رواية خطايا واجتثاث الفصل الاربعون بقلم نور البصري
ــــــــــــــــــــــــــــــღـــــــــــــــــــــــــــــ
اچلچل وامطر بصبخه واطش حيلي
وٱتاني يخضر النعناع واتحزم
وألم روحي وأكض منجل
واتاني الكاع تتخوصر
وأكول ٱفيش هذا أبني
ــــــــــــــــــــــــــــــღـــــــــــــــــــــــــــــ
ســـــــــــــــــ♡ـــــــــــــــــؤود
والتر أو حسن مثل ما صرت أسميه بروحي جان واكف بكل رومانسيته و نبرة صوته بيها حنية مخلوطة بلهفة خلت ركبي ترجف من خله إيدي على صدره حسيت دكات گلبه و لاكتها دكات گلبي و بيده الثانية لزمني من خصري وآني عبالك طفلة توها تتعلم المشي باوعت لعيونة السمائية ردت أكله أحبك ردت أذوب بهاي اللحظة بس جفصتي المعتادة جانت لازم تحضر.
بلعت ريقي وبصوت يرجف كوتله:
: عزا بعيني والتر.. تدري دكات گلبك أسرع من الـ (Treadmill) اللي جنت أركض عليه بالنادي؟ بطئ شوية لا يوكف گلبك وإحنا تونا كولنا يا الله!
هو ليش هيج حجيت ما أعرف زين ليش هو يضحك:
رد بزعل : مدكول نكتة أوك.
بس رجع صف بوجهي ضحك ضحكة بصوت عالي ضحكة مليانة حياة مو مثل ضحكاتي الميتة اللي جنت أجامل بيها الناس شالني بين إيده يطوح بيه عبالك طفل يهزه يمنى يسرى وهمس:
: مجنونة يا سِيوداد حتى بهاللحظة عم تمزحي؟ هيدا قلب عاشق مش ماكينة رياضة.
و باللحظة اللي تقرب بيها وجهه من وجهي مر طيف حسن كبالي غمضت عيوني حيل ردت أمحي الصور القديمة ردت أقتنع إنو هذا اللي كدامي هو قدري الجديد بس سترة حسن.. بعده عطرها روحيًا أتنفسه ذيج اللي عفتها بالجنطة جانت عبالك تصيحني ليش خذلتها وهي ياما بالليل أنام بحضنها.
ردت أنزل من بين ذرعانه بس هو شدد إيده حيل ونزل بشفايفه لكصتي.
توترت و يمكن حس بيه أنحرجت وتوترت فنزلني وهو يضحك بس ما تركني حوط وجهي بكفوفة الدافية وعيونه السمائية ظل يركز بعيوني.
من يوم خطوبتنا هو هاي نظرته دومه يركز بعيوني يخليني دوم أحس يعرف قصتي ومغلس بس أرجع أطرد الفكرة من راسي وأكول منين يعرف هو بس يعرف جنت مخطوبة بفترة مراهقتي وخطيبـي أستشهد.
همس بصوت منخفض مملي مشاعر:
: سِيوداد.. عيونك بتحكي قصص ما عم بعرف أقرأها تركي الماضي لورا الليلة نحنا وبس.
: شنو تقصد؟ منيلي ماضي ترى عيب تكول لبنية عندج ماضي النوب بليلة عرسي تجيبلي شبهة لا حبيبي لا أكلب الدنيا عليك وعلى..
سكتت همزين ما يميز السياق العراقي لو عراقي جان فهم الكلام المتروك هو وعلى أهلك و الخلفوك.
هو ظل يفرزن كلامي السريع و لزم إيدي بقوة و ملامحه صارت أكثر تزمت وهو ينطق كلماته بتشدد:
: مش عيب يا قلبي يكون الواحد عندو قصة حب في الماضي بس العيب هون.
خلا أصبعه على كصتي أشر على عقلي
: لكن العيب إنو نترك خيالات هالحب تسيطر علينا وتنزع علينا حياتنا على علمي إنك كنتي مخطوبة و خطيبك أستشهد صار لازم من هاللحظة تتركي التفكير بغيري لأنك هلق صرتي ملكي إلي و إلي وحدي.
همست : إيدك تضغط زندي حيل دتعورني.
نزل نظره لأيده على زندي وخر وأعتذر.
: حبيبة قلبي ما كان قصدي زعلك ولا لحظة ما كان قصدي أخوفك بفعل أو بكلام لكن بغار عليكي بتعرفي إنك الدنيي كلها بنظري؟ دخلك لا تاخدي على خاطرك مني بتبقي أنتِ الحب كلو.
تدلعت عليه رفعت جتفي بنترة من لزمني هناك.
: وخر كلامك حيل زعلني منك النوب شلون يعصر زندي.
: خلص بقى شيليه لهالزعل من قلبك وحياتك ما كان قصدي تعي ننسى اللي صار ونبلش صفحة جديدة لأنو ضحكتك هيي اللي بتنورلي حياتي.
آني بوقتها جنت صايرة عبارة عن كتلة من التناقضات جسمي هنا بلبنان بس روحي مسافرة لذيج السترة المضمومة الجنطة حاولت أخذ نفس عميق أشم عطره هو عطر والتر جاد اللي بي ريحة نظافة و هدوء بس خيالي جان أقوى جان يسحبني لغير مكان.
من تقرب أكثر ولزك كصته بكصتي حسيت بحرارة أنفاسه غمضت عيوني حيل مو علمود أعيش اللحظة لا علمود أطرد طيف حسن.. اللي وكف بينا مثل السد.
و لاحظت والتر ذكي و يلكفها من أفكر بغيره لو ممندمجة صافنة بعيد وهو يتغزل تضايقت حيل ما أعرف شبيه من ظل يحجي عن حبه ومشاعره حسيت آني شريرة لأن وكعته بحبي لغاية.
فكوتله بصوت مخنوك وآني أحاول أغير الموضوع حتى ما أنفجر بجي:
: والتر.. عوف السترة أقصد عوف الحجي تدري هالفندق منظرة يجنن خلي نطلع بالبلكونة نشوف أضواء بيروت أحس الهوا هنا طبيعي حلو مو مثل البلد الأجنبي بارد جدًا.
باوعلي بنظرة بيها عتب خفيف كأنه أحس بگلبي المو صافي بس غلس بذكاء لزم إيدي وباسها بهدوء:
: تكرم عيونك يا روحي.. أنتِ متوترة هلق أول تجربة للبنت صعبة لا تخافي هلق رح نمشي خطوة بخطوة المهم تكوني مرتاحة.
أستحيت صريح أبن العرب والأجانب خجلت منه فضحك وغمز بطرف عينه
: تعي لعندي الليل بعدو بإولو.
لزم جف إيدي وكعدني بصفة بقنفة بالبلكونة البرد مال لبنان لمس وجهي و سندت ظهري عليه وهو حضني من ورى يهمس بأذني كلمات أجنبية على لبنانية وآني أباوع للضوا البعيد.
بگلبي أكول : يا رب ساعدني شلون أعيش ويه هذا الإنسان وآني (طيوف) الماضي تنهش بيه نهش.
