رواية دخيله الشيخ زين العابدين الفصل الرابع والستون بقلم أوتار حزينه
هيله
واكفه ادحك لولدي شبعو بجي گاضبين
ابوهم ومايردون يهدو
كال
ياهيله
رفعت عيوني له صافن عليه كال بغصه
ابريني الذمه يبنت العرب
مدري شصار بيه معدتي وجعتني على غفله وگلبي هبط ماكدرت ارد لساني تربط وظليت صافنه له كمل عيونه بعيوني
ابريني الذمه ام شعلان انا ساري للموت واخاف مااعگب واروح لربي وانا شايل ذنبج برگبتي
درت وجهي منه وكتمت دموعي رديت گوه وبصوت مخنوك
مبري الذمه يازين
سمعته تنهد دحكت له دمعتي حدرت شافها
وجهه انطعن وصار دم كال
حسبي الله على الفرگنا وخلاني اطلكج مو مبري الذمه ياحمد لان فرگتني وانا مااريد الفراگ
دموعي حدرت درت روحي منه اسمع ولدي يبجون تكلم معهم
اش يابه كافي بجي شعلان اسكت وسكت اخوك حتى من اعگب اجيب الكم باسكل
مااريد اريدك انت تظل يمنا
استغفر الله ياربي يول لا تقهرني تره البيه كافيني
ماما كولي له خل يظل يمنا
ابني جرني من هدومي گضبت ايدو وكلت
كافي ماما وكول اله الله وياك بابا
ظل يبجي ،،،،،
يدحك بزعل لابوه
يمان اجه ليمي شلتو
الزين صافن لنا مقهور
وجن مايريد يروح
اروح لاتنسينا بدعائج
كال هالكلام وسرى بسرعه من يمنا شعلان ظل يصيح علي وهو يبجي
بابا لاتروح
گضبتو بقوه ادحك له صعد بسيارته وراح كعدت بنص الزرع ولدي بحظني يبجون
وانا وياهم اردد بقهر
وانا هم ماردت الفراگ لجن انت خليتني افارگ
انت يازين ذبحتني من سويت السويتو
ماما اريد بابا
تمالكت روحي بصعوبه من وراه هو ويمان لان ظلو يبجون ويدحكون للدرب ويدورون علي
كمت لحيلي مسحت دموعي كلت بصوت مخنوك
كافي ماما لاتظلون تبجون
اريد بابا اريد اروح ويا
شعلان ردد يبجي وويا يمان رديت علي بهدوء
اذا تحب بابا اسكت مو زين تبجي علي وهو رايح بدرب
شهگ ودموعه تسف على وجه دحك للشارع بعدين عليه كملت
اسكت حتى يويو هم يسكت وياك شوفو يدحك لك ويبجي
دحك لاخوه الجان بحظني يشهگ هز راسه ومسح دموعه كلت
يله خلي نعگب للدار
هز راسه گضبت ايدو وسرينا سوه ساكته لجن بداخلي قهر يهد جبال وين جنا انا ويا ووين صرنا
تفارگنا وكلو من حمد وتسرعه هو لان رفض
يسمعني او يصدك بي وفضل يصدك ولد خاله عليه
اعرف بروحي خطيت من رحت لشهم وحدي وجان المفروض مااروح له لجن
خوفي علي وعلى الزين هو خلاني اتصرف هالتصرف الي دفعت ثمنه غالي كلش
ليالي مرت عليه اصفن بيها على ولدي واسمع كلام اهله الي ظلو يرحون ويجون علينا وامي معهم لان لانت من يمه هي وخواتي حتى ريمه ماعادت مثل الاول ادكلي انتي خطأتي وهو هم خطأ صح غلطته جانت جبيرة بس انتي تعرفين الزين عصبي كلش وغضبو يتحكم به شهم هم ماقصر ظل يروح ويجي عليج وهو يتخبل منه وتعرفيه يغار غيره گشره وحذرج تتكلمين معه وانتي رحتي له للبستان وشافوكم وحدكم به وعمي مجتول يمكم طگ عرج براسه وسوه السواه وهو مو بوعيه
اسمع كلام الكل واكول اي حگه لجن انا هم حگي ازعل عليه واجافي لان صعبه انسى السواه ولا اكدر انسى الصار بذاك اليوم
كلما اشوفه اتخايل روحي بين ايده ويريد يذبحني ادحك للجرح بأيدي يون عليه هو وجرح گلبي جنت اكول اذا اسامحه ماراح تظلي كرامه جدام الناس
ولا جدام روحي وراح اخسر
اعز شي عندي من بعد
الروح وهي الكرامه
گلبي يريده وروحي هم لجن قيد اذيته لي قيدني وخلاني ارفض اعگب اله خليت كرامتي فوگ حبي له
واختاريت اظل هيج هو بمچان وانا بمچان ثاني
ايام طويله مرت علينا بالمزرعه ماكدرت اروح للبستان ادحك له من بعيد وگلبي يدك ويون من الشفتو بي دمعتي تحدر
وامسحها
بهالايام المرت علينا ،،، زين ماكدر يتصل ولا تكلم مع ولده لان ماكو شبكه وسمعنا المعارك اشتدت بالموصل ووگعوا جثير شهداء من كل الطوائف
