحكت لامي غوركت عيونها لان جدتي ماتت وهي صغيره كلش ردت بصوت مخنوك
تسلمين يمه والله انا هم حاسبتج اما لي بدون ما اتحجيها
عجل مادام امج احسبي البيت بيتج وظلي تعشي يمنا
جده دارت خاطر امي وخواتي كلش وهالشي
خلاها تكبر بعيوني بعد اكثر الهنوف كملت مبتسمه
تره ماظل احد وحنا مسوين خيرا جثير وين راح نوديه خل نكعد كلنا ونضرب ونترس الكرش
ضربت على كرشها وكملت بضحك
سولي حل الو كبر الكرش واليشوفني يكول حامل بشهري الرابع
رابع لو تاسع يبنت فضه
الجده قصفتها خربت ضحك اشرت عليها وكالت
الشيخه تقصف ولاتبالي
ابتسمت خواتي ضحكن امي ردت
الله يخليها الكم هي الخير والبركه بهالبيت ويطول بعمرها هي والشيخ شعلان ويحفظلكم الزين من كل شر
اللهم امين
عفت اهلي يم جده والهنوف صعدت اريد ابدل ريمه وهاجر ويايه طبيت تفاجأت بزين كاعد على
الجربايه يحجي بجهازو
دحك لي وسكت هاجر ضحكت وكالت
امشي ريمه خل اخويه يشوف الجمال ع الطبيعه
سرن بسرعه من يمي دحكت لهن سدن الباب وراهن توترت عضيت شفتي من خجلي لان البدله جانت مكشوفه وقصيره سريت بسرعه للحمام بدون
ماادحك له
بسرعه كام وصار جدامي ردت اكع علي گضبني بايدو الاثنين
🌿🌿🌿🌿🌿
زين العابدين
اختي لعبت بيه لعب انا جالس بمجلس ابوي وهي ادزلي بصور هيله نار شبت بيه من شفتها شلون طالعه وكلت بقهر
من الله ياخذج يا هاجر حركتيني وعطبتي افادي
اكثر ماهو محروك
يازين
انتبهت ابويه يتكلم معي رديت
سم يا شيخ
سم الله عدوك اسال فزاع رتب حالو هو وولد عمو
اي يابه رتب كلشي وراح يسري معي باجر
هز راسو وذب حسره يدحك لي واشوف طول هالايام الفاتت قلق ويهوجس بي لجن ماتكلم شي حنا كاعدين خابرو بشغله خذ عم مهنا وعم بحر وطلع من يمي المجلس جان فارغ مابه
احد
كمت وعگبت لدار هلي دشيت من باب المنور
وصعدت لغرفتي جان ماكو احد كلها عكبت لدارها وفضت السبعه
انا واكف جهازي دك جان صعب رديت
هلا والله بسباح گلبي وعرج العين
هلا بالعريس الي عرس ونسه اخوتو
اانجب بله
افا انا انجب يازين
اي انجب انت وذاك لا تخابرون لا تسالون وش
بلاكم اليشوفكم يكول الغيره چتلتهم وضاجوا لان عرست وهم لاااا
هههه تريد الصدك انا لاا لجن اظن حمد هيج
خلي يولي ذاك المجفي ابدا ماخابر ولا سال اريد اعرف وش بلاه جفى فد مرة من سمع بيه تزوجت
هههه غيره يبعد اخوك يقااار منك
ابتسمت ورحت كعدت على الجربايه تربعت سأل
اكلك انت صدك راح تسري مع فيلق العشيره وتقاتل داعش
اي باذن الله لو باجر لو عگبه اسري
مخبل انت يول مو تعرفهم هادرين دمك انت وابوك
وكل شيخ وكف بوجهم ومارضى بطبتهم علينا
اعرف ومايهمني
ولك لاتخبلني اذا يگضبوك يذبحوك يازين
يول اعرف كل هالكلام وما يهمني مو انا الي اصير جبان واكعد مثل الحريم بالدار وانتظر الغير يجي ويحرر ارضنا ايدنا بايد ولد الجنوب
الما تفض على خير وتتحرر الغربيه كلها
موو انت يازين خل غيرك يروح
اي انت كول هيج وغيرك هم نفس الكلام ناس تذبها على ناس والارض تظل تحت ايدهم وماتتحرر ونظل هينه لاچين وعافيها لهم
يول انا خايف عليك انت هالواحد لاهلك والشيخ من بعد ابوك الله يطول بعمرو عوفها ولاتفجعنا بك فكر بأمك وحرمتك ولك عروس راح تهدها وتمشي
