رواية ليلة كمرية الفصل الثامن بقلم ليلي الهاشمي
ضحكت وباوعتلي
_ نور يشبهه ابو ، مستحيل يكون مايدري
_ ابو ؟
_ اي ابو الي جابكم وخلاكم يمي …!
عدلت گعدتي وعيوني صارت مباشرتًا عليها .. يعني شنو يشبهه ابو وأبو هو جابنا فهميني خليني استوعب
_ خالة ابو نور هو الي جابكم أنا مرة كاعدة بمكاني وهو اجا دگ بابي قبل الليلة الي اجيتوا بيها بيوم وكال هيچ وهيچ السالفة ، وانطيچ راتب شهري لو خليتهم يمچ وافقت بحكم اني وحدي وماعندي احد وهم راتب شهري واعين نفسي وافقت .. يعني هي ما معقولة مرة تطلع بنص المطر الي جان بيومها حتى تكون صدفة وآخذكم واعيشكم يمي
الموضوع جان مترتب من ابو لنور
ابو نور رجال شغلة مو معروف ومحد يعرفه بس رجال مقتدر وعنده فلوس يابو فلوس بس ما اشترى شي ولا عنده شي غير هالبيت الي تشوفي وماكو غيره اصلاً
ومحد يعرف هالرجال شنو چان يشتغل بعدين يلا عود انكشفت الأوراق .. المهم اجيتوا يمي واخذتكم وبيومها خلاكم بالشارع وما راد يجيبكم يمي مباشرتًا ماعرف شنو السبب ولا جنت فاهمة السبب اني بس سمعت بيها راتب
گلت هايهيه
ضل الراتب شغال لمدة سنتين وره بعض وانت چنتي تعينيني بالبيت وبهل فترة اني لكيت الچ شغل يم بيت وحدة من صديقاتي ورحتي وصار عندچ راتب وكافي النا وللبيت ، وويا راتبي ومن يوم الي شتغلتي بطلت اخذ الراتب مال ابو نور وضليت ع راتبي وراتبچ وااستقرينا بعد ذيج الأيام .. راح ابو نور والروحة روحة ومحد يعرف بي وين وشلون مات وحتى جثة ماعنده احد يزورها او يترحم عليها
مرت الأيام ونور صار يشتغل يم بيت ابو امجد ويا امجد
ومناك صارت صداقتهم وكبروا سوه بس نور جان يشتغل ويدرس وأمجد للسادس إعدادي وكف وما كمل لان أتوفى ابو وصار هو المسؤول .. ومن ذيج الأيام وقبول نور بالجامعة صارت بينهم مشاحنات وامور وعركات بالشارع ما تنتهي ابد ويرجعون يتصالحون
وانت جنتي تعرفيهم وتلعبين وياهم بصغرج بس ناسيه
لان هم اشتغلتي والتهيتي وتفرقتوا ، مرت الأيام ونور اشترى سيارة واشترى بيوت وشقق وامور غريبة وصارت الفلوس تلعب بأيده ولا زال والمصدر محد يعرفه
وذا على الراتب فـ راتبه ما ينطي هيچ مبالغ
لهذا گتلج مثل ابو .. ابو نسوان وأبو فلوس
وماكو رجال ماعنده هلشغلتين يعني صارت من بديهيات الحياة .. دخلنا بمواضيع وامور قديمة بس حتى افهمج انت شلون اجيتي وبأي طريقة
ضليت صافنة عليها ونطق لساني بدون تفكير .. چا ليش ما گلتي قبل ما يصير موضوع زواجنا
شربت الچاي وباوعتلي بأستغراب .. ليش ؟ ليش اكلچ شنو الي راح يمنع زواجكم لو كتلچ يعني الموضوع عادي
_ خالة ممكن يكون عادي بس أن يكون ابو نسوان
يعني موضوع الشقة هذا يدري بي وسوسن وحدة من نسوانه والموضوع بالنسبة اله عادي
_ لا لتخافين وبعدين يا خالة اني شبيدي على قرارج لو جان اي لو جان لا بالنهاية انت جبيرة وفاهمة وتعرفين ولو ما قابلة جان امجد ضل وراج لحد ما ياخذج ثانية
_ انتوا شلون تشوفون الدنيا يعني شنو امجد يغصبني؟
لو من اعرف شنو تاريخ ابو نور ونور راح اقبل اخذه
ترا شغل ابو نور اعرفه وبعيني شفت كلشي وبالي شفته بالشقة يعني نور مثله ومن العيار الثقيل هم بس لو حاچيه بس لو ناااطقة
ما حچت وصفنت عليه وحچت بهدوء حتى ما تسمع فاطمة الي چانت كاعده ومستمعة ..
