رواية الرجل الاخر كاملة جميع الفصول بقلم جوهرة
لم اعد داريا اين اذهب..
كل يوم احس انك اقرب..
قد تسللتي في مسامات جلدي..
مثلما قطرات الندى تتسرب......
يسكن الشعر في حدائق عينيك ...
فلولا عيناك لاشعر يكتب
🍒🍒🍒🍒🍒🍒
ملاذ / مااكدر بعد صدكيني مجاي اتحمل..
حجت بقهر وهي ادحك على صديقتها بنظره مليانه يأس
شجعتها صديقتها و بقوة / ملاذ يعمري اعرفج قويه وشجاعه لاتخلين عصام يخوفج انتي اكبر من هالضعف هذا اللي اشوفه بعيونج اليوم ، ابقي قوية مثلما اعرفج
ردت ملاذ بشراسه / ما اسامحه اني اكرهاااا اناني كول اليهمه شأملك من فلوس وشكد عندي أملاك
تنهدت وذبت حسرة ورجعت كملت وبصوت ناصي ..ميحبني
حظنتها علا وحجت برقه / اووي فدوه للتحب الرومانسية
ملاذ وهي تمسد على ذراع صديقتها / سنتين وياه ماسمعني كلمة حب وحدة كل اليهمة المال ، الصفقات ، وبس ومشاعري ميهتملها ..تدرين اني شكد نادمه عالزواج منه وما ادري شلون رجعتله بعدما طلكني !!!
سكتت علا تحب تنطي مساحه من راحه الفكر لصديقتها قطعه صوت أحد زملائهم ينادي لحظور الكادر الطبي فورا
تنهدت ملاذ / ااه اكيد مصابين أو حالة خطرة وصلت هسة
وفعلا وصول الإسعافات تحمل عدد من الجرحى بسبب انفجار صار قرب احد المطاعم....انشغل الكادر الطبي بعلاج
الجرحى .
ملاذ تضمد بالجرحى وتسمع انينهم ومر بخاطرها الالم اللي يعاني منه الجرحى مقارنه بألمها وحست شكد مشكلتها تافهة مقارنه بالجاي يمرون بي ذول الناس الي ما عدهم ذنب ذنبهم تواجدهم بالمكان راح يعتبروا مشؤم بالنسبه الهم.
حست بأحتقارها لعصام مايهتم بس للفلوس
وهي جاي تعيش معاناة الناس المرضى الجرحى اشكال تمر عليها بهذه المستشفى.
.......
بعد مرور الوقت وانتهاء عملها ومناوبتها بالمستشفى رجعت للبيت
جانت الساعه ٧ المسا وكالعاده عصام مموجود !!!!
دخلت للغرفه وراحت طلعت تراكسود ومنشفة ومباشرة للحمام وفتحت الدوش وبقت جوا المي البارد حست اعظامها ارتاحت لان جان اليوم كولش متعب بالمستشفى حست رجعلها نشاطها بعد ما كضتها ركض والجو حار بعد شهر حزيران هنا بالعراق نار
طلعت نشفت روحها ولبست ومشطت خلت عطر وراحت للمطبخ تسوي لروحها لكمه لان ميته جوع
ملاذ /
فتحت الثلاجه صفنت بالخضراوات على بالي اسوي زلاطة شي من المقبلات ورجعت سديتها احس روحي مسحوكة ونفسي
انسدت بعد ماجانت جوعانه !! رجعت للغرفه مديت السجادة ولبست حجاب الصلاة صليت الاوقات الفاتتني المفروض اواضب عليها واصليها بالمستشفى بس ما اكدر الا اصلي بالبيت
باوعت للجرباية منظرها وترتيبها يناديني انام ، مددت وحاولت انام ورى فترة حسيت وبقيت اتكلب بالفراش ومن شفت الساعه مالت الموبايل ب٢ سمعت حركه بالبيت وصوت كمزت من فراشي وسحبت شعري الاسود الناعم طاير على وجهي بعدته
ورى اذني ولميته كبايه فتحت الباب طلعت من الغرفة بخطوات هادئة طلعت بالممر اليودي للصاله
سمعت صوت عصام يحجي وي واحد مديت راسي ولمحت رجال اطول من عصام حنطاوي ولحيته ثخينه حسيت بخوف من هيئته جان شكله واضح لأن الصاله منورة خفت منه مادري ليش حسيته بهذا شكله وملامحه القاسية شيطان
تفاجأت من سمعت عصام يرزله والرجال ساكت ودنك راسه وعصام يهين بي ، اكو شي بينهم لان وجودهم بهذا الوكت غلط !! وانوب اسمع عصام يكله ابقى الليله هنا بات والصبح اطلع !!!! وراه مصيبة لو شنو وليش يجيبه للبيت !
