رواية ليلة كمرية الفصل السادس بقلم ليلي الهاشمي
_ امجد
كمت على كيفي ونور راح عبر من سطحهم
وكال .. لا تنزلين شويه واجي
تقدمت شويه وباوعت على الباب وجان امجد واكف
وينتظر احد يفتح بهل فجرية .. شفت نور فتح بابهم وباوعله وصوتهم جان واضح
_ شتسوي هنا بهل وقت ؟
رد امجد وواضح من صوته انه معصب
_ شعليك انت شسوي هنا عم وليد خال بنية؟
_ لا هذا ولا هذا كلي شكو داگ الباب بهل وقت على الناس
وكعدتنا
_ بابا امشي روح من خلقتي حيل صاير تزعجني
_ امجد روح منا واچفى الشر ترا البيت الي ادگ بابه هذا بيت مرتي يعني اكدر هسه احطك واكتلك ومحد يگلي ليش
_ مرتك؟
_اي .. اي مرتي زهرة عن قريب راح تصير حلالي
يعني لا انت ولا غيرك يگدر لا يدك بابهم ولا يتجرئ واني موجود
_ هذا خيالي واسع منك لو فعلاً وافقت عليك
_ باجر احنى وين رايحين تعال يمنه العصريه لان مبين سهران وما تكدر تجيني الصبح .. تعال العصريه اشرب استكان چاي وزهرة بنفسها راح تكلك اني راح اتزوج نور
حتى هاي الدودة مالتك تستجن وتعوفنا بحالنا
عافه ومشى بدون ما يحچي ولا ينطي رد فعل
رجع نور دخل للبيت وصعد للسطح وانا واكفه انتظره
باوعلي وابتسم وگال
_ شفتي هذا السگط مادري شجايبه بهل وقت
_ اي شفت بس شتتوقع؟ شيريد
_ والله يا زهرة مادري هذا من يخلي شي براسه يقفل چنه مطي ، بس ماريدج تفكرين هسه ولا تحملين هم واني يمج
ولازم اول شي اريدج تسوي تهتمين بنفسج واريدج تنسين الشغل
_ يا شغل ؟ مال نهى
_ اي شغل اي شغل تنسي وتنسين انج چنتي تشتغلين اصلاً
اريدچ يمي وبقربي واريدچ تنسين كلشي والله يقدرني على هل شي .. وأمجد معليج بي خلي عليه
_ زين وامك شلون راح تقنعها لان هي من اجتني حجتلي بأنها ماتريدني
_ معليج امي هم يمي انت موافقتج كافية والباقي سهل
خجلت وابتسمت ابتعدت خطوات وحچيت بصوت ناصي
_ أنا .. أنا راح ادخل بعد جوه ماضل وقت وخاف خالتي تفگدني على صلاة الفجر
ابتسم وأتقرب مني صار مقابيلي وصوته صار هادئ
ابتعدت ورجع اقترب .. من زمان چنت منتظر هالقرب
بس مراح أتقرب اكثر اريدچ حلالي يلا يصير القرب بي لذة
رفعت وجهي بوجهه وبس ضوه الگمر چان موجود
ملامحة واضحة .. عطره چان طيب وهادئ عيونه الي تباوعلي رجعت حبيتها من جديد.. ما چنت متخيلة بيوم اكون بهل قرب منه واحچي ويا هيچ چنت عبالي راح يضل يسلم ويروح بس الله رتبها وراح يصير مني وبيه
_ باچر العصرية ادزلج بنات للبيت وسوي الي تريدي
يعني سوالف نسوان ماعرفلهن اني وهم اريدچ إذا شعرج طويل لا تگصي
_ منين تعرف البنات انت ؟
— معرفة قديمة جدًا بس صدگيني تبت بدون جهد منچ
حتى اتوبيني.. بس انت تستاهلين تكونين بحياتي وحدچ
_ يعني صديقاتك هذني ؟
_ هسه دعوفي هل اسئلة
_ تمام براحتك لاتحچي بس ماريدهن يجن
_ راح تطلع الخبالات من هسه لو شني ؟
ضحكت وكتله .. شو عيدها هاي مال شني
_ مااعيدها گوه حچيتها عمي صعبه على لساني
_ تتوقع بأختلافنا واختلاف مذاهبنا حتى ممكن ما يكون الاختلاف للمدى البعيد مضرة النا ؟
_ ماكو اختلاف صدگيني لكونچ انتِ شيعية ما راح يضرني راح يخليني افتخر بشيعيييتي الي حافظت واتمسكت بنفسها .. وراح تفتخرين بالسني مالتج لان غير من حماة الوطن وهيج
ضحكت على سالفته وبعدها اتحولت الضحكة لابتسامه
هادئه وضل الصمت سيد المكان لدقايق
_أنا يمكن لازم ادخل هسه صدگ
توتر وگال .. ها اي يلا روحي باچر اشوفج
دخلت جوه ونزلت ركض حتى صحتي رجعتلي عبالك حط بروحي روح جديدة وحياها
بسرعة دخلت جوه البطانية وگلبي ما تسعى الغرفة ولا البيت ولا الدنيا كلها .. فرحتي الچبيرة لانه سمعني وقبلني مثل ما أنا
نمت بيومها وچان اهدء وأحلى نومه ممكن انامها
تمنيت الساعات ما تخلص واتمنيت اضل عايشه بيها ..
