رواية المغتصبة ( كاملة جميع الفصول ) بقلم ورود الخالدي

اسمي رزان حاليا عمري25سنه يمكن قصتي مو قصة تقليدية بيها اشياء غريبة ومصادفات يمكن بالمليون تصير  مرة وحدة.. وراح ابديلكم من البداية حتى الصورة تكون اوضح الكم 

اني اخر.. العنگود يعني اصغر وحدة بالعائلة عندي اخويه ارشد اكبر مني واختي جيهان اكبر وحدة بينا لان احنا بس، 3 بابا معنده لا اخوان ولا اخوات اي معندي عمام وعمات بس ماما عدها ٣ اخوان وخمس، اخوات خوالي هواية وعلاقة ماما بخوالي كولش قويه لان بابا من تزوج ماما مجان عنده بس بيبي وجدو الي ملحكت عليهم من جيت للدنياجانو متوفين فماما ماعدها هوايه عيال فبقت علاقتها باخوتها واخواتها قويه خصوصا خالو عدنان  وخالتي سلوى الي هي اكبر خالاتي وخوالي بالعمر المهم بداية قصتي من جان عمري ١٢ سنه جنت طالبه بصف سادس ابتدائي  ومدرستي بعيدة شويه عن اهلي بس قريبه على بيت خاله سلوى وبيوم من الايام جنت مبدله الصبح دا اروح لمدرستي، ماما كالت: 

رزان من اطلعين من الدوام مري على خالتج سلوى حتى تجين وياها لان هي راح تجي علينا غداها يمنا هي والبنات

ماشي ماما

خاله سلوى عدها ٣ بنات و٢ اولاد البنات وحده جان عمرها بذاك الوكت ١٥سنه هاي الجبيرة بالبنات والباقيان وحدة ١٣  وحدة ٩سنوات والولد الجبير جان عمرة.. ١٨.. والزغير عمره ٥سنوات 

المهم من طلعت من الدوام تذكرت ماما كالت مري على بيت خالتج سلوى وفعلا رحت الهم دكيت الباب هواية محد فتحلي كلت يمكن مموجودين لو راحو النا ردت امشي خطوتين شفت الباب مالتهم انفتحت وطلع منها ابنهم الجبير مصطفى  كلي 

تعالي رزان

فرجعت كتله: 

ماما كالتلي مري على خاله حتى فد مره اروح وياها لاهلي! 

انتبهت اله شكله هستوه كاعد من النوم شفته تثاوب وكلي: 

بس محد بالبيت كلهم طالعين 

هاا يمكن راحو لبيتنا اني راح اروح لعد

ردت اروح كلي: 

تعالي فوتي هسه ابدل واني اخذج لاهلج

فتت جوة طبعا عادي بيت خالتي ومأمنه عدهم ومتعوده افوت لبيتهم معندي شك او اي خوف انه راح يصير اي شي

بقيت كاعدة ع القنفه الي بالصاله وجنطتي على متوني منتظرته.. هو بدل وطلع كتله: 

عطشانه اروح اشرب مي 

رحت فتحت الثلاجة شربت مي وغسلت وجهي بمغسله المطبخ  اجه للمطبخ كلي: 

يله وين صرتي

هسه بس، اسد البوري 

اجه هو سد البوري بس انتبهت هو بقه يباوع عليه بنظرات غريبه وحسيته مد ايده على خدي وكلي: 

كبرانه رزان صايرة تخبلين

ضجت من لمسته ونظرته بسرعة نتلت ايده وكتله

خلي نروح 

مد ايده على جنطتي ونزلها وكلي 

اصبري شبيج مستعجلة

اريد اروح حسيت. كلبي كام يدوك هوايه  لان نظراته الي مجانت طبيعيه 

دنكت ردت اشيل جنطتي لزمني من ايدي وجرني حيل كتله: 

شبيك... شبيك.. مصطفى.. هدني.. هدني! 

لج لتخافين اهدي.. 

ردت ادفعة بس، هو قوي طبك اديه اثنينهن وره ظهري وبقه يبوس بيه وفتح دكمه قميصي بايدة الثانيه ودخل ايده جوه قميصي وبقه يعصر بجسمي خفت اكثر وكمت اصيح 

هدني.. هدني.. حباب.. هدني.. 

