رواية حرم الاسود الفصل العاشر بقلم بتول ابو الليل
اريانا : بقيت بالمستشفئ وضعي زين بس كالو لازم ترتاح ويخلص المغذي.
مادري شصار ويه تيمور كل ماتذكر تصرفه وياي احس كلبي يصير جمر ليش هيج تصرف وياي متاكده ميحبني هل انسان مريض ونسونجي بشكل موو طبيعي كل همه البنات تنعجب بيه وتسلمه نفسها.
بقت امي يمي ليلتها ابوي واخوي رجعو للبيت مسلم حيل انزعج مني لأن جنت ويه تيمور هوه هم يعرفه موو راحه ويخاف عليه منه.
ثاني يوم الصبح اجانه ابوي سجلي خروج طلعنه من المستشفه جان تيمور واكف باب المستشفئ مضمد راسه وايده هم مضمده وجهه عباره عن جروح وشكله يخوف صاير لازم بيده عكازه لأن رجله متأذيه امه واخوانه وياه بعد 3 شباب ماعرفهم من ضمنم زيد الي سلم عليه مره بيتهم.
حازم : ها بويه شلونك
تيمور : شويه احسن
حازم : شصار بالولد طلع عايش موو
تيمور : أي عايش بس متكسر واني تحملت كل المسؤليه وراح احاول اعوضه عن كل ضرر سببته اله.
جميله : الحمدالله ع كل حال المهم طلعتو سالمين كلشي يتعوض
تيمور : أي خاله صح كلامج هذا المهم.
جنان : الحمدالله علئ سلامتج حبيبتي
_الله يسلمج
زيد : شلون صرتي
_الحمدالله بخير
زيد : انشالله دومج بخير
تيمور : أحم نوصلكم ويانه
حازم : لا بابا سيارتي موجوده
تيمور : خاف عندك شغل شيء اني اوصلهم
قصي : بعده جرحك اخضر ماتكدر تسوق اصلاً
حازم : ارتاح ابني ولاتسوق هل فترا
هز راسه بأي يباوعلي درت وجهي عنه واني ضايجه مشينه اني وامي للسياره شويه واجه بابا ورانه.
صعد وساق خليت راسي علئ كتف امي واني تعبانه شويه وصلنه البيت نزلنه اني وامي وبابا راح لشغله تلاكت ويانه بالباب عفاف مرت اخوي
عفاف : الحمدالله علئ سلامتج حبيبتي
_الله يسلمج
عفاف : گلت لمسلم ياخذني الج بس ماقبل كال مابيها شيء وباجر يخرجونها.
_أي ماكوو داعي وين ريان
عفاف : نايم
جميله : انتِ هم ماما اصعدي لغرفتج اسبحي وبدلي ملابسج ورتاحي
هزيت راسي بأي عفتهم وصعدت لغرفتي بدلت اخذت ملابس ودخلت سبحت وطلعت انشف بشعري اباوع علئ شكلي بالمرايه.
تذكر شلون باسني تيمور من شفتي بلعت ريكي بتوتر
كلش خايفه يعرف مسلم بالصار تصير كارثه والله حته بعد ميخليني اوصلهم ولا احجي ويه اليان هوه من غير شيء علاقته موو هل كد وياهم.
تأففت بضوجه ورحت كعدت علئ سريري دايخه وافكر بكلشي صار اخذ جهازي مني هسه شلون بيه كل ارقامي وصوري وصديقاتي لازم اخذه منه اكيد عنده هسه هوه .. تمددت علئ فراشي ونمت.
كعدت العصر علئ صوت عفاف واكفه يم راسي
عفاف : اريااانا كووومي يمعوووده اليااان لاكين مكانها
كمزت من نومي واني ممصدكه الكلام السمعته.
_صدكككك والله منووو كالج
عفاف : هسه والله سمعت من مسلم واجيت اكولج
_الحمدالله ياربي الحمدالله
كمت بسرعه غسلت وجهي ونزلت اركض جوه اسمع شلوون رجعت للبيت وشصار وياهم.
_هااا ماما صدك راجعه اليان
جميله : بعدها ماراجعه بس سمعنه ابوها عارف مكانها ورايح حته يجيبها من الناصريه.
_ياااا شوصلها لهناك
جميله : والله مادري
_وهسه
جميله : شمدريني ياامي اخوج انطانه الخبر وراح مادري لاكينها هسه بعدعم
_وينه وين راح
جميله : اجاه صاحبه وطلعله
_اووووف هسه وكته
ريان : عمه بيج اووه
_ها حبيبي لا مابيه شيء
كعدت علئ ركبي خليته بحضني ابوس بيه شاف ايدي مجروحه ومضمده وكال هيج
عفاف :انشالله يلكونها خطيه صارلها هواي من انخطفت
_انشالله يااارب
شويه ودخل مسلم للبيت كمت بسرعه رحت عليه ملهوفه.