_ اخذج ؟
هزيت براسي لا وحمدت الله بصوت عالي
ماحچت بعد ولا أنا حچيت فاطمة تسأل وترجع تسأل واحنى ساكتين ما ردينا ولا حچينا وياها
كمت واخذت الصينية وياي
المواعين خلصن والمطبخ نظف بدون ما احس
الأفكار بعقلي صارت ضخمة بطريقة تخليني افز كلشوية من اي فكرة ثانية .. من اي تفكير وتوقع ثاني يخليني افز واخاف
رجعت للصالة .. فاطمة ضلت تدرس وعيني عليها
وخالتي عيني صدت عليها وهي گاعدة بالحديقة وصافنة
اتمشيت وگعدت يمها
باوعتلي ورجعت عيونها على الباب .. ندمانة على زواجج المتسرع هذا ؟
ضليت اشلع الثيل الي گباليي وعيني على الباب مثلها .. مادري خالة ماعرف ولا اريد أفكر هسه بهلشي لان راح يرهقني فوگ إرهاقي ومادري إذا ندمانة لو حبي لنور راح يخليني عادي اتقبل كلشي
_ بعدج تحبي ؟ وذا عرفتي هو مثل ابو تبقين تحبي
_ حب الصبا ومراهقتي وشبابي ووراها صار رجلي انت تخيلي وحدة تحب واحد من هي وصغيرة وتالي يصير رجلها
فوك الحب تتعلق.. ماعرف إذا اضل احبه لو اشوف الي سويته تسرع لو هو ليش اختارني ولو ولو ولو
كومة سوالف بعقلي موتتتني
رادت تحچي وسمعت صوت تلفون يدگ
استغربت وباوعت عليها قبل لا اسأل هي حچت..هذا التلفون نور جابه الي يمكن هو لان ماعرفله وأكثر من مرة اتصل وما اعرف شلون ارد
نهضت نفسي واتبعت مصدر الصوت ، اخذته ورفضت ماعرفت شلون ارد رجع اتصل ودست الدگمة الثانية ورد
واجاني صوته .. ها خالتي شلونچ
رديت أنا وكتله .. أنا مو خالتك أنا زهراء
سكت شويه ورجع حچه بنبرة اسف .. اسف ادري جنت شوية قاسي وياچ بالاتصال ونبرتي مچانت حلوة بس لازم تعذريني لان هوسة الشغل راح تكتلني
سكتت شوية وچنت ما ناوية احچي بس حچيت بخوف وتوتر واضح .. ياشغل.. ياشغل نور اشك اصلاً انك بالعسكرية اشك انك تشتغل شغل شريف
ما حچه والتلفون انسد صحت الو .. الو ماكو رد
باوعت على التلفون وچان مسدود ما رجعت اتصلت واصلاً ماعرف تركت التلفون ورجعت لخالتي چانت واكفه بالباب وتحچي وماعرف ويا منو خليت الشال على شعري وطلعت أتمشى للباب
وگفت وره ظهر خالتي وباوعت چانت مرة من الجيران واكفه وتحچي ضليت وراها واستمع لحد ما لمحت امجد يتمشى هو ومرّة منقبة وخرت من ظهر خالتي
ورحت باوعت من الزرف مال باب .. ضلّوا يتمشون لحد ما وصلوا بابنا وتعدوا للبيوت البعدنا
رجعت مديت راسي من الباب وشفتهم تعدوا
خالتي لزمتني من دشداشتي ورجعتني وانا صافنه اريد أشوفهم وين يوصلون .. سلمت على المرة وطبت وسدت الباب
_ شبيييج هسه خلنباوع، شگيتي الدشداشة يمكن
خزرتني وحچت بحدية.. تدرين كلش زين مانعج تطلعين لو توكفين بالباب ووصاني إذا شايفج لو امج شايفتج شلون بيج ؟
_ لا تسوينه رجلي بعده بس ورق وبعدين أنا متعود اطلع مراح يجي ويسجني وخليني على راحتي حتى لو امه شافتني
لشوكت اضل مضمومة بس يجي اكله ويحل هالموضوع
_ عود من يجي مو هسه ، هسه استري علينا
وبعدين شوكت تباوعين للرجال ومرته
_ هاي مرته المنقبة؟
هزت راسها ومشت وكملت حچي ..مرته ولا تسألين ليش منقبة لان يغار عليها وحلوة
اتذكرت من شوفني وجهه وچان فعلاً جميلة وحيل
ورجعت اتسأل هو فعلاً رادني بس لان استعطفني وعنده هيج مرة يتمناها الكل .. يوووو يا زهرة هي مال اسئلة كافية الاسئلة الي ببالج وما الها حل ، حچيتها بصوت عالي ودخلت وراها للبيت .. چان يوم عادي وهادئ خلص وچان كل واحد بفراشه ، فاطمة بحضني وخالتي بصفي
وانا متمددة وببالي إلف حسبة وعقلي وگف.. بين الخوف والقلق والمجهول الي خليت رجلي بي بدون وعي
ماگدرت انام وضليت اتگلب لحد ما سمعت صوت التلفون الي چان مشمور بالصالة نهضت نفسي على كيف ووخرت فاطمة وگمت .. اخذت التلفون ولبست شي ثخين
وطلعت بره سديت الباب وراية وانتظرت يدك مرة ثانية
وفعلاً مرت دقايق ورجع اتصل
جاوبته بسرعة والتلفون على أذني صار بدون حچي وهو كذلك شوية وگال .. مافكرتي بحچيچ شوية
رديت بعدم اهتمام .. يا كلام ؟
-تعرفي والي سديت التلفون من وره ورحت وما كلفتي نفسج ترجعين تتصلين
ضحكت وكتمت ضحكتي گوه لان أنا شمرت التلفون وطلعت وما اهتميت ، اتنفست ورجعت احچي ويا
_ اي فعلاً أنا ماعرف عنك غير اسمك وحتى اسم ابوك عرفته يم الشيخ يعني ماعرف عنك اي شي
ولا بعمري شفتك مثلاً لابس عسكري لو اعرف شنو شغلك بالضبط بالاضافة إلى الشقة والسوالف الي بيها واكيد تدري لهذا ما راح احچي
ضحك وبين صوت ضحكته .. ولچ الخبلة يعني شلون البس البدلة العسكرية وأفتر بالشارع غير هي الها مكان محدد وتنزع شسوي افتر بيها وشنو شغلي ولچ انت شنو ببالج دخيلك ربي امحي الي ببالج امحي وعيب تفكرين هيج بيه
والشقة شبيها الشقة ؟
سكتت ومادريت
_ زهرة .. زهراء وياي انتِ .. زهراء
_ ها ها وياك
_ شكو ما جاوبيني؟
_ لان مادري شجاوبك اريدك تجي حتى تنحل هواي عقد براسي واسئلة .. أنا ممكن اكون ما دارسة ولا افهم بأمور الدنيا هسه ..بس مو غبية ولا ما اعرف اميز واعرف الناس شلونها فـ رجاءً لا تستغبيني.