فتحت عيني والدنيا جانت ظهر اول مرة بحياتي اكعد الظهر
الجو بارد بالغرفة وگوه افتح عيوني من النعاس نهضت نفسي وانا بعد اريد انام وتوجهت للصالة چانت خالتي يمها
وفاطمة بملابس المدرسة كاعدة تتريگ
_ فطومة ليش الصبح ما تريكتي؟
ردت وهي تگوم تحضني
_ لا ما اتريگت خفت افتح الطباخ واخذت وياي لفة جبن وبيها خيار وطماطه مثل ماتسويها الي بس ما أكلتها
_ ليش ومصروف عندچ؟
_ اي بيبي انطتني
باوعت على خالتي وجانت ما تحجي ومو من عوايدها ماتصبح عليه او تحجي وياي اول ما اكعد
_ شبيچ خالة شو ما كلتي صباح الخير
ردت بدون ما تباوع عليه
_ قصدج مساء مساء الخير
_هسه مساء صباح مو المهم كعدنا والله كتب النا عمر جديد لو شني شرايج انت
_ فاطمة روحي بدلي ونامي حتى تكعدين تدرسين العصر
وجّهت الحجي لفاطمة وفعلاً فاطمة راحت وانا واكفه مچتفة وبردانه
_ تعالي كعدي يم الصوبه حتى تدفين وتگليلي شعندج انت ونور للفجر بالسطح
كعدت گبالها وايدي على الصوبه حتى ادفي نفسي
وسكتت وهي حچت .. الصبح اجا امجد وگالي يريد يحجي وياچ
_ بيش ساعة اجا وهذا شدخله بكعدتي ويا نور ؟
_ اجا ساعة سبعة وردت اكعدج وانت ماقبلتي ومن كتله كال زهرة جانت سهرانه ويا نور وكال ضروري تحجي وياية
يريد يكلج على شي
_ ترا راح يخبلني شهل ملحة وليش لازگ
كتله ماريدك ولا اريد اصير قريبة منك وبعدين يعرف وعلى فكرة شاف رجلي شلون مشوهه يعني قربه مني اله مصلحة لو كسر خشوم لا اكثر ولا اقلل انت لو شايفه مرته شتگولين
_ مافهمت يعني امجد كايل الج يريدج وانت رافضته
هاي شوكت
— خالة الله عليج مابيه حيل اشرح بس خليني اخلص من هل امجد وارجع احجي وياج وافهمج كلشي
_ كال خابريني من تكعد
استغربت من مال خابريني.. ليش انت منيلج تلفون حتى تخابري؟
_ هو جابه وحط رصيد ورقمه وكال بس تكعد خابريني
_ شو بله خابري خلنشوف شيريد
طلعت التلفون واتصلت وبسرعة جاوب
وكالت أله گعدت إذا تريد تعال
سدته وانا گمت غسلت وجهي وخليت الشال على راسي عدل وطلعت بالحديقة انتظر الباب ادگ حتى اطلعله
اول ما ندگت رحت فتحتها ودخل وصفنت من جرائته
سد الباب وگال
_ من شوكت تحبين نور
چتفت ايدي وگتله بثقة .. اول ما شفته حبيته
صفن وعگد حواجبه وهز بأيده بأستهزاء
بعد عني وتخوصر وضل يفتر رايح جاي وانا صافنه عليه
وباوعت على خالتي الي واكفه بباب المطبخ وتباوع علينا
_ يعني شنو تحبي اول ما شفتي من زمان يعني تريدي انت
ورفضتيني علموده ؟
يحجيها وهو يفتر
_ دوختني عادي توكف ؟
وكف بعيد عني وضل متخوصر ورأسه مرفوع ويباوع بغضب واضح .. عادي هاي وكفت بس كليلي رفضتيني علمودة ؟
_ لا ما رفضتك علموده لان من رفضتك هو ماجان موجود ولا گايلي اريدج .. رفضتك لان متزوج وتحب زوجتك وزوجتك حلوة ومآخذها على حب .. رفضتك لأنك مستعطفني.. رفضتك لان ماريدك
