رواية الرجل الاخر الفصل التاسع بقلم جوهرة
ضليت مدنگه ما رفعت ࢪأسي وجان يباوع بكل حذر على كل تفاصيل بيه .
منير /
رجعت للبيت خطواتي ثكيله اسحبها سحب والافكار براسي لاعبه لعب احجي ويه نفسي ، شسويت اني جاي احط نفسي بموقف صعب !! خبل اني ليش ماطلكها ؟!!!
واتخلص من عصام وعصابته ليش اغرك روحي بحياتهم ومشاكلهم بس البنية اعتمدت علية ماريد اخذلها متستحق اضحك عليها ، اااااخ والله عندي احساس بكارثة راح تصير
ملاذ مو بالبيت ادري بيها بالدوام عندي معلومات كامله عليها واعرف كل تحركاتها ، باوعت بساعة ايدي ب٧ اكيد عدها خفارة
دخلت لغرفتي طلعت ملابس ومنشفه ودخلت للحمام.
ـــــــــــــــــ
عصام من قابل طلال شافه عصبي وعيونه مليانه غضب اول مدخل للمكتب زمخ بي طلال / الله يلعنك شوف وين وصلتنه .
عصام كعد عالقنفه ودنك راسه صدك كلامه وين وصلت ااااخ .
طلال رجع يحجي / ولك اتصلت بيها العصر تكلي ما اطلك منه اتفقنا نبقى سوا ، هاااا سيد عصام ارتاحيت هسة
طلال جان اعصابه فايرة خاصه من اتصل على اخته وضحت متقبل بالطلاك .
حس بيها دكت العناد بعدما جبروها عالزواج
اخته ومربيها على ايده يعرف من تصر على شي.
عصام الوجه انكلب احمر من القهر والعصبية / والله اقتله هالحقير التافه خلك عامل اني سويت براسه خير
نتر بي طلال / كااافي لخاطر الله كاافي السويناه والله اني ندمان بكد شعر راسي من سمعت كلامك بعد ما اتصرف الا اخذ رايها وما اوكف ضدها ، عصام صح انت صديقي بس ترى هواي عبرتلك على حساب اختي وهذا اكبر غلط اني سويته
عصام تعبان نفسيا بعد اللي صار / طلال...هاي انت هيج تحجي.
طلال بايع بوزه عليه / هذه اختي امانه عندي وادمرت هواي بسببك ، خلها تعيش حياتها مثل متريد هي عاقلة واعيه تعرف تتصرف لاتتدخل بعد.
انفعل عصام / شلوووون ؟!!! لك ماريد اتخيل ينام وياها !!! يااااربي مجاي تفهمني انت
طلال رجع ظهره عالكرسي منصدم بهستيريه عصام جان يرده / عصااااام شنو هالخربطة كمت متعرف تسولف اثنين مزوجين شراح يكون بيناتهم برأيك ، كافي بعد لاجيب طاري اختي افهم بعد حرمت عليك وهسة بذمة رجال ثاني ، اعقل واتقبل الخسارة ولا تنسى انت اللي جبته وخليته بطريقها
كام عصام وهو يتنفس بقوة / هذا اخر كلام عندك ؟!!!!
هز راسه بدون ميردله وبداخله يفكر بتصرفه ويكول والله تخبل الرجال.
طلع عصام من المكتب مخذول مجان متوقع طلال هيح يحجي !!!!
ـــــــــــــــــــ
ملاذ /
حست بمنير يراقبها واكفه تسوي ريوك بعدما رجعت الصبح من المستشفى . گلبها فز من حسته واكف وراها نترت / شبيك يا اخي تنحنح فعلا فززتني
تقرب وكف بصفها وبين فرق الطول بيناتهم جان توا كاعد من النوم شعره القصير مخربط لابس برمودا وتي شرت نص ردن ، بلعت ملاذ ريكها هذا شبي اشو ماخذ راحته لا ولابس برمودا والجو يكصب تكصيب من البرد !!!!
