رواية هو لا يشبههم الفصل السادس عشر بقلم تبارك الوائلي
حِينَ يبكي القلب بِـ صمت ، تحكي الدموع كل الحكاية...🫀
طيبه : اوكفي جمانه هذا حميد بس خلي اسمعه .
حميد : طيبه بلغي خالتي تره بسام مغمه عليه يمنه
واخذنا للدكتور وطلع عنده تشمع بالكبد والغماء صرع صار عنده .
اباوع طيبه المبايل باذنها تخبلت تبجي وتحجي صحت .
_ شبيج ولج غير اعرف شكو .
طيبه : بسام مغمه عليه وصاير عنده صرع .
جمانه : يااا ، عزااا العزاني منين اجاه .
طيبه : ولج يمه لحكي ابنج راححح .
نمله بيته بالبجي والصياح اخر شي تعبنه من البجي دكينه عليهم وحجيت اني ويه عادي .
" الو ، اي بس افهم عادل .
" اي اي فهمت
" تسلمون متقصرون ، ها انتو تجون خوش يله الله وياك .
ام بسام: ها يمه جمانه شفهمتي ؟
جمانه : عمه يكول مغمه من باقي يمهم و ماخذي لدكتور بـ جمله عصبيه ومسويله تحاليل وفحوصات طالع عنده تشمع بالكبد من الشرب الدكتور كايله انت تشرب هواي ابني واذا بقيت هيج تموت من وكت وصاير عندك نوبه صرع بسبب الحبوب المخدره الي ياخذه وكايله لازم تترك كلشي وتمشي على العلاج
حتى تصير زين واكل صحي وتلتزم وهسه يكول عادل منخلي يرجع بعد يمكم راح انبقي يمنه وعنده علاج وابر يكول احنه نلتزم بيهن ويا
كعدت عمتي تبجي وتلوم نفسها .
_ اني صوجي يمه بسام كله مني هيج وصلته لو سامعه كلامه وشايله يم بيت عمته على واهس ولدهم جان مارجع يشرب اخ مني اخ .
جمانه : عمه فدوه الكلبج مايفيد الندم بعد انتِ
منا السكر لا يصعد فدوه اكعدي واسكتي وادعيله ربي يهدي ويصير زين .
ام بسام : ان شاء لله يمه يسمع من حلكج الخاطر جهاله كومي انتِ وطيبه روحن اشترن اتراكات اثنين اله يبدل بيهن هناك يم بيت عمته ولازم من يجي انطي افلوس العلاج الي خسرو عليه عيب منهم .
_ ان شاءلله يله طيبه ترحين .
_ اي ليش لا يله .
ورحنه اني وطيبه ونور وطارق ويانه وعفت ملاك يم عمتي ، اخذت اله تراك زيتوني وتراك اسواد وبيجي ورجعنه ومرت كم يوم واحنه وحدنه بالبيت عمتي بس ياذن المغرب تقفل الباب واطب هيه والجهال واني اسوي العشه وانام كلنه بالصاله سوه ويومين واجه عادل وبسام وفرحنه بجيتهم اجوي العصرية سوينه العشه وعادل جايب الابر ويا ضربه ابره وانطا العلاج وفرشنه بالاستقبال الهم بس عادل كايله لا روح انت بغرفتك ، وصدك اجه بسام نام بغرفتنه وكعد يحجي اليه من راح اشلون اهتمو بي واشلون مداري كتله .
_ اي والله اني اعرف بيت خالتي بدون متحجي
همه هيج طبعهم .
_ اي والله صدك فضلهم ماينسي ابد .
_ وين رحت العصر ورجعت .
_ رحت على ايهم البيته اشوفه .
_ اي وشفته .
_ لا مالكيته كالت زوجته بالموصل رايح ويتأخر
ياله يرجع .
_ ها خطيه .
نام بسام اباوع عليه وجها تعبان ومتغير صدك كسر خاطري وبجيت عليه وعلى شبابه ليش هيج مسوي بنفسه الله لا يوفق الي يصنع الشرب شكم شاب ادمر بسبب هل شي هواي شباب الي دفع عمره والي دخل سجون بسبب هل سم الله يهديك ويشفيك الجهالك كعدت الصبح سويت الريوك تريكو وعادل كعد على راس بسام كاله .
عادل : كملت بسام ياله اخذ علاج حتى نروح للبيت راح نتخر والجو بره حار عليك نرجع .
بسام : اي هسه ابدل بس اشوف الطيور وانطيهن اكل وانزل .
راح لطيوره ونزل وشفت بعيونه حزن ميريد يروح بس مجبر على الروحه لان يشوف وضعه تعبان حيل ونزل سلم علينه وبوس الجهال واجه عادل كال العمتي .
عادل : ام بسام عندي شغله براسي بس اتناقش
بيها اني واخوتي وادك عليج .
ام بسام : الله كريم يمه .
وراحو وكعدت عمتي تبجي .
جمانه : عمه احمدي ربج شوفي شلون يخافون عليه خلي يطيب احسن ما يرجع هنا لنفس سوالفه .
ام بسام : اي اي يمه خلي ربي يشفي شريد منه اني .
ومرت الايام ودكو علينه ولد خالتي وكال حميد .
حميد : تعالي عيني ام باسم ابنج يريد يرجع يمكم وكلناله اكعد يمنه عيش ميقبل واحنه منكدر انخلي وحده يجي .
ام بسام : أي يمه هسه اشوف منو يجيكم يجيبه.
دكت طيبه على صالح وخطيه اجه علينه ورحنه
اني وصالح وعمتي عليهم طبينه لكينه الكل ضايج وزهكان .