_ حبيبتي ممكن بلا هل حچي لان ما اله داعي ولا مفهموم اصلاً ليش مخليه شكوك ببالج ومصدگتها ممكن افهم ؟!
_ لان ما دام ماكو جواب منطقي وواقعي يثبتلي عكس الي ببالي فـ يعني كل الي ببالي صح
_ ولچ شو لسان اهدي علينا شويه ، وبعدين صار وحاضر الي تريدي يجرالج وهسه مشتاقلج
_ تشتاقلك العافية .. عليمن مشتاقلي شوكت حبيتني انت
ضحك بصوت عالي وحجه وهو بعده يضحك
_ ولچ صدگ خبلة لعد والنظرات والسوالف والسطح
وإذا ناسيه فـ احنى من الصغر سوه حتى لو ما احبچ راح انجبر اتزوجج لان بنت جيرانه
_ وهاي شكو وحدة عدها ابن جيران لازم تاخذه
_ اي حبيبتي اي وسدي الموضوع .. مشتاقللللللججججج
_ ما
_ هي شنو ما
_ يعني ما لا تشتاق
_ يا يابه كل الإدوات النافية خلتها بجملة واحدة
دخيلك ربي الله يساعدني
ابتسمت .. ديلا هسه شتريد اريد انام
_ شأريد يعني ، اريدچ وهواية هم
_ تجي باچر ؟
_ بنهاية الأسبوع اجي
_ هواااااية
_ الظاهر هم مشتاقتلي وخجلانة
_ اهووو نور هسه دحچي
_ يابه مو كتلچ بنهاية الأسبوع اجي
واريد اكلج هم خاف طلعتي ترا ماقبل وأبد ما اغفر لطلعتج لو للباب فهمتي اغفر لكلشي إلا انچ تكسرين كلمتي
شنو هذا عرف طلعت اليوم گلتها بنفسي ورديت عليه .. لا لا ما اطلع اصلاً طول الوقت چنت نايمة وما طلعت
_ خوش زهرتي اريد احچي وياچ اكثر بس لازم اروح عندي شغل أخلصه وانام والصبح اتصل عليچ وبأي وقت عندي مجال اتصل عليچ … والطلعة الطلعة يا زهرة ممنوعة عفية سمعي كلام
_ اي نور هايهيه روح وبالك على نفسك
_ والله لازم أدير بالي هذول الدواعش داچين علينا
والوضعية داچة فرد دچة
_ شنو دواعش نوب
_ زهراء انتوا بالبيت ماعدكم تلفزيون
يعني ماتشوفين الأخبار ما تسمعين بالوضع هسه
يعني ما تعرفين شكو ماكو ؟
_ لا
_ لعد 24 ساعة تطرگين بالشارع وكلشي ماتعرفين وين تروحين
_ استغفرلله شنو اطرگ هو من البيت لبيت نهى وارجع
يعني ماطالعة خارج هالحدود
_ يلا ميخالف ان شاء الله الله يطول بعمري واخليج تفترين العراق كله
_ تمام هايهيه ، انتظرك وبالك على روحك إذا صدك اكو خطر او شي
_هايهيه تمام امر وصار
سديته وابتسمت ماعرف صوته خلاني ابتسم لو راح يضل يذكرني بروحي الي حبته .. لفيت روحي زين وتمشيت لحد ما وصلت الباب فتحتها ووگفت اكو نخل بعيد ومنظره يخبل ويا هوى الليل البارد والنجمات الي مخليه السما وكأنها لوحة فنية
شعري جان يطاير ويا نسمات الهوى الباردة
چنت مطمئنة ماكو احد بهل وقت يطلع ما لبست شال
قدمت نفسي شويه وباوعت ماچان اكو احد
رديت الباب وطلعت أتمشى
الهوى بارد ويلعب بشعري .. حسيت بالهوى يمشي بجسدي ويحيني أخذتني رجلي لأخر بيت بالمنطقة ومن بعد هالبيت جان اكو بستان
صديت ورجعت أتمشى لبيتنا .. طفت الكهرباء وچانت ليلة ضلمة بدون گمر ولا اضاءة من اي مكان
وگفت بمكاني شوية ورجعت امشي بسرعة خايفة ومرعوبة من الضلام الي حاوطني
ضليت امشي امشي لحد ما سمعت صوت سيارة قريبة
بسرعة بالچاكيت الي لابسته خليته على راسي
وضليت امشي هي المسافة مو بعيدة ابد بس خوفي خلاها بعيدة
السيارة صارت گبالي وانفتحت أنوارها
صرت گبالها بمسافة قريبة.. نزل وما چنت أميز
السيارة عالية وما شايفتها
نزل يتمشى باوعت على يميني وفعلاً أنا گبال بيتنا والسيارة
گبال بيت نور
ردت ادخل للبيت واتراجعت نزل يتمشى صار گبال صحت بأسمه گمز وعاطت بنفس الوقت من الفزة
_دخييييلككككك ربيييييي
_لا لا اسم الله عليك يابو طول الحلو ها اشوف تحرر العراق من داعش واجيتني
ضل لازم گلبه ومرتچي على السيارة ويتنفس بسرعة
تقربت يمه
_ ها استاذ نور ما كتلي تحرر العراق لو بعده ؟
لا تطلعين زهرة ديربالج تطلعين زهرة لا تكسرين كلمتي زهرة
ولك مو هسه سديت التلفون هسه والكاك گباااالييي
اجت كهرباء الشارع وصار وجهه واضح كدامي
مصفر وواگف
يلهث ولازم گلبه .. عبالي.. عباليييي جني عبالي جني الله لا يوفقج زهرة ماتن رجليه