ملاذ جانت لابسه تراكسود نيلي قديفه وبي رسومات بصدر بلوزة التراك جرت البلوزة جوه استحت لان
التراك كصيف وجسمها بارز
انتبهت يحجي وياها بهدوء / اسف ممتقصد اخوفج
بقى يراقبها تحضر بالميز وصبت كوبين جاي وكعدت
رفعت راسها وطلبت منه / تعال تريك
حك راسه وابتسم بتك خد / اروح اصلي الفجر ممصليها.
ميلت راسها وبدت تتريك .
مندمجة تمسح الزبده بالصمونه من كعد كبالها وبدا يتريك كامت واخذت الكوب / اكيد برد الچاي اصبلك غيره.
ابتسملها بود / يسلمو
أخذه من أيدها وبدأ يشرب بالجاي بهدوء ويراقبها ،، شكد ناعمه وحلوة بشرتها صافيه وخدودها ورديه تجبر المقابل يركز بيها
التقت عيونهم وجان ممستعد يغض نظره عنها
هو من كعد الصبح واحساسه بملاذ غير شكل تعود عليها صار ايام سوا .
حط الكوب على جهة وراحة ايده خلاها عالميز.
منير / خلينا نحجي احنا اشخاص كبار واعين وبما انه احنا عايشين سوا نفس البيت لازم نتكلم
ملاذ صافنه بطريقة كلامه بداخلها متفاجئة بي !!! اسلوبه كلامه كله رزانه ولباقه زين شلون يشتغل عامل يسوي جايات وكهوة لعصام الاثول ، احتمال خريج وعنده شهادة ومضطر عالشغل
رادت تساله بس محبت اطوخ علاقتها بي
فردت على كلامه بكل برود الدنيا / ماكو شي مشترك بيناتنا ومابيها داعي نسولف
رد وهو ممتفاجىء بكلامها / ملاذ من كلت اعتمدي علية ترا اني كد حجايتي
ملاذ ضحكت باستهزاء وهي تردله / ههه اعتمد عليك لا ما اعتقد ،، ومنو حضرتك ترا اني ممحتاجه بس لرب العالمين لان فقدت الثقة بيكم شتفرق عن بقية الرياجيل شتفرق عن طلال وعصام ، طلال اخوية اللي رباني وبكل سهولة انطاني لعصام ورجع وافق على اقتراح عصام يزوجني لجنابك خاطر اكلك وارجعله ، شفت أكثر من هذه المهزلة !!!
ابتسملها وكلامها ما اثر بي واثق من نفسه راح يسعدها / ماكو مجال للمقارنه صدكيني انتي جربيني ومراح تخسرين شي صدكيني مراح اخذلج واني كد حجايتي .
دققت بوجهه محتاره / ليش اصدك بيك واحنا راح ننفصل
رفع اصبعه يحذرها / لا تعيدين هذه الحجاية لان مراح اطلكج ،
لا عبالج اني عصام اللي يتحمل استفزازج وكلامج مثل السم ،
ترى جنت موجود وشاهد على حواراتكم انتي وياه
رمشت بعيونها متفاجئة ومصدومه / شنو قصدك.
ردلها بكل برود / قصدي واضح اسمعيني زين قبل ايام وكفت بوجه عصام ورفضت اطلكج تدرين ليش مو لان اتفقنا ننطي درس لااااا لان اني مراح اتركج ابد وراح تبقين على ذمتي
ملاذ كمزت مثل الملدوغه والكرسي انركع بالكاع طلع صوت قوي صرخت بي وهي فاقده لاعصابها / يا كلب ياحقير واني الوثقت بيك
عيونها تريد تاكله والغضب يشع بيهن / منيرررر اتفقنا ، فخليك رجال كد المسؤلية
جر نفس وذبه / والله اكون نذل اذا عفتج انسي حبي انسي اعوفج.