🌿🌿🌿🌿🌿
زين العابدين
الموصل صارت حفرة موت وحصدت ارواح جثير بشر الناس انحصرت بيوتها وما كدرو يطلعون منها منهم الطلع وسلم بروحو ومنهم المات هو واهلو وصاروا جوه الانقاض
وحنا معهم كل لحظه يگع واحد من ولدنا ويعگب لاهلو بتابوت فارگ الدنيا وفارگهم وخل جرح وونين بالگلب راح يظل طول العمر وياهم
كاعد يم حايط دار ولابد به
صافن للگمر دنيا ليل اسمع صوت رمي حوالينا
گلت بصوت مخنوك
ياضي الگمر اسالك عن هيله وش خبرها وكيف حالها واحوالها
تنهدت وكملت
اشتاگيت ياضي الگمر والشوگ غلاب
سندت راسي ليوره صافن وحاضن سلاحي يدور براسي السويتو بها وشلون
بترت شعرها وردت اذبحها
غمضت بقوه كلت
هذا نتيجه تسرعك وغضبك يازين ضيعت كلشي من ايدك ضيعت بنت العرب وخسرت حبها لي
ونيت بصوت مكتوم وكلت
ااخ يابه ااخ جنت ادگولي الغضب يعمي الواحد عن الحگ ومايخلي يشوف منو الصح ومنو الغلط وتردد قول الرسول الف الصلاه والسلام عليه (( اذا غضبت فاسكت اذا غضبت اسكت ))
وانا ماسكتت يايابه تكلمت وفعلت واذيت وجرحت وجرح البها مابره ولا راح
يبري ابدا
ورثت جگاره واخذت نفس طويل زتيتو وكلام يدور بعقلي واردد وي روحي
بقهر جنت اريد ادورج اشوف وين صفى بيج الدهر لجن خفت لا من اشوفج اذبحج خفت يولي من روحي لا اسويها واسكنج الگبور
ضربت راسي بالحايط بهدواه منظرها واكف بنص الزرع هي وولدي هيج المواجع وهي مو راكده
دمعة عيونها ذبحتني جن تعاتبني بها جن ادكلي شسويت بينا فرگتنا وخسرت گلب جبير جان يحبك
ايد گضبت جتفي وكال
زين العابدين تحضر راح نهجم
علي تكلم معي وكمل
اسمعه الكواد كاعد يقنص بولدنا
رديت
خل تگضبوا ايدنا بالقران الا اسحلو بالهمر
نادونا بالجهاز
تحضرو راح نقتحم هاي المنطقه
تم سيدي
رديت علي كام وويا صافي كمت تاكدت من سلاحي بي دخيره صار رمي كثيف
صحت
يالله
طلعنا نركض ونرمي حنا من جهه والولد من غير جهه صار اشتباك عنيف بينه
وبينهم
كلشي هدأ وره لحظه سرينا نمشط المنطقه بحذر وهدوء وبالنا المفخخين والبيوت المفخخه انا اسري نادوني
زين العابدين
نعم سيدي
تعال من الجهه الشرقيه عذاب استشهد
وگفت بمچاني وغمضت عيوني بقوه كلت بقهر
الى رحمه الله ياخويه
سريناا للجهه الشرقيه اسمع صياح الولد وغلطهم وفشارهم على جم واحد من الدواعش گاضبيهم وخاليهم يم الهمر دحكت
لهم بغضب ونار مشتعله
بصدري صحت
خرررب والديكم نعل صفحه اهلكم جتلتو وين ماكو واحد يسوه راسكم انتو والجابوكم
سحبت اقسام اريد اجتلهم واحد كام وصاح
يااشيخ زين العابدين الامان الامان
وكفت بمچاني من صاح اسمي وعرفني تقدمت علي ملثم بشماغ عتيتو من وجهو عكدت حواجبي من عرفتو واحد من ديرتنا
ضربتو بجعب السلاح براسو وصحت به
نعل والديك خرب صفحه اهلك وولك مننا وبينا وتذبح باخوتك
فقدت وكعتلو دك بالسلاح جروني منه صاح والدم يفلت من راسو وحلكه
الامان ياشيخ افيدك والله بس انطيني الامان
مااالك امان ياغدار اجتلوو ولكم اجتلوهم كلهم لا تخلون واحد طيب
صحت بجنون رد بتوسل وهو يبجي
انااا اعرف من جتل ابوك
جمدت بمچاني من كال هالكلام صافي راح له كعد يمو عتو من هدومه وصاح به
من جتل عمي الشيخ تكلم ولك
انطوني الامان انتو ماراح تجتلوني عگب مااكول لكم من جتلو
هذا صدك كاعد يحجي اسمعه زين العابدين كاعد يساومنا وهو داعشي
علي تكلم وراح له وكعلو دك هو وصافي صرخت بي
تكلم ولك من جتل ابويه تكلم راح يجتلوك
خلف خلف بس عووفوني
صرخ هووو جوة ايدهم فكيت عيوني علي عتو من هدومو وكعدو سأل وهو
يكفخ بي
منو خلف احجي ولك لا اخلي طلقه براسك
دخيل الله لاتجتلوني انا راح اتكلم واكول كلشي بس خلوني عايش ولاتذبحوني