تريد بعد
تقدم عليه وباوع بعيوني ركز وبعدها وخر عينه ورجع حچه
_ مايفيدچ اني اريدج
_ وهي شني لعبة كتلك ماريدك ماااريدك شني ما تتفهم
باوع شويه ووخر وجهه عني وباوع على خالتي ورفع ايده للسلام وهي ردتله وابتسمت وبعدها دخلت جوه
رجع عليه وگال .. بيتچ وحدج وبعيد عن مرتي وفاطمة وخالتج وياج والي تريدي يجرالج
_ ولو تخلي العراق بأسمي مو بيت هم ماريدك يا امجد
ويلا خليني اشوف عرض چتافك وبعد لهنا لا تجي ولا اريد اشوفك ولا راح يكون مرحب بيك بأي مكان .. وانا اريد واحب نور وراح اتزوجة ولو يگعدني بخيمة راضية بي ها بعد تريد الأقوى .. لو تبقى آخر رجال هم ما أرضى بيك
وما ابني وياك شي على حساب تعاسى غيري والأقوى منها
ماريدك ولا أطيقك وبلا وقبل لتروح انتظر اجيبلك التلفون تاخذه وتروح لان مانريد شي منك
عفته ومشيت ورحت اخذت التلفون من خالتي ورجعت
انطيته التلفون ما اخذه وضل صافن عليه والشر من عيونه مبين ومرعب
_ هاك التلفون وروح منا إذا شافك نور تصير مو حلوة
_ ويعني؟ وذا شافني نعال
فتح الباب وراح يدك ببابهم لزمت كلبي خايفة
خالتي طلعت وانا وكفت بالباب وهو يدك بجسارة
طلع نور وضل صافن ومبين هستوه كاعد ما خفتهم شي
جره من الفانيلة وقدمه للشارع وضربه
عطت ونور عينه عليه وصاح … طبييي جوووه
ما طبيت وضل واحد يضرب الثاني
هذا يگلى كتلك عوفها وهذا يردله شعليك
وخالتي لازمتني وانا انگز بمكاني اريد اروح .. ام نور طلعت وضلت تعيط وتملخ بشعرها
وأمجد نزل على نور بكل قوة وحقارة عنده
صار جوه ايده عبالك طفل
حاولت ووخرت خالتي مني ولميت حجار من الشارع
وضليت أشيل واضرب بظهر امجد واعيط.. عووووفه عووووفه جباااان
وخر ومن وخر گام عليه نور وضربه بحيث بضربه وحدة
امجد وكع لا حس ولا نفس
اجاني نور لزمني من چتفي وانا عيني على دم وجهه وعيوني مغروگه وامه تصيح .. كله من وره هاييييي ولكم تتعاركون
عاد لو تستاهل طببني للبيت ورجع على امه طببها وقفل الباب ورجع عليه
يلهث ويحچي .. خوما سوه شي وياچ ؟
هزيت براسي لا وايدي صارت على خده امسح الدم
وخر ايدي وگال … سهلة سهلة چان يضربني أقوى
راح اروح اودي للمستشفى وارجع ماريدج تطلعين ولا تسوين اي شي واني بخير وامي معليج بيها حتلو اجت للبيت وحچت
هو يحچي وامه تصيح من وره الحايط
وخالتي واكفه ورايه لاني چنت بالگاع كاعدة وخايفة وجسمي يرجف راح ودخل للبيت وسمعت صوته وهو يصيح ويريد سويج السيارة وامه تعيط وهو يعيط
الهوسه جانت تخوف واصواتهم كلها يمي
سمعت صوت سدة الباب وقفلها من برة وصاح ..محد يطللع
وشغل سيارته وطلع
خالتي شالتني من مكاني نهضت كوة
وما كدرت اطب ضليت كاعدة يم الباب اريد اسمع صوت سيارته حتى اطلع خالتي حاولت وياي ادخل وما كدرت
خفت حيل ومنظر الدم ارعبني