تكلم هالكلام وهيله دشت هي واختها واختي صفنت عليها والگلب كام يدك بجنون
البنوات انسحبن بسرعه وهن يضحكن خجلت مني كلش وتوترت سرت تريد ادش للحمام سديت الخط بوجه صعب وفزيت بسرعه
وصرت جدامها لزمتها من رادت تگع عليه تكلمت گوة
هدني يازين
بس اشوفج ياهيله واملي عيوني بهل الخلقه
ماتحركت ولا ورفعت عيونها لي سحبت ايدي
منها صافن عليها والگلب يريدها هو وكل عرگ بي
🌿🌿🌿🌿🌿
هيله
مارفعت عيوني له خفت منو كلش وخفت من
نفسي هم لان ماتحركت مد ايدو لشعري جر خصله شمها بنفس طويل وباسها تكلمت بتوسل وبصوت مخنوك
يازين عهدك
اذكرو ومااريد شي بس هاللحظه
رد وكمل بصوت متغير
ياويل گلبي اذا تسلسل هالشعر على جتفي
غمضت عيوني وحسيت بدوخه ومشاعر سيطرت عليه وخلتني مااعرف شلون اتصرف فتحت دحگت له صافن ومبتسم كال
يبعد حي وحياني شطالعه تخبلين وتاخذين العقل
نزلت راسي منو گرب رجعت خطوه كمل بتوسل
ياهيله اذكر عهدي معج ومااخلفو لا والله لجن اريد شي واحد ولاتخلي بنفسي وانا راح اسري ومدري اعكب لج طيب مدري ميت
رفعت راسي بسرعه ودحكت له بخوف هالنظره مدري شسوت به وجهه تغير وفرح جثير كمل
اريد حظنج ولو لحظه
درت وجهي منو خايفه لا يفقد خايفه من نفسي والكاعد احس به گرب مااعكبت ليورة مد ايدو لخصري جرني علي بهداوه خليت ايدي على صدرو وغمضت بقوه حظني بهداوه شمني من رگبتي بنفس طويل حسيت جسمو حار كلش لمني بقوه وكال بصوت مخنوك
احبج يولي وماضل عرگ بالگلب ماحبج
سحبت روحي منو مااگضبني رفعت راسي
له ملامح وجهو مرتاحه ابتسم وزاد من دكات گلبي
سريت من يمو بسرعه رحت للحمام تكلم وهو يضحك
ديربالج لاتكعين مثل ذيج المره
دشيت اتنفس سريع وجسمي كلو غده حار مااعرف شصار بي مااعرف ليش ماتحركت وسويت الي رادو مني دخت من
المشاعر الي حسيت بيها
ووي من وي زين الي جنت اكول عنه مااحبو واكرهو وخليت عهد عليه مايگضبني الا كلبي يطيب من يمو
سريت للمرايه دحكت لروحي خدودي غاديات دم وعيوني تلمع بلمعه غريبه لزمت گلبي اليدك بسرعه وهناك وبعقلي حسيت انا ابدا ماحسيت بهل المشاعر مع شهم
غمضت عيوني بقوه اريد اهدأ اريد افكر صح لان كمت مااعرف شلون اتصرف مع زين ولا اعرف شاريد
السواه كلو مر عليه حبو الجبير
عركتو مع صكبان الردي ومع شهم لان ضربني
كلشي مر عليه وخلاني اعرف اكو فرق جبير بين ابن عمي وبينو
هو راد وداس على الكل حتى ياخذني
هدد وذبح روحو حتى اصير الو
لجن شهم ماكلف خاطرو
يجيب حلقه ويسد حلوك الاودام الحجت بيه
واولهم زين عرف به يريدني هو وصكبان لجن ماتحرك ماجاتل اهلو وخلاهم يجون وهو معهم ويخطبوني دمعتي نزلت بجيت بشهكه
من عرفت متاخر انا جنت منطيه گلبي لواحد هان علي
يحجون بي وماسوه شي يبرد گلبي ويسد حلك صكبان وزين
درت روحي على الباب ابجي بقهر هناك وره هالباب عرفت انا الله رزقني زلمه لو اريد روحو ينطيها لي
🌿🌿🌿🌿🌿
ليان
كاعدين بالعشه وتاليا بحظني فرحانه بيها كلش
اني وبابا وماما نوار بالبدايه خجلت من عدنا لان ظلت يمنا من وره وضع مالك
بس كلنا حجينا وياها وكلنا الها احنا مو ضايجين منها بالعكس فرحانيين بيها وبوجودها ويانا اني بهل الايام تعلقت بيها كلش
