رواية هو لا يشبههم الفصل الخامس عشر بقلم تبارك الوائلي
• أنا امرأةٌ قويّة
أصلحُ نفسي دائماً وحدي
وبكُل هدوء 🖤🦋
جمانه: صدمني كلام ابويه الي متغير بشي مجرد
رجع صار يحجي الايهم على غلاط بسام و اخر شي ختمها كله .
أبو صالح: اسمع بسام هل مره ترجع بس الخاطر اخوك ايهم مو الخاطرك واذا نعادت تحلم تشوفها .
جمانه : سمعت كل كلامهم ونقهرت شويه وصاحني ابويه رحت طبيت للاستقبال واجتي عيني بعيون بسام وهو كالب وجها و ما عاجبه كلام ابويه سلمت وكعدت وحجه ايهم كال .
أيهم : ام نور خويه هذا بسام كبالج حلف بعد ميعيد غلطه و اني اتكفله بعد اذا يغلط بحقج اني موجود
و ارده .
سكتت مكسوره خاطر مكدرت احجي ، ابويه سمعه كال .
أبو صالح : يله بنيتي روحي اجمعي ملابسج ورجعي البيتج .
جمانه : صدك رحت لميت ملابسي بدون اي تردد بعد ما مات كل احساس عندي وصار همي الوحيد ارجع الجهالي لان حياتي ويا بسام حفضتها واعرف مالها نهايه بس اهم شي عندي مابعد عن جهالي احس كرامتي مبقت وكبريائي نكسر ، بس الي بي اني كله سببه اهلي الي ماخلولي كرامه كل زعله يرجعوني اله ومن احجي يكولون اتحملي وارجعي وجهالج
وعيب وماعدنه بنيه تطلك كملت كلشي وشلت ملاك
و طلعنه بالباب سلمو على ابويه .
أيهم : والله عمو ماعرف اشلون اشكرك .
أبو صالح : لا ادلل وان شاء لله يطلع هل مره اخوك صادق بوعده .
أيهم : غصباً عليه هل مره يصونها ، يله خويه
ام نور تفضلي .
جمانه : مشو كدامي وهم شايلين الجنط وأني
شايله ملاك سمعت بسام يكله الاخو .
_ سمعته لخالي اشكد يبالغ ويحجي والله كومه اتحملته .
هو خزره وكله .
أيهم : اشبيك بسام الخأطر ربك متسكت طبعاً يحجي حقه غير بنته امشي واسكت احسن .
جمانه : وصلنه للبيت وطبينه تلكتنه عمتي اخذت ملاك من حضني تبوس بيها وتهلي هيه وطيبه شويه وايهم كال .
أيهم : اسمعيني خويه ام نور بعد بسام من يغلط يحقج تتصلين عليه اني هم اخوج ولتكبروها الخاطر جهالكم .
جمانه : ان شاء الله هو اني شعندي قابل .
أيهم : الله يهديكم اني ترخص .
بسام : لا وين تترخص اكعد ابقه نتعشه سوه وروح .
أيهم : اعذروني والله ماكدر خطيه تنتضرني ام دينا ونتعشه سوه اخاف تزعل وابات بالشارع اليوم ههههه .
ام بسام : انزول عليك ايهم والله عليك سوالف .
أيهم : اي يا يمه شسوي خلصانه الدنيا اضحك علمود ماشيب ههه وهم باجر دوام عندي ياله اني اترخص
مع السلامه .
جمانه : راح واني بكلبي كلت ربي يحفضههم شوف
شلون شايل هم زعل زوجته تعال شوف اخوك الي عمره ماحترمني وحسبلي حساب ضحكت بداخلي
على خيبات املي ، الله يسعد العالم عمتي كالت .
ام بسام : اي يمه جمانه هاي كدام بسام بعد متعوفين بيتج ابد ومالج شغل بسام اني يمج .
جمانه : عمه فدوه الكلبج اني قابل الي سويته لو بنج يدزني ابات وبالليل يتذكرني وهو الي عافني وما سأل .
ام بسام : أن شاء الله متنعاد .
جمانه : لا عمه ابنج حرمني من جهالي وخلاني افرفح عليهم .
ضاج من كلامي وصاح .
بسام : كافي جمانه انسي وياله كومي سوي عشه علمود نتعشه .
جمانه : كمت اسوي عشه وعفتهم يحجون ونور وطارق مكيفين واكفين يمي ويحجولي على الي
صار بغيابي واني اسمع بنور واضحك عليها وعلى سوالف طارق يقلدها شتكول هههه ، وهو نسه نص وقته جان يمي فدوه اروحلكم حبايبي والله انتو الي رجعتوني ومتحمله لجل عينكم ،
شلت الصينية مال العشه وصحت .
_ ياله نور جيبي الماي وتعالي .