بس والتر جان صبورا لدرجة تخوف دارني عليه و رفع وجهي بيده وكال بلهجة واثقة:
: الليلة رح نكتب أول سطر بكتابنا سِيوداد وما رح اسمح لأي طيف يشاركني فيكي.
و بهاي اللحظة وسط هدوء الليل وصوت الهوا تقرب وطبع بوسة هادئة على كصتي خلتني أحس ولو للحظة إنو يمكن فعلاً أكدر أبدأ من جديد.
أبتسمت وغابت أطيوف ماضي
بلحظة عناق ولمسات ليلة الدخلة.
فتحت عيوني أسمع صوت طرطشة وشخص يغني رغم والتر.. لبنانيته ممتازة بس اللي يسمعه من بلده الأصلي يحس كلامه اللبناني بي لكنة أجنبية.
لأن من وصلنا بالمطار وأسمع كلام الموظفين هناك والمسافرين اللبنانين حسيت كلام والتر مكسر بالنسبة لكلامهم.
كعدت بنص الجرباية الملكية والتر من عائلة غنية فحجز بفندق راقي وملكي
أبتسمت صرت مرة متزوجة غمضت عيوني وخليت إيدي على بطني يعني بلكت هسة أبني هنا وأشهر وأصير أم.
أبتسمت عود يغني متونس وهو يسبح برزت بالأغنية تكسيرة كلماته العربية المتأثره بلغته الأجنبية فكانت مخارج الكلمات بيها تصادم قطارات رغم من يحجي ممتاز بس مو خالي من تكسيرات ولكنة أجنبية.
بين.. دام.. أنا بين دام..
(بندم.. أنا بندم)
على كول الأي... يام.
(على كل الأيام)
اللي أنا إيش... تو..
(اللي أنا عشتو
بـ إيد أن حوب باك
(بعيد عن حبك)
يا هابيبي.. أنا فاك كارت السـ.. ئـ.. ادة.بين.. دام.. أنا بين دام..
(بندم.. أنا بندم)
على كول الأي... يام.
(على كل الأيام)
اللي أنا إيش... تو..
(اللي أنا عشتو
بـ إيد أن حوب باك
(بعيد عن حبك)
يا هابيبي.. أنا فاك كارت السـ.. ئـ.. ادة..
ضحكت من كل گلبي عمي لو ساكت أحسن ظليت أقلد تكسيراته لبنانيته أنا فاك كارت السئادة.
هههههه عود أنا فكرت السعادة.
طلع لاف المنشفة على جسمه ذكرني بالأفلام الأجنبية وخرج البطل يلف منشفةً حول خصره.
ظحكت بخجل ودنكت وهو أبتسم:
: صباحوووو يا روحي آنا يالله حاج كسل قومي تحممي وغيري تيابك لفرجيك بيروت.
دخلت للحمام بس لحكني بخجل كوتله:
: أذا الي ببالي لا حبوبي هنا تحترم نفسك مال تريد تسبح وياي أبد ما أقبل آني أستحي.
ردت أختل بنص روب النوم اللي لابسته من كال:
: هلق طلعت من الحمام ليش لأرجع أتحمم من جديد؟ بس جيت آخد غياراتي لإن نسيتن كنت عم غني لفيت المنشفة وطلعت.
هو ليش يفشلني ما يعرف يغلس ويسكت أو يظاهر راد يفوت وياي للحمام ويمشيها.
أريد أسد الباب بس وكف هو بنص الباب بحيث مكدر أسده:
: ها شكو بعد؟ الشسمهن أخذتهن ألمن تابعني يعني بعد الواحد ماكو حرية شخصية وهو يسبح.
بس هو ضحك وجرني من خصلة شعري وباس خصلة الشعر وباس كصتي وخدودي و أستقر لشفتي.
: مو أنتَ مجاي وراي.
بس الجواب حضنه وغزله.
: حسن أريد أسبح.
باوعلي : و هلأ رجعتي نطقتي نفس الإسم مبارح و أنتِ بين إيديه عالسرير لفظتيه و قلت بلكي عم بتخيل أو سمعت غلط وحاولت مرقها و أنسى الموضوع بس هلأ رجعتي عدتيها! مين هاد حسن؟ أوعا يكون قصدك الخطيب الشهيد؟
ما جاوبته ذب حسره وهمس بصوت يخفي داخله شيء.
: طيب فيكي تروحي تتحممي وما تتأخري ناطرك باللوبي تحت ونصيحة الدنيي حلوة و مستاهلة نعيشها مش ندفن حالنا ونحنا طيبين كان فييّ أخد الأحلى والأصغر بس آنا حبيتك إلك ونقيتك إلك.
هنا شكيت معقولة عمي مسولفلة و يظاهر يمي ما يعرف والا من وين عرف ماجدة.. تشتغل بمركز اللي هو مول مشروعهم بس لا هاي مستحيل تنطي بيه.
ظليت محتارة وآني أدخل الحمام وأسد الباب وحتى من سبحت بالي شارد يم حسن الي شك ضربت خدي.
: أصحي أصحي حسن مات و صار عظام يله عيشي حياتج لو أنتِ ميته و هو عايش مينتظرج سنين ولا يتحول داخلج مرض مستفحل بخلاياج وعقدة متغادرج.
ورى ما خلصت طلعت من الحمام بدلت ملابسي وكملت نزلت بالمصعد وآني أشوف أضواء الصبح تارسه المكان والناس طالعة بجمالها والتر.. لابس نظاراته وكاشخ لكيته كاعد بصالة اللوبي (ردهة الفندق) وكف بس أجيت باوعلي بنظرة أعجاب.
: يا عروس.. شو هالجمال؟ طالعة بتعقدي اليوم محضرلك برنامج رح يخليكي تحبي بيروت أكتر ما حبيتيها بالصور اليوم رح نمشي بشوارعها ونشم ريحة تاريخها.
: والله كلي حماس من البارحة وآني أتخيل شلون راح تكون جولة اليوم ببيروت.
أشرلي نطلع من بوابة الفندق.
: يلا تعي.. بالبشرة (بالبداية) رح نمرق على وسط بيروت السوليدير رح تشوفي العمار اللي بيرد الروح ونمرق على ساحة النجمة وبعدها لازم نطل على صخرة الروشة هيدي اللي بتعرفيها بالصور بس عالواقع إلها هيبة تانية خالص.
ظل كل شوي يتغزل بيه رديتله الغزل وآني الزم بيده..
: يابة والله حلاتها بيك وبشرحك أنت صاير أحسن دليل سياحي يلا شوكت نوصل للروشة؟ أريد أصور هناك وأدز لأهلي.
باوعلي بطرف عينه هو يسوق السيارة نبرته هادئة بس بيها مغزى.
: بس قوليلي سِيوداد مع إنو عم نحكي عن الجمال والصور ببيروت كل شي إلو أسم وتاريخ ما في شي بيضيع متل البارحة لما قلتي حسن ونحنا بوضع حميم لسا هالأسم عم يدور براسي متل صدى صخرة الروشة.
سكتت أهو شلون أعلمه يتقبل أنو أريده حسن بس هذا طلع صعب و عنيد من أول مرة خلالي حدود أنو مستحيل يبدل أسمه.