صحت بي
تكلم اانطق لاا تعرف وش راح نسوي بيك
خلف ولد عم الشيخ صگبان هو الي جتل ابوك هو ماغيرو وجان معنا لجن
طلع من زمان وعگب للديره
ولك انت شكاعد ادكول خلف ماغيرو هذا الي راد يجتلني وابويه ديرو من الديره
ااي هو ماغيرو ياشيخ هو بيت لهالشي وخطط له وجتلو بستان المزرعه
مالتكم جان يكول واسمعو
بأذني ثارنا مانام واخذت حگي منه للشيخ شعلان
وبردت گلبي وگلب الشيخ صگبان بي
باااطل ولك بااطل هالردي هو وره موتت ابويه هو جتلو غدر ومعه الشيخ
صكبان
صرخت بجنون وعتيتو بقوه وكملت وانا جازه على سنوني
وينوو ولك هذا وينو الردي ولك تكلم انطق كلي تعرف مچانو
عگب للديره لچن والله مااعرف وين لبد
دفعتو من صدرو وكمت صاح بيه بتوسل وهو يبجي
ياشيخ الامان
رديت بروده
مالكم اماان يالغداره صاافي اخذو وحرص علي هذا شاهد على من جتل ابويه
تم ياشيخ
عته هو وعلي ،،،واخذو من يمنا وكفت نار مشعوله بصدري من السمعتو عگب ماعرفت شهم مو هو الي جتل ابويه انه شكيت بشيخ صگبان وكلت اله يد بهالشي لجن ماجان عندي دليل
علي وهساع وگع بأيدي وراح اخذو للديره واخذ حگي بالدم من عار الزلم
وهذا الشي صار اخذت عذاب الي استشهد ورشيد الي هو وده على خلف وشيخ صگبان وعكبت للديره
🌿🌿🌿🌿🌿🌿
هيله
حنا بالمطبخ الضحى سمعنا رمي امي صاحت
بخوف وقهر
جابو شهيد
طلعنا للبره سعود واگف يم الشارع العام سيارات
جثيره مرت شفت تابوت عليه علم عراقي ورايحين باتجاه دار اهل الزين
سعود عگب وصرخ من بعيد
جااابو الشيخ ااستشهد شيخ زين العابدين
مدري شصار بيه جن شي قوي ضربني بگلبي وراسي هويت بالگاع على رگبتي صرخت من كل گلبي
لاااا لااا لااا
فصلت عن الدنيا بس اصرخ وگاضبه گلبي احسو راح يطلع من مچانو اصرخ مفجوعه
جنت تعرف راح تموت وكلت اابريني الذمه
ريمه
انفجعنا من كال سعود الزين استشهد هيله انهارت بالگاع تصرخ وتضرب على گلبها
امي وياها ملخت روحها خواتي وانا واكفين يمهن ونبجي علي ولدها يتصارخون بنصنا عمه هنيه تبجي وتنوح علي صوت
صاح
وش بلاااكم شصاير
دحكت له فزاع جاي يركض علينا رحت له بسرعه وبدون شعور كلت بشهگه
الزين استشهد جاابو شهيد هساع فات من يمنا
منوو وج هذا مو الشيخ
صفنت علي من رد بهدوء امي صاحت به
يعني الزين مااابه شي
لاااا خاله مابي شي هذا عذاب ولد الشيخ نصيف جابو الزين شهيد
رحت لهيله كاعده بالارض وادحك وهي تبجي
وتشهگ
فزاع گرب منها وكمل
لاتخافين خيه،،، الزين بخير وطيب
يااااسعود شلون كلت لنا هذا االزين اسم الله على عمره
امي انهدت به رد بخوف
مدري ياعمه سمعت كالو جابو الشيخ مستشهد
وعبالي هو
خرب حظك وحظنا وياك وكعت گلبنا ونشفت الدم بعروگنا
ردت علي هيله كامت بصعوبه ماتكلمت بشي
سرت من يمنا وعافت حتى ولدها يبجون وراها
راح يصير يها شي من الهبطه
امي كالت هالكلام ولحكتها هي وخواتي هاله شالت يمان وكادت شعلان ظليت واكفه بمچاني وصافنه
على الصار
شوفي اختج خاف صار لها شي
انتبهت لفزاع واكف حدي وگريب مني دحكت له صافن عليه بنظرلت خلتني ادير وجهي منه واسري لدارنا
هيله
دشيت الدار ابجي واشهگ الهبطه هدت حيلي وهالخبر مااعرف شسوه بي جن روحي راحت مني هويت امي گضبتني وكالت
ااسم الله يمه
يمه مدري شبيه
تكلمت هالكلام ووكعت بين ايدها جنت واعيه لجن مابيه حيل جسمي مات كلو وغديت فد مرة
سمعتها تصرخ هي وخواتي ذبو مي بوجهي وشربوني شوي اريد اتنفس ماكو هو ثگيل يدش لصدري فركت لي گلبي تبجي وتردد
وولجن شي حلو راح تروح من ايدنا
ريمه
شفت هيله غدت فد مره طلعت اركض
فزاع يروح ويجي يمنا صحت بي بخوف
الحك علينا يافزاع اختي مدري شبيها
شبييهاا
صاح واجه عليه گال
سووي درب بسرعه