_هااا مسلم صح لاگين مكان اليان
مسلم : أي صح بس بعدهم ماواصلين الهاا.
_انشالله يلكونها
مسلم : انشالله.
بقينه كاعدين ونسوالف موضوع اليان صار اليل سوينه عشه اني وعفاف وكعدنه كلنه تعشينه اجه علينه اخوي خالد هوه ومرته وجهالهم
عنده 3 بنات و 2 ولد بناته ضي، قمر، ملك
اجوني لأن سويت حادث تحمدولي بالسلامه وبقو يمنه.
صارت ساعه بـ 11 بليل رجعو لبيتهم صعدت لغرفتي ارتاح تمددت علئ فراشي مانعسانه ولاكدر انام.
بقيت اتكلب وافكر بكلشي ديصير وياي مجاي افهم شيء
فكرت هوواي منا لحد مادخت ونمت كعدت ثاني يوم الصبح.
كمت بسرعه غسلت وجهي وبدلت ونزلت جوه أسال اخوي عن اليان اذا رجعوها لوو بعدها.
لكيت امي وعفاف يتريكن وابوي واخوي طالعين للشغل
_صباح الخير
عفاف +جميله : صباح النور
_هاا يمه شكالو علئ اليان لاگينها.
جميله : لأ مالاگينها بس متعقبين الاتصال ومحددين الموقع الي جانت بيه ومن رايحين مالاكينها بنفس المكان.
_ياااااا
جميله : والله وابوها خطيه حته باقي يبجي عليها خايف عليها حيل همه مهددينه اذا يسوي أي تصرف غلط يأذونها.
_ياربي دخيلك وهسه شلوون شنسوي
جميله : والله مادري يايمه احس گلبي جمر عليها مادري شنسوي شلوون نساعدها قبل شويه خابرت ابوها مايكدر حته يحجي ابوج كال من يرجع من الشغل نروح عليهم.
_اروح وياكم.
جميله : وين رايحه انتِ احنه نروح بس نشوف ابوها ونصبر عليه ونوكف وياه نسأله اذا محتاج مساعده شيء نكدر نسوي اله.
_مااا والله اروح وياكم معليه ماكدر انتظركم تجون وتنطوني خبرر عنهاا.
جميله : خلي يجي ابوج واسالي اذا قبل روحي اني معليه
هزيت راسي بأي وسكتت عافتنه امي وكامت راحت تخابر بابا بقيت كاعده گلبي معصور عصر علئ اليان حييل خايفه عليها عيوني نملت دموع كل ماتذكر سوالفنه سويه وضحكنه ياترئ شسوو بيها هسه أذوها.
عفاف : احمم اكلج اريانا
_كولي
عفاف : سمعت بيج جنتي ويه تيمور بالسياره شعدكم احجي بينكم علاقه لوو شنوو
_ماكو شيء بينه لاتشغلين بالج
عفاف : احجي شبيج والله ماحجي لشخص ماتعرفيني شنوو
_شوفي والله لو اكوو شيء جان حجيتلج بس ماكو شيء من الي تفكرين بيه مجرد جان يريد يوصلني لا اكثر ولا اقل بس اني حضي مصخم وين ماروح المصايب تفتر وراي واكثر من مره اطلع من الموت ولوو الله ياخذني احسلي بهواي.
عفاف :ههههه شبيج هسه انفعلتي وضجتي من كلامي شحجيت اني بس تدرين شخصيته كلشش حلوة وهوه جذااب شكله فخامته كلش واو
_كون يسمعج اخوي هسه جا علمج الحجي شلوون يصير.
عفاف : بس اخوج بعيني احلا ترا
_ايي واضح.
عفتها وكمت اني بيا حال وهاي تحجي هيج صعدت لغرفتي واني ضايجه وخايفه حيل.
لاكلت ولاشربت كعدت بالغرفه وسكتت صارر الظهر دخلت امي عليه للغرفه
جميله : شبيج ماما يوجعج شيء
_لأ مابيه شيء
جميله : چا ليش حابسه نفسج بالغرفه
_مقهوره حيل علئ اليان وخايفه يسوولها شيء ماما تدرين بين شكد احبها واعزها خايفه اخسرها وبعد ماشوفها.