ظليت أستمع لعتابه وتلميحه وآني ساكتة أنتظر يكمل كلامه.
: مبارح ونحنا بلحظة حميمة وأنتِ بين أيديني وعالسرير لفظتي الأسم أوعا تعيديها مافيني أتحمل أكون طيف.
ضجت : لا تزودها شنو طيف شتقصد تحجي عبالك لازم لزمات علية وتعرف شي وما تريد تواجهني أنت تتعبني هيج صحتك حسن لأن حبيت أسميك أسم مميز بس أنت عاجبك أسمك
واتر بم (ماطور مبرد) مدري وترميلون ( انكلش ركية)
سكت فغيرت الموضوع:
: عزا والتر! شوف هاي العمارة شلون تصميمها غريب! تجنن صدوك والتر أنت كتلي راح توديني ناكل مناقيش أصلية مو بالله؟ متت من الجوع والريحة هنا تدوخ الواحد.
أبتسم أبتسامة مكسورة وغيورة
حسيته يغار بس من شنو من حسن اللي ميعرفه خطيبي مدري خمن و ربط الأمور ببعض.
بس بتفهم ولطف كلمني :
: تكرم عينك المناقيش جاية وكل شي رح يجي بوقتو بيروت مدينة بتكشف أسرارها شوي شوي وأنا كمان صاير عندي طاقة صبر لأعرف كل شي.
بووم اليوم كضاها عليه بس يبسمرني بس رديته بصورة طبيعية كأنما الموضوع مو يمي.
: أي الصبر زين شوف شوف هاي الساحة مو هي اللي بيها الساعة الكبيرة؟
رد والتر بهدوء:
: إيه هيدي ساحة النجمة تعي ننزل هون نتمشى شوي بلكي ريحة القهوة بضيع شوي من الضياع اللي عم نحس فيه.
هواي أفترينا و تغدينا مطعم آكلات بحرية.
لزمت أيده حيل:
: تعبت عفية بعد كافي صح أجرت سيارة تسوقها و نفتر بيها بس من نتركها تكربني مشي.
: شو تكربني.
وضحت بلغة الأجنبية هاي أي شي منفهمه من لهجاتنا واحد يوضح للثاني باللغة الأجنبية.
: شوف يعني ماخذني سخرة متعبني مشيني هاي أعتقد بلهجتك اللبنانية تعني مكربجني وراك مسافات.
ضحك بصوت عالي:
: ولو! لكان شو مفكرة؟ إذا رجعنا ع الأوتيل هنيك كمان بدك تكربني أقصد تفلحي وتشتغلي شغل السخرة يعني لاحقيتك لاحقيتك! ههههه هههه.
خجلت هواي يحرج المقابل وآني بعدني أستحي منه بهيج أمور خصوصية.
فقلدت ضحكته بتنمر:
: هههي ههههه هههي ما تضحك نكتك أصلا لازم تكول وراج كراب لأن دتحجي عني مو عن نفسك وتكول تكربني هههي تعلم أول لهجة وعود رد بلهجتي.
بس هو أستمر يضحك عض شفته وضحك بضحكة خفيفة باوع بعيوني بنظرة بيها غزل صريح وكالي:
: ممممم باينتو عاجبِك لعبة الكَراب بغرفتنا ما هيك؟
بقينا أسبوعين بلبنان صرت حتى بخيالي ما أكدر أصيحه حسن مثل ما جنت أريد لأن أحس بذنب دخونه بأفكاري وهذا خطأ هو ما إله ذنب هو أختارني إلي.
بس آني أختاريته مجرد شبيه راسي أحسة يصدع من الأزدواجية إلي أحسها بداخلي أعرف والتر جاد يحبني وما يستحق هيج أجازيه بس شي داخلي سنين تعويد أحاجي صور و سترة شهيد ألبس حلقتي لخطوبتي معاه وحلقته الفضة بكلادة ذهب ما همني ميصير ينزل سعر الكلادة لأنها مو للبيع ضميتهن بعدتهن بس واهسي المرضي تحول لحسن.. يارب هم كلت حسن سميت رجلي بحسن بدل والتر.
خابرت أمي كالعادة وسألتها:
: يمة عليج بعزيز گلبج هم عمي مسولف لوالتر عن علاقتي بحسن عن خطوبتنا عن حبنا ومعاناتي وسنيني الضاعت أنتظر؟!
: لا يمة بعد صفحة و أنتهت يبقى رجال شلون نحاجيه بشي أنتهى أوف يحسوني يا وجعتي يعمة أوف صفيت جوة الكاع والله ولج لو مو سنة الحياة و لو بي أمل يرجع من الموت فلا أعرسلج لغيره.
يارب شحاجيها حتى لو أريد أنسى سنين هي تذكرني وتنوح عليه.
: زين يمة منين عرف هو ما واجهني بس بأقل كلمة يلمح آني مو طيف وما أريد تفكرين بغيري وخرط حجي مال واحد يعرف تفاصيل عني.
: والله يمة عمج ما يكذب بس يحترم رغبتج وهم فهمته تروح تحجي النوب تزرع بذرة شك والولد يظل يحس هو مجرد طيف فكال هاي هي بس كون هي تتسنع ومو تشرد الولد بسوالفها لو تعيش وهم حسن اللي تحول داخلها مرض عايش وياها.
تغيرت مواضيع المكالمة بينا ووصتني بي وكالت ما حجيت يم ولد خالج من خابرولي زحمة مصار هواي من مات محمد يزعلون يمة و سولفتلي عن فيديوات تشيع محمد دزوهن إلها.
: حوليهن إلي.
دزتهن إلي من سديت المكالمة كابلتهن وعيوني تصب كل ولد عمة موزرين مهاويل وهوسات ودخلوه جوة للبيت ومرته خطية تصيح منهو لبناتك يا محمد ولك حاجيني وصيت منو بيه منو ببناتك.
بناته توهن مراهقات ذبن كصايبهن على تابوت الأبو كصن الضفاير حزن عليه مسحت عيوني ورمن من البجي مكدرت أكمل باقي الفيديوات.
تذكرت يوم زفة حسن لقبره تذكرت يوم شفت ورقة إعدامه وما صدكت تذكرت يوم الذبيت روحي بحفرة عظيماته أحضنهن وآني أحس طعم الموت يتشابك بشفتي وي رمل الصحراء الشاهد على أكبر جريمة بحق الشباب.
اليوم تنحست و أعتذرت من والتر مطلعت وياه وشجعته يطلع مردت أكوله أريد أبقى وحدي.
فمن رجع كعد على طرف الجرباية وهو يباوعلي بعيون نسميها بالفصحى ثاقبة يعني نبه.
: ليه عم تبكي شو بكي؟ كنتِ عم تبكي؟ عيونك ورمانين.
حضنته و بجيت من كل گلبي أغسل عذابي وروحي اللي معذبتني ومحمد إلي راح بعز شبابه:
: أُمي دزتلي فيديوات.. (شهكة بجي وسعال).
كام جابلي مي و كلاص :
: خذي أشربي وتنفسي بهدوء وأنتِ عم تحكي.
شربته وكملت : راح محمد شاب مكدر والله شنهاي خلصوا ولد خوالي ما كافي را...
