 |
القضية الواحد والعشرون خبر عاجل الفصل الثالث بقلم اية السحماوي
_ للأسف يا احمد.. لازم ناخد عينة دم من الذئب نفسه
_حد قالك أحيه قبل كده!!!
كان اخر كلام بيني و بين كريم و طلب أروحله المعمل، وقفت بالعربية قدام المعمل و نزلت بسرعة دخلت لجوه..
لقيته واقف ماسك شوية ورق، لف ليا لما لقاني دخلت.
كان المعمل كبير جداً و في فريق كامل متولي المهمة دي.
قربت من كريم قلع الماسك و قعدت انا و هو و قالي و بيشاور ليا على الورق كان شكله مرهق جداً و باين عليه لسة منامش:-
_ لُعاب الذئب مش ظاهر ليا فيه غير تحليلات غريبة
سم كوبرا مصرية و دي مادة مُصنعة مش طبيعية
و كمان هرمون نمو بقري Bovin Growth Hormone محظور استيراده إلا بتصريح بيطري أصلًا.
منشط أعصاب خيول مادة زيلازين Xylazine دي بتاعت الخيل بس
حمض نووي غريب لذئب يعني نسبة تكسير عالية في الشريط الوراثي يعني الحمض النووي ملعوب فيه..
كشرت وشي و انا ببص للورق و رجعت بصيتله و قولتله:-
_ ايه المعجنة دي؟ ايه جاب سم الكوبرا لهرمون البقر لمنشط الخيل! هو كان قاعد في صيدلية!!
لقيته بيبصلي بُغلب و اخد نفس و حط الورق قدامي و بقى يشرح من جديد:-
_ هبسطها شوية، تخيل الذئب ده وصفة أكل بس وصفة اتعملت بغل
سم الكوبرا ده التوابل الحارة يعني بتخلي الذئب شرس وغبي بيضرب الأعصاب، ده اللي بيخليه يدبح وميفكرش
هرمون النمو البقري ده الخميرة نفخ جسمه وخلى حجمه 5 أضعاف.
زيلازين الخيل ده المنبه زي 50 فنجان قهوة بيخلي رد فعله أسرع من الرصاصة عشان كده مش بنلحق نجري منه.
الحمض النووي المتكسر دي بقى الكارثة العجينة نفسها بايظة حد لعب في جيناته، قص ولزق فبقى مش عارف هو ذئب ولا خيل ولا افعى ولا بقرة حتى.
اخدت نفس بيأس و نفسي امسك اي بني ادم قدامي أرزعه علقه تجيب اجله عشان معتش يفكر تاني، و يتعدل شوية:-
_ و إيه الحل دلوقتي يا دكتور.
وقف سحب زجاجة فاضية حطها في ايدي و قال:-
_ ده مش ذئب عادي دا ذئب بني آدم عجنه في معمل واللي عمله سايب توقيعه في لعابه السم مصري وهرمون محظور يعني اللي عمله من هنا... من الشرقية نفسها، وعشان كده بقولك لازم دم.
اللعاب جابلي المكونات بس الدم هيجيبلي الفاعل
الدم فيه البصمة الوراثية كاملة هتقولي ده كان ذئب عادي واتحقن ولا اتربى على كده من الصفر
والأهم يا أحمد المصل اللي يقتله مستحيل أعمله غير من دمه.
زي ما السم في جسمه... المضاد لازم يطلع من نفس الجسم..
دا على ما اشوف لسه هل هعرف اكون المصل اللي يقضي عليه خالص، و دا هيتحدد من عينة الدم.. لأني أصلا وصلت للي في اللُعاب بصعوبة.
بصيتله شوية و انا مثبت عنيا عليه و قولتله:-
_يعني عايزني أجيبلك دم من كائن لو شافني هيفصل راسي قبل ما أقول بسم الله..
وقف تاني فتح درج و طلع زجاحة شفافه فيها سائل احمر حطها قدامي و قال:-
_ عملت حسابي، حاولت لحد ما عملت مخدر يناسب جسمه و عكس اللي ظهر في اللُعاب، هنملى السهم بتركيبة عكسية من نفس السم اللي في جسمه اللي هو دا .