جميله : لاتحجين هيج ماما لاتفاولين عليها انشالله ترجع سالمه ومابيها شيء
_انشالله يارب
جميله : يلا تعالي انزلي ابوج رجع وسأل عليج نزلي تغدي وكوليله اذا يقبل حته تروحين ويانه
هزيت راسي بأي كمت غسلت وجهي ونزلت وياها جوه جان اخوي مسلم كاعد ومخلي ابنه ريان بحضنه يلاعب بيه من نزلت باوعلي بتركيز.
بلعت ريكي بتوتر يحسسيني مسويه ذنب او يعرف بالصار بيني وبين تيمور رحت كعدت يم بابا
حازم : هاا بويه شلون صرتي
_الحمدالله احسن
حازم : يالله شربتي علاجج
_لأ
جميله : كلشي مامخليه بطنها من لبارحه
حازم : ليش باباتي
_ماعرفتو شيء عن اليان
حازم : لأ والله يابويه كلشي ماعرفنه خابرت ابوها ليوم كال ماكدرنه نوصل الهاا بس رايحين للمكان الجانت بي وسألين اهل المنطقه ومحد منهم عارفها او مدليهم عليها وراجعين كلشي مامسوين.
_اوووف بس لايسولها شيء
حازم ; لاتخافين كلشي مايسوون لأن مصلحتهم بيها ميكدرون يأذونها ابدد.
_انشالله ميسولها شيء
جميله : يلا حبيبتي كومي اكلي حته نروح
مسلم : وين؟
حازم : لبيت ابو تيمور
مسلم : واريانا شكوو رايحه
_اريد ..
مسلم : ممنوع
جميله : شتريد منهاا خليها تروح ويانه
مسلم : كلت ممنوع ماتشوفون حالتها وين طالعه
حازم : وانتَ احرص منه عليها رايحه وياي موو ويه ناس غريبه كومي بابا اكلي واخذج وياي
مسلم : عود تعاندوني لووو شنو بالضبط
حازم : انتَ منتبهه علئ نفسك شلوون جاي تعامل اختك هل فترا شبيك بابا ليش حاط كورك وياها شمسويتلك.
مسلم : مامسويتلي شيء واختي هيه اذا ناسين اخاف عليها واريد مصلحتها.
جميله : ميخالف يمه بس هل مره خليها تجي ويانه بعد ماتروح والله
مسلم : كلت ماتروح يعني ماتروح.
_خلص ماروح اني هم تعبانه صاعده ارتاح
مسلم : تعاي وين اكعدي اكلي لاتزعلين علئ الاكل
_ماجوعانه والله
سحب نفس بقوه وكام من مكانه لزمني من ايدي وخذني كعدني يمه ع قنفه
مسلم : لاتضوجين من اخوج ترا والله لمصلحتج هيج اسوي اخاف عليج وانتِ ماصارلج يوم من طلعتي من المستشفى
_ماضوج منك والله وعادي ماروح بس علمود اليان خايفه وجنت اريد اسمع اخبار عنهاا
مسلم : كلشي يصير وياهم اني عندي علم بيه واول ماسمع شيء يخصها اجي واحجيلج
_تمام
حازم : عفيه هيج اريدكم خوتكم حلوه موو عرك ومعاند.
مسلم ; خواتي كلهن احبهن موو بس هاي
حازم : بعد ابوك
جميله : يلا نروح
حازم : يلا
كام بابا هوه وامي راحو علئ بيت اليان بقيت اني كاعده ويه اخوي وريان يلعب يمنه بالطوبه شويه وعفتهم ورحت للمطبخ اكلي شيء حته اشرب علاجي.
.......
صار اطلاق نار مانعرف منين وليش وعلينه او علئ غيرنه صرخت وخليت اديه علئ اذاني اجاني بسرعه آرون حضني علئ صدره ورجع بيه لداخل الزرع والنخل والاشجار.
آرون : اششش لاطلعين صوت لاتخافين اني وياج ماعوفج والله لاتخافين.
_شنوو هذا ليش ديرمون علينه
آرون : احتمال موو علينه لأن الصوت بعيد موو قريب حيل علينه يمكن صياده لاتخافين اوك بس اهدي ولاتصرخين.
لفيت ايدي علئ بطنه من الجهتين وحضنته وهاي جانت اول مره بحياتي اسوي هيج حركه.
جنت حيل حيل خايفه منا الضلام والاصوات الي اسمعها ومنا اطلاق النار
حضنته بكل قوتي صار وجهي علئ صدره اسمع حته دكات گلبه هوه حاضني ويتلفت يمنه ويسره.
_حيل خايفه آرون طلعني منا فدووة.
آرون ; ماكوو شيء يخوف اني وياج اهدئي.