ما كملت ردت أجفص وأكول ما كافي راح حسن لزمت بريك وضميت وجهي بصدره أنحب بكل قوتي وهو يهمس يواسيني.
ورى هذا الموقف طلب أبدل ما قبلت بس أصر طلعني ونسني ورجعنا متأخرين بالليل ورى 12 والله ما ألكه منه ومن حنانه بس آني وحدة عايشة بوهم ماضي ومخربة حياتي.
رجعنا لبلدنا الأجنبي ورجعت الحياة للروتين أستقبلنا عمي وأمي بالمطار وماجدة.. و باقة الورد من ماجدة.. تشكرتها بس من حضنتها همست:
: وين تطيرين مني تخليلج جناح هم أنوشج وأفعصج وأكص لسانج بسيطة
همست : شبيج شقاج بايخ؟
: لا والله ما أشاقى شكايلة لوالتر أنتم تشتغلون سوه.
: هو طلبت منه علاج لوضعي يعني دأخذ يمه وبعدين أنتِ هم تشتغلين بالمشروع.
: آني بس مشروع أما أنتِ بقسم المعالجة النفسية وهو هناك هم شغله الدائم.
لزمني من إيدي وعمي وصلونا السيارة لبيتنا إلي أثثته على ذوقي.
بقو شوي و أنطونا الهدايا عمي ووالتر أندمجوا بالسوالف أشرت لماجدة.. تتبعني للمطبخ وهناك تعاركت وياها كلامنا همس:
: عمي يحلف مكايله شي أكيد أنتِ؟!
توترت وكالت:
: والله قبل لا تنخطبون سألني عنج عبالي معجب فكطعت الطريق عليه.
: إي بله وشكتيله أطربيني يا أم الفواين.
: شنهاي ترى مصختيها من تصيرين ولي أمري وترفضين عرساني مكاني شو ما سويت مثلج بس نبهتج عندي لسان آني أرفض لا تحجين مكاني
هسة شلون كبت بوجهي حتى عطوبج صعدن أريل مال راديو قديم.
: أنجبي.
: قابل أكذب أم شعر المكوش ميفيد بي مشط.
: كافي تنمر متضيعين السالفة شنو حاجيتله.
: كلتله مخطوبة وإذا معجب بينكم فارق الدين وهي أرملة لخطيبها وحجيتله شلون ليلة العرس أخذوه وسنين تنتظري بأمل يرجع حسن.
لطمتها راشدي:
: طاح حظج إي ولله كايلته على إسم خطيبي الله يرحمه عاتبه عليج ناخيتج ولج جفصت بالإسم أشوفه يبسمر كملي كملي بعد شحجيتي؟
: ماكو شي يعني نقلتله شلون بقيتي تتأملين عايش بس لكيتيه بالمقابر الجماعية والله بس هيج كتله تعقدت وتخاف تزوج لا تنحس الياخذها ويموت.
: صخام بعينج! ولج مطلعتني يم رجلي وجه البومة وأم نحس وعلاسة زلم اليخطبني يموت الله ياخذج حسن منو قتله خليني ساكتة بس حزبية بنت حزبي ما عليج عتب.
باوعتلها بصدمة النوب فكت حلگها تضحك درزلها أهينها وتضحك ديله بله رجعت أستفهمت أريد أعرف شنو كايلة.
: والسترة والصور والحلقات وهاي الكلادة اللي برگبتي عرف يخصن حسن؟
: لا هنا ما حجيت مو لهاي الدرجة مجرد وضحتله طريقك صعب لا تنعجب بيها.
: إي يالفاهية عود سمعج هياتنا تزوجنا ولعبنه جودو وچقلمبة.
ضحكت : صدك شلونه الزواج طلع بتول لو خبرة.
غميتها : هذا الكاتلج شلة مال سوالف طايح حظها رجاءًا هاي خصوصياتي عمومًا شاب متربي هنا و عنده رس أجنبي من جدته شتتوقعينه عايش عيشة ناسك و متوصف.
: إي هم صح بس شعجب وشم شعار دينه السابق بجف إيده برسخه جانبيًا ما مسحه؟
: هاا..
سكتت وتفشلت ممنتبهة لهاي الشغلة
شلون زوجه أنتِ راح يطفش الزلمة إذا بقيتي هيج.
راحت ماجدة.. وي عمي وأمي.
لكيت والتر يدخل الجنط النزلهم عمي من سيارته ذن بقن بغرفتي ببيت عمي
من خابرت أمي وصيتها تجيبهن بطريقها باوعت للجنطة الخضرة هاي ليش جايبتها مو كلت الي على كنتوري هناك لا تجيبها.
أبتسم وهو يصعد الجنط جنطتين جنطتين نازل وصاعد لمن كملهن.
: تعي لعندي لازم نلاقي حل بدي ياكي هون بين ضلوعي.
أبتسمت وبحجة الزم أيده ما أعرف شلون ما أنتبهت مدري أشوفه دون مركز وأهتم.
: حبيبي هذا الوشم لازم تروح مركز تجميل يزيله حرام يبقى.
نزل نظره للوشم وأبتسم بصلافة
و مشاكسة :
: بدك تعرفي كيف وشمته؟
: إيي بدي.
حجيت عود مثل لهجته
: طيب كان عمري سطعشر سنة وكان في حفلة للجالية المصرية خاصة بالأقباط هنيك تعرفت على بنت و حبيتها كانت أول حب بدقلو قلبي بس أهلها رفضوني وبتعرفي حتى لو كانت من ديني بيضلو شرقيين وعقلهم صعب بالإيام اللي كنت بخرج فيها معها لفتني وشم الصليب اللي على جنب إيدها وهيدا الوشم بيعملوه كتير أقباط بمصر عجبني الروتين تبعهم وقررت أوشمو.
رن نقاله و أنطاه رفض :
: هيدا بيتك و فيكي تعملي كل اللي بيعجبك طالع مشوار.
: ليش لحكنا نوصل وتطلع وين رايح؟
بس كرص خدي وباسني بشفتي و شم رقبتي و طلع شنهاي عود وين رحت شنو خاف بدت سوالف الزعبلة مال الزلم لا والله خاف ما ترضى غير طابوكة أنيمها براسك.
ظليت أروح وأرجع أكو واحد يسوي سوايته توة واصل من السفر يطلع مشاوير بله وين أروح هسة.
بس رجعلي حسن.. ينهش بعقلي
و يستفحل كياني آخ يمة آخ ألمن دازتلي هاي الجنطة مو آني بعدتها عني أريد أنسى و أعيش صرت مثل المدمن وعرف أكو هروين فوك رحت أركض و أخذت الجنطة خليتها على الجرباية وآني أفتحها.
: آخ أويلي يا عطرك الغيبته التربان يا روحك الشاغت وسط التعذيب يلجنت حلالي وهسة حرام أذكرك حتى لو بخيالي.. يلصرتلي هسة أطهر ذنوبي
ولك قبل أسبوعين جنت حلالي وفنه اليمنعني أكول حسن.. يا نشغة الروح
هسة صرت أتختل و أخاف أغلط بأسمك هسة صرت أنت ذنب لو فكرت بيك وخيانة لو جبت طاريك.
