رواية سيرة القدر الفصل السادس عشر بقلم فجر المساري
سراب مر على زواجي 6 اشهر وكل شهر يمر جنت
لانقهر لان اريد طفل صح فهودي مالي عليه حياتي
واحسه ابني بس جنت اريد اطفال…
وفد يوم سميته اليوم الاسود بحياتي بعد مكلت
الدنيا ضحكتلي رجعت بجتني…
بهاليوم الاسود طلع الحجي ابو لمياء وبعدها
مارجع للبيت… .
اجه حسن وجان مو على بعضه مخبوص وسال على
الحجية مو من عوايده يجي هالوكت وكال متصلين
بي من المعمل يكول ابولمياء بالمستشفى واجه
ياخذ الحجية امينة اني تخبلت توسلت بيهم اروح وياهم حسن مقبل بس الحجية كالتله
خلي تروح يمه هذا رجلها صعدت واخذت عبايتي
نزلت ركض طلعنه حتى فهد عفته على اخواته
وصلنه للمستشفى دخلنه حسن راح
سال موظف الاستعلامات وكال موجود وصلنه
سال حسن الدكتور كال البقية بحياتكم اهنا اني
انصدمت ورجليه متعيني كعدت بالكاع كمت ادك
وابجي والطم على حظي الفكر…
كاالوا صايرة عركة بالمعمل واحد من العمال غالط
على ابو لمياء ومتعاركين وضاربه بالحديده على
راسه ومهزوم والعمال ناقلي للمستشفى بس مع
الاسف مكدروا الاطباء يسووله اي شي لان عندة
ضغط وسكر وماات اني اتخبلت وملخت روحي
اني والبنات واجوي اخواته وكرايبة وصار التشييع
والدفن… اووووف ياربي رجعت وحيدة من جديد
بقيت مصدومه ممصدكة الحجي ماات بلحظة
راح من عندي الصبح اتريك وبدل ويبوس بفهودي
كلي مشتهي دولمة سويلي وطلع حبيتة لان
ماشفت منه الا كل الخير والاحترام والتقدير
والامان والاستقرار وخلصت الفاتحة 3 ايام
الحجية امينة بقت يمنه وحسن يمر علينه كل يوم
هوه عنده بيت وحده وكاعده وياه الحجية…
ومرت الايام وزاد حزني وقل اكلي وكمت مااكل
تمرضت معدتي كامت توجعني وادوخ لحت عليه الحجية واخذتني لدكتوره وحللت وطلعت
حامل شهرين مفرحت زاد قهري، ياربي هم مثلي
راح يجي لدنيا يتيم الاب لا اعتراض على حكمك
خالتي اجتي من يوم الفاتحة بقت يمي عبالهم
راح اروح واتركهم بعد ماتوفئ ابو لمياء
البنات يبجون وميريدوني اروح ..واعوفهم…
جنت فوك بغرفتي واجتي جمانه خاله الحجيه
تصيحج بغرفتها كتلها جايه…
نزلت ورحت لغرفت الحجية دكيت الباب كالتلي
فوتي كعدت كالت عندي موضوع وياج كتلها ايييي
يمه كولي كالت ندري راح تعوفينا وتروحين كتلها
لا ..انتم اهلي وماعندي غيركم واني حامل ماراح
اعوفكم راح ابقى هنا ويه البنات وحالي من حالهم
فرحوا وبقيت عايشة وياهم…
سبحان الله من تاخرت بالحمل الحجي كلي مانريد
هسه اطفال خلي لمياء تكمل السادس يله نسوي
طفل علمود ماتعب بشغل البيت وحدي ويساعدوني
سبحان الله رزقني من عنده طفل…
وخالتي رجعت لبيتها… ولزمت عده بعد وفات
الحجي ب 15 يوم واخو الحجي حسن جان
ميدخل للبيت يبقى بالحديقة من يجيب الحجية
هي تطلعله جان هو يسوك للبيت وماقصر ويانه ابد
جنت اني اكتب بورقة الاشياء والغراض المحتاجيها
وانطيها للحجية جان خطية حسن يجيبها النه
وسمعت من بنات اخو عاف سوالفه ويه البنات
يكولون صاير يصلي ويصوم وكلش متغيير
سبحان مغير الاحوال… اني من دخلت للبيت مشفت
منه الا الخير ..
