رواية ليتك قدري الأول الفصل الواحد والاربعون بقلم رفل الكناني
طلعت الم بشعري شفت اساور ووجهها مخطوف بوستهه وهيه تبجي وتشهك والجهال جيتو عليه ابوس بيهم واحجي
هلو عمه هلابيكم اساور شكو تره كلبي نخمش عفيه شكو
لزمت ايدي وكعدت تشهك وتضرب عل وجهه
هبه عصام عصاااام طلع متزوج عليه
هاي الكلمه مثل السهم وطب بنص كلبي راسن تذكرت حركت كلبي من سلام تزوج ومر شريط ذيج الايام كله كدامي
نهائيا متشمتت واني أتذكر اساور شسوت بيه لان كل إنسان ملجوم ميحس بلجمته ال الملجوم مثله واني حسيت بااساور واتخذتها الحضني وهيه مفرفحه
اساور كولي يالله شتسوين بعد صارت اسكتي خطيه جهالج يباوعولج
هبه حرك كلبي والبارحه جابهه للبيت يكولي تعيشن سوه
ردت انتحر الا شويه هبه البيت سويته عل ايدي وكلشي بي حطيت بي دم كلبي هيج يجازيني
وتالي شسويتي
عفت البيت وطلعت وهاي الليله المرت عليه مامرت على اسلام ومالكيت غير رجلج ينقذني
بارق
اي عفيه خل يساعدني اني اريد اطلك
عزززه اساور انتي شتحجين والجهال
طبهم مرض اخوج مخله خط رجعه واني ماتكدر ابقى وياه وهو متزوج انوب بيتي يبووووو غير اطك
عل كيفج موهيج البارحه اتزوج اليوم تطلكين هاي وين صايره
ولج ياالبارحه الله ليعلم شكد صارله واني نايمه ورجليه بالشمس
اووووف اساور شكلنه لعد عصام من زمان مايلفي بلبيت وانتي بيت اهلج ويا مه امي نصحتج وانتي ماكو
اي اي صخام صخمني وصخم اهلي هسه يكلولي ارجعي
هدي نفسج هدي والله كريم
كمت رحت جبت مي وقدمتلهم وهيه عينهه عل ركبتي
تباوع الآثار وتفرك بديهه وترجع تباوع عل بيت
صاح بارق: هبه تعاي الجهال كعدو
كالت عفيه حاجيلياه
اصبري اساور ارتاحي هسه
رحت عل الجهال لكيته يمهم سلني عليها سولفتا
كال: هبه اني عصام اتخبل منه هاي وحده اثنين شغل للكرايب ماشتغله لان لازم تصير شكالات ونتخارب اكو الف محامي الا اني وإذا على التكاليف تره ميحتاج شغلتها بسيطه تتطلك وتأخذ نفقه وانتهت عل هاي اكوم اوكف ويه اخوج بالمحكمه تره اسمه نسيبي كدام العالم هاي بطرانه اكولج عوفج منها اني راح اروح لبيت اهلي هم اشوف امي وهم اخاف تبقى حتى تأخذون راحتكم
اي بس لاسبحت ولاتركيت
عادي حبيبتي هناك عود اسبح وتريك بس لهي الجهال بين مااطلع
تمام
والله شويه وكومتهم غسلتلهم ودخلتهم يبوووو حمت ااااااساور مو شلون مجان كامت تحضن وتبوس بيهم
ولا عبالك ذوله الجانت تكفخ بيهم شوف الدنيه شلون دواره بعدين سلتني عل بارق كتله طلع عنده شغل وبلغتها كلامه بوزت ورادت تروح بس كلبي منطاني يبقون جهال اخويه والدنيا ظهر وحاره جلبت بيهم عل غده وبقت واني كمت بسرعه سبحت وطلعت بلشت بلغده وهيه تفتر بلبيت تخبلت كله حديث وجديد وغرفة الجهال والالعاب جهاله سووهه خريطه وهيه تمشي ودكول لوهيج العيشه لو متنراد عينك عينك حتى البواري تفتح بيهن وتسد وتكول: حتى ميكم يختلف
