رواية سيرة القدر الفصل الحادي عشر بقلم فجر المساري
رحت باركتلهم ع الخطوبة وخلصت الامتحانات
ع خير والحمد لله …
وكالوا اسبوعين وتطلع النتائج ورجعت للبيت
ثاني يوم الصبح كعدت حضرت ريوك تريكنه وبعدهه سويت حملة تنظيف على البيت من لسطح
لشارع يومية اطلع قهري بتنظيف غرفة ومااخلي
شي بيها ماانظفه واغسله ومرت الايام وبعد اسبوعين خابروني البنات وكالوا باجر تطلع النتائج
وراح يجي ابو الخـط يـاخذنه للمعهد كلش فرحت
كعدت من الصبح غسلت وبدلت ونزلت انتظر البنات
شافتني خالتي تعالي سراب اتريكي الساعة 7 بعد
وكت لا خاله مااريد كعدت يمها بالمطبخ انتظر الخط
فد نص ساعة واجـه ابو الخط البنات رمشولي
بوست خالتي وهي تدعيلي بالنجاح واخذت جنطتي
وطلعت السلام عليكم… الكل وعليكم السلام
وصلنه للمعهد خفت رغم اني اعرف بنفسي مجاوبه
واستلمت النتيجه والحمد لله طلعت ناجحة بتفوق
ورجعت للبيت فرحانه ودانزل من الخط شفت
بيت جيرانه ام محمد هوسه ومخبوصين…
ودينزلون كراسي من السيارة وهالسوالف ديحضرون
لزواج محمد شفته هو وخطيبتة نزلوا من السيارة
وسلموا عليه… واني هم رديت السلام…
اجه محمد باتجاهي وكف ومد ايده بجيب الستره
مالته وطلع كارت من جيب السترة وكلي معزومين
على العرس بالقاعة كتلة… الــف مـبـرووووك
وربي يسعدكم… حاولت مابين شي واني قويه ..
مو ضعيفه ..
محمد ..الله يبارك بيج…
شاف محمد ورقه بايدي…
محمد… سراب شطالعه… ابتسمت ..ناجحة…
شفته هو فرح وخطيبته…
باركولي على نجاحي هم راحوا… واني
فتت للبيت واني مامهتمه او جنت اتظاهر بهالشي
ودعيت الله يسعدهم…
خالتي تلكتني ها بشري شطلعتي … كتلها نجحت حضنتني…
وبوستني وفرحت… صعدت لغرفتي .واني افكر
وكلت ميصير هيج حرام اضل اطلع دائما بحياتهم
خطية لازم ينساني واني انساه هم… بهالاثناء دك
تلفوني طلعته من الجنطة فتحته شفت وصلني
مسج من محمد… كاتبلي جنت اتمنى اليوم اني
وياج هسه دنحضر لزواجنا وجان اني هسه اسعد
انسان بالدنيا بس اني سبب بدمار حياتي بيدي
لا تنسين حتبقين مزروعة بقلبي…
أ… ح… ب… ج يـا نـبـضـي… .اوووويلي
اني من قريتها طكيتها بجيه ونعلت الساعة الي
اجيت بيها على هذا البيت وعلى اليوم الي صعدت
بسيارتة وتعرفت عليه… يـاربي… ياللهي ..ازرع
بقلبه كـره وحقد الي وياربي ازرع بقلبه حبه لخطيبتة… غيرت ملابسي وصار اذان الظهر وصليت
وضليت كاعده ع سجاده واندعي ربي ..
وابجي انساه ويبتعد عني…
الى ان سمعت خالتي تصيح عليه سراب سراب
كملت ونزعت ثوب الصلاه ومسحت عيوني ونزلت
خالتي يالله نكعد نتغده اجه عمج ..
كعدت واكلت شلون مجان…بعدهه كعدنه اني وخالتي وعمي قاسم طلع للحديقه يزكيها وكتلها خاله خلي نسافر
اسبوع لشمال ونغيير جو… والله مخنوكة
وتعرفين بقصتي ويه محمد وهو بهل يومين زواجه
يحضر وحتى اليوم انطاني كارت دعوة لزواجه
بالقاعة… من اجيت من المعهد شفته وانطاه الي
ومااريد شي يربطني بيه او اخلي يتذكرني ..
والله لو عندي غير مكان اروح اله جان هجيت
وخلصت من هالحياة خالتي…
كالت لزوجها وافقوا نروح سفرة لشمال وراح عمي
قاسم العصر حجز لسفرتنه بالشركة بالمنصور
وكال نطلع من الفجر الحجز مالتنه…
وبلليل حضرت ملابسي بالجنطة ،… ونمت
وثاني يوم… طلعنا من الـفجر لشمال ورحنه لاربيل
وصلنه للفندق ارتاحينه وبعدهه طلعنه برا اتغدينه
وافترينا بالمولات والمطاعم وتعشينه ورجعنه للفندق
الفندق حجزسويت غرفه الي وغرفه لخالتي وزوجها
وجبير وحلووو عبالك شقه حته ثلاجه زغيره بي
ونمنه من التعب اني محسيت لصبح وطلعنه اتريكنه
برا ورحنه لمصايف وافترينا وكلش اتونسنا
بالسفرة وحسيت نفسيتي اتحسنت ورجعنا بعدهه
لحياتنه ولبيتنا وجنا مشتاقيين للبيت عبالك صار
اسنين عايفي وجان بي ترااب صعدت بدلت ملابسي
لبست تراك ونزلت وبديت حملة تنظف البيت هههه
وعمووو قاسم يشتغل بالحديقة كلش يحبها يلم الاوراق من الكاع كلش يعتني بيها 24 ساعة
يشتغل بيها واني خالتي كملنا تنظيف،البيت
وسوينه غده وتغدينه وللعصر اتفقنه نطلع اني
وخالتي نروح لسوق واشترينه هدية لزواج محمد
فرشه لــون بصـلي وبيها شغل ذهـبي كلش حلوووه
وراقيه واخذت وياهه لوحة كلش عجبتني وغلفتها
كملنا ورجعنه للبيت… وصعدت لغرفتي ارتاح
للمغرب نزلت حضرت عـشـا ..
