رواية سداد وبنت العرب الفصل الثاني والأربعون 42 بقلم الزهيريه

رغم أننا نؤمن إن إختيار العقل أكثر 

صوابًا الا انه يصعب التخلي عن اشياء 

اختارتها قلوبنا 

ألق/ مرات تجيك الفرصه بالوقت الضايع وتكون أساساً ما متهيأ إلها ولا في بالك لهذا من عرض عليه سردار الزواج تعجبت بالبدايه شنو يزوجني وهو مزوج 

وانطاني فرصه حتى أفكر وانطاني موبايل  ونزلت يم بيت جدو  وهو راح وعمه بسمه بعدها موجوده سولف ويه بيبي 

واجى جدو وهو يگلي/ هذا زلمتچ ليش يذبچ علينه ويروح تعالي فهميني اخذيني على گد عقلي 

الق/ جدو هذا مو زوجي هذا ابن خالته وآني ما مزوجه 

وهو گتله هيچ لو تخبل 

جدو/ لمن مو زلمتچ شلون ترحين وترجعين ويا شتگول الناس عليه حفيدة جولان رايحه وراجعه ويه زلمه غريب 

الق/ وصاحت عليه بيبي وتگله تعال يا رجال افهمك هو انت شفتهمت 

وهو راح للغرفة ومن شاف عمه بسمه سلم عليها وگعد وهو يسأل/ شنو تفهميني ربيعه تگلچ مو زلمتها وهي تفرفر ويا 

ألق/ وبدت عمه بسمه تشرحله الوضع مالتي وأكبر صدمه اله لكون عرف اني حامل 

جدو / شنو حبله احنه رواحنه ما موكليها أنوب أوكل فرخ  يعني نربي فرخ نغل احنه الناس تگول على بيتنه بيت الخبول ومن چانوا يشوفون امچ وهسه اخوچ يگولون علينه بيت المنغولين هسه شيگولون بيت النغل هذا الحچي ما يصير ربيعه فهمي بنت بنتچ هذا النغل ما يجي وخلي تروح ويه عمتها بسمه وتنزله وما بينه حيل الطلايب 

الق/ ليش إنزله جدو شنو ذنبه اما مال تگولون عليه نغل هذا الكلام ما أقبله من إي آحد عنده اب يجي يسجله بأسمه واذا ما قبل يجي اكو محكمه اجيبه أما منين أعيشه غصبن على أبو يجي يصرف عليه 

جدو / وانتي جايه وجايبه طلايبچ لجولان  وطلع مخبل مثل خوالچ وين تودي لو مثل امچ وابوچ منغوليين شلون بيهيچ حاله هذا رسنه والرس يندس لسابع ظهر 

ألق/ جدو ماكو واحد يختار آهله اذا منغوليين أفضل من غير ناس ما تخاف الله والله شكاتبلي أشوف راح أشوفه  جدو إني أريد تروح ويايه للمركز الضابط گال تگدرين يحضر وياچ ولي امرچ وحتى سوون بدل ضائع وعن طريق الجنسيه نسوي راتب لأخويه يفيدنه 

وهو من سمع اكو بيها راتب نوعًا ما هدئ 

وعدني ثاني يوم يجي ويايه هنا حسيت إنه راح أخلي رجلي على الطريق الصح وبس گام جدو من يمنه وحچيت لبيبي وعمه نسمه على كلام سردار 

بسمه/شوفي ألق هاي اجتچ خوش فرصه اقبلي بسردار عسى وعلى يكون عوض الچ عن سداد 

الق/ شوفي عمه اني بالبداية انعجبت بسردار آول ما شفته بس بعدين من عشت ويه سداد حبيت سداد وبعد معاملته إلي كرهته وفجأة من أهتم بيه سردار حسيت نفسي أميل اله وهسه أخاف منه ما اعرف أحدد شعوري وآني ما أريد بعد أرتبط بأحد طالما مشاعري متذبذبه خليني هيچ لما اعرف راسي من رجلي 

بسمه / انطي سردار فرصه حسيتي نفسچ تميلين اله اقبلي بي حسيتي نفسچ ما متقبلته اگعدي واسكتي 

الق/ عمه هو انطاني موبايل وراح نتواصل والله كريم وبقت يمنه عمه بسمه على ثاني يوم الفجر طلعت من يمنه وراحت على مندلي 

إما اني غبائي ما إله حدود من انطاني سردار الموبايل من اجيت ذبيته بالبوفيه مال بيبي لهذا نسيته والظاهر ما بي شحن هواي لآن طافي وما أنتبهت عليه ألا لمن جدو وبيبي چانوا فوگ بدوامهم الرسمي ويسبحون خوالي وكالعاده عياطهم وصريخهم مسمع الفرع كله 