وكمت مااصدك شوكت ارجع للبيت حتى العب وياها واخذها لحظني
فدوه للبنوته الحلوه هاج اكلي بعد
كاعدين بالعشه اوكلها شوربه مال خضار ماما سوتها الها اباوع لاخويه فرحان بنوار الكاعده بصفه واني فرحانه بي لان على الزواج تغير وجهه وكام ياكل مثل الاول واحسن
ماما سالت
يابنات شراح نسوي بالسبعه
اامم ماادري خلي العروس تقرر
ها اني
ههه لعد اني
رديت على نوار باوعت لوسيم رد مبتسم
انتي براحتج شتريدين نسوي
هو يعني مثل اي سبعه والله ماادري اني مااعرف بهيج سوالف
بابا كال
شوفو راح اوصي عشه يعني كلشي يجيكم مرتب وانتو بس تقدمو للخطار
اي بابا مثل العرس هو نفس المطعم خلي يرتب عشه السبعه لان شغلهم يخبل ومرتب
رديت جرس الباب اندك وسيم كام
بابا كله
اكعد اني اروح اشوف منو
طلع من يمنا سمعنا صوته وره دقائق
تفضل ابو تاليا انت مو غريب صرت من عدنا وبينا
ارتبكت لان جان شعري منفوش وطايره سبرنكه
منا ومنا عدلت كم وحده واكيد الباقي ظلن
طب سلم
الله يساعدهم
هلا مالك تفضل بعدنا باولها
امي ردت نوار كامت علي راحت بوسته اخذها لحظنه وباسها من گصتها سال
مبتسم
شلونج يولي
الحمد لله تعال تعشه
تسلمين مااريد
وسيم سلم علي وكله
عليك الله تعشه ويانا امي مسويه شلون كبه تخبل بس تضوك وحده تاكل ماعون كامل
اي والله تخبل كبة عمه
نوار ردت وكملت
وليونه سوت هاي التبوله والحمص بطحينه هم يخبلن
ههه بس حامضه كلش
وسيم حجه بشقه رديت
ديغزر بيك
اكعد ابني وتعشه
ابويه سحب كرسي اله كعد حجه وي توته
ها ولج اشو صايره ما ادورين ابوج
دارت روحها منه وحظنتني
صفن عليها وبعدين عليه نزلت راسي ولهيت روحي بالشوربه بابا ضحك وكال
بنتك بعد ماتريدك
الظاهر هيج
تعشه ابني
سم اسم الله وبده ياكل وجوده يمنا وترني كلش
بس لهيت روحي بتوته عشيتها وكمت بيها
رحت غسلت اني وياها رجعت كيتي طلعت من غرفتي شافتها كامت ادكمز بحظني تريدها كعدت على زوليه الصاله وحاوطتها بكوشات رغم هي تكعد ماتوكع بس خفت عليها
كيتي اجتي يمها لزمتها من راسها وعضت اذانها خربت ضحك من شفت كيتي فزت وكمزت بعيد رحت بسرعه
علي توته من زحفت عليها كلت
مو هيج راح تخرب العلاقه بينج وبينها
شلتها بستها من خدها انتبهت مالك اجه ويا وسيم باوع عليه وعليها بعدين نزل راسه وراح للصحيات غسل واخويه اخذه للاستقبال كعدو هناك
توته اشرت علي
ابا ابا
تريدين بابا
كمزت بحظني مشيت بيها للاستقبال كاعدين يحجون بشغل
ابا ابا
صاحته دار روحه علينا حجيت مختصر
تريدك
اخويه كام لحيله اجه اخذها مني وودها اله خلاها بحظنه باسها ضاجت
خرب ضحك وكال
شلون يعني وياج ما اربي لحيه وشوارب من وراج
مشيت من يمهم ورحت للمطبخ شفت نوار تلم بالمواعين وي امي ما خليتها اخذتهن من ايدها
وكلت
اامشي اكعدي يم اخوج ووسيم ماعليج بأي شي
لاااا خلي اساعدج انتي وعمه
ااش مانريد مساعده امشي روحي لاا ابدي بشغل الحمه وياج
حجيتها بضحك امي ابتسمت وردت
كلها تسويها الا انتي
اي والله ياعمه ليونه ورده مال الله كل الشافوها من گرايبنا حبوها وتعجبو بجمالها
لبست جفوف حتى ابدي اغسل المواعين كلت بگلبي
حلوه بس ماعندي حظ
ماما صبت الجاي وكالت الها
اخذي وياج لعمج والولد
اي هسه