كلبت البوم الصور و آني أبجي.
: يارب ليش لو عايش وهسة جان خلفتي هسة شباب على وجه زواج
مددت السترة ونمت بحضنها وتغطيت بطرفها و آني حاضنتها وأشم بردنها مثل الشارب مخدر مضيع واقعه وعايش بهلوساته.
غمضت عيوني الي غرني بنحيب و غفيت و آني أناجيه وأدوره بين زوايا الأحلام واقع ماجمعنا وإنحرمت منك ردت الحلم يجمعني بيك.
فتحت عيوني على صوت والتر وهو يدردم فوك راسي جان يحجي بلهجة أمه الي بس بصوت مخنوك وعيونه تجدح نار من لكاني حاطة راسي على سترة حسن ونايمة وهو تحول لواحد ثاني.
الغيره بدت تاكل بكيانه مو من رجال حي لا الغيرة جانت من ماضي منتهي و عايش بس بخيالي آني زرعته وبديت أسقيه بدموعي كل ليلة.
: لإيمتى سِيوداد؟! لإيمتى بدي ظل عايش مع شبح؟ عم حس حالي دخيل أسبوعين وأنا أخبي خذلاني و وإنكساري بجرحي.
كمت ألملم شظايا روحي وباوعتله ببرود خلا يفقد أعصابه أكثر.
: والتر أنت تدري من البداية جنت مخطوبة وماجدة طلعت حاجيتلك السيفي مالي آني و حسن.. شنو هو بالنسبة إلي ليش هسة صرت تسويها طلايب؟
صاح بوجهي وهو يشمر المخدة :
: لأنك ما عم تشوفي جاد! ما عم تشوفي والتر جاد عم تشوفي حسن.. بملامحي عم تحبيني لأني نسخة منه! أنا إنسان إنا إلي كياني ماني صورة فوتوغرافية لخطيبك القديم!
جان بيده صورة حسن.. و صور البوم العرس الي ما تم وصور خطوبتنا ذكريات ما تغادرني وتحولت مرض مزمن نسيتهن مطشرات عالجرباية ونمت.
ظل يكلب بيد ترجف ووجه أحمر و معصب كوة يتنفس يدري مريت تجربة خطوبة وماجدة منطيته أموري بس الظاهر ميعرف مستعزة بالذكريات ولا توقع لهاي الدرجة أحب حسن.. الغيرة عمته وشمر الألبوم بوجهي.
: شو هيدا؟ لكي إسمعي.. بتعرفي هيدا شو بيسموه؟ هيدي خيانة!
شو بعمل هلق؟ قوليلي! أنتِ عم تتخيليني حسن؟ ولِك فيه شبه كتير مني وأكيد عم بتشوفيني حسن.. جرحتيني وهيدي نذالة منك!
سكت وضرب الحايط بوكسيات خفت ليجيني بوكسي وبأعلى صوته يصرخ
: لا ما عم أصدق كيف تخدعيني؟! أنا ماني خيال لحدا لما بتصرخي وبتقولي حسن.. يعني عم تتخيليني هو! ناديني بأي إسم بدك ياه بس حبيبك حسن لا ما بقبل! ناديني والتر ناديني جاد لو حتى بتناديني بيتر أو أيوب ما بتفرق معي بس حبيبك لا! مفهوم؟ لاااا!
صوتنا صار يوصل للجوارين بهذا البلد الجوارين ما يرحمون وبس يسمعون صريخ يبلغون فوراً.
فعلاً لكينا الشرطة والباحث الاجتماعي ستيفن يدك الباب جاي يفتهم شنو هاي العركة اللي دتصير و إلي الجيران أشتكو.
كعدنا بالصالة والتر كبالي وستيفن بالنص يباوعلنا بنظرات فاحصة و الشرطة تستفهم.
كعد والتر. يحجي بحرقة يحاول يبين للباحث إنو المشكلة بيه بإدماني على الماضي وسواني أعاني مرض نفسي و دأتعالج جان يريد ينهي الشكوة حتى يرحون.
: سيد ستيفن زوجتي ما عم تعيش الحاضر هي عم تحاول تعمل مني تمثال لشخص مات من سنين هي مريضة نفسيًا بمرارة الفقد ذ وبدها علاج قبل ما تدمرنا ثنينا!
من كال مريضة نفسيًا حسيت الدم صعد لراسي شفت حسن يباوعلي من بعيد وشفت والتر كدامي وهو يحاول يصغرني كدام الغريب كمت من مكاني ونترت بيهم أثنينهم :
: تنجب وتاكل تبن تريد تركب الحق عليه؟ آني مو مريضة أنت المريض بعقدة النقص! أنت اللي تغار من شهيد تحت التراب لأنك تعرف ما توصل لأظفره!
عفتهم وطلعت أركض للشارع الجو جان بارد والناس تتفرج سمعت صوته وراي يركض ويصيح بأسمي بلهجة مكسرة.
: سِيوداد! وقفي عم قلك وقفي لا تفضحينا بالشارع يعني شو لازم قلّن لحتى يفلو دون أستدعاء للمركز قلت إنو إجتها كريز (Crise) نفسية.
التفتت عليه جان وجهه أحمر وعيونه طافرة تقرب مني ولزمني من إيدي حيل كدام الناس والسيارات اللي بدت توكف وتتفرج على الرجل الشرقي بنص أوربا.
: أرجعي للبيت فوراً سِيوداد لا تخليني إفقد أعصابي أكثر!
باوعت بعيونه شفت والتر الحقيقي مو حسن.. شفت الشخص اللي يريد يملكني ويجتث ذكرياتي بالقوة وبدون وعي وبكل حركان الگلب والسنين اللي ضاعت و آني أنتظر رفعت إيدي وظربته راشدي.
إيدي جانت ترجف وهو جمد بمكانه لزم خده وعيونه أنملت بصدمة كأنما هذا الراشدي هو اللي صحاه من حلم الحب اللي بناه وياي.
الباحث الاجتماعي طلع مستغرب رد فعلي والناس بدت تهمس باوعلي والتر.. نظرة أخيرة نظرة واحد أنكسر وأنذل كدام الكل دار وجهه ومشى بنص السيارات بكل هدوء.
وكفت بنص الشارع و الكل يباوعلي حسيت آني فعلًا أجتثيت كل شي حلو جان ممكن يربطني بي.
رجعت للبيت وحدي والغرفة جانت فارغة إلا من ريحة حسن اللي بالسترة وبرود والتر اللي عافه وراه كعدت بالكاع و آني أردد بيني وبين نفسي:
: شسويتي يا سؤدد؟ شسويتي بحالج وبالرجال؟
بقيت كاعدة بالگاع إيدي اللي ضربت والتر بعدها تنبض بحرارة مو طبيعية كأنما الدم اللي جرى بخده أنتقل لأصابعي البيت اللي جان قبل شوية يهتز من الصياح صار هسة هدوء يكتل هدوء يشبه هدوء المقابر.
باوعت لسترة حسن الشمرها جاد على القنفة ذيج السترة اللي جانت ملجئي هسة صارت تحسسني بالذنب.
