رواية بديلة اختي الفصل التاسع بقلم خاتون الكعبي
شاهين بستغراب : ليش جدي اشسوت
الجد بعصبية : كول شما سوت ليكتهة واكفة وية الصكط عماد بشارع والأناس رايحة رادة تباوعلهم وما شألله هية اشونهة سمعت عماد بالمنطقة حتة توكف ويا
مرسلين : اباوع علة شاهين عيونة كامت تجدح من العصبية وربي خفت منهة خرووب انوب جدو كام يشعلهة اكثر واكثر واول مأجة يحجي شاهين دخل محمد شكرت ربي الف لمن شفتة لأن شاهين مبين ما ناويلي علة خير باوعلي بستغراب وسلم وكعد رجعت عيني علة شاهين وشفتة بعدة عصبي وعروك ايدة وكصتة ناطات من العصبية خفت من نظراتة فكلت لمحمد بسرعة انه يوصلني قبل لا اترزل منة كلي محمد ماشي واول مراد يكوم كعدة شاهين وكلة اني اوصلهة كال هيج وخزرني وطلع بلعت ريكي بخوف وطلعت ورة هوة يمشي واني ورة اباوعلة عبالك يركض والغربية انة مكال اي شي طول الطريق الحد موصلنة ودك الباب طلع اخوية اشرلي ادخل وسلم علة اخوي وراح وعاط بوجهي اخوي لأت اتأخرت كتلة جنت بيت جدو ودخلت وكل عادة استقبلتني امي برزالة والعياط لأن متأخرة ما خلتني احجي الحد ما سكتت يلة اكدريت احجي وياهة وكلهة مريت علة بيت جدو سلمت عليهم اباوعلهة سكتت وكامت دردم بينهة وبين روحة خررب حظي كلت هيج وصعدت الغرفتي بدلت ونزلت ساعدت مرت اخوي بصب الأغدة ورحت صحت ابوي وخواني تغدينة وغسلت المواعين وصبيتلهم جاي وصعدت الغرفتي طلعت كتبي وبديت ادرس للعصر يلة كملت دراستي ودخلت اسبح اني بالحمام واسمع المبايل ايدك كلت اطلع وشوفة بس ما سكت بالخمس مكالمات قليل لبست ملابس اشون ما كان وطلعت اشوف منة شلت تليفوني وطلعلي ست مكالمات فائتة من رقم غريب ممسجل عقدت حاجبي بستغراب ورجع دك بيدي مجاوبتة وهم رجع دك كلت اجاوب يمكن تطلع وحدة من صديقاتي لو بنات عمي واول مفتحت خط اجاني صوت ابنية وهية تسب وتفشر بنواع السب والغلط فتحت عيوني بصدمة علة حجيهة حتة تقى مجانت تفشر هيج افشار وعطت بيهة بصوت شبه عالي
مرسلين بعصبية : انتي هيوو اشهل غلط احترمي نفسج ولا تتجاوزين احدودج اعرفج تعرفيني حتة تحجين وياي بهل طريقة
: لججج ب*** امل زلمم هسة جاااي تستشرفينن بررااسي شنوو عبالجج اعوووفلج يااا اذاا طلكنيي لا والله ما اخليجج تتهنين بيي ورجججعة وخللي يطلكج بتل الفكرر الس*** ال..
مرسلين : هية تحجي واني ضالة مثل الطرش بالزفة كولشي ماكو الحد مكالت ايطلكج عرفتهة تقصد علة شاهين ولمن بدت تتجاوز بالكلام غلقت الخط بوجهة وسويتلهة حضر واتصلت بشاهين اباوع علة ادية كامت ترجف من كثر العصبية الحقيرة اشون تحجي وهذة الحقير الثاني اتصل بي مرة مرتين ميرد المرة الثالثة يلة رد واجاني صوتة عبالك جان نايم وكال بكول برود
شاهين بصوت خشن: اشتردين
مرسلين بعصبية مكتومة : من باجر تجي واطلكني
شاهين : ههه حاضر تأمرين أمر
مرسلين بحدة : مجاي اشاقة وياك كتلك ورجع وكول من باجر تجي واطلكني فااهم
شاهين برود : احجي عدل لا اجي اكسرج وشبيج شنو اطلكج تخبلتي
مرسلين : مو تايهتلك حتة تجي تكسرني واي تخبلت من باجر اطلكني وسوالف النسوان مالتك لا ادخلني بيهة وقسماً باله اذا دكت علية وحدة ثانية اكول الجدو وتوقع هذة سبب كافي حتة يطلكني منك
شاهين : شه...