وندگت الباب طلعت صار سردار بوجهي ومن شافني رفع حواجبه 

سردار/ اگلچ أنتي ليش غالقه الموبايل شلون احچي وياچ عن طريق الوحي 

الق/ أصلًا ما غالقته ولا شفته خليته بالبوفيه وبعد ما شفته 

سردار/ حمد لله هو بي شحن قليل شحني حتى اليوم احچي وياچ بالليل وهسه بلغتي جدچ حتى يجي ويانه للمركز 

الق/ إي بلغته وگال اروح وياچ هسه أصعد اگله 

وعفته واگف بالباب وصعدت فوگ لجدو وبلغته بوجود سردار وگال حضري نفسچ وهسه أنزل 

واني حمدلله شحضر من نفسي شوه هي جبه وشال نزلت لبست الجبه والشال وظليت أنتظر فرج الله لما نزل جدو وهو بدل دشداشته وخله شماغ على راسه وطلعنه وسردار چان گاعد بالسياره صعدنه آني وجدو بالسياره وشي طبيعي سردار لكونه شاب يسمع أغاني شبابيه 

جدو / ابني انتوا شباب هذا الوكت ذوقكم بالاغاني رديء تسمعون أغاني ما بيها معنى أسمع أغاني ناظم الغزالي أسمع القبنچي هاي شنو تسمعوها 

ألق/ وسردار گضه الطريق كله يريد يقنع جدو انه أغاني هذا الوكت هم حلوه بس جدو ما قنع أبد لما وصلنه للمركز ومن دخلنه الظاهر سردار چان متفق ويه الضابط على الموعد لان بس وصلنه وعرف بوجودنه گبل دخلنه لمكتبه وهو هم من شاف جدو گام وگف وسلم على جدو وظل يرحب بينه 

فرقد/ حجي انت تعرف إنه البنيه ولي أمرها هو عمها وطالما عمها بالسجن ويكون داخل السجن بتهمة قتل او أغتصاب او سرقة تسقط الوصايه عنه لهذا لازم تكون الوصايه لشخص ثاني من عائلتها ويكون من الدرجه الاولى بالقرابه يله يحقله يصير وصي عليها هسه گلي انت شنو تعود إلها 

جدو/ افا عليك سيدي آني من أشد الناس الي تمشي على القانون آني جده والد أمها 

فرقد/ العفو حجي بس هذا سياق القانون ولازم نمشي عليه وشنو إلي يثبت هي حفيدتك أريد مستمسك إثبات 

الق/ وجدو طلع علاگه سوده متلفلفه فتحها وبعدها طلع من العلاگه هم چيس وهم متلفلف وفتحه وطلع محفظه مثل جزدان النسوان وطلع جنسيته وهو يگول لضابط / هاي جنسيتي واصدارها حديث 

والضابط أخذها وهو يضحك ويگله لجدو انت هسه احلى من الصوره إلي بالجنسيه وجدو يگول لضابط اني چنت بشبابي البنوات كلها تركض ورايه بس اني بعد هويت ربيعه شلون عليها لفت فوطه بريسم ماكو بنوه تلف الفوطه مثلها 

والضابط بس يضحك في حين آني ما اعرف هو ليش يضحك والحچي اكثره ما فهمته 

فرقد/ شوف حجي هسه انت قدمت شكوى انه جنسية ألق واخوها ضايعات وهمه تحت وصايتك  وهاي الشكوى راح تروح للقاضي وبعد 10 ايام يله ترجعلنه من المحكمه ويكون القاضي موقع عليها وتاخذها وتروح بيها للنفوس وهناك همه بعد يكملوها آلك وتدلل حجي وهسه تگدرون ترحون الله وياكم 

الق/ وشكرنا وطلعنه من المركز وصلنه سردار للبيت ومن نزل جدو من السياره وآني دى إنزل گال 

سردار/ ألق بعد ما اوصيچ شحني وفتحي موبايلچ حتى احچي وياچ 

الق/ وبس هزيت راسي موافقه على كلامه ودخلت لبيت جدو وهو ظل يحچي ويه جدو وبيبي چانت گاعده تنظف بالخضره وهي شافتني 

بيبي / بعد حبوبتچ اني الله گرمني گوه امشي منگعه خوص بالمي فوگ  بالسطح طلعي من المي وجيبي ألي حتى وره الغده احوك كم مكناسه يفيدن بالمصرف 

