رواية من الذي احبه الفصل الثاني عشر 12 بقلم لولو وائل

= انا بحبك يا روح

نظرت له بصدمه=انت بتتكلم بجد

=هى دى حاجه فيها هزار

= يمكن بتعمل مقلب فيا طب اميرة قالتلك حاجه

= فى اى ياروح مالك هو الكلمه تأثيرها قوى اوى كده

= طب فى الحالة دى اقول اى

= انتى بتسألينى انا

= اومال هسأل مين

= روح حبيبتى الله يهديكى ركزى معايا لما طرف بيقول للطرف التانى بحبك الطرف التانى بيقولو اى

= الله يخليك مثلا او الله يكرمك أو الله يسهلك

=هو انا بشحت منك يابنتى والله هجبلك اميرة ترد وتقولك بيقولو اى

= لا اميرة لا انا عارفه هترد تقولى اى

= روح انتى بتحبينى ولا لا

= لازم ارد

مراد بغيظ= لا مش لازم انا ماشى

أوقفته روح قبل أن يذهب = خلاص خلاص وانا كمان بحبك

= قولى تانى بالله

= لا اقول اى احمد ربنا أنى قولتها انا مش عارفه انا قولتها ازاى

= الحمدلله يارب انا راضى والله

=طيب بعد كده بيحصل اى بقى

= مش عارف انا اول مره اشوف اعتراف بالمنظر ده بسببك انتى مش بتشوفى مسلسلات أو افلام

=ما الفكره حتى لو قولتلك اه انا مش بعرف اكون رومانسيه

= سلمىىىى سلمىىىى

= انت بتنده على سلمى ليه

واتت سلمى مسرعه على صوت مراد

= اى فى اى حصل حاجه

= خدى صحبتك من قدامى بدل ما اعمل فيها حاجه

= ايه هى عملت اى عملتى اى يا بنتى

=معملتش حاجه معرفش انا بس قولتله أنى مش بعرف اكون رومانسيه اعمل اى

=كنتى عايزه تعرفى يا روح انتى جبله ولا لا صح انتى سألتينى السؤال ده فى البيت

= اه والإجابة

= انتى حتى كلمة جبله قليله عليكى يابنتى مش حرام عليكى

= خلاص هحاول تانى

= هو تصوير مشهد يا حبيبتى

= روحى ياسلمى وانا هشوف اخرتها معاها

= ماشى بس متقتلهاش

= هحاول

= مالك يا مراد فى اى

= يا حبيبتى انا مبقتش فاهم مالك انا بس علشان قولتلك بحبك بقيتى هبله اى إلى حصل

= انا لما بيتقلى كلام حلو بتوتر غصب عنى

= انا خايف اقولك تتجوزينى والله

= لا لا أهدى براحه علياا انت قولت بحبك ولسه بحاول اتقبلها اى تتجوزينى دى بقى

= ولا كأنك سمعتى حاجه خالص

=بص على العموم انا موافقه لانى مش عايزه حد غيرك بصراحه حسيتك فى حنية بابا وخوفك علياا ووقفتك جمبى وانك مستحملنى حتى فى المشاكل كنت تقوينى ومسبتنيش لحظه بس دلوقتى انا متأكده أنى بحبك اوى فعلا ويمكن اكتر من اول مره حبيت فيها بس كل إلى عايزاه منك انك متعملش إلى عمله ادهم

= مش مصدق إلى بسمعه والله طب ماانتى حلوه اهو ومتخافيش انا مش هسيبك ابدا

= ماانت إلى مش بتصبر شوفت لما صبرت جمعت الكلمتين إلى فى دماغى وقولتهم اهو ومعلش على العبط إلى حصل بس أنا كده لما بتوتر بقول كلام عبيط

=مش مهم إلى حصل المهم انك معايا

=هنروح بقى ولا هنفضل هنا

=يلا نروح وهاجى اتقدمك فى أقرب وقت

=ربنا يقدم الى فيه الخير

فى فيلا مراد دخلت مرام وهى غاضبه وذهبت إلى غرفتها وأغلقت باب غرفتها بقوه تحت تعجب الجميع من تصرفاتها