مرت ساعة ونص وسمعت صوت السيارة وگمت بسرعة وطلعت فتحت الباب وصار گبالي نزل من السيارة واتمشى عليه مضمدين رأسه وماسحين الدم من وجهه
تقدم عليه بسرعة وسحبني باسني من راسي .. وانا احاول ما انزل دموعي.. انتِ تثقين بيه ؟
هزيت براسي بسرعة .. اي اي أثق بيك
اريد جنسيتچ وخالتچ تجي وياچ وبس
_ راح تتزوجني هسه ؟
_ ماعندي غير حل إذا ما صرتي مرتي هسه ما راح تصيرين وذا لاحگني بعربانه مكسرة
قبل لا اجي اتفقت ويا شيخ بس ما يكدر يجي ولازم نروحله
_ وإمك والشهود ؟
_ الشهود خالتچ واصدقائي ثنين وامي معليج بيها
صيري مرتي هسه وبعد معليج
— تعال .. جريته من ايده ودخلنا جوه
صار مقابيلي خالتي وحچه بدون ما اگله.. مچان بأيدها شي غير انها توافق وتمشي ويانا گعدت فاطمة وكالت .. لحگوني للسيارة اجيب الجناسي وفاطمة واجيكم وانت لبسي شي مو تضلين بهاي الصايه الي كلها تراب .. باوعت على الصاية الي معلگه صح كلها تراب بس ماعندي غيرها
عيني صارت على نور وهز براسه وابتسم يعني عادي
اخذتها لبستها ولبست الشال
وعيني صارت على المراية وهو وراية مبتسم .. ابتسمت وطلعنا صعدنا وخالتي اجتي ورانا هي وفاطمة .. وصلنا الجامع جان قريب نزلنا وچانوا ثنين ولد واگفين
سلموا على نور ودخلوا ودخلنا وراهم وچان الشيخ منتظرنا
گعدنا كلنا بمكان واحد وفاطمة تباوع مستغربه والنعاس بعينها وخالتي ما راضيه وواضح من ملامحها عدم الرضا
بس چنت ادري مسويه الصح بهل تصرف … اخذوا الجناسي والإجراءات كملوها
گال الشيخ .. انتِ شيعية ؟
رديت بـ اي
_وين ابوج امج .. اخوج عمج خالج اي احد يكون ولي
رد نور .. ماعدها أحد شيخنا بس اني وهل مرة وهم مو قريبتها
_ بهيج ماتكدر تنزوجها لازم بالمحكمة لا السنة ولا الشيعية يزوجون البكر بدون ولي إلا حاكم شرعي وهو القاضي
تكدر تشوف الوضع باچر اما هسه ماتگدر او شيخ مرخص بس ما موجود هسه لازم اتصل ويجي
رد عليه نور بسرعة.. اتصل شيخنا اتصل لازم هسه وضروري هم
فعلاً اتصل وكالوا اله هسه يجي .. وما تأخر وصارت الإجراءات بسرعة ووصلنا لحد ما يكون الشيخ ولي
وسألني موافقة .. ووافقت بروحي قبل لساني وهو كذلك
وچنت فرحانة حيل .. باوع عليه بعد ما انتهى العقد
_ خو هسه رسميًا صارت بوسة الراس ولزمة الايد حلال
صرتي مرتي
ابتسمت باسني براسي .. وعد يا زهرة إذا الله خلاني عايش ويطول بعمري إلا آسويلج عرس ما صاير بكل بغداد
اجتي خالتي سلمت علينا واصدقائه هم
وفاطمة اجتي مبتسمة وباستني وباسته .. على الرغم من أن كلشي صار بسرعة وهوسه كلشي چان مو طبيعي بس الدنيا ما چانت سايعتني من الفرحة
اصدقائه سلموا وراحوا وخالتي صعدت هي وفاطمة بالسيارة وبقيت أنا ويا وهو مبتسم وواضح شكد فرحان
_ تدري هسه يلا انتبهت عيونچ سوداها ملفت
وانتبهت على وجهج شكد حلو وايدچ ناعمة وهسه يلا انتبهت انت طويلة وطولج يخبل
