رواية سداد وبنت العرب الفصل الواحد والأربعون بقلم الزهيريه
لا توجد أمرأة كئيبه
بل توجد أمرأة في مكان
لا تنتمي أليه روحاًوعقلاً وقلباً
ألق/ كل انسان يكون تحكمه ظروفه ماكو أبد شخص يگدر يتحكم بالظروف وهاي الظروف أكثر الاحيان تجبرنه آنه نسوي أشياء ما نريدها وبنفس الوقت تجبرنه نعيش او نتعايش مع أشخاص احنه ما نريدهم ولا همه يريدونه من آحد يسألنه شنو الجابركم نرجع ونگول الظروف وآني في موقفي ظروف حياتي هواي جبرتني على أشياء ما أريدها ومن ضمن هاي الظروف انه اجيت يم أهل أمي وآني من أعرف أمي أبد لان من جابت أخويه رجعوها بيت جدي اهل أبويه على أهلها وإني أصلًا وعيت على عمه نسمه هي تعتني بيه
لهذا چنت اگول يمه لعمه بسمه وظروف بيت جدي آهل أمي ما اعرفها أبد ومن عافني سردار وراح ظل جدو يصيح ويغلط بس على منو ما أعرف وآني اخذت ايد أخويه ودخلت وره جدو للبيت وطبعًا اشگد ما أوصف صدمتي بالبيت ما تنوصف أبد البيت طبعًا مو چبير يمكن إذا الله ما مكذبني يطلع مساحته 60 متر البناء كله اول ما واحد يدخل صاله ومفروش بيها حصيره وعلى الجوانب دواشگ ويمكن عدهم عداوه ويه التنظيف لان الوسخ الموجود يبين إنه هذا المكان ما متنظف صار شهر
وجدو سمعت صوته جوه دخلت وچان يصيح على وحده عجوز وهي ساكته وفهمت انه هاي بيبي
وهي من شافتني گالت / تعالي حبوبه دى احبچ
وآني تعالي فهمتها بس احبچ ما فهمتها اتقربت عليها حضنتني وبوستني هنا فهمت انه احبچ يعني ابوسچ
وتگلي / گعدي حبوبه هذا بيتچ
وگالت / اگعدي جدو عافنه وراح وهو يسب بيبي واني گعدت واجى أخويه گعد يمي وراحت بيبي وهي تسحل برجلها وجابت مي واجتي
بيبي / يمه احنه على گد حالنه وعين غطى وعين فراش ولا تخلين في بالچ كلام جدچ هو كل مره يحچي بس گلبه أبيض
الق/ لعد أمي وين ما شفتها
بيبي / امچ تعيشين أنتي قبل 5 سنوات انطتچ عمرها وبقيتوا إنتوا من ريحتها
الق/ تعجبت يعني قبل خمس سنوات ماتت أمي
وعمي نزار لا هو ولا زوجته كلفوا نفسهم وبلغوني انه أمي توفت مرات أفكر ماكو شي بي خير سوا ألي عمي نزار ومرته بس يبقى إلي بالگلب بالگلب وطول ما إني گاعده أسمع صوت عياط تعجبت هاي شنو العياط وبقت حسره بگلبي وسألت بيبي على العياط
بيبي/ هذوله خوالچ آني الله بلاني بولد 2 مخابيل وامچ چانت منغوليه الله يرحمها
الق/ وهمه وين ودى يعيطون هيچ
بيبي/ فوگ بالغرفة ما نگدر نخليهم يطلعون لآن عقول ما عدهم
الق/ عفت بيبي وگمت وطلعت من الغرفة إلي أني بيها صار گدامي درج صعدت وكل ما أصعد درجه صوت يقرب لسمعي وصار گدامي بابين باب فتحته چان باب السطح والباب الثاني فتحته چان باب غرفه بس العجيب إنه الباب ما مقفول تعجبت شنو معقوله ما يگدرون يفتحوا ويطلعون بس من دخلت للغرفه فهمت ليش تاركين الباب مفتوح وشفت منظر والله يگطع الگلب مسوين 3 أقفاص من حديد وقافليهن بأقفال حديد وخوالي كل واحد مخلي بقفص وقافلين عليه الباب وهمه ومن شافوني صار يهاددون ويضربون بالقفص ويعيطون من بشاعة المنظر
صدگ بچيت عليهم وبعد ما تحملت عفتهم ونزلت ومن سالت بيبي على القفص الثالث المن
بيبي/ هذا القفص چان لامچ الله يرحمها وهسه صار لاخوچ
