رواية سداد وبنت العرب الفصل الواحد والخمسون بقلم الزهيريه
قد تبكي وهذا حقك
قد تحزن وهذا حقك
لكن إياك ان تكسر
الق/ من تكون مسوي شي وماتريد شخص محدد يعرف بيك انت مسوي هذا الشي ظل مثل المهدد تخاف لا بيوم يعرف وهذا چان حالي ويه سداد ومن عرفت انه جيهان سمت أبني أيليا بصراحة ضجت ومو لكون چان اسم ابنه من زوجته الأولى لكن ضجت لآنه لكون لو عرف سداد بوجود أبني عباله إني سميته أيليا حتى استعطفه عليه باسم ابنه الأول
وبين علامات الانزعاج على وجهي
سردار/ شبيچ ترى الاسم الأنسان لا يقدم ولا يأخر يبقى إنتي وتربيتچ اله ولا تخلين غير هذا الشي في بالچ
رغد/ يمعوده انتي نفسه ومو زين عليچ تنقهرين هو أسم المهم اتمامت الخلقه
الق/ گولوا سكتوني سردار ورغد من ناحية الاسم وجمعت الأغراض وراح سردار يستلم الطفل من الخدچ وطلعنه من المستشفى وابني على ايد سردار
وأني صعدتني رغد بسيارتها لآن مو عاليه مثل سيارة سردار وسردار خله أبني بحضني وفرحتي بي ما تنوصف ورجعوني للبيت ورغد اخذت من أبني وانطته ونزلتني من السياره ودخلتني للبيت وما أوصف فرحة بيبي من شافت الطفل خطيه ظلت تبوس بي ونمت بالفراش آلي فرشته ألي بيبي وسردار بقى شويه يم جدو وبعدها راح وكذلك رغد هم راحت وبقيت آول 3 ايام بيبي معتنيه بيه وبالطفل وبيوم الثالث گعدت ماكو الطفل فزيت وطلعت أركض من الغرفه
وبيبي وجدو ماكو أريد اصعد فوگ بس أخاف على عمليتي ظليت واگفه يم الدرج وأصيح بيبي جدو بس جواب ماكو ظليت الوب طلعت للباب البره لگيته مقفول وطبعًا هذا جدو يقفله خوفًا على خوالي ظليت حايره وما طولت حيرتي بعدني چنت الوب على أبني ودخلوا جدو وبيبي
وخطيه بيبي من النوع العايشه على القديم وهي إنه ضامه ابني جوه العبايه مالتها واجيت بسرعه وبلهفه وسألتها لبيبي/ وين چنتوا وشكو ماخذين الطفل
بيبي / ولچ أخذنا طهرنا يم المضمد آبو خالد احنه عاداتنا وتقاليدنا بيوم الثالث نسبح الطفل واذا ولد ناخذه نطهره واذا بنيه نسبحها وناخذها نزرف أذانها ونخلي بيها تراچي ذهب وإذا الامكانيه ما ساعد نجيب تراچي ذهب نخلي خيط
الق/ وليش ما گتولي راح تاخذوا تطهروا وبعدين وين اكو مضمد مفتح من الصبح
بيبي/ جدچ گال عوفيها نايمه ولا تگعديها هسه بس تعرف راح نطهر أبنها ظل تعوي وبعدين المضمد ابو خالد من أيام ما طهرنه خوالچ هو نتفق ويا قبل يوم من الطهور ونروح عليه من الصبح نلگاه مفتح
الق/ عزززززه هذا مطهر خوالي هسه تلگي مخرف خرب حظي دى اگول وين اكو واحد يفتح من الصبح طلع هذا موجود من زمن ما چان الطهور عض
وبيبي ظلت تضحك عليه لكون گلت الطهور عض وتگلي / انچبي انچبي ابو خالد أيده عافيه على الجهال انتي شمفهمچ
الق/ وحق الله اذا صار بأبني شي إلا اروح أشتكي عليه بالمحكمه واسجنه حتى بعد لا يأذي طفل
واخذت أبني منها ودخلت وهو أصلًا مفتوح ما مگمط بس رابطين رجله تخبلت عليه من شفته بحيث گمت ابچي عليه ما اعرف لكون هو ابني بچيت عليه لأن اني من النوع ما أتأثر گد ما مرت عليه مصايب
وسهرنه ويا ذاك الليل گد ما بچى من الوجع وباليوم الرابع وحدود الساعه 10 ونص الصبح چنت ارضع بأبني من دخلت يمي بيبي وهي تگول تفضلن عيني هذا بيتچ اذا ما نشيلچن فوگ الگاع نشيلچن فوگ روسنه