_متسمع الاصوات يمكن اكوو حيوانات مفترسه هنا
آرون : اكو ذيابه بس ماعتقد بهل مكان
_شنووو يمممممه يعني اكوو ذيابه هسه يفترسونه خلينه ننهزم شمنتظرين.
آرون : اوكفي خليني اتصل علئ جون واشوفه وين صارر
ابتعدت عنه طلع الجهاز من جيبه واتصل علئ صديقه جون.
آرون : ها وينك أي احنه قريبين منه تمام تمام راح نجيك.
سد الخط رجع الجهاز الجيبه دار وجهه عليه وكال.
آرون : يلا امشي واصلنه جون بس ميكدر يفوت السياره هنا لأن طسات قويه وخاف تعطل
هزيت راسي بأي لزم ايدي ومشينه رجعنه سمعنه اطلاق نار لزمت ايد آرون حيل سمعنه صوت سيارات شرطه قريبه علينه
ركض آرون وخلاني اركض وياه شويه وشفنه سياره جون واكفه علئ صفحه بمكان ظلمه حيل
راح بسررعه آرون فتح السياره ودخلني ودخل وسد الباب.
آرون : سووووق بسرررعه
شغل جون السياره بسررعه وساق اني بس ساكته ماعرف التصرف السويته هسه صح لوو غلط ليش قبلت ابقه وياه بابا جايني يريد يخلصني
ليش مابقيت انتظره احس افكاري تشوشت وخفت اكثرر.
_وين راح تاخذوني هسه
جون : مادري والله وين اخذكم آرون
آرون : اطلع كبل الاربيل
جون : مخبل صاحي انتَ
آرون : لأ صاحي وعقلي سليم راح اخذها لبيت عمتي هناك هيه راح تكون بامان ومحد راح يخطر علئ باله وحته اذا فتحت خطي مراح يكدرون يتعقبونه.
جون : بس شلوون المسافه حيل بعيده
آرون : ماعدنه شيء سوق ونوصل بأي وقت
جون : نعلئ علئ شرفك آرون هاي غير سالفه.
آرون : اذا تريد انزلك واني اسوق لاتجي ويانه.
جون : لا يابه شنوو انزل اوصلكم ورجع.
آرون : لأ والله انزلك واني اكمل سياقه شتسوي جاي وتعبان وبعدين ترجع وانتَ عندك دوام وملتزم.
جون : والله مادري بكيفك بعد انتَ اذا محتاجني اني وياك بكل خطوه تخطيها
آرون : سالم حبيبي.
بقيت ساكته وخايفه كلش راح ياخذوني الاربيل حيل ابتعد عن بيتي واهلي خايفه بابا يتعاند وياهم وميخلوني ارجع.
بس اني اعرف شلون اخلص نفسي اذا ماخلوني ارجع اشتكي عليهم وادخلهم سجن ثنيهم لأن عرفت هويتهم الحقيقه.
خليت راسي علئ الجام ونمت حيل تعبانه وراسي احسه مسطور سطر.
مادري شكد نمت كعدت لگيت السياره واكفه ومحد بالسياره بس اني نايمه
كمت واني خايفه اباوع حواليه واكفين قرب مطعم
لزمت الباب اريد انزل مقفوله السياره عليه تاففت بضوجه وبقيت كاعده اباوع للساعه الي بالسياره بـ 4 الفجر بعدها الدنيا ليل مطالعه الشمس
احنه طلعنه من الناصريه تقريباً بـ 10 بليل يعني صارلنه 5 ساعات نمشي.
شويه وطلع آرون من المطعم وهوه شايل بيده علاكه اجه فتح السياره ودخل شغلها وكال
آرون : صح النوم
_وين هسه احنه؟
آرون : باطراف بغداد
_هاا
آرون : راح اخذج لبيت عمتي باربيل واخليج تتعرفين علئ اختي
_بس احنه متفقنه هيج بابا راح يتنازل بعد يومين ليش ماخذني لهناك شيرجعنه بعد
آرون ; ابوج مايحجي كلام حقيقي جاي يلعب علينه يكول يومين وهوه ممسوي شيء اصلاً راح اخذج هناك منا لحد ميتنازل ويطلع ابوي يلا اكدر ارجعج اله.