الق/ وبصراحه آني ما افهم شنو يعني خوص ومن سألتها 

بيبي / شبيچ يا عوبه الخوص من سعف النخل الصغار فوگ بالسطح ناگع طلعي من ألمي وجيبي وتعالي 

الق/ فهمت على بيبي وصعدت لسطح لگيت أكثر من طشت بي مي وطلعت الخوص وگمت أنزل جوه وهي فارشه وصله واني أخلي عليها وبعد ما نزلت كل الخوص 

بيبي/ بعد حبوبتچ سويت مثروده وهاي الخضره لگطتها غسليها وبس جيبي الجدر وتعالي 

واني سويت مثل ما گالت وجبت المواعين وهي فتحت الجدر شفت مي احمر ويمها جدر نايلون للخبز مخليته وطلع الخبز المكسر وذب بالجدر البي مي أحمر وسوت اكثر من ماعون وجدو اخذ مواعين إثنين وصعدهن فوگ وآني وأخويه بماعون وهي وجدو هم نفس الماعون ومن اكلت منه شويه صدگ طيب وگعتله دگ حتى خلصته آني وأخويه وهي صبت بعد الغده غسلت المواعين وسويت چاي وصبيت لجدو وبيبي واجيت گعدت يمها 

بيبي / بعد حبوبتچ ليش ما اعلمچ سوين مكانيس ويايه وهم تحصلين كم فلس 

الق/ بصراحة عجبتني الفكره وبقيت أتفرج عليها شلون سوي وسوت ثلاثة گدامي ووصلت الفكره ألي واخذت منها خوص وسويت وحده بس أيدي ثگيله 

بيبي/ هاي بالبدايه هيچ بطيئه بعدها تقوى ايدچ وتسوين سريع 

الق/ هاي چانت البدايه بس چنت مخليه في بالي لازم الگى شي استرزق منه وخصوصًا آني حامل وجاي طفل بالطريق وقررت بس استلم جنسيتي أروح للمحكمه وأشتكي على سداد بس هسه خلي ابقى هادئه وأشتغل بهدوء بدون ما اگول شي لسردار 

سداد/ صعب من تفقد الثقه وتفقد انتمائك لشخص أو لعائله وتحس نفسك وحيد وإني إحساسي ما ينوصف يعني ضربه بالراس قادره على ان تفقدك صوابك شحال 3 ضربات يعني منا ضرب آريا ومنا ضربة ألق وألي كمل عليه سردار حتى صرت أحس نفسي مهزوز وما عندي ثقه بنفسي لهذا قررت أرجع لاربيل وطز شيصير ورايه في بغداد خلي يصير 

وعرفت من كوجر انه المدير قبل يرجعه لأربيل واني هم قدمت طلب وهو چان معارض على رجعتي لأربيل لأن اني واوزجان الله يرحمه وكوجر أكثر 3 يوثق بيهم وهسه صفينه ولا واحد يمه لهذا ترجيته آنه يوافق أرجع لأربيل وبعد معاناة وافق 

وأول شي سويته انه المحاميه سحر رفعت للقاضي تلتمس الرأفه والشفقه انه يقبل ينقلون روجيدا بمصحى بأربيل كون أهلها كلهم بأربيل وماكو احد منهم في بغداد 

ولازم موافقة القاضي ونظر للحالة الحرجه ألي بيها روجيدا وافق القاضي انه تنقل لأربيل واني بيوم ألي دى ينقلوها وتحت رعاية صحيه اخذت بنتي يبرق وعرضت البيت مالتي يم مكتب عقار حتى يبيعه إلي 

ورحت لاربيل وبعد ما اطمئنيت على روجيدا ودخلوها بالمصحى اخذت يبرق ورجعت يم أهلي لا بعد منو يبقى يم يبرق وظلت أمي تبوس بيه وتبچي  واني چنت تعبان بس سبحت نمت وبعد ما حسيت على شي لإن الطريق متعب 

وما گعدت غير أمي تگعد بيه وهي تگلي گوم اجوي ضيوف يريدون يشوفوك 

سداد/ واني گوه مفتح عين ومغمض عين وأسألها منو اجى 

وهي ما جاوبت عليه أبد وراحت نزلت جوه بقيت اني گوه گمت من الفراش اسحل بروحي سحل سبحت حتى أنعش جسمي وبدلت ونزلت جوه وچانت المفاجأة ما متوقعه لگيت اهل آريا أبوها وأمها 

تخبلت بس گوه لازم أعصابي بس هذا شر لابد منه لازم اواجهم عاجلًا او آجلًا هاي المواجهة 

