رواية سيرة القدر الفصل التاسع عشر بقلم فجر المساري
سراب مشت ايامنه عاديه. وتمرضت كلش ومعدتي
اذتني شنوو اكله اتقئ اخذني حسن لدكتوره
وكلتلي سوي تحاليل سويت وطلعت حامل
فرحت وحسن هم فرح ومرت الايام…
وبيوم جنت كاعده وفاتحه تلفزيون اتابع الاخبار
سمعت المذيعه تنقل خبر عن عملية ارهابيه من
قبل جرذان داعـش على موقع الرطبه وجرحى
وقتل عدد من الضباط والجنود العراقيين ونقل
الجرحى لرمادي اني انصدمت جان دووام حسن
بالرطبه اتخبلت صعدت اخذت الموبايل واني
روحي وجسمي ترجف ودكيت عليه ودكيت
ماكووو يطلعلي مغلق نزلت ركض على الحجية
والبنات وكتلهم حسن ميجاوب عليه يطلعلي مغلق
بس لا صار عليه شي ..
الحجيه اسم الله عليه ان شاء الله ماكووو شي
وضلينا بحاله صدمه وندك ماكو مغلق وللمغرب
دك تلفوني… حسن الووو وينك صوت رجال
كالوا مجروح وبالمستشفى الفلاني والمشكله
احنه جنه بعيدين عنه يعني منطقتنه بعيده عن
مركز المدينة اول يوم مكدرنه نرووحله بقيت للصبح
منايمه جافاني النووم طار من عيني يمكن غفيت
ساعه بعد صلاه الفجر…
لصبح رحنه اني ولمياء واخذنا تكسي الحجية
رادت تروح وهي مريضه خفنه لا تتخربط علينه
بالطريق بلكوه قنعتها تبقئ…
وصلنه للمستشفى وفتنه وسالنه موظف الاستعلامات حسن خليل كلولي موجود بالردهه
وبالممر شفنه الشهداء يخلوهم بالصناديق
شنووو هالوضعيه…
واني ابجي وادعي ربي الطف بينه ماعدنه غيره
اني وهالايتام ربي احفظه والطف بحالي
فتت وسوده عليه شفته نايم مصدكت ودموعي
تنزل ومتصوب بجتفه وبوجهه جروح ومعلكيله
مغذي رحت ذبيت روحي عليه واصيح حـسن
واني دموعي تنزل اكعد فدوه ارووحلك 😭
لا ترروح وتعوفنا الله يخليك… وجان لمياء تصيح
عمووو حبيبي شصاير بيك انت مثل الورده هيج
يصير بيك وبقينه نبجي اني وياهه وفتح عينه
وخزرني اني ولمياء وكام يصيح علينه ويحجي
شجابجن هناا وشلون اجيتن وكال اني زين
رووحووو وممنوع وحده منجن تجي لهناا
مو عيب شكوول للناس… وبهالاثناء جان يفوت
مازن وسلم علينه وكال اختي…
لاحد يجي هنا يومين ويطلع واني بيدي اجيبه
للبيت وطلعنه وطلع ورانه وكال لا يضل بالكم عليه
اني موووجود وكال هذا رقمي سراب لمياء
سجلي الرقم اني تلفوني نسيته بالبيت… واخذنه تكسي…
ورجعنه اني ولمياء للبيت وطمنه الحجية كنالها
يومين ويطلع ويمه صديقه ..
وبقينا نضحك على نفسنا شلون استقبلنا دك رزايل
فديته…
سراب واني اكول عبالي هسه مثل الافلام الهنديه
يكلي كلمه رومانسيه …
لمياء… ههههه ولج سراب اتخبلتي…
لليل صحت لمياء كتلها اتصلي على مازن… دكت
مره فتح خط ونساله عن حسن وصحته وخطيه
حركنه عليه التلفون حرك كل ساعتين نتصل عليه
وجنا نخاف من حسن ونترزل وننطي التلفون
للحجية 😁علمود لايحجي علينه وثالث يوم لصبح
مازن هو اتصل علينه وكال هو وحسن بالطريق
جايين فدووووه حبيبي صعدت غسلت وبدلت
لبست كلابيه لون ازرك وتعطرت مخليت مكياج
خفت يرزلني كدام اهله وحضرنا الصاله
فرشناها وخلينا بيها سرير لحسن حتي ياخذ
راحته وحظرنا الغده ..
سويت تشريب لحم وبرياني ودجاج وزلاطه
اني بالمطبخ سمعت صوت سياره باوعت من شباك
شفت حسن دخل للبيت يمه حبيبي ولف ايده
خطيه ويمشي علي العكازه لان رجله هم مضروبه
وفات مازن وياه واثنين جنود تلكتهم الحجيه
بالهلاهل والجكليت واني ولمياء جنه واكفين
يمها وهو يخزر بينه واحنه فتنه للمطبخ ركض
ودخلوا للهول…
لمياء… ولج سراب اليوم يكسر العجازه علينه
صاير اعصاب
فاتت رباب حييل شمودجن واكفات هناك
لمياء انجبي معليج… سكتنه
اجتي الحجية كالت حضروا الغده وصبينه الغده
وفرشنه سفره بالاستقبال… صبينه الغده وحضرنا
صينيه االفواكه والحلويات وصاحتلهم ام حسن
وراحوا يتغدون وحضرنا صينيه الجاي سمعت
الحجية صاحت بنات وين الجاي صاار ..