اخذته وراحت اني واكفه اجلف سمعت صوت توته انداريت جايه عليه بالحجله تصيح ده ده
ابتسمت الها وكلت
تعالي هياني
اجتي ليمي وكفت لازمه تراكي
هسه اكمل واخذج نلعب وي كيتي بس ها مااريدج تعضيها صيري عاقله حتى تظل تحبج
كامت تكمز وتصيح
ده ده
ذبيت الجفوف وغسلت ايدي شلتها ابوس بيها رحت للصاله كعدت انتبهت مالك كدامي صفن علينا
كمت بسرعه غيرت مكاني وكعدت على صفحه كيتي يمي كاعده وتوته تريد بس تلزمها
ااش شوفي شراح اطلع الج بالتليفون
طلعت اغنيه سنجوبه تموت عليها كامت تكمز وتصفك وتباوع عليها فرحانه وره ساعه مالك رادها هي جانت نايمه بحظني واني ملتهيه اباوع لفديو مال زرع
ليونه مالك يريد توته
انتبهت لنوار من حجت كلت خليها يمنا خطيه نايمه شلون يطلعها بهالبرد
ماادري والله خلي اكله
رجعت اله طولت كمت شايلتها ورحت للباب
الاستقبال سمعته كال
مو مايصير ياعم يعني كل اليوم يمكم وهم تنام بليل عدكم زحمه هيج
لا رحمه ابني ماكو اي زحمه اصلا احنا فرحانين بيها كلش وماليه علينا البيت بصوتها ووجودها الحلو
باوع عليه شايلتها بحظني ونايمه وجهه انطعن حسيته اختنگ نوار حست بي مثلي سألته بقلق
شبيك مالك هم ضغطك صعد
لااا
رد مختصر ترخص وطلع من يمنا اخته لحكته هي ووسيم بابا باوع عليه وعلى
ماما الي كالت
اكيد تذكر مرته
محد حجه نوار رجعت مقهوره وسيم وراها حجه
مابي شي لاتظلين قلقه وتفكرين
اعرف اخويه خجلان من وره توته ويحس بروحو مثكل عليكم
ردت بعيون مغوركه
ماما ردت بحنيه
ماكو اي ثكل بالموضوع احنا صرنا اهل وهالطفله
بيها اجر لان امها ماتت وعافتها اخوج لايظل
يتحسس من عدنا ويعاملنا مثل الغربه
نوار ماردت وسيم رد
اني افهمه باجر من اروح للمكتب مالته
ها راح تبلش شغل يمه
اي بابا طلب مني ارجع واني وافقت
على بركه الله ابني روح وفهمه احنا صرنا اهل
وخلي يشيل من راسه توته مثگله علينا وكله ابويه يكول هو فرحان بيها كلش وتارسه علي البيت
نوار ابتسمت من بابا حجه هيج
وسيم صفن عليها وحجه بضحك
اكلج كل الشباب تاخذ عروس وحدها الا اني اخذت عروس ووياها بنيه على الجاهز
امي ضحكت هي وبابا نوار خجلت منه وماردت
اني كلت
عيني اخذ مرتك واصعد فوك توته من نصيبي ما عليكم بيها ولاتجون يمها
هههه سمعتي ماعلينا بيها يله اامشي
وسيم حجه ودفع نوار كدامه خجلت وعضت بشفتها اله هو غمز الها وزيد خجلها
راحو من يمنا مشيت وراهم ورحت لغرفتي خليت توته بصفي ومخده بصفها
كيتي لحكتنا وكعدت يمها
صفنت عليها ووجه مالك بين عيوني مقهور من وراها ومن ورة ظلتها يمنا يحس
هو جاي يثكل علينا وهو ماايعرف هي ملت علينا البيت وزرعت الفرح بگلوبنا
بدلت الها الحفوظه وهي نايمه ورحت فرشت سنوني ورجعت لغرفتي كعدت يمها بدلت خليت كريم لايدها ورجلها احب اعتني بيها مثل مااعتني بروحي كملت خليت الكريمات بالجراره جهازي دك جان مالك
🌿🌿🌿🌿🌿
مالك
بنتي ظلت يم اختي بيت حجي مصطفى لان امي تمرضت وره ابويه وصارت افلاونزه قويه ردت اخليها يم نسوان اخوتي بس
اعرفها ماتصبر يمهم وراح
تظل تبجي وتشلع افادهم
باتت اول يوم يم ليان وثاني يوم هم وهذا الاسبوع كله هي يمهم خجلت من عدهم لان اختي عروس وعيب منهم تظل باقيه عدهم