ووجه فريد حديثه إلى خالته=هى مالها دى

= اتجننت باين عليها

= هى لسه بتحب مراد

= اه بس أنا غلطت غلطه كبيره أنى جبتها هنا

=ليه هو مراد رفضها

=اه قالى أنه بيحب بنت تانيه وانا مش هقف قصاد فرحته

=مراد بيحب اى إلى حصل فى الدنيا

دخل مراد فى هذه اللحظه واجاب على فريد

=عقبالك انت واخوك

اجاب فريد بضحك=لسه مجتش إلى تخطف قلبى

=يسلام على الرومانسى وانت يا يوسف زيه برضو

=انا لقيتها ومن زمان اوى

=ومين هى بقى

=احلف كده لو قولتلك مش هتعملى حاجه

=كنت ضربتك من زمان انت والجزمة إلى فوق

=الجزمة إلى فوق نزلت عايز منها اى

=يعنى انت عارف كل حاجه

=عارف بس مستنى اسمعها منك

=يسلام اوى اوى انا يا مراد بحب اختك وطالب إيدها للجواز

شهقت مى بصدمة =انت بتقول اى

=نسيبنا من المصدومة دى رأيك اى يا ماما

=انا طبعا مش هلاقى احسن منك يا يوسف لبنتى

=وانا عن نفسى مش هلاقى غطى للبلاعه إلى جمبى افضل منك

=انا غطى يا مراد

أجابت مى بضيق=يعنى انت مزعلك انك غطا وانى بلاعه دى عادى

=خلاص يا ستى ولا تزعلى نفسك انتى احلى بلاعة شافتها عينى

=بس بقى علشان بتكسف

نظر له مراد بنفور=بس بقى جاتكم القرف كنت عايز اقولكم حاجه تانيه

أجابت والدتة=قول يا حبيبى

=انا قررت انى اتجوز وهتقدم للبنت الى بحبها

صرخ الجميع فرحين بما قالة مراد وذهب إليه والدته واحتضنتة

=اخير هفرح بيك انت واختك

=طب لية العياط دلوقتى

ردت مى بمزاح=دى دموع الفرحه أنها هتخلص منا

واقترح يوسف شيئا=اى رأيك نتجوز انا وانت فى ليله واحده

=مش لما اتخرج الاول

=خليها قبل التخرج بقى وخلاص وكملى اخر سنه فى بيتنا عادى

=ماشى

=يبقى اتحلت

رد فريد=وانا عليا تجهيز الفرح

ردت مى=وانا هغنى

رد الجميع فى صوت واحد=لااااااااا

=ليه داحتى صوتى قمر

=مى حبيبتى صوتك قمر وانتى بتغنى فى الحمام مش فرحنا دى ليله فى العمر عايزها تبقى احلى ذكره ولا اسوء ذكره

=احلى ذكره طبعا

=يبقى مسمعش صوتك فى الفرح ماشى

=على فكرة انت بتكبت موهبتى

=موهبة تستحق الدفن يا قلبى

رجعت روح وسلمى إلى المنزل وذهبت اميرة مسرعه إلى روح وهى مبتسمة

=ايوه بقى هتبقى احلى عروسة

=عرفتى منين

توترت اميرة ولم تستطيع انت تجيب=هو يعنى

=مين إلى قالك

ردت سلمى =اختك دى قالتلى متقلقيش محدش هيعرف هى أول ما دخلتى فضيحه

= كنت فرحانة مقدرتش أخبى الفرحه طيب

=انا رايحه اغير بدل ما اقتل اختك واقتلك واقتل نفسى واخلص

ذهبت سلمى وأخذت اميرة روح وذهبت إلى الغرفه لتعرف ماذا حدث بالكامل وحكت لها روح كل شئ معادا ما فعلته مع مراد

=مم طب ما الدنيا حلوه اهو اومال حسستينى ليه انك معقده

= لما تحبى حد هتعرفى انا كنت بعمل كدا ليه

= وممكن ابقى صريحه جدا مش زيك

= هنشوف يختى

= وهيطلبك منى انتى

= يطلبنى منك انتى

ردت اميرة بتكبر وهى تضع قدم فوق الاخرى= ومالى إن شاء الله مشبهش يعنى

ردت بضحك= لا يختى تشبهى بلد

= ده مدح ولا ذم

= مش عارفه بصراحه

= اختى هتتجوز يانااااااس

= بس يابت

= سكت اهو

فى فيلا مراد وبالتحديد فى غرفة مرام كانت غاضبة للغايه وتكسر اى شئ أمامها

= ماشى يا مراد ماشى حتى لو اعترفتلها مش هخليك تتهنى معاها لحظه واحده وانتى يا روح كنتى اخر واحده افكر انك تكونى هى مش حلوه ولا فيكى اى حاجه مميزه علشان يحبك ويسبنى بس ماشى ملحوقه موتك هيبقى على أيدى وقريب اوى