_ الله لا يوفقك انت شكد جذاب وملعب
منيلك علي السيااارة
صفن وعدل وگفته
_ شعندچ طالعة اني شگلت
ضحكت بأستهزاء .. ولك لو ما طالعة والله مطلعني هسه ما اشوف هاي الطلة البهية ماشوف جمالك ما شوف طولك الحلو هذا ، ليش چذبي عليه شنو الغرض
رجع سحب السويج من جيبه .. تعالي صعدي وافهمج كلشي
_ لا ما اصعد يا نور ما اصعد وهسه تگلي كلشي
_ ولچ بالشاااارع يم بيتناااااا
_ شكو ترجف من امك جنك سعفة اي هنا وگبال البيت ولو الدنيا طلعت هسه هم تفهمني وتگلي شوضعك وشنو تشتغل وتفهمني كلشي كلشيييي
اجا راد يلزم ايدي ابتعدت عنه وبعدت ايدي بسرعة
_ ما ماااااا ما ماصعد ولا تحاول فهمني هنا
_ دخيل ربچ دخيل الكائنات دخيل الأنبياء والأمة بس تعاي وياي والله افهمج كلشي وكفة الشارع هاي مو ضابطة
وبعدين انت شمطلعججججج
_ اصعد بس بشرط اكعد وره وماكعد يمك
_ اي اي عادي بس صعدي
صعدت وهو صعد وقفل البوب .. منيلك علي السيارة
مو جانت عندك حمرة ؟
ما مشى بس قفل البوب وضلينا بمكانه
_ هاي سيارة صديقي واجيت للبيت اخذ كم شغلة واروح
_ نور عادي تبطل جذب وتسولفلي الصدگ
_ والله العظيم والله والله يشهد عليه هاي سيارة صديقي واجيت اخذ كم شغلة واروح وهاج هاي السنوية وهويته هم هنا انت متعرفين بالسنوية بس هي هاي
وحتى غراضة هنا وعطوره وصور بنته هاج علي صورة بنته اسمها فاطمة هم الصغيرة وهذا ابنه الچبير مالك
شوفني صور العائلة وانا صافنه عليه وما بعدت نظري عن وجهه .. باعي وهاي ملابسه وعطره اني ماستخدم هلعطر
وما قبلت اجي عليج لان كلت ما تسوى اشوفها شويه واروح خليني ع نهاية الأسبوع وهم حتى نستقرّ ببيتنا وتكونين مرتي جنت مرتبها
_ السيارة مو الك عادي .. بس انك تنزل من دوامك وترجع لبيتك بسيارة صديقك أنا وماعرف هم بالبديهي محد ينزل من واجبه هيج
_ أنا هنا واجبي قريب بسيارة ربع ساعة يمچ
صحت بصوت عاالي .. لا تجذذذذذب لا تجذذذذذب
عبر يمي وبحركة سريعة سد حلگي .. سكتي سكتي ليش تصيحين
وخرت ايده وردت انزل والبوب مقفولة
_ والله يا نور إذا مااحچيت الصدگ هسه اكسر الجامة ولو ايدي تشكك وهم انزل واعوفك وتكون النهاية بيناتنا
_ هو اني شفت البداية حتى اعبر للنهاية بس صبري
شكد گوووية
_ وخررر عني وخر جسمك منيييي
_ إذا وخرت مو تصيحين
_ لا وخر واحچي يلا أسمعك
ابتعد وهو صار على يسار الشباك وانا على يمينه
شغل جگارة خلاها بحلگه
دك تلفونه قفلة وشمرة على الكشن الأمامي
_ شتريدين تعرفين ؟
_ حتى نكون على بينة اي شي تحچي يكون صادق
وانا مخيرة بأني ابقى لو انفصل عنك مدام لسه ما صاير شي والأمور طيبة خلينا ننهي بكل احترام
_ شنو ننهي هو شصاير حتى تعوفيني؟
_ لان من شفت الشقة ووضعها وخالتي حجتلي على ابوك
أنا شكيت بأنك تشتغل شغل مو زين ابد ابد ومو ضابط ولا شغلتك شريفة
_ هم كالت شغلتك مو شريييفة ولج شبيج ؟ شبيييج شنو شغلتي مو شريفة وشنو ابوي وشنو الشقة كافي تتخيلين وتصدگين
_ ها اتخيل واصدگ خوش لعد يلا أسمعك تحچي وتنفي الي بعقلي هذا كله
_ شلون اني بدرس العربي بابا فكي ياخة والله كلشي ماعندي شبييج
_ لا حول لله نور الله عليك احچي ولتشلع گلبي
_ولج شحچي يعني تريدين اكلچ الي يرضيچ لو الصدگ
والله اني ضابط وعندي شهادة وهسه اشوفها الج إذا تريدين وعادي يصير عندي فلوس اسوي سلف عمي واشتغل شبيج ليش مكبرة الموضوع
ماحچيت ويا وصديت وجهي على الجامة وصارت عيني على بابهم
_ لا تقترببب
_ حاطة عيون براسجج
_ معليك وافتحلي الباب
_ ما افتحة إلا ترضين
_ وانا ما راح أرضى يا نور وبأحلامك
إلا اعرف كلشي واتاكد .. لان إذا ما تدري فـ السالفة الي حچيتها الك ابوك جان يشتغل ويا ابوي بالدعارة خاف ماتدري وييبع نسوان ويجيبهن
ماعرف الله شلون هدىَ وجابنه لخالة حفيظة وانت فاتحلي شقتك مال مگودة وزلم ويا زلم نسوان ويا نسوان وعرگ