استغفر الله حتى المي مخلص وكل شويه تكب العيطه عل الألعاب ويوسف مجلب بيه الووو بابا عود خابري بابا علمود يشكيله منهم واني اكله عيب ماما خطار لحد مكملت الغدا وتغدينه وكملنا وكسر الجو شويه الا راحت اشو بين ملميت البيت واجه بارق توني كعدت ودنسولف عل عصام واساور ومنحس غير الباب مو ندك لا نهجم كام بارق فتحه ويهجم عليه عصام
انت وااااحد متستحي شنو تحرض مرتي عليه ودكولها شغلتج بسيطه تطلكين وتاخذين نفقه
اااااااااحترم نفسك انت بيتي ماريد اهينك وانت خال الجهال افتهم الموضوع قبل متحجي مرتك اجتي تطلب مساعدتي تريد ترفع دعوه عليك ولو اني مثل مدكول جان جرجرتك بلمحكمه وأخذت حق وحده موكلتني بقضيتك بس مسويتهه وهاي اختك شاهده
بارق عصام عيني منا العالم دخلو جوه وسدو الباب خل نتفاهم
عصام عيني ابو محمد تره مفتهم غلط والله العظيم اساور طلبت مثل مكلك بارق وهوه رفض وهاي كلمة التنكال هوه كال شتريد تسوي مثلن غير تطلك وتأخذ نفقه اكو غيرها وره وكفت المحاكم
اااااااني اعلمها بسيطه
عافنه وراح وبارق كال وره
طاح حضك اي والله والله لو ما الخاطرج جان شمرته من
فوك الطابق ودفعت فصله عل قندره
سكتت شريد احجي اخويه عايل ومتهجم عليه بيته ومرته الحقيره مغزر بعينه الضيافه وشلون مساعدهه راحت حقرت عليه شكد كلبه ومتصيرله جاره انوب خجلوني ويه رجلي بس هوه محسسني وترك الموضوع بيومهه خلص اليوم بلبيت ويه الجهال رغم كل الصار بس مرتاحه لان رجعت الحياتي الهادى
ومرت الايام بيت اهلي مارحت وهديل تراسلني مااجاوبهه واساور اسمع من امي بعدها زعلانه وعصام جايب مرته الثانيه عل امي مسلمه عليه د كول امي عنده منها ولد الله اليعلم شكد صار متزوج هذا نتيجت اهمال اساور وروحاتها بلايام ولاسابيع يم اهلها الزواج مثل الموت تعدددت الأسباب والموت واحد والزواج هم صوج هيج وصوج هيج وبلنهايه هوه تزوج وانتهى
ايناس اليوم عزمتني عل خطوبة قتيبه سوه لبراسه وخطب بنت خاله وماعرف شلون لان علاقتي بيناس من وراه مشاغل الحياه صارت عل كد السلام فحضرت نفسي لبست بشت اسود طلبته من بيج عل فيس طبعا بعد متوسلت بارق وهوه استلمه منهم ال قنع جان اسود وتطريزه كرستال فضي خليت وياه مكياج هادى وبرمت شعري أما بارق اشتره طقم اسود رهيب قاط ويصير وياه لفاف عل كتف من لبسه وكفنه سوه عل مرايه حسدت نفسي عليه وصليت عل نبي يوسف هم قاط ونور بدله وردي مدنفشه وهيه مدعبله طلعت تجنن وبارق يكزكز عليهه وكل شويه وكال شلون اني منين الكاه
من البنيه من امها هههه كملنا وطلعنا الشال بس خليته عل راسي وهوه تخبل اجيت ابجي من كد ماحجه
ليش ملفيتي اني صوجي صار كم يوم مستخطيج وممشوهه ركبتج اني اعلمج منا وهيج اليوم بليل اصبري اني اورمهه بساعتهه الا تلفين الشال
بارق بارما شعري والله يخرب بعدين احنا بسيارتنه منو راح يشوفني
دخل المح أحد يباوعلج ال اهجم الخطوبه وانتي السبب