ومر اليوم عادي .. وثاني يوم العصر كالت خالتي
نروح عليهم صعدت غيرت ملابسي ولبست فستان
ماروني وشال ماروني وخليت مكياج خفيف
ورحنه عليهم وصلنه لبيتهم ودكينه الجرس عليهم
وجان يطللعنا محمد صفن وبعدهه سلم علينه
ويباوعلي وكال اتفضلوا فتنه للبيت اني وخالتي واني مدنكة وهو فات جوه…
صاح لامه قبلنه فتنا وكعدنه بالهـول اني وخالتي
وامه اجتي زوجته اسمها هديـل سلمت علينه
مبينه حبابه وحلووه وناعمه قصيرة وبيضة
وعيونها بني…
وجان مبين عليهم كلش فرحانين بحيث كعدوا هو
وياهه ويانه وواحد بصف الثاني وضحك وسوالف وانطيتهم الهدية
وباركتلهم شفت محمد خزرنـي…
كلت هذا شبي .. مهتميت اله… وزوجته وامه كلش
عجبتهم الهدية وتشكروا مني ومن خالتي…
محمد… اني زعلان عليكم ..
ليش ماجيتوا لحفلة العرس بالقاعة عزمتكم
خالتي كالتلهم والله طلعنه سياحة لشمال،نغيير جوو
محمد… هااا سفره سعيده هو يحجي ويباوعلي
وسوالف وبعدهه سلمنا عليهم وكمنه نريد نطلع
جلبوا بينه ع العشا ..
ام محمد مطلعون ابقوا اتعشوا ويانه .. خالتي لا والله مااكدر قاسم وحده بالبيت خطيه…
محمد اني اصيحه يتعشه ويانه ..
خالتي لا خلوها غير مره ..
محمد براحتكم وطلعنا جنت خايفه لا خالتي تقبل
لان مااتحمل ابقه وكدامي محمد وكلسع يخزرني
وطلعنه ورجعنه للبيت ...
واني صرت نار من تصرفاته شنو هيج يخزرني
واني صايره اعصاب واحجي وخالتي تهدي بيه
وتكلي لا تنقهرين يجي يوم ويرزقج رب العالمين
بالاحـسن مـنه ومشت الايام ونفس الروتين
كل يوم وبيوم من الايام واني كاعده ع السجاده
اصلي الفـجر سمعت عياط وصياح خالتي متت
خوف ونزلت جوه ركض بثوب الصلاه ودخلت
لغرفتهم شفت عمي قاسم نايم ميتحرك وخالتي
يمه وتـصيح… انصدمت وبقيت واكفه باب الغرفه
واني ماعرف شسوي… وطلعت ركض على بيت
محمد جيرانه بثوب الصلاه…
دكيت الباب وطلع محمد يفرك بشعره لبس
بس شورت وفانيله كيمونه ششكد استحيت منه
شافني… صــاح شكووو شبيج… كتله عمي قاسم
مدري شبي تعال الله يخليك تعال ..
واني ابجي فات بدل وطلع لبس تراك جوزي
واجه وياه اخو…ونسوان وفتنا للبيت شافه وكال
البقية بحياتكم… 😔
هنا اني الدنيا صارت سوده بوجهي واباوع على
خالتي دك وتلطم وتصيح وين عفتني ورحت قاسم
وين رحت وخليتني وحدي واني رحت عليها
وحظنتها واني ابجي وهي تبجي واجوي الناس
شالوا عمي قاسم خابرت على بيت عمي
ابو ياسر وكتلهم عمي قاسم اتوفه وخلال نص ساعة انترس البيت
عالم اشكال ناس جيران ومعارف واقارب وخالتي
تخبلت وصار تشييع عمي قاسم وسووا فاتحة
متت تعب وخطية خوات محمد ساعدوني بالمطبخ
وتنظيف البيت… وخالتي… .
بعدهه مصدومه الله يساعدهه واجوي بيت عمي
ابو ياسر بس جنت محجي وياهم وبقوا يروحون
ويجون علينه ومره جنت كاعده يم خالتي واجتي
ام ياسر شايلة بيدهه تلفون وكالت هذا ياسر
يريد يحجي وياج لخالتي حتى يعزيها وكعد يتعذر
ويسلم ع خالتي كملت خالتي وسدته وخلته يمها
وباوعت عليه وحظنتني وكالتلي راح نبقى اني
وياج طوول الـعمر سـواه…
خايفة عليج لا ااامووت وين تروحين انتي…
وام ياسر شفتها واكفه باب تباوع علينه وساكته…
وراها مرت الايام وخلصت الفاتحة وناس كامت تكف
وقليل يجوون علينه بس جيرانه بيت ام محمد
خطية ابد متركونه ولا تقطعوا بيتنا وصـارت عندي
علاقة بـزوجة محمد خوش بنيه وحبابه ..
وكامت تحجيلي ع تصرفات محمد وانو هي حامل
شهرين وتعبانه ومحمد يضل عصـبي عليها
ويـصيح وحتى مرات توصل بينهم للـضرب
واني انـصدمت ..ياربي نعاد عليه نفس شريط
حياتي ويه ياسر … .
خطية ليش هيج وكتلها الله يصبرج…