ام بسام: شكو يمه بسام ليش تريد ترجع .
بسام : كافي يمه ماريد ابقه صرت زين وهمه ميطوني محفضتي ومجلبين بيه ميخلوني اجي .
حميد : ولك بسام سد حلكك من الصبح كعد لسه يصيح ويكفر وكلب البيت بصياحه علينه فوك خوفنه عليه هو ميعجبه ، بله اجتك نوبه الصرع بالطريق
و صار بيك شي .
بسام : معليكم بيه عوفوني صرت زين .
جمانه : صبو الغده كعدنه تغدينه بعدها راد يرجع وهم تعصبو عليه وكال حميد .
_ عمه احجي ويا كلناله هاي غرفتين الك انت وزوجتك وجهالك جيبهم يمك يعيشون وكل اسبوع انوديك تزور امك .
ام بسام : شكو بيها ابني ابقى .
بسام : ماريد يمه .
حميد : زين تعال اجر بيت يمنه وعوف الشرب واكعد لتخسر شبابك بسبب الشرب .
بسام : لا ماكدر اعيش هنا مااشيل لتلحون .
ام بسام: انت مو قبل ردت تشيل هنا وليدي ابقه واني اجيك كل اسبوع ازورك ابقه فدوه رحتلك .
بسام : كلت لالالالالا ، ياله كومي فضينه نروح يله .
وبقه مصر بسام يرجع وهم زعلو منه وكالوله بعد مالنه علاقه بيك ورجعنه واشكد قنعته عمتي وصالح وماقبل قافل على الرجعه ورجعنه وبيت خالتي زعلو منه ، وصلنه صالح وهم ضايج من تصرف بسام وطبينه للبيت المغرب وسويت عشه واخذ علاجه وكعد وبقيت اني وعمتي نحجي ويا ونكله .
جمانه : بسام حتى اذا متريد تشيل ابقه يمهم طيب زين وارجع .
ام بسام: اي يمه بعدك ماتحسنت زين وبعدك شباب ليش اضيع نفسك وجهالك .
سكت وكال .
بسام : كافي تعبان راح اروح انام .
جمانه : كمت فرشت اله ونام بالصاله ونمنه كلنه سوه ورره يومين اجتي حماتي ليلى طبعاً هاي متجي كل سنه مره وكاعدين نحجي وندكت الباب طلعت نور كالت .
_ هاي عمه كواكب اجتي .
جمانه : هله بيها تعالي كواكب .
طبت كواكب وكعدت سلمت وكالت .
كواكب : هيه بسام ليش هيج تسوي بنفسك ها مو شفت اخوتي اشلون اهتمو بيك ليش رجعت وانت بعدك ماطايب وصراحه خالي أبو جمانه ضاج وكال بسام مايتغير ابد وكال جيبي جمانه وياج وتعالي وخلي بسام يكمل حياته ويبقه بمرضه .
عمتي وليلى وطيبه ضاجو حيل وكالت عمتي .
ليلى : ليش كواكب تره هم مره ورجال عوفوهم .
كواكب : اني مالي علاقه بيهم ليلى يعرفون اهلج اشكد احبه اني بس ميصير هيج يسوي بروحه كل احنه نعرف بسام رجع هنا علمود يرجع يشرب
والا ليش مابقه وعالج نفسه بس ميكدر يعوف الشرب .
جمانه : اني كاعده وساكته استمع الهن ومالي خلك اناقشهن بسالفه اني مافاهمتها اصلن .
نور : ماما ، بابا يصيحج بالمطبخ .
كواكب : يله جمانه ليش ساكته كومي بدلي حتى نروح .
جمانه : هسه اجي كواكب ، رحت للمطبخ لكيت بسام واكف ويباوع عليه بحيرة كتله .
_ اشبيك بسام .
_ خير اشبيها كواكب خالي دازها عليج مو .
_ اكيد سمعتها كدامك الحجي صار .
_ اي وانتِ راح ترحين وتعوفيني .
_ بسام اني ماريد اعوفك ولا اعوف جهالي بس انت متقبل تتعالج ورجعت هنا لان متكدر تعوف الشرب .
_ لا جمانه عفيه لا تروحين وتعوفيني والله ماشرب بعد وراح احاول اتركه وراح ارجع البيت عمتي اكمل علاجي واتوب بس لتعوفيني الله يخليج .
جمانه : باوعت عليه وهو عيونه مدمعه كتله .
_ صار ماعوفك والله بس لتفشلني وبطل وعيش شبابك عمرك 23سنه انت بعز شبابك ليش هيج اتسوي كلي باوع للجهالك .
بسام : والله ابطل بس ابقي لتروحين اي .
جمانه : سكتت بعد ماكدرت احجي اي شي وضطريت ابقه وانطي فرصه اذا مو الخاطره هو الخاطر جهالي كمت رحت يمهم بالصاله باوعت كواكب وكالت .
كواكب : ها يله فضينه جمانه تخرت .
جمانه: لا كواكب ماراح اروح واعرف شراح تكولين انتِ وحتى اهلي بس خلي انطي فرصه بلكي اكون سبب ويترك كل شي .
كوكب : هذا هوه جمانه براحتج اني دزني خالي وانتِ براحتج بعد يله عيني اترخص .
كامت كواكب و رحت ورها كلتلها .
جمانه: لتضوجين من كلامي كواكب اهلي كم مره اجيهم زعلانه ويعرفون بكل سوالف بسام و يرجعوني اله عادي هسه يردوني اعوفه من وكع بشده وانتِ تعرفين بسام اذا طلعت من البيت ميخليني اخذ الجهال لو تنكلب الدنيا واهلي ميرفضون ولا يحجون ويا وحفضت هل كملتين ماعليهم شي ويم اهللهم وعوفيهم واني ماكدر على بعد جهالي .
