رواية دخيله الشيخ زين العابدين الفصل الثاني والستون بقلم أوتار حزينه
ريمه
ظليت واكفه بمچاني ادحك لهيله من راحت للزين
طلعت جهازي تاشوف ساعه بيش
قريت جم رساله جايتني
من حنان صديقتي بالمعمل رفعت راسي
عكدت حواجبي من ماشفت لا هيله ولا زين
دحكت يمنى ويسرى ماهيه ولا هو وسيارتو
گلبي هبط وهوجست بالشر رحت بسرعه اريد اعبر الشارع سياره سوده وكفت جدامي فزاع نزل صفنت علي بذهول گلت له بصوت مخنوگ
ووين اختي
تعالي معي وانا افهمج وش صار
فزاااع وين ااختي
صرخت به الناس دحكت لنا حرس نزلو وصارو يمه مسلحين وهو هم جان مسلح ولابسين زي الحشد محد تدخل گرب عگبت ليوره گمت ابجي گلت
خطفها مووو اخذها غصب سواها الزين
اسري وياي خل افهمج
ووين تريد تاخذني ووين
صحت به وسريت من يمو امشي بسرعه لحگني صار جدامي وگال
يولي اسمعي الجلمه خل اخذج لداركم وافهمج
وش صار
شصااار مبينه خطفها اخذها غصب موو هذا الصار
انهديت بي رجال جبير اجه وويا شباب سألو
خير شبيك وي البنيه
ماكو شي يابه گرايبها انا واريد اوصلها لدارهم
كرايبج هذا بنتي
سأل دحكت له هزيت راسي بلا ابجي واشهگ گلت
مااعرفه ولا شايفتو ابد
سريت اشهگ شباب اجي ورايه گالو
نوصلج اختي
لاااا
رديت مختصر درت وجهي عليه صعد لسيارته طلعت جهازي اريد اخابر امي
تذكرت ماعندي رصيد
گمت اسري بسرعه وامسح بدموعي عقلي ماجاي يستوعب هو سوه هيج ولا كدرت اصدگ هو خطفها بنص النهار
اسري واتكلم مع روحي ودمعتي تحدر على خدي وصلت دارنا ومااعرف شلون وصلت بهالسرعه ،،، دكيت الباب دحكت
للشارع شفت سياره فزاع وكفت نزل يدحك لي امي فتحت الباب دشيت اشهگ ومنهاره فزت وصاحت
ووج شبيج شصاير ووين اختج
خطفها الزين اخذها بالغصب
لطمت خدها وصرخت
شنوو وج انتي شگاعد تتكلمين
خواتي اجن يركضن شعلان وراهن هو ويمان
ااخذها خطفها ماادري شلون صار هالشي بلحظه اختفت من جدامي
ولدها گامو يبجون امي صاحت
وين جهاازي جيبوو بسرعه
الباب اندگ ساريه راحت له فتحتو فزاع واگف
امي راحت له صاحت
وين هيله وين بنتي يافزاع
خاله بهيده لاتفزعن وخلني افهمجن وش صار
الصاار عرفناااا
صحت بي وهديت علي بلساني
ااانت معه مووو شاركت بهالشي استگويتو علينا ياافزاع لان حريم وماعدنا
احد
لااان ماعدجن احد سوينا هيج شتريدين ياابه تظلن هينه والرايح والجاي يتحارش بيجن
اااانجب واحترم روحك
خزرني من جسرت علي
امي صاحت
بي وهي تبجي
رريمه دشي جوه
حسبي الله عليكم حسبي الله ونعم الوكيل سنتين ونص حنا هينه محد منكم
تذكر وگال وينهن ووين
لفه بيهن الدهر هساااع تذكرتونا هسااع ياابن العرب شالتكم الحميه
علينا
مارد دار وجهو من عندي امي تكلمت معه بتوسل
يافزاع خابرو خل يردها بنتي راح تتخبل والله راح تذبح روحها من وره السواه
ياخاله الزين قفل وانتي تعرفيه من يريد شي يسوي لو يعرف الموت يجي من وراه
شلووون يعني جبر غصب يااخذها
انهديت بي مادار بال اليه
كمل مع امي
حضروا روحكم ناخذكم للديره
شنووو ،،، يمه كاعده تسمعين وش كاعد يتكلم
ووج روحي مناااا خل افتهم شگاعد يصير
الگاااعد يصير هذا الواگف جدامج هو والزين يريدون يلووون ايدينا بهيله حتى