مرسلين : سديت التلفون بوجهة قبل لا يحجي ويبرر مريد حتة اسمع صوتة وشمرت التليفون علة الجرباية ورحت مشطت شعري او بل حرة عتيتة عت بيحث نصة وكع بيدي ولفيتة كعكة ونزلت جوة اخواني وابوي طالعين وامي كاعدة وتخابر بخالاتي اتأففت بضوجة ودخلت للمطبخ حتة اسويلي شي اكلة جوعانة و...............
___________
اوتار
اوتار : ليش حبيتك
محمد بستغراب : شنو
اوتار : شنو شنو دا اكلك ليش حبيتك شنو بيك ينحب او يخليني اعشقك بهل طريقة شو مغرور متسلط بارد مستفز مزعج وفوك هذة كولة تحب وحدة ثانية ودايماً تزعجني بكلامك فليش حبيتك
محمد برود : خبلة
اوتار بستهزاء : ههه فعلاً خبلة حبك خبلاني تعرف شنو اقصة امنياتي هسة
محمد : شنو
اوتار بقهر : انساك كمت اتمنة اكعد اصبح وحبك ماكو بكلبي مختفي اريد اعيش حياتي بشكل طبيعي مثل اي بنية عادية تحب وتنحب وينتهي قصت حبهة بزواج واطفال وعائلة علة او علة الأقل اكرهك
محمد : ههه تمني بس صدكيني تبقة امنيه ومستحيل تتحقق بيوم وتنسيني او تكرهيني
اوتار بسخرية : واثق من نفسك اهواي
محمد بغرور : دكتور محمد حسن ال** اشون ما اكون واثق
اوتار : ومغرور
محمد : شي اكيد من حقي انغر
اوتار : وغبي
محمد بحدة : اوتاار
اوتار : ههه خلص اسفة اشاقة
محمد : باوعتلهة ورجعت عيني علة الطريق
اوتار : رجعت التفت علة الجامة صفنت علة الطريق وكلت
اوتار : محمد
محمد : ها
اوتار وعينهة ع الجامة : احبك
محمد بسخرية : اعرف
اوتار : ابتسمت علة جوابة الي ما بيوم حيتغير وسكتت الحد موصلنة البيتنة وصفت السيارة بالباب دخلت وهوة وراي وسمعت صوت عالي جاي من الستقبال واول مردت ادخللهة عاط بية محمد وكال صوت زلم اشعتدج داخلة كتلة مادري ودخلت للصالة سلمت علة بيبيتي وامي وسئلتهن منو عدنة بالستقبال كاللي وشاهين ومرسلين
عقدت حاجبي بستغراب ودخلت ابدل و.........
_____________
تقى
شايفين النار لمن تحركك واشكد ما تحجي للناس عن الوجع الي صايبك منهة ويواسوك بس همة محاسين بيهة هيج جانت حالتي محتركة بداخلي جمر بس محد يكدر يحس بية هاي امي اراحت مو وحدة غريبة حتة بين يوم وليله انساهة ورجع امارس حياتي بشكل طبيعي انكسرت تقى القوية فعلاً انكسرت بموتت امهة احس راحت قوتي راح مصدر اماني وسعاتي امي جانت بنسة الي كولشي بهل حياه بير اسراري وسعاتي تعرفني من ادق تفاصيلي وهية الوحيدة التقبلتني بل حالة الجانت عندي مال سب بوقت جانت الناس كولهة تنتقدني ومن ضمنهم ابوي بسبب هل حالة ههه وراحت هل حالة وية روحتهة صرت روح بالجسد ابتعدت عن الكول غرفتي جانت ملجئي الوحيد صرت شبه فاقدة بسبب الأبر المهدئة الجنت اخذهة جانت هية الوحيدة التريحني وتخليني افقد ولو ساعتين حتة ما افكر بموت امي صرت اخذهن بشكل مبالغ بي في سبيل اني افقد وانسه موتت امي الحد ما كطعوهن مني بوكتهة تخبلت عيطت صرخت بجيت ردت حتة كصيت شعري صرت بحالة هستيرية ومع ذالك مقبلو ينطوني ياهة بس بقة مفعول المخدر بجسمي لأن جنت اخذة بشكل مستمر وصابني خمول بشكل مو طبيعي وهوة هذة الأريدة ما اريد احس او افكر بس اريد انام افقد عن العالم كلة فزيت اليوم من كابوس ثاني ابشع من الأول اباوع
ع الساعة بتلاثة ونص العصر احس ريكي ناشف جريت الشال ونزلت اجيبلي بطل مي مريت من يم الصالة وشفت عمتي ام مسلم كاعدة وبصفهة اختهة المطلكة وبتهة وهاي الثانية كثرانة جياتهة اهنا بين يوم والثاني ونطتنة مدري شعدهة اباوعلة بزمن هية وبتهة لمن شافني وسلمن علية بس ولا عبرتهن ودخلت للمطبخ اخذت بطل مي من الثلاجة ورجعت صعدت فوك واول مدا ادخل الغرفتي طلع مسلم شافني وابتسم مهتميتلة ودخلت للغرفة و......
