رواية عشقتة حتي اذلني الفصل الحادي عشر بقلم نوران
مودة
مرت ايام غدير خسرت طفلها وتدمرت نفسيتها وحالتها الصحية تدهورت كانت حامل خمس اشهر واللطفل مات ببطنها وسوولها عملية ومنعوها من الهلفه ٣ سنوات قهرتنا كلنا وما عرفنا شلون وكعت كان الدرج كل شي ما عليه وهي تكول كان عليه دهن ومحد صدكها بس اني جعفر يحبها وهذا الشي الزين بالموضوع ما تركها وساعدها تتخطه ازمتها والكأبه اللي صابتها كرهت كل شي وكرهت اللي حواليه عرفت اختي راح تتأذه اكثر اذا اعوفها وكانت احد اسباب سكوتي وعدم اعتراضي عالزواج
انخطبت لخضير وزوجته صممت عالطلاق وراحت عند اهلها وخضير ما قبل يطلقها حددوا العرس رغم اعتراضي وعدم قبولي بس رضيت وقبلت من شفت ابويه مصمم اتزوجه غصب عني ابويه اللي عمره ما ايده على وحدة منا ضربني وضرب سارة لان واجهنا باللي كاعد نشوفه منه وتغييره المفاجئ لا هذا ابونا ولا نعرف هاي الناس
خضير ما حجيت وياه ولا طخ لساني بلسانه زعلت منه واصلا اسلوبه وتوقيته وحبه الي كل شي سواه غلط كرهته لان جبرني مثل ما كان يهدد وين كلامه عن الحب ووين اللي وعدني بي من حب وامل شككني بنفسي وبكل شي حواليه وكرهني بالزواج اني مو مفقس ماخذني خلفه وبس وحتى لو تزوجت يحلم اخلف اله طفل وهو بهاي عقليته ما اريد اطفال لرجل متخلف باجر عكبه يجبرهم مثل ما جبرني
زفوني لخضير وريم لاحمد بنفس اليوم اهلي بهاي الفتره كعدوا ببيت اجار على كد اجازتهم وحتى احمد وريم ياخذون راحتهم وسووا عرس الناس تسولف بي دخلت للغرفه وخضير فرحان ويضحك والله لو بيدي اضربه بشي وابتلي بدمه شكد كارهته سد الباب وتقرب مني جسمي كله يرجف عصبيه على خوف
-نورتي بيتي وحضني يالحبيبه ولو اني عندي عتب وياج كل هاي الفترة وانت كاطعه عني حتى عيونج الحلوات اللي اخذن القلب والعقل حرمتيني شوفتهن
سكتت ما ارد بس خزرتي ووكفتي بعيد عنه يمكن كافيه
تقرب الي يحضني دفعته وابتعدت اكثر
-شبيج يا عافيتي شنو اللي صار الج ما تريديني
-وانت ما تعرف يعني مجبورة خضير مجبورة وقبلت بيك لا تطلب مني اصيرلك مره وانت كرهتني بنفسي واصلا حتى زواجنا باطل والهلاهل حرام وعرسك كله ما يجوز
-مودددة!!!!