هيشل حركته 60 ثانية بس لكن مش بيقتل للأسف، في الـ60 ثانية دول لازم تكون أنت فوقه وتسحب منه 10 سنتي دم.
ضحكت بصوت عالي و انا بضرب على كتفه، ضحكت جداً بجد لأول مره:-
_ انت بتتكلم و كأنك بتقولي اركب حمار.. دا أنا على ما اقول بسم الله هيعدي 30 ثانية..
_ الموضوع محتاج سرعة بديهه بس و دا طبعاً شغلتك لأنك ظابط..
أنا هضرب السهم في نقطه معينه.. لكن لازم نكون واقفين قدامه بمسافة متر..
مسحت على وشي و اخدت نفسي و وقفت قولتله:-
_ يلا بينا..
_ مش دلوقتي .. لما تكون الشمس في اشد حرارتها.
قعدت تاني و انا مستغرب لقيته بيكمل و هو بيبتسم و بيشرح ليا شوية نقط و اسم كل مادة في جسمه:-
_هو و الشمس اعداء طب ليه؟
هقولك سم الكوبر اللي في جسمه السم ده بيتكسر بالأشعة فوق البنفسجية، الشمس بتضعفه فجسم الذئب بيحس بألم رهيب لو طلع في النور زي ما تكون بترمي ماية نار على جلد محروق.
أنما بقى زيلازين الخيل المنشط ده بيرفع حرارة الجسم لـ42 درجة انما بالليل الجو بارد فبيعرف يوازن حرارته لو طلع في شمس الشرقية 40° حرارته هتعدي 45° ويموت بنزيف في المخ شديد..
زيلازين الخيل دا للخيل بمواد معقولة و الدكتور البيطري عارف بيعمل ايه، انما الغبي اللي ضرب كل المواد دي في بعضها، عملت حريق و لخطبه في هرمونات الذئب عشان كده المادة دي لو طلع في الشمس هتبقى حرارته فوق 45.
أما بقى هرمون النمو البقري ده بيخلي الخلايا تنقسم بسرعة جنونية الضوء بيخلي الانقسام يخرج عن السيطرة ويعمل أورام لحظية تحت الجلد يعني ألم لا يطاق.. و دا برضه بسبب المواد اللي دخلت مع بعضها.. عشان كده الذئب عدو الشمس..
رفعت حاجب و سحبت الورقة و القلم و خطت بتركيز:-
_ يعني كده احنا ممكن نخلي ال60 ثانية يبقو 3 دقايق..
هو مستحيل يطلع في الشمس، لكن احنا نقدر نطلعه.. لو حكم الأمر نولع في كل أراضي الموز.. و هو بيكره الضوء و الشكافات اللي كانت معانا امبارح ضعيفه.. يبقى لازم نزرع كشافات عالية جداً من اللي هي بتاعت الاستاد، هتبقى حوالين الأرض من كل اتجاه.. و طبعاً دي هتكون التجربة الأولى بدل ما نولع في اراضي الموز لأن دي رزق ناس.. لو فشلت و برضه مطلعش.. يبقى هنولع للأسف.. و نصرف تعويضات للأهالي.. لكن عندي سؤال مهم.
_ اسأل.. فكرتك حلوة.. فعلاً لو طلعناه هيبقى زي الفرخة الدايخه كده نقدر نسيطر عليه على ما نسحب دم.
رفعت عنيا عليه بسأله بستغراب:-
_ هو ليه بدل ما نسحب دم، نستغل الفرصة دي و نحقنه بسم مميت.
_ مش هيأثر فيه أي سم لأن أي سم فاللي في جسمه ضده، لأن زي ما قولتلك كل الهرمونات اتلغبطت و دخلت في بعضها، و لو اتحقن بسم تاني هيضُر اكتر و مش هيقتل.. و ممكن يبقى اشرس من كده و يلغبط حاجة كمان جوه، و احتمال 80٪ حجمه يضعاف تاني.. عشان كده بقولك لازم نسحب دم عشان نشوف أو هل هعرف اعمل مصل مضاد لكل الخراب ده و لا لأ..