أنتبهت على الدخلن وراها چانت مومه وجيهان واجني بوسني واخذن أبني مني وهن متعجبات شلون مطهري ورجعت بيبي تعيد عليهن عاداتنا وتقاليدنا
جيهان/ سبحان الله نسخه طبق الاصل من أيليا الله يرحمه
مومه/ غير اثنينهم من نفس الاب حمدلله على خلقته الكامله
جيهان/جبت ويايه جنسية سداد اخذتها من محفظته بدون ما يدري وانطيني جنسيتچ والعقد حتى أجيب الچ نسخه من البيان واني هنآك بأربيل كل مره أروح للنفوس أشوف اذا البيان واصل حتى إتصل بيچ وتجين ويه سردار نسوي اله جنسيه
مومه/ شوفوا اني چنت ضد سداد بكل إلي سوا ويه ألق
بس غلط تخفون وجود الطفل عن سداد هذا غلط
الق/ آني اخفي وجوده لان تعرفون شنو سوه بيه هسه اذا عرف يموته لأبني ذمه برگابكم ما مبريين الذمه ليوم القيامه الي يگول سداد خلونه بعيدين عنه
مومه/ آني مره نصحت سردار وگتله أبني لاتزور توكيل وزوج ألق وسداد بس هو ما سمع مني وهاي نتيجتها ومن هسه اگلچ وصلي خبر لسداد خلي يعرف أبنه إجى للدنيا احسن ما يعرف من غيرچ وساعتها اذا عرف من غيرچ لا تلومين إلا نفسچ سداد اني أكثر وحده تعرفه اسمعي نصيحتي أحسن الچ
الق/ اعذريني خاله ما أريد خلينه هيچ لا أريد سداد يشوف أبني ولا يعرفه
وحسيت أنه مومه زعلت بس ما اهتميت إلي يزعل خلي يزعل ما يهمني وجيهان چانت ما مقصره جايبه إشكال وألوان من ملابس لأبني والي ومسواگ ومن دى يطلعن مومه وجيهان كل وحده منهن خلت فلوس جوه مخدة أبني وطلعن وهنه يوصني آي شي أحتاجه إتصل بيهن واني انطيت جنسيتي لجيهان حتى تكمل البيان من المستشفى وجيبلي نسخه من البيان
بس اني خلاص قررت بعد أعتمد على نفسي و أربي أبني وما اعرف من خيبتي بحب سداد احس نفسي ما ارغب بأي رجال ولا أريد أرتبط
وأكثر وحده تعبت ويايه هي بيبي وبعدها رغد وعبرت الايام العشره الأولى واجى موعد رفع الخيط واجتي رغد رفعت الخيط إلي ما رحت لدكتوره وبعدها مرت الايام عاديه ويوميه إتصالات كاميرا ويه جيهان حتى أشوف أيليا وجيهان كله صيح لابني ليو
وجيهان بلغتني انه طلعت نسخه من البيان واخذتها حتى ظل تراجع بالنفوس ومن يوصل البيان تبلغني حتى أروح لأربيل اما سردار علاقتنه كما هي يتصل يطمئن عليه وعلى ليو ومرات نسولف بس يصرف بشكل طبيعي يعني ما يضغط عليه بموضوع الزواج ابد
ومشت الايام بين شغلي بالبيت وبين أبني وبين الأطفال يمي وبين اخويه وجدو وبيبي ومر على ولادتي لأبني ثلاثة أشهر ودخل آول أيام شهره الرابع وبده ليو يكبر وصار دبدوب وآني گد ما احبه ومتعلقه بي أخاف عليه من الهوى الطاير وبوقتها طلبت من سردار إنه يسالون عمي نزار وين خله ابويه أريد اجيبه يمي
وسردار أبد ما قصر بحيث عرفت فيما بعد انه عمي نزار طالب فلوس يله گايل أبويه وين وسردار دافع فلوس اله
ومن اتصل بيه سردار/ ألق طبعًا بعد مباحثات طويله وعريضه يله گال انه ابوچ بالشماعيه
الق/ وين صايره هاي الشماعية
سردار/ من تردين تروحين گليلي إني اوديچ عليها
الق/ يا ريت بخلال هذني اليومين تاخذني للشماعيه
وهو وعدني إنه شوكت ما أريد أروح بس انطي خبر وهو ياخذني
وأني أبني من دخل بشهر الرابع ظليت احاوط اله بالمخاد واگعده حتى يتعلم على الگعده وبيوم چنت مگعدته واصور بي لان يوميه ادز مقطع فديو لجيهان وأثناء ما دى اصوره عطس عطسه متقطعه تموت ضحك وبنفس الوقت رسلتها لجيهان ولرغد