_واذا ماطلعه شنوو تخليني محبوسه عدكم ترا اني مليت ماتحمل هل وضعيه
آرون : ماخليج هواي لازم ابوج يفكر بحل مناسب واني راح اهدده انو اذا ماتنازل هل يومين راح أذيج
_شنووو
آرون : ماسويلج شيء لاتخافين مجرد كلام
_افففففف ياربي
آرون : هاج هذا اكل اذا جوعانه اكلي
_ماريد كلشي ماريد
آرون : شبيج ضايجه
_تسألني شبيه ضايجه؟ ليش عاجبك وضعي هسه بابا مشلوع گلبه ويدور عليه واني راضيه بالي تسوي واكفه وياك واني اصلاً ممتاكده اذا جنت تحجيلي الحقيقه او تجذب عليه
آرون : راح اخذج وتشوفين الحقيقه بعينج
سكتت مجاوبته درت وجهي علئ الجام رجع يسوق مشينه هووواي وطلعت الشمس واحنه نمشي
وصلنه سيطره انطاهم آرون هويته واوراق بالسياره بقو يتناقشون وياه بعدين خلونه نعبر.
مشينه هوواي وبعد سياقه كلش طويله وملل وضوجه انام وكعد والكاه يسوق ورجع انام وكعد وبعدنه نمشي
اخر شيء دخلنه شوارع اربيل المحافظه تجنن بشكل حلووه
جايه الاربيل مرتين قبل لاتموت امي مره اجينه سفره سياحيه والمره الثانيه اجينه نزور بيت خالت ماما.
وبعدها ماجيت لهل مكان ابد هل حجي جان عمري 16 سنه
_اكول
آرون : كولي
_اروح لبيت عمتك هل شكل وكف السياره علئ مول او محل ملابس اريد اغير ملابسي
آرون : عادي بويه شبيهن ملابسج طالعه حلوه بيهن.
_اني ماريدهن
آرون : ماشي هسه اوكف السياره بس هاا اشتري شيء رخيص ماشايل فلوس هواي وياي.
_لابسه محبس ذهب اخذه بعيه وانطيني الفلوس اريد ملابس هواي شنوو اروح بلبس واحد؟
آرون : انتِ صاحيه مخبله شبيج تبيعين ذهبج علمود ملابس اشتريلج شيء هسه امشي بيه ومن نوصل البسي من اختي او من أليڤ
_أليڤ منو؟
آرون : بنت عمتي وخطيبتي
انصدمت من گال خطيبتي يعني آرون خاطب احس تجمدت حته ماعرفت شنوو ارد عليه بلعت ريكي بتوتر ودنكت عيوني دمعن مثل الي جاي يحبس دموعه والخنكه بداخله.
آرون : بيج شي
هزيت راسي بـ لأ سكت هوه وكف السياره علئ محل ملابس نزل واني هم نزلت مخنوكه خنك والعبره بلعومي كوه صابره.
آرون : يلا اخذي الي يناسبج واني راح ابقه يم المحاسب تمام
هزيت راسي بأي دخلت للحمل رحت اباوع بالملابس وعقلي ابد مو يمي ليش ضجت من عرفت بيه خاطب شنوو جنت متأمله تكون بينه علاقه اصلاً شلون انعجب بهيج انسان خطفني وبعدني عن اهلي.
اخذت بلوز ابيض ابو الركبه فوكه شاكيت كابوي وجينز عريض نفس قماش الجاكيت وبيه شريط اسود نازل.
اخذتهن ودخلت لغرفة القياسات لبستهن اباوع علئ نفسي بالمرايه حيييل متغيره اسبوع صارلي مشايفه شكلي بالمرايه شفتي يابسه وجهي صاير اصفر وباهت وشعري تعبان
لفيت شعري سويته كعكه خليت شويه نازل من اطرافه
بقيت صافنه بشكلي بالمرايه شنوو الناقصني ليش احب انسان موو الي والاحلا من هذا خاطب !
مستحيل اسمح لمشاعري تسيطر عليه مراح ابين نفسي ضايجه ولا راح اهتم ابد هوه عايش حياته قبل لايعرفني.
طلعت من الغرفه ورحت علئ آرون جان واكف يم ابو المحل الي يحاسب دفع الفلوس صارو الملابس بـ 40 الف
طلعنه من المحل رجعنه للسياره دخل وساق بسرعه
آرون : مشتهيه شيء اجيبلج
_لا شكراً
هز راسه بأي بقيت اباوع من الجام علئ المكان هوه يسوق بصمت مرت نص ساعه تقريباً وصلنه لبيت عمته.
مكانهم كلش كلش حلوو منطقتهم كلهاا زرع ورد والبيت يجنن من برا.
آرون : يلا تعالي
هزيت راسي بأي نزل هوه كدامي واني وراه جانو اكو 2 بنات كاعدين بالحديقه الي هيه اعجز عن وصفها تجنن كلهاا ورد ومرجوحه بالحديقه وكراسي المكان يفتح النفس.