كواكب : هذا هو حبيبتي حقج والله يله كافي بجي وطبي مع سلامه .
_ الله وياج كواكب انتِ هم احجي وياهم وفهميهم فدوه .
كواكب : صار من عيوني والله فاهمتج .
راحت كواكب واني كل الافكار تجمعت براسي
شراح يكولون اهلي عليه وشراح يحجون ، طبيت لكيت عمتي والكل مبتسم على موقفي الي سويته واجه بسام كال .
بسام : ها راحت مواكب .
جمانه : اي راحت وان شاء لله متفشلني بسام وتروح تتعالج وتباوع علينه اني وجهالك تره مالنه ذنب بكل الي سويته انت .
بسام : اي والله ادللي من باجر ادك على عادل واتراضه وياهم لان اعرف زعلو مني من رجعت من يمهم .
طيبه ه : مو بس هاي بسام انت لا مخلي كفران وصياحك السابع جاي كالب المنطقه عليهم .
بسام : الصمي وسدي حلكج طيبه وانتِ اشمدريج .
طيبه : غير امي حجت من رجعتو .
بسام : كافي وسدو السالفه هواي لحيتو بيه وخالي هم ماله داعي يدز كواكب ويدخل بينه .
جمانه : هااا والله حقك بسام ليش اني مو بنته
وانت الي سويته مو قليل ثوب مايلبس عليه .
بسام : مو كافي جمانه تره هواي لغيتي وكبرتي السالفه انتِ واهلج لتخلوني اعاند واكعد ومابطل
اي شي كافي كلها صارت براسي تفهم وخيره .
جمانه : ياااااا .
بسام : وعلا ، خلي اصعد يم الطيور احسن ماكابل هل وجوه بس تبجي .
ام بسام : انت صدك متستحي هاي فوكاها فوك ما
انت الغلطان .
بسام : كافي يمه الخاطر ربج .
صار عصبي ودفر الدولمه و الماي جفاه وصعد فوك .
ام بسام : يااا اشبيه هذا .
جمانه : ها عمه هذا هو ابنج بعد خو سمعتي وشفتي بعينج .
من شافو هيج سكتو كلهم وبقن فشلانات منه ورجعت ليلى لعيالها ومرت ايامنه كله كذب وتسفيط بس كلام بسام لا راح على بيت خالتي ولا تعالج ولا حتى اعتذر منهم على تصرفه الي سواا يمهم ولا غير اي شي من حياته بالعكس كام يزيد بشرب وكام حتى حبوب ياخذ اشوفه يطلعهن من مكانات بالبيت ماتخطر على البال مره شفته بعيني طلع من الشباك مالت المبرده جيس وطلع حبه بلعه واني انصدمت
وجيت كتله .
_ يااا هذا شنو الي بلعته بسام ؟
بسام : ماكو شي كافي سدي حلكج لا افلشه .
جمانه : ياا عزه تريد تنتحر انت ليش هيج تسوي .
بسام : كاااااافي بت القند...ه سدي حلكج لتجي امي وتخبصني .
جمانه : انت مو طبيعي والله شلون خاطر على بالك هيج مكان .
يحجي ويتلفت وشكله مكلوب كلب .
بسام : مو اخاف لا الجهال تشوفه و تبلعه .
جمانه : اي لا حقك والله هواي خايف على جهالك من السم الي تبلعه ، باله ماخفت تموت وتعوفهم يربون بله اب ما فكرت بينه .
بسام : كافي راح احرك اهلج بنت ال......كافي ولى من وجهي .
وكف غلط وسب وراح صعد بالسطح واني محتاره شسوي ياربي والله تعبت اهلي مايوم نصفوني ويا لو لاكي من يرده ماسوه هيج ولا تماده ومرات اصفن اكول ولو اكثر من ولد خالتي ماخلو شي ماسوو اله وماتاب ولا كعد وهنا يمر شريط حياتي كدامي واني اشوفه يجي وريحت الشرب تعط منه وتملي كل الصاله وميسيطر على مشيته و يصير يتلولح ومو ثابت و اني اكوم ارجف من الخوف وكلشي اتخيله يسوي وحتى حجي أخاف احجي ويا و يكتلني خلاص لو يكتل جهالي وتعودت كل يوم يجي سكران بس يتعشه يكعد يباوع على التلفزيون وبعدين نشوفه نايم وهاي اني وعمتي وطيبه والجهال داخلين انذار من خوفنه نتراجف منه ولا حرف نحجي يمكن لو اذب ابره نسمع صوتها من كميت الهدوء ومرات صار يتاخر مينام بسرعه كمت انطي شراب الرمين للجهال علمود انيمهم قبل ليجي
ابوهما لان اخاف يسوون شي كدامه ويكتلهم
اعرفه اذا لزم احد بيهم ميرحمهم ولا عبالك جهاله ابد ماعنده رحمه بكلبه عليهم رجعت من صفنتي
على صوت عمتي دنيا العصر وهو يريد يطلع عمتي كلتله .
ام بسام : مو كافي لوهم تريد تشرب مو بزعنه منك .
صاح بصوت عالي عليها وكال .
بسام : انتِ كافي ولتبقين تحجين زايد سمعتييي .
ملاك واكفه بصف عمتي شو هذا فقد و شالها من ايدها وشمرها مسافه واني جمدت بمكاني ماكدرت اتحرك من شفت هل موقف وراحت عمتي تركض حضنتها والطفله فاحطه وخشمها كله يصب دم
رحت اخذتها من حضن عمتي وغسلت وجها وكتله.