سداد/ طبعًا مرات الانسان من يفقد ثقته بكل شي يشوف الناس كلها كذابه واي كلمه تصدر من المقابيله ما يصدگها سواء هاي الكلمه صادره من عدو او صديق وآني في وقت من چنت احچي ويه ويه نزار ومن گلي العقد وجابت بوقتها متت ضحك
وجاوبته/ يا خطيه انت بعدك عايش بالقديم بابا يا عقد يا طفل بنت أخوك تركتها وكل حمل ماكو وأخاف عبالك تنصب عليه لا حباب چان غيرك أشطر
نزار/ أسمع مني مثل ما جاي اگلك ابن عمتك ما أدري ابن خالتك ما اعرف شيصير منك دز عليه جماعه ويريد يعرف عقد الق مال زواجها منك وين لآن يردون يسجلون أبنها
سداد/ شوف هذا الفلم روح شوفه وحدك ابن خالتي لا متواصل وياك ولا يعرف أنت وين من الأصل اما مال موضوع أساعدك أنسى لو بيدي كفيلك الله آني أحكم عليك بالإعدام وآني أنفذ
لهذا ما صدگته وطنشته بس ما أنكر أنه زرع بذرة شك بداخلي لآنه لو يعرف شنو صار بعلاقتنه آني وسردار چان ما جاب أسمه صريح چان گال جماعه تواصلوا ويايه على مود العقد وما يحدد سردار بالأخص
وصلت لاستنتاج إنه سردار دى يلعب من وره ظهري يعني حقيقي سردار سأل على العقد المزور بس ليش وشنو الهدف اذن اسلم حل إلي أسأل فرقد
ومن إتصلت بي رد وظاهر چان نايم لان گوه يحچي
فرقد/ والله كاكا سداد أوقاتك ألي تتصل بيها عليه حتى توقيت گرينش ما يگدر يحددها
سداد/ اسف سيدي ما چنت اعرف انت نايم
فرقد/ كاكا سداد چنت بالدوام ومن رجعت غطيت بنوم عميق بحيث اني هسه حملت 70 حلم و71 على النص
سداد/ أعذرني سيدي والله لما الموضوع مهم وما يتأجل ما چان اتصلت بيك
فرقد/ اعرفك مصلحچي على العموم تفضل أسمعك
سداد/ اليوم طلب نزار يشوفني وگلي شي سطر دماغي بي
فرقد/ نزار منو
سداد/ سيدي عم هاي البنيه إلي تهمتني وأسمها ألق
فرقد/ أعذرني توني گاعد من النوم وما دى اوچد شي أعذرني اذكرت على العموم شنو گال
سداد/ ومن حچيت كل حچي نزار ظل صافن وما حچى شي لهذا سألته / سيدي سؤالي هم بيوم اجى سردار ابن خالتي وسأل على نزار
فرقد/ آي صح قبل فتره تواصل ويايه سردار وچان ما اعرف شنو يريد من نزار بس بعد التواصل ويه الضابط صفاء عرفنه أنه منقول لأربيل
سداد/ يصير أنه يكونون يسجلون طفل بسمي
فرقد/ ادري شلون يسجلوا غير اكو جناسي اب وام وعقد زواج شلون يسجلون طفل بسمك واذا يسووها ذوله اغبياء لان هذا تزوير يشتعل جدهم السابع عشر
وشكرته لضابط فرقد على تعاونه ويايه وفي وقتها والله إجى في بالي إنه يمكن سردار يدور على العقد في سبيل يتلفه ويزوج ألق أكثر من هيچ ما يخطر على بالي
ومر على مواجهتي ويه نزار شهر كامل وبيوم چنت اريد جنسيتي دورت عليها بكل مكان ماكو بس اني متأكد انه ما مطلعها من المحفظه شلون ما موجوده وأمي خطيه ويايه نبشنه البيت نبش ما خليت مكان ما فتشنا
وأمي تگول / ما لگيناها طلع بدل ضايع شنسوي
وآني أصيح واتعارك ويه أمي واگللها يمعوده يا بدل ضايع جنسيتي ما مطلعها من المحفظه أبد شلون تخلون الواحد يشك بروحه واني گدام امي نفظت المحفظه أكثر من مره
والعجيب بالموضوع إنه من أختفت الجنسيه بعد يومين لگيتها الجنسيه بالمحفظه بحيث نزلت لأمي وشفتها الجنسيه بالمحفظه وهذا إلي خبلنه اكثر