سألته تاني بتركيز و ستغراب:-
_ طب بما ان الشمس بتضره، ما ممكن نمسكه في قفص و نصدره للشمس.؟
_ ما هو يا اذكى خواتك، لو اتحط في القفص الشمس بتضره موقت بس.. أول ما الليل يدخل تاني هيبقى ابشع لأن جسمه هيُطرد كل اللي الشمس عملته.. و ممكن يكسر القفص كمان.. يعني كل اللي عملناه في الفاضي.. فأفضل حل عينة الدم و نعمل المصل.. دا لو عرفت اعمله.. موعدكش بصراحة.. لأن اللي عمل كده في الذئب مسبليش فرصة اعالج ده.
وقفت و أنا عنيا على الشباك مستني الشمس تطلع اكتر و تبقى احمى من كده، لفيت لكريم و انا بقوله بغضب جوه مني:-
_ انت قولت ان اتضح ليك ان اللي عمل كده من الشرقية نفسها، ما احنا حتى لو اللي عملناه دا فشل يا كريم.. يبقى لازم نوصل للشخص اللي عمل كده لأن هو الوحيد هيكون عارف ازاي يسيطر عليه صح!؟
وقف قدامي و هو بيجهز الزجاجة و لبس الجاكت بتاعه و قال:-
_ صح.. أكيد مليون في المية، اللي عمل كده معاه اللي يقتل الذئب، لأن زي ما بيجرب كل دا.. بيعمل المصل المضاد.. و على ما اعتقد أن هو مقَّدرش يسيطر على الذئب تاني.. لأن اللي يعمل كل الخراب ده جوه ذئب، واحد بيحاول يبقى دكتور كميائي.. لأنه محسبش كل نسبة بتتحط معملش التحاليل المناسبة، هو زي ما يكون كان بيهبد و يشوف هيطلعله ايه في الأخـر..
_ و ليه ميكونش الذئب فصل راسه بعد ما التجربة عملت فيه كده!
هز راسه بلأ و هو بيفتح الدولاب و قال:-
_ طباخ السم مش بيدوقه يا أحمد.. هو أه غبي بس مش لدرجه يبقى مع الذئب في نفس المكان بعد ما يحقنه.. لأنه بيبقى عمال كله احتياطاته.. هل هتنجح؟ ولا هتفـشل!..
هزيت راسي بيأس و اتحركت انا و هو من المكان على ما نوصل لمكان الذئب، هتكون الشمس بقت احمى من كده.. كلمت الفريق يروح هناك و يزرع الكشافات في كل اتجـاه.. في ارض الموز.. و قولتلهم يجهزو قوس سهام..
بعد نص ساعة وصلت للمكان، لقيت كل الكشافات مزروعه لكن مطفيه، كشافات كتير و عالية يعني هتعكس الضو جوه الموز الضلمه بمعدل اكبر من الشمس..
نزلت انا و كريم وقفنا في الأراض الفاضية، جهزت السهم في القوس و حطيته في ايد كريم، و اخدت من الحقنة اللي هسحب بيها الدم..
اتحركت من مكاني جهة الموز.. شاورت للفريق من برا يشغل الكشافات.
الكشافات كلها اشتغلت مع بعضها، و انا عنيا جوه الأرض مستنيه يطلع.
اتحركت ببطء لما حسيت الموز بيتهز.. شاروت لكريم..
بقيت أجري قصد الذئب، هو جوه الموز و أنا برا..
حركته فعلاً ضعيفه عكس سرعته بليل.. و كريم سبقني عشان يضرب السهم قبل ما يدارى في ارض تانية.
سرعت خطواتي اكتر بشكل جنوني، لأن لو فلت المره دي مش هنعرف نجيبه تاني.. طلع من الأرض و نط لفوق عشان يدخل ارض تانية.
لكن كريم كان فعلاً أسرع منه و ضرب السهم في بطنه..
جرى شوية كمان جوه الأرض التانية، و أنا وراه.. لحد ما حركته بقت بطيئه و وقع في الأرض.. قربت من بسرعة غرزت الحقنة جوه رقبته.. و بدأت اسحب الدم.. لكن لقيته بيتحرك تاني.. و هجم بضوافره على دراعي.. ازاي الحقنة مأثرتش؟ دا معداش حتى 30 ثانية..