يحچي وهو لازم ايدي بقوة .. بعد امجد ما يكدر يفك حلگه
خو صرتي حلالي .. بس اريدچ تعرفين انت ما وافقتي بس على الزواج وافقتي على كل مشكلة راح تصير وعلى كل هوسه .. قبل لا يكمل قاطعته
_ موافقة وراح اوافق لو رجع بيه الزمن ميت مرة
انتَ فگه عيون گلبي .. وانتَ الي چنت اتمنى وأحلم بي يومية .. انتَ الي چنت أضيع نومي حتى أشوفك واتأمل مشيتك وصوتك وصوتك ببالي بعيده
وما چنت أتمناك بهل قرب .. لان چنت ابعد وأبعد من انك تكون نظرتك عليه مو نوب زوجي
بس صرت وانا راضية بكلشي يصير وياك وبكلشي راح يصير
صدگني احبك
باسني براسي وسكت .. راد يحچي وسكت ماعرف اكو كلام بس ما گدر يحچي جرني ومشينا للسيارة
صعدنا وفاطمة گالت بلهفة
_ عروس بدون بدلة بس تهبلون سوه
_ والله إلا اجيب الها احلى بدلة
بس خليني اخلص من كم المشاكل الي راح تگع على راسي ورأس الخلفوني
شغل السيارة ومشى بس ما راح للبيت
چنت حاطة ايدي قريبة على الكرسي مالته .. وأيده حاوطت ايدي ابتسمت وانا عيني على الشباگ وتذكرت من أخذنا للمدرسة وچنت اريد هلحظة تصير .. شالها وباسها وفاطمة تباوع فرحانه وخالتي ساكته ماحچت ابد
_راح اخذج لصديقاتي الكتلج عليهن
من البارحة اشترن ملابس الج وصيتهن وراح اخذج حتى تسوين سوالف النسوان حتى ما ينقصج شي
_ هم صديقاتك ؟
_ لا لتخافين من تروحين راح تشيلين الفكرة من بالج
وذا الملابس ما عجبوج عادي .. بس المهم اليوم ماريد لون الأسود هذا ملبوس وبعدين نروح نشتري على ذوقج .. وما نسيت لا خالتج ولا فاطمة
ماحجيت شي اكتفيت بالابتسامة
وصلنا المكان وچانت عمارة وبيها شقق ومحلات جوه
نزل قبلنا وراح صعد وانا عيني عليه شويه ورجع
فتح الباب ونزلني نزلت ونزلت ورايه فاطمة فرحانة
_ يلا خالة ؟
_ لا ماروح تعبانه اني روحي انت وسوي الي تريدي
جاوبها نور مستغرب
_ ترا عرس بنتچ يعتبر غير انت ربيتيها شلون تعوفيها وحدها بهيج يوم
ضحكت بقهر واضح وگال .. كبرت وهي معتمدة على نفسها خليها بعرسكم الصدگ اروح وياها
وصلني للبيت وارجعلها
_ خالة شلون تعوفيني هيچ
صدت وجهها وما حچت
باوع عليه نور وتعابير وجهه مچانت احلى شي
سد الباب ولزمني من ظهري .. فزيت وضحك ولزمني من ايدي وفاطمة من الايد الخ
صعدنا ووصلنا لشقة وعليها رقم 14 ومكتوب يم الرقم
شقة سوسن .. هاي عليمن حاطه اسمها
ضحك ورد .. شوفي ولا واحد حاط اسمه إلا هي لان تعتبر نقطة دالة
_يمكن انت خبرة ؟
رجع ضحك وما رد وفتح الباب
گامت بوجهي مرة جبيرة بالعمر شعرها اصفر والعلج بحلگها
اجتي يمي وكالت بدون سلام ولا كلام .. نور ينراد الها شغل لباجر الصبح
_ انت شنو شفتي منها حتى هيج تحچين ؟
_ مبين مبين هياتها عيني وينراد اعلمها وهسوالف
ووراها طلعت وحدة صغير اصغر منها ومن نفس التشكيلة
شعر اصغر وعلچ بس هاي سلمت عليه وابتسمت