طارق : واني ماما بس نور تجيب .
جمانه : ضحكت على سوالفه وكتله .
_ انت جيب الخبز وتعال .
طبينه للصاله وابوهم صاح.
بسام : هاي شنو اليوم فرحانين .
جمانه : طبعاً غير امهم يمهم وفرحانين بيه شكول عليك مثل من حرمتي منهم .
بسام : تستاهلين ليش تعاندين وخلي بالج اذا بعد بقيتي يوم يم اهلج هم اخذهم منج واعوفج .
جمانه : جريت حسره وكتله .
_ الكلام مابي فايده وياك .
_ يله عاد فكيها وسدي السالفه .
جمانه : باوعت عليه و بكلبي اكول والله ماشفت
احد ماعنده احساس وكلب بكدك سكتت وكعدنه نتعشه وهو ماكل غير اشويه وكال .
_ اكلو انتو اني رايح للمطبخ اريد اشرب .
جمانه : كملنه عشه واخذت صينيت العشه ولكيت الشرب على الكاونتر عايفه غسلت المواعين على السريع وطلعت اخذت الجهال وصعدنه بالسطح نمنه لان ماعدنه خط مولد ليلي بـ 12طفه عليهنه وصعدنه فوك وكعدنه الصبح على الذبان والشمس
بعيونه .
ومرت ايام حياتي الي ماله طعم غير بس جهالي وبسام نفس وضعه ونفس طبعه ونفس اسلوبه مايحترم ويجاوز ويغلط ويسب على اتفه الاسباب وحتى الجهال ماسلمو منه ومن يجي المغرب يجون يمه اصدقائه يكعدون بلاستقبال والجاي ونركيله والسوالف والضحك والصوت العالي واني خايفه
منه ومن جماعته متحملت اسكت كلت العمتي .
_ عمه ليش قابله هيج عليه بله طلع واحد بيهم سكران ودفع الباب وطب علينه شنكول للعالم
وانتِ عندج بنيه ماخفتي عليها .
ام بسام : ولج شسوي يمه جمانه والله ماكدرله
شوفي صار يجيبهم هنا و كلت ميخالف يضوج
خلي يجيب واحد اثنين يتعللون ويرحون شمدريني سواهم 10 زلم وكام يحط الفحم والجاي والتعلوله بعد حتى من احجي ماياخذ كلام تعرفي .
جمانه : تأفأفت وكلتلها ، والله طلعها من ماعونها
بسام والله حرام عليه الي ديسوي بينه مافكر بينه ابد بس اهم شي راحته دسمعي اصياحهم وضحكهم وكل شويه جايني علكي الفحم صبي جاي سوي فلان شي .
ام بسام: تحملي بنتي شنسوي .
جمانه : اشلون بيه اني كليلي مامكتوب اليه الراحه مثل النسوان بس كليلي وين اروح من ابنج لا هنا مرتاحه ولا يم اهلي ياخذ الجهال مني ويحرمني منهم .
ام بسام : اسكتي يمه ليسمعج مابينه حيله فدوه اروحلج .
جمانه: ها ونوب لازم نكعد خرسان ابيتنه هذول الجهال شيسكتهم كليلي عمه .
ام بسام : بس كومي نيميهم وخلصينه ليروح يطب على صواتهم ويضربهم كومي عمه .
جمانه: كمت امري لله شكول عليك بسام .
ام بسام : تعالي جيبي ملاك يمي وروحي الباقيه .
جمانه : اخذتهم و رحت وصرت اقره قصص الهم بس مصرف الهم قصصي لان متعلمين ينامون بصف بييتهم ويباوعون كارتون رجعت فرشت الهم يمها وعلكت التلفزيون وطفينه الضوء وغطيتهم وكعدت بصف طيبه كاعده بصف الصوبه ندكت الباب قوي فزينه من الخوف همزين الجهال نامو طلعت عمتي وطلعنا وره الباب حتى نشوف شكو طلع جارنه المختار جاي وكال .
_ ام بسام خويه رحمه لموتاج تره ميصير
هيج كل يوم يطبون يمكم هل شباب وصياحكم ماذين جيرانكم .
ام بسام : خويه تره ذول خطار يمنه شويه ويرحون .
_ اشلون يعني هاي بس انتو خطارك كل يوم .
طلع بسام فشلان وصار يعتذر والرجال كال .
_ بسام ميصير ترا هذا الوضع ممسموح بي و
الخاطر شيبات امك راح اسكت .
راح المختار واني واكفه وره الباب سمعت كلشي بعدها طبينه اني وعمتي اباوع الها خايفه على مستحيه وره اشويه طلعو اصدقائه وقفل الباب واجه معصب صاح .
بسام : هذا شعلي بيه ها واذا مختار على روحه
والله العضيم اسحله بالشارع وخل عود واحد يطلع ورا .