_ ليش هيج متخاف ربك شنو ذنبه هيج سويت
انت وامك ماعندك رحمه بكلبك .
بسام : اي ماعندي رحمه وانتِ جايه تعلميني الرحمه بنت الكلب سكتي انعل ابوج لا ابو بنتج .
جمانه : حضنت ملاك اريد اسكتها متسكت وهو صار عصبي وكام يصيح.
بسام : سسسكتيها اكلج حيوانه اسكتتتتي الف مره كايللكم محد يحاسبني ومالكم علاقه بيه ليش تخلوني احرك البيت عليكمممممم .
عافنه وراح يرعد مثل الاعصار واني حضنت ملاك اسكت بيها وابجي على بجيتها جتي نور وطارق وهمه هم يبجون على بجيتي مسحت دموعي وكلتهم .
_ كافي يمه كافي تبجون .
نور : ليش ماما هيج يسوي ابويه ويضربنه ولا عبالك جهاله احنه .
جمانه : كافي نور وديري بالج تعيدين هل كلمه والله اذا سمعج يحركج .
نور : ليش ماما ؟
جمانه : ولج لتدخلين اسكتي ذاك اليوم ضربج بخشمج وسوه انحراف عندج استكي لا هل مره يضربج ضربه ويروحج من ايدي .
صارو ييجون كلهم ويصيحون عمتي في صاحت .
ام بسام: كافي يمه سكتيهم .
جمانه : اي عمه صار هسه اسكتهم واني منو يسكتني كليلي .
بجيت بحركه وكابلت عمتي وصرت اندب بحضي كالت .
ام بسام: والج كافي مو راح تموت روحج هسه ماحفضتي البسام وحفضتي سوالفه مو زين ماضربج والله خالج الله يرحمه جان ضرب يضربني هو من
اخذتي لهسه ابد ميضربج .
جمانه : اي صح ميضربني بس شنو الي عيشنيا اقسى من الضرب عمه وشنو امسوي فضل عليه ابنج مكفي وموفي بحركه دمي كل النهار مخلي دمعتي على خدي لو على اهانته وسبه اليه وغلطه على اهلي وعليه وميحترم لو جهالي كل ضربه
يضربهم اكول هسه واحد يموت بايده بعد شتريدين اكثر من هيج بقت على ضربتي والله لو ضاربني وهوه عصبي هم ميخالف احسن من الي ديسوي عمه ابنج دعلج واوي على كولت ابويه يعرف اشلون يحرك كلبي وينزل دمعتي من غير ليكول اضرب خلي اسكت احسن لان محد راح ينصفني لا انتو ولا اهلي وبعدين ممكن خالي يعصب ويضربج بس شجاب بسام على خالي الي كل الدنيا تحلف براسه وجان احن اب على بناته امي دكول عود يضربهن من يتعاركن كل قوته بالخاولي يضربهن ابنج يتعامل بكل ادوات البيت .
طيبه : والله حجيتي الصح وهاي نتيجه تربيته ودلاله خيه كافي راح تموتين الحركه طلعت من كلبج.
جمانه : طلعت بالطرمه كعدت وملاك بحضني سوده عليه خشمها كله مجرح ومشخط بله شنو ذنبها هل طفله ومرت ايامنه واتعس ايام تمر بحياتي يمكن بس من انام احس مرتاحه لان نهاري كله مشاكل بسام وعصبيته وضربه للجهال عود يحرك كلبي لان احجي ويا وكله كافي شرب وتعالج ميريد اي احد يحجي ويا من غير من يجي واشوف ملابسه كله علامه منكر يعني ماتاب ولا بطل سوالفه ويا شباب
كل عاده اجه سكران وكال .
بسام : صبي زقنبوت بسرعه دقايق والكه الاكل جاهز .
ماعندي اي جرئه أو قوه اوكف بوجها كتله .
_ اي صار .
ورحت سويتله عشه كملت وجيت انطيته كعد ياكل كال .
بسام : والله اليوم مرتاح راحه باعي لج مو تغثيني احرك اهل اهلج سمعتييي .
هزيت راسي بخوف واني اباوع شلون ياكل .
جمانه: اي اي صار .
جر نفس وكال وهو مبتسم ابتسامه مكروها .
بسام : أي لتغثيني لان هسه ارتاحيت واجيت شلون راحه اخ تخبل اشلون واحد حلو .
يحجي ويعض شفته كشت روحي منه وردت اتقيء كال .
بسام : شلون ولد صاحبي يخبل وبقه بنفسي ولازم اتقرب منه بس الساقط ميقبل على نفسه عود صاير شريف اني هم خوش سويت ويا خليتله حبايه بالشرب وسطرته ونام من شفته غط بنوم عاد نزعته ملابسه ونمت ويا وشافني صاحبي الثاني كال اني هم اريد كتله لا هذا بس اليه ماكو كال ليش مو اني الحلو مالتك ليش رحت ويا وعفتني اليوم كتله ميخالف حبيبي هذا عجبني وميقبل ينطي نفسه وكل ممنوع مرغوب واني محد يكلي لا ابد تعرفين جمانه شنو يعني الحلو مالتي يعني بس اليه يبقه اني اتقرب اله ومينطي نفسه الغيري اشكد احب قربهم لان متعود عليهم من صغري .
جمانه: لزمت بطني حسيتها مغصتني من العبان نفس
وجسمي كله يرجف دخيلك ربي خلصني هل مره اريد الخلاص منك لان اعرف محد راح يصدكني وحتى لو ازعل واحجي يرجعوني واني الممنونه
استمر بكلامه وكال .
