رواية سداد وبنت العرب الفصل الثالث والأربعون بقلم الزهيريه
كوني انتي حتى وان لم تعجبي احد
ان كنتي راضيه عن نفسك ذلك يكفي
فأنت أجمل حين تملكين الثقه بنفسك
الق/ مرات قلة المال نعمه من الله ورحمه لان مو كل شي يشترى بالمال أكو أشياء لو تدفع مال الدنيا كلها ما تگدر تحصل عليه واني حمدلله قلة المال متعوده عليها قابل چنت يم نزار ونضال تلافه شو حمدلله گاضيتها كلها گدايه شنو الجديد بس اللهم ربي بس من رحت يم سداد ارتاحيت شويه بس من رجعت يم آهل أمي صح همه حالتهم ضعيفه بس ارتاحيت
وبديت أسوي مكانيس ويه بيبي واني اغسل ملابس وآني أنظف البيت لان بيبي تعبانه بهيچ حاله نوعًا ما جدو شويه سكت عني واني أثناء هاي الايام 10 الي حددهن الضابط حتى ترجع معاملة البدل الضائع من المحكمه أول يوم من رجعت من المركز وچان ويايه سردار وجدو بالليل شحنت الموبايل وما يقارب الساعة 10 ونص أتصل بيه سردار ومن جاوبته
سردار/ شلونچ ألق شخبارچ مشتاقلچ والله
الق/ هلو انت شلونك آني بالنسبة عني بخير حمد لله
سردار/ شبيچ الق ليش احسچ دائمآ حذره مني
الق/ مو مسألة حذر سردار بس اني نفسيتي تعبانه ومنا أني حامل تخيل النفسيه شلونها
سردار/ فكرتي بعرضي عليچ وصدگيني خاف عبالچ من نزوج تعيشين ويه امي وهلات لا راح اقسم البيت ونص الچ والنص الثاني لأمي وهلات وكل أثاث جديد وعادي عندي جيبي اخوچ وياچ ما عندي مشكله
الق/ شوف هي مو مسألة مغريات بالعروض هذا زواج لازم الشخص يكون متأكد من نفسه لإنه هذا عمر كامل راح اگظي وياك وآني حاليًا أكون صريحه وياك ما متهيأ للزواج أبد وعندي أستفسار منك وإذا أشوفه تدخل مني لا جاوب عليه أبد
سردار/ تفضلي اي سؤال آو استفسار تگدرين تسألني هذا من حقچ
الق/ يعني انت من مقرر تقسم بيت أهلك وتزوج اكيد راح تبلغ أهلك لو شلون
سردار/ اكيد أني بلغتهم بالموضوع قبل لا افاتحچ بالعرض إلي عرضته عليچ
الق/ ترى حرام عليك خطيه هلات شنو ذنبها تزوج عليها وهي شفتها شلون هجمت عليه على مودك
سردار/ أنتي فاهمه غلط هلات موافقه على زواجي ومن نعقد بالمحكمة تجي تبصم بالعشرة على زواجي گدام القاضي
الق/ اگلك شنو موافقه هي هجمت عليه چانت راح تگطعني شنو موافقه على زواجك
سردار/ يا بنت الناس اني طالبچ بالحلال وگتلچ على زوجتي موافقه واي مشكله ماكو اما شنو السبب إني احب احتفظ بالسبب لنفسي هذا شي خاص بيه
الق/ أنوب من گلي هيچ وگف عقلي على موضوع هلات شلون موافقه على زواجه وانتهى الإتصال بينه بعد ما لحيت عليه اعرف السبب وهو عصب ونهى الإتصال وبعدها الليالي كذلك ما يجاوبني على أسئلتي
وباليوم العاشر إجى علينه سردار من الصبح وطلع اله جدو وعزمه يدخل للبيت وجدو يصيح جيبي چاي ألق
وهو احنه نخدر الچاي وجدو يگول النه تشربون بس كوبين باليوم حتى لا يخلص الشكر والچاي أصلًا نشتري الچاي وجدو من النوع البخيل يعني حتى من الناس جيب النه حاجة يگول لا تاكلوها كلها خلوا منها الباچر
اجيت أريد اصب الچاي ماكو شكر وهو يضم الشكر بصندوگ مربع ويقفل عليه لازم أروح يمه واگله الشكر وين ومن رحت يمه وسألته وخطيه يسوي روحه متفاجئ انه دى اسأله وحتى يتخلص من انه يقدم شي لضيف يذب الصوچ بينه