_______________
اوتار
قدمت الجاي البيبي وجدو بس نظراتهم ما رتاحيتلهة همة وامي عبالك اكو حجي بكلبهم بس ميكدرون يحجو كعدت بصف اخوية عادل وكدامي محمد وبدة جدو يحجي عن الشغل والمحلات الحد موصل الموضوع الزواج اشلون وليش معرف الحد ما بدة جدو وعمي يحمدولي برعد يلة وضحت عندي الصورة ونهة امي النقاش وهية تكول انو ام رعد الصبح اجتهة ورايدتني لأبنهة مدري ليش بس صار عندي فضول اشوف شكل محمد رفعت عيني علي وشفت ملاحمة باردة ولا كأنو اكو شي صاير معرف ليش بس ضجت بوكتهة ونقهرت يعني معقول متأثر ولو واحد بالمية وردت فعلاً اضوجة مثل ما ضوجني فتحمحمت بخجل وكتلهة ان شألله افكر وكلج اشو هذة نفس الشي وبلعكس ابتسم مثل الي يستهزاء معقول الهل درجة ما اهمة عيوني غرغرن دموع هوة ترخص وطلع ترخصت منهم بسرعة وكمت طلعت وراه وقبل لا يطلع برة صحت علي وكلت
اوتار بقهر: معقول الهل درجة ما مهتملي
محمد برود : وليش اهتم مفتهمت
اوتار : يعني عادي عندك اصير علة ذمت واحد غيرك
محمد : ههه اوتار اني وياج نعرف انج مراح اتقبلين بي بعد شهل حجي المالة داعي
اوتار : وشلي خليك واثق اني ارفضة
محمد برود : لأنج تحبيني ومستحيل تفكرين بواحد غيري
اوتار : بس انته متحبني ولا حتحبني بيوم لهيج اتوقع انو من حقي اشوف حياتي وية واحد غيرك صح
محمد : لا غلط
اوتار : اباوعلة عافني وطلع بكول برود ااااه تعبت تعبت وربي اشوكت ايحس بية اشوكت تنهدت بقهر علة حالي ودخلت جوة ضليت كاعدة وية بيبيتي الحد ما صار المغرب رحت سويت عشة وية مرت عمي تعشيت وغسلت المواعين ودخلت الغرفتي كملت تقريري وحضرت ملابس الأروح بيهة باجر واول ما ردت انام دك مبايلي اباوعلة فجر ادك تأففت وجاوبتهة وكلت
اوتار بضوجة : ها خيرج شعدج داكة علية بهل ساعة متكولين اكو حيوانة تريد تنطمر
فجر : ههه ها ها شبيج منو الكاتلج حتة جاية اذبين حركتج بية
اوتار بعصبية : فجرر تكولين اشتردين لو اسدة
فجر : هههه لا خلص حكول
اوتار : يلة فضيني
فجر بفرح : حخطب
اوتار : خررب اضلين ثولة طول عمرج قصدج خطبوج ومنو تعيس الحظ
فجر : هههه يعني منو غير فادي ولا مو
ثولة بس فعلاً حخطبة او بالصح خطبتة
اوتار : ههههههه عود صدوك تحجين لو تشاقين
فجر : شوفي هوة جان شقة انوب انكلب حقيقة
اوتار : اشون يعني
فجر : شوفي مساعة جنت احجي ويا وجنة نشاقة فكلت ابسمرلة بموضوع الخطوبة وضربلي عصفورين بحجر واحد عود صرت ذكية بس كشفني وتفشلت منة والحمد لله تمت الخطة بنجاح وحس علة دمة وكالي حدز امة وخواتة باجر وذا وافقو اهلي انسوي الخطوبة بنهاية الأسبوع
اوتار : ههههه خررب وربي خبلة بس يول مو جنكم مستعجلين
فجر : ع بختج يا مستعجلين من المتوسطة واني احبة وهوة عبالك احجارة ميحس وبعدني الحد الأن ما مصدكة انة اعترفلي بحبة واصلاً احنة مراح نزوج هسة الحد ما نتخرج اثنيناتنة من الكلية يعني تخيلي حنتظر اربع سنوات
اوتار : ههههه خررب عقلج بابة اثكلي عيب
فجر : خاب ما تنجبين ام العيب
اوتار : هههه علة كولاً حب الف مبروك ويوم النفرح بيكم وبجهالكم
فجر : امين يارب من حلكج الباب السمه
اوتار : ههههه خررب بيج يلة ولي خل انطمر
فجر : وطمرتهم يلة باي
اوتار : ههه بايات كلت هيج وسديت التليفون الله يتمملهم علة خير ان شألله ما تستاهل الة كول خير حطيت تليفوني ع الميز ونجطلت ع الجرباية دقايق وغفيت و.................