وحده كاعده علئ كرسي متحرك والثانيه كاعده علئ الارض ولازمه بيدها ورده وتسوالف وياها من شافونه كامت البنيه وهيه مصدومه
توترت باوعت الارون ابتسم وفتح اديه ثنينهم كامت هيه واجت نحونه تركض بكل سرعتها
راح عليها آرون حضنته بكل قوتها وهوه هم حضنها وشالها من الارض.
بقيت بس صافنه وارمش بعيوني اختنكت كلش وعيوني دمعت احس نفسي جاي ابالغ ليش اغار اصلاً مابينه شيء.
ضمها علئ صدره حيل ويفر بيها وهيه تضحك بصوت عالي نزلها علئ الارض لزم وجهه وباس راسها.
آرون : لوو تدرين شكدد مشتاق لهاي العيون.
أليڤ : جذاب لوو مشتاقلي متبقه كل هل وقت بعيد عني ولاتسال عني وتكول مرتي منتظرتني.
آرون : هههه شسوي بويه غير عندي شغل
أليڤ : اممم اي تحجج بالشغل تحجج
آرون : رهوفه شلونها
أليڤ : كلش زينه اصلاً هل فترا العلاج صاير ياخذ مفعوله
آرون : الحمدالله رايح اشوفها
أليڤ : دقيقه منوو هاي؟
باوعتلي بستغراب دار وجهه عليه آرون ابتسم بهدوء وكال
آرون ; تعالي اليان
بلعت ريكي بتواتر ورحت يمهم تباوعلي بنظرات استغراب.
_مرحبا
أليڤ : مراحب عيني منوو انتِ
_اني
آرون : زميلتي بالشغل وعدها هنا شغل وماتعرف أي بشر هنا فأ جبتها وياي للبيت تبقه يومين يمنه وتروح
استغربت ليش كال هيج يمكن محاجي الهم الحقيقه او يخاف علئ نفسه ينكشف
أليڤ : هاا اهلاً وسهلا بيج تفضلي
_شكراً
عافنه وراح آرون علئ اخته خطيه كاعده بكرسي متحرك وتباوعله وهيه عيونها مليانه دموع
راح عليها هوه حضنها من راسها وباسها كعد علئ ركبه وبقه لازم اديها ويسوالف عليها.
أليڤ ابد ماحبت وجودي مبينه من ملامح وجهه حيل تغيرت ونزعجت
هيه حييل حلووه معانيها تخبل عيونها خضر وشعرها طويل وجهه ناعم تكول وجه طفل.
مشيت وياها للبيت دخلنه سويه جانت اكو مره كاعده علئ القنفه وتباوع بجهازها
أليڤ : ماما اجانه ضيف
جيهان : اهلاً بيك امي تفضلي
ابتسمت بهدوء رحت سلمت عليها وكعدت يمها.
جيهان ; شنوو تشربين
_شكراً ماريد شيء
أليڤ : ماما أيسر رجع
جيهان : وينو
أليڤ : بعدو ويه رهف جالسين بالحديقه
جيهان : وينو خلي يجي
هزت راسها بأي عافتنه وطلعت باوعتلي بهدوء وكالت
جيهان : شنو اسمك
_اليان
جيهان : حبيبي امي يحفظك ربي
_فدوة لكلبج
دخل آرون للبيت وهوه يدفع بالعربانه مال اخته اجه علئ المره سلم عليها وكعد مقابيلنه.
جيهان : شعجب اجيت ومانطيتنه علم بجيتك.
آرون : صارت بسرعه مالحكت انطيكم خبر
جيهان : البنيه هاي منو
آرون : تشتغل وياي وعدها هنا شغل تريد تخلصه وماعدها عرف باربيل وطلبت مساعده مني جبها وياي
جيهان : اهلاً وسهلاً بيها البيت بيتها
_تسلمين خاله.
أليڤ : شنو تشربون
آرون : اني ماريد شيء اليان كلشي مماكله سوولها اكل اكيد جوعانه
أليڤ : الغده جاهز رتاحو بين مانصبه.
هز راسه بأي الها رفعتله حاجب واشرتله بعيونها مادري شتقصد هوه ابتسم وهز راسه عافتنه وراحت اخت آرون تباوعلي بصمت مبينه حييل هادئه.
رهف : اممم شلونج
_ الحمدالله انتِ شلونج
رهف : بخير ماتعرفت عليج دخلت بدون ماسلم اعذريني.
رهف : عادي حبيبتي اني هم نسيت اسلم عليج اسمي اليان
رهف : عاشت الاسامي اني رهف اخت أيسر
_عاشت الاسامي تشرفت معرفتج .
رهف : بعد كلبي تعالي لغرفتي غيري ملابسج ورتاحي شويه بين مايخلص الغده
_اي
كمت من مكاني واني حيل متوتره ممتعوده عليهم ولا اعرف أي شخص منهم غير آرون وهم غريب بس متعوده عليه
هيه ضغطت زر للعربانه وصارت تمشي من وحدها مشيت وياها لغرفتها.