بس مهدني فلت اديه وشمرني بالكاع ع الكاربد مال المطبخ.. وصار فوكايا بقيت ارفس واصيح بكل قوتي بس لان محد بالبيت صياحي مجان بيه اي فائدة.. وكل محاولاتي حتى اتخلص منه فشلت لان هو شاب وقوي واني مجرد طفلة جوه ايده ومعافني الى ان اغتصبني واخذ الي يريدة مني والغريب انه هو مشك ملابسي من اغتصبني لا جان لازم اديه بايد وحده وبايدة الثانيه نزعني ملابسي الداخليه واسوه عملته السودة ومن خلص وخر عني وعبالك الموضوع عنده عادي بينما اني مذبوحة من الالم والخوف والرجفة بدمي واحس، نفسي ميته  نتلتي من ايدي، وكلي: 

كومي فوتي للحمام غسلي، وتعالي

بس يمكن وكفت اقل من ١٠ ثواني بعدين وكعت وغبت عن الدنيا ومن كعدت لكيته ملبسني ملابسي ويضرب بخدودي

رزان.. رزان كعدي.. كعدي فتحت عيوني اول مشفت وجهه جرت دموعي وكمت اصرخ

انت شسويت بيه.. شسويت بيه!! 

لج كافي لتصرخين.. ماكو شي 

ماكو شي شنو انته شسويتلي.... شسويتلي؟؟ 

سكتي ولا حرف تحجين هسه راح اخذج للبيت لتحجين لاهلج اي شي لان اذا حجيتي راح يذبحوج ويذبوج بالبلوعة.. 

شنو ما احجي

اي لتحجين لاحد.. ابوج واخوج اذا عرفو راح يذبحوج..؟؟ 

ليش.. ليش يذبحوني!! 

مثل مجاي اكلج.. انتي بس لتحجين واني اصلح كلشي!! 

تصلح كولشي شنو؟؟ 

راح احاجي امي تخطبج الي ونتزوج ومحد راح يعرف!! 

نتزوح شنو.. اني، ما اعرف للزواج!! 

معليج انتي بس سكتي ولاتحجين لاحد لان اذا حجيتي والله العظيم راح يذبحوج اهلج.. 

طبعا هذا كل الي اتذكرة من الي صار بذاك اليوم الاسود من حياتي.. واتذكر بعد من رجعت للبيت ومن بدلت ملابسي ولكيت بالشورت مالتي دم.... ورحت ركض غسلته حتى محد يشوفه.. لان صدكت من كلي مصطفى راح يذبحوج  اذا عرفو.. طبعا اهلي، ملتمين جاي، يتغدون ماما انتبهت عليه كالت: 

وج رزان شبيج وجهج احمر شنو مصخنه

ادنت عليه لزمتني من كصتي كالت:

يااا مشتعله نار يربي.. 

خاله كالت: 

انطيها براسيتول ودثريها.. 

انطتني براسيتول ودثرتني بس اني جوة البطانيه اطك سن بسن ومدري شلون غفت عيني ونمت يمكن من الصخونه مدري من الخوفه ومدريت مصطفى وين راح  لان هو وصلني على دراجته وطلع.. كعدت من النوم المغرب هم لازمتني النفاضة بس، بيت خالتي رايحين.. ارجف واحس معدتني تتكطع من الجوع والرجيف كعدتني ماما وكلتني شويه.. وهم نطتني علاج عركت.. فراشي نكع هلكد معرگت.. رادت ماما تسبحني اندكت الباب فتحته وكامت تصيح

يبووو يبووو.. شفتها تصيح وادك وتلطم وركضت للكنتور لبست دشداشه سودة.. والي، فهمته من حجيهم انه احد مات من خوالي بس وره شويه سمعت بابا يكول: 

روحي، واني اجيب البنات وراج.. 

سمعت ماما كالت: 

صخام الصخمج يسلوى.... راح وليدج.. راح وليدج.. 

من طلعت ماما.. عرفت من بابا انه مصطفى جان طالع بالدراجة وضاربته سيارة وميت بنفس اللحظة.. 

