رواية عشقتة حتي اذلني الفصل السابع عشر بقلم نوران
❤ خطوبة
-----------------
سارة
تفاجأت بأم علي وبنتها وهمه ببيتنا وتخطبني لعلي اصلا الموضوع مو خطوبة كانت زيارة عادية جدا وهي كاعدة ويه امي وابويه واني دخلت سلمت واريد اطلع وفرحت بجيتها لان امه واحبها لمحبته بس هي بقت تسولف وياي وتسألني عن دراستي وشكد بقالي واكمل وبالاخير التفت لامي وابويه وطلبتني لعلي ابويه شفته اتردد ويكلها فرق العمر هواي وهي تقنع بي وضلت تلح اني هنا بين المصدومة والفرحانه زين ليش ما كال ليش ما لمح الي بشي
ابويه ضل حاير ما يكدر يردها ولا ينطيها امل لاسباب عدة اولها فرق العمر ونهوة مصعب واخيرها يخاف لا اني ارفضه وافشلهم وكال الها الجواب ترجعه امي الها
ومر يومين وسألوني ووافقت مباشرة وامي تضحك عليه تكول ما صدكتي وهوهذا اللي صار من فرحتي اريد اصعد للسما
وما كملت هالفرحه اجاني خبر من اخواتي مصعب متخبل وما سكت واجا وراها لبيتنا وصارت هوسه لان اني رفضت ووالدي رفض وجدي وكف ويه مصعب ويريدوني مثل اخواتي بس حتى اخواتي كدروا يتأقلمون لان يحبون ازواجهم اني اكرهه لمصعب ولو اموت احسن ما اتزوجه بقيت ايام ابجي شلون بهذا النذل الا اطلع قهري بي يلا يرتاح تمرضت ونمت بالفراش من قهري الاكل عفته والمشكلة علي ما صدك لا سأل ولا اعترض على النهوة وعرفت هو ما عنده علم بالخطوبة وامه خاطبتني اله زاد قهري اضعاف بس والله ما اسكت لو اعرف اذبحه لمصعب وكفت وجان جسمي يرجف كله اكل ماكو وفوكاها المرض اللي هد حيلي لبست بسرعه ونزلت اروح لبيت جدي
تلكتني امي رادت تمنعني ما كدرت طلعت وبوجهي الهم دخلت للبيت استقبلوني خواتي من الباب يهدون بيه بس اني جنت مو بس عصبيه ومقهورة احس جسمي كله يرجف شفت جدي ووكفت كدامه وبديت اعاتبه عاللي صار مو لان منع زواجي من علي لا ما انقهرت هو ما رايدني خلص اني هم ما اريده بس ما انغصب على مصعب الحقير
ضليت فترة طويله وبيني وبينه صار نقاش وعلت اصواتنا احس خواتي يلزموني واني ما منتبهه لنفسي لحد ما وكعت وما وعيت الا بعد فترة بغرفة مودة وخواتي يبجون وامي وياهم
اسمع صوت ابويه يصيح جوه وجدي صوته اعلى منه وهوايه كلام صار لحد ما رجع ابويه واخذنا وطلعنا من بيتهم وهنا صار الزعل قوي بين والدي وعمامي وهالمره ابويه كال الهم نطيتكم بناتي اثنين وما خلصت من زعلكم هالمره ما يهمني خواتها قبلن هي ما تريد واحنا ما نغصبها تريدون الزعل هالمره اني اكول الكم زعلان منكم مو انتو.