رهف : هذاك الكنتور طلعيلج تراك وبدلي.
فتحت الكنتور جانو ملابسها معلكات اخذت تراك ودرت وجهي اباوعلها كاسره خاطري حيل حلوه وهادئه والله حرامات متكدر تمشي
رهف : شكد صارلكم تشتغلون سويه انتِ واخوي.
_احمم مو هواي
رهف : اخوي يحب يساعد الناس هواي ويهتم بالكل ماكو ابد بحنيه گلبه
_الله يحفظه الج
رهف : فدوة لكلبج انتِ منين يعني من يامحافظه
_من بغداد
رهف : ها اني هم جنت عايشه بغداد
_صدوك شكد صارلج تتعالجين هنا
رهف : حاجيليج أيسر عني؟
_اي حجالي
رهف : صارلي تقريباً سنه واني هنا التعالج كاعده عد بيت عمتي للصراحه همه حيل يحبوني ويهتمون بيه ابد مخلوني احس بنقص.
_زين انتِ جاي تاخذين علاجات هسه لوو تسوين تمارين حته ترجعين تمشين
رهف : ثنينهم سويه اخذ علاجات وجلسات اروح لدكتور.
_امم اكو دكتور صديقي بس مو هنا بغير بلد معروف ومعالج لهيج حالات مثلج يعني هوايه يراجعونه ويرجعون يمشون.
رهف : ياريت بس تدرين حالتنه الماديه موو مال سفر وبلدان يادوب ندبر فلوس الجلسات والعلاجات وأيسر سوده عليه راتبه قليل واني ماحب اتعبه اكثر البيه مكفيه.
_الله كريم من ترجعين لبغداد اني اخذج علئ حسابي شتكولين؟
رهف : لا حبيبتي تسلمين
_لٱ والله احجي من صدك اني اساعدج سفرتج علئ حسابي والدكتور صديقي اخلي يسويلج جلسات بلاش ومياخذ منكم ربع.
رهف : والله مادري احجي ويه أيسر
_تمام اني احجي وياه واخذ رأيه اذا قبل حته نحددلج موعد عنده ونسفرج.
رهف : بعد كلبي تسلمين ربي يحفظج الاهلج.
_يروحي انتِ ويحفظج.
رهف : يلا اني راح اطلع بدلي ملابسج وتعالي.
هزيت راسي بأي عافتني وطلعت رحت سديت الباب حييل رتاحيت الها احسها حيل حبابه وهادئه بيها هواي صفات من اخوها آرون
نزعت الجاكيت والبلوز باقيه بس بالستيان هستوني اريد البس البدي مال التراك انفتح الباب عليه
آرون : رهف ..
........
راح ابوي وامي علئ بيت اليان يسألون عنهاا
بقيت اني اكل بالمطبخ شويه واجت يمي عفاف.
عفاف : ليش ماخلاج تروحين مسلم
_مادري
عفاف : ضاهر مسلم ميحب تيمور ابد لوو تشوفين وجهه من عرف بيج انتِ ويه تيمور بالحادث.
_صدوك انتم منوو گالكم عني
عفاف ; غير اهل اليان خابرو عمي واحد من اخوانه اعتقد.
_هاا
عفاف : اي والله انتِ احجي الصراحه شجنتي تسوين وياه بالسياره
_ترا كتلج راد يوصلني
عفاف : شمدريني صدك ام هثيم ليوم البارحه اجت علينه وكتلها انتِ بالمستشفى وجانت تريد تجي عليج بس كتلها راح يخرجونها وبقت يمكن ليوم يجون علينه
_اففف ابد موو وكتهم ترا
عفاف : ليش موو وكتهم موزين خايفين عليج خلي يخطبونج حته يصير الموضوع رسمي.
_مستحيل اسوي خطبه واليان مموجوده حته لوو وافق بابا انيي مراح اوافق منا لحد ماتجي ونحدد موعد
عفاف : والله مادري بكيفج انتِ بعد
سكتت عنهاا مالي خلك أسوي اي شيء هل فترا منا تيمور ومنا اليان والحادث احس عقلي راح يطير مِڼـّي كلشي مخربط عندي
عفتها وصعدت لغرفتي تمددت علئ فراشي واني دايخه وتعبانه واحس تفكير راح يخبلني
احس تيمور موو طبيعي ابد وتصرفاته مال واحد مجنون ومتكبر عباله ڪلشي يعجبه يكدر يحصل عليه بس باحلامك توصل الي مستحيل اخليك تستغلني.