زمخت بي متقززة / اني مو حبك
مد ايده ولزم ذراعها حاولت تبتعد بس ثبتها بمكانها بقى مركز بعيونها المشتعله نار حس بغضبها منه بس لازم يكمل اليريده / انتي مميزة ملاذ ومستحيل اتخلى عنج
حاولت تبعده قرفانه من الوضع اللي خلت نفسها بي / عوفني شتريد تسوي
jawhara_2028
قرب وجهه يريد يبوسها ، رفست رجله بقوة خلته يرجع للورا وشتمها / ااااخ ايا حماااارة
رفعت تك حاجب وحذرته / اياك تتقربلي
خزرها وبنترة / شلون جان عصام متحملج والله كمت اتعاطف وياه شلون جان عايش وياج ؟!!!
حجت بقهر / متوهم مجنت اخلي يلمسني
استهزا بيها وهو يضحك / ههه لاا شنو هالقوة ماشاء الله والله انتي اكبر جذابة ، جذابة بس حلوة تنكرطين كرط ..اشرلها بعيونه على جسمها
ملاذ استحت من نظراته الجريئة .
كمل وهو يحاوطها بنظراته / ملاذ ماكو رجال عنده عقل وصاحي يعوف هيج انوثه وجمال الا اذا كان شاذ لو ماعنده الرجوله الكافية.
بقت ادحك مذهوله من كلامه وكانما لمس وتر حساس ، ردت عليه وهي تطلع من المطبخ منهزمة / ماكو داعي لهذا الحجي اني كلت العندي وانت افتهم الاريده.
قفلت باب غرفتها وتروح وترد بالغرفه متوترة لان لمسها وحجى وياها بهذا الاسلوب متقصد الحجاه يريد زواج حقيقي ..
ضربت على راسها بقوة..غبية غبية غبية شلون امنت بي .
گلبها يخفك بعنف فاجئها يريد يبوسها لااااا بعد ما اتقربله ولا ابقى يمه هذا خطير .
،،،
انتبهت من النوم على دكات قويه عالباب رفعت راسها من المخده باوعت عالساعه يوووو شكد نمت ، هسة بالوحدة الظهر جرت روحها من الفراش وكفت ورا الباب / نعم شتريد
ردلها منير / يابه موبايلج سطرني مبطل رنين
ضربت كصتها / يووو شكد مطفيه ، ثريا كالت اتصل عليج
حاجت روحها وفتحت الباب انطاها الجهاز
وبقى صافن عليها شعرها الاسود مبعثر لان توها كعدت وممهتمه ترتبه والعيون منفخه اثر النوم بيهن واضح
تقدم عليها جان توكفه دفعته بيديها بصدره حست بالارتباك وهي تلمس صدره القوي كله عضلات وهذا وترها
منير جان جامح ميكدر يسيطر على روحه حجى واللهفه واضحه بنظراته / ااخ ربي شكد مغرية وشهية تدرين شأريد هسة ؟!
مد ايديه وسحبها بقوة هزتها هزت حواسها وگلبها ، كامت ترجف وهو قافل عليها بحظنه حاولت تبعده وين تكدرله هو وطوله وعضلاته وهي مو ذاك الوزن ليخليها ادافع كله على بعضها ٦٠ كيلو ،
محاوطها وبدا يبوسها بلهفه
وشغف توسلت بي وهي ترجف وتلهث وبعدت راسها / اترجاك عوفني
عافها وهو يحاول يسيطر على روحه تنهد / اتأمريني انتي
تفاجأت تركها بهذه السرعه والسهوله يربي ليش كاعد يحيرها ؟!!!!
دخلت غرفتها عالسريع وقفلت الباب وسندت ظهرها عليه گلبها يدك سريع لاااا ملاذ لاتخلي يأثر بيج بس حسسني بمشاعر واحساس عمري ممجربته .
اااه يربي منين طلعلي هذا ..
راح يكلب حياتي فوك ماهي مكلوبه.