_ ياااا ، ولك يمه هيه هيته تسحله عنده احزام ولد ولد اخو انت غلطان .
_ انعل ابو لابو ولده خل يحترم نفسه وينجب .
جمانه : كافي بسام صوتك خلي يولي اسكت مو حتى الجهال كعدو على الهوسه.
ام بسام: بس ابني اسكت عيب .
جمانه اعرفه مو بوعيه و تهستر علينه يعيط ويتهدد على المختار وبلكوه انسايس بي وسكتنا وراح نام وكعدت يم عمتي وطيبه انتضره فرد نوب ينام وروح
اني هم انام بالغرفه
ومرن الايام ....
واني ملتهيه بين الغده والعشه واقري نور صارت
صف ثاني ومكتفيه بجهالي وبس ، والله مرات احس نفسي مامتزوجه لان بسام عايش النفسه وابد ما بينه علاقه زوجيه لا كعده لا سالفه وحتى حاجته يجي يطب للغرفة كل شهر مرات اكثر ويطلع بسببه صرت استحقر حياتي وطبعا كعداته صارت يوميه وكمت انيم الجهال من وكت ونبقه كاعدين اني وعمتي وطيبه ومانكدر انام ابد اله يطلعون ويرحون اصدقائه واليوم طلعو مثل كل يوم وراح بسام
سد الباب وراح ينام شويه و اندكت الباب وعمتي خطيه تخاف بالليل تفتحه بس طلعت مجبوره
ام بسام : منوووو ؟
_ اني خاله اريد بسام .
_ يمه نايم بسام .
_ خاله اطلعي بالباب احجي وياج .
طلعت عمتي واني وطيبه وره الباب واكفين
نسمع الكلام كله .
_ خاله اني تره حاسب احساب الج والشيبتج .
_ كول يمه خير ؟
_ اليوم جنت كاعد يم ابنج ومبايلي نسيته يمه
ومن سالته كال مو يمي ورجعت عليه قبل ساعه
كلي دورته مالكيته والمشكله بي شغلات وصور .
_ يجوز صدك مو يمه .
_ لالالا يمه خلي يرجعه احسله ليش اسوي مشكله خلي يطلعه ويجفي شر .
_ والك يمه والله العظيم نايم تعال باجر وتفاهم ويا .
ضلت عمتي تحجي ويه الولد و بلكوه راح نقهرت عليها طبت وجها مخطوف لونه كنالها .
_ شكو ؟ كالت .
_ اسكتن وعوفني بحالي .
رحنه نمنه وثاني يوم شفته طلع من الاستقبال وشايل بيده مبايل وطلع الشريحه مالته وكسره وذبه بالمغاسل وكعد يكلب بي كتله .
جمانه : بسام هذا منيلك .
_ لكيته بس .
_ بس البارحة راعيه اجه بالليل على عمتي يسال عليه وعصبي وكال باجر اجي اريده .
_ اي وهو جان سكران يعني ميدري اذا صدك موكعه يمي بس والله طلع بي بلاوي هل مبايل وصور ناس عرف وهم غالي راح ابيعه افلوس وجتني اشلون ترديني ادفرها .
_ يااا ، عزاااا اشلون هيج تسوي رجع بله اليوم وسال عليه شتكله .
_ كافي وسدي حلكج ولتدخلين بيه خوش .
جمانه : راح واني مصدومه من كلامه يعني بسام كلهن حويتهن ماعندك شي زين ابد بحياتك واجتي عمتي من المحل وعرفت وصاحت .
ام بسام : كافي هل مره اني راح اعوفلك البيت واطلع رجع المبايل للولد واستر عليه عايف كل الناس جاي على ذوله الشرانيين تره ماعايزه مشاكل اني .
وكف بوجه أمه وصاح .
بسام : كافي الخاطر الله جلبتي اسكتي وكافي لتدخلين بيه لتخليني احرك البيت هسه عليكم والله .
صار عصبي وهم راح ضرب جام الصاله وكسر جامتين وطلع واني وعمتي صافنين وحده تباوع على حض الثانيه خافو الجهال منه ورحت لميت الكزاز كله ونضفت المكان وراحت خطيه عمتي جابت من ابو الاسواق كارتون بيض وكالت .
بسام : خلي عمه بالشباك مالت الاستقبال بارده عليكم ماعندي هسه احط جام .
طيبه : اي بنج يزهك ويكسر واحنه واكعين بيها من البرد .
جمانه : واجه اليل وهم نفس الروتين والكعده بس هل مره راحو طب بسام بالكوه يمشي وراح كبل نام مبين اليوم شارب هواي لان عنده افلوس الي باع المبايل بيهن وهم اخذ علاكه وطب بيها مبين عازمهم على الشرب نام و احنه ارتاحينه من نام كعدنه نباوع على التلفزيون شويه وتفلش الباب تكسرت
من الدك وطلعت عمتي ترجف خطيه وطلع الرجال ابو المبايل صاح .