طبعا اهلي وخوالي ملتهين  بالفاتحة واني بس اباوع بالوجوه ماما كالت لخالاتي رزان مريضه.. ماكدرت اخليها وحدها بالبيت بقيت مثل الي، بغير دنيا ناس تلطم وناس، تنعى وناس، تصرخ محد يدري بمصيبتي بس، اني ادري بيها والي اغتصبني رب العالمين اخذ عمرة قبل ميمر عليه ٢٤ ساعة 

والله وحدة يعلم شلون مرت عليه ايام الفاتحة الثلاثة.. ومستحيل اكدر اوصف الكم لو اوصل الكم بالضبط بشنو جنت امر او احس ويمكن اي وصف لوضعي يكون باهت ومغاير للحقيقة.. ما اعرف شلون صبرت ومصرخت  بنص العالم وسولفت الهم الي صار بيه يمكن لان جنت طفلة ومن سمعته كلي، اهلج يذبحوج خفت وما حجيت ويمكن لان عقلي الزغير صورلي انه ثاني يوم من شفت ماكو اثر دم بملابسي والالم والحرگة بدت تخف من المنطقة فكرت انه مابيه شي وراح اطيب والافضل اسكت حتى بابا واخويه ميذبحوني مثل مفهمني، مصطفى..

وسكتت وسكتت ومرت ايام واشهر وسنين واني ساكته وكل الي فاهمته انه اني مابيه شي والي صار.. بيه مجرد جرح صار بوكته وراح وطاب.. الى ان صرت بالاعدادية واختلطت بالبنات وانفتح عقلي  ونضجت وكمت اسمع اشكال الوان من القصص عن البنات.. الي تصير بيهن حوادث الاغتصاب او يفقدن شرفهن تحت اي ظرف من الظروف وصار الفضول يدفعني اعرف اكثر واتقصى وابحث عن كل.. تفاصيل الاغتصاب ونتائجة وجانت اقوى صدمة بحياتي من عرفت تفاصيل العذرية ووجود غشاء البكارة.. واثر الاغتصاب الدائمي، عليه بعد معرفت هالتفاصيل عشت بحاله رعب وانعزال عن الناس حتى اهلي شكو انه بيه حاله نفسيه لو تابعة لو من هالسوالف لان منعزله وما اختلط بالناس.. لان مصيبتي محد يعرفها غيري ومفكرت بيوم من الايام احجي بيها لاحد حتى لاختي وماما الي، هنه اقرب الناس الي لان اعرف جيهان متضم اي، حجاية وبس يصير بيني وبينها اي توتر ممكن تكت كل السالفة اما ماما فمتتفاهم وما اضمن رد فعلهاخصوصا هي، متضم اي شي على بابا فخفت احجيلها وتكول لبابا وبابا يذبحني مثل كل الاباء الي ميردون شرف بناتهم عليه اي غبار.. واول طريقة يعالجون بيها الموضوع هي القتل

بقيت ساكته... وعايشه الرعب بكل تفصيل من تفاصيل  حياتي

وخلصت الاعددية وانقبلت كلية تربية.. وداومت اول مرحلة كليه وره شهر من دوامي انخطبت اختي جيهان.. وع اساس خطبتها متطول يعني مجرد شهرين وياخذوها عيالها لان الولد الي خطبها من الحلة واحنا ابغداد والولد مجهز كل امورة فعليش اطول الخطبه 

بس، ورة شهر، واحد من خطوبة جيهان جنه كاعدين  دنغدة بامان الله ونسولف فجأة بابا انكلبت عيونه ووكع على وجهه ماما ضلت تصرخ ارشد اخويه عدله وضل ينفخ بحلكة يحاول يكعدة بس بابا ابد ميتحرك وبقينا مرتبكين ونصرخ الى ان طلع ارشد.. جاب تكسي واخذناه للمستشفى طبعا شالوه شيل ارشد واثنين من ولد جيرانا.. وللاسف من وصل للمستشفى جان ميت وملحكو الاطباء عليه.. ومن خلال حجي، الاطباء عرفنه انه السبب هو سكته قلبيه مفاجئة وراح بابا.. وبقينا يتامه بيتنا مخيم عليه السواد والحزن.. بس،.. خوالي وخالاتي.. معايفينا دائما خالاتي يم امي وخوالي جياتهم مستمرة على بيتنا.. ومخلونا محتاجين شي وراتب، بابا.. نستلمة وامورنا المادية وسط... وطبعا عرس جيهان تأجل الى ان دارت سنه بابا واخذوها عيالها بعرس سكتاوي، بناءا على طلب ماما لان ماما مقبلت اي مظهر من مظاهر الفرح يدخل بيتنا حتى بعد دورة السنة.. 