دشيت اركض صحت
يمه فزاع جااي
ووج خلي يجي اختج مدري شصار بيها
تكلمت هالكلام
هيله گضبت ايدها وهزت راسها بلاا
وج يمه خلي يجي تانوديج للمستشفى خاف صار بيج شي
هزت راسها بلاا ادحك لها غدت صفره والشفه ابيضت هاله خلت مره اللخ شكر بحلكها
ياااخاله ادش
فزاع صاح
رحت له واكف باب المطبخ كلت له
ماتقبل تروح للمستشفى
هي واعيه يعني مافقدت الوعي
لاا واعيه لجن مابيها حيل ادكوم ووجهها غده اصفر والشفه ابيضت
بسرعه انطيها شربت حلو هذا ضغطها صفر من الهبطه عجلي به يولي لا تروح من ايدنا
ااي اي هساع انطيها
انهذلت كمت مااشوف دربي افتر بالمطبخ
تكلم
وج شبيج شدورين
الشربت
يولي شبيج غير خالي بالثلاجه
هاا اي
رحت لها بسرعه فتحتها اردد
وين الشربت ووينو اي هيانو
طلعت باكيت مال زبيب ورحت به لامي شربنا الها مغمضه ودمعتها تحدر وكل ساع تشهگ
حسبي الله عليك حمد من فرگتها عنه حسبي الله ونعم الوكيل عليك من هجمت
بيتها هي والزين
بجيت وي امي الي ظلت تدعي على حمد
اسكت بولدها لان ماسكتو هبطو من ورة ابوهم ومن
وره هيله
شلتها انا وامي وهاله وودينها تسحل برجليها گوه تمددت على الجربايه ترجف وكل ساع تفز غطينها بغطه ثگيل وهي نفس الوضع
شعلان يبجي ويردد
ماما شبيج ماما دحكي عليه
خاله ريمه بابا شبي ماات
لاا مابي شي ابوك مشوار يجي ويشوفكم
هاله ردت علي
صرخ بعصبيه
وهو يبجي
ااجذبون عليه بابا مات سمعت ادكولون ماات
كال هالكلام وطلع من يمنا يركض لحكته راح لبره فزاع بعده واكف بره شافو اجه بسرعه عليه گضبو صرخ بي
ياعم اابويه ماات موو
لا يابه طيب
لااا ماما وكعت من سمعت بي ماات
لك يابه مابي شي هساع يجي ويشوفكم
وديني علي ااريد اشوفو ااريد ابويه
يصرخ ويضرب بي
صحت
شعلاان موو هيج عيب تضرب عمو
عوفي راح اخذو للزين
سكتت من رد علي كمل
اي شي يصير خل امج تتصل عليه ماراح اطول يم الزين بس اخلي شعلان
يشوفو ويطمن واعگب به
لكم
هزيت راسي بأي سرى به وراح عگبت لجوه رحت لغرفه هيله متمدده وامي يمها وخواتي سألت
ها يمه شلونها هساع
مدري يمه مدري بعدو وجهها اصفر ومابيها حيل حتى تفتح عيونها
فزاع
اخذت شعلان ولد الزين ورحت لدارهم طول الطريق يبجي ويشهگ يردد
ابويه مات
ولك كافي ابوك طيب هساع تشوفو
ماسكت ظل ينوح فوگ راسي وصلنا دارهم صايره هوسه يم المجلس والزلم كلها بره شفت الزين واكف وي عم مهنا كلت
شوفو ذاك ابوك
دحك له صرخ بلهفه
بابا بابا
وكفت بسيارتي يريد يفتح الباب مايكدر نزلت رحت فتحت الباب شلتو فلت
من ايدي وكمز الزين شافو اجه علي
شالو وحظنو لصدرو سريت له شعلان يبجي ويحظن بي كلت
الحمد لله على السلامه ياشيخ
هلا اخويه وش بلاه لشعلان عش يبجي
صارت سالفه لا على البال ولا على الخاطر
زين العابدين
عكدت حواجبي من سمعت هالكلام وسألت فزاع
خير يول وش صاير
من جبتو عذاب اهلك شافو الجنازه وسعود شأحجي علي كال الهم جابوك شهيد
ام شعلان سمعت منا وتخربطت وغدت فد مره وابنك ماسكت جبتو واجيت كلت خلي يشوفك
حتى يسكت خفت لايصير
به شي
گلبي هبط وسريت بسرعه للسياره لحكني صعدت بسيارته شعلان بحظني
يبجي ويردد
ماما مدري شصار بيها
ااش يابه اسكت هساع نروح الها ونشوفها
فزاع داس للسياره وصلنا بسرعه نزلت انا وولدي راح يركض لجوة يصيح
ااجه بابا
وكفت باب المطبخ اريد ادش مااكدر امها اجت تبجي كلت بسرعه
ياعمه وش بلاها لهيله
هبطت يمه من وراك ومدري شصار بيها راح حيلها وحنا معها من ورة
الهبطه
ااريد اشوفها
تعال
سريت وراها رحت للغرفه الجوه متمدده وترجف جوه الغطه خواتها يمها يبجن
هيله اكعدي دحكي عليه يولي هياني مابي شي
فتحت دمعتها على خدها كعدت يمها ردت اگضب خدها لجن مو حلالي ولا تجوز لي كلت بقهر