نعگب للديره
سكتت انهد من الغضب دحگت له بخزره وگلت
عز الله لگاعد تسوه مااهي سوالف زلم
🌿🌿🌿🌿🌿
فزاع
جزيت على سنوني وما رديت على ريمه ماردت اتكلم كلام اندم عليه بعدين
شعلان اجه يبجي يسأل
وين ماما بابا وينو عم فزاع خذني الهم
يمان لحگو يبجي معه ك
گلت
خاله هيري روحج انتو بعد مالكم گعده هينه الزين تره ماراح يخلي ام شعلان
تعگب لكم خذها وبعد
مالها رجعه للهالديره
خابره اتكلم معه
امي ردت
هز راسو بلااا وكمل
ماراح يفتح خط گلي جيبهم وتعال
امي انهارت وگعدت يم العتبه تردد وهي تبجي
گلت ماراح يجوووز منها اعرفو خلاها بعقلو وگلت راح يسوي شي وهذا خطفها واخذها بالغصب
ولدها زادو بالبجي خواتي رادن ياخذوهم ماقبلو شعلان جلب بفزاع يريد
يروح ويا لابوه
ويمان نفس اخوه يصيح
ماما ماما
صحت بي
لووو تذبحني مااروح وياك وغصبا مااعليكم هيله تعگب هساع رايحه اشتكي
عليكم واگول خطفتو اختي
هديت للباب دش وسده ووگف يمو
دحگت اله بذهول
امي كامت وگالت بغضب
مو هيج المروة يافزاع مو طبعنا هذا ولا اخلاقنا
عز الله گلتي الصح لجن حنا بعد مانكدر نخليجن هينه شفنا وش صار بذاك اليوم
دحگ لي وكمل
شفت هالردي هو وربعو شرادون يسوون بيج وشلون هد وراد يجتل اختج وهذا الشي ماكسر ظهر الزين بس لا عز الله كسر ظهورنا كلنا
انهديت بي بجنون
عسااكم بالكسر بعد اكثر عسى حوبتنا ماتفوتكم كلكم ياااهل الديره الي ماشفنا منها غير بس الاذيه والقهر
سكتت مارديت عليها حگها الصار بيهم جبير ومالنا عين نجابلهن بها
امها تكلمت وهي تبجي وتنوح وتضرب على رجلها
اگعد يبو هيله اگعد ياالشيخ العادل الي ماترضى بالظلم اگعد وشوف حالنا وشصار بينا
ريمه
گضبت هدومي بقوه ارجف من غضبي دحگت لفزاع حدر وگعد يمها وگال
خااله عگبي انتي والبنوات وعز الله كلنا راح نصير لج ولد واخوه وكلام الله وستر بيت الكعبه انا لج ولد وسند وعزوه بس عگبي معي وخلج يم بنتج معززه مكرمه
هديت علي وجريتو من هدومو وصحت بي
گوووم ااطلع بره ااطلع وولي مناااا
فتحت الباب رگعه وگرب عليه يخزر والوجه انطعن صاح بيه بصوت مكتوم
اااعقلي وكااافي خبال خليهن راااكدات
صوب على راسه
امي بينا تبجي وتردد
وولك شلون تريدنا نهد كلشي ونعگب شلوون
يافزاع
وگف يرجف من غضبه ويخزر بيه
صحت وانا ابجي
ااطلع لااا بارك الله بيكم ماشفنا منكم بس الاذيه
الكلام الج خاله انا راح اوگف بره منا لساعه
ماحضرتي روحج انتي والبنوات تانعگب لربيعه راح تشوفون تصرف من عدنا ماايسركم
فكيت عيوني وصحت به
سوويتها بهيله وخطفتوها غصب وتسوها بنا عز الله صايرين عصابه واستگويتو
على الضعيف بگوتكم
شلووون ماتريدين تفهميها اافهميها هذا اخر الكلام الي عندي انا بره ساعه
اذا ماتحركتو معنا ناخذكم
بالگوة
گال هالكلام وشال يمان گاد شعلان الجانو يبجون وماسكتو وطلع
سمعت الباب انقفل من
بره بالسرگي خيالو من جوه بين وگف يمه
امي انهارت دشت للمطبخ لحگنها گعدت تبجي وتنوح
گلت لها بغضب
يمه خابري حاازم خلي يجيب الشرطه ويجي
عليه هو والعصابه مالته
ولج المن اخابر شتريدين ابلي ولد عمتج معهم ماجاي تشوفيهم التمو علينا وهم مسلحين ويحجون بزود ولا خايفين من احد
