رواية علي الهامش كامله جميع الفصول بقلم جمانه السعيدي
اني اسامه مواليد ٨٠
طولي ١٧٨ حنطاوي مدرس لغه عربيه
من البدايه اني جنت الولد الوحيد الاهلي
ابوي موضف وامي ربت بيت
احنا من سكنت بغداد
بيتنا ايجار مو ملك بس ايجار قديم
يعني اني اول ما نولدت هو هذا بيتنا
الايجار كان معقول لان احنا ساكنين منطقه متوسطه
لا شعبيه حيل ولا من المناطق الراقيه
كنت مدلل ومحبوب بلعائله وبين كل الاهل والاقارب
اني مخلوق مؤدب
انسان مخلوق كل صفاتي حلوه
حليم كريم مؤدب اجتماعي احب الشغل
احب امي وابوي اخدمهم بعيوني
خلال فتره عمري من سنتين والحد ماصار عمري ١٢ سنه
امي ما بطلت ادور حمل
تريد بعد اطفال شلون تبقى بس عليه
ماخلت دكتوره تعتب عليها
تريد طفل حتلو واحد اخ او اخت اليه
الحد ماصار عمري ١٢ سنه
رب العالمين جبر خاطرها وطلعت حامل
بعد ما تعبت وهيه تفتر على العيادات وتأخذ وصفات
مو تكولون حمل لا عبالك تملكت الدنيا وما بيها بهذا الحمل
وخاصه وهيه اكثر من عشر سنوات مابقت دكتوره تعتب عليها
ادور ريحة طفل عبالك محرومه اني مو بعينها يمكن
الفرحه انتشرت بين الأهل والاقارب والاحباب
اكثر ثنيين فرحانيين امي وابوي
اني طبعا كنت فرحان الفرحهم
واكيد احب يكون عندي اخ او اخت حالي حال باقي الاطفال
ماكنت اعرف وضعي راح يتغير بسبب هذا الطفل
والاهتمام كله يروح علي
واني راح اكون على الهامش
راح اكون شخص زايد بلعائله بعد ماكنت الكل بلكل
المهم امي وصلت للولاده وجابت اخوي احسان
احسان الي من اول لحظه صار بيها فرد من هاي العائله
اخذ كل الحب والدلال
يمكن تكولون انت تغار
لا هيه مو مسئلة غيره بكد ما هيه تجاهل الوجودي
امي كل وقتها واهتمامه اله وابوي يرجع من الدوم كله لهفه علي اما اني صرت شخصيه زايده بهذا البيت
محد يهتملي اقرا اكتب وحدي
وحتى ملابسي اني اغسلهن لان كلما اطلب من امي شي
تكول اعتمد على نفسك ما تشوفني مشغوله ويا اخوك
ملابس اخوي تغسلهن وتعطرهن وتسفطهن بلكنتور
واني ارجع من المدرسه اغسل ملابسي بنفسي واحضرهن
واكعد اقرا
مو بس هاي هواي شغلات بلبيت صرت اني المسؤل عنهن
بسبب انشغال امي بااخوي
مرات اكول ميخالف مشغوله
مرات اكول ليش ما تقسم الوقت بيني وبين اخوي
اني ابنها مثل ماهو ابنها حتلو جبير هم محتاج اهتمام
جمانه السعيدي
كلما اعترض لو احجي امي وابوي ثنيبنهم
يحجون عليه ومايقبلون افتح حلكي بكلمه وحده
انت جبير شنو تغار من هذا الطفل
اعتمد على نفسك
هذا بعده زغير ومحتاج اهتمام اكثر
المفروض انت تهتم بي
اسامه....اني فعلا احبه وفرحان بي
بس كارهة شي واحد ليش وجوده لغه وجودي بهذا البيت
ليش مايكون الحب مقسوم بينا ثنيينه
ليش فرحتهم بي نستهم عدهم ولد ثاني محتاج اهتمام ورعايه
حتلو تكولون انت تغار
اي من حقي اغار واني اشوف كلشي بلبيت مهيئ
الراحة هذا الطفل
بديت اتعود شويه شويه اعتمد على نفسي
واتغاضى عن أي شي يسببلي حزن
اعتمدت على نفسي اعتماد كلي
كل وقتي اخلصه اقرا واحضر دروسي
بما ان امي ما منتبه الوجودي
اني انتبه على نفسي وانجح بدراستي
كثر الاهتمام بالإحسان خلا يطلع طفل متمرد
وكح اناني خبيث
كل الصفات الموحلوه بي
عكس صفاتي تمام
اني عاقل هو وكح
اني مرتب نضيف هو مخربط
اني اقدر وضع اهلي اذا احتاج شي ومايكدرون يوفرونه اليه
هو لا اذا راد شي لازم يكون موجود بنفس اللحظه
اني كنت اشتغل بلعطله حتى اكدر اشتري ملابس للمدرسه
واي شي احتاجه
امي بس تشوف عندي فلوس تاخذهن
لان استاذ احسان يريد لعبه لو لبس معين
او يريد فلوس يصرف
اسامه....امي ترا هيج غلط انتي جاي تنطي اي شي يطلبه
علمي يشتري بس الاشياء الي محتاجه
بعده زغير وتكدرين تفهمي
امي....ليش تكول هيج لان اخذ منك فلوس غير اخوك وبعده زغير اذا انت ما ادلل اخوك