والحمل كلش تعبني وتهدد بالاسقاط وبقيت فتره
نايمه على ظهري واخذ علاج مثبات ومقويات
كالت الدكتوره بالشهر التاسع اتسويلي عمليه
قيصرية خفت…
كمت ابجي طول الليل ليش هيج ياربي شنوو
ذنبـه الطفل يعيش مثلي يتيم بدون اب…وام
اخاف اموت… وبيوم كعدت حتى اصلي صلاه
الفجر حسيت بوجع يروح ويرجع عبالي مغص
متت خوف بعدهه زاد الوجع متحملت كمت اصيح
واعيط وخطية البنات كعدوا على صوتي واجوي
ركض شافوني اتوجع…
لمياء شبيج خاله… راح اموت واني اصيح كتلها
يمكن ولاده راح تصير عندي خابري الحجية
لمياء اسمعت صوت خاله سراب طلعت شفتها
داتتوجع كتلها شبيج كالت خابري ع الحجيه رحت
ركض لغرفتي وخابرت ع عمي حسن وكتله خاله
عدها ولاده يمكن كال جاي…
خطيه البنات خابروا ع عمهم واجه هو والحجية
اخذوني للمستشفى وطول الطريق واني ابجي من
الوجع موتتني كلت راح امـوت وكتلهم عفية
خاف يصير عليه شي ديرو بالكم على ابني،
مااريده يعيش مثلي يـتيم وصلنه للمستشفى واني
مااكدر اكوم جابولي عربانه كعدت بيها واصيح
هما خطبة احتاروا ويركضون بيه
والبنات بقوا بالبيت ويه فهودي فحصتني الدكتوره
كالت عملية ودخلوني
لغرفه العمليات الى ان خلوا الاوكسجين وفقدت الوعي وكعدت شفت نفسي بالغرفه ويمي الحجية
كاالت الحمد لله ع السلامه…
اجاج ولد وجابوا اليه واخذه عمه حسن واذن
باذنه واني ابجي وهما يبجون جانوا يتمنون الحجي
ابو لمياء يكون موجود سموا بـكر بقيت بالمستشفى
يومين اجتي خالتي عليه وكالت اخذها ويايه
للبيت اسبوعين ترتاح…
رحت ويه خالتي وحبيبتي فهودي يغار من اخو
اخذته ويايه لان متعود عليه…
اجه ياسر وبناته واخته فضة يباركولي ع النونو
جانوا جايبين هدية لنونو سيت ملابس مال اطفال
لون ازرك حلووو…
كلي سراب عندي موضوع وياج وياريت سمعيني بس وحدنه كتله احجي ياسر ماكو احد غريب
اختك وخالتي اححي شنووو الموضوع كول…
كلي اريد اتزوجج اني اتفاجات بس بشرط كتله
شنووو شرطك استاذ ياسر كلي انتي بعدج زغيرة
وحلوه وبدل الطفل تسويين عشـرة وهذا الطفل
انطي لاهله يربوا واني وياج نتزوج كتله انت مخبل
تحجي من كل عقلك اكووو واحد يعـوف ابـنه
البـزونه متعوف اولادها تريدني اني اعوف ابني
وعلـمودك لـو ابقى طـول عمـري بـلا زواج ماتخلى
عن ابني كام وكف ويصيح ويعيط ايييي انتي
تريدين تعيشين خـدامة بيـتهم شنووو انتـي
متفهمين متحسين يردوووج خدامه… افتهمي
كتله اييي خدامة بـس مااتـرك ابـني…
بهالاثناء فات حسن ولمياء والحجية امينة وسمعوا
حجي ياسر كلتله الحجية ليش يـمه تحجي عليها
خدامه هاي ام بكـر الغالية وابنه ميروح للغريب
وهي راح تبقي يمـنا لان جايين ليوم نخطبها لحسن
سراب… اني من سمعت هيج انصدمت… 😲
عززززة اني اتزوج حـسن معقولة… 😱
كتلها لا عمـه مااكـدر اتـزوج حسن ولا اكـدر اصير
زوجـته… بهالاثناء صاح ياسر شفتي اجوي ياخذوج
ويريدوج تصيرين خدامه…
حـسن عاط بي وصار حجي بيناتهم وصارت
مشكلة اني ماتحملت وكمت اصـيح كـافي…
ارحموني شبيكم مااريد اتزوج اييي واحد منكم
ارتاحيتوا…
اذا ماسكتوا تـرا والله اخذ ابـني واهج منكم ..
ومن مشاكلكم ..وانت ياسر كتلك مااريدك ماريدك
انتظرتك 6 سنوات وكسـرتني ولا اعترفت بيه
ورحت حبيت وتزوجت وصارت عندك بنات…
وجاي هسه تكلي اريدج شنووو… اني لعبـة
بايدك وجاي هسه تكلي اريدج لا انت متريدني
علمود اخدم بناتك بعد ماست ندى عافتك وراحت
حسن انت اعزك واعتبرك اخوية وبعدك بعز
شبابك والف وحده تتمناك لاتاخذك عواطفك
بعيد وتتزوجني علمود ابن اخوك هذا هم ابنكم
واني راح اربي وحدي وباي وقت تعالوا وشوفوا
هذا حـقكم ماامنعكم مـنه بس فكرة الزواج
انسـوها مـسستحيل اتـزوج… فهمتوا…
طلعوا واني طكيت بجـي ليش هيج ياربي اضـل
بالقهر والتعب والمشاكل شوكت ارتاح حضنتني
خالتي