_ هسه اريد مبايلي لا احرك البيت عليكم المبايل بي
صور وشغلات يودني الجهنم ماتحرك اله يطلع بسام ويجيبه لان متاكد المبايل عنده .
ام بسام : ولك يمه والله العظيم نايم تعال بالنهار ليش تجي بالليل .
_ خاله اني اشتغل بالنهار مو مثل ابنج عطال بطال .
بقه يحجي وسمعو الجيران واجا وكله .
_ ابني عيب عليك روح وتعال باجر الصبح صارلك
ساعه تحجي وتصيح و المره جبيره ومتكدر تسويلك شي .
طرده جارنه وطبت عمتي وكعدت تبجي لان استحت من الجيران رحت حضنتها وبجينه سوه مادري على حضي لو على حضها
كعدنه الصبح نتريك واجه الولد من الصبح و .
_ كله اريد المبايل اخاف من الصور الي بي اذا عندك كلي .
بسام : شبيك صادق وروح ابويه مو عندي والقران مو عندي .
كعد بسام يحلف دين يمين مو عنده وكدر يقنع الولد مضيعه بغير مكان والولد مشه وصدكه واني كلبي يدك من الخوف على الحلفان الي حلفه يمه اشلون هيج ميخاف الله ويحلف جذب ياربي رحمتك
عمتي بزعت من بسام وسوالفه وكالت .
_ بعد هاي هيه اني راح اعوف البيت واطلع بزعت
منك بسام وحتى افلوس مانطيك ولا عبالك تكلب الدنيا بعدك شباب روح اشتغل ودبر نفسك .
بسام : هو وينه الشغل وراتب ابويه موجود ليش اشتغل .
ام بسام : مالك شغل براتب ابوك انت كبرت ونكطع راتبك اشويه باوع على زوجتك وجهالك والله العظيم حرامات عليك عائلتك بس اخ كله مني اني .
صار يصيح بسام على أمه ويتجاوز .
بسام : ولي وجفيني شرج وروحي وين متولين
ولي روحي الاخوتج العارات الي مابيهم خير .
ام بسام : ولك اخوتي تاج راسك اقلها احسن
منك حرامات انت بزر بطني .
انقهرت عمتي و طلعت وكالت .
ام بسام : وروح ابويه البيت بعد ماطبه حير بزوجتك واختك وجهالك .
جمانه : تخبل بسام وكام كسر الجام الباقي بشبابيك الصاله وشال الصوبه وشمرها على المجمده وكلب النفط كله بلكاع وطلع واني والطيبه والجهال واكفين نرجف من الخوف والعياط مجرد مطلع كعدت بجيت وصرت اندب بحضي شبعت بجي بس شنو الفايدة صرت اكره حياتي بسبب هل انسان
كمت على حيلي لان اباوع نور وطارق عينهم عليه ويباوعون عليه والخوفه بعيونهم رحت اخذتهم بحضني وكلتلهم .
_ لتخافون ماما ماكو شي ، كومي طيبه اخذيهم وكعدي بالمطبخ خلي انضف الكزاز والبيت .
طيبه : ولج جمانه والله اخاف يرجع .
جمانه : لا ميرج هسه لتخافين راح يشرب ويجيج
مسطور ، ياله كومي .
راحت طيبه اخذت الجهال واني رحت الم بالكزاز وابجي نضفت وكملت و اجيت كتله للجهال .
_ نوره روحو انتِ وطارق الابو الاسواق جارنه ابو ايهاب جيبولي كراتين يله حبايبي رحو ركض .
راحو الجهال جابولي كارتون وكمت رتبته بالشباك سويته كله طيبه كالت .
طيبه : جمانه هم يطب هوه روحي دكي جرجف
من بره .
جمانه : ولج مو تصير حيل ضلمه الصاله .
طيبه : ميخالف لعد يكتلنه البرد احسن .
جمانه : رحت دورت جرجف و دكيته على الشباك
من بره وعلكت الصوبه وخليت ملاك بحضن طيبه وشغلت تلفزيون على الكارتون النور وطارق
وكلتلها الطيبه .
_ راح اسوي عشه شوربه تمن لان من البارحه المسواك خلص وعمتي ماسوكت خطيه الجهال علمود اعشيهم ونيمهم قبل لا يجي اخوج .
_ أي عيني روحي .
رحت سويت شوربه تمن وتعشينه اني وطيبه والجهال ونيمتهم بفراشهم وكعدنه نباوع على التلفزيون و طب هو بالكوه يمشي اليوم همزين
ماكو جماعته ماجابهم صبيتله اتعشه ونام وكعدنه الصبح ماكو ريوك اكلنه خبز وجاي وهم سويت شوربه للغده راح هوه سحب 2جلكاين نفط واخذهن ويريد يطلع كتله .