شلون يمه شراح نسوي وهيله هساع شحالها
مدرري ولجن مدري شراح اسوي
خل نسري لهيله يمه لاتروح تسوي شي بروحها اعرفها هساع تخبلت من السواه الزين وخايفه لاتسوي شي بروحها وتأذي روحها
هاله تكلمت بخوف
صحت بها
ووج وين تريدينا نعگب للديره الي ماشفنا منها غير الاذيه والطعن بالشرف
سكتت كملت بهده
نسيتي يوولي شسووه بنا وشلون هجينا منها بليله ظلمه نسيتي وش صار باختج وشلون ابويه مات من وره قهرها وقهر الصار
بها
گعدت يم امي تبجي
امي گالت
الزين ماراح يعوفنا يولي ولا يعوف هيله اخذها ومستحيل بعد تعگب لهينه وراح يظل فوگ راسنا يحن حتى نعگب للديره
يمه هووو طلگها شلون اخذها شلون سوه هيج ولكم رااح اتخبل ماجوز له شلون سوه هيج شنو مايعرف بالدين مايعرف الگاعد يسوي حرام
يااريمه انتي ماتعرفين الزين من يريد شي ياخذو ولا يهمو احد
هاله ردت
صفنت عليها واحس بروحي عاجزه ومااگدر اسوي شي رحت لأمي گلت وانا ابجي
يمه شراح نسوي شلون يعني كسرونا هاهيه راح نسمع كلامهم ونعگب للديره
ااختج ولج هساع مدري شصار بيها بس لايصعد ضغطها ويصير بها شي
هاله ردت بشهگه
يمه خل نسري لها خاف يصير بها مثل ماصار بأبويه
گعدت منهاره الوب مااعرف وش اسوي ،،، الزين لوه ايدنا بهيله الي مااعرف
هساع شصار بها
🌿🌿🌿🌿🌿
زين العابدين
سويت الي اريدو ضربت كلشي بعرض الحايط ونسيت انا من وشنو سمعت صوت گلبي وعقلي خطط وسوه الي اعرفو هو
غلط لجن انا ماظل عندي
صبر اظل بعيد عن هيله وولدي
ادحك لها مخدره ونايمه حاظنها بأيدي وساندها على صدري اعرفها ماراح تگعد الا وره مانوصل بساعه صافن لها وگربها مني هيج
الذكريات الجانت تجمعنا سوه
مره بليل عگبت من المجلس صعدت لغرفتنا
فوك فتحت الباب وگفت من شفتها گاعده تسرح بشعرها ابتسمت من دحگت لي وسألت
اجيت
ااي اجيت ووياي الشوگ
سريت لها بهداوه گامت والشعر تسلسل على طولها وكفت مسافه ادحك لها واملي عيوني بجمالها
انتبهت مكحله وجاره
الكحل الخجل لاح
بملامحها لان طولت اانظر الها گلت
انا هساع بشنو اتغزل بشعرج لو الكحل الي سباني وخلاني بس صافن
لج جن اشوفج اول مرة
ابتسمت بخجل گربت لها اخذتها لحظني عيوني بعيونها گلت وانا هايم
بها
رجل انا ومااستسلمت لفارس من قبل مالي امام عيونها مستسلم
غمضت عيوني اتذكر ذيج اللحظه شلون ضعت بكلشي بيها كلماتها اليه
وشلون جنت انسى روحي واعيش وياها اجمل لحظات عمري
شيخ ماظل شي ونوصل
انتبهت لعوض من تكلم وگلت
بس نصل اطلع للمزرعه
تأمر شيخ
جهازي دگ برساله من فزاع فتحتها كاتب
الله يساعدك شيخ سويت مثل ماطلبت وهساع جاي ووياي الاهل
ابتسمت مرتاح لان الي ردتو صار دحگت لهيله بعدها نايمه وصلنا وره مشوار للمزرعه نزلت وشلت هيله وطبيت بيها لجوه
رحت للغرفه االجوه خليتها على الفراش حجابها نزل على وجهها وخرتو وخليتو على صفحه جلست يمها ادحك لها واملي عيوني بشوفتها وهي هادئه انتبهت لخصله شيب بكذلتها مديت ايدي
وگضبتها
نزلت راسي وشميتها فليت شعرها اريد اشوفو طول عكب ماابترتو وخليت
اثر بيها وبروحي
طولان لظهرها لجن مو ذاك الطول الي جنت هايم بها خليت راسي به ونيت