_ هسه هي يمچ امانه ووصيت اكل هم لان ما اكلت هي
ويمكن تضل للصبح صدگ فـ عينچ عليها وشتريدين يجرالچ
_ ديلا عيني يلا
باوعت عليه وگتله .. وين عايفني للصبح
_ لا تخافين ، اني اريدج تبتعدين شويه وتتونسين
وفاطمة هم تتونس واني بس اخلص الهوسة الهناك حتى لو الفجر اجيج .. اريدج ترتاحين اليوم ولا تفكرين بشي
_ لا تتأخر عليه ولا تتعارك ويا امجد وأمك لا تقسي وياها
ابتسم وتقرب وهمس بأذني .. اريد ابوسچ شلون ؟
رديت بنفس طريقته .. بوسني عادي متعود يمكن تتباوس هنا
ضحك ورفع نفسه باسني بخدي وراح وقبل لا يروح صاح .. سوسن عريس اليوم اني ومتصوب يعني داريها حيل حيل
وطلع وبقيت أنا وفاطمة صافنين عليهن
اجتي وحدة اخذت فاطمة وسوسن باوعتلي وگالت لحكيني
وفعلا
مشيت وراها دخلتني لغرفة بيها حوض چبير
والوانها هادئة .. نزعي ملابسج كلها وكعدي بالبانيو
اريدج جسمج رطب
—خالة شني بانيو شني انزع ؟
_ لچ دادا هي شنو الشني ترا عندي العندچ غير متزوجة
دگعدي هياته البانيو
هي داتحجي وأذن العشى صاحت .. لچ دادا شبسرعة هسه صليت المغررررب
_ خالة ليش انت هم تصلين
_ ليش شنو كدامج كافرة ملحدة لو لان شعري اصفر
دنزعي وگعدي بالمي بين ما اصلي ، راح تشعلين گلبي مبين
راحت ونزعت شالي والصايه
ودشداشتي السودة صارت گبالي وشعري ووجهي المليان شعر .. شلون حبيتني بهل بشاعة هاي حتى ريحتي مو طيبة
ردت انزع الدشداشة ومر طيف حيدر گبالي بسرعة رجعتها ودمعتي نزلت .. ترا اخوج ميت حيدرچ ميت شلون هيج تسوين عمت عينج اي والله .. ضلت دمعتي على خدي واتذكر
اجتي وشهكت.. لچ دادا ليششش تبچييين
_ خابري نور حبابة اريدة
طلعت التلفون من صدرها ودگت وانطتني التلفون ورد بسرعة
_ ها سوسن
ردت وانا اشهگ .. مو سوسن أنا زهرة ، نور ماگدر انزع الأسود روحي فرفحت بس تذكرت حيدر
_ زهرة حبيبي .. اليوم عرسچ ولو حيدر موجود جان فرحلج والأسود مو زين عليه بگبره شلون تريدين تخلي يضل يتعذب بدموعچ وبالاسود الي لابسته
_ نور ماگدر
أتنهد وگال .. تريدين ارجعلچ ؟
_ لا بس ما اگدر انزع الأسود
_ إذا اني ماعندي خاطر يمچ فـ لخاطر حيدر تفرحيني وخل اشوفج بالألوان
سكتت شويه وهو گال .. ها زهرتي ؟
_ هايهيه .. بس لا تتأخر
_ صار إذا مو هسه الفجر اجي انتظريني
سده وراح وانا نزعت وبقيت بس بالداخلية والبجامة
باوعت عليه سوسن وضحكت
— صاية ودشداشة وبجامة وجواريب وحتى الستيان اسود ولابسه تيشيرت جوه .. شنو مدرعة ولچ ليش هشكل
_ شبيج خالة ترا متعودة
_الله يساعدك نور .. دنزعي نزعي عيني ماريد شي على جسمج وبدون عيارة يلا
_زين وين فاطمة ؟
_ راح اختي تسبحها واطلعها جديدة ويمكن تسوي تسريح لشعرها هم راح تتلوز اليوم معليج .. يلا
نزعت كل ملابسي ودخلت للبانيو مالتها