_ بسام هاي شنو .
_ والله ماعندي افلوس واريد ابيعهن مصرف اليه .
جمانه : عافني وطلع واني صافنه على حضي
ويا صار المغرب اجه جايب علاليك ويا عبالي
مسواك طلع جايب شرب خلاهن على الميز
واجه طارق يركض يلعب وجر العلاكه وكع البطل ونكسر خفت من ردة فعل بسام وصحت .
_ عززز طارق اسويت .
طارق وكف خايف واجه بسام ، يمه هو شافه
لو تخبل علينه ولزم طارق كتله كطعه تكطع
واني واكفه ابجي عليه واتوسل بي يعوفه .
_ بسام فدوه والله ميدري عوفه طفل عباله جايب شي بلعلاكه .
_ انعل ابو لابو حتى الشييييي طفل لو شيطان هذا صوجج ممأدبتهم .
جمانه : بسام كافي و عباله حلويلت لان ماشتره اليوم تعرف امك معلمتهم تشتريلهم واليوم هيه ما موجوده .
ضرب كل كلامي بعرض الحايط وكال .
بسام : خلي اروح اجيب بعد بطل غيره وارجع وشوفي شاسوي اليوم البيت اكلبه عليج وعلى
ابنج
بنت ال...... انعل ....... يا ......
راح واني حضنت طارق وابجيت .
_ اي شوداك عليه بس كلي حضي .
طيبه : عوفي للطفل شمدري هو .
جمانه : لا ولج هذا حضي يدولب بيه .
طيبه : تعال عمه اسكت حبيبي .
جمانه : هسه اشلون طيبه اخاف يجي ويسوي مشكله لو يضرب طارق .
طيبه : لا ميسوي شي لان راح يشرب بره ويجي هسه تشوفين .
جمانه : حجيت بقهر ، شفتي اخوج راح يبيع
النفط لان امج ماموجوده عبالي راح يسوك النه
تالي جايبلي شرب وجاي ، مفكر وكال جهالي شياكلون شيشربون حاير بشرب بعدها سكتنه
ومر الوقت طويله كالت .
طيبه : جمانه شراح تسوين عشه هم شوربه
والله ملينه .
جمانه : لعد شسوي كليلي .
طيبه : سويلنه جاي وطلعي خبز نحمي ونتعشه احسن .
جمانه : أي هم صدك .
كمت ترست الصوبه نفط وطلعت خبز وسويت
جاي كعدنه ناكل وندكت الباب طلعت نور كالت
_ ماما خالو صالح اجه .
_ يا هلا بصالح تعال فوت .
طب سلم ونطاني علاكه فتحتها لكيت بيها خبز حار وخضراوات وعجينه كباب كال .
صالح : هاي كواكب دزته الج .
جمانه : ابتسمت وكلت الحمدلله ربي ميكطع فتحت العلاكه الثانيه بيها حفاضات الملاك كتله .
_ ليش مكلفت نفسك وجايب حفاضات .
صالح : مو عرفت بعمتي يم بيت عمي ابو حسان وعرفت ملاك راح تبقه بله حفاضات .
جمانه : اجه تقرب باوع على صينيه الجاي والخبز وكال متفاجاء .
صالح : شنو شتاكلون ؟
جمانه : هاا ، لا هيج هاي طيبه شتهت خبز مكسبه وجاي و تعشينه بي .
مصدك بيه ولزم طارق وكاله .
صالح : ها خالو طارق اتعشيت ؟
_ لا خالو ماعدنه عشه اكلنه خبز وجاي .
صار عصبي وصاح عليه .
صالح : كووووومي ليش كاعده هنا كليلي شعندج .
جمانه : شسوي لعد كلي بسام وامه حفضناهم شنو الجديد .
صالح : وانتِ وجهالج واكعه بيها .
حجت طيبه مقهوره .
طيبه : ليش صالح بس اختك ياريت الله يخلصنه
من بسام ومصايبه .
صالح : كومي جماااانه انتِ وجهالج يله بساااااااع .
طيبه : يااا صالح واني تعوفوني .
صالح : اني واكف بالباب انتضرج .
بجت طيبه وكالت .
طيبه : جمانه صدك تعوفيني .
جمانه : طيبه والله بزعت من اخوج .
طيبه : والله ادري بيج وحقج ومحد يلومج بس
اني اخاف ابقه يمه وحدي فدوه مو تدرين بي من يسكر حتى عليه يباوع بنضارت طايح حضها .
جمانه : باوعت عليها نقهرت عليها كالت وهي تبجي .
طيبه : لا عفيه لتعوفيني .
جمانه : لتبجين طيبه كافي كطعتي كلبي ماعوفج والله .