بسام : بس ها جمانه اني ماخلي احد يتقرب اليه ابد ماقبل ، اني عندي اكثر من واحد هواي حلوين عندي اصرف عليهم وارتاح وياهم متشوفين اني ما احب اتقرب الج لان متكفي بالشباب مالتي وصراحه اني هم احب الشباب اكثر من النساء بس عادي جمانه موووو تضوجين .
جمانه : هو يحجي واني كل حيلي يرجف من كلامه وتلعب نفسي منه وبنفس اكثر واكثر وبنفس الوقت مصدومه من كلامه كمت رحت ركضت اتقياء لان متحملت كلامه كعدت بجيت بالحمام وصرت اعصر
بوجهي اريد استوعب الكاله صح جنت أشك بس محاجيلي شي تاخرت بالحمام اجه ورايه عود خايف عليه ضرب الباب كل قوته وصاح .
_ فضيها ليش طولتيييي .
فزيت من الخوف كتله، ها ، كال .
بسام : شنو نمتي خو مانمتي .
_ فتحت الباب كال .
_ شكو اشبيج
_ لا مابيه شي .
طلعت وهو راح نام بفراشه واني رحت بحجه اغسل مواعين رجعت لكيته غاط بنوم ويشخر وصوته شخرته كافي يثبتلي نام جريت النفس من شفته نايم ورحت على عمتي وطيبه وحجيت الهم كلشي وعمتي كل عاده كالت .
ام بسام: لالالا سكران كلامه مو صح شبيج انتِ .
جمانه : ليش مو صح عمه كلامه صح لان كل تصرفاته تثبت كلامه صحيح واني كل ماغسل ملابسه اشوف بعيني يعني ابنج صح يتقرب الشباب .
نكرت عمتي وحاولت تغير الموضوع ورحت
بفراشي اريد تاخذ عيني نوم ماكو ليش هيج
يصير ويايه ليش يارب المن الوم والمن احجي
واني احجي ويا نفسي وافكر كعدت نور كالت .
_ ماما عطشانه .
_ اي ماما هسه اجيبلج ماي .
رحت امشي للمطبخ واني اسمع طيبه تهمس بصوت ناصي.
طيبه : يمه كافي دافعين الابنج كافي مو من جان مراهق قبل زواجه واني احجيلج عليه يجيب شاب ويا ويطبون بالاستقبال هو وياهم ويقفل الباب واني يحصرني اكعد بالمطبخ .
ام بسام: قابل شيسوون .
طيبه : يمه يلعبون ختيلان هو ابنج هذا دربه من صغره ورحتي شلتي خطيت جمانه وجهاله ويا وميتوب ابنج ابشرج وبعد ويسوي الانكس من هذا .
ام بسام : كافي ولج شمدريني اني كلت بلكي يتوب هو العنده وحده مثل جمانه وجمالها هم يدور عليها
شو احلى ابنيه اخذتله جنها لعابه شيريد بعد اجيبله.
طيبه : اي خطيه والله ضحكتيني يا لعابه يمه ابنج يحب الشباب ميحب لعابات.
ام بسام: كافي ولجچ سدي حلكج اني كل هذا
واكول ماصدك لان ماشيفه منه شي .
{ جمانه }
ااااخ يااهلي ضيعوني ودمرو حياتي صار الليل هو اماني الي احتمي بي من مصايب بسام والبجي صار اعز صديق الي صار صديق روحي الي ماكدر انام اذا ماتغرك المخده من دموعي ومر شريط حياتي كدامي لاهوه حلم واصحه منه بقه كابوس كاتم على انفاسي وصلت بيه مرحله صرت ماعندي اي مشاعر انوثيه ابد ولا احس نفسي مره صرت مجرده من الاحساس والعاطفه وتقبلت عيوب بسام كلها بس حتى ابقه يم جهالي واشوفهم يكبرون كدامي خوفي عليهم منه
اكثر من خوفي على نفسي ما اكدر افرط بيهم واعوفهم مرات احس اني كاعده بيت بسام خدامه بس انضف واطبخ الهم ومرات اكول لا المهم احمي جهالي منه ومن وحشيته الي على اتفه الاسباب يضربهم او يعاقبهم تنازلت عن كل حقوقي واكتفيت باطفالي وبس .
كاعدين كل احنه اجه بسام طب وبايده جايب علاكه شرب راح ضمه بالكنتور وره اشويه اندكت الباب
طلع ورجع طلب اخذ الشرب طلعه الهم وطب بيده افلوس ومبتسم واني وعمتي وحده تباوع بوجه الثانيه .
بسام : اشبيجن تباوعن ولج .
جمانه : هاي شنو بعت الهم شرب .
بسام : شعليج انتِ لتدخلين لا افلش وجهج .
ام بسام : بسام منيلك فلوس وشنو بعت شرب احجي بسام .
بسام : اي صديقي نصحني وكلي جيب واحنه نشتري منك ليش نروح ونتعب واني هم ماكدر اشتغل هيج اريح اليه اجيب شرب وابيع بالبيت .
ام بسام : عززززااااا ابعينك بسام شنو بعد الي ماسويته بحياتك ولك والله كلهن حويتهن وسفطتهن بجيبك .
بسام : اهوووو كافي لغوه واسكتي لتلغين زايد احسلج .
جمانه : اني بعد ما ابقه راح اعوف البيت الك وارتاح.
بسام : بعد احسن هذا الباب يفوت جمل قابل ميفوتج انتِ ست جمانه لتباوعين هيج لا افكس عيونج حيوانه .