وبعد متزوجت جيهان واستقرت ابيت عيالها اني جنت اداوم مرحلة ثانية وارشد اخويه مخلص، سادس علمي قبل كم سنه بس مقبل يكمل رغم  معدله جان زين بوقتها.. بس جان يفكر يدرس خارج العراق،.. رغم بابا الله يرحمه وماما رافضين الفكرة  لان جان من زمان يلح عليهم بموضوع السفر من قبل وفاة بابا.. بس هو ميأس ضل يدخل بكروبات المغتربين العايشين بره العراق، ويصادقهم ويعرف طبيعة حياتهم وشلون كدروا يطلعون ويستقرون ويعيشون هناك وجان يتحسر من يشوفهم صاعدين سيارات حديثه وفاتحين بث بذيج المكانات المرتبه والاجواء الحلوة والحياة المتطورة يمهم.. وجان يوميه يفتح الموضوع ويه ماما ويكولها ما اضل بالعراق اريد اسافر ادرس بره اعيش الدنيا حالي حال هالشباب وهي تفرفح وتكوله معدنا غيرك وانت رجال  البيت واني واختك منكدر نعيش.. وحدنا.. بس هو مجان يسمع يمكن الدلال والاهتمام الزايد

خلاه اناني ويفكر بس بنفسه وميهتم لا.. لامه الارملة ولا لاخته اليتيمه اصلا بالفتره الي سبقت سفره حاربنا حرب نفسيه حتى يخلي ماما تحاجي خوالي ينطوه فلوس حتى يسافر بيهن ولما ماشاف نتيجة ضل يداعيهم بحصه ماما من ورث جدو.. ومن انفتح موضوع الورث كدام خوالي.. صار هو سبب.. باجتماعهم يم بيت خالو عدنان حتى يحددون الورث الي عافه جدو ويقسموه عليهم.. طبعا جدو. جان مخلي، عقارات ومحلات وكراج يجيبن كل شهر مبالغ محترمه وجانو خوالي يقسموهن بيناتهم بما يرضي الله وحتى ماما يجيها كل شهر فلوس من الايجارات بس من كعدو يسولفون ع الورث، خوالي قررو ينطون اخواتهم حصصهن فلوس، كاش.. وخالاتي خمستهن اخذن حصصهن فلوس بس ماما ضلت تفرفح وتكلهم ما اريد فلوس اني ارمله وهذا ابني صراف تلاف يصرفهن ويخلينا ع الحديدة.. لوياخذهن ويسافر بيهن وامسح ايدي بالكاع فخالو عدنان شافها تبجي وتفرفح... كعد وياها على صفحة وكلها:

 مراح انطيج حصتج راح تبقى حصتج وياي وانطيج كل شهر شيطلعلج من الايجارات بما يرضي الله وهذا ابنج العاق مابيه فايدة انطي كم مليون يسافر بيهن ويكفيناشره.. واشرط عليه شرط من يسافر ويشتغل ويصير براسه حظ هناك يدزلي فلوسي، على شكل حوالات شكلتي؟؟ 

طبعا ماما فرحت لان مراح تستلم فلوس، كاش وراح تبقى حصتها ضمان ومصرف النا.. بس بجت لان خالو.. راح ينطي ارشد فلوس السفر،.. وكالت: 

ابو كريم شلون يسافر ويروح اضل وحدي اني وبتي

اي وهسه هو شنو فايدته عليج شو النهار كله سايب وبالليل سهران ويه السرسريه ع الموبايل خليه يسافر خليه يشوف الغربه والتلطم.. والعوز والذله.. ولتخافين ماعليه شي هسه ياخذله كم شهر، ويرجع يبوس برجليج حتى ترضين عنه

وسافر ارشد.. وضل البيت  خالي، علينا اني، وماما.. وطبعا ماما متتحمل تضل بين اربع حيطان فجانت دائما يم خالاتي، وخوالي ومرت الايام والاشهر، وصرت بالمرحله الاخيرة يعني، كم شهر واتخرج ومحجيت الكم شكد عانيت بكل مرة تحجي بيه الناس لو وحدة تحاجي ماما حتى تخطبني لابنها خالاتي هم رادني بس اني جنت ارفض بحجة اريد اكمل دراستي، وما اشغل نفسي، بزواج وبخطبه.. لان اني، مستحيل افكر اتزوج مثل اي بنيه عادية.... بسبب مصيبتي المحد يعرف بيها غير، رب العالمين.. وجنت... اتهرب من اي، موضوع خطبة الى ان اجه اليوم الي مجنت اكدر اتهرب بيه لو ارفضة وصار الجنت خايفه منه.. 