الق/ تحچين صدگ شلون تحبسون أخويه ترى هو مو مخبل وبعدين الناس تورث بيوت سيارات احنه نورث قفص حمدلله على كل ما بلانه بي
وبذاك اليوم ما نمت غير لنص الليل وأخويه ما قبلت ينام بالقفص ونام يمي بالغرفة وبيبي هم نامت ويانه وجدو نايم بالصاله ومن گعدت الصبح چان العياط مسمع سابع جار و طلعت من الغرفه
وچانت بيبي ماكو صعدت فوگ لگيتهم هي وجدو فوگ ومطلعين واحد من خوالي من القفص ومخلي بالسطح ودى يغسلون بي وجدو گوه لازمه وهو يعيط وخالي الثاني هم يعيط واكو رووس مال زلم من كل الاسطح وهمه يحچون على جدي على حرام عليكم نريد ننام ولا ليلنه ليل ولا نهارنه نهار روح ذبهم بالشماعيه واكسب بينه آجر
بس اذا الحايط يجاوب چان جدو جاوب وهو شافني واگفه وصاح بيه / همي ايدچ وتعالي لو تلزمين ويايه لو تعاونين حبوبتچ لا ظلين واگفه على راسي مثل شمعة الفگر
الق/ وآني النادره على أساس اجيت دى اعاون بيبي واكو وغف مال زاهي ازحلگت بي ونضربت بجدي وهو لازم خالي وعينكم شوف الا النور جدي يخاف لا يوگع وعاف خالي وظل لازم الحايط وآني لازمه جدي
وخالي اجته فرصه من السما بس عافه جدي نزل يركض وهو بلا ملابس وطلع للشارع وما نسمع غير العياط مال النسوان والزلم صيح عبالك سوگ هرج ونزلت خطيه بيبي واني امشي ولازمه الحايط ونزلت وره بيبي
وهي واگفه بباب البيت وصيح ولك تعال راح تشوفك سعدية
وهو يرگص ويجاوبها خلي شوفني سعدية خلي شوفني سعدية وصدگ فاتت وحده مغطيه وجهه بالعبايه وتگول دهر فرك طالع لشارع يا مولاي كما خلقتني واصور هاي سعدية نفسها ظليت صافنه يعني جدي ابو ابويه شنو چان بعقله من زوج ابويه من بنيه منغوليه إخوانها مخابيل أدري ما خفت لا تجيبلك أحفاد مخابيل
وبوقتها إجى واحد جر خالي ودفعه علينه للبيت وسد الباب وهو يگول ما على المجنون حرج
ونزل جدو سحب خالي وهو يفشر ويسب بيه لكون اني چنت اساس المصيبه وأني دخلت للغرفة وهمه صعدوا فوگ أنوب آني جوعانه وگعد أخويه وتقريباً مر ساعه يله نزلت بيبي من فوگ ملابسها مبلله وتلهث
بيبي/ ولچ يمه ألق جيبي ثوبي من البوفيه
الق/ يا لون بيبي
بيبي/ شوف الفطيره شنو عندي عشر ثواب هو عندي ثوبين واحد لابسته وواحد بالبوفيه انطيني ذاك وهذا شري على الحبل
انطيتها ثوبها على گولتها وبدلت وهي تگلي روحي بعد حبوبتچ حمست طاوة طماطة جيبيها وقوري الچاي واكو علاگة ثحاريب خبز جابتها ألي ام عبير خلي نتريگ بگلبي گلت فدوه لعينك ربي ما أخلص من الگدايه شنو الگدايه مكتوبه علينه طول العمر ووضعهم كلش صعب يعني همه مو بس فقره همه جوه خط الصفر 70 سالب جوه الفقر
جبتهن الگالت عليهن وگعدنه ناكل اني وهي وأخويه واخير شي قررت أستفسر منها شلون عايشين
وسألتها/ بيبي اگلچ شبيهم الجوارين وليش يگلولكم ذبوهم بالشماعيه
بيبي / بعد حبوبتچ اليدري يدري والما يدري گضبة عدس لمن نذبهم بالشماعيه احنه شلون نعيش
الق/ ليش بيبي همه شعليهم شلون تعيشون قابل يشتغلون
بيبي/ شوفي بعد حبوبتچ جدچ قبل يشتغل عماله ومن كبر بعد ما يگدر يشتغل عماله بعد وهو مسوي رواتب لخوالچ مال معاقين من الرعاية الاجتماعية اذا يذبهم بالشماعيه يگطعون الراتب الشماعية تستلمه حتى تصرف عليهم احنه ما عدنه راتب بعد شلون نعيش