جدو/ هاي بعدچ لسه ما صبيتي چاي لاخوچ سردار يله هو هم بعد ما بقى وكت خلي نروح دوائر الدوله متعبه
الق/ وگام جدو وسردار يباوع عليه واني عفته ودخلت لبست جبتي وشالي وطلعت وركبت وياهم والطريق كله جدو يسولف على ايام قبل وسردار عينه بالمرايه يباوع عليه بس آني ما اهتميت أبد ما أعرف صرت ما أهتم بسردار أبد وقررت أرجع الموبايل أله
وصلنه للمركز وچان الضابط ما موجود ومن أتصل عليه سردار ما اعرف شنو گال لسردار بس بعدها اكو ولد أجى فتح باب مكتب الضابط وطلع النه الفايل وانطى النه واخذنا ورجعنه للبيت ومن وصلنه نزل جدو
سردار/ اگلچ أنتي شبيچ گالبه خلقتچ عليه ودورين حجج گولي ما أريدك وفضيها
الق/ اني جاوبتك من البدايه سردار مستحيل اني بعد راح اتفرغ لطفلي ولبيت جدي فقط والموبايل انتظرني هنا راح أدخل أجيبه الك واجي
وعفته ونزلت ودخلت للبيت اخذت الموبايل وطلعت ما لگيته إتصلت بي بس ما جاوبني واني هم عفته ولگيت بيبي تحوك مكانيس ومسويه مجموعه واني ساعدتها
بيبي/ بعد حبوبتچ هسه تجي أم رفعت تاخذ المكانيس لميهن بگونيه وحضريهن
الق/ بيبي أنتي منين جيبين الخوص شو البيت صغير وما بي ولا نخله
بيبي/ بعد حبوبتچ ام رفعت عدها أقاربها بالعرب همه يجيبون إلها واني احوك إلها وتنطيني شغل أيدي أحسن ما أظل بذلة مدت الأيد للجدچ يوم الراتب ينطيني وبعدها أبد ما ينطيني الى ما يجي الراتب الثاني
الق/ گمت جمعت المكانيس وخليتهن بگونيه وللعصر اجتي ام رفعت وهاي مثل كونه گبل تدخل للبيت وشافتني بالمطبخ ويه بيبي وظلت تسأل عني
وبيبي جاوبتها انه أني حفيدتها ومطلگه واجيت گعدت يمهم وظلت تسأل أسئلة هواي وبيبي جاوب على سؤال واحد وتعبر عشره ما جاوب عليهن وبعدها راحت
واحنه عبر يومنه عادي وظلينه لليل اني بيبي نحوك مكانيس الى ما تعبنه ونريد نام گمت شفت الموبايل لگيت سردار متصل هواي واني رجعت أتصلت بي وهو جاوب استلمته
الق/ اگلك ترى دى احچي عربي خلاص بعد إي تواصل وياك ما أريد وبعد لا تجي سردار نهائيًا
سردار/ اگلچ هذا كله لكون ما جاوبت على سؤالچ بخصوص هلات ما اصدگ ابد بس گولي حنيتي لسداد هو انتن النسوان ما اعرف ليش ما تحترمن الي يحترمچن وتحترمن وتركضن وره إلي يحگرچن
الق/ صدگ فور دمي جاوبته/ اني إنسانه تافهه إني أركض وره واحد حاگرني مثل ما تگول تعال أخذ موبايلك وراح أغلق الجهاز
وبس نهيت الإتصال غلقت الجهاز واني تعبانه گبل نمت حسيت ثاني يوم على جدو وهو يصيح ويريدني اگعد وبس غسلت وجهي وبدلت لأخويه واني هم لبست وطلعت لگيت سردار واگف بالباب وچنت أريد أرجع أدخل للبيت بس جدو صعد بعد لسياره اضطريت أصعد اني هم وأخويه
واخذنه للجنسيه وبعد تقريبًا طلعت اروحنه يله كملت واستلمناها وهذا چان اول خيط بيدي ألزمه وبعدها رجعنه للبيت وآني چنت قبل لا اطلع أروح للمعامله خليت الموبايل بجنطتي لهذا خليت الموبايل على الدشبول مال السيارة ونزلت
وآني دخلت يم بيبي لگيت ام رفعت
گالت / حبيبه آني أريد اگلچ شي بس مستحيه من عندچ