گعدت مقابيلهم وخليت رجل على رجل بس بطريقة الاحتقار وبده الكلام أبوها/ أبني آني أعرف الحق وياك والغلط من بنتي بس شسوي الصار بعد صار والله كون ما يخلي بنفس موقفي الله يستر على بناتك  الناس اذا سمعت شنگول شنحچي وماكو شي ينضم 

سداد/ اي عساها بنار جهنم شسويلها شنو المطلوب 

أبو آريا/ ابني أريدها من الله ومنك تتنازل عنها وشنو تريد احنه حاضرين وتاخذه من عيونه 

سداد/ شنو انت تحچي من كل عقلك اني أتنازل عن بنتك هاي من شوفني مخبل تسويها الا اشهرها شهيره واخلي الناس كلها سولف بسالفتها اني مو سداد وما تعجبت من اجيت هسه تتوسل بيه لإنه انتوا هذا مستواكم واني هسه رجعتكم لمكانتكم ويله طلعوا بره ما أريد أشوف خلقت واحد منكم لان انتوا مو وجه نعمه 

وعفتهم وگمت وهمه يتوسلون بأمي بس أبويه چان ماكو صعدت فوگ بس شنو اغلي شلون قباحه يريدون أتنازل لو يموتون وبعد تقريبًا ربع ساعة نزلت لگيت أبويه وأمي يسولفون ومن شافني ابويه صاح عليه 

وظل يرزل بيه ويگلي/ ولك صرت بگد المطي شوكت تفتهم ما اعرف ترى سداد أنت تعبتني لا من چنت صغير اني مرتاح ولا من كبرت ارتاحيت نفس وضعگ گلي شلون أتعامل وياك 

سداد/ اعرف على شنو دى تحچي بس هذا موضوعي وآني احله بطريقتي 

رجع ابويه / لك انت غبي ما تفكر غير بس بنفسك 

گالك شتريد احنه حاضرين اطلب منه تتنازل عن كل حقوقها وأولها البنات  وخليها تولي تدري اذا صدر بيها حكم عن طريق المحكمه انها زانيه شنو موقفك من بناتك ذني بس يكبرن راح يكرهنك وساعتها راح يشوفنك مو بس فضحت امهن فضحتهن الهن أتنازل وبشروطك وخليها تروح تشبع بي هاي اذا بقى يباوع بخلقتها واكبر عقاب إلها ترجع لفگر أهلها 

سداد/ أني في وقتها عيوني بيهن غواش كل شي ما اريد اشوف أو أسمع من ناحية آريا لهذا رفضت الموضوع واصريت على موقفي  وعفتهم وصعدت لغرفتي 

واني دخلت للغرفه سمعت موبايلي يدگ شفته چان گوجر واني منا أعصابي منتهيه فتحت عليه خط آول شي هنأني بمناسبة رجوعي لمحافظتي  وبعدها 

كوجر / اگلك سداد قبل يومين من دى أجي لأربيل  تدري المن شفت 

سداد/ المن شفت 

كوجر/  أبن خالتك سردار وويا بنيه صغيره شنو سردار مزوج على زوجته 

سداد/ تعجبت شنو بنيه صغيره يعني طفله ترضع لو شنو الموضوع سألته/ شنو بنيه صغيره ما فهمت عليك 

كوجر/ يمعود تحچي صدگ شنو ما فهمت عليك بنيه چانت ويه سردار تطلع عمرها تقريباً الخامسة عشر سنه 

سداد/ ووين شفتهم 

كوجر/تذكر الضابط فرقد رحت عليه على مود جنسيتي بقت يم نقيب صفاء وهو حضرة جناب نقيب صفاء مجاز وآني أريد جنسيتي لهذا رحت عليه حتى يحچي ويه نقيب ً صفاء وحمدلله طلع صفاء مجاز 

ومن طلعت شفت سردار وويا بنيه بس هو ما شافني لإنه چان ملتهي يباوع على البنيه وسالتك هاي زوجته 

سداد/ كوجر ممكن توصفلي البنيه الچانت ويه سردار 

گوجر / بنيه قصيره وبشرتها سمره وعيونها كبار بني 

سداد/ والبنيه ضعيفه 

كوجر/ صحيح ضعيفه 

سداد/ هاي ألق مصيبة حياتي بس شنو دى يسوون يم فرقد وطبعًا ما معقوله أسال سردار لآنه مليون بالميه ما راح يجاوب احسن حل أسال فرقد وهو يجاوبني 

وغلقت الخط ويا كوجر وأتصلت على فرقد 

فرقد/ هاااا سداد اكو شي صار كم يوم من رحت بسرعه لحگت تشتاقلي 

سداد/ بلا زحمه سيدي سردار ابن خالتي ويا بنيه شنو چانوا يمك