______________
تقى
نايمة وما احس الة بمي بارد ع وجهي فزيت فزة من مكاني وشفت مسلم واكف ويباوعلي ببتسامة وبطل المي بيدة باوعتلة بحقد وعطت بوجهة اباوعلة ولا هتملي ودار ظهرة وكال قبل لا يطلع من الغرفة
مسلم : حضري نفسج ربع ساعة ولاكيج جوة اوصلج للمدرسة واطلع الشغلي
تقى برود: ومنو كلك اروح
مسلم : ربع ساعة اذا ملكيتج جوة اصعدلج وسحلج بملابسج هاي للمدرسة وتعرفيني كلش زين اسويهة وما يهمني شي
تقى : كال هيج وطلع ركعت المخدة ورة بغيض ودخلت غسلت ولبست ملابس المدرسة بس هل مرة تبدل الون الأبيض بالأسود ابتسمت بسخرية واني اربط الدنبوس بالشال وجريت جنطتي بتعب ونزلت جوة شافتني عمة وبتسمت بوجهي صبحت عليهة واشرلي مسلم اكعد اتريك كتلة برود ما اريد ورحت البابة دخلت للغرفة وشفتة نايم ابتسمت وطلعت دوة الضغط وبطل المي وحطيتهن يم راسة هل ايام سودة علية الضغط معلك عندة ما ينزل وما بية حيل اخسر واحد ثاني وبست راسة وطلعت شفت مسلم مكمل ريوكة طلع واني وراه ركبت بالسيارة وصلني للمدرسة واول ما دخلت للمدرسة شفت بوجهي مرسلين اباوعلهة نصدمت بشوفتي وركضت علية وحظنتني بادلتهة الأحظن ودخلت للصف والتمن البنات علية يعزني وشكد كرهت بلحظتهة نفسي ونظرات الشفقة البعيونهن كوات صبرت نفسي حتة ما اهجم علة وحدة منهن ودكت الجرس ورجعت كول وحدة ارحلتهة ودخلت مدرستنة و.............
___________________
اوتار
كاعدة ع الأستيج والقهر كاتلني واني اشوف نظرات البنات علي وهوة يشرح وحدة تهمس لأثانية بأسمة لو براد بيت مو هيج معرف اشون لزمت نفسي حتة ما اتهجم علة وحدة منهن وشوهت وجهة الحد ما خلصت محاضرتة اني اشاهد واول مطلع زفرت انفاسي بعصبية وجريت فجر وطلعنة كعدنة بالحديقة دقايق وصار الي اسمه فادي فوك راسنة سلم ولزك يمنة وربي لو مو عيب جان طردتة اباوع علة فجر اكلتة بعيونهة وربي لو مو عيب جان اغتصبتة كدامي صديقتي وعرفهة وشون اني محترك كلبي وهذولي يتغومسون كدامي ترخصت منهم ورحت للسنتر شفت المكبلين كاعدين وكل واحد لازم ايد الثاني ابتسمت معرف ليش تخيلت اني ومحمد هيج معقول يجي يوم ويتحقق هه مستحيل كلت هيج ورحت اشتريت اثنين كهوة وبجهي المكتبة وصلت وفتحت الباب بسرعة ودخلت للمكتب واول ما رفعت عيني علي ضليت مصنمة ابمكاني من الي شفتة وبس اعيوني الترمش اباوعلة كاعد والدكتورة سهى ورة وحاطة ايديهة علة جتفة مثل الحاظنتة وراسهة ع جتفة واول مشافتني وخرت منة مثل المنحرجة رجعت عيني علي ولا حرك ساكن وطاغي ع ملامحة الجمود باوعلي وكال بحدة
محمد : اشلون ادخلين بلة مدكين الباب
اوتار بسخرية وصدمة : هه اسفة دكتور مجنت اعرف حضرتك بوضع حميمي وية الدكتورة اعتذر
محمد بجمود :..........