لقيته بيحاول يقف لكن بيقع تاني.. زي الفرخة الدايخه.. الحقنة بتخدر موضعي.. لكن كريم فكر انها مخدر ثابت.. كتر خيره، هو برضه بيحاول يوثل لحل معايا.
سحبت الحقنة و طلعت تاني من ارض الموز، كريم استلمها بسرعة.
و أنا شاورت للفريق يسحب الكشافات تاني..
مسكت دراعي بألم طفيف.. شمرت الكُم لقيت ضوفر جرح دراعي جرح عميق.. كريم بص عليا و استغرب، حكيتله اللي حصل..
لفيت ورايا لما اتخايلت بحد بيبص علينا، لفيت عنيا على كل البيوت و حواليا.. و بعدين ركبت العربية تاني..
وصلنا للمعمل تاني، كريم اخد الدم حطه على جهاز كده.
و رجع ليا تاني معاه قزازة شفافه فيها مادة صفرا.
بدأ يحط منها على دراعي و يمسح بالقُطن، و بعدين لف دراعي بالشاش و هو بيقول:-
_ دي مادة ضد الفيروسات من اجسام غريبة.. أدعي بس ان اللي حصل مينقلش ليك أي سموم.. كل نص ساعة حط من المادة دي على الجرح.
هزيت راسي بهـدوء و سندت راسي على دراعي و عنيا على كل حاجة هو بيعملها مع الفريق.. كل واحد بيتحرك في مكان، كل واحد في ايده حاجة متخصص فيها.. ابتسمت بهدوء، لكل واحد هواية فعلاً لا الظابط يعرف يعمل اللي بيعملوه.. ولا هما يعرفوا يعملو اللي بعمله.
و فعلاً لا يكلف الله نفساً إلا وسعها..
ربنا لو مش عالم إني قادر و اعرف احل كل ده، مكنش حطني انا في وش كل ده ولا الكل اختارني.. لكل واحد قُدره برضه..
فِضلت قاعد لفترة طويلة، مستني تحليل الدم.
دا انا مستنتش تحليل حمل مراتي كده.. ياه على الأيام..
رفعت الفون كلمت شخص و كلفته بشيئ معين، و قفلت تاني.
عدى من الوقت ساعة و اتنين و تلاته و كريم لية واقف على رجليه حرفياً.. فعلاً مش كل واحد لابس بالطو يبقى دكتور، ولا كا واحد اخد الشهادة يبقى دكتور.. قليل اللي بقى يعمل بضميره و يعمل بالقّسم اللي حلفه في التخرج..
بعد نص ساعة كمان، لقيته بيقرب مني في ايده ورقة حطها قدامي و قعد و هو بيتألم من وجع رجليه و قال بنبرة أسف:-
_ مش قادر و مش عارف أوصل للي في دمه غير أن الدم طلع فيه نفس الزفت اللي في اللعاب بالمللي سم كوبرا وهرمون نمو بقري وزيلازين خيل، يعني أنا كنت صح والذئب ده كوكتيل تجربة.
طب ليه مش عارف أعمل مصل بقى؟ عشان البيه اللي عمله بوظ قانون الكيميا كله يا أحمد المواد دي مش قاعدة جنب بعض وساكتة،
لأ دي بتتخانق جوه دمه كل ثانية السم بياكل في الهرمون والهرمون بيكسر في المنشط والمنشط بيزود السم تاني، دايرة مبتخلصش يعني عينة الدم اللي أنت جبتها من أربع ساعات خلاص بقت حمضانة التركيبة دلوقتي جوه الذئب اتغيرت ميت مرة والمصل اللي هعمله دلوقتي مش هيشتغل عليه كمان ساعة هيبقى زي الماية.. والمصيبة التانية الحمض النووي المتكسر ده بيخلي جسمه يطلع مضاد للمضاد لوحده يعني لو عملتله دوا جسمه هيقراه ويصنع عكسه في عشر دقايق ده زي فيروس الإيدز كل ما تعمل له علاج يطور نفسه... والمصيبة التالتة مفيش مرجع علمي أمشي عليه العلم يعرف يعمل مضاد لسم الكوبرا لوحده ومضاد لهرمون النمو لوحده، لكن التلاتة مع بعض محدش في العالم جربها مفيش وصفة و اللعاب كان سهل كان بقايا زي ما تمسك قشر البرتقان وتعرف إنه كان برتقان لكن الدم ده البرتقالة نفسها وهي بتتعصر وتتحول لمخلل وترجع عصير في نفس الثانية، كل ثانية بتركيبة شكل أنا لو حقنته بمصل دلوقتي ممكن أخليه يكبر تاني أو يطلعله جناحات مفيش معادلة ثابتة أشتغل عليها..