مرت ايام وانسد الموضوع ومصعب الحقير راح خطب يريد يتزوج وعناد بيه اني واهلي راح يبقون يلحون بمسألة النهوة وما يقبلون اتزوج لو مصعب لو ماكو والامر عليه علي يكدر يخلصني لان النهوة ما توكع عليه هو هم من العمام بس هو ببساطة انسحب وما رجع مره ثانيه ولا حاول واني مصعب لو يبقى بس هو ما اقبل بيه
مرت فترة سكتنا بس القلوب شالت والزعل طول حددوا موعد عرس مصعب واجانا خضير يعزم ابويه وامي طبعا ازواج خواتي ما صارت اي مشاكل بينا وبينهم وامهم تجي تشوف ريم بس جدي زعلان بقىراحوا الكل للعرس واني بقيت وحدي بالبيت شكد حاولت افهم علي ليش ما حاول ويه اهلي مره ثانيه ما عرفت السبب
اختنكت وطلعت للبستان ادري هسه هي فارغه لان الكل ملتهين بعرس مصعب رحت وبوجهي للنهر كانت بمحاذاته اشجار عاليه استندت للجذع وكعدت ومديت رجليه بعمري ما مسويتها وكاعده عالتراب حتى بطفولتي ممنوع لازم احافظ على ملابسي وعلى شكلي صرت اجمع تراب والعب بي بأيديه مثل طفل صغير واضحك يمكن تخبلت اكيد عقلي انشخط والله حاسه بروحي تخبلت كثر ما تغيرت قناعاتي وحتى اسلوبي وطريقة كلامي ويه الناس لحظات وجفلت من الصوت اللي صارله الظاهر فترة يراقبني
-ها هم كولي مو لعب مال زعاطيط
كمت بسرعه ونفضت ملابسي
-علي من شوكت انت هنا
-من زمان من اول حفنة تراب
-هالمره اني بكاع جدي ما غلطانه مو صح؟؟؟؟
-اي انت بكاع جدج واني هم
-وشجابك هنا اقصد شعجب ما رايح للعرس
-سارة عندي سؤال واحد وصارلي هوايه اجي هنا اريد اسأله الج وانت ماكو
-اني
-اي انت
استغربت من تصرفه وكلامه
-اي تفضل
-سارة انت جنت تدرين بامي اجتي وخطبتج الي قبل فترة وانلغى الموضوع
-ادري بيها وادري انت ما رايدني وانلغى
-تعرفين ليش لغيته
-النهوة
-ما توكع علي اني من عمامج بس مصعب كال انت وياه تحبون ومتواعدين بزواج واني انسحبت
-وليش ما سألت استفسرت
-وعن شنو اسأل وانت وهو شفتكم بالكليه سويه ما محتاج سؤال كتلج هاي المسائل عدنا هنا ما تمشي هيج
-وشتريد هسه انت جاي دا ترزلني وتلومني لان ابن عمي اجاني للكليه لو لان ما عاجبتك وامك جايه بدون ما تكول الك وخطبتني وهمزين خلصت مني عمي والله ما مسويتلك شي اني ولا اعرفك ليش هالعداوة خلصتني من الموت اشكرك وسويتلي معروف ما انساه بس مو معناتها تضل تلوم وترزل بيه لان حاولت انتحر وما متت يا ريتني متت وارتاحيت
-مو عداوة ولا تدعين على نفسج ما اقبلها
-ما ادري شتسميها عالعموم من رخصتك تعبانه اريد اروح وما صار شي خطوبة انلغت ما يحتاج تبرر الي
-اوكفي وين ما كملت بعدني
زفرت نفسي بنفاذ صبر والتفتت اله اسلوبه وكلامه مستفز واني ما الي واهس اسمع لنفسي مو لشخص مثله
-وكفت كمل كلامك لان اريد ارجع وما حلوة وكفتنا هنا
حسيته ارتبك لان جاوبته بنفس اسلوبه
-يلا روحي خلص الكلام بيناتنا
استغربت من تصرفاته هذا مو طبيعي شنو هالتناقض اللي عنده شنو يلزك يريد يسولف شنو يطردني بهاي الطريقه اني هم عفته ومشيت قبل لا اسويله مصيبه وترجعلي الشخطة اللي دا احسها صايرة بعقلي واطلع سواديني عليهمشيت وبصدري نار ليش كل ما نلتقي ننتهي برزاله ويزعلني وهم فوكاها قلبي الغبي هو يرزل وهذا يدك قوي ومستمتع عبالك تغذية مو رزالة والله لو القلوب تتبدل جنت خلصت منه اللي مفشلني
رجعت للبيت خايبه وامالي تحت الصفر ورجعوا اهلي من العرس متراضين بينهم ومنتهيه كل المشاكل ولا كأن اكو انسانه تدمرت من وره هالزعل والرضا تضايقت واختنكت بس شفت والدي مرتاح وامي هم لان المشاكل انتهت اخيرا وحتى النهوة ملغيه وجدي لخاطر اهلي لغاها صح تحررت من قيودهم بس القيد اللي بقلبي صار اقوى وما راح اكدر احب مره ثانيه واني شبعت ضيم