شلتها وحضنتها حيل ردت أشم ريحة حسن ردت منه يكلي عفية لو ليش هيج سويتي؟ بس الجماد ما ينطق الجماد بس يمتص دموعنا ويظل ساكت.
كمت بديت أمشي بالبيت مثل المخبلة ألم أغراضي وأشمرها بالجنط ما أدري وين أريد أروح بس أعرف إنو هذا الحايط صار يخنگني.
الباحث الاجتماعي ستيفن بعده واگف برا لو راح يبلغ ؟ هنا بأوروبا الراشدي مو مجرد ضربة هنا السالفة بيها محاكم وقوانين تحمي الكرامة قبل الجسد.
طلعت من البيت الجنطة بإيدي ورجلي تخط ممنتبهه والمطر بدا ينزل خفيف يغسل وجوه الناس اللي جانت تتفرج علينا قبل شوية بس ما يغسل السواد اللي بگلبي.
وصلت لراس الشارع و شفت والتر واگف بعيد ساند ظهره على عمود الكهرباء ويباوع للفراغ من شافني ما تحرك ولا حاول يمنعني بس عيونه جانت تحجي أنكسار ما شايفه بحياته.
تقربت منه ردت أگول آسفة ردت أگول والتر أنت ما تفهم بس الكلمات وكفت بلعومي.
هو اللي بادر بلهجة ميتة خالية من أي عاطفة :
: سِيوداد الوجع اللي بخدي راح يطيب بس الوجع اللي بقلبي هذا اللي أنتِ ردتي مبروك گدرتي تكتلين والتر للأبد
دار وجهه ومشى وبقيت آني واگفة الجنطة بإيد وذكريات حسن.. بالإيد الثانية والضياع هو العنوان الوحيد اللي أعرفه بهذيج اللحظة.
رجعت لبيت عمي اللي رزلني و تعارك وياي وأمي هم رادت تكتلني بس من وكعت متخربطة حضنتني تبجي.
أيام مريضة والتر ما يتصل ما أعرف موقفه نرجع لو يمشي بالطلاق تمرضت كولش وبعد شهر تبين حامل
أكثر وقتي مستشفيات حملي صعب
أكيد عرف من عمي لو من ماجدة بس أيضا ما أتصل.
مرت الأشهر و آني ببيت عمي جني غريبة بوطن ماله ملامح بطني جانت تكبر وياها يكبر الخوف والندم بگلبي
أمي جانت تباوعلي بحسرة تداريني بكلمة طيبة وبصحن أكل وآني عيني بس على الباب وأذني وي الموبايل
بيوم بادر يراسل بس رسايله جانت باردة جنه كاعد يأدي واجب مو أكثر شلونج؟ الطفل زين؟ تحتاجين فلوس؟
جنت أجاوبه بكلمة وحدة بس بداخلي جان أكو صرخة تريد تكوله:
: تعال آني بلاية صوتك صرت بس حزن.
بكل ليلة جنت أحط إيدي على بطني وأحس برفسات الطفل وأتذكر حسن
بس الغريب إنو ملامح حسن بدت تغيب بدت تتبدل بملامح والتر وهو يضحك والتر وهو يهتم بيه قبل ما تتدمر الأمور.
أكتشفت متأخرة إنو السترة اللي جنت أحضنها ما توكل خبز ولا تدفي طفل راح يجي للدنيا محتاج أبو يوكف بظهره.
وبيوم وقت الفجر جان بارد بشكل يگص العظ الوجع بدا ينهش بظهري نهش عبالك ضلوعي دتتكسر ألم ولادة أمي ركضت تجيب جنطة الطفل وعمي بدة يشغل السيارة وآني جنت كاعدة على طرف الجرباية دموعي تنزل وعرقي يصب.
طبعاً أمي ولدت قبلي بكم شهر طفلها الأخير اللي تعبت بي حيل فلزمت طفلها:
: أخلي الجهال يم أم تالا السورية وأرجعلج صيري قوية.
بذيج اللحظة ما ردت حسن. ولا ردت ذكرياته ردت والتر.. طلعت الموبايل إيدي ترجف والوجع يسد نفسي دكيت الرقم وگلبي يدك وياه.
: والتر..
كلتها بصوت مخنوك غصيت بالعبرة وبالوجع حجى باللغة الأجنبية
: سِيوداد؟! شكو؟ ليش دتتصلين بهيج وقت؟
صوته جان بي لهفة ضمتها جروح الأشهر الفاتت.
: راح أجيب والتر الوجع راح يموتني عفية تعال لا تعوفني وحدي آني خايفة.
سكت ذيج السكتة اللي خلت روحي تطلع وترجع ردت أعتذر ردت أكوله
: آسفة على كولشي بس الوجع جان أقوى.
سمعت صوته وهو يحاول يسيطر على أنفاسه تكلم أجنبي أسهله بهيج وضع نفسي متوتر.
: لا تخافي سِِيوداد أنا جاي ربع ساعة وأكون عند الباب أتحملي علمود البيبي وعلمودي.
سديت الخط وغمضت عيوني حيل حسيت إنو هاي أول خطوة حتى أجتث الحزن من حياتي وأبدي صفحة جديدة مو علمود الماضي بس علمود الطفل اللي ديفرفح بطني يريد يشوف الدنيا.
بالمستشفى جانت ريحة المعقمات تخنكني والوجع يروح ويجي جنت أغمض عيوني وأتخيل وجوه هواية بس من فتحتهن ما شفت غير وجه والتر.. جان واكف فوك راسي وجهه شاحب وعيونه بيهن قلق لزم إيدي حيل و فجأة أنكسر الهدوء بأجمل صوت سمعته بحياتي.
بچي قوية بجي طفل يعلن جيته لهالدنيا الممرضة شالته جان ولد مثل الكيمر وجهه يضوي وصحته تمام.
من حطوه بحضني شفت والتر نزل لمستوايا باوع للطفل ودموعه نزلت بلا أستئذان.
لزم إيد أبنه الصغيرة وباسها وبعدين باوعلي وكال:
: الحمدلله على سلامتك يا بطلة شوفي شو حلو بيشبهك إلك هيدا الصبي رح يملي حياتنا فرح ورح ينسينا كل اللي قطعنا فيه.
حسيت بذاك الوقت إنو الحواجز اللي بنيتها بيني وبين والتر ذابت لمست خده نفس المكان اللي ضربته بيه بذيج الليلة وكلتله بصوت مخنوك
: جاد سامحني والتر.. هالطفل هو بدايتنا الحقيقية.
باس راسي وهو يبتسم:
: خلص يا سِيوداد ما بقى تعتذري هلق صار عنا عيلة وهيدا أهم شي بالدنيي الماضي راح ونحن ولاد اليوم.
بس آني ما كدرت أنسى بقيت أحن للشهيد بخلواتي أفكر بي من أشوف طير تجي يمي أشمر فتات خبز و أتخيلها روح حسن.
ظل والتر كلما يفوت للغرفة يرفع نظره للجنطة الشمرتها فوگ الدولاب
يذب حسرة و أستمرت حياتنا بس كل فترة مشاكل وطلايب راد يسمي أبني أسم عربي بس عاجبني أسميه بوب على جده يمكن خبالاتي على كولة أمي مخبلة والله يساعده عليج أمه داعية عليه هذا المسكين تورط بيج
ما همني حبيت الأسم شعليه بآراء الناس بوب صار كل حياتي أدلعه بوو.