منو الي يهتمله ويدلله
هذا سندك من تكبر انت ماعندك غيره
اسامه...واني شكلت بس ربي مثل تربيتي علمي
على الصح والغلط
مو كلشي يطلبه تركضين اجيبينه
لازم يتعلم مو اي شي يطلبه ياخذه
امي...مادام اني بلدنيا وابوك سالم مراح احرمه من اي شي
خلي يدلل علينا
هسه هو شطالب نمونه ملابس ولعب وحلويات
اسامه...اليوم تكدرين على طلباته باجر هاي الطلبات تكبر
وماتكدرين عليها
امي...بعد مااطلب منك شي انت شنو مان علينا بفلوسك
مااريد منك شي
اصلا انت تكره احسان من اول ما صار
عود اخوك الوحيد ولازم انت الي تهتم بي وتشتريله كلشي يريده
اسامه...كان الكلام ويا امي ماله معنى ولا بي فايده
وحتى ابوي واكف وياها ويا احسان ويطلعوني اني الغلطان
دائما
عفت الكلام بهذا الموضوع بس كلما اجمع مبلغ
الكا ناقص
امي عدها مفتاح الكنتور وكلما يطلب شي الأمير وليم
تركض اطلع فلوسي وتشتريله
ولله اني مابقيت شغله ما اشتغلت بيها
بس حتى إجمعلي مصرف للدوام واشتري ملابس
لان راتب ابوي يادوب للايجار والعيشه
جمانه السعيدي
بس هذا الحجي ما ينطبق على ولي العهد
هذا اي شي يطلبه لازم يتوفر حتلو نتقرض من الجوارين
مرات يشتري شغلات مالها معنى ولا بيها فائده
بس حتى يشتري وبس
ولأن يعرف نفسه اي شي يطلبه يكون موجود
مايبطل يطلب اي شي يخطر على باله
بلاعداديه كمت اشتغل عماله
اجي الضهر ميت تعب الدنيا حاره بس اوصل امي تاخذ فلوس شغلي مني
لازم اطلع عذر حتى تاخذ تعبي مني
لان اني تعبي مو مهم بكد طلبات احسان المهمه الي لازم
تتوفر بس يطلبها
انقبلت جامعه كلية تربيه
ماحسيت اهلي فرحانيين بيه بكد فرحتهم بإحسان
لان دخل ابتدائيه
الملابس اشكال واللوان الدفاتر والاقلام
ابوي ياخذه يوصله للمدرسه وامي تروح اجيبه منها
تكعد تتوسل بي حتى يقرا وهو مايقبل
تشتري لعب واقلام ملونه وحلويات
بس حتى يقرا مايقبل يقرا ولا يقبل يتعلم
اصلا ما يحب المدرسه
المصرف الي ياخذه اني مااخذ بكده واني رايح للجامعه
بس حتى يقبل يروح المدرسه
اني ممنوع احجي لو اكول هاي التربيه غلط
لا زم يتعلم ويتربى صح
لان امي تكول انت جبير وتغار من هذا الطفل
شبيها تربيته هسه يكبر ويتعلم
ليش خاله كدام عينك ليش تحجي علي عوفه مالك شغل بي
واني فعلا كنت اراقب ومحروك دمي ومااحجي
طبعا اني لان كنت دائما انتقد تربيته ودلاله
هو يحس اني اكرها
ما يحبني ولا يقرب عليه اني من اشوفه يغلط ازمخ علي
لو اضربه وهنا تقوم القائمه عليه
يخبث عليه دائما الكا الكتب والملازم
مشككه
واذا اخلي فلوس ياخذهن
وياخذ اقلامي ويكسرهن
ويغلط ويتفل عليه
حتى يسبني ابوي من يسمعه يضحك
اذا أقرب علي لو اضربه يصير يوم اسود عليه
امي تزعل وابوي يغلط عليه
اكلهم جاي يجاوز عليه واني اكبر منه
يكولو اي وشنو يعني طار نصك لو صار بيك شي
واذا غلط عليك
طفل تخلي عقلك ويا طفل يمتى تكبر وتفهم
حرب حرب ما تنتهي
مو اخ مرض خبيث ونزل علينا
الحد ماتخرجت من الجامعه وصار السقوط
اتخلخلت الأوضاع بغداد
رحنا يم اقاربنا بوحده من المحافظات
لو تشوفون تصرفاته شلون فشلنا كدام الناس
كل الي نكعد يمهم يتخبلون منه مو طفل شيطان
لعب بينا لعب
أجرنا بيت وكعدنا وحدنا لمدت ست اشهر بسبب احسان
طبعا اني دورت شغل وشتغلت عامل نقليات
لان وضعنا بهاي الفتره صعب كلش صعب
بعد ما استقرت بغداد رجعنا البيتنا
بس حالة ابوي الصحيه مو تمام مايكدر
وخاصه بعد فترة الخوف والعوز الي مرينا بيها بهاي الفتره
بعدها طلع تعييني مدرس بمدرسه بنفس منطقتنا
وبديت اداوم
اما بلنسبه الإحسان كان عدوه اللدود المدرسه والكعده الصبح للدوام
مايقبل يكعد يروح للمدرسه
والسنه يخلصها بسنتين لمن بالسادس ابتدائي بطل
قرر بعد ماكو مدرسه
محد اعترض لان اهم شي راحته المدرسه مو مهمه