سكت شوية و انا بسمعه و عقلي لسه بيستوعب ان ليه البنـــــــي أدم يوصل للقرف ده!! ليـــــه! هيستفــاد إيـه.. بصيلته تاني و هو بيعمل مساج خفيف لرجليه و بيكمل كلامه:-
_ والحل اللي قدامنا يا أحمد مفيش تاني ينجيب الفاعل نفسه هو اللي عمل المصل المضاد الأصلي..
ثبت عنيا على الشباك حاسس اني حيلي مهدود.. طب أعمل إيه؟
افتكرت حاجة و بصيت لكريم تاني و انا بقوله بتركيز و تفكير:-
_ انت قولت في الأول ان اللي عمل كده شخص بيحاول يبقى دكتور، و كمان مليون في المية هو من الشرقية، و اهالي الشرقية ناس غلابه ملهومش في كل العكس ده.. ليه ميباقش عيل بيجرب!! و شايف كل الخراب اللي بيحصل بس خايف يظهر!
_ خايف ازاي!
سندت على الترابيزة و كملت كلامي:-
_ اصل هو زي ما انت قولت، بيبهد و عايز يشوف النهاية هيطلعله ايه، زي أي واحدة بتجرب تريكات اكله جديدة، عشان فضول تعرف طعمها ايه.. هو بقى خايف يظهر و يتكلم و نعرفه، عشان مفكر ان احنا هنسجنه! و ياخد اعدام!
_ ممكن فعلاً.. طب هنوصله ازاي و نطمنه! أو نسحب رجليه!
طلعت تليفوني فتحت لايف و ثبت الفون قدامي و كريم ظهر معايا في الفيديو، و اخدت فون كريم و كلمت فريق اعداد تلفيزيوني يظهر الفيديو على كل شاشات التلفزيون في اسرع وقت.. بعد ما خلصت ثبت عنيا على الفون و بدأت اتكلم بهدوء و ثقة و نبرة قوية:-
_ الرسالة دي للشاب أو للشخص اللي عمل تجربة على الذئب، أنا المقدم أحمد علواني و بوجهلك الرسالة دي. لو انت فعلاً عملت التجربة دي و معاك اللي ينهيها و خايف تظهر نفسك و مفكر ان الحكومة بشعه بالصورة اللي في دماغك، احب اطمنك بنفسي و على ضمانتي انا.. اظهر نفسك و متخافش و تعاله على قسم الجنايات المصرية و سلم المصل المضاد.. انت لو مظهرتش بارداتك و فضلت متخفي، انت كده بتثبت لينا انك عملت كده بمزاجك و عن قصد و مش غباء و فضول منك..
و هناخد ضدك كل الأجراءات القانونية و برضه هوصلك، اقسم بالله قادر اجيبك.. لكن أنا على ما شوفت في التحاليل عرفت انك غلبان و للأسف غبي كمان.. عشان كده عايز اسيبلك فرصة للبراءة أو تخفيف الحكم لأبعد درجة.. انت و اهلك كمان معرضين للخطر، لحد الآن الضحايا سبعه.. و هما ملهمش ذنب.. تعاله و أنا المقدم أحمد بنفسي هتكون في حمايتي أوعدك.. لو متعرفش أحمد علواني فانا أسمي و مكانتي سبقاني.. و مش بجيب غير الحق، و مفيش مظلوم دخل السجن بسببي في يوم.. كلمة اخيرة.. بطمنك و بقولك متخفش تعاله.