جسمي تبلل وهي لبست چفوف واجتني .. يلا گومي نامي هنا
شلون السدية مال مستشفيات بس عليها چرچف ابيضّ ويمها عده مال تنظيف الجسم
تمددت وغطتني لحد بطني وبلشت من وجهي لحد بطني وهي تشيل شعر ووصخ مال سنين بحيث كعدت على صفحة من التعب وما سكتت بس تحجي وتباوعلي
بلشت بوجهي وخلصته وبعدها جسمي لحد بطني
وارتاحت شويه ورجعت من بطني لحد رجليه
كملت لحد ما وصلت رجليه وصفنت .. هاي محروگة ؟ ليش هشكل
_ اي من چنت صغيره مرت ابوي تچوي بيه بنفس المكان يوميه وضلت مستمرة لحد ما صار هيج
_ ما تتأذين إذا شلت الشعر ؟
_ لا ما تأذى
وفعلاً بلشت بس حسيتها حذرة هي باقية بس آثار بس هي خافت .. راح انطيج كريم تخلي يومية قبل النوم وشوفي إذا ما رجعن جديدات مثل جسمج
وجسمج ابيضّ حيل استغربت من رجلج
_ هايهيه بعد شسوي
ابتسمت وكملت .. وخلت كريمات ودهون قييياااامة على جسمي وتخلي وتروح فترة وترجع تغسل جسمي لو تمسحه
ظهرههه نكسر وهي تشتغل على هلجسم المتروك
كملت وكومتني حتى باللفية سوتلي جسمي وانا مستمتعة لان السبح اشوفه بس بالشامبو والبلسم ماكو غيرهن
وغسلت شعري عدل ووراها باوعتلي .. تدرين يا زهرة بالنسبة الي انت إنجاز لان مستحيل جنت أتوقع من ذاك الجسم تطلع هل لوحة الفنية بهل بياض والنعومة
حتى رجلج مطية مننظر حلو لجسمج
وتضاريسج حلوة خوش مختار نور … يدور بالدهاليز هل رجال ما جان عندي امل بيج الصراحة .. بس هسه لو اني رجال ما اتركج ضحكت ضحكة غريبة
وراحت شويه ورجعت انطتني روب أخذته ولبسته بسرعة
لان متت برد
ولحگتها وفاطمة باوعت على وجهي وگال
_ زهرررررة انت بيييضضضضضة
ردت عليها سوسن … ولج طلعت بيضة بس الشعر مسويها قرد ما تنشاف منه
حچت البنية الي وياها .. فعلاً وجهج تغير حيل تغير الشعر جان ظالم ملامحچ
اكتفيت بابتسامه من البرد .. كعدتني على كرسي وبلشت تسوي بشعري وتخلي مادة زرگة وطولت وهي تسوي وتكوي وتغسل فاطمة نامت وانا بعدني مستمرة
لحد ما دگت الساعة 1:00 وهي تسوي والي وياها نامت
وضلينا أنا وياها .. لحد ما انطتني تراك سود قديفة ماروني
بجامته ضيگة والتيشيرت بي سحابه وهم ضيگ
لبسته من لا چارة من التعب والنعاس
وشعري استغربت لان طولان واصل زري هو بطبيعته ملولو
يعني ما يبين طوله إلا مثل ماهي سوت
اجتي والتعب مبين عليها .. خلتلي عطر
_ تصدگين ما تحتاجين ميكاج لان ملامحج واضحة بطريقها عبالك مخليه .. وهم توفير وقت لان تعبت وراح انام
ما حچيت وياها ورحت اريد انام يم فاطمة وصاحت
_ لا روحي نامي بالغرفه الي يم الغرفه الي سبحتج بيها مفتوحة بس دخلي لان نور اتصل وگال جاي
عفتها ومشيت ودخلت للغرفه
چان مزينة ورد وحلوة وعطرها احلى .. والضوه چان اصفر بالزواية مخليته ومنطقي للغرفة فد راحة مو طبيعية
تمددت بوسط الچرباية وعيني على السگف وما حسيت بنفسي الا غفيت ..