جمانه : شبيك بسام شبييييك فهمني .
بسام : بعد انتِ هم الغي سمعينه صوتج .
جمانه : لا ماحجي اكثر من الي حجته عمتي بسام بس اكلك كلمه وحده خاف ربك بلي داسوي بينه وبجهالك كافي بعد انت طغيت هواي .
بسام : لتكفريني .
جمانه : صار يكفر كفران يهز العرش من ورا وكفت خايفه صاح.
بسام : ماريد اعتراض ومالج دخل انتِ بيه لا احرك ابوج وامج بس تحجين كلمه أشك حلكج ميعجبج طز بيج وخلي احد يجيني من اهلج يحجي لو يكول وربج ماخسر غير سجينه واحطها بكلب اخوج صالح واعرف شلون احرك كلبكم عليه واولهم انتِ .
جمانه : ليش هيج تحجي بسام .
بسام : سدكي حلكج احسلج واذا سمعت حاجيه كلمه وكايله ابيع بالبيت شرب والله ماخسر غير رمانه بيت اهلج وافجرهم كلهم عود خلي يفيدج النك مالج.
صار يحجي ويصيح وشال الطبله ركعها بالجام وطشره بالكاع واني ماعرفت شرد عليه من الي سمعته خفت منه حيل بسام كل شي يطلع منه لا يعرف الله ولا عنده كلب عديم الاحساس بقيت على كعدتي الحد ما طيبه كالت .
طيبه : جمانه جمانه شبيج صافنه كومي خيه شبيدج انتِ قابل متكليلي .
جمانه : فزيت من صفنتي عبالك صحتني من حلم كلتلها .
_ هااا أي ... أي .. راح اكوم الم الكزاز .
كمت سحلت خيباتي ودست على جروحي ونضفت المكان كله ومرت الايام وصار موعد روحتي الاهلي
و بسام ميقبل اروح كل ماكله يطلع عذر اثاري يخاف احجي الاهلي على سوالفه صار المغرب
وهو واكف بالباب وشباب يمه واجه صالح كال .
صالح : ها جمانه شو ماكو مختفيه ماجيتي كلت اجي اشوفج .
جمانه : اي مو جانت ملاك مريضه وماكدرت اجي .
صالح : هاا خطيه ... لعد شنو هاي الشباب ابابكم اكفين شو من طبيت شفتهم ينطون افلوس البسام شكو .
ام بسام: لا عمه ماكو شي هذوله رفجانه مو تعرف بسام .
اندكت الباب حيل وعله الصوت طلعنه كلنه وطلع صالح وكفت وره الباب اني وطيبه سمعت المختار
كال .
_ ميصير هيج ام بسام عيب انتِ جارت العمر من
ال 85 نازله يمنه ماعندج اذيه على احد بس ابنج كل شويه مشاكل وشباب يطبون ابيته وتعاليل وسهر وضحك والجيران شكت منكم وسكتنه بس مال ابنج يسوي بيته بار مال شرب ويبيع لا مانقبلها عيب هل حجي والله اروح ابلغ عليه الشرطه وتعرفون ممنوع هل تصرف .
ام بسام: يااا عزااا ..العزاني .
وكف بسام صاح.
بسام : منو كلك اني ابيع شرب بربي بالقران مابيع الكلك جذاب ابن جذاب .
_ عمي محد كلي شفتك بعيني بسام لطلعها من طورها واني حذرتك هل مره الخاطر امك تره هل مره متعرف شيطلع مني .
راح الرجال عصبي وصالح بس يسمع وساكت وعمتي وجها صار اصفر طبو و صالح كال .
صالح : شنو بسام تبيع شرب ابيتك معقوله ؟
بسام : لا يمعود ماكو شي هذا بكيفه يحجي جذب .
صالح : وشنو مصلحته يجذب وهو يكلك بعينه شايفك ؟
بسام : جذب اني اكلك لو فاهم غلط مره صديقي انطاني قوطيه بالباب واني رجعتها اله وكتله ماريد رجعلي افلوسي الله وكيلك هاي هيه تعال اكعد نسولف اشونهم اهلك لعد زين من اجيت اخذ جمانه وياك تريد تجيكم خطيه واني صار يومين ماكدرت اجيبها .
جمانه : طرت من الفرح من هيج كال رحت اركض بدلت للجهال وطلعت ويا صالح وبالطريق حجه صالح كال .
صالح : جمانه الي حجا الرجال صح يبيع شرب بسام .
جمانه : هااا لا لا جذب ماكو هيج شي .
صالح : زين ليش وشنو مصلحته الرجال يجذب .
جمانه : مادري يجوز مثل ماكال بسام فاهم غلط .
اني ماحجيت الصالح لان اعرف صالح بس يقهر نفسه وميكدر يسوي شي كله بيد ابويه وامي وهم بنفس الوقت اخاف عليه من بسام اخاف يحجي ويا كلمه ومن يسكر يذكر ويروح يضربه سجينه و هو كل نهاره حاطها بجيبه وصلنه البيت اهلي واني طايره فرح وشفت اهلي وكعدت يم كواكب اسولف الوحيده الي ارتاح اسولف وياها هيه كواكب واول مره ابات يم اهلي وبسام مادك عليه ابد ولا سال وصار ثاني يوم وبقيت للعصر وداني صالح واني متعجبه شعجب بسام مخابر بس بكلبي كلت اكيد ملتهي يبيع ومخبوص وفعلا جان ملتهي
وعدت الأيام
استمر يبيع شرب بسام والباب من يصير المغرب يوكفون سره عليه صار الليل كل معتاد كمل الشرب ونام والجهال نايمين كاعدين اني وطيبه وعمتي انباوع على التلفزيون وهم نحجي براحتنه لان بسام صار ميطلع من البيت من كام يبيع شرب لحضات
مرت وما حسينه غير اله و الباب انشلع وطبو علينه شرطه بيهم بل 5 فوك روسنه كلنه عطنه وخفنه خوف مو طبيعي عمتي صاحت .