بصوت مخنوگ
اخ يولي شسويت بيج وشسويت بروحي لو ميت بدال ابويه ولا ماد ايدي
عليج وذابحج هالذبحه
وخرت منها اريد احظنها اريد احبها من الشفه واطفي نار گلبي وشوگي گربت وانا اگول
انا ماطلگت باطل طلاگنا انتي حرمتي بعدج يولي لي وبأسمي
حبيتها بهداوه وعيوني مغورگه شلتها لصدري هايم بها ومشتاگ حبيت خدها وعيونها وحده وحده اردد بغصه
احبج هيله واموت بيج عز الله ماحبيت ولا راح احب حدا غيرج انتي وبس الي تجرحين واداوين بنفس
الوقت
فتحت عيونها وسدتها ادحك لها واعرف راح تثور بوجهي وتتخبل من السويتو ماهمني اي شي گلت اتحمل كلشي يطلع
منها
هيله
وگفت يم الزين تأخذ الفلوس سياره وگفت ورايه درت وجهي شفتو فزاع عگدت حواجبي درتو للزين مااهجس غير شي صار بوجهي صحت
لاا يازين
تحركت گضبني دخت وراسي افتر ظلام صار بعيوني بلحظه وبعد مدري شصار فتحت عيوني وسديتها اريد استوعب الصار بيه جن مضروبه براسي بقوه وماجاي اركز شويه شويه وعيي رجعلي فتحت عيوني صارت بعيون اعرفها كلش
عيون زين استوعبت
الصار،،،،فزيت وصرخت
شسووويت يازين خطفتني اخذتني غصب
هيله ااسمعيني خل افهمج
دحكت لروحي انا ويا بجربايه وحده حجابي ماهو والجبه ،،،، ذابها عني وحالي حال شعري منثور ومااعرف شصاير بيه گمت بسرعه دخت وگعت ليوره صاح واجه عليه
الله يابه ووج على كيفج خل افهمج
لاااتگرب يازين اذبحك والله اذبحك
سريت للجربايه جريت الحجاب لبستو گضبني دفعتو بقوه وصرخت
لاااتگضبني هدني مااتحمل لااا لزمتك ولا شوفتك
سريت للباب اجه وجتفني من وره وحظني لصدرو صرخت واني اضرب بقوه
برجلي
هدني يازين ولك هدني خليني اعگب لهلي
ماكووو روحه هذا مچانج واهلج جايين بالطريق
تخبلت اتلاوى وياه ماگدرت اصرخ
سوويتها يازين سويتها واخذتني غصب
شالني لفوك وسرى بي للجربايه اضرب به برجلي
التوت برجليه ووگعنا سوه بالارض گمت بسرعه ورحت للباب اريد افتحو مقفول تخبلت انداريت له انهد من الغضب واخزر بي
گاعد ومتربع بالارض ابتسم وخبلني بالزايد گال
بعدج گويه يولي وتعاركين مثل الاول
ااافتح الباب
صرخت به
رد بروده
واذا مافتحتو شراح تسوين
ااذبحك يازين اافتحو خل اطلع من هينه
ماكو طلعه من هينه انتي حرمتي ومچانج هنا يمي وبديرتي
اانت شبيك مااتفهم انا تطلگت منك مااجوز لك اافهمها عاااد
سهله اعقد عليج من جديد
رد بروده وانا غاديه نار هزيت راسي بلااا وگلت
مااريدك بعد مو غصب هي يازين موو غصب تعقد عليه وانا مااريدك ولا اريد شوفة وجهك
ذب حسره وگام من الگاع رد بنفس البروده وعيونه بعيوني
لجن انا اريدج وهذا يكفي
ماراااح اقبل ماراح اگول اااي يازين تحلم اوافق عليك تحلم اگول اااي
صرخت بي
رد بهدوء
لا راح ادگولين ااي ياهيله وتوافقين
هزيت راسي لاااااا
ابتسم ودحك للجربايه هوجست بالشر دار وجهو عليه گرب عگبت ليوره عيوني بعيونو گلت بغضب
لااتگرب اذبحك والله اذا گضبتني مره ثانيه
جنتي مخدره ياهيله
الباب صار ورايه سندت روحي علي من گال
هالكلام صفنت علي وگلبي
يدك بسرعه خفت اسمع شي يخليني انفجع
شسوويت يازين
شوفي روحج وانتي تعرفين وش سويت
فكيت عيوني هزيت راسي بلااا صحت بجنون