مابي شي يبعد حي وميتي
غمضت تبجي بشهگه
امها كالت
شاادعي عليك حمدد فرگتهم من الله لاينطيك
يمان جان كاعد يمها اجه لحظني يشهگ شعلان هم كعد يمها گضب خدها كال بشهگه
ماما اكعدي دحكي بابا طيب شوفي
عمه بدلي لها تاخذها للمستشفى
مااروح
ردت بصوت مخنوك وكملت
مابيه شي
يولي شنو مابيج شي وانتي غاديه صفره وبسج ترجفين
اريد اظل وحدي
كالت هالكلام ودارت روحها من عدنا تكلمت
هيله خلي اوديج لايصير بيج شي
ماردت امها كالت وره لحظه
عوفها يمه اذا صار شي لا سامح الله فزاع يمنا وما يقصر
سكتت ادحك لها اسمعها تبجي بخنگه كلت
عليمن ادعي يولي على ذاك السكن الگبور لو على روحي من صدكتو واذيتج هالاذيه وانتي لي اعز من روحي
هو مات وخله وراه الاذيه
امها ردت
كمت ادحك لها شعلان گضبني وكال بخوف ودموع
لاتروح ابقى حدنا
مااروح يابه راح اكعد بره يم عمك فزاع منا الما امك تصير زينه يله اعگب للدار
كلت له هالكلام وكملت وي امها
انا بره اي شي يصير تعالي عليه
ان شاء الله ماكو شي
ردت علي بخنگه وهي ادحك لهيله
ظليت صافن عليها هدأت الرجفه بس صوتها بعدها تبجي
سريت من يمها ولدي معي اردد بقهر
بجيت العيون الجانت تضحك لي
هيله
ظليت وحدي بالغرفه اسمع اامي تتكلم مع خواتي بالصاله دمعتي تحدر ما امسحها اعرف نقطه ضعفي الزين اعرف اذا راح انا انتهي واصير عباره عن ذكرى
ماكدرت استوعب هو استشهد عقلي ماتحمل
هالصدمه ولا كدرت اسيطر على نفسي انهاريت وحيلي راح بس عرفت بروحي
خسرته
اجه وسمعت صوتو وشفتو غصه صارت بگلبي ودعيت وتحسبت على حمد لان فرگني عنه وخلاه يصدك انا ممكن اخونه
ردت اتماسك جدامو ما كدرت جسمي يرجف وشهگه تطلع من گلبي وروحي مايعرفون انا طول هالمده الي جنت بعيده بيها عنه انا جنت امثل القوه وانا من الداخل انهيارات بيه مو انهيار واحد
زين العابدين
اخذت ولدي وگعدت بالحديقه فزاع حدي كلت بصوت مخنوك
عرفت من جتل ابويه يافزاع
فز من مچانو وكال
من ياشيخ من هوو
خلف ولد عم الشيخ صگبان
شنوووو
رد بذهول
كلت
مثل ماسمعت
عز الله لانحرگ بيوتهم عليهم وناخذ ثارنا مربع
صاح بجنون
لاااا مو هيج ياخويه اكعد واسمعني عدل
كعد يدحك لي غادي بارود كملت
انا باجر ساري لمجلس القاضي اكعد مع الردي صكبان بسالفه تعرفها مال الفيلق
اي
هناك من اخابرك تجيب لي رشيد وادش بي للمجلس راح يكت كلشي يعرفو عن
الصار وهناك اخنگ صگبان
واخلي يقر عن مچان خلف
من رشيد ولد متعب
اي هو ماغيرو هذا گضبنا وي الدواعش وقر بكلشي يعرفو عن خلف
باطل مننا وبينا والغدر من عدهم ولكم ليش سويتو هيج ليش
اسمعني زين اريدك تحزم الولد مااعرف شوكت اطك الجيله بينا وبين هذا العار خلك حدي وجثر حرس على المزرعه خاف من غدرو لهل الغدار الي جتل
ابويه يعود لنا هم ويغدر واحد مننا او واحد من ولدي او حرمتي واهلها
هذا اول شي راح اسوي
عفيه بيك وهالكلام مااريدو يطلع لثالث خلي بينا باجر اريدك وياي ورشيد يمك
بس اخابرك ادش بي علينا اريد اشوف وجه صگبان وانا احكم ان جان يعرف من جتل ابويه او لااا
تطلع منو ماراد يذبحو قبل سنين وعم حميد ماخلاه وخلف هم راد يذبحك لوما ستر الله وتحشر الفشكه بالمخزن جان جتلك
ااي لجن انا اريد اتاكد اريد اتصرف مثل ابويه من جان يتأنى بالحكم مااريد اتسرع
ياخويه شفت التسرع شسوه بي خلاني اخسر اعز الناس لگلبي
هز راسه ولدي سكتو بحظني نزلو وراحو ليم الدجاج صفنت عليهم وهيله بين عيوني
شفتها شلون خافت عليه وشصار بها من عبالها انا جابوني شهيد عرفت انا بعدني بگلبها مثل ماهي بگلبي هالشعور خلاني
استبشر بالخير
لحظه فرح ولحظه حزن صارن بگلبي بنفس الوگت دك العرج بالراس وكلت