رجعت بسرعة للغرفة امشي على اصابيعي قبل ما يجي عصام اللي دخل بعدي بلحظات للغرفة ،، حاولت انام مغمضة عيوني سمعت حركته بالغرفه ينزع ملابسه
دقايق ودخل بالفراش لينام مثلما تعود !!!
ماحسيت الا على صوت المنبه موقته الموبايل كعدت توضيت وصليت الفجر
دائما تفوتني صلاة الفجر لان انام تعبانه من ارجع من دوامي ، بس احاول اصليها باوقاتها والله بغفرلي
دخلت للمطبخ اسوي ريوك وراية دوام سويت بيض تكلاه وطلعت جبن ومربى من الثلاجه حطيتم عالميز بالمطبخ صبيت چاي وكعدت ، شعور وإحساس لامسني انو اكو عين تراقبني وفعلا رفعت راسي وشفته صدوك من شبهته شيطان ، والله يخوف مو شكله يعني بخوف لا هو جان الوسامه واضحة بوجهه بس شعره ولحيته التارسه وجها نظراته وعيونه يخزر من يدحك تخلي غامض ويرعب ، عيونه مصوبها بغضب علية
فزيت لأن نسيت هو موجود توقعت طلع بس الظاهر سمع كلام عصام من كاله لاتروح ، ديلا واني ماخذة راحتي شعري رافعته فوك راسي والخصل الناعمه نازله على وجهي
ولابسة تراك نص ردن ، صابتني رهبة من شفته واكف بنص باب المطبخ وهدوئه يخوف
عفت الكوب وسألته بنترة لأن ماحبيت تطفله ابيتي / نعم تريد شي ، مو من الافضل تنتظر مديرك ؟!!!
بقيت اراقبه بقلق وبعدها اسمع صوته الخشن الرجولي يعتذر / اسف جنت عطشان وجيت اشرب
كمت وطلعت من الثلاجه بطل مي بارد وناوشته واني عيوني تخزره / تفضل
اخذها فتح القبغ وشرب وعينه علية من رجعت كعدت ، روحي انتابها الانكماش وهو يطالعني بهذه النظرة كرهت نظرته شكد جريء لخاطر الله سويت نفسي ممهتمة نزلت راسي اكمل ريوك
سمعت صوت عصام ومن رفعت راسي ماشفته للرجال !! عصام دخل المطبخ وصبح علية جان يكللي
عصام /
منير يشتغل عندي صارله فترة كولش خدوم وهواي يساعدني .حضريله ريوك
خزرته بنظره كولها برود / ماشاء الله شنو هالاهتمام بعامل بسيط ترى هذا مو طبعك !!!
كعد كبالي واخذ صمونه وقسمها يريد يتريك ورد علية بضوجه / ماكو داعي تستهزئين ادري شسوي ميعجبج العجب
عفته وطلعت من المطبخ جان يصيح عصام
بصوت / منيررر ..منيررى تعال تريك
دخل منير وبقى صافن ، نتر بي عصام / شبيك جنك حايط واكف تعال تريك
كعد كباله وكاموا يتريكون وراها بشوي دخلت ملاذ مكمله لبس وشايله جنطتها تريد تروح للمستشفى حجت بنترة / رايحه واميرة بالتسعة تجي تنظف البيت
عصام / شبي البيت اشوف يلق نظافه
ضيكت عينها / لا تتدخل بشغل النسوان
مشت رافعة راسها بدون متهتم بيهم ولا بنظراتهم محاوطتها كل واحد جانت عنده نظره خاصة الها !!!!