قدامك 24 ساعة.. لو مظهرتش، أنا هعرف ازاي اجيبك و ساعتها متلومنيش لأني في الأول بقدملك البراءة..
و السلام عليكم ورحمة الله وبركاتة.
اللايف بقى يتنشر بسرعة جداً، التعليقات كلها بتطمن محمود و يظهر نفسه و ميخفش، و باقي التعلقيات بتقول مستحيل يبقى بريئ دا راح ضحية غبائه سبع اشخاص، يعني اتخرب سبع بيوت بسببه.
الفيديو اتنشر، و في اقل من نص ساعة بقى ترند مصر الأول..
و لحد الآن موصلناش أي مكالمات و لا أي حاجة غريبة.
بصيت على دراعي لقيته بدأ يرزق، اخدت المادة الصفرا و حطيت منها تاني و لفيت بالشاش.
كريم فتح الشاشة اللي بقت تظهر الفيديو بتاعي برضه.
مش شرط الواحد يجري من مكان لمكان عشان يحل قضية، و مش شرط يكون حريف و ابو العريف.. ممكن تكه واحدة تغير مجرى القضية كلها..
و أنا فعلاً عارف مكانه و شوفته و هو بيراقبنا، كان هو الوحيد برا بيته غير كل الأهالي، شاب هذيل و ضعيف و باين عليه الغُلب.
و لما رنيت على عسكري قولتله يراقب بيته لحد ما يشوف هيطلع ولا لا، و عشان ميهربش.
بيته ضعيف و معمل بالطوب الأبيض، و مسقوف بالقش..
جسمه همدان و باين عليه فعلاً فلاح و غلبان جداً، عشان كده عملت كل ده و عايز اسيبله فرصه يتخفف الحكم عليه، لكن مستحيل ياخد براءة.. اشفقت عليه فعلاً، شكله و بهدلته صُعب عليا.. حبيت اسيبله فرصة يكون في نظر الناس بطل و انقذهم، عشان حتى لو اتحكم عليه و طلع ميبقاش لبانة في فوق الجيرام و اهله يتعايرو في الرايحة و الجاية.. و في الأرياف دي احلى شغله عندهم..
خرجت أنا و كريم ركبنا العربية و اتجهنا للقسم.. مستني العيل اللي كان بيلعب عشان يبقى مشهور.. الشُهرة لحست مخ الناس.
اللي عايزه تتشهر تقلع.
اللي عايز يتشهر يطلع مراته و اهله.
اللي عايزة تتشهر بقت تتمسخر قدام الشاشات.
انما بقى اللي عايزة تبقى ترند.. بتقل من نفسها و كرامتها و اهلها و في ثانية الشعب العبيط بيناولها اللي عيزاه.
يعني هما بيعملو للعبيط سيط، و يرجعو يقولو بلاش قرف اشكال ملت البلد.. ما لو نتغاضى عن كل عبيط و كل واحكة بتتمسخر قدام الكاميرا كانو بقوا ولا حاجة.. ولا معاهم الفلوس دي حتى.
لكن احنا اللي بنعملهم، الواحدة اللي طالعه تعرض نفسها الكاميرا هي عارفه كويس بتعمل ايه... هي عارفه انها هتتهان و تتشتم و ابوها كمان يتهان.. لكن هي مش عايزة توصل غير لعدد معين من "المشهدات"
و شكراً.
وقفت قدام القسم نزلنا و دخلت غرفة الأجتماعات كان الكل موجود، قعدت بصمت و بدأو يتكلموا مع كريم عن شوية حاجات بخصوص الذئب و دمه و هكذا.
و انا عنيا على الساعه مستني يجي، و يسلم المضاد و نفسه.
قاعد هادي، ثابت، عنيا على الساعه وبس، متجاهل ألم دراعي أصلًا.
عدى ساعة و اتنين و خمسة.. لسة مجاش.. مش عايز الوقت يعدي منه..
وقفت بسرعة لما العسكري دخل و قال في شاب برا.
طلعت بسرعة و الكل طلع ورايا.. لقيته واقف لابس قميص واسع عليه و بيفرك في ايده و هو اصلا جسمه ضعيف جداً.. عينه عليا بخوف و رعب.. لقيت في ايده قزازه.. قربت منه و انا ببتسم بحاول أطمنه.