-لا تصيح ولا تعلي حسك علي اني مو علياء وعبالك ضعيفه تستقوي عليها لان بنت عمك وما خلفت الك وتزوجت غيرها وتريدها تسكت ولا اني عبده اشتريتني بفلوسك وتجبرني عليك قبلت ادخل وياك غرفه بس قسما بالله الا اخليها جحيم الك واخليك تتمنى لو لاعبها ويه غيري هاي لعبتك
-مودة تخبلتي اي لعبه واي كلام هذا الي كاعد تكولينه مو اني اللي اتهدد هاي وحدة والثانيه اعرفي لو ما انت عزيزة بقلبي والله افرك حلكج هسه واخليج تندمين عاللي كلتيه هسه اني منتظرج تبدلين وتجيني فاهمه وتعقلين وتصيرين زوجة الي اني ما العب ولا امثل احبج لان فعلا اني احبج وحصلتج بزودي فاهمه غصبتج لان ما نطيتي مجال للتفاهم انت وبقيتي بعنادج كل ما افتح موضوع الزواج وياج تسدينها بوجهي ما خليتي كدامي غير عمي وكلت الج عمي راح ينطيني ما صدكتي
-خضير اطلع من غرفتي
ضحك وصفك ايديه قوي بنفاذ صبر كان بعده لابس عباته وعكاله ذبهم عالسرير واتقرب الي حاول ياخذني بحضنه قاومته ما كدرت هالمره وقرب شفافه لشفافي واخذ بوسه غصب شافني ضليت اتلاوه وياه اريد اخلص نفسي تركني وراح كعد بعيد دنك وحط ايديه على راسه شويه وباوعلي بنضرة غضب وتهديد
-شوفي ولج ما تريديني يطبج طوب هاي حياتج ويايه واني اصبر وانتاصبري ونشوف منو صبره اطول والله عمرج كله تبقين معلكه لا انت لسما ولا للكاع افتهمتي الظاهر اني غلطت ونزلت نفسي هواي احبج اي بس فوك كل هذا اني شيخ والشيخ ما ينزل راسه وما يتوسل فاهمه روحي واخذي راحتج اني راجع لغرفتي القديمة وانت ابقي هنا واي قصور تجاه اي احد بالبيت والله اكسرج افتهمتي شكد قوية لخاطر ربج واكول تحبيني طلعتي اقسى من الحجر لا والله الحجر يزعل لو قارنا بيج بس اني الج
-ما يهمني تهديدك مغصوبة عليك اني وانتظر فرج من ربي
-اي عفيه بحبيبتي وبنت عمي ادعي عليه بالموت كون اموت واخلص لان بس هذا فرج ربج الج فاهمتني لو تقبلين لو تقبلين ما عندي وما اعرف شي اسمه ما اريدك خليج هنا واني جوه واني هم انتظر لو فرج ربي الي لو فرج ربج واخلص
طلع وسد الباب قوي من قوته الباب انكسرت صارت ما تنطبك كعدت كل حيلي يرجف ما همني كلامه ولا تهديده حتى لو يريد يغصبني فما يحصل مني غير جسم اما الروح فابتعدت عني وصرت شكد ما اني بارده وجامده من يوصفوني الكل صارت الحاله اضعاف
ثاني يوم نزلت الوجوه كلها مكلوبه جدتي وعمتي ام خضير زعلانات وعمتي سهيلة شمتانه وتتمضحك ما همني كعدت يم غدير بالمطبخ اللي توها بدت تتعافى من الحاله اللي مرت بيها شويه دخلت امي جايبه صبحيتنا وبدت تسولف شلون احمد وريم لساهم ما طالعين وامي تدك بابهم واحمد يصرفها ضحكوا عليه واني دعيتلهم بالسعادة اثنينهم يستاهلون الخير احمد خوش ولد وريم ماكو احسن منها بعدها انتبهت خضير طالع وسألتني عنه وضلت تحجي من سولفولها شلون خضير طالع من الصبح مهموم وعصبي والغريب امي صفت وياهم ترريدني احبه وحطوني بدرس طويل ساعه يمكن وكل كلامهن وهذا ابن عمج وما الج غيره وما عنده اطفال وما بيها شي يتزوج ثانيه عبالهم اعتراضي على زواجه هو لو متزوج غيري اكول حقه بس مو حقه يدري بيه ما اريد اكون اني سبب الخراب اللي يتزوجها وجبرني عليه واستمر هالكلام اللي ما يفرق عندي كلهم بنفس السالفه وضلوا يحجون