يعني شنو تفرق عن ابوك ؟ شنو
شو نفس الشي وحتى مصدر للفلوس ماعندك ولا تقبل تگول
والحلوة تگلي من الراتب
ولك يا راتب يفتح بدل البيت اتلاثة اضحك بيها على غيري
هاي إذا ما طلعت …
بعدني ما مكملة واجاني راشدي فر راسي فر
من قوته ضليت لازمه خذي وصافنه
رجع لمكانه وفتح البوب وبصوت عالي وعصبي.. نزلي نزليييي او اكلج لا ابقي اريد اشوفچ المگودة شلون تصير
عرفت شنو راح يسوي وفهمت غضبه
قبل لا يمشي بالسيارة فتحت الباب ووگعت بوگعتي نهضت نفسي بسرعة وفتحت الباب مالتنا وطبيت بسرعة
قفلت كل البوب وضليت واكفه بالمطبخ والغضب من عيوني طلع
انفتحت الباب الخارجية بقوة دخل وباب المطبخ قفلها گوه مچلب بالباب
فتحت الباب وصار بوجهي وصوته ناصي ويحچي وهو گاز على سنونه حيل .. ما راح اعاقبج هسه بس صدگيني ما راح أنسى انچ ضنيتي بيه كل هل ضنون واني مامسوي شي ولا عندي خبر او علم بأي شي كلتي
لزم وجهي بقوة وتقرب باسني وابتعد عني .. ابتسم
فتحت عيوني بصدمة بصدمة على تصرفه الي چان شبهه مال مخابيل بسرعة سديت الباب وحيلي يرجف لو ضاربني لو ضال على موقفه معصب وحاچي لا صدمني بأنه هيچ سوه والابتسامه مچانت بمكانها وشلون نگلب فجأة
حاوطت نفسي بأيدي وگعدت بمكاني صافنة ومرعوبة
التلفون دگ طلعته خلّيته بأيدي وما رديت ورجع انسد ودگ وكذلك استمر لحد ما حسيت أن صوته راح يگعد خالتي وفاطمة .. خليته على أذني
_ ها حبيبي .. أنا آسفة
خو گلت أنا يعني لازم تسامحيني
_ بلشت اخاف منك
_ اوووه .. ولچ ليش
مارديت رجع ضحك وگال بهدوء
_ لا بيبي لا تخافين اني إذا ما احميچ ما راح أأذيج
احبچ هواية الله يخليج الي يلا روحي نامي ورتاحي
هم ما رديت .. انطاني بوسه بالتلفون .. هاي البوسة على خدچ حبيبي
سد التلفون وراح .. التلفون ضل على أذني وصافنة
هذا شبي وشلون يتغير هيچ وليش يتصرف بهل تقلبات ويايه
ضليت بمكاني ماتحركت
_ ولچ چا شوكت ترتاحين وتخلص صفناتچ مو كثرن وماعندچ حل .. كافي
حچيتها وانا بمكاني ماگمت والراشدي حرارتة بخدي ضلت
صار عندي قابلية للصفنة والتفكير ممكن اضل بمكاني
بدون حركة بس أفكر عادي
سمعت صوت العصافير رفعت عيني الجو متكشف
كمت وكوة رجلي منملة والگاع باردة وظهري على الباب متشنج .. فتحت الباب والجو چان يكص كص من البرد
قفلتها واخذت التلفون ضميته حتى ما اسمعه من يدگ وما ردت اجاوب
رحت لمكاني خليت روحي بينهن وغفيت بسرعة
ظهيرة الخميس الساعة 11:00
_ اروح اجيب فاطمة من المدرسة
صفنت على السگف وعيني مفتحة وعين مغمضة .. لا اليوم جمعة
نهضت نفسي وصحت على خالتي چانت گبالي
_ اكلچ خالة اليوم خميس لو جمعة
ردت .. خميس ، تعاي تريگي
_لا راح اغسل واروح لفاطمة اجيبها لان الفلوس ما أنطيت للخط ويمكن ما ياخذها
_ لا يمه هي تجي مشي شعليها قابل
گمت توجهت للمغسلة غسلت وجهي ولبست الصاية الي گدامي لفيت حجابي .. لا وين تمشي وهي بنية راح اروح اخذها وامر انطي فلوس الخط واجيب مسواك هم
_ عندچ فلوس
_ اي عندي اخذت
لبست برجلي وطلعت تمشيت والجو جان حلو مو بارد مثل الفجر الطريق بعيد شوية بس مو متعب
ورحت بس حتى احرك رجلي وصلت المدرسة وچانوا بعدهم ما طالعين .. وگفت يم ابو البلبي
وصفنت شوية وشفت شلون يطلع حرارة وهو رجال جبير واكف
رحتله ابتسمت وسلمت وگتله .. إذا انطيتني كاسه وما أدفع الك عادي ؟
رد السلام وصب بدون ما يرد ابتسمت واخذتها وگعدت على كرسي يمه وهو هم گعد على الكرسي مالته
_ عمو عندك بنات ؟
_ اي بنيتي الچبيرة مثلچ بعمرچ شويه اكبر يمكن عمرها 22 وعلى حدها بالسادس إعدادي وهاي ثنين بلابتدائية واكو وحدة بالمتوسطة
_ كلهن مكملات ؟ دراسه يعني
_ اي لعد شلون هاي العربانة طلعت محامية وكبرتهن
وكلهن احلامهن بين الطب والمحاماة بس الصغيرة عندي تريد تصير ممثلة
ضحك وكمل كلامه .. بس هي الوحيدة الي تفهم احسن شي تسوي بالهدنيا انك تمثل ..