صالح : يله فضيها .
جمانه : لا صالح ماروح ماكدر اعوف طيبه تخاف وحدها وبعدين عليمن اروح يومين ويجي بسام واهلي يرجعوني اله بس ابهذل جهالي وعوفهم
ورايه تعرف بسام ماينطيهم اليه وابويه راح
يكلك جهاله ويبقون يمه عليمن خليني كاعده يم جهالي احسن .
صالح : لعد ليش مترجع عمتي يعني متعرف سوالف ابنها وعايفتكم هيج بدون مسواك بدون كلشي يله مع السلامه اني ما اتحمل سوالف بسام .
جمانه : راح صالح بعدها اجه بسام هم كل معتاد سكران ونام بوجها حمدت ربي لان نام ونسه سالفه طارق والبطل الي كسره الصبح كعدنه كتله .
_ بسام راح اروح اني وطيبه على عمتي .
بسام : روحن .
جمانه : وصدك اخذت الجهال ورحت اني وطيبه والجهال فرحو من شافو عمتي وكعدنه نحجي
ويا عمتي وهيه قافله ماتقبل ترجع .
طيبه : يمه تره هذا تربيتج وابنج الخاطر ربج
المن عايفتنه وحدنه يمه وتعرفين بينه نخاف .
ام بسام : اشلون يعني ما اخلص اني .
طيبه : كافي يمه و رجعي ويانه .
ام بسام : لا مااجي وروحن مابقه وكت اخذن الجهال وروحن .
جمانه : رجعنه للبيت اني وطيبه واجه بسام سكران كال .
بسام : وين امي.
جمانه : ما قبلت تجي .
بسام : امشي لبسي و تعالي ويايه انتِ واطارق نروح انجيبها .
جمانه : لا ماكدر اجي رجلي توجعني .
خفت نروح وهو سكران كتله .
_ وانت شيوديك هسه بِ لليل روح باجر الصبح عليها هسه اكيد نايمه .
رد باصرار.
بسام : لا اروح يعني اروح جيبيلي قمصله .
جمانه : راح واوني وطيبه خايفين شلون راح يسوق هيج وهو سكران كعدنه ننتضر على نار نامو الجهال مرت كم ساعه وسمعنه صوت السياره بالباب ركضت
فتحت الباب طلعت جايه عمتي ويا كعد هو عصبي وكال .
بسام : هذا اخوج اشبي بله يتفيك عليه ويمسلت بالحجي كليله يحترم نفسه احسله .
هيه تعرفه سكران ماردت عليه وراحت نامت
وكعدنه الصبح ماراحت عمتي لسوك كعدت تعاتب بي وتحجي عليه واني هم الكله فرصه وياها
احجي عليه لان صاحي وهو معاجبه كلامنه كال .
بسام : اهوووو كافي تلغن على راسي بزعتني
كافي خاطر ربجن .
ام بسام: والله انت لو متربي ماحجيت هيج ويايه بس اني ماعرفت اربيك .
بسام : أي صوجج لو مربيتني عدل ما هذا حالي .
نقهرت عمتي من كلامه بس سكتت ومرت ايامنه عاديه واجتي ساره خطار علينه ساره لسه ماخلفت خطيه و زينه الحمدالله صار عدها ولد و2بنات وصار العصر وكعدت اقري نور وعمتي كاعده بالباب وطبت هيه وطارق وملاك كايدته تمشي صار عمرها سنه كالت .
ام بسام : تعالي جمانه اجو خطار.
طلعت وشفت ايهم وزوجته وبناته طب ورحبنه
بيهن كعدو ضحك وسوالف هاي اول مره زوجته اطب بيتنه صاير عدهم بنيه بالكماط عمرها 3اشهر باركنه الهم وهيه جانت البنيه اجامل وتحجي ويانه وندمجت وبسام كال .
بسام : اليوم تبقون على العشه يمنه اول مره اطب ام دينا علينه لازم نضيفها .
ايهم : لا ماكدر عذرني عندي شغل .
ابسام : ابد والله ازعل عليك اذا طلعت .
اصر عليهم بسام يبقون ورحت للمطبخ اجهز العشه واجتي ساره اساعدني وكلتلها .
جمانه : والله عيب بس انكلي بتيته وبيتنحان وطماطه .
ساره: لعد شتردين كل عقلج اهلي يسوون غير شي بالطبخ اهلي مايغيرون طبخهم جمانه من قبل لا تجين انتِ هم هذا اكلهم .
اجتي عمتي وياها ام دينا عمتي كالت .
_ ولجن ليش عفتن البنيه تصفن وحدها عاد خلي تجي يمجن وسولفن سوه .
جمانه : ياااا عمه غير انتِ يمها تعالي عيني ام دينا كعدي يمنه .