بيوم كال جدتي تريد تشوفج و تشوف حفيدها عود لبست أرقى لبس رسمي و مكياج لطيف متلهفة أشوف جدته بس آخ خياتي شسولفلكم شحجي شكول طلعت عدها تميز عنصري وما أعرف شبيها وي اللون الأسمر يعني بس شافتني سمرة تصيحني بأنتقاد وقح
: والتر شنو هذا هاي ملونة ما أهتميت غيرت دينك هاي حريتك بس زواج من ملونة لا لا أوفر يا والتر جاد.
يعني العينتينة ما تهتم ترك دينه و دخوله لغير دين كد ما أهتمت لبشرتي والله يومها بالضحك كتلها.
: هاي زين فتح لوني و شوي ربيت لحمة وصرت رشيقة قبل نحيلة وسمراء داكنة يا سيدة معلوف
تحب الألقاب وتحب الفخامة وتحب برستيج بالكلام وكولشي كون كامل مكمل وين يصرفلها سؤدد الي ترعد لو واحد ذبلها حجاية تريد ترزل العالم وكون يبتسمون ديله بله.
أذكر ردتني من طرف خشمها:
: سِيوداد أهدئي ما أعرف الملونون ليش دائمًا ما يملكون لباقة الحديث وفوضوين وأنت يا والتر هي هاي زوجتك؟! لو مختارها بملامح أوربية كان أفضل
حسيته أنحرج وقتها وأخذت الطفل من إيدي و هي تتأمل ملامحه.
: والتر يشبهك الحمد لله مو ملون مثل أمه.
لوما عيب ومرة جبيرةجان لزكتها بالحايط كوة متحملة أبتسم علمود البرستيج مال بيت المعلوف ما يخرب.
ظاهري مبتسمة وتقربت من إذن والتر و همست بإذنه:
: حاول نفلت منا ترى ما مسؤولة لو كسرت التحفيات على راسك وراس جدتك العنصرية يعني ترضاها تحاجيني بطرف خشمها وفوكها ترزل بيه ملونة ما ملونة النوب ترزل وآني لازم أبتسم أحافظ على مكانتك ومكانة آل المعلوف.
هو توتر و حاول يمهد ننهي اللقاء والله بس أطلع منا ما مسوية طلابة فلا أجي لهاي العنصرية.
ظلت تلاعب ببو وهي تبوسه و والتر منحرج بيني وبينها وهي كل شوي ذبتلها حجاية طبعا كل كلامها أجنبي ما تعرف تحجي مثلنا حتى لبنانية حفيدها ما تعرف لعد شكد تافهة الجد لبناني ولا تعلمت منه.
هي شوي وتتغزل بجمال والتر ويستحق وحدة بجماله مو سمراء مثلي شرقية عربية ملونة.
دردمت بعربية ما تعرفها
: ليش شبيها العربية لا عشتوو عليج على شنو هاي العجوز شايلة خشمها شو عيونج زروف مس هم مو أي مس لا مو الأستيل الأستيل شوي أكبر عيونه والله يا والتر بيبيتك عيونها جنها زرف مس فافون القديم خلي أول تلحك وسيعة عيني عود تعيب شو كافي العين مني تسوى مرة كافي آني العين وسيعة والرمش سعفات جنوبية.
همس بالعربية لا تفهم جدته
: هيدي مرة كبيرة بالعمر كبري عقلك شوي! شو هيدا الأسلوب؟ كتير مش لطيف منك على أساس أنتِ مثقفة! أعتبريها متل ستِّك عيب هالحكي منيح إنو هيّي ما بتفهم عربي وإلا كنتِ فضحتيني مع ستّي!
: ها فضحتك! زين هي ما فضحتك وياي مو عيب تتنمر علية آني طالعة أنتظرك برى عود من تكمل لقاء بستك مدري بيبيتك التحفة عود تعال وراي عشتوو ناقصني بس هاي العجيز تعيب علية جان كالت خلقة الله.
طلعت كعدت بمرجوحة بفيلا الحجية ماري عشتو عجوز البين رجلها بالقبر وتتنمر عالعالم.
بس هسة عرفت العيون زرق منين ورثهن ورث لونهن من جدته التحفة ماري بس والتر كبار عيونه على أبوه وجده.
مراويني البوم الصور هو أمه سمرة حنطية بس تخبل وشعرها أسود طوخ بس عيونها عسلي مخضر ذكرني بعيون الفاهية ماجدة.
أبوه أشقر ذهبي عيونة سمائية على أمه ماري العوبة وجده عيونه بني فاتح جداً عبالك قهوة بالكريمة فهو طالع على أبوه و عالجدة بلون العيون فقط أما وسيعتهم على أُمه عيونها كبار والا أبوه عيونه دگم.
شوي وطلع يخزرني زعلان عود فشلته من عفت جدته وطلعت چا الله يرضاها ترزل بيه ولازم أبتسم لأن برستيج لازم أصير مؤدبة وأسكت لليتنمر عليه وآني ممنونه هة هو هة هو وي سؤدد. ما تمشي عليه.
: قوانينكم يالأجانب لو أريد أتنمر جان كلت شنهاي أووي لقبكم معلوف شنو أنتم دابة دور علف.
أشر بغرور وكبرياء بيده.
: تبعيني!
وركب سيارته خلا الطفل ورى بمهد خاص بالسيارات مثبت وبي حزام أمان و ممكن يتحول لكرسي طفل أيضا.
وكفت شنهاي عشتوو تبعيني! أشتغل عندك بدل ما تعتذرلي صفاقة الحجية بيبيتك ولو مو مال حجية هاي مال أعوذ بالله من شر الشيطان شلون ردت أغلط بكلمة.
كعدت بصفه وهو يرجع بك بالسيارة لمن طلعنا والحارس سد الباب مال الفلا.
ألتفت إلي وبلغة جدته الأجنبية :
: جنت أتمنى تتركين أثر طيب يمها ترى فشلتيني يعني أسلوبج همجي ولا جنج كفآت عُليا و إلي بتخصصج يكون مرهف الأحاسيس يعني فنان لازم يكون لطيف و إنسان يختار كلامه بعناية.
أستهزئت : هو بس شغلة ما سويتها نسيت ما غنيتلها تغاريد العصافير وأغرد كون الها بكل تخصصي الفني تغريدات إشي بلابل إشي كناري وها هديل الطيور هذا تغريد فريد نوعه يوصل شتم لسابع جد بنت الأجانب دتهيني و أنت ساكت ليش ولك ليش وإذا جدتك مكلت كرامة مرتي وزحمة مرتي بنت العرب تهينها بنت الأجانب أو شنو بنت لا عجوز الأجانب دخيل الله كافي عنصرية يكفيني فخر آني من أقدم بلد مهد الحضارات والأنبياء آني لكش آني سومر آني بابل آني السريان آني الكلدان آني الشبك والكرد آني بنت العرب إي آني الأصل وفخر غصبا عليها خلي تاريخها يلحك تاريخي عود تحجي.