وسمعت صوت هاتفها وكانت والدتها تتصل بها

= يادى النيله علياا

وأخذت الهاتف وأجابت عليها = الو خير يا امى بتتصلى ليه

= مش عايزانى اتصل ولا اى

= عايزه اى دلوقتى

= سمعتى الجديد ولا هبله زى ماانتى

= قولى على طول فى اى

= مراد ويوسف يختى هيتجوزو مع بعض خالتك لسه مكلمانى وقايلالى

ازداد غضبها عندما استمعت بهذا = مش هخليه يتهنى ولا يتجوزها هموتها بإيدى يعنى هموتها

= انتى زعلانه على اى يا خايبه الى يتزعل عليه بجد هو يوسف هتضيعى ثروه انتى متعرفيش كام وهو هيحطهاا فى حجر مى وأمها وانتى خليكى يختى حبى فى مراد بتاعك ده

= انا مش عايزه غير مراد مش عايزه ولا يوسف ولا غيره

= مرام بقولك اى انتى دلوقتى قدامك فريد لازم تتجوزيه انتى فاهمه وانسى مراد ده

= مش عايزاه انا عايزه مراد وهقتل روح لحد ما يبقى لياا

= تقتلى مين انتى هبله عايزه تودى نفسك فى داهيه وليه القتل اصلا فى طرق تانيه

=ده على اساس انك مقتلتيش قبل كده ولا عامله فيها ناسيه تحبى افكرك

= هو انا عملت كل ده ليه مش علشان حقنا

= حق اى إلى بتتكلمى عنه قتلتى ابويا علشان خاطر عرف بالى عملتيه فى اختك وجوزها وقتلتى اختك وجوزها وخدتى فلوسهم كل ده ليه اصلا

=الفلوس دى حقى إلى هما خدوها وسرقوها

= حق مين انتى حقك خدتيه من زمان زيك زى غيرك وانتى إلى ضيعتيه بإيدك لكن هما خدو الفلوس وكبروها لحد ما بقو اغنيه ومشهورين وتقولى حقى انتى ملكيش حق فى ولا مليم منهم اصلا انتى فلوسك وضيعتيها يبقى متبصيش فى رزق الناس وتقولى حقى

= انتى جبتى الحكمه دى منين يابنت

= دى مش حكمه دى الحقيقه إلى لو حد عرف بيها هيتلف على رقبتك حبل المشنقه وقتى

= انتى بتهددينى

= مش بهددك  بس سبينى فى حالى وملكيش دعوه بيا انا مش هتجوز فريد اتجوزيه انتى سلام

أغلقت مرام الهاتف بكره وحزن على ما تفعله أمها وعلى ترك مراد لها

فى اليوم التالى ذهبت روح مع سلمى إلى المستشفى وعندما دخلو وجودو زينه بداخل وكأن هناك احتفال

ردت سلمى بمرح= عيد ميلاد مين ده

ردت دعاء= مش عيد ميلاد حد ده زينه كدا علشان فى اطفال جايه زياره

= زياره للمستشفى

= انتى متعرفيش أن فى رياض الاطفال دلوقتى علشان يتعملو عن مهنه دلوقتى بيروحو المكان بتاعها زياره وكمان بيتكلمو مع صاحب المهنه علشان يحكلهم عن خبراته وعن مهنتة

=ده على كده احنا كنا عبيد فى المدرسه زمان

= ده حقيقه

= طب وهيسألو مين

= رئيس الأطباء عنده خبره اكتر منا بكتير وهيفيدهم اكتر

= طب كويس أنه مش احنا كنا هنعك الدنيا

= حصل فعلا

واتى أسر ومراد فى هذا الوقت

= صباح الخير

نظر مراد إلى روح وابتسم = ازيك يا سلمى

نظرت له سلمى= انت بتكلمنى انا

=هى اول مره اسلم عليكى ولا اى

= انا من ساعت ما جيت هنا واشتغلت معاك مقولتليش سلام عليكو حتى

=منا بسلم اهو

رد أسر=لا يا خفيف سلم على إلى يخصك

= ماشى يا عم عقبال ما تعمل زى

= سبنالك الرومانسيه

= قول بقى انك خايف تعترف

= مين ده إلى خايف

= طب ما تثبتلى انك من خايف

ردت سلمى مسرعه=اى الى جاب الخوف فى الاعتراف اهدو الله هيديكو انتو الاتنين

= اسكتى انتى يا سلمى خلينا نشوف أسر هيعترف ولا جبان اعتقد جبان

= مخلاص يا دكتور مراد انت عايزه يعترف بحاجه ممكن يكون مش حاسس بيها

= اى ده انت مش حاسس بيها يا اسر

ذهب أسر ووقف أمام سلمى ولم يهتم بأحد

= سلمى انا بحبك

سلمى بصدمه=ها..