والله كعدنه وحجينه وضحكنه وسولفنه كملنه وحطينه العشه وتعشينه سوه وبقو يمنه لل 9ويسولفون اباوع بسام يحوص يطب ويطلع من المطبخ يريد بس يرحون علمود يكعد يشرب بعدها سلمو وراحو وقفلنه الباب ورهم وكعدنه وهو راح يركض للمطبخ علمود يشرب كعدنه .
طيبه : يااا هذا اشبي راح يركض .
جمانه : اي خيه علمود يشرب ماتدرين بي .
طيبه : شفتي ابن المسعده البس والعطر وزوجته البس والاناقه واشلون يحجي بثكل ومرتب .
جمانه: ضحكت بستهزاء وكلتلها ، مثل اخوج بالضبط
بعدين والج حرام امه ميته .
ساره : اي ليش لا هذا دلال امج معرفت اشلون
تربي .
طيبه : أي والله صدك .
ساره: تدرين جمانه جان ايهم اصغير بيتهم بالفرع الورانه قريبين علينه وينهزم من امه الضهر ويكلها هذوله مو اخواني اريد اجيهم ويريد يلعب ويا بسام
وهي متخلي تجي تاخذه وتروح .
جمانه : يااا ، عود صدك .
ساره : اي والله من صغره جان يحبنه ويحب يجينه بس امه شايله الصونده جوه عبايتها تفتر ورا وتكله امشي اقره ماخلته ولا سنه يرسب وهم شافت تصرفات بسام من صغير مشيطن ماخلته يمشي ويا .
ذبت حسره عمتي وكالت .
ام بسام: اي هيه الدنيا احضوض خاطر الله مسكتين ساره وسدين حلكج .
ساره : لا والله يمه ليش زعلين انتِ دللتي ابنج هواي وهاي تالي دلالج وهسه زوجته وجهاله وكعو بيها .
ام بسام : اي وكبر اخوج ماتعلم من الناس من الدنيا لو مجلبات بدلالي والج ذاك اليوم رحت البيت خالج عايفهن بدون مسواك هذا اخوج ما عليه عتماد ابد .
جمانه : حجيت بقهر وكلت ، اي واني وكعت بيه مو.
سكتن مردن عليه واني هم كمت واخذت ملاك انيمها جوه ونور وطارق ينامون بصف بيبيتهم
ثاني يوم رجعت ساره لعيالها ومرت الايام وسمعنه بساره حامل والكل فرح الها ورحنه باركنالها
خطيه الله جبر خاطرها من بعد 7سنوات .
ومرت الايام __
اجه موعد روحتي الاهلي وكتله .
_ بسام هل مره توديني الصبح تجي قبل المغرب
لو اخلي صالح يجيبني من يطلع .
بسام : خوش هذا هوه .
جمانه : وفعلا رحت وصدفه حلوه اجتي شهد وكعدنه نححي ونفضفض البعض بقيت للعصر
ورجعت وصلني صالح لبيتنه وبعد بفتره رجعت اشوف علامات بملابس بسام يعني رجع النفس
دربه القديم ويه اصدقائه اطور بسام و كام يسوء حاله اكثر بالشرب يوم عن يوم واجه الصيف
ورجعنه انام بالصاله كل احنه سوه واساسا هل
شي ميفرق عندي أو ما خوفي من الله جان امنعه من نفسي بس هو اصلا وجوده وعدمه واحد لان بسام ميطب غرفتي ابد واذا عجبه ميطب غير بالشهر مره
ومرات اكثر من شهر يمر يجي يطب يقضي حاجته بدون اي مشاعر ابد ويطلع ينام بالصاله الي يشوفنه من بره يكول هذوله خوان مو زوج وزوجته وستمرت حياتنه هيج والحمدلله اصدقائه
مطببهم بعد من يوم اجه المختار اشتكه منه بطل بسام يطببهم يمنه
كاعدين نتفرج على المسلسل والوقت متأخر
وكل عاده اجه بسام طب واحنه نصدمنه بشكله
وجها كله مورم وعيونه طافيه و بالكوه يمشي سكران اخترعنه من منضره وكعدنه نبجي عليه وهو ولا هامه راح كبل نام بفراشه واني وعمتي وطيبه
نريد نعرف اشلون هيج صار بي ومنو هيج سوه بي الحد مانمنه وكعدنه الصبح وهوه كعد واكف و يباوع الروحه بالمرايه سويت ريوك وعمتي تباوع واني اخاف اساله غلست عليه احسن عمتي سالته وكالت .
ام بسام: بسام منو سوه هيج بيك ؟؟
بسام : رحت يم واحد صديق وعزمني على شرب وكعدت اشرب يمه ومادريت بعد شصار .
ام بسام: زين اشلون متدري وانت طلعت من 1الضهر وماجيت الا بـ 10بالليل .