الق/ إنتوا شنو چنتوا سوون لخالي
بيبي/احنه يوميه الصبح نخليهم بسطح نسبحهم ونحفظهم ونرجعهم للقفص وما يطلعون من القفص الا باچر الصبح وننطيهم أكلهم وهمه بالقفص
ألق/ مرات الواحد يعجز عن وصف مأساة شخص شلون أريد أوصف مأساة بيت جدي آهل أمي ما اعرف أوصف أكثر من هيچ وحتى عذرت جدي من يعصب إما بيبي شگد انقهرت عليها كبر سنها ودمرات أيدها تدل على كبر سنها وتعبها الله يكون بعونها وهي تخدم المعاقين
وطلبت منها تگعد وآني بلشت أنظف وأعدل بالبيت
وبعدني أعدل بالمطبخ سمعت صوت چنت اعرفه عز المعرفه وهذا صوت يگول/ يأهل البيت وينكم
طلعت وشفت عمه لازمه باب الصاله وهي شافتني فتحت أيدها اجيت حضنتها وهي ظلت تبوس بيه وتبچي وآني هم دموعي ويه دموعها
وگتلها / تفضلي عمه
وبيبي صيح هاي ياهو إجى ومن گتلها عمه بسمه ظلت تهلي وترحب وهي بالغرفه وتگول بعد حبوبتچ جيبيها خلي تجي أشوفها
بسمه/ هاي جيتي من مندلي الى هنا بس آني مو وحدي
الق/ وياچ زوجچ
بسمه / لا ويايه سردار البارحه بالليل إتصل بيه وحلفني إنه يجي ويايه حتى يحچي وياچ ومو معقوله يحچي وياچ بالباب
الق/ خلي يدخل وياچ بغرفة بيبي وجدو وبيبي موجودين
وطلعت عمه بسمه صاحت عليه وهو شويه ودخل سردار وهو سلم عليه وبعدها دخلنه كلنه يم بيبي وبعد ما سلموا على بيبي بدت كلامها
عمه بسمه/ ألق اني سمعت من سردار يا بنتي بعدني كل شي ما سمعت منچ احچيلي
الق/ وحچيتلها من هيثم الى تهمتي لسداد الى حملي الى هسه أني متهجوله والطفل مشوه في بطني
بسمه/ هذا الأحداث أكو سمعت بيها من سردار وأكو أشياء ما أعرفها هسه سمعتها منچ آول نصيحة الچ مني وأريد تسمعين هاي النصيحة وتاخذين بيها مو بس سمعين الطفل مشوه شسوين بي وأنتي بالحالتين سداد ما راح يعترف بي ما فكرتي بشنو نظرة المجتمع عن هذا الطفل وشلون راح يعيش بالمجتمع وهو اب ما عنده ومشكوك بأمره وبنسبه وأنتي نفسچ شلون تعيشين حتى تگدرين تعيشين طفل ماما هذا مسوؤلية
الق/ عمه الطفل ما أنزله هذا قراري واذا سداد ما يريده إني أريده ومال عباله سداد انه اذا ما يريد الطفل إنه ما راح يحمل إسمه عندي أستعداد أشتكي عليه بالمحكمه حالي حال آريا أما موضوع العيشه هذا موضوع لازم ينحل ما معقوله راح أعيش عمري كله على الناس
بيبي/ ليش هو الفرخ غير بزرته ورجله فوگ راسه يجي على أبنه بسمه خافي ربچ تردين تموتين فرخ وهو ببطن امه مو الله عاباچ سنين ما عندچ خلفه هسه عبن الله انطاچ گمتي تگولين الفرخ ينزل واذا على اللگمه ترى إذا اكلتي خبز وبصله وضميرچ مرتاح ولأ اكل دجاج واني شايله خطية فرخ برگبتي
سردار/ ألق سداد عنده أستعداد يدفع آي مبلغ أنتي تريدي في سبيل تنزلي الطفل واني اشوف تقبلين بعرض سداد أفضل الچ
الق/ إني بصراحة ما تعجبت غير بس على موقف سردار هو من أشد مناصرين لسداد وموافق على كلام سداد حتى خفت منه
بسمه/ أخذي فلوس أحسن ما تبقين الحمل وبعدين لا حظت برجيلها ولا خذت سيد علي
الق/ ومن شافوني مصره على موقفي
سألني سردار / أنتي هسه شنو تحتاجين گولي حتى النگدر عليه نسوي الچ