منير بقى بالصاله يفتر خطواته متوترة عيونه يبرقن وكل شوية عينه على باب غرفتها
وداخله رغبه ميكدر يسيطر عليها رغبه تجذبه لملاذ
ياربي شنو هاللذة الحسيتها من جانت بحظني جر حسرة وذبها وهو يتخيلها بحظنه .استغفر ربه هذا شكاعد يفكر بس هي على ذمتي حلالي اااخ ااااخ .
،،،
بمرور الوقت ،،
ملاذ اجنبت منير وحمدت الله تكضي وكتها بالمستشفى لان بقائهم سوا يربكها ومنير جريء مبين يريد يتزوجها زواج حقيقي.
خبرتها علا لازم تفكر بحياتها واذا لكت منير رجال زين تواصل حياتها ويا صح ماعنده شهاده ومستواه الطبقي هماتين بس هذا ميمنع يعيشون حياة زوحية سعيده هي شحصلت من عصام
منير هالايام ميشتغل لان عصام طرده بس مرة شافته مرة يحط فلوس بجنطه صغيرة بوكتها استغربت ومن حجت وياه على الفلوس اللي اتفقت وياه تدفعهن..رفض
وعصب عليها كاللها مو بحالهن
يربي لعد منين يحيب هذه الفلوس رادت تساله بس ترددت شمدريها بي يجوز يطلع رئيس عصابه خطف او اي شي هي متعرف عنه شي ، بس للامانه يعاملها باحترام وابد ممبين عليه رجل سوقي او متخلف تصرفاته وطريقه كلامه تحيرها تراقبه من ياكل بهدوء و كانه متعود ومن يطلع من الحمام يتركه نظيف حتى غرفته تدخل بدون علمه
ترتبها تلكاها مرتبه وكولشي بمكانه والله جاي يحيرها شنو هالنظام والترتيب تدري بي رجال بسيط على كد حاله بس الجاي تشوفه رجل اخر رجل خلاها محتاره بي !!!
.......
وصلت لبيت طلال اليوم عدها اجازة وقررت تكضيها بيت اخوها لان مشتاقه لثريا وانس
سالتها ثريا عن منير وعلاقتها بي وحجتله الوضع كله
ثريا نصحتها / اذا تحسين براحه ويا لا تطلكين ولج ملاذ شلون صاك هو وعلى كلامج شخصيته مثل شكله
ملاذ / اوووي ثريا اني وين وانتي وين تحجين .
ثريا / هاي شبيج شفتج ضايجه كلت اونسج.
كضن الوكت سون الغدا وانتضرن طلال يجيب انس ويجي شوي ودخلوا انس ركض عليها بوسته /حبيبي مشتاقتلك
رفعت راسها لطلال الفتح ذراعه الها راحتله حظنها بحب ولهفة وهو يسألها / وين زوجج
ردت بدون اهتمام / مااعرف يمكن عنده شغل او راح يدور شغل.
طلال حجى بتفهم / اي لعد قابل يبقى كاعد لازم يشوفله شغله.
ثريا جرت ملاذ / تعاي عيني نصب الغدا لما يغسلون
كعدوا يتغدون بالمطبخ ملاذ سألت ثريا / شلونه انوسي بالمدرسة .
ثريا / الحمدلله معلمته مكيفه عليه ادكول اذكى الصف
ملاذ / فدوة حبيبي ديري بالج عليه صف اول يكولون يحتاجلهم اهتمام
ثريا / اي والله ، صدك ملاذ المرة الجايه خل منير يجي وياج ، اهتمي بروحج كافي اطويها ورقه عصام
طلال خزر ثريا ميريدها تفتح هيج مواضيع
ابتسمتله تتحايل عليه..شبيك عيوني غير انصحها
ملاذ / تسلميلي يروحي ادري بيج تردين سعادتي.
ــــــــــــــــ
بإحدى المهمات /
مستعدين ..من انطيكم اشارة تتقدمون.
الكل / جاهزين سيدي .
رد نقيب نشوان وجهاز الارسال بيده يتكلم من خلاله
....بعد عشر دقايق اتصل استعدوا.