وووش سووويت بي تكلم اانطق
مارد عليه گمت ارجف اردد
لااا ماسويت شي ما تسترجي يازين تسوي شي لي ااي ماسويت
گرب عيونه بعيوني لزگت بالباب وگف مسافه ورد بروده
المخدر مايعرف بروحو وش يسوي او وش صار به شفتيني شصار بي من خدروني وشلون سويت شي انا مستحيل اسوي الا اذا جنت فاقد الوعي والاداراك
دحكت للجربايه هوسه صايره وانا حالي حال بجيت وگضبت هدومي لميتها بقوه انهاريت وگمت اصرخ بجنون
لااااااا ماااسويتهااا لاااا يازين لاااا
اجه بسرعه عليه نزلت بالگاع اصرخ وگاضبه راسي اصيح بخبال گضبني صحت بي بتوسل
گووول مااسويت شيي گول يااازين
مااسويت شي والله مااسويت هيله عز الله ما كربت لج لجن ردت اشوفج انا شلون انظلمت وسويت السويتو وانا مخدر ومو بوعيي
صفنت علي ارجف من الخوف ومو مصدگه كمل
وحگ الله ماسويت شي وداعه ولدي تكلمت هيج
حتى تعرفين المو بوعيو شلون مايعرف بروحو شسوه او شعملو بي
تخبلت ضربتو على صدرو بقوه صرخت
شتررريد مني ااانت تخبلني ياازين تحرگ دمي ااكثر ماهو محروگ
صاح بيه
ااريدجج تعرفين انا هم اانظلمت مثلج
گال هالكلام وحظني بقوه لصدرو اصرخ واضرب ولا همه ضمني بقوه ويردد
بصوت مكتوم
ماااگدرر اعوفج روحي معلگه بيج ولج هيله اانسي لخاطر ولدنا مو لخاطري انا
ااخ ااخ يااابه
صرخت من كل گلبي وانهاريت بعد اكثر حسيت خشمي طگ دم وجسمي باد وحيلي راح هدئت غصبا ماعليه حس وخرني منه شاف وضعي وصاح
زين العابدين
هيله هدأت بحضني وخرت منها فكيت عيوني من شفت خشمها يفلت دم صحت بخوف
هيله شبيج ووج فتحي عيونج دحگي عليه
ونت وفتحت عيونها گمت امسح الدم بأيدي كمت
بسرعه وشلتها للجربايه خليتها عليها رحت للحمام
نگعت خاولي بالمي وعگبت الها گعدت يمها امسح بي
وبوجهها
ادحگ لها مغمضه وتبجي گلت بصوت مخنوگ
كاافي ولج وارحمي روحج وارحميني عااد
ماردت دارت روحها مني تشهگ وتبجي
🌿🌿🌿🌿🌿🌿
مالك
اني بالشغل ابويه خابر وگلي مر للبيت عندي حجي وياك سألتو
خير يابه صاير شي
تعال للبيت وتعرف
عگدت حواجبي من سد الخط وراح عفت كلشي ورحت لبيت اهلي وصلت الظهر ومأذن الاذان
طبيت للمطبخ امي بي هي وزينه سلمت مدري شبيهن وجههن مو تمام جن صاير شي سألت
ابويه وينو
بالصاله
امي ردت مشيت اله هي ورايه گاعد فهد يمو ومحمود سلمت گعدت گلت
خير يابه صاير شي
صار يابه وانفضحت وي اهل مرتك
عگدت حواجبي من رد هالرد دحگت لاخوتي
ساكتين رديت
يابه الصار لا بأيدهم ولا بأيد احد امر الله عليهم شيردون يسون لها وهم تبرو من زمان منها
ولك انت تفتهم شنو الصار سمعتهم لحگتك الك وعفت بيتك من وراهم مااشفت شصار هديت كلشي لخاطر مرتك وگعدت بيت الزين
ااي واهد كلشي لخاطرها حرمتي هااي شتريد يابه من اول هزه بحياتنا اعوفها وامشي
سكت محمود گال
مالك تره الفضيحه كلها عرفت بيها وسيرتنا وياك صارت على كل لسان
اسمعني زين محمود اني ماايهمني احد بهالدنيا غيركم انتو وليان وولدي الي يريد يحجي بظهري طز بي خلو يحجي لو بي خير خله يجي جدامي ويتكلم شلون مااسويه نصين وانعل صفحه الجابو
جاان اكبر غلط من انطينا اختك الهم واخذنا منهم وحنا نعرف بنتهم شمسويه