جنت اشوفها من اروح الصبح او ارجع الظهر ماشفت ليان بهل جم يوم بس بليل من كلت بس كافي اليوم اخذها يمي
لان صارت بلا ملح
طبيت بعد ما لح عليه عم مصطفى وشفتها كاعده بحظن ليان بالمطبخ وكاعدين يتعشون كعدت تعشيت وياهم واباوع كل مشوار عليها هي والكاعده بحظنها الشعر منفوش وزايدها حلاه بنتي مرتاحه بحظنها ومبين عليها تعلقت بيها بعد اكثر
ردت ارجع واخذها وياي بس نوار ماقبلت لا هي ولا اهل وسيم ليان اجتي
وكفت يم باب الاستقبال
الداخلي دحكت عليها بنتي نايمه بحظنها
اختنكت وانقهرت كلش لان بنتي ظلت على ايد الاودام نزلت راسي ترخصت وطلعت بسرعه اختي لحكتني هي ووسيم سالتني يم الباب شبيه وليش انقهرت رديت
مامقهور يس تعبان واريد ارتاح
ترخصت منهم ورحت لبيت طبيت مخنوك وممروده روحي بيتي فرغ عليه مابي روح
اختي تزوجت وبنتي لحكتها يم بيت اهل رجلها جانن مسويات حس بالبيت وصوت هساع گبر صاير واحسو يوم وره يوم جاي يخنكني ومااكدر اظل بي
كعدت مهدود حيلي وراسي يوجعني فد مره ورثت جگاره اخذت نفس صفنت
بجمود على الحايط شاريد اسوي مااعرف اريد ازوج بس غير ليان مااريد اخذ هي وبس الي اريدها لو اعرف طول عمري اظل بدون زواج بس شلون تقبل
بيه مدري رجعت لنفس الموال ودخت بي طلعت جهازي رحت لرقمها اريد
اتصل احجي الي بگلبي خايف لا ترفض واتصخم بعد اكثر ذبيت حسره
غمضت عيوني بتعب سندت راسي ليوره
تذكرت اني جبت مسواك حفاظات وحليب لان نوار كالت خلصت ماظل غير كم وحده وما انطيتو الهم جريت جهازي اريد اتصل عليها شفت ساعه ب12 كلت عيب هساع وي
رجلها
رحت لرقم الحجي ما اتصلت ردتها حجه اخابر ليان وخابرت ردت
الو
هلو ليان
هلا مالك خير صاير شي
لاا ماكو شي بس جبت مسواك لتوته حفاظات
وحليب ونسيت انطيها لنوار
هاا اي ادز بابا ياخذهن منك
سكتت كالت
الو مالك
هياني ليان
رديت بصوت مخنوك هي انتبهت سالت
بيك شي
غمضت عيوني بتعب رديت
تعبان ليان
ماردت ذبيت حسره سالت
من ورة توته تعبان
ااي وجثير شغلات مكدره حالي واهوجس بيها
هاا
بنص همي ابتسمت كملت
دايخ بهوايه شغلات وكاعد افكر بيها
هاا افتهمت بس لاتفكر بتوته تره كلنا نحبها وفرحانين بيها كلش
اعرف تحبوها لجن اني مو مرتاح ذابها عليكم احس مثكل ومشيلكم مسؤوليتها
ابدا لاتفكر هيج والله مو مثكل واصلا بابا زعل عليك من سمع هالكلام
سكتت ترددت جثير بعدين كلت
ليان ااني يعني مااعرف شلون اكولها لج بس اتمنى تسمعيني زين وما تستعجلين بالرد
سكتت كملت بخنكه وگلبي يدك بجنون
اني احبج وو
مالك هالكلام راح اعتبر روحي مااسمعته
ليش ليان ليش اني موو مثل ذاك لاتحكمين عليه
من وره تجربه فاشله
سكتت ردت وره لحظه بخنكه
هي هاي التجربه الفاشله تخليني ابتعد خاف لا هم انصدم صدمه عمري ومن صدك ذيج الساعه اروح بيها
ليان اني مو مثلو اني اغار عليج من الهوه لو طخ وجهج لجن هو ماشفتو يغار عليج اليحب يغاار
يخليج بگلبو ومايخلي احد يلمح شعره من شعراتج
سكتت كملت بتوسل
يولي والله احبج واموت عليج وتعبت واني افكر بيج
لاتفكر مالك اكو هوايه بنات روح تزوج اي وحده منهن يقبلن بيك لان انت بالنسبه
الهن شاب كامل المواصفات
بس اني مااريد غيرج گلبي حبج الج واريدج تصيرين حرمتي وام لتوته