نمت واني حبسه تاخذني وحسبه ترجعني كعدت تقريباً بليل الاذان يأذن
ڪمت غسلت وجهي وتوضيت وكعدت اصلي اندك باب غرفتي دخلت عفاف
عفاف : تقبل الله
_منا ومنكم صالح الاعمال.
عفاف : تيمور جوه جايب جهازج وياه يريد ينطي الج
_شنوو ليش مانطاه الامي اليوم من راحت عليهم وتعاي شافه مسلم؟
عفاف : شبيج انفعلتي الولد يريد يسلمه الج بعدين اليوم امج كاعده بالصاله وهوه بالاستقبال وين ينطي الها يلا تعالي ومسلم طلع عنده شغل يريد يخلصه.
هزيت راسي بأي واني متوتره عافتني وطلعت خلصت صلاتي لميت السجاده وباوعت علئ نفسي بالمرايه عيوني مبين بيهن الخوف والرعب
سحبت نفس بقوه ونزلت جوه جان هوه كاعد بالاستقبال ويه بابا
_وينه
عفاف : بالاستقبال كاعد ويه عموو.
هزيت راسي بأي رحت عليهم واني حيل خايفه ومتوتره احس مسويتلي مصيبه وبأي ساعه تنكشف دكيت الباب ودخلت.
_سلام عليكم
تيمور : وعليكم السلام
حازم : جهازج باقي يمه ليوم مرجعين السياره من الصناعه ولاڪي وجايبه وجاي.
_هاا شكراً
تيمور : ماكو داعي للشكر احنه عائله وهذا امانه يمي ڪتلهم مارتاح اله اسلمه الها بيدي .
باوعتله ممقتنعه بكلامه ابتسم ابتسامه خبيثه انطاني الجهاز اخذته من ايده وطلعت من الاستقبال بسرعه
بقيت اباوع بالجهاز مفتوح ماباقي بيه رمز ياربي دخيلك هذا شلون فتح الباسورد مال جهازي
ڪعدت بالصاله واني اتفقد الصور والرسائل شمسوي اكيد مسوي مصيبه لازم باله شيء هذا جاي يلعب عليه لعبه وصخه كلش وبس الله اليستر منهاا.
جميله : ها يمه رجعالج جهازج
_أي
جميله : الله ينطي العافيه خفت يطيح بيد واحد ابن حرام بيه صورج وصور كرايبنه بالاعراس.
_ايي صح
بقيت ساكته لوو تعرف امي بتيمور شيسوي،جان عذرت اولاد الحرام ماتدري بيه واحد نسونجي ومسربت
شويه وراح تيمور وبنفس،الحظه اجه اخوي للبيت تلاكو بالباب سلم عليه وراح
دخل مسلم للصاله وهو ضايج مايحب تيمور ابد ويعرف سوالفه مكسره ينغث كل مايشوفه.
مسلم : شعنده جاي علينه تيمور؟
حازم : علمود جهاز اختك باقي يمه وجابه الهاا.
مسلم : لا والله وانتم عادي عدكم هل شيء موو مكيفين رجع الجهاز الهاا
حازم : شبيك بابا رجال لاكي بسيارته واجه يرجعه شڪو بيها.
مسلم : ماعرف ينطي الامي ليوم من راحت عليهم الك انتَ لوو ألا لست اريانا يسلمه.
حازم : السياره العصر راجعه من الصانعه ولاگي بطنها وجايبه وجاي.
مسلم ; استغفرالله ياربي هذا ورا شيء اكص ايدي اذا ماطلع راسم شيء باله هل انسان اخبث خلق الله تعلموني بيه
حازم ; انتَ ڪلشي تفسره علئ ڪيفك شمسويلك الولد
مسلم : اذڪركم بكلامي اذا ماتندمتو وگلتو ياريت لوو سامعين منك.
حازم : هسه عوفنه من هذا الموضوع خلصت شغلك الرحت عليه
مسلم : أي خلصته
حازم : اكعد خلينه نتعشه ونروح اكوو اجتماع بين شركاء العمل ولازم نتعرف عليهم.
هز راسه بأي وكعد عفتهم واني وصعدت لغرفتي متوتره وحيل خايفه مسلم يعرف تيمور موو راحه ويحوس
خايفه اذا عرف بتيمور تقرب مني شيسوي يموتني اڪثرر من مره ڪلي ابتعدي عنه.
ڪاعده ولازمه جهاز بأيدي وافڪر اجتني رساله علئ الواتساب.
فتحت الجهاز جان رقم غريب وجايني عليه فيديو دخلت علئ الفديو فتحت عيوني بصدمه ..