يمين الله عليه اذا عرفت الشيخ صگبان هو ورة غدر ابويه الا احرك دياره علي واذبحو مثل ماذبح ابويه
مشوار كمت ورحت للمطبخ دكيت الباب طلعت لي امها كلت
عمه شلونها هساع
الحمد لله هدأت ونامت
الحمد لله انا راح اعكب لدارنا اي شي يصير خابريني وفزاع حدج ماراح يعوفكم
روح يمه ماكو شي ان شاء الله
اترخص
الله وياك
بابا ظل حدنا
لا شعلان اروح عندي شغل جثير لازم اگضي
دحك عليه بزعل يمان دش لجوه كلت
يله الحك اخوك وديربالك على امك اي شي يصير خابرني من جده
اااي اخابرك تجي موو
اي اجيك مثل الطلقه
ابتسم لي رفع ايده شلتو حبني من خدي وحبيتو كلت
اريدك سبع وزلمه خشن ماريدك تبجي بعد انا خالك هينه تحامي امك واخوك وجدتك والبنوات خالاتك وعيب تبجي شتريد يكولون عليك جبان وابو دمعه
لاا انا شيخ مو جبان
عفيه بيك هذه هگوتي بشيخ شعلان وهساع
اريدك تروح ليم امك ودير بالك عليها
هز راسو نزلتو سرى يتلفت لي عمه بجت من شافتو شلون مايهلو يروح من يمي
يارب لاتحرم ضنه لا من امه ولا من ابوه
ذبيت حسره وكلت
امين ياعمه اروح اعگب بليل اتطمن على هيله
هلا بيك شوكت مااجيت
مع السلامه
الله وياك
🌿🌿🌿🌿🌿🌿
ايهم
المحامي مالتي خفف الحكم لسنه اطلع وره سته اشهر اذا جان السلوك حسن كاعد بسجن وصافن جسدي بي وروحي تهيم
بغير مكان
رغم ازوجت انسانه راقيه بمعنى الكلمه ووكفت وياي بهالمحنه وماعافتني ابدا بس اني گلبي وعقلي كله يم
ليان الي حبيتها وماراح احب احد من بعدها
ساند روحي على الحايط رجال جبير اجه وكعد يمي خل جاي كدامي وكال
تفضل واشرب جاي وياي
مااريد عمو
شلون ترد ايدي ابني مايرد الكريم الا البخيل
سكتت ابتسم بوجهي
اشرب وي عمك الجبير استكان الجاي حتى يصير بينا زاد وملح
تسلم
كعد يمي سأل
انت شجابك للسجن اشوفك واحد مرتب وابن ناس يعني مااعرف شمسوي
حتى تكعد ويانا هالكعده
سكتت طلع جكاره انطاها اليه ورثها وورث جگارتي كال
مظلوم لو ظالم ابني
غمضت عيوني وذبيت حسره كلت
ظالم ومظلوم
صفن عليه رد
احجي يابه طلع الي بگلبك مرات الانسان من يحجي ويسولف البيه يرتاح شويه
والحمل الثكيل يخف عنه
اااخ شاحجي قصتي عجيبه
غريبه
ابتسم ورد
هاي الدنيا بيها قصص تشيب الراس وقصتك يجوز اهون من هوايه قصص
ابتسمت بألم هزيت راسي كال
احجي خل اسمع هالقصه العجيبه والغريبه
جنت محتاج واحد مااعرف غريب عني احجي ويا براحتي افضض اله واذب شويه من
الحمل الي على جتفي طلعت الي بگلبي يسمع ويهز راسه وره ساعه
سكتت والي ذكرته هيج كل الاوجاع
استغفر الله ياربي الشيطان دخل بينكم وضيعك ياابني
ااي وهي هم ضيعتني من حسبي الله ونعم الوكيل بيها
راحت بعد مااذت الكل وخسرت روحها للابد
سكت للحظه يباوع عليه ومقهور كمل
اسمع ابني انت لازم تخلي هالبنيه الي ظلمتها تبري ذمتك وتغفرلك السويته بيها لان صدك ماراح ترتاح طول عمرك مادام اذيتها هالاذيه
سكتت كمل
بس تطلع ويفك الله حبسك روح الها واعتذر منها
وانساها ابني هي مو مقسومه الك ولا انت مقسوم الها وهاي الدنيا ارزاق وانت الله رزقك بمره
حبابه وبنت عمك وتحبك يعني العوض لكيته عيش وياها وديربالك عليها ولا تخليها تحس ابد انت گلبك يم ذيج البنيه تره مايوجع المره غير من تحس هي
انطت گلبها لواحد گلبه يم غيرها
اااي هي ماتستاهل تحس هالاحساس ولا اريد اقهرها كافي السويته بروحي وبيها من وره هاي الساقطه
الله يغفر الها ماتت وهي مسويه ذنب عظيم
مارديت سكتت هو هم سكت وغير الموضوع
🌿🌿🌿🌿🌿
هيله
انا بالفراش حسيت راسي ثگل وعيوني قفلت غفيت ونمت نومه ثگيله جن متت
ماحسيت لا بوكت ولا سمعت اي صوت
ايد هزتني وصوت تكلم
هيله يمه اكعدي