ام بسام: اسم الله يمه شنو انتو .
_ حجيه ابنج يبيع شرب وعدنه أمر القاء القبض عليه .
احنه وكفنه بمكان واحد خنسنه وهم طبو عليه
واحد منهم صاح .
_ هاي نايم المدللل حبيب ماما .
راح شال دولكه ماي فرغه على راسه وشحطه اني من شحطه حسيت على روحي وفزيت ركضت
لبست ازار الصلاة لان جنت لابس دشداشه نص ردن وشعري طالع يارب دخيلك صرنه فرجه الامه محمد من وره بسام اخذو يفرو بالبيت يدورون على الشرب اخر شي حتى المجمده فتحوها وفرغو ابطالت الماء كله عبالهم البطاله بيها شرب اخر شي كالو .
_ اكو بلاغ عليكم كالو تبيع شرب بيتك والطرف مشتكي عليك بس مالكينه شي عندك ونعتذر منك.
طيبه من شافت هيج كامت تصيح .
طيبه : اي والي سويتو بينه منوووو يعوضه
و الهبطه والباب الشلعتو اشلون منو يسوي .
ردو عليها واحد منهم وكال .
_ انه.....انه اسوي على كيفج اختي يله شباب شكلو الباب بسرعه .
وفعلا راحو سوو الباب واحنه مصدومين واحد يباوع بوجه الثاني وبسام ولا همه شي راح رجع كمل نومته واني وعمتي وطيبه ماجانه نوم من الخوف حمدت ربي الجهال نايمين ومرت الايام وبسام نفس وضعه كل الناس تتغير للاحسن اله بسام لا يتغير ولا ابد بالعكس بسام يزيد ميقل وصلت بي مرحله كام يضم الشرب بمكانات متخطر على البال ابد بس علمود يبقه يبيع براحته .
اجيت فرشت السجاده وكفت اصلي المغرب وماحس الباب نفتحت همزين كملت الصلاة بعدني ماشايله المصلايه واشوف الشرطه طبت فوك روسنه الشرطي كال .
_ اول مره اشوف واحد يصلي منا واحد يشرب منا.
ووانطا البسام كف على وجه قوي وكلهم انتشرو بالبيت فتشو البيت وكالو.
_ خاف عبالك قبل فتره اجينه ومالكينه شي هسه هم رجع انعاد البلاغ عليك وهاي الجيه اجتي بوقتها .
راحو دورو وصدك لكو كارتونه شرب طلعوها من جوه ضربو واخذو حافي وحنه بس ساكتين ونباوع شبعنه من الهبطات مال بسام كل يوم مداهمه
كعدت عمتي تبجي واني وطيبه انسكت بيها وكعدت نور تبجي مفزوعه .
جمانه : ليش البجي يروحي هسه يرجع بابا .
_ ماما ليش ضربو بابا واخذو .
_ لتخافين ماما هسه يرجعو .
بكلبي اكلها شفتهمتي من ابوج سوده عليه شالو هم ويه همي و هوه حتى كلمه حلوه ميسمعهم ابد ماكو ودوم قاسي وياهم ويضربهم على اتفه الاسباب سكتت نور وصبيت عشه العمتي لان عدها علاج
_ يله عمه تعشي واذكري ربج لتنسين عندج سكر ليروح يرتفع احمدي ربج بلكي يتوب بسام ويبطل يبيع .
سكتت عمتي خطيه شتريد تحجي وره يومين اجه ايهم سامع ابسام واجه يفهم منه السالفه وحجتله عمتي وبقه ساكت وكاللها .
أيهم : الله كريم أن شاء الله يطلع ميبقى بس لازم ياخذ جزاته.
ام بسام: يعني يطلعو.
أيهم : أي اكيد يطلعو.
بعدها كام وكف ترخص وكال .
أيهم : يله راح اروح يمه اني حتى اشوفه بيا سجن واوديله عشه وانتو اي شي تحتاجو اني موجود
اعتبريني ابنج و دكي عليه .
ام بسام : متقصر وليدي بس اني هم ماقبل انت اتودي عشه يوميه مر عليه باجر واني انطيك.
أيهم : صدك تحجين بله موعيب هيج تكولين هو عشه يمه شمودي اني .
ام بسام: لا ميخالف يمه عيني متقصر .
أيهم : تره هنه 3 ايام واروح للدوام يعني مو على طول اودي ولتنسين بسام اخويه .
ام بسام: الله يحفضك وليدي
{جمانه }
اني اسمع وكالعاده ما احجي أي شي
بكلبي كتله منين اخوك ولا اكو اي شبه بينكم ولا عبالك اخوان لا بالخلقه ولا الاخلاق الحمدلله ياربي .
أيهم : ها ام نور خويه لديرين بال واني موجود .
جمانه : الله يسلمك الله كريم تفرج ان شاءلله .
أيهم : معتازه شي للبيت للجهال .
جمانه : تسلم ابو ديما متقصر اخويه انت .
بعدها سلم وراح وره 3ايام هم اجه بالليل سلم وكعد
وكال .
أيهم : يمه راح اروح باجر الصبح للدوام وصيت واحد صديق اليه بس كليله اني من طرف ايهم وانطي العشه يودي اله .