الق/ گولي خاله على شنو المستحى
ام رفعت/ اني عندي الچ شغل تقبلين بي خيرًا على خير ما تقبلين بي براحتچ جيرانه صيدلانية وتطلع من الساعه 4 العصر لساعه 10 بالليل وعدها بنيه عمرها سنتين ونص بس تحير وين تخليها عيالها ما يقبلون البنيه تبقى عدهم وأهلها بعيدين عليها وظاله حايره تگول انطي 200 آلف بالشهر الي يبقي بنتي يمه وتريد ناس ثقه شتگولين تجيبها يمچ هذا الوقت لو ما تقبلين
الق/ بصراحة عجبتني الفكره والسعر كلش زين وهو آني إلف دينار ما أملك انوب 200 الف بلغتها بموافقتي وراحت ام رفعت وبعدها تعجبت ليش تخليها عندي وآني أخويه منغولي وخوالي مخابيل ما تخاف على بنتها يمنه
بس يگلك اذا عرف السبب بطل العجب وعلى ثاني يوم العصر اجتي ام رفعت ووياها بنيه كلش حلوه وكشخه وهي طلعت الصيدلانيه واتفقت ويايه ونزلت بنتها من السياره وعرفت ليش جابتها يمي لان البنيه هم منغوليه وامها طلعت 200 إلف وانطتني وگالت بعد كل شهر بتاريخ اليوم انطيچ القسط ووياها جنطه مخليه بيها حفاظات وحلويات وحليب وملابس لطفله وراحت وهي توصيني على بنتها
وطبعًا ما انسى جدو اذا شاف هاي البنيه شلون لهذا أتفقت ويه بيبي اگله البنيه تنطيني أمها عليها 50 آلف وانطي 25 الف وعلى أساس 25 الف الي حتى لا يأخذ الفلوس كلهن وبالفعل سويت مثل ما گالت بيبي وهو من انطيته 25 الف فرح بيهن وسكت وآني الباقيات ضميتهن وقررت بعد أركض على راتب لأخويه ولكون اني ما بالغه راح يصير جدو اليستلم الراتب وهم اخذ منه أحسن من الماكو ومن بلغت جدو صار عنده عيد
واني چان هدفي انه خلي جدو يستفاد حتى نبقى يمهم
وحتى من ارفع قضية على سداد ما يحچي جدو أبد لكونه مستفيد من عدنه أني وأخويه ومر على وجودي يم بيت جدو شهر ونص وصار عليه 4 اشهر وأسبوع وهذا الوقت كله سردار يتردد على البيت بس يريد يحچي ويايه بس ما يگدر لان جدو موجود لهذا يشوفني بس من اجيبله الچاي وأسلم عليه وأطلع
واني هاي الصيدلانية رغد الله جابها الي رحمه من عنده من عرفت ظروفي صارت شكو ملابس عدها مال بيت او طلعه جيبها الي اكثرهن جديدات حتى مكياج والراتب أصرف بي على أخويه وبيبي والباقي أضمه وجابت إلي موبايل بالقسط وگالت اني كل شهر اگطع
جزء من راتبچ الى ما يسدد سعره واني مكنكه على جيرانه
وهاي التطورات مال الملابس ما أهتم إلها سردار بگد ما تخبل من شاف الموبايل بيدي من دخلت دى انطي مي وحاول هواي إنه انطي رقمي بس خلاص بعد ما أريد أرتبط أو اخذ واحد مزوج من زوجته وأولاده وبالإضافة صرت اي شعور أتجاه سردار ما عندي ما اعرف لكون منشغله وحامل ما آلي خلگ لكل شي بس ألي متأكده منه انه اي شعور أتجاه سردار ما عندي
إما حملي ذبيتها على الله ويومية اصلي بالليل وادعي من رب العالمين آنه يرحمني برحمته وما اريد ينشلع گلبي بالطفل ورغد صارت تنطيني مقويات وفيتامينات وشگد لحت عليه حتى أروح للدكتوره بس ما قبلت لأنه اخاف خليتها على الله وهو أرحم بالطفل من عندي
وقربت أخلص الشهر الخامس وبقت أيام وأدخل الشهر السادس وبيوم الصبح كالعادة الملحمه مال تغسيل خوالي فوگ بالسطح والعياط والهرجه وسمعت الباب ندگت ومن طلعت للباب فتحتها صار گدامي سداد