بدا الوقت يمر بطيء وجماعته متحضرين ينقصون على العصابه عصابه من التجار يوردون اسلحه ومتفجرات كدر نشوان ينصبلهم كمين بمساعده جماعته عدد من الضباط والجنود تذكر ماهر جان ضايج لان استبعده من المهمة .
نشوان ميريده يشارك لان جانت مهمه كولش خطرة خاف عليه ورا مرة وجهال.
ماهر تعارك ويا يكله اني ضابط امن
وحياتي كلها خطر متعود على هذا الشي نشوان ردله وهو يحظنه / ماهر لاتنسى عائلتك تريدك ، بعدين لاتزعل شو يوميه مهمه وخطر جديد يعني على هاي
زعلت ترى المهمه مو ذيج الخطورة .
ردله وبعده متضايق / لاتجذب نشوان ادري زين كولش خطرة
طبطب نشوان على جتفه / اعرفك سبع ورانا مهمات راح انفذها سوا مو بس هاي ترى.
ملاذ كاعدة هي وعلا يسولفن وعلا تسأل بيها على منير وشلون يعاملها ....انتبهن للصوت من السماعه ينادي طاقم
الاطباء والممرضين يحظرون لصاله الطوارىء لان الإسعاف وصلت جرحى .
عالسريع طلعن و شافن معاون طبي فسألته ملاذ .
ردلها مصطفى ..
جماعه بالامن جانو بمهمه .
دحك بنظره خاصه لعلا الجانت مطنشته ومشى عنهن !
الصاله جانت مكلوبة رجال امن ومبينه الشغله خطرة.
سمعت واحد من الاطباء يصيح / بسرعه تعال هنا الرجال راح يموت مجاي يتوقف النزيف.
ركض مصطفى يساعده ونقلوا للعمليات والبقية كلها تعاونت ضمدوا الجرحى والحالات الخطرة نقلوهم لصاله العمليات.
اثنين من الجرحى واحد اصابته قريبه عالعمود الفقري والثاني بطنه هي مشافتهم لان من وصلت جانوا داخلين عمليات.
الساعه جانت ٣ الصبح الكادر هلكوا تعب اجتمع بيهم الجراح شكرهم عالجهد والتعب وبشرهم نجاح العمليه وكدروا ينقذون حياتهم .
تقدم عسكري رتبه وسال الطبيب باهتمام وقلق واضح / شلونه النقيب نشوان .
الجراح / الحمدلله تمام الرصاصتين ممأثرات بعموده الفقري والضابط الثاني جانت قريبه عالمعده وهسة تحت المراقبه بالعنايه المركزة
ماهر كعد عالكرسي بالممر مقهور .
انتبه لموبايله يرن ، فتح خط ورد / سيدي ...الحمدلله هسة بالعنايه اني باقي ماروح الا اطمن عليهم.
غلق الموبايل وكام ليزور الجرحى عددهم اثنين والحمدلله الله سلمهم بس واحد كسر بذراعه والثاني جرح بكتفه متعرض لطعنه حربه.
ماهر فهم منهم المهمه تمت بنجاح والعصابه بالسجن وانقتل كم واحد وكدروا يتحرزون عالاسلحه والمتفجرات .
كل شوي يباوع بساعته الوكت يمر بطيء وثكيل شاف واحد من الاطباء تقدم بخطوات سريعه يسأل / شلونه هسة النقيب نشوان وفراس
ردت الطبيبة اطمنه / واحد الاصابه قريبه عالمعده الحمدلله تمام توا صحا حالته مستقره.
ماهر / الحمدلله ..بس نشوان الاصابه بظهرا .
طمنته / اطمن راح امرله وابلغك ، اني الخفر اليوم وية البقية ومراح نقصر
شكرها متفاجىء شلون صدفه هذه شايفها مرة من بعيد بس متوقع يشوفها هنا بقى صافن بعدين رجع كعد جتف ايديه ينتظر ، الجو بارد حيل بالليل وماله واهس لكلشي حتى قمصلته نساها بالسيارة اتعاجز يروح يجيبها ، يبقى هنا الجو ادفى
بالممر صادفت الممرضه طلعت من غرفه العنايه المركزه خبرتها حالته مستقرة وبدا مفعول المخدر يزول لان المريض جاي يهذري ويه روحه.