_ الله يخليهم الك ويخليك الك سند وأب عظيم
_ رحم الله والديچ بنيتي ، وانت شنو وين واصله وجايه تاخذين بنتج لو منو
نزلت راسي مبتسمة وابتسامتي چانت حزينة
-أنا ما كملت لا .. بس فطومة اختي كملت وراح تصير دكتورة وأخوية حيدر صغير حچيتها وشهكت بدموعي .. مات حيدر حبيبي الصغير عمو مات
_ لا حول لله اسم الله على كلبچ .. وين اهلچ
_ باعوني ابوي عمو باعني وانا گعدت وضليت اربي بأخواني
حيدر اندعم وتوفى وفاطمة ضلت أنا وياها وأريدها تصير احسن بنية بالدنيا
مسح وجهه وبصوت شايل حنية الدنيا كلها .. اني ابوچ والله اعتبريني ابوچ بس لا تبچين ويارب تشوفين اختچ من احسن الناس
مسحت دموعي وابتسمت .. عادي اجي عليك من اتعب ؟
_ والله يوم المنا من اشوفج مرة ثانية
بنتي وان شاء الله ماقصر ابد
ضحكت وفرحت .. شكرًا عمو الله يخليك
_ انت شسمج بنيتي؟
_زهراء عمو
_ اني ابو زهراء منا وهيچ الي يگلي شسمك اكله ابو زهراء مو ابو بهية.. بنتي انتِ الحياة مو عادلة وتدرين محد مرتاح بيها .. بناتي احيانًا يتذمرن من شغلي بسكوت ويا امهن
انقهر حيل .. بس استمر لان ما يعرفن لو راحت هاي العربانة وهي سبب بالرزق چان ولا وحدة وصلت منهن
انقهر بس هنا مسؤوليتي وصح كبرت بس ماريد العوض منهن اصل هنا لحد ما اموت واصرف على نفسي لحد ما ينگطع النفس .. أريدهن يكبرن ويصيرن لنفسهن ويم الله ما يضيع شي
اريدچ صبوره على مصائب الزمن وراضية وقنوعة
الله راح يدزلچ رزقچ من المال او الرزق بشكل عام بحياتچ هاي بطرق ما تصدگيها .. عقلج ما يصدگها تگولين معقولة
فـ اقبلي واتقبلي والغلط لا توصلي .. وتوكلي على الله وصدگيني ما ترجعين خايبة
مبتسمة وعيني تباوع عليه ودمعتي مسحتها بسرعة .. اريد اسوي شي بس لا تگلي لا
_شنوه تدللين
_ گول والله يازهرة اخليج تسوين هذا الشي بدون ما اگول لا
_حسب ؟
_ ياعمو دگول
ضحك وردد نفس كلامي
_ طلعت مبلغ الخط وانطيته.. اريد كل الأطفال العدهم والما عدهم ما يدفعون اليوم وكلهم يأكلون هل لبلبي الطيب ومدام حلفت يعني ما راح ترجعني
_ والله حرجتيني اليوم عندي قسط مال معهد بنتي الي بالسادس وچنت حاير ماعندي منين اجيتي والله منين دزچ
ماتحملت وبچيت وهو گام باس راسي وشكرني
بهل أثناء طلعوا من المدرسة كلهم
واجتنب فاطمة تركض فرحانة والحچي بلش يوزع لبلبي للطلاب كلهم بدون فلوس وكلها چانت فرحانة
اخذت كاسه لفاطمة
_ عمو أنا رايحة
چان بين هوسه الطلاب صد عليه وضحك ورفع ايده ورجع عليهم
رجعنا نتمشى وفاطمة تحجيلي عن يومها ودروسها وانا ارد مستمتعة وياها وأريدها ما تسكت لان احبها من تحجي وهي فرحانة بدراستها ويومها المليان احداث
عدلت ضفيرتها
_ باچر اخذچ ونروح للأمام الكاظم نزور واشتريلج ملابس وناكل حلاوة ونرجع
_ صدك صدككك صدك والله
_ اي والله بس اريدج تخلصين من هسه دروسج
_ ماعندي شي الأحد بس امتحان وحافظته والباقي مكملته
بس اريد اروح ازور مشتاقة حيل
_ صار من عيوني اخذچ
ردنا نعبر الشارع وسعد مر من يمنه وما سلم ولا عبرنا
وفاطمة باوعتلي وماحچت .. السيارات رايحة جايه وخطوط
گوه عبرنا ودخلنا فرعنا
وملتهية بالسوالف وصار بمستوى مشينا وسلم
امجد :السلام عليكم .