سكتت وحسيت ضربت وتر حساس كملت بغصه
ليان فكري زين لاترفضين هساع عوفج من العشتي عوفج من الشفتي العوض يمي والله راح اعوضج عن كلشي شفتي واصيرلج اب
وزوج وسند طول العمر
مالك كتلك
لااترفضين ليان هسه وتذبحيني كتلج فكري لاتظلمين روحج وتدفنين نفسج وانتي بعدج شابه الف واحد يتمناها واني منهم
شوفيهم عاشو حياتهم وانتي
بعدج عايشه بجرح الماضي
ردت بخنكه
انت كدرت تنسى الصار والسويته بمرتك
غمضت عيوني رديت گوة
مااانسيت ليان وادعي كل يوم الله يغفر لي ذنبي وياها بس انتي سمعتي نص
الحقيقه ااني جزت من كلشي لخاطرها بس هي
ظلت نفس الطبع واذتني جثير بالكلام
لان فقدت ثقتها بيك السبب منك مالك اي بنيه زوجها يخونها اكثر من مرة تفقد الثقه بي وبعد ما تشوفه مثل الاول
سكتت لان كلامها صح كملت
اسفه مالك گلبي سديته عن شي اسمه حب واصلا كمت اشك اكو حب حقيقي
بهالوكت
رديت
دحكي لامج وابوج وشوفي وسيم ونوار وراح تعرفين اكو حب حقيقي بس انتي سديتي عيونج عنه تعرفيني كلش زين اني احبج وتصرفاتي ثبتت هالشي
وذاك هم جنت اشوفه يحبني وخاني وي اختي
اني مو ذاك ليان اني رجال وكد حجايتي اذا اكولها
لعد ليش ماصرت كدها وي مرتك
عمري ماقصرت وياها بشي دللتها دلال مو صاير بس خطاي الوحيد هو اني مااحبيتها ولا كدرت اسلمها گلبي
سكتت كملت
بس انتي حبيتج ليان وحنا من نحب نوفي للي نحبو
واني مااحبك مالك
جنت اعرف هالكلام بس ليش من سمعتو جن سجين وزرفت گلبي سكتت
هي كملت
من رخصتك
سدت الخط انذبحت بسجين عميه
من اعصابي الفلتت صرخت
ااااخ ولج اااخ
رگعت الجهاز بالحايط وجع راسي زاد عكب السمعتو رفضتني وخلتني اون من قهري ومن الكاعد احس بي بهالساعه
🌿🌿🌿🌿🌿
هيله
طلعت من الحمام مخنوكه واتجنب ادحك لزين شفتو ماهو كلت نزل يم عمي وراح للمجلس علكت البدله بالكنتور صفنت عليها هي وبدله العرس
كلشي جابه اليه غالي ويخبل ماقصر معي بشي الي ردتو والي ماردتو جابو اليه وخلاه بين ايدي حتى گلبو وروحو خلاها بين ايدي ومابخل بأي شي عليه
وانا ردت من شهم حلقه بس حتى يسد حلوك الاودام ماجابها ولا سوه شي يخليني اعرف انا غاليه عندو ويحبني مثل مايكول
غمصت عيوني طفرت دمعتي الباب انفتح جان هو درت روحي بسرعه ومسحت دمعتي
اي يافزاع عگب باجر نسري جهز حالك تره من الفجر راح نطلع تمام ياخويه الله وياك
مااندريت علي لهيت روحي بالفرشه اعدل بها كال
ماكو مواجيل منا منا تره جوعان كلش وعبالك
تاخرتو بالعشه
اي هساع انزل واجيب لك العشه
سريت للباب اتجنب ادحك له خله ايدو جدامي وكفت سأل
خير ليش باجيه
عضيت شفتي ودرت وجهي منوو
رديت گوة
لااا مو باجيه
سريت وكف جدامي تكلم
يولي باجيه لان گضبتج موو
غمضت عيوني بقوه وهزيت
راسي بلاااا
عجل وش بج ليش تبجين احد غاثج كولي تكلمي
دحكت له حجيت بگلبي
غاثتني روحي يازين وگلبي الجان يدك لواحد مااحبني ربع حبك
صفن بعيوني واشوفو توتر تكلمت بصوت طلع يرجف
مابي شي بس اهوجس من روحتك
رفع حواجبو والفرح ترس ملامحو
يعني جنتي تبجين لان راح اسري للحشد
نزلت راسي من نغزني گلبي علي
سكتت هو هم سكت مد ايدو لي نزلها ماگربها عليه كمل بصوت متغير
تخافين عليه يبنت العرب