شكرتها / روحي ارتاحي اليوم كلنا تعبنا راح اعاينه بنفسي
دخلت بهدوؤ تعودته جيكت الاجهزة وتقربت من النقيب المصاب وكفت مصدومه رمشت بعيونها ممصدكه دنكت تتأكد اذا هو نفسه حست الوكت وكف بيهاوهي صافنه بصفحه وجهه نايم على بطنه وظهره
عاري ملفوف بشاش وضمادات من بين شفايفها كوه طلع صوتها / لاااا يربي ممعقوله ؟!!!!
سمعته يدردم كلام ممفهوم او يمكن لان مصدومه مركزت بكلامه .
جان يون متألم حاول يتحرك بس جسمه يصل صل من الوجع .
انتبهت ولزمت ذراعه المليانه عضلات وگلبها يدك بقوة
صرخ بوجع وكام يون متألم ، حذرته / لاتتحرك ينفتح الجرح
كعدت مقابيله وعيونها عليه مجاي تستوعب معقوله هيج يصير بيها ؟؟!!!
....رمش بعيونه حاول يتذكر مكانه يشوف ظلال بعدين ركز وفتح عينه بثكل من اثر المخدر وكدر يشوفها كاعده قريبه عليه طلع صوته كولش ضعيف
سمعته يكول / حسيت روحي ميت
ردتله بهدوء / الاموات ميحجون تنهدت وسحبت نفس قوي وكملت / عندك اصابتين بظهرك بس بعيده عن الفقرات
تعتبر محظوظ مخترقت عمودك الفقري وكدر الجراح يطلعها
ملاذ / لعد يامحظوظ حاول متتحرك حتى تشفى بسرعه بعدها نتكلم
كامت وهي تحجي / حمدلله على سلامتك نقيب نشوان .
طلعت منه اهه بألم واضح على وجهه / ينتظرني شي خطير !!!
طلعت وطمنت صاحبه الجانت الفرحه بعيونه
شغل بالها سؤال / عندك علاقه قويه بنشوان
ماهر يدري بيها عرفته رد بهدوء واحترام /؛صاحبي واخوية من جنا سوا بكليه الشرطه
ماهر سكت ميريد يحجي يعرف نشوان ميقبل واكيد راح يوضحلها هواي شغلات.
ملاذ /
كملت مناوبة ورجعت للغرفة استراح كعدت عالكرسي ونزعت حذائي ودلكت رجلية التون
علية لان تعبت كولش ...
تنهدت و راسي بين ايدية اريد استوعب اللي شفته ، يعني طول الوكت اني مخدوعه بي اكيد جان يضحك علية !!
ولولا الصار البارحه جان ماكشفته على حقيقته !!! حقيقة العامل البسيط اللي دفعه عصام لحياتي وتزوجته ، معقولة عصام
جان ميعرف هويته اي اكيد هم خدعه ياربي ياربي شلون خدعنا بكل هذه المهارة ، شلون كدر يتغلغل بحياتي ؟!!!!
.....اسئله مازاحمه براسي اريد الاجابه ، صح جنت اشك بتصرفاته توقعته يشتغل بعصابه واحد محتال ، لعاب وكثير القاب جنت اتوقع هو واحد منها ،
الرجال اللي انفرض علية وزوجته طلع ضابط امن !!!!!!!!!