الساعة 3:00 ضبط دخلت فتحت الي الباب سوسن
_طلعت جديدة وهنيالك عليها جوهرة وكلشي ماتعرف
_ مانسى وكفتچ .. روحي نامي هسه
— اي طبعًا اروح انام شتسوي بيه قابل .. وهي بالغرفة مالتك نايمة هسه لان من زمان راحت
عافتني ومشت دخلت للغرفة الي نايمة بيها
وذبيت السويج والتلفون على الميز والباب سديته وقفلته واني واكف .. أتنهدت ومن بعيد اباوع عليها نايمه بعمق وايدها جوه بين رجلها چانت بردانه … ابتسمت وتقربت عليها
اول شي جذبني شعرها وشكد جان اسود وحلو وعلى الچرباية خصلة متناثرة…. ووجهه الچان مختفي مادري وين وشلون مثل الملاك چان بياضها وجرة عيونها وخشمها
حتى رسمة شفتها حلوة وما چانت مبينه على گد ما چانت منتبه لروحها وولا حتى تشوف وجهه بالمراية .. لمست وجهه بأصابيعي وفزت بسرعة
فتحت عينها وابتسمت .. وببالي صارت أغنية باسم العلي "خليني يمك" .. هو انت صدگيه ويمي لو چذبية
رجعت ابتسمت وگوه فاتحه عينها صوتها جان عذب وهي تگول .. صدگيه ورجعت غمضت وفتحت شويه وگالت
_ تأخرت هواية ليش
_ ومو مهم تعرفين هسه المهم هسه احنى وين وشلون وهذا كله شلون صار ..
فتحت عيونها على وسعها وضحكت ضحكة ما شايف بأنوثتها دارت وجهه وخلت أيدها على عيونها.. ولك شو عينك الثانية هم مضروبة
ضحكت على ضحكها .. هو امجد كل ما يشوفني يزرگني بوكس يطفي عيني وشبابي ولچ هاي مو هسه من زمان من چنه صغار هيچ كل ما يضوج يجي عليه يضربني ويروح
واني ما اگدر أضربه لان اقسي واخاف عليه .. ماشفتي من ضربته وگع بمكانه
رجعت ضحكت وبصوت عالي واني على ضحكها ضحكت
سكتت واتنفست بسرعة .. نور
صديت وجهي عليها .. عيونه
_ عود الي بي أنا وياك صدگي لو چذبي
— صدگي حيل صدگي وانت بهذا جمالچ صدگيه لو چذبية
_ والله ماچنت اظن أنا حلوة تدري ماباوع على روحي
وحتى شعر جسمي ووجهي قليل اسوي بسبب الانشغال والهوسه ناسيه روحي وانت ذكرتني بيها
سكتت واني اباوع عليها وعيونها تتفحص كل جزء منها
_ عادي نعدل نومتنا هاي ؟
نهضت نفسها وكعدت ووخرت شعرها على وجهه ورجعت نامت عدل وجرت البطانية عليها
وبصوت ناصي حچت .. عادي تحضني
_ انخوك بس ؟ بس احضنج اي عليج العباس اي عليج الحسين اي اويلييي بس حضن
ضحكت واخذتها بين ايدي .. ماعرف شنو شعوري چان بيومها بس حسيت ملكت الكنز الي مستحيل الگى مثله مرة ثانية .. زهرتي بأيدي وتبًا للجميع .
_ يا جميع غير خلوا وجهك خريطة
_ صار خريطة علمودچ حتى امي ضربتني اليوم ولو تشوفين امجد من عرف اتصرگع عبالك عاشگچ وكام صفگني بوكس طفى شمعة شبابي وراح وامي ماخلت نعال شحاطة حذاء
بوري واير.. خو گتلي اليوم جان عمل شعبي ياهو اليجي ياخذ راشدي واني متحمل اريد اخلص حتى اجيج .. حتى ما بدلت شلونه عطري ؟
عدت السؤال وماردت باوعت عليها وچانت نايمه وأيدها الاثنين محاوطتني.. الله يشهد گلبي راد يطلع من مكانه بيومها من الفرحة واللهفة …
_ لو العالم كلها وكفوا ضدي راح انهزم بيج منهم وما اخليج تعيشين يوم مر لو تضوجين هذا عهد عليه .. احبچ زهراء