رجعت ادرس وذبيت نفسي بكتبي وهملت كل شي احبه وبيوم كنت راجعه من كليتي تعبانه وضايجه تلكتني ريم بضحكه
-سارة تدرين منو اجانا اليوم
-منو
-بيبي ام علي
-واني شعليه
-لج خبله جايه تخطبج لخالي وعمو انطاهم موافقة وحددوا موعد مشية زلم وعقد
-شنوو منو كال الكم اني موافقه
-ساره شبيج وشنو هالعصبيه مو انت وافقتي اول مره
دموعي جرت قلبي فرح وعقلي خايف واني مذعورة ما اريد اتورط بي واحبه ورايدته مشاعر كل وحدة بشكل وكل فكرة تضرب الثانيه صرت اروح وارد واتهسترت هذا شبيه يريد يخبلني شمسويتله وليش يلعب بيه وباعصابي
مرت الايام تركض واني بغرفتي حابسه نفسي اتفقوا نطلع نشتري الذهب قبل العقد ما ردت اروح وامي ضلت تحجي وتكلي انت شبيج تخبلتي علينا ما تريدين كولي ما رايده لا تضلين تتمنعين امي هالمره اجا العريس على مرامها وفرحت بي مستوى اجتماعي وشخصيه قوية كل الي رادته لبنتها اجا بعلي كانت تدفعني دفع اكمل زواجي منه واني جنت كل ما اتذكر اسلوبه يرجع الخوف اضعاف عندي معقولة ياخذني حتى يذلني بس ما سويت شي واستاهل منه يكرهني
طلعنا كلنا اني وامي وريم وهو وامه الطريق كله اني ساكته وعيني ما رفعتها ولا شفته واشترينا كل شي واني بعيدة عنهم وحتى رأي ما نطيت بشي وريم هي اللي كانت تختار
كملنا وبطريق رجوعنا للبيت امه عزمتنا على غداهم اني اول اللي اعترضوا وامي سكتتني بكرصتها لصفحتي وريم كالت محد بالبيت وامه ضلت تلح وهو ساكت ما يعلق ولا يحجي وبدون ما ياخذ بكلامنا ولا اصلا كأن احد اعترض اخذنا لبيتهم نزلوا واني ضليت بالسيارة ما اريد انزل امي تأشرلي براسها واني ضايجه وواضح اعتراضي ما حسيت الا الباب من جهتي انفتح وانجريت من ايدي ونزلت غصب
-يلا خاله هاي نزلتها فوتوا جوه هسه تجي وراكم
اباوع الكل دخلوا واني واكفه يمه ردت امشي جر ايدي من زندي حسيته انخلع رجعني كدامه
-وبعدين ويه تصرفات الاطفال هاي ما تكبرين عاد
طكت دمعتي واني بعمري ما باجيه كدام احد باصعب مواقفي واني قويه ودمعتي عنيدة
-اريد امي
-هههههه لا والله لج انت شنو يوم وره يوم اصدك اكثر انت طفلة امج شراح تسويلج يا حلوة
اول مره يتغزل هذا هم يعرف اثاري بس حتى غزله ناشف اني حلوة يعني عدلت حجابي ومسحت دمعتي وادعيت القوة رغم ما مبين عليه
-اقصد اريد اروح وراهم ما ترهم نضل هنا
-لا هذيج المره كلتي ما ترهم وصدك جانت ما ترهم بس هسه اني وفيت بوعدي وكتلج روحي ماكو كلام بيناتنا هسه صار وقت الكلام واني اريد اسمعج وتسمعيني هاي خطبتج وصرتي بأسمي رسمي ويومين نعقد العقدين كدام الله وعباده تصيرين حلالي حتى تعرفين مو كل الزلم سويه واني ما احجي اني انفذ عرفتي هسه شلون اني من احب هذا دربي ما الي غيره
اختبصت ما اعرف شسوي افرح اعيط لو ابجي واخيرا يكول احبج واخيرا سمعتها صح هم وياها رزاله بس المهم سمعتها يخرب بيتك من حالك حتى وانت رومانس تنشف دمي
دخلت لبيتهم واول مره ادخله ما فرحت بشي ولا ركزت رغم كبره وانبهار امي بي اصلا جنت بغير عالم بعيد ويه هذا اللي يوصلني للجنون وبكلمه يردلي عقلي اباوعله وهالمره النضرة لحبيب جانت ريم كاعده يمه وكل شويه يشاقيها يكلها خلصتي اكلنا انت وابنج وهذا شكد ياكل تورطنا وعزمناكم وكل شويه يخطفلي نضرة تاخذ من روحي اخجل وانزل عيني وهو يبقى صافن اووف من عيونه اللي راح تجيب اجلي