ام بسام: اي يمه متقصر رحمه الله على امك .
بعدها راح وبعد كم يوم اجه صالح اخويه وعرف
بسام بالسجن وتفاجاء ورحت ويا يم اهلي بتت ليله ورجعت بس اهلي ماتفاجو من سجن بسام عدهم عادي تعلمو عليه رجعت ثاني يوم عمتي كاعده كالت.
ام بسام : لازم نخابر بيت عمتج ام حميد لازم نلكه حل البسام وياخذو يمهم حتى لو نستأجر بيت ونشيل يمهم اني قابله بس يتوب ويبطل .
جمانه : اخ يا عمه مو اشكد ردنه منج نشيل ماقتنعتي اله وصلتي المرحله محد يكدر عليه بعد .
خابرنا على بيت خالتي وكالو البيت موجود بس يقبل بسام احنه نجي ناخده ،
وبعد مرور شهر كاعدين كل احنه مقهورين
طلعت عمتي كعدت بالباب ضايجه و اجه صالح
كال .
صالح : عمه اسمعي بس لتخبصين روحج ولتخافين .
ام بسام: احجي ابني شكو ؟
صالح : اكو واحد اعرفه اجاني وكلي بسام جايته نوبه الصرع بالسجن وكايلين خلي يجي احد يتكفله ويطلعو .
ام بسام : يااا يمه وليدي وهسه شلونه فدوه اروحلك صالح عمه شسوي دبرني .
صالح : عمه يصير انتِ تكفلي لان عندج راتب
يعني تكدرين تتكفلي وطلعي .
ام بسام: اي اي عمه باجر الصبح اروح اني وياك فدوه تدري بيه مااعرف كلشي .
صالح : اي ميخالف بعيني .
جمانه : كوه نمنه الليل وثاني يوم راحت عمتي الصبح هيه وصالح وتكفلت بسام وكايليلها روحي واحنه انطلعه وصدك للعصر طلعو اجه بس شنو شكله حيلللل تعبلنه لدرجه وجها صاير نوميه وتعبان
كوه يحجي ومرضه زايد عليه ، يون من وجع جسمه جان ميحس بالوجع لان كل النهار يشرب وجسمه خدران فميحس بوجع حجينه ويا وكلنالها على بيت خالتي وهوه ساكت ميرد اخر شي عمتي كالت .
ام بسام: شوف بسام راح اخابر بيت عمتك يجون ياخذوك يمهم و احنه هم انشيل يمهم كلنه ما ابقه بعد هنا دقيقه اني .
رد بصوت تعبان وكوه يحجي .
بسام : بكيفج يمه الي يعجبج سوي اني اريد انام تعبان ونعسان .
ام بسام : روح يمه ارتاح ، وانتِ كومي طيبه دكي على عادل بسرعه واحجيله .
راحت طيبه حجت ويا عادل وكاللها ميخالف باجر يمكم وصدك ثاني يوم اجوي الولد واخذونه كل احنه يمهم لاكين بيت ومستأجري ، بس عمتي بقت وحدها بالبيت ورحنه لكينه البيت حيل نضيف ومرتب وكعدنه بي وهو يروح ويجي عليهم وره 3 ايام كال .
بسام : جمانه اريد اروح اشوف امي ماتخر عليكم .
جمانه : روح الله وياك.
راح ورجع المغرب وجايب شرب ويا وكعد يشرب بالليل لمن سكر ونسطر ونام وره يومين هم راح وعافنه وهل مره خابر وكال
" ماكدر اجي راح ابقه يم امي جمانه انتِ وطيبه روحو على بيت عمتي ام حميد باتو يمهم وقفلو البيت "
و صدك رحنه بتنه ابيت خالتي واني وطيبه
متكابلات ونحجي على تصرفات بسام ، عمتي من شافته كل يوم رايح وجاي لمت كل غراض البيت وحتى الكناتير فكتهن وتانكيات الماي كلها ولكت مستاجر اجرت البيت واجتي يمنه انجبر بسام
يجي يمنه بس كل هذا وهم مفاد ويا بشي من شاف عمتي يمنه امن علينه ورجع هو يطلع ويروح المنطقتنه ورجع لسوالفه ، وهيه كعدت تلوم روحه على تصرف بسام اجه حميد وعادل علينه وكالو .
حميد : شلون يعني كلولي ويا بسام والله عمي ماكو هيج بشر ابد .
عادل : يعني جبنا وكعدنا واجرتو بيت ومولد وهسه هوه جابكم ورجع .
حجت عمتي بحركه كلب .
ام بسام: يمه حميد فدوه ما عندك. عرف هنا
بالشرطه .
حميد : ليش ام بسام كولي .
ام بسام : اريد من يجي بالليل اجيبه علينه للبيت ادري بي راح يجيب شرب اريد منك ادزهم عليه يخوفو بلكي يتوب .
حميد : ادلللي بس والله ميتوب ابنج لو مو شرطه.
ام بسام: ميخالف يمه انت دزهم بالكت الله يتوب.
راحو الولد واحنه قفلنه البوب وراهم وصدك ثاني يوم اجه بسام وجايب شرب ويا ومن صار اليل كعد وحط الشرب وكعد يشرب اندكت الباب قوي طلعت عمتي وطبو بيهم 5رياجيل بملابس عسكريه جرو
بسام بالغرفه الثانيه وقفلو الباب عليه وضاربو
واني وطيبه واكفات نرجف من الخوف ركضت لبست عباتي وكدت طارق اخذته ورحت على بيت خالتي اكللهم صوت بسام يجيب التايه يمكن راح يموتو وصلت وكلت لحكو راح يموتووووو