ظل هو ساكت وآني ماأسكت شسكت ولكم بنت العرب أنهانت وهذا ساكت والله ما أريد مشاكل ومرة چبيرة جان غلستي متنقصين شي لعد والكرامة والعروبة الي مزقتها هالجدة.
وهم مرت أشهر و اليوم ميلاد أبني فآخر عركة وي أبو بو جانت بمطعم نرفزني حيل وقتها قررت أسوي حفل عيد ميلاد بوو بسيط بمطعم.
عزمت ماجدة.. وأهلي و هو قدم دعوة لجدته الي ما أجت بحجة كبر العمر وهاي أجواء متلائمها بس هي أصلاً تكرهني ما حبتني عدها تميز عنصري حتى متعجبة من مراويها صور عمي وأمي بنقاله من عفته وطلعت للحديقة يومها مراويها وكايلتله هي ملونه وهم بيض ديله بله.
شوي ومحسيت ألا شابة يمكن عمرها 20 تركض و جلبت بجاد وشبعته بوس وهو يحاول يوخرها وهي حبيبي.
وكفت وكلت : جاد منو هاي بله؟!
توتر وجرها من زندها وما أعرف شحاجاها بس بملامح قاسية و متشددة وهي بغضب ضربته راشدي
عزة العزاج سؤدد أنتِ موجودة وهاي تكتل رجلج هديت وجريتها من شعرها أريد أتناوشها وأدوفها دوف.
بس عمي أستعجل جر البنت وطلعها من المطعم معرف شكللها هنا باوعت لوالتر
: إييييه؟!
توتر و باوعلي علاقة قديمة
: أهاا يا ما شاء الله قديمة جديدة تجي بنص عائلتك لا هذا ما ينسكت عليه.
: روقي عم قلك علاقة قديمة أنا رايح هونيك فشارع ليك عشر دقائق تروقي وتهدي شوي نكمل عيد ميلاد الولد.
هو طلع وآني أفور نار نار نار متحملت آني ما يهدئني هيج حجي آني يهدئني من أفوخ گلبي بي شنو هاي جاية صدفة؟ لو متعمد يعزم الماضي النوب حلوة بنت الأجانب.
طلعت أتعارك وياه و ضربته وهم تعالوا بلاغ وللمركز وحولونا جلسات يم باحثة إجتماعية وآني هم حولوني
لازم علاج نفسي لأني أعتبروني سادية أعنف زوجي المسكين عشتو.
وتعرفون باقي الأحداث
طبعا ماجدة لجأت لزوجي بعلاجات وهذا خلاها من فترة تريد تعرف ماجد شخباره ولو من بعيد.
من جبتلها الأوكي وياه بشارة بنتها هنا قررت تسافر ورى فترة طبعاً وسافرت وهسة آني من أسبوع أتصل بيها مغلق صرت زمالة ما أخذت رقم أختها من سولفت عن أختها وأستقبالها الها بالي حيل مشغول على ماجدة.
وصل الأمر أبلغ لأن تعتبر ماجدة.. مواطنة من هذا البلد وأختفائها أكيد الدولة تجري أتصالات للسفارة وهناك يشوفون أسباب أختفائها.
خفت لا هذا الغبي ماجد أذاها لا أسم الله أكيد مبيها شي أما حياتي هي هيج بقت مشاكل وصلح وحنين لميت و حسرات والتر اللي شفت بي يتمنى هو الكون كله بحياتي هاي رغبته الي مكدرت أتأقلم عليها.
مــــــــــــــــــــــــــريم
(نرجع بالتاريخ لمريم ونصفيها )
من يوم شفت سـؤدد.. بعد ما شفتها وسمعت بعدين تركت البلد من أبن خالها اللي كعد ببيتهم أجره منهم إي أسمه حسين.. تزوج و جاب أمه وزوجته وسكن بمنطقة أمي
طبعا أمي بدت تتحسن و رجعت بيتها.
بس الصار رجلي مدري شبي أحسه متوتر و قليل يطلع.
حول أملاكه بأسمي من قبل السقوط بفترة ورى السقوط كال مديون بس ما صدكته حسيت أكو ناس تهدد بي وهذا خوفني كولش عليه.
الأملاك البقت مو بأسمي كال أبيعهن ونصفي أمورنه وهم الأملاك الي بأسمج تبيعين ونهاجر بس خلي أأمن وضعنا.
: أحد مهددك؟!
: لا يعني منو؟
: أريد أشوف أمي هم أنطيها كم فلس أذا تقبل لدواها خطية.
: صار هي المن باقية وي هذا السكير أبو البلاوي والنصاب خلي تتطلك وتجي ويانا.
: إن شاء الله من أروحلها أبلغها يمتى تاخذني الها.
باوعلي : عون.. موجود حاليًا مريت أشوفها و شفته وذب حجي تعاركنا فهددني.
ظلت ببالي هذا عون ميتوب دوم يهدد شبي ميعوفني مو عيب عليه.
باوع لساعته وكال أنتظر جماعة تجي
خلا سلاح بخصرة
: يا شنو؟!
: الوضع مو أمان وآني ماضي قبل لا أتوب جنت ظالم فلازم سلاح أأمن روحي على ما أكمل أجراء طلعتنا بري
ظليت أبجي.
شوي و خابروله على نقاله
: عصام صار هو مثل ما كلت ما أطلع ولا أفتح باب لأحد أي أي ما أطلع بس وياك أنت تحميني وما تتخلى عني أكيد.
هذا من شركائه وأصدقائه أبد ما عافه وهو الشجعه يبيع كولشي و يغادر البلد أفضل.
أجو عليه و طلع وأني أتصلت على بيت أمي أرضي.
: هلو ماما شلون صرتي.
: زينة الحمد لله.
: عون.. يمكم؟
أستغربت سؤالي
: لا يمر يوميه يطمن عليه ويروح ليش تسألين ؟
: يعني بعد ما نكدر نجيج آني وزوجي مو؟ لأن مربيتلج جلب حراسة يعض وينبح هواي وصليلة كلامي رجاءًا لا يهدد ترى شيصير عليه وعلى زوجي راح أبلغ ناس تنطي خبر للشرطة.
طبعا كذب عود بس أخوفه يبطل تهديد لأن حيعم عليه و رجلي هنا شلونه عاد يتخبل من عون ويحرمني أواصل أمي بسببه.
تأخر ومن رجع بالليل تعبان وضايج كال أنام ما عفته رحت بصفة تمددت حضنته وراسه على صدري أسمعه يناشغ و يبجي.
فجان هذا اليوم و هذا الليل ثگيل يمر على الروح مثل الجبل وساعات تمر ما نمت.
أما نصير غافي بس نومته مو نومة مرتاح جنه كاعد ينتظر المصيبة تدك الباب وفجأة فزز هدوء الغرفة صوت النقال رنته بهذيج الليالي جانت تشبه نعي الموت.
فز مرعوب عيونه تتطشر يمنى و يسرى وكبل جفل من إيدي تشيل التلفون المحمول أيده على أيدي وجر التلفون النقال مني وهو يجاوب المتصل..