خالو عدنان خطبني، لابنه الجبير كريم.. طبعا كريم مو زغير عمره ٣٣ سنه بس هو ممتزوج لان جان رافض، فكرة الزواج وحسب الي جنت اسمعه من مرت خالو وماما انه كريم من جان خالو يلح عليه حتى يزوجه ويفرح بيه جان يكوله 

اني اخر، واحد اتزوج.. زوج بناتك.. كلهن وولدك واني بالاخير اتزوج 

ومحد يعرف ليش رافض يتزوج رغم هو شخصيه وشاب مرتب وشايل شغل محلات خالو تلاثتهن على متونه.. وفعلا خالو زوح ابنه الاصغر من كريم قبل ٣ سنوات وبنات خالو هم متزوجات بقه.. بس كريم ومحمد وطيبه ممتزوجين من بيت خالو.. ولسوء حظي خالو بهالفتره باقي يلح عليه ويكوله لازم ازوجك واختار اي بنيه واخذها الك.. فهو مختارني وكله: 

اذا مصر تزوجني اريد رزان بت عمتي

من جتي، ماما فتحت وياي الموضوع.. حسيت بمغص، قوي كطع امعائي.. يربي شكول لماما شلون بيه.. ماما جايه طايرة من الفرح وتكولي: 

وج رزان.. كريم رايدج.. خالج كلي رايدين رزان لكريم كلبي طك من الفرحة 

يوم كريم شنو انتي شتحجين؟؟ 

يااا وج شنو كريم شنو هذا ابو عگرب راس الكلادة شو تحجين چنچ.. مراضية

اي، ماما مراضية كريم اكبر مني بفوك العشر سنوات.. ماعرف ليش، هالكد فرحانه انتي.. شنو عين الكلادة شنو ابو عگرب.. شعليه بيه عسما يطلع ابو طنطل.. ما اتزوجة لو تنگلب الدنيا

ماما وجهها كوله انكلب وصوتها طلع يخوف: 

شگلتي ولج... ترفضين كريم.. غير اكطعج تكطع واكلج بسنوني اذا تحجين هالحجي كدام خالج.. اشو تتزوجيه ورجلج فوك ركبتج.. ترفض كريم العوبه.. ولج.. خالج منتظر منه كلمة حتى يكول يازواج.. اول كلمة كالها اختارج انتي.. وهسه بكل صلافة تكولين ارفض.. منو انتي وبتمن انتي، حتى ترفضين وين تلكين رجال مثله.. شفتي روحج بالكليه وتعرفتي، على شكول شكول من ذوله السايبين العايشين على فلوس، ماما وبابا عبالج ازوجج واحد زعطوط بكدج يعيشج.. بالفكر، لو بالعوز.. 

ليش، يوم اني ما الي رأي يعني بالانسان الي راح اتزوجه.. شناقصني هم بنيه حالي حال البنات  واريد اختار الانسان الي اتزوجه..واذا ابن اخوج.. واذا حلوو.. واذا شخصية واذا زنكيل يعني اذا انتي مقتنعة بصفاته لازم اني.. اتزوجة بدون كلام وتفكير تره حرام تغصبيني عليه

ولج انتي صاحية مخبلة... اني جايه وكلبي طاك من الفرحة وانتي.. تتفسفسين براسي.. واريد اختار... واريد رأيي.. وشريك حياتي ومن هالخريط اشايفه نفسج انتي خاف عبالج.. بس انتي شابه وحلوة وخريجة وعليج العين ذنيج بنات خالاتج كلهن خريجات وحلوات ولج يركصن بالف جفيه.. اذا سمعن كريم مو خاطبهن لا والله لو مجرد جايب طاريهن وانتي الولد عاف كل بنات الدنيا ورايدچ انتي وهسه حظرتج ترفضين بكل هالصلافة

يوم.. اسمعيني..  

ما اسمع.. باجر.. خالج يجي.. ويكعد يسولف وياج تكوليله موافقة.. لا وروح ابويه اتبرة منج ليوم الدين

يوم وكليتي غير عندي، دوام؟؟ 

اي وهمه ما مستعجلين.. مجرد يحلقون ويجيبون نيشان والعرس عود ورة التخرج

الفصل الثاني من هنا