وگفت وباوعتله وهو ابتسم ، ابتسمت مجاملة ورديت السلام وكملت مشي وهو ويانه
سلم على فاطمة وفاطمة ترد
_ سألت نور عنج كل ما أخابره بس چان يجاوبني بمثل ما يعجبه ارد اعرف منچ شلونچ وشلون الزواج وياج
_ الحمدلله كلشي تمام
_ مبين كلشي تمام .. حليانة
وكفت بنص الشارع وباوعتله .. الي شفعلك وكفتنه هاي بس لو چان بغير مكان والله يا امجد ما يسكتني عنك شي
واردك لو چنت شنو ومنو فـ احترم نفسك وامشي
_ احترمچ وماريد اذيتچ وزواجج من نور چان غلطه ماريدچ تتندمين عليها .. ادري بي مو هنا وذا حابه اجي العصر ونحچي اريد افتح عيونچ واروح وبعد ماتشوفيني
ما تستاهلين زهرة انتِ والله
صفنت بوجهه وتذكرت سوالف نور ومانعني اطلع واكيد ما راح يقبل امجد يحچي وياي
_عازمتك على الغدى وبدون لا
اخوية انت ان شاء الله وانا مرت اخوك ونگعد بالحديقة ناكل يعني لا تقلق
ومنها تحجيلي الاسرار العظيمة الي عندك
توافق اهلاً وسهلاً ما توافق ما راح اسمع
صفن وباوع على الساعة طلع تلفونه ورفعه على أذنه شويه وگال .. لا تنتظروني على الغدى راح أتغدى يم زهراء وخالتها بالحديقة سد التلفون رجعه بجيبه وقدم ايده بمعنى يلا
مشى هو وفاطمة قبلي وانا وراهم
ما فكرت بعواقب أفعالي ولا ردت اسمع شي منه
بس الغدى چان جاهز ولگيته بالشارع عادي لازم أعزمه
چنت احچي ويا روحي وانطي مبررات وحلول
وصلنا وهو طب وفاطمة ويا وراحت صاحت خالتي
دخلت وراهم وقبل لا ادخل لمحت سعد يباوعلي بنظرة الطفل الشريرة ابتسمتله ودخلت وراهم .. شهل يوم المليان ابتسامات ضحكت لروحي وحسيتي خبلة لان احجي واضحك على سوالفي
امجد واكف بالمطبخ يحجي ويا خالتي وفاطمة دخلت تبدل
وانا وكفت وباعتله .. انخوك ريحة دولمة خوما ماتحبها
_ لا احبها احبها
_ چا خوش خليني اجهز السفرة برة بس تگدر تساعدني وتشيل الصوبة من اخلي الوصلة حتى اخدر الچاي عليها
_ اي صار يلا
اخذت الوصلة وهو شال الصوبة خليت الوصلة جوه السقيفة وهو حط الصوبة وگعد مباشرتًا
_ لا گول راح اجيب دوشگ
ماگال باطل گام وانا جبت الدوشگ ورتبت الگعدة وهو كعد واستقر
دخلت للمطبخ وخالتي عينها عليه
ترست القوري .. نور والله يگضي بيج التوبة لو عرف شلون تجيبي عيب مرة متزوجة وعيب رجال غريب يدخل البيت اصحي
باوعتلها وباوعت الفوري انترس.. ابن جيرانه قديم .. مثل ابني .. أصدقاء طفولة انتوا .. امجد زين وخوش ولد
اكل شرب ناقص زايد كهرباء مدرسة معتازين .. امجد
بس من اعزمه للبيت وكاعد بالحديقة هسه صار كخة وعيب ما ايام وليالي هنا هو ويدخل ويطلع هسه صار ممنوع .. توجهت للطباخ وشغلت على المي مال چاي
_ هسه الوضع اختلف ، انت متزوجة
_ متزوجة ؟ لا بعدني بس ورق وكررتها الج هسه بس ورق
ولو احس بنور يشكلي خطر على حياتي صدگيني حتى حبي اله ما يهمني وممكن اتركه .. وانا أريده يعرف وشيصير خل يصير
_شبيچ شبيييج شداتحجين
_ داحجي الصح والي أشوفه .. نور مو ضابط وجذاب
ولعب علينا كلنا وكولي ما كالت زهرة وحتى وان مو ضابط ممكن أسامح عادي .. نور عنده أمور اكبر اكبر ما يتخليها عقلي ولا عقلج
وذا على شغلة ابو ممكن سهلة على الي ممكن يكون عليه نور
وامجد كال احجيلج وانا اريد اسمع واعرف وما اضل صافنة وأفكر چني مطي
_ ممكن يجذب عليج ؟
_ شنو الغاية ؟ ماكو غاية لا أنا احلى من مرته حتى يلحگ جمالي ولا أنا العندي فلوس وطماع بيهن كلشي ماعندي غير إنه فعلاً يريد مصلحتي
وحتى لو كل هذا ماكو .. فـ لگمة هنيه تكفي ميه
شلت القوري فار المي واخذت البثل مال چاي وطلعت
هو رفع رأسه وابتسم ..ممكن تخدر الچاي بين ما اجي
_اي صار ، شكد اخلي ؟
_خلي ثنين والثالثة مسح وخلي على صفحة لا يحترگ
عفته ورجعت للمطبخ
فاطمة شالت الزلاطه وخالتي واكفه وجهه ما يتفسر
_ خايفة من عشوائيتچ هاي
_ خالة كتلچ لگمة هنية تكفي ميه خلي ياكل الرجال
_اني مو على الاكل اني على التصرف التصرف غلط زهرة وما يرضى بي اي رجال حتى لو جان كواد
شلت خبزه خليتها بحلگي وضحكت .. چا هو گواد ليش مايرضى ضلت صافنه ، شلت جدر الدولمة وطلعت .. ممكن تگلبها ولو تعبناك
_ لا يابه شمسوي ، جيبي الجدر حار عليچ
اخذه من ايدي وگلبها صفگت فاطمة وهو فرح عبالك مسوي إنجاز
اجتي خالتي وبأيدها البيبسي والخبز ومبتسمة
گعدنا او التمينا على سفرة وحدة واخذتنا الأحاديث
من اعجابنا بالدولمة .. لسوالف قبل والضحك اخذنا
ومرينا بكل دهاليز الاحادث الي راحت