شفتك وشفتني اهجم اكتل انعل اشعل
هاااا ارجع تره ماعندي مانع لو ارجع لو اكوم اقسم انتي ختاري
عفيه ارجع ولاتقسم تره صرت منحرفه من وراك
اسكتي لعد هاج كلينكس خففي الحمره شويه
عفيه رجعني حتى للخطوبه ماروح
اي بعلي امشي أخطب بيج بلبيت وعرس هم
بارررررق
ااااااااااااااااموت عليج
عزه صوتك وصلنا
عاد نزلنا وقتيبه بالكراج واكف واحنا دخلنا بارق سوه لقطه ضحك الكل جانو واكفين ناس بالمطبخ وناس بباب الاستقبال وهوه كابل قتيبه ولزم الفاف ال عل كتفه منا ومنا ويهز بجتفه ويكوله :
عففففففيه عليك مثل عمك مو زلمه وانعد عل الزلم اذا مااخذ الحبيته
فدوه اررروحلك عمي بس خل ينطوها وتصير ال اركص
وياك اليوم للصبح
منووو مينطيكياه لك غير انعل والديه
جنت أضحك عل سوالفهم وختفت الضحكه من شفت عمتي كاعده بكرسيهه ياربي شوف الإنسان شكد قوي وبلحضه يوكع بعد ميكدر يكوم وشكد عمتي قويه قبل بس هسه منضرها يكسر أكبر خاطر ولان بيبيت الجهال ولخاطر بارق توجهت عليه بوستهه وشلت الجهال الحضنهه باستهم وهيه لايد ولا رجل مجرد دميه وكاعده بارق يباوعلي ونضرته بيهه رضه بعدين رحت سلمت عل بقيه ونتضرنه الكل ونجمعو ومن دنطلع اجوي حذام وهديل سلمت عليه وسلمت عادي بس بثكل صعدنه بسيارتنه وحذام بسيارة خلدون وهنا بارق حكمني ألف الشال بعد مابيها مجال نفذت مثل مكال
الا ارتاح وصلنا وشفت البنيه حقه قتيبه صغيره وحلوه وايناس مبوزه : شبيج عيني ام العريس
يمعوده والله فرحانه بس خايفه قتيبه نسخه من عمه بارق وهاي شوفيهه شكدوتته والله اخاف يخاربني ويه اخويه
يمعوده شجابه عل بارق حبيبتي النسخه الاصليه بس عندي والباقي كله تقليد ومدام يحبها لاتخافين
هاااا هبه لازم بارق ينحمل وجنج هاهيه قنعتي بي
اروحله فدوه شبي لعد الله عليج مومتغير مشفتي اليوم شلون منطلق وفاك العكده
اي والله كلناهه اني وأحلام كلنا هذا بارق لو غيره
وبعد وبعد عيني الحب كلشي يسوي
يمه منج قنعتيني
شويه وكالو هلهلو وام رقيه مقصرت وسوو المراسيم اخذوهه وره الباب عقدولهم واجه قتيبه كعد يمهه بعد شويه ويطير والضحكه شاركه الحلك شاورت ايناس
وينه نسخه بارق هذا راح ينام بحضنهه
اي وعلي اشو إبني من شافههه فهه
هاااا شكلنه
وين وصاحو علينه طلعنا لزمت جهالي وجانت هوسه مال زلم بل باب بارق من شافنه من بعيد سلم واجه بتجاهنا فتح السياره من السويج واشرلي اصعدي واجه صعد شخط السياره ووكف براس الفرع
هي وين دصبر بعد مطلعو شكو ومكفتنه هنا
ادري بس هناك هوسه ننتضرهم هنا
هسه متخلينه نتفرج حرام
راح الخمج عل حلكج شتتفرجين كله زلم بنت ال
سسسسستوب والله سكتت
عزه هذا ميتقارش خل اسكت احسن عاد مشت السيارت وصرنا سوه نمشي ونص الطريق طلع ايده من الجامه اشرلهم عل جسر ليطلع عل بيتنه يعني رايح للبيت وفر السياره بتجاه بيتنه وبعدين غير رايه كال اكولج اني ماخذ اجازه وعندي الج مفاجه
شنووو
هسه تشوفين