فتحت عيوني گوة شفت امي حدي كعدت وسألت بخوف
ها يمه شلونج هساع
زينه يمه
كعدت حسيت برجفه بجسمي غمضت وفتحت سألت
وين ولدي
بره يم فزاع بالحديقه
سكتت دحكت للساعه بالخمسه سألت
صار الصبح
اسم الله يمه هذا المغرب انتي نمتي من الظهر لحد هساع
ذبيت حسره سألت
اكعدي غسلي حتى تاكلين لگمه تاصيرين زينه
مااشتهي
مايصير يمه لازم تاكلين شي حتى يرد لون وجهج
وياكم اتعشه
رديت مختصر صفنت عليه كالت وره لحظه بصوت مخنوك
شصار بحالج يولي عگب ماسمعتي بي هو اسم الله علي مستشهد
غمضت عيوني بقوه دمعتي حدرت رددت
حسبي الله عليك ياحمد من فركتهم لاهي تريد هالشي ولا هو شفتها شصار بيها
لبنتي وشفتو هو شصار به
من سمع بها تخربطت من وراه
يمممه انا مااكرهتو ولا تمنيت له الاذيه بعدني اهواه ومن سمعت بي ااخ
ياربي
انهاريت ودفنت وجهي بالغطه شهكت
بالبجي كالت لي
سامحي يمه مادامج بعدج تحبي صح اذاج واذانا معج لجن تذكري الزين مالتو
هو ماقصر معنا من تهجولنا من كاع الشيخ صگبان ووفى فلوس جثيره له
ولا من هدينا الديره
من لفو الدواعش
شفتي وش سوه لج ولنا خلي هذا جدام عيونج وعكبي له
مااكدر يمه الزين كسرني كسرا مايجبر
كرامتي وين يمه اذا عكبت له شراح ادكول الادوام عليه وحده بلا كرامه زلمتها هانها وفرعها جدام زلمه وربعه وبتر شعرها وراد يذبحها وتهمها بشرفها
وعگبت له
سكتت رددت بدموع
يمه انا ادوس حبي له واخلي كرامتي
فوك هالحب اتحمل فراكه اتحمل كلشي ولا اسمع واحد يتكلم عني ويكول هذي بلا كرامه وماعدها احترام لنفسها
مدري يايمه مدري انتي حكج وهو هم حگه وما اعرف شلون راح تصفى بينكم
سكتت دمعتي بعيوني ولدي اجوي مسحتهن بسرعه شعلان جايب بيض بهدمو
ويمان بيضه يايدو كال
جده شوفي لمينا لج البيض
عفيه بالسبع
ماما صرتي زينه
ابتسمت گوة اله وهزيت راسي كال
عجل كومي خلي اشوفج الدجاجه الحمرة وين تضم بيضها
عوف امك هساع باجر الصبح شوفها وين تضم بيضها هالمصكوعه
ههه جده مزنه ادكول هالجلمه لعمه هاجر
گرب مني امي اخذت البيض منهم سأل
ماما خل نروح لعمه هاجر اشتاكيت لها
اي فد يوم ادزك لها انت ويويو
ااي وياج انتي وبابا موو
سكتت شلون اريد جروح گلبي تطيب وانا اسمع منهم هالكلام
امي اخذت البيض وطلعت من يمنا يمان ضرب على ايدي بهداوه يريد يلفت انتباهي كال
ماما ابه لاح عن عن
اي هو يجيبلك باسكل
ااي شوشو هم
اي اخوك هم
كامو يكمزون يمي من فرحتهم امي دشت
شايله جهازها
لا يمه كعدت ومابها شي اي ابو شعلان تطمن لايظل بالك هذوله ولدك يصيحون
بابا جيب باسكل انا ويويو
امي انطته ااجهاز راح يتكلم مع ابوه ويويو وراه
امي اجت ليمي كالت
سندي عليه وكومي
مابيه شي يمه انا اكوم
كمت وكفت حسيت بدوخه بس مادرت بال دحكت لي شافتني مابي شي كالت
اروح اسويلج شربت طبيعي مال زبيب اظن يولي بيج فقر دم وجهج صارلو فتره هيج شاحب
هزيت راسي بأي راحت من يمي اخذت هدوم سريت للحمام اسمع شعلان يتكلم
مع الزين عن البيض وساريه يمو جن فاتحين كامره
دشيت سبحت اريد روحي ترد اليه وصدك شويه تحسنت عن الاول طلعت
للغرفه صليت الفرض مال العصر وقضيت الظهر انا جالسه بمچاني اسبح شعلان دش يركض صاح بفرح
ماما بابا يريد يشوفج
خله الكامره جدامي بسرعه كعد بحظني ويويو هم ماتكلم صفن عليه انتبهت
له وجهه مطعون وغادي دم
نزلت راسي سال
شلونج هساع
الحمد لله
ماما اواه
يمان تكلم وحبني من خدي شعلان
سوه مثله وسالني
وين الوجع تابوسه مو انتي من نتعور تبوسين الاواه
مارديت اتجنب ادحك للزين كال بصوت مخنوك
هيله عرفت من جتل ابويه
دحكت له كمل
خلف ولد عم صگبان هو الي جتل ابويه
من كلك
رديت بخنگه
رشيد ولد متعب گضبتو بالموصل مع الدواعش وقر واعترف علي