مارديت هو كال
السكوت معناه ااي
اروح اجيب لك شي تاكلو
ماتكلم شي انهزمت من يمو اريد اطلع قبل لاافضح روحي بعد اكثر نزلت لجوة اهلي كاعدين وي الهنوف والحجيه بالاستقبال رحت
للمطبخ عمه هناك هي ورهيفه وامنه وهاجر
تكلمت
عمه زين يريد عشه
سوي له تريدين اذن يله تخلين عشه لزلمتج
ردت بنتره هاجر اشرت لي رحت يمها وكفت صفنت عليه وسالت
باجيه ياهيله
لاااا
اي عش ماتبجي مو زين راح يسري من يمها وهي عروس بعدها وتوها طلعت السبعه مالتهم
رهيفه ردت وامنه كملت
يولي شبيج انتي فاهيه ماتحجين معه كولي له لايروح بلكي يسمع جلمتج انتي يالعروس
حجتها بنغزه ودحكت لامها رديت
انتو تعرفون زين يمشي من شور راسو وماتمشيه
حرمه لو يريد يسمع كلام جان اخذ بكلام عمتي وبطل من هالسالفه
سكتن ماردن دحكت لباب المطبخ الداخلي هو واكف وسمع كل الكلام ابتسم
ودار وجهو وعگب هالابتسامه مدري شسوت بگلبي
اخذي له العشه
هاجر تكلمت شلت الصينيه وطلعت بها
جان كاعد بالصاله وحدو ساريه وريهام يتكلمن
معه ويضحكن جر طبله جدامو خليت الاكل عليها رفعت راسي
عيوني صارت بعيونو تضحك والملامح متغيره
عدلت حالي بسرعه سالتو
تريد شي بعد
تعالي تعشي معي
اتعشه وي امي والبنوات
هز راسو بأي وهو ساكت لجن ملامح وجهو تحجي كلام
🌿🌿🌿🌿🌿
زين العابدين
تعشيت وانا مرتاح ومبتسم عيوني على هيله تسري رايحه جايه وي خواتي خلن
العشه بالديوانيه وساريه وريهام حدي تعشن معي اسمع هرجهن وسوالفهن الحلوه
كملت هن شالن الصينيه وودهن للمطبخ غسلت وصعدت فوك بدلت هدومي وكعدت اخابر واجهز لطلعتنا
كملت كلت خلي اخابر مالك ماهو صارله فتره دكيت فصل وماجاوب رديت اتصلت رد
هلا زين
عكدت حواجبي من سمعت صوتو مو تمام
هلا مالك خيرك يول بك شي
لاا
عليه مالك صوتك مخنوك جن احد غاثك
سكت سمعت طكه جداحه كملت
ااحجي يول صاير شي
شاحجي زين تعبان كلش وگلبي يوجعني
سلامتك ياااخويه كلي شبيك شصاير لك
ولك شاحجي زين اكلك حبيت وحده ماتحبني
صفنت من سمعت كلامو هو ردد يصوت مخنوك
حبيت ولك وحده وكلت الها اني احبج وردها جان سجين وذبحتني بي
منو هي
سكت سمعتو ذب حسره ورد
اخت وسيم الي اخذ نوار
وهاي شوكت حبيتها يعني من زمان لو من اخذ اخوها اختك
الصار بيه مثل ماصار بيك
عكدت حواجبي سالت
ماافتهمت وضح اكثر
يول اني وياها جنا مو صلح معارك بعدين فجأه گلبي مال الها وحبيتها بس هي ااخ زين مااتحبني كالتها اني
مااحبك
فان حظك اي والله راح تاكل تبن مثل اخوك وتركض ركضه الصفا والمروة يله تقبل بيك
ماتقبل زين هالبنيه مصدومه من الصار بها
ليش شصاير ياستار احجي طلع الي بگلبك لاتخلي لا تروح تفطس يول
راح احجي بس بداعه عم شعلان غلاتو بگلبك ما اريد اي شي يطلع لاحد من الاهل
لاتووصي ولك انت حاجي لزلمه سرو بير يزتو وما ايدور وراه
يازين هالبنيه جانت مخطوبه وعاقده على واحد
مقدم بالشرطه قبل عرسهم قبل جم يوم خانها وي اختها
فكيت عيوني بذهول سالتو
شنوو
مثل ماسمعت العار النذل الكواد نام وي اختها بيتها والمسكينه من عرفت ضربتها ذبحه ورادت تروح بيها
ولك صدك تحجي
اي والله مثل ماسمعت
ولك ماجاي اصدك خاانها وي اختها يعني اختها من امها وابوها