بسام : اي رحت يمه الضهر شربنه بس يمكن
عايفيلي حبايه بالقوطيه مالتي ومادريت بروحي بعدين صحيت وره المغرب كعدت لان جنت نايم مادري بااي شي كعدت لكيته يمي ويكلي جنه كاعدين وجاي واحد ضاربني عداوه اني ويا وكلي ماكدرت ابعده عنك .
ام بسام: هسه يطلع هو جايبه عليك .
بسام : واني هم كلت هيج وعبالج اعوفه واعديها اله لا والله ، خلي يصبر ويشوف شسوي بي .
ام بسام: يااا عزااا والك فديوم يكتلوك ويشمروك فطيس بالباب مافكرت بزوجتك وجهالك انت اشوكت اتوب من الشرب .
بسام : والله هذا الشرب إلي تحجين عليه انتِ رجعتيني عليه اجيتج وكتلج خلي نشيل منا وماقبلتي .
ام بسام: بحسره ، يمه الخاطر جهالك كافي .
بسام : اتحملي دربي القديم صوجج ، فكرتي بروحج وبناتج ومافكرتي بيه اتحملي واسكتي احسلج ومحد اله علاقه بيه الي يعجبه يعجبه والي ميعجبه الباب يفوت جمل .
كمل كلامه وعافنه وصعد لطيور ونور وطارق خاتلين ورايه يخافون من شكله هو اني اخاف
عليه لان شكله مكلوب كلب عيونه منفخه وارمه
عمتي ضاجت من كلامه وعصبت وكامت لبست عبايتها وكالت .
ام بسام: بعد ماكعد بالبيت اني بزعت روحي .
جمانه : فدوه عمه وين رايحه والله هسه يتخبل
علينه والله عمه كل احنه نخاف منه فدوه اروحلج اكعدي .
_ ابد ماكعد وانتِ هم روحي الاهلج وعوفي هذا عوج وميتوب .
جمانه : ضحكت بهستريا وكلتلها.
_ ليش هسه عرفتي مو خوش ادمي عمه ليش بعد ماخليتي 3اطفال براسي هسه تحجين ومن اروح
زعلانه اخوج يرجعني انتو كلكم شلتو خطيتي
والله حرام عليكم ضيعتونه ويه هيج انسان .
صرت ابجي واشهك احس نفسي تايها وماعرف منو اني عمتي كالت .
ام بسام: ولج كافي عمه والله كطعتي كلبي شمدريني هيج والله العظيم عبالي يبطل ويكبر ويعقل شمدريني هيج يسوي بيج وبينه .
تكابلنه اني وطيبه وصرنه نبجي سوه عمتي كالت .
ام بسام : كافي يمعودات فتحتن بوري بجي الخاطر ربجن هسه ينزل ويسمعجن مابيه حيل والله استرن علينه واكعدن .
طيبه : أي يمه سكتنه .
ام بسام: زين طيبه يمه خابري بيت عمتج ام حميد خلي يجون يحجون ويا بلكي يتوب هو يحبهم حتى اذا يريد اشيل اقبل والله بس خلي يلكولي حل .
راحت طيبه دكت على بيت خالتي وحجت ويا ولدهم عن وضع بسام كل شي عن وكالو احنه
نجي باجر ونحجي ويا .
جمانه : وبعد فتره اجوي ولد خالتي وكعدو وحجو ويا وقنعو يروح وياهم كم يوم يغير جو ولازم يترك الشرب علمود جهاله وقبل يروح ، مرات اكول بكلبي بسام مسكين هم يتمنه يترك الشرب بس من اشوفه ميطول اكثر من اسبوع ويرجع اكول لا جذاب يكدر هو عاجبته السالفه المفروض يجبر نفسه علمودي وعلمود جهاله ، راح وياهم بقه يمهم كم يوم ودك
المبايل علينه وطلع حميد حجت ويا طيبه وملامحها كلها انكلبت ودموعها صارت تصب اني واكفه كبالها اريد افتهم شكووو منضهر مينوصف كلتلها تحجيي
كالت بدموع .......
إلى هنا وختم بارت اليوم
مهم
بنات نزلت صوره الكروب الخاص بيه اذا تحبون انضمو اله راح يكون النشر هناك اول بأول
تعالو بنات وينكم مختفين علقولي بشغله خلوني افرح بيكم ....ارجع واكول القصه بعدها مبادئه احداثها الأساسية اصبرو اصبرو لهذا السبب رفضت اكتبها اعرف بيكم متتحملون قهر بس انتضر البارتات
الجايه راح اعوضكم 😜
جبتلكم صوره قريبه لجمانه
والبطل مو هسه انزله الكم
جمانه حيل تشبه هل ممثلة بشكل
والله العضيم بدون مبالغه خصوصا الغمازه هههه