ابويه رد دحكت الو بتركيز ورديت بهدوء
كل بيت بي الصالح والطالح هذا حمد شفتو شسوه بالزين واهلو ليش
ماتحجي بي مو ابن اخوها لأمي مو گرايبنا وفضحنا
بكل مچان وصارت سيرتو بكل بيت
سكتو محد رد كملت
يابه عم مصطفى مايستاهل الصار بي ولا وسيم الرجال انجلط وشوفة عينك گعد
بالكرسي المتحرك من وره مصيبتو شتريد اروح اگوله طلگ اختي واني اطلگ
بنته شلون تقبلها شنو ذنبهم هم بالصار جااوبني
ليش سكتو
مااعرف مالك الشي جبير ومسنا كلنا
محمود رد
ابويه كمل
اعرف هم مالهم ذنب بالصار لجن يابني راح يحلگك عار بنتهم وتأذيك حجايه الناس
مامهتم لأحد ولا يهمني كلام الناس البي خير خلي يجي ويحجي جدامي واني اردو برد يخلي يبلع لسانو ويسكت
ااستغفر الله ياربي هالبنيه شسوت باهلها هجولتهم
وخلتهم حتى بيتهم يعوفو ويسكنون بيت غيرهم
ابويه ردد گمت لحيلي وگلت
يابه هذا الموضوع بعد مااريد تفتحو وياي انت علمتنا وشفناك وي امي على الحلوه والمره واني مثلك وي حرمتي على الحلوه والمره
هز راسه اخوتي سكتو
امي گالت
بعد محد يحجي بهالموضوع البنيه ماتت وراح عارها وياها وماتجوز لها غير الرحمه وشفنا ابوها شلونو وشلون صايرين ما نريد حنا هم نجي ونزيد
عليهم همهم ونشيلهم قهر فوگ قهرهم
رحمه الله والديج يمه حجيتي الحگ
يمه انا اخاف الله هم شنو ذنبهم بالصار
شنريد من هالحجي نهجم بيتك وبيت اختك وانا گاعد اشوف ليان ورده مال الله شالت بنتك وربتها وما قصرت وياها بشي ووسيم
زلمه حگ وخايف الله بأختك وشايلها بالصلاوات عش نجي حنا ونخرب بيوتكم بهالسوالف
رديت
اي وانت شفتهم بعيونك عائله مستوره لجن حظهم هيج صار انطاهم بنت ما خافت الله بيهم
الله يرحمها ويغفر الها طلعت من ذمتنا وراحت
يم الله ومايجوز لها غير الرحمه
امي ردت
الموضوع انسد يم اهلي طلعت من يمهم ضايج ومخنوگ من هاي السالفه
الي ماعاد تنسد
رجعت للبيت مارحت للشركه طبيت من المطبخ ليان بي هي ونوار سلمت شربت مي سألت
شلون عمي اليوم
الحمدلله حجه اليوم كم كلمه
ليان ردت واجت ليمي سألت
مااجيت على الغده
جنت يم اهلي
هاا
مشيت للصاله محد بيها صعدت للغرفه كيان نايم ليان اجت ورايه ذبيت القميص سألتني
بيك شي مالك
لااا ليش تسألين
صفنت عليه وبعدين گالت
احس بيك شي وجهك صاير دم احد غاثك
لاا ماكو شي بس تعبان
سكتت لبست گلابيه وگعدت على الجربايه اجت گعدت يمي گلت
ليان مابي شي لاتظلين تفكرين بيه ويصير بيج قلق
احد من اهلك حجه وياك بسالفتنا
عگدت حواجبي گلت
لاااا ليش يحجون بهاي السالفه
سكتت ادحگ عليه ذبيت حسره وگلت
ليان محد حجه وياي بسالفه اختج سديها عااد
لهاي السالفه وبعد لا تحجين بيها
نزلت راسها وگامت تبجي
ااستغفر الله ياربي فهميني ليش گمتي تبجين
اعرفك گاعد اجذب عليه وحجو وياك بهالشي وحقهم والله وحقك انت وياهم اذا حجيتو لان تأذيت انت وياهم من وره السوته لارا
مارديت كملت بشهگه
شنو ذنبك انت ونوار بالصار بينا
اني وياج على الحلوه والمره وكافي تبجين تره گلبي ماعاد يتحمل هالقهر
گامت من يمي تفتر دحگت عليه وگالت
طلگني مالك طلگني وفك روحك من عدنا صرنا حمل جبير عليك وو.....