صار وقت الغدا ودخل خضير يسلم ويحجي ويه الكل واني ما يباوع بوجهي بعد احسن كام يروح لغرفته صاح عليه ردت ما اروح وغدير تدفع بيه تكلي روحي رحت اله دخلت للغرفه اللي نفسها غرفة علياء دكيت الباب ودخلت لكيته كاعد على سريرهم والله استحي ادخل غرفتها احس روحي غدرتها واخذت زوجها
-نعم
-ينعم الله عليج شوفي انت زوجتي كدام اهلي ادخل تفزين من مكانج تستقبليني فاهمه لو افهمج يعني ما استحيتي اختج تتلكاني وتسلم وانت مغلسه وكاعده بعيد
-وانت عرفت تسلم حتى استقبلك
-ولو مسلم عود جان انصلح حالج وعالعموم انت المفروض تعرفين الاصول لو ما شايفه امج مسويتها وتبادر بالسلام
-اي عالمره الجايه اسلم عليك-شوفي مودة اسلوب البرود والردود المستفزة لا تستخدميه ابد وياي تره تندمين فتهمتي
-حاضر اكو شي ثاني
-لا ماكو يلا اخذي ملابسي حضريها لباجر عندي التزامات
طلعت من غرفته واخذت نفسي لان كنت حابسته كوه ما انكر صعب نحب شخص لفترة وبعدين نلاكي نفسنا بغير مشاعر
مرت ايام والحياة مشت شلون ما جان وبيوم كنا بالبيت واهلي عدنا همه واحمد وريم وتاركين سارة بالبيت وحدها لان هي ما تحب تجي يوميه وما نعرف السبب وامي تحجي عليها بين ما كاعدين اجتي عمتي سهيلة همست باذن بابا شفت وجهها مخطوف وكام لحيله وطلع واخذ وياه احمد ردنا نفتهم اللي صار ما قبلت تسولف بس عرفنا وراها شي هالحيه لان كل شويه تندار لامي تكلها شيجي منج غير الشر
شويه ودخل بابا وبيده ساره مدمايه وجهها وايديها وشعرها كله مكطع واحمد يصيح بره والله الا اذبحها كمنا كلنا نعيط ونلطم وهمه مستمرين بضربها لحد ما وكعت بأيدهم اني شمرت نفسي عليها خفت لا تموت وخضير بعدهم بالكوه والدي الحنين اللي جان خيمتنا وسترنا صار يضرب بينا وبدون وعي وحتى امي ويانا غدير جعفر لازمها بعيد وتعيط تريد تذب روحها بس هو يخاف عليها لان عمليتها جديدة واني خضير وكفلي ما يقبل تجيني ضربه بس المسكينه اختنا ما احد كدر يخلصها الا دخل عمي ابو نذير ووكف بينهم وشالها كله اني اخليه يستر عليها بنت عمه وما بيها شي اذا حبها والسالفه ما طلعت بيناتنا اللي عرفناه بعدين ابويه واحمد من طالعين من يمنا لاكين نذير بالبيت وساره يمه احمد متضارب وياه وصايرين كوم وكايل الهم اصلا هي اتصلت وكالت اهلي مو هنا وفتحت الباب اخذوا كلام نذير انه هو وياها علاقه وحب وسوالف من هاي انجرت وانفضحت وانضربت بيومها عمي ابو نذير حتى يسد السالفه هو وابويه اقترح يزوجوهم وابويه ضل يلطم ويبجي يكله على تالي عمري بنتي تفضحني المشكلة سارة جانت مغمى عليها وابد ما حاول احد يكعدها لو يحركها انعصر قلبي عليها مهما يكون هاي اختي وحتى لو غلطت وحبت ابن عمنا وياما اني حذرتها من تهورها ما توصل لهاي الدرجة تموت رحمتهم
من اخذناها وكعدت ضلت تعيط وتلطم تكول هو كال انتظر اهلج يرجعون ومن دخل بابا اتهمني اني متواعده وياه وتحلف ما متواعده اخر شي سكتت من امي كلتلها ابويه نطاها لنذير والسكته سكته لا بجي ولا حجي ولا اكل ٣ ايام وهي بهذا حالها وباليوم الرابع كعدت الفجر اتفقدها خلوها عدنا لان ابويه اتبرى منها ما يريدها اجيت اشوفها لكيت شعرها الحرير الحلو كله بالكاع طايح وهي ماكو بيومها على عيطتي البيت كله التم وبدوا يركضون ويدورون عليها وبهاي خبصتنا اجوا اهلي يركضون وعمامي اتصل واحد كال الحكوا ساره ذبت نفسها بالمشروع الاروائي القريب من البستان اللي زلم اخذها الماي مالته وما كدروا يطلعون وكلنا طلعنا بوجهنا ركضه وحده نسوان وزلم لهناك