السفرة بقت وگلاصات الچاي بأيدنا .. فاطمة كملت وراحت نامت وبقينا احنى التلاثة .. چان يحچي بموضوع ماعرف ما انتبهت شنو قاطعته وعيني عليه .. يلا احچي
سكت وصفن اخذ القوري ورجع زاد الچاي .. شحچي
_تحچي الي اجيت علموده
_ اي فعلاً تدرين نسيت لان هواي تونست والموضوع هذا يغثني
ردّت خالتي.. راح يغثنا حتى احنى يمكن بس احچي لو الموضوع يفيدنا
_ نور مريض .. المرض مو عضوي
المرض نفسي ، نور عايش بأوهام ما الها وجود
_يعني؟
_ اكلچ شنو يعني …
_انت انسان فاشل فاشل فاشل ولا تحاول تصير مثلي
الكرك چان بالگاع شلته وتوجهت عليه .. وانت بشنو ناجح حتى اصير مثلك
صاح بوجهي وهو يملخ بنفسه .. ضابط اني ضااابط وعندي فلوس وسيارات وأحسن منك انت ترعى غنم وعندك كاع تزرع انييييي نووررررر الدين احسن منك انت
_نور روح منا لا اخلي الكرك برأسك واشوفك اني فاشل
_ اعترف بفشلك ولك اعترف ومن ردت تصعد عليه رحت اخذت وحدة معجب بيها
_ اصحى انت مو ضابط انت خلگ جندي
والبنية الي ردتها انت بلسانك كلت ما چنت تدري هي خطيبتي
تقدم عليه يضحك ووجهه انكلب اسود من كد ما ضغط على أعصابه .. لا .. لاااااااا لاااااااا ولك لااااا مو جندي اني مو جندييييي ضابط ضابط عندي رتبه هناااا چتافي شايله رتب
چتافي تگول الملازم الاول نور الدين نور الدين الضابططط
ومرتك حبيبتي ضحك ورجع يحجي .. حبيبتي اصلاً اموت عليها
ذبيت الكرك ورحت ركضتله لزمته من ياخته وصحت بوجهه … سكراااان شبيييييييك
دفعني بكل قوته وضحك وحط ايده على عيونه وگام يبچي
ضليت صافن ماعرفت شنو أتصرف
كعدت بنفس مستوى ورفعت رأسه وهو يهز چتافه من البچي
صوته چان يقهر وهو يبچي مدنگ رأسه وأيده على رأسه ولازم شعره بقوه ويبچي .. كلشييي ماعنديييييي امجد كلشيييي ماعندييييي اخخخخخ گلبي يمه كلشي ماعنديييييي
ماريد اعيش كلشي ماعندي دخيلك اكتلني وخلصني من نفسي تعبت تعبت من الچذب تعبت من التلون هذا
تعبت واني أتظاهر .. لا تعوفني دخيل ربك ما تعوفني
لزمته من چتفه گومته اخذته لبيتي ودخلته
چان يرجف ويدور بجيوبه .. شوف جيبي اكو حباية اريدها
_شنو من حباية ؟
مسح خشمه ودموعه.. بس شوفها اريدها ضروري
لگيت الشريط وانطيته اخذ بلعها بدون مي
گمت جبتله مي رجعت لگيته نايم نومه الطفل وحاضن نفسه ويتهز ويبچي
كعدت بصفه وماعرف شكو وشبي
_ لا تعوفني انت الصح واني الغلط اخذني لدربك
خليني أتعلم منك .. تعبت امجد اخوية انت لا تعوفني بلهدنيا وحدي الله عليك لا تعوفني
ضل يحچي ويهذي وغفى من وحدة
غطيته وضليت كاعد يمه .. اخذت الشريط وبحثت
طلع حبوب مهدئه قوية
مافهمت لشنو وليش بس بيومها عرفت نور مو طبيعي
_ أنا وخالتي صافنين وهو يحچي ومقهور
_وقبل زواجكم بيوم ..
_لا تضيعها نور انت مو مال زواج
اتزوج وحدة من كحابك عوف عووووف زهراء ، زهراء تعبانه بدنياها لا أتعبها زيادة
جگارته بحلگه وعيونه على السريع
_ شتريد أبقيها الك ؟ حتى هم تتزوجها وتصير عندك كلشي واني ارجع بأيد فارغة
_ هسه اطلگ مرتي وابيع گيعاني وانطيك الي تريده
ولو روحي تريدها اخذها ، إذا هلشي يريحك اسوي وما يرفلي جفن بس گلي شبيك وشتريد .. ولا تخلي زهرة بالدوامة الي انت بيها
_لا اني زهرة اريدها حبًا مو احتياج يعني اطمئن اني مو مثلك ردتها لان استعطفت وضعها .. وهم راح تخليني استقر وما تترك ايدي لان تحبني
_وين تعيشها ؟
_اكدر افتح بيت ثاني اكدر ااجر يعني واكعدها هي وأختها
او البيت المتعدين بي ادفع ايجاره اني
_ مو حل مو حل هذا نور مو حل
تدري بأمك رافضتها وتدري ببنت خالتك متعلقة بيك
عوف زهرة خلنعوفها اثنينا ونمشي من حياتها نهائيًا
ونساعدها من بعيد انت ، اتزوج بنت خالتك واني ابتعد عنها والتهي بحياتي
هي ما تحتاج حمل فوك حياتها الخربانة
ووجودك راح يخربها اكثر حتى لو تحبك من زمان
نهض نفسه ورجع لسيارته
_امجد .. لاتتدخل بأمور تخصني يكفي اني ما ادخلت ولا بأمر يخصك .. خليني اسحب روحي منك وابطل احتاجك واشوفك البطل الخارق الي راح يحل كل مشاكلي
زواجي ومن عدمه من اي وحدة .. انت لتخلي روحك بي نهائيًا وخلينا أصدقاء وبيناتنا السلام
وباچر عرسي
شغل سيارته وعافني ومشى
بوقتها رحت لامه .. وكالتلي نور ما يگدر حتى يتزوج
لا انت ولا بنت خالته بسبب مرض عنده
وچان المرض ضعف .. وهلشي مسبب اله أزمة نفسية صعبة
استفسرت بالموضوع اكثر وطلع يتابع ويا دكتور نفسي
وطلع عنده اضطراب نفسي .. اسمه ثنائي القطب
_نور مريض ومتشوهه داخليًا يا زهرة .