انتبهت لعلا دخلت والارهاق واضح عليها كعدت كبالي / اويلي مدري شلون خلصت هالليله بس اريد اوصل البيت وكبل اذب ازريك بالفراش.اااخ ساعه واروح وارتاح
بالبيت اول ما وصلت نسيت التعب ودخلت مباشرة لغرفه منير فتشتها ماخليت مكان مادورت بي اريد اعرف اللي تزوجته منووو لان فعلا فقدت ثقتي وما اعرف منو هو ،
المجرات والكنتور وكولشي بالغرفه فتشته مالكيت اي دليل بس لكيت عقد وبي اسمه منير عادل سليمان اسمه المزيف تزوجت رجال مزيف يعني زواجي باطل !!! ياالله ليش هيج يصير بيه كعدت عالجربايه
ودموعي نزلت بيأس وحيرة مو عن شي بس لان حسيت بكمية الخداع اللي عايشة بيها واللي اني ذبيت روحي بيها من ايدي لوما اروح واحجي وياه واطلب منه يشترك وياية بالخطة ماوجان صار كل هذا ، وبقيت أبيت اهلي ، لا عصام ماراح يعوفني بحالي واكيد محضر مصيبة غير اللي جابها. اسمه منير !!!!
صفنت شوي ومسحت دموعي ..بسيطه
منير مدري نشوان والله لخليك تندم كااافي اهانات من ورا هالزواج الاغبر كولشي كذب كذب الجاي يصير مهزله بس والله لتندم على هالخداع.
هدرت الوكت بالبيت وكل تفكيري شلون اعاقب منير
بس اتصلت بالممرضه سألتها عنه وطمنتني نقلوا لجناح خاص والطبيب عاينه حالته مستقره.
اي ليش لا حضرة النقيب جناح خاص واهتمام وعنايه طبيه
.....
يومين يلا دخلت غرفته اتطمن عليه لكيته صاحي سلمت واخلاقيا مكدرت اتجاوزه تحمدتله بالسلامه للمرة الثانية وتقربت اعاينه جان يحجي وعينه علية / ها اشوف اختفيتي
رفعت الغطا اشوف جرحه واني ارد بكل برود / صدكني اتمنى اختفي احلى شي بهذه الفترة هو الاختفاء
باوع بعيونها جانت مدنكه وقريبه عليه لابسه اللابكوت الابيض وحجابها لايكلها وجهها منور بي وخالى من المكياج وبهاللحظه تأكدت هالوجه الحلو هذا خالي من اي عاطفه كانما غريبه عليه متعرفه يحسها فاقدة الاحساس وهذا الشي ضوجه معقوله
ماعدها ذره من القلق عليه وهي تشوفه طلع من الموت.
ملاذ توترت من شافت الالم واضح على وجهه وجسمه متقلص وكام يون تصرفت غريزيا بدون وعي مدت ايدها ومسحت صفحه خده المقابيلها براحت ايدها / اسفه اسفه راح ارجع الشاش على كيفي يلااا ثواني
نشوان كز سنونه ورجع عض شفته بقوة.. كملت ورجعت الغطا على جسمه الشبه العاري وحاولت تساعده ينسدح على جنبه وخلتله مخده وهي تسأله بقلق / احسن
هسه
خزرها بعينه وجهه شاحب / شتتوقعين مثلا ،، اني رجال جريح الالم مالي جسمي ويجوز بعد ماامشي على رجلية
عيونها محاوطته وبيها نظره حنية لان فعلا انقهرت عليه بس متريد تبينله تعاطفها كطبيبة لا اكثر هذا اللي فسرته لنفسها ، تنهدت وردت / عرضوا الاشعه على اكثر
من جراح والكل اتفق تكدر تمشي وهسه ارتاح ماكو داعي للتمثيل تستحق جائزة واللهخوش ممثل
كزكز على سنونه / شكد قاسيه بس اوعدج خل اتعافى وشوفي شسويلج
ضايقته اكثر وهي تردله بلا مبالاة / صدوك وشسويلي اطكني كلبجات ابيدي لو تعلكني بالسكف
رغم الالم البي بس ردلها بمكر / والله افكر بعقاب احسن احتمال احبسج بغرفه النوم و...من يدري بوفتها اعرفج على حقيقتج
احمر وجها تريد تردله بس سكتت من انفتح الباب ودخل صديقه ماهر. يتطمن عليه