هيله دشت شايله جاي سمعت اخر الكلام صفنت
عليه اشرت لها افتهمت ماطلعت صوت گربت وخلت الجاي حدي تكلمت عيوني عليها
اي يازين من امها وابوها
عجيب يارب هاي شصاير بهل الدنيا
سرت من يمي وطلعت كملت
اي كمل
شأكمل يازين حجيت وياها وكتلها انا مو مثل ذاك فرق جبير بينا وهي ماكو قفلت
من الرئيسي وسدت كل البوب بوجهي
حگها يبن الخاله البنت مجروحه جرحا جبير ومن اعز الناس لها يعني زلمتها مع اختها شي مو هين جبير كلش انا سمعت انذهلت عقلي ماشال السالفه مو عاد هي الحرمه الضعيفه
سكت وانا هم سألني وره لحظه
شااسوي يول شور عليه
ورثت جگاره رديت
اصبر عليها ولاتعوفها خلك جدام عيونها افرض نفسك ولاتسحب روحك منها اليحب من صدك يصبر ويتحمل منا الما يلين گلبها وتعرف انت مو مثل غيرك
انت هيج سويت يازين
اي وسويت اكثر وتحملت كلشي سمعتو من حرمتي حتى تقبل بي وتشوفني
بغير عين بس هاا
خير يول
ضحكت وكملت
راح يفين حظك وتتعب تعب يطلع حليب الي رضعتو من خشمك
راضي ولك خلي يطلع بس هي تحن ترضى ادحك عليه بنظرة عطف
خربت ضحك وقاطعتو
وحنان واهتمام وووالهام
كاعد تصنف ولك
ههه شأسوي اضحك على همك وهمي شبينا حنا
الجنا نصيد انصادينا وطاح حظنا
ااي اضحك على جروح گلبي وگلبك
سكت للحظه سال
خير ولك انت مو اخذت هيله وتزوجت شكو بعد هالحجي
عكدت حواجبي من كال اسمها رديت بضوجه
يول لادكول اسمها
هههه
ضحك وتبدل المود كملت بغضب
انجب ولا تضحك واياك بعد ادكول اسمها اذا تريد تجيب طاريها كول ام شعلان او خيتي
صار ادلل من عيوني بس لاتعصب
اي جر عدل وخليني حلو وياك
ههههه ادلل ابو شعلان بس هم ماكلت شبيك
وياها توكم عرستم ما صارلكم ايام
مابينا شي بس داشبه لك الصار بيه وهساع نفسو صار بك
ذب حسرة ورد
قادر ربك يغير حالها
هي شاسمها
روح ولك
ههه شفت توجع موو
انجب بله لاتظل تملست وروح اجاني شغل
ههه رايح ابو تاليا
الله وياك
سديت الخط صفنت وي روحي وكلامو عن هالبنت
وجعلي گلبي انا الغريب ماتحملت الصار بها من اختها هي شلون تحملت
هيله دشت شايله صينيه فواكه وحلويات ابتسمت من شفت الترتيبات خلتها
يمي تكلمت بتردد
تريد اسويلك شي بعد
لا تسلمين اكعدي وياي خلي نتعلل سوه
كعدت اگبالي املي عيوني بخلقتها خجلانه مني ومااتخلي عيونها بعيوني
كالت بعد لحظه
باجر معزومين بيت اهلي
اي كال لي عم حميد
سكتت كملت
كشري لي برتقال
مدت ايدها اخذت وحده كملت
هيله خليت لج مبلغ جوه ايدج بالجراره الي بنص باب الكنتور الثاني اصرفي منو اذا احتاجيتي شي
رفعت عيونها لي وردت من انطتني البرتقاله
تسلم بس انا مو محتاجه شي
احتاجي هيله حسسيني انا كاعد اصرف عليج وانا بعيد حتى اعرف ماقصرت معج
بشي
صفنت عليه ملامح وجهها تغيرت ردت بصوت متغير
انت ماقصرت معي بشي غركتني يازين انا واهلي
ادللي ياهيله عيوني لج انتي وهلج
غمضت عيونها ملامح وجهها انطعنت
سألت بقلق
وش بلاج حجيت شي يزعل
رفعت عيونها لي ترددت للحظه كالت
اااانا
جهازي دك مادرت بال رجعت سألت
اي انتي وش تكلمي ياهيله
جهازي هم رجع دك دحكت له فزاع تكلمت بضوجه
وش بلاك انت اللخ
كامت من يمي فتحت الخط عيوني عليها تكلمت بضوجه
خيرر يافزاع
كال كلام خلاني افز من مچاني صحت
وووش ادكول