سداد/ مرات اكو شي يصير صدفه يقلب الموازين 180 درجه إني من إجى كوجر وگلي شفت سردار ويا بنيه وطلبت منه يوصفلي البنيه هاي مواصفات ألق بس آخر مره من رحت بيها لبيت خالتي وسئلت على ألق خالتي گالت راحت وما ندري وآني اعرف خالتي ما تكذب أبد بس الظاهر سردار بعده عنده تواصل وياها والمشكله مو هنا المشكله انه كوجر گال شفتهم بمركز الشرطة يعني شسوي بمركز الشرطة غير تريد تشتكي عليه وبمساعدة سردار
ومن خطرت هاي الفكره على بالي تخبلت بوقتها إتصلت على الضابط فرقد وآني من سألته ما انتبهت على نفسي گد ما چنت معصب وارجف أنوب حظي الأغبر چنت من أريد فرقد 100 مره اتصل عليه يله يجاوبني بس هاي المره من اول دگتين رد عليه ومن سألته على سردار والبنيه تخبل فرقد والغلط من عندي لإنه ما منتبه على نفسي شلون احچي ويا
فرقد/ كاكا سداد أحترم نفسك هواي احترمتك من تحچي اعرف انت ويه منو دى تحچي إني فرقد حباب واذا ما تعرف فرقد منو وتتعدى حدودك ويا احرگك فهمت وآني بحكم شغلي ما انطي أي معلومه فهمت وأنت بصفتك شنو تسألني
وغلق الخط بوجهي ما عرفت حجم خطئي الا من رجعت اتصلت بي ويفصله ظليت ألوم نفسي هسه شلون أعرف آو افتهم شنو فلم سردار والق ومن الشوطه اتصلت على خالتي مومه وهي ردت عليه بسلام ثگيل
مومه/ هلو سداد خير اكو شي
سداد/ خاله من اجيت يمچ وسألت على ألق گلتي راحت من يمنه وهسه سردار يفتر وياها بالمراكز حتى تشتكي عليه اني بس أريد اعرف سردار شنو مصلحته وهيچ يركض الها
مومه/ شوف سداد أنت اساس المصيبه وانت الجبتها بس مال سردار يزوج ألق لو يسجل أبن ألق بأسمه هاي الا ما رايد روحه سردار تجي انت تحير بمصيبتك وغلقت الخط بوجهي
ظليت صافن شنو يزوجها مخبل هذا بنت ليل شيزوج منها وبوقتها ردت بس اعرف بيتها وين ما عرفت
هيچ نماذج أتعامل وياها بس بالفلوس
إما آريا هواي اجوي يتوسلون في سبيل بس أتنازل عنها وآخرها أبويه ظل يحچي عليه في سبيل أعفي عنها لخاطر البنات وقررت أتنازل عن اريا وطلبت من أهلها أنه تتنازل عن البنات وحتى شوف ما بناتها
واهلها وافقوا وأني هم نزلت لبغداد وويايه كوچر رحت بالبدايه على ايد المحاميه وقعتها على تنازل عن البنات
اما بيتي عرفت انه جايين مشتريه عليه
وبعت البيت ومن رحت على خالتي مومه وصح هي زعلانه مني بس گلبها طيب اول ما دخلت لبيتهم ظليت ابوس أيدها وهي جر نفسها الى ما رضت عني وظليت اسولف وياها وإني اسأل على ألق واجى سردار صار گدامي
سردار/ نعم سداد اكو شي شكو جاي يمنه
مومه/ انچب سردار هو جاي عليه مو عليك هذا بيتي
سداد/ اي جاي على خالتي وبنفس الوقت اسالك شكو تركض ويه ألق بالمراكز شنو حتى تثبت أصل ابنها
سردار/ بنيه ما عدها احد ما بيها شي إذا ساعدتها واذا على الحمل البنيه نزل حملها وأنت بطران جاي تسأل عليها
سداد/ كذاب بعدها حامل
سردار/ اني جاي اگلك البنيه سقطت الحمل مالتها روح نام رغد ماكو طفل بعد
ملاحظه/طبعًا هواي سئلتوا على تشبيه لسردار وشعجب ما نزلت تشبيه اله