انتبه عصام لمنير اللي يفتت الصمونه بين أصابعه / اكل شبيك تتصفن
منير ابتسم تك خد / انحرجت ، ماجان اجي هنا زحمة وزوجتك موجودة واضح ضاجت
عصام يهفي بيده بمعنى لاتهتم / دعوفها يمعود هي ميعجبها العجب ، يلا كمل حتى نطلع للمكتب
منير شغل نفسه ياكل بس عقله يفكر بشغلات خلت راس مزدحم بكم الأفكار والهواجس اللي عنده
ــــــــــــــــ
بمكان اخر في مدينة بعقوبة
ديمة تحاول تماشي عمتها بكلامها وهي تفرض عليها رأيها / تمام عمة اسوي اللي كلتي عليه
ام سعد / اي ومثلما وصيتج سوي مقدار كوبين تمن نكعيهم وضيفي شعرية ويتهم من تطبخين
ديمة / إن شاء الله
ام سعد / لا تهبدين الزيت ادري بيج ايدج مو الج وسدي القبغ زين لا يوكع ويتبدى مثل ذاك اليوم
ديمة بغيض / عمة والله ذليتيني تورطت وكعت شوية زيت
ام سعد / ولج مكموعة نص بطل ساح وانتي فاهية ما تلاحكتي عليه
ديمة تستغفر بداخلها وسكتت ما يفيد بعمتها ، شسوي اداري خبزتها هنا وين تروح
، شافت عمتها طلعت من البيت راحت للغرفه تأكدت عبودي نايم حتى تشتغل براحتها لأن اليوم عدها تنظيف وتعزيل
كملت كولشي وانتظرت عمتها ترجع والظاهر للعصر يلا تجي من بيت اقربائهم ، سمعت صوت الباب ودخل سعد سلم عليها وابتسامة بوجهه من شاف عبودي بحظن أمه / هلوو عبيد تعال شوف خالو اجابلك
انطى العلاكة لعبودي بيها حلويات وجبس اخذها عبودي وهو فرحان ، شكرته ديمة / تسلم والله بس لا تعوده تبتلش بي بعده صغير
سعد بحنية / خلي يدلل عبيد ، شوفي شلون فرح
ديمة بود / الله يحفظك لو ما انت منو يفرحه
تنهد سعد ورجع سألها / شنو طابخة ترى جوعان
ديمة / تدلل غسل وصلي بينما احظر الصينية ، طبخت تمن بشعرية وتشريب حمص
وعدنا خضرة هماتين
سعد / نعمة كريم
طلع يتوضى حتى يصلي الظهر وديمة كعدت عبودي عالمخدة بالمطبخ وراحت تحضر الصينية ، سمعته يسألها على أمه كالتله راحت لبيت ابو علي ( اقربائهم)
ـــــــــــــــــــــــ
المكان معرض للسيارات الحديثة في بعقوبة
فارس وهو يفتش موبايله يقرأ كم الرسائل ومبتسم وعيونه تشع خبث للراح يسوي ، ضغط الاتصال ولحظات يسمع صوتها تدلل وتتغنج تريده يمر عليها
فارس / احترك كارتج يلا باي
انتبه عالاتصال اللي ورده فتح خط فرحان / ياهلا باللي راح ونسانا يا هلا بصاحبي العافني ولا سال علينا
/ ......
فارس / انتظرك كمل شغلك وتدلل على احلى سهره واحلى وناسة
/......
فارس / بحفظ الله دير بالك على نفسك
أنهى الاتصال بصديقه وأخوه وأكثر صح مايربطهم الدم لكن ربطهم وثاق الصداقه الحقيقية
نهض من مكتبه وراقب العمال برى بين السيارات اللي بالمعرض لاحظ غياب واحد منهم وسأل عليه كالوله راح يتغدى ويرجع
اجا اتصال ضيك حاجبه وهو يدردم وسوى حظر للرقم / مو مرة ستيشن لازكتلي اعوذ بالله طلكتها وما خلصت !!!