سراب ..وجان البس عبايه واخذت صينيه الجاي
وفتت سلمت عليهم وتشكرت منهم وخليت الصينيه
واشوف حسن صار اعصاب لو بيده يكوم ويضربني
بالعكازه طلعت ركض… شافتني لمياء شبيج
ولج هذا عمج عيونه كامت تجدح ليوم اصعد
فوك واقفل الغرفه عليه ومااطلع اذا يشوفني
اليوم راح يموتني ورا مكملنه غده وغسلنه المواعين
وكملنا تنظيف لمطبخ وسمعناهم سلموا وراحوا ..
وسمعت صوووت حـسن صااح سسراب جان
مثل الاعصار وينكم تعالوااا…
لمياء ..جاك الموت ياتارك الصلاه ..
رباب موكتلج صلي قبل لا تموتين… خبال
رجنه وفتنه لصاله وكال عند حساب وياكم واحنه
وحده تباوع على الثانية واستلمنا رزايل وغلط،
واني متحملت كمت ابجي وكتله هذا فوك خوفي
عليك هيج تحجي واني واسفه وكتله شتريد
تسوي سوي بس اني هم الي حق عليك…
اني خفت عليك لو انت بمكاني جان هم اتصرفت
مثلي واكثر… سكتت وكال ياالله طلعوا،…
اخذت الجهال وصعدت تعبت اريد ارتاح 3 ايام
واني منايمه زين بالي يمه وخايفه عليه وهسه
يرزلني صعدت غسلت لجهال وبدلتلهم ونيمتهم
ونمت كعدت ونزلت جوه ماكو احد البنات بغرفهم
يمكن نايمات رحت على حسن شفته نايم كعدت
يمه واني من شفته هيج متحملت ودموعي نزلت
تذكرت من شفته مضروب بالمستشفى ياربي
اشكرك رجعته الي سالم غانم… واسمعه يكول
وتالي اليوم شلون ماراح انام وارتاح راح ضلين
تبجين سسكتت وكتله اسفه…
وكال هالمره بالسماح ..المره الجايه استعمل وياج
اقسى عقوبة .. كتله حاظر متنعاد…
اووووف واني اتذكرت اول ليله الي وياه من
اتزوجنه خلاني اوقع علي ورقه ..
كتله هاي شنووو… كال هاي ورقه بيها مكتوب انتي
موافقه اتزوج موه ثانيه…
اشوكت ميشوف وحده تعجبه وبنت بنوت…
وخلاني اوقع عليها بدون اعتراض مني لان هذا
جان شرط من شروط خلته يوافق علي زواج مني
ويوميه اموووت لا يروح يتزوج عليه ويتركني
جان مجبور يتزوجني علمود اولاد اخوو
واني اوافق علمود نفس السبب ولان ماعندي احد
وين اروح… واني قبلها متزوجه مرتين…
وعندي طفل وافقت…
كتله حسن اني اصعد انام فوك يم الجهال ولمياء
يمك اذا تحتاج شي .. صااح بيه وكال لا خلي
الجهال ينامون يم لمياء وانتي تجين هنا ..
لان احتاج ارووح للحمام واريد اغسل .. ميخالف
كمت حضرت اله الحمام وملابسه والمنشفه
واخذته للحمام دخلته وكعدته على كرسي لان رجله
وايده وغسلتله بقه بس بالداخليات وكلي يكدر
يبدل لبس ملابسه وتعطر فدووه وحته هو مريض
يخبل… ورجعته للغرفه ونام بس مجانت لهفه
والاشتياق مال كل مره هادئ وبارد حسيته يعاقبني
ببروده…
وكل يوم مازن يزور حسن… ومرت الايام وتحسنت
حاله حسن الحمد لله … وخلصت اجازته ورجع
لدوووام ورجع خوفي عليه وبقه نفس حالته
وبروده واني هم عفته رغم جنت كلش مشتاقتله
جنت التهي ويه الجهال والبيت ومرت الايام عادي
وحسن بعده بالدوام…
وبلليل جنه نايمين وسمعنا صوت رمي كلش قوي
وصـياح ..يارب سترك واجوي البنات يركضون عليه
خايفات وسمعنا جيران وصياح زاد طلعنا
نشوف شكووو شصاير ..
وكالوا داعش دخلوا لرمادي…
اني متت بدمي وحسن مموجود وبس اني والحجيه
والبنات وجهال وين نرووح وين انطي وجهي
عزززه… واحنه نبجي وجهال يبجون كلت هاهيه
انتهينه…