الق/ أني كل مستمسكات ما عندي أريد منك ساعدني حتى أوصل لعمي نزار أريد منه مستمسكاتي آني وأبويه واخويه
سردار/ بعيني هسه راح أتصل بالضابط إلي چان يتردد عليه سداد ونسأله
الق/ وأتصل وظل يدگ يم الضابط وما رد على سردار أبد
سردار/ اذا ما عندچ شي هسه نگدر نروح عليه للمركز وهو عسى بحكم هو ضابط يگدر يساعدچ
بسمه/ روحي ويا وآني گاعده هنا منتظرتچ لما ترجعون
الق/ گمت لبست جبتي وشالي وطلعت ويه سردار وصعدت ويا بالسياره وهو ألتفت عليه بعد ما چان يباوع گدامه
سردار/ افتقدتچ هواي البارحه وهواي چنت افكر بيچ وأنتي
الق/ بصراحة چنت تعبانه گبل نمت حتى ما فكرت بشي
سردار/ خلفله عليچ چنت مصور انه مثل ما اعزچ تعزيني
الق/ إني أحترمك ربي يشهد عليه
وظل يسولف الى ما وصلنه للمركز وسألنه على الضابط گالوا عنده اجتماع انتظروا نص ساعة ويخلص
وبقينه ننتظر لما حتى حتى رجلينه نملت ويله فات الضابط واني هذا الضابط شايفته من اجيت ويه سداد من اربيل وسلمني لهذا الضابط وهو يمشي الكل يدگ تحية اله وهو من شافنه سلم على سردار
سردار/ سيدي احنه من طرف سداد آبن خالتي وجايين على الله وعليك
فرقد/ كاكا بعدني ما صار كم ساعه من ودعت سداد
اجاني ابن خالته على العموم تفضلوا بمكتبي
ألق/ دخل المكتب واحنه ورا وبس گعدنه گاله
سردار/ سيدي هاي البنيه كل مستمسكات ما عدها وما نعرف شنو نسوي
فرقد/ ادري شنو قابل تبخرن بطاقة سكن جنسية أبوها اخوها عمها اي احد من اقربائها هذوله هم مستمسكاتهم ضايعه
سردار/ سيدي هي عدها عم واحد ومسجون عدكم اذا تگدر تاخذ اي مستمسك من عنده نكون ممنونين منك
فرقد/ منو عمها اذا يمي هسه انطيك اي مستمك تريده
سردار/ سيدي عمها نزار إلي تهم سداد
فرقد/ عرفته نزار بس هذا مو يمي بالمركز هذا يم نقيب صفاء هسه أتصل بي وهو عسى يگدر يساعد
الق/ ورجع فرقد إتصل بنقيب صفاء وحچى ويا فرقد بس هو أكد انه ما عنده أي مستمسك وانتهى الإتصال بينهم
ورجع گال
فرقد/ شوفي بدل ما تدورون على مستمسك ليش ما إنتي سوين بدل ضائع لكل المستمسك بس لازم يجي شخص بالغ لأن انتي ما بلغتي
الق/ سيدي يعني اذا كملت الجناسي مالتنه يصير أقدم على مود أخويه أسوي راتب أله لكون منغولي
فرقد/ لا حول ولا قوة الا بالله شوفي أنتي مو من حقچ لا سوين معامله بدل ضائع للمستمسكات ولا إنتي تستلمين الراتب لازم شخص بالغ وإذا إجى بعيني اني أكملها اله بأسرع وقت
الق / شكرنا وطلعنه من يمه وآني أحس گلبي مورم ما بقى گدامي غير جدي وهو عبالك چان يقرأ افكاري ويگلي / شوفي اذا يصير جدچ ولي امرچ احتمال الراتب ينزل بجيبه وأنتي كل شي ما تحصلين بحكم هو راح يكون جدچ وصي عليچ وعلى اخوچ
الق/ أدري راح أظل طول عمري تحت رحمة الناس
سردار/ شوفي ألق آني بعد ما اگدر كل يوم آمر عليچ هذا موبايل وكامل من كل شي سيم كارت ورصيد وأتصل بيچ منه
الق/ بس شنو نحچي
سردار/ اتعرف عليچ تتعرفين عليه نحچي بكل امورنه الخاصه وعندي الچ أقتراح وأنتي بعد حره سواء قبلتي او رفضتي
الق/ ما فهمت انت شتريد
سردار/ آني ما احب آلف وادور ألق آني أريد اعقد عليچ واخذچ وبي وحتى اخوچ وياچ واني أتكفل بكل المصاريف