______________
مرسلين
نايمة وما احس غير بصوت اعياط مرت اخوية واخوي ادري شنو المشاكل بهل بيت ما تخلص كمت ولميت شعري ونزلت شفت مرت اخوي واكفة بنص اصالة وتعيط واخوية يريد يهد عليهة شكلة المشكلة جبيرة رحت دخلتهة اني وامي للغرفة وابوي جر اخوية محسن وطلعة برة دقايق ونكلب بيتنة كلاب جدي وابو شاهين ولولد كلهم جاين ادري مشكلة بين مرة ورجال انتم اشدخلكم بنص وسئلت امي شكو شبيهم كالت اخوج خاينهة ابتسمت بسخرية اخوية خاينهة واجونة اخوانهة وابوهة هادين هيج اشو احنة تنسحل كرامتنة بالكاع ومحد من اخواني يفك حلكة سكتت واني اشوف بيبيتي وعمتي يدخلاً ورحت سلمت عليهن وقدمتلهم الجاي وللعصر يلة فضت السالفة وراحت مرت اخوي وية اهلهة حتة ترتاح لليل طبت اختي هدى تعيط وتبجي دخلناهة جوة ولتمو ابوي واخواني عليهة وعاط بيهة ابوي وكال
ابو مرسلين بعصبية : اهددي وكافي انواح وفهميني اشبيج
هدى بدموع: بابة.. حي.. حيدر داعملة واحد والشرطة اجت.. اخذتة.. يكو.. يكولاً يم. يمكن ميت
مرسلين :...........
_________________
شاهين
طلعت من غرفة التحقيق واني احس راسي مسطور سطر من ورة هل هوسة واول مردت ادخل المكتبي الشرطي كلي
: سيدي مرة اجت سئلت عليك وحالين منتظرتك برة تريد تحجي وياك
شاهين بستغراب : منية ما سئلهة ع اسمهة
: لا والله ما اعرف وسئلتهة بس ما رضت اتكول او تحجي شي الة اشوفك
شاهين برود: دخلي ياهة كلت هيج ودخلت الغرفتي لحضات ودخلت علية بااوعتلهة بحدة وكلت
شاهين : اجابج
: كلبي جابني احبك تعرف شنو يعني احبك والله من غيرتي عليك اسويتة ابووس ايدك لطلكني كلشي اسويلك بس لطلكني وذا تريد اروح واعتذر من...
شاهين بصوت جهوري : لاا اجيبين طارريهة علة الساانج مفهووم ومن باجرر اطلعين من الشقة واتنطين مفاتحيهة الأبو سالم ويومين وتجيج ورقت طلاكج واياني وياج اشوفيني خلقتج مرة ثاني ترة عديتلج ياهة المرة الفاتت بمزاجي بس وحق الحق اذا تكررت متلومين الة نفسج
بدلع : ويوهون عليك تعوفني و.. قاطعهة شاهين بحدة وهوة يكول
شاهين : صبااا ستري علة نفسج وطلعي لو تردين اجربين السجن بعد بيكفج
صبا بدموع : شاهين احبك والله احبك وما اريدك اطلكني ابوس رجلك بس لا اطلكني
شاهين : اباوعلة نزلت تبوس رجلي دفرتهة وصحت الحارس يطلعهة طلعهة وزفرت انفاسي بشمأزاز كلجن نفس الشي ما تحبن الة نفسجن كلت هيج وبديت اشتغل ع اشكم ملف ورة ربع ساعة تقريباً اندك الباب صحت ادخل ودخل الشرطي وكال قبضنة ع اشكم واحد مطلوبين كتلة دخلهم واول ما سديت الملف ورفعت عيني ع الدخلوهم اجت عيني بعينة ابتسمت بسخرية هذة الفضلتة علية هسة واكف يرجف كدامي مثل الجريذي والله دنية كمت من مكاني وكلت
شاهين بستهزاء : هلة بحيدر عاش من شافك بوية
حيدر بخوف: هلة بيك سيدي
شاهين :...........