ااااش
صحت بيها وگمت لحيلي كملت بعصبيه
انتي شگاعد تحجين وتخربطين شنو اطلگج
تخبلتي شلون طلعت من حلگج هالجلمه شلون ليان
راااح تتعب ويانا عارنا راح يظل ويانا طول العمر وانت راح يصيبك منه هوايه
ااي اطلگج ووسيم يطلگ نوار وتنهجم بيوتنا هذا الي تريدي موو ؟
سكتت وگعدت تبجي ذبيت حسره ورحت گعدت يمها كملت بهدوء
يولي شلون طلعت من حلگج اهون عليج تقهريني بهالجلمه
هزت راسها بلااا حظنتها لصدري وگلت
بعد لادگوليها ذبحتيني يولي من سمعتها طلعت من حلگج اني وياج بس الموت يفرگنا
تعبتك وياي مالك تعبتك هوايه
ماتعبت ولا شكيت الج ولا راح اتعب بيوم ،،، اتعب من اشوفج هيج ضعيفه وبس تبجين
وخرت دحگت الها مبتسم مسحت دموعها بأيدي وگلت احاول الطف الجو
ليونه الغاليه زعلانه ومنو يراضيها
ابتسمت بنص دموعها واجت لحظني حظنتها وگلت
غيرت رأيي اني الزعلان منج لان حجيتي هالكلام
اسفه مالك گمت مااعرف شلون افكر
حقج يابه الحمل جبير والهم ترس الگلوب
الباب اندگ وخرت مني گلت
تفضل
توته طبت وگالت
ماما تعالي بيبي تريدج
اي هسه انزل
گامت من يمي گلت
راح انام جم ساعه گعديني بالخمسه
تمام
🌿🌿🌿🌿🌿
ريمه
طول الطريق ساكته ودمعتي بعيوني لان الراده الزين وفزاع صار
امي خافت على هيله
وگالت خل نعگب وبعدين نشوف وش نسوي
شفت مره فزاع يدحگ لي يالمرايه الجانبيه وسحبت روحي وبعد مادحكت من
الجامه
انكسرنا من مات ابونا وخفنا لا هم هيله يصير بها شي وتكسرنا محد تكلم من عدنا ساكتين
فزاع هم ماتكلم بشي
حالنا مثل ذاك اليوم من تهجولنا من وره داعش لجن الظالم هساع الزين وواگف معه هو وربعه
وصلنا ريمه
هاله تكلمت مارديت
شفت درب المزرعه وتذكرت ذيج الايام الي جنا بيها وابويه طيب ويشتم الهوه دمعتي حدرت ومسحتها انتبهت له يدحگ
لي بالمرايه درت وجهي
منو والغضب تارس گلبي
دشينا لها شفنا عم عزام وسعود وعمه هنيه جن ينتضرونا وگف نزلت امي يم
الدار الزين واگف سألتو
بغضب
وين هيله يبن الشيخ هااي عمله تعملها،،، بنتي اذا صار بها شي انت المسؤول
انت يازين
خيه مو هيج الكلام هدي ودشي لجوه
عمه هنيه تكلمت معها واخذتها لجوه تبجي
شعلان ويمان راحو له نزل وگعد گبالهم حظنهم
لصدرو
گلت بغضب
غلطت يازين وغلط جبير
هالشي السويتو راح يخلي هيله تكرهك بعد اكثر
مارد عليه سريت من يمهم اغلي من غضبي
خواتي لحگني سمعنا صوت امي بغرفه الجوه رحنا بسرعه عليها
دشينا گاعده يم هيله ساكته لجن وجهها غادي
دم
امي سألتها
يولي شصاار بيج گلت راح تموت من وره السواه الزين
ردت بصوت مخنوگ
ولدي وينهم يمه
اجوي ويانا يم الزين
هاله ردت
سكتت دحگت لنا وحده وحده وگالت
عش اجيتو يمه عش هديتو كلشي واجيتو
شلون تريدينا نعوفج وحدج يمو شلون يمه وانا اعرف وضعج وحالج
ااخ يمه ااخ
صاحت ونزلت راسها بين رجليها نسمع صوت شهگتها
ماما ماما
شعلان صاح رفعت راسها مسحت دموعها بسرعه اجه ليمها يمان وراه صعدو عليها اخذتهم لحظنها
كاتمه دمعتها گوه
ماما لاتعوفينا بعد شوفي يويو بجه جثير وعيونو ورمن
لااا بعد مااعوفكم لاتبجون
انتي هم عيونج مثل عيون يمان
شعلان تكلم والحزن بعيونه
الزين دش
هيله دحگت له ملامحها تغيرت للغضب
گالت
خلونا وحدنا
امي دحگت لها بعدين
اشرت النا وسرت من يمها وحنا وراها شلت شعلان وهاله شالت يمان
بجو يريدون يظلون يمها بس اخذناهم من يمهم وگعدنا بالصاله
هيله
ظليت وحدي انا وزين گرب من يمي گمت وگلت
يازين الگاعد تسويه مايفيد
انا وانت انتهينا وخلصت قصتنا
لااااا ماخلصت ولا راح ارضى بهيج نهايه
نبدي من جديد مو لخاطري
لخاطر ولدج سويها ياهيله لخاطرهم هم مو انا
مااگدر ولا راح اتحمل وجودك بحياتي ارحمني يازين واعتقني لوجه الله
صفن عليه وهز راسه