دمعتي حدرت كمل بقهر
اخ ياهيله اريد اجتلهم كلهم اريد اروح هساع احرك بيوتهم ومااخلي واحد طيب
سكتت كمل
شوري عليه يبنت العرب وكولي لي الراح اسوي صح ولا اغلط
اسمعك يازين
راح اروح باجر اكعد مع الشيخ صكبان بشي يخص الفيلق وراح اخلي فزاع يجيب رشيد واخلي يقر بكلشي يعرفو يم القاضي
اي وتشوف رده فعل صكبان وتحكم عاد اذا هو له يد لو لاا
اي فهمتيني وش اريد اسوي
انت ماسالت رشيد اذا جان هو له يد بغدره عمي لو لاا
سالتو مايعرف
شرت الكبار بهالشي
لاا ماتكلمت الا مع فزاع واتفقت معه خفت تطلع السالفه منا لو منا وهالردي
يعرف وياخذ حذره
سكتت ولدي يدحكون لي وله هوجست نار راح
تشتعل بالديره اذا ثبت صگبان اله يد بالصار بعمي
اعرف زين بس يتاكد راح يحرك الاخضر واليابس ومايخلي شي مايسوي كال
انا شددت الحراسه عليكم ومااريد اي واحد منكم يبعد عن الدار منا الما اگضب
خلف واصفي شغلي معه وحگ الله بس تگضبو ايدي الا اجيبو سحل من مجانو للديره بزفه مووت
يازين اخذ ثارك منه لجن لاتمثل بالميت حرام ما يرضي الله هالشي الشاه تنذبح ويوجعها الالم لجن مايوجعها شي عكب السلخ
يولي نار شايه هينه
اشر لصدرو وكمل بغصه
مااعرف شلون راح اتصرف هيله انا هساع گاضب روحي گوة مااريد اسري
لهم واذبحهم مااريد اصير ظالم مره ثانيه اريد اتاكد يله اتصرف
عيوني بعيونه سكت للحظه وكمل
ظلمتج من وره تسرعي وصارتلي عبره من هالشي بس عگب ماخسرتج للابد
درت وجهي منه دمعتي حدرت ردد بخنگه
انا المخطي وانا الندمان وانا المجني وانا الجاني
بابا لاتبجي ماما
شعلان تكلم بزعل وهو يدحك لي وله كلت
ماابجي من وره بابا
لاا انتي كلما تشوفي تبجين هو كاعد يزعلج
سكتت دحكت للزين فد مرة صار كلت
عيب ماما هالكلام انا تذكرت جدك شعلان وبجيت
ظل صافن عليه وبعدين لابوه ماتكلم الزين كال بغصه
اروح ياهيله ومااوصيج لحد يطلع منكم حتى للبستان لاترحون وحرصي على روحج وولدنا واهلج
هزيت راسي بأي سمعت صوت زلم يمه كال
مع السلامه
الله وياك
🌿🌿🌿🌿🌿
زين العابدين
كاعد بمجلس القاضي معي الكباريه من وجوه قبيلتنا جدامي الشيخ صگبان
القاضي تكلم
شيخ زين العابدين الشيخ صكبان جاني يشكي ويكول انت ماتقبل يگضب اي شي يخص الفيلق ولا تريد تخلي ايدك بايدو صح هالكلام
اي صح
ليش يابه لاتنسى ولد عشيرته مشاركين معك
بهالحرب وهو جبيرهم يعني
مابها شي تخلي ايدك
بايدو مادام ساعي للخير
ياقاضي اسالو جدامك هو وين جان من ابويه وانا تحزمنا وصحنا النفير يالربع
كلت هالكلام ودحكت له كملت
وين جنت ياشيخ من جنا نحزم بولدنا وولد الديره ونصرف من عدنا ونجهز لهالحرب
انا جنت مستهدف وطلعت من الديره مثل ماانتو طلعتو
حناا ماطلعنا من عدها الا من شفنا الدواعش دشو لها ماهدينا اي شي ولا فلتنا
باروحنا وبالغالي والنفيس الا من شفنا الشغله انداست وبعد مالنا كعده بها
سكت القاضي كال
هساع هو يريد يكف وياك وانا اشوف هالشي خير للكل
لاا ياقاضي مع احترامي لك مايتساوى الي وكف وحزم وصرف مع الي هد كلشي وفلت بروحو
وووش كاعد ادكول انت شقصدك انا جباان
صاح بيه ردت اكوم له لجن حسيت ايد ابويه گضبت رجلي وصوته رن باذني
بهداوه يازين الجلمه الصح توجع اكثر من ضربه الايد رديت بهدوء
لا ماكلت هالكلام انت كلتو
سكت يدحك لي بغضب كملت
ياشيخ صكبان ابويه قدم روحو لهالديره انت وش قدمت گلي
مارد علي القاضي كال
الله يرحمو للشيخ شعلان اصيل وماقصر مع اهل الديره وحرامات لحد هساع مانعرف من جتلو
عيوني على الشيخ صگبان وجهو تغير لميت قبضه ايدي بقوه وكلت
لجن انا عرفت من جتل ابويه
تذب الابره بالمجلس ماتنسمع من الهدوء الصار بيه صحت
يااافزاع ..........