دلفين/ طبعًا إلي اخذ المحفظة سوه بيها شي ورجعها
سداد/ عفيه هو هذا قصدي بس المشكله وين أستخدمها ومنو يجرأ ياخذ محفظتي ومن وين اخذها من البيت لو من غير مكان وبقيت هذا حالي ومر أسبوع على ترجيع الجنسيه آلي وما صار شي لهذا أطمئنيت نوعًا ما
وبيوم چنت ضايج ودى اگلب بمواقع التواصل الاجتماعي لان وقتي فارغ
واثناء ما دى اگلب صار گدامي مقطع لطفل والله خله جسمي يرجف وهذا الطفل نسخه طبق الاصل من أبني الله يرحمه أيليا والمشكله والأدهى آنه الطفل مكتوب على المقطع أيليا تخبلت النشر اباوع عليه مو قديم صار يومين من منشور هيچ منشور
ودخلت على صاحب الصفحة وطلعت بنيه وسألتها عن الطفل وهذا المقطع منين گالت والله أخويه اني ما أعرف منو هذا الطفل هذا مقطع متداول صار يومين من نشرته بس هم اخذته من صفحة چانت ناشرته
واترجيتها تنطيني اسم الصفحة الي سحبت منها المقطع ورسلت إلي الصفحه وهم راسلتها وهم نفس الكلام تخبلت اباوع على المقطع واگول هذا أبني أيليا بس ذاك چان اكبر وهذا أصغر لا أكثر ولأ اقل وبوقتها خطر على بالي آنه اطلب عن طريق ألأمن الوطني هذا المقطع منو آول واحد نشره
وبوقتها إتصلت بكوجر وگتله شنو أريد ورسلت المقطع لكوجر وهو من شافه ظل يحلف ويگول هذا ابنك أيليا الله يرحمه واكو واحد مسوي فوتوشوب لا أكثر
سداد/ شوف أريد اطلع الصفحة الاولى ألي نشرته وإذا فوتوشوب والله أشتكي على الصفحة والا اطيح حظه
وبوقتها كوجر حچى ويه واحد يعرفه وهو ضابط بالأمن الوطني في بغداد الضابط مبلغه انه نريد هذا المقطع منو نشره آول واحد
والولد طالب ساعتين ويرجع النه جواب من الي نشرها بس شنو مو ساعتين عبالك سنه صارت عليه أخيرها
إتصل بيه كوجر / سداد عيني الصفحة لبنيه صيدلانيه من بغداد وصفحتها مكتوب عليها رغد الصيدلانية وهي ناشره هذا المقطع ورسلي صورة لصفحة مالتها ورابط الصفحه واني گبل دخلت على الصفحة عن طريق الرابط لگيت ناشره أكثر من مقطع لنفس الطفل تخبلت وراسلتها ردت منها ترد ماكو ابد ما ردت
رجعت دخلت على الصفحة مالتها لگيتها ناشره عن صيدليتها واسم وعنوان الصيدلية لهذا قررت أروح لبغداد واحچي وياها شنو هذا أبنها لو شنو وأول أيام ما گدرت أروح لبغداد ومر تقريبًا 5 ايام يله گدرت اروح
ومن وصلت لبغداد وآني رحت للصيدليه وچانت مقفوله ومن سألت المحلات القريبة على الصيدلية
گالوا / الصيدلية ما تنفتح الا ساعه 4 العصر لهذا رحت أجرت غرفه في فندق ومن تعبي نمت گبل وما حسيت غير المغرب گمت سبحت واكلت وبدلت وطلعت بوجهي للصيدلية ومن دخلت چان اكو نسوان اثنين يريدن علاج انتظرتهن ياخذن العلاج وبقيت بس أني بالصيدلية والبنيه الصيدلانية نفسها وظلت تباوع وعليه متفاجئه ليش ما دى احچي وبعدها هي كسرت حاجز الصمت وسألت
رغد / تفضل أخويه شنو تريد حتى اجهزلك طلبك
سداد/ إنتي ناشره بصفحتچ مقاطع لطفل صغير هذا ابنچ
رغد / وانت جاي تسألني على مقاطع فيديو وهذا أبني لو لا تفضل اطلع بره وهذا شي ما يخصك فهمت
سداد/ بعيني تدللين راح اطلع بس اعتبري نفسچ اليوم راح تكونين ضيفه بمركز الشرطة يلعبون عليچ طره كتبه لان هذا الولد أبني ومخطوف صار اسبوعين