العساكر كانت رايحة تمسكه، برقتهم يرجعو تاني..
بصيت وراه لقيته أمه قاعدة بتعيط، ست مُسنه و قعدة تعيط بُغلب، طبطبت على كتفه و قولتله و انا بسحب القزازة من أيده:-
_ بطل يا..
_ محمود
_ بطل يا محمود.. اوعدك يكون الحكم خفيف عليك جداً، سنة او اتنين بس.. لكن لو مكنتش ظهرت، منت اخدت مؤبد.. لكن عايز اعرف ليه عملت كده! و عملتها ازاي!
دموعه نزلت بعجز و قال بصوت ضعيف:-
_ أنا كنت في كلية علوم.. و قولت هكمل ماجيستير بس رفضوني.. و أنا عايز أبقى حاجة.. قولت هعمل تجربة للمواشي و الماعز يبقو أقوى و اللبن يبقى كتير.. لأن دي اعلى طموحات الفلاح.. و لو نجحت هقدمها و ابقى مشهور و اجيب فلوس حلوه.. والله نيتي كانت خير اقسم باللهنيتي كانت خير.. لما عملتها جربتها على معزة.. بس مستحملتش و لقيتها ماتت.. قولت لازم اجربها على حاجة تستحمل شوية عشان ابدأ اعدل النِسب و هكذا.. كنت بروي في الارض بليل طلع عليا الديب الابيض ده.. جريت منه و حاولت استهدفه كتير لحد ما مسكته في قفص.. و حقنته بالمادة دي.. تاني يوم لقيت حجمة بيكبر شوية.. يومين و لقيته بيعوي زي الكلب و يتلوى في الارض، رابع يوم روحت اشوفه لقيت القفص مكسور و الحيط كمان و هو مش موجود.. و يوم كمان لقيت الأخبار بتتكلم.. خوفت اطلع او اقول تمسكوني.. أنا وحيد امي و هي ملهاش غيري.. خوفت والله يحضرة الظابط.. لكن والله غرضي كان بريئ.. و الندم بيقطع فيا من كل روح ماتت بسبب الديب ده..
طبطبت على كتفه و شاورتله يروح مع العساكر و وعدته يكون الحكم عليه خفيف.. و اتحركت انا و كريم مع الفريق بسرعة و روحنا تاني ارض الشرقية..
عملنا نفس الحوار الأولاني، الكشافات يعني..
و كريم عمل السهم في المضاد اللي معاه، و انا حطيت الرصاصه في المصل ده و ركبتها في السلاح تاني..
و قربت انا و كريم بهدوء من ارض الموز، و دخلنا جوه فعلاً.
لقيناه بيجري عكس الأرض، كريم حري وراه ضرب السهم في ضهره، و انا صوبت السلاح كويس و ضربت الرصاصة في دماغه.
ثواني و وقع في الأرض بيتحرك بشكل عشوائي.
و فجأى سكت تماماً.. فعلاً مات.
اتنهد بهدوء حاسس ان قادر اتنفس.. العساكر اخدوه.
و خرجت انا و كريم تاني، و صلت خبر للأخبار.. و بدأ الخبر ينتشر ان الكائن تم استهدافه بالفعل..
و اتصرف تعويضات للأهالي اللي ارضهم اتخربت، و للأهالي اللي كان رجالتهم ضحايا للذئب..
ركبنا العربية، لقيت كريم بيشمر دراعي و حط من المصل على الجرح. و رجع ربطه تاني بالشاش و قال:-
_ مكنتش عايز اقولك عشان متقلقش.. لكن لو مكنش المصل ده ظهر في خلال اربعه و عشرين ساعة، كان زمان اهلك بياخدو عزاك.. المهم حط من المصل تاني بليل و خلاص كده..
ضحكت و هزيت راسي بهـدوء، خبى عليا.. طيب كريم ده.
و شكلها مش اخر مره لينا سوا في قضية..
ــــــــــــــــــــــــــــــــــــــــــــــــــــــــــــــــــــــــــــــــــــــــــ