بلااا رد
اعتقيني انتي بالاول من حبج وانا اعتقج بعدين
شلوون يعني ماراح ترحمني انا بعد مااگدر اعيش هنا تغير كلشي يازين انا تغيرت ماعدت احب هالمچان لي به ذكريات توجع
وانا لي به ذكريات هم توجع لجن خليت ذكرياتي الحلوه معج وفضلتها على ذيج
الي توجع
سكتت خانگه دمعتي گرب وكمل
هيله انتي مچانج هينه بأرضي وگلبي هنا يولي
اشر لصدرو وكمل بتوسل
خطيت عز الله خطيت بحگج جثير واريدج تعفين عني
دمعتي حدرت گلت
عفيت يازين حتى مااوگف انا وياك جدام الله ولا اشوف خلقتك يمو
وجهو انطعن وغده دم رد بغصه
وانا ماعفيت ياهيله وخطيتي وخطيه حبي لج اريدها تظل برگبتج الى يوم الدين
درت وجهي منه كمل
ااسمعيني زين يبنت الناس انا مستحيل اهدج بعد ضيعتج مني مره وبعد ماعندي استعداد اخسرج مره ثانيه
درت وجهي عليه كمل
لاتفكرين تهدين المزرعه لاان ماراح تگدرين خليت حرس بكل مچان وعيونهم عليج انتي واهلج يعني شيلي هالسالفه من راسج واگعدي هينه معززه مكرمه انتي وياهم وولدج
زين العابدين
ردت عليه بصوت مخنوگ ودمعتها على خدها
غصب يازين
ماخليتي لي غير هالحل حجيت وتكلمت معج بالهداوه وتوسلت بيج واعتذرت وانتي ماكو رافضه حتى تسمعيني
راحت گعدت تبجي سريت لها گعدت گبالها وخليت مسافه گلت
عز الله السويتو من حبي لج ماهان عليه اشوفج ترحين وتجين والعيون عليج
دحگت لي وردت
يازين انا وياك مانرهم بعد
مااريد شي منج والله ماريد بس اگعدي هينه وي ولدج ماراح اجبرج على شي ثاني
اافهم انا مااگدر ااشوفك
سكتت من انهدت بي بغضب وجرح گلبي كبر ومااعرف شوكت يبره رديت
ماراح تشوفيني اجي بره اشوف ولدي واعگب
دارت وجهها مني كملت من گمت
اطمني ياهيله انا ساري للموصل يعني وما اعكب الا بعد شهر اجي اشوف ولدي وماراح اخليج تلمحين
خيالي
ماردت عليه غمضت عيونها ودمعتها على خدها سريت من يمها
وگفت يم عمه والبنوات وگلت
عمه انتو بعد مالكم رجعه لبغداد هاي مزرعه بنتج وولدها يعني انا مامسوي فضل عليكم بيتكم هذا وداركم اكعدو بها معززين وانسوه الرجعه لهناك
وشغلنا شنو نسيت حنا نشتغل بمصنع الشيخ شعلان
ريمه ردت عليه
كلت بهدوء لجن الغضب
تارس گلبي
شغل بعد ماكو الخير جاي يجي جثير من هالمزرعه اكعدو بخيرها وانسوه الشغل يم هالشيخ مو بعازته انتو ولا محتاجين له
يازين مايصير هالكلام حنا هدينا كلشي واجينا من خوفنا على هيله
ياعمه انا ماعندي غير هالكلام رجعه لهناك بعد ماكو عدكم جم شغله تريدون تاخذوها فزاع ياخذج لج ومعج وحده من البنوات تجيبيهن وتعگبين غير هالكلام بعد ماعندي
ريمه
ماگدرت اتكلم بشي اختي ماسوت شي ولا گدرت تغير رايه عيوني راحت لفزاع واگف يم باب المطبخ الداخلي ويدحك لي جزيت على سنوني وخزرتو بغضب رفع حواجبو باستفزاز درت وجهي منو وگلت بغضب
مو بشر جن عايشين بغابه كلها ذيابه مالكم امان وانتو شيووخ
الزين مارد سرى من يمنا فزاع دحك لي بغضب لجن ماتكلم بشي
لحگه وطلع من يمنا
🌿🌿🌿🌿🌿🌿
ايهم
مرت ايام عليه طويله واني بالحجز هناك مر عليه شريط حياتي من عرفت
ليان ولحد هاي اللحظه
اسمع صوتها بأذني وضحكها اشوف خجلها مني وشلون جانت تخجل من الكلام الحلو تصورت حياتي وياها شلون راح تكون
اذا ماغلطت هاي الغلطه الي ضيعتني وخلتني اخسر كلشي
اتخيل روحي اطب للبيت تستقبلني بابتسامه واخذها لحظني اعيش وياها مثل
ماجنت احلم واريد بس هذا
حلم ظل بنفسي وصار بداله كابوس عشته وي لارا وختمته بنهايه خلتني اعرف
اذيه ليان طلعت بيه الضعف زوجه زانيه وولد معوقين خسرت وظيفتي والعار
لبسني من وراها وراح انحكم مااعرف شگد
واگف وره القضبان اباوع للقاضي اليوم حكمي وراح اعرف مصيري شنو
قره البيان الختامي،،،
وگال وهو يباوع عليه......
