رواية هو لا يشبههم الفصل التاسع عشر بقلم تبارك الوائلي
جمانه : شافه الدكتور هز رأسه باسف وكال
:- بنتي الولد منتهي يعني حتمال ساعات و يموت
جمانه : شنو دكتور فدوه كول غيرها الله يخليك
سويله شي انطي علاج انطو أي شيء.
:- انتِ متشوفي شصاير بي شتردين نسويله.
:- والله دكتور البارحه مابي شي ويحجي ويانه عادي .
:- اختي هذا محتاج انعاش تعرفين شنو انعاش .
:- لا والله مااعرف دكتور عمري كله ماداخله هيج اماكن اني .
كعدت اباوع عليه بحيرة كال .
الدكتور : الصخونه حيل قويه عنده نكعي الخاولي وخلي على رجلي .
:- اي هسه اسويله .
رحت نكعت الوصله وخليتها امسح رجلي بيها
دك صالح عليه حجيتله وكتله .
:- صالح الحكلي الدكتور يكول ساعات و يتوفه
بسام لان منتهي .
صاح صالح لالالا .. ونقفل مبايله رحت يمه وكفت اجتي دكتوره جايبه صونده تريد تخليله ادرار حاولت ويا مصارت كالت .
:- اصلن المثانه فارغه ميحتاج صونده .
وكفت تحجي الدكتوره ويا دكتور اجنبي بينهم واكفين على راسه
ومخبوصين بي واني بس عيوني تباوع شويه وصار صوت ..... وكف الجهاز الي يدك مال كلبه وهمه
نخبصو خبص جابو رجاج الكهرباء يسووله صدمات الكلبه حاولو هوايه ويا اخر شي واحد باوع بوجه الثاني كالت الدكتور .
:- ميحتاج لسوي صدمات كهربائيّة وكف كلبه
لا اله الا الله كامو يشيلون الجهزه الي عليه واني واكفه اباوع كلشي مااعرف ولا اعرف معنى الي كالو
ولا مفتهمه كل الي صار كملو و غطو وجها بالجرجف الابيض من غطو وعيت على نفسي وانتبهت عليه من غطو صحت بهيستريه .
جمانه : ليش ليش غطيته اشبي فدوه احجي شبيييي.
:- اختي اتوفه الله يرحمه .
:- شننننننو شنو اتوفه ههه لا دكتور على بختك شوفه زين فدوه هسه مابي شي جبنا يمكن جهازكم عطلان يمكن نايم .
:- اختي انتو جبتو اخر نفس منتهي الله يصبرج .
راحو وعافوني واني ماريد اصدك الصور بقيت مصدومه وحدي عمتي طلعت تشتم هوه ومحمد زوج شهد لسه مااجه رحت رفعت الغطه منه حضنته وبسته وصحت .
:- لا لا بسام اكعد فدوه كوم هسه تجي عمتي شكللها اني كوم فدوه هذا اموري يريدك بعده ماعرفك ولا صاح بسمك كوم بسام طارق شفته اشلون بجه وراك وراد يجي ويانه لا عفيه كوم .
اجت مره موجوده جانت بالغرفه وياي كالت .
:- يا يمه فدوه العينج غطي خطيه اتوفه الله يرحمه انتِ ليش وحدج محد وياج .
جمانه : لا خاله عفيه كليلهم يشوفو ماميت يجوز
بعده نايم كليلهم خاله الله يخليججججج حاجيهمممم .
:- اوي سوده عليه حبيبتي والله مات تعالي كومي ويايه واطلعي بالباب اوكفي هسه يجونج اوكفي هنا
طلعتني المره واني انحب وابجي اجه محمد شافني كال .
:- ها اشبيج جمانه شكو ليش تبجين .
جمانه : اتوفه بسام محمد شكول العمتي شكول الجهاله.
محمد : لا اله الا الله .. الله يرحمه جيبي الطفل راح يوكع منج و اكعدي شويه كافي ترجفين .
جمانه : محمد عمتي بره لتكللها خطيه .
بعدني احجي وطبت عمتي كالت .
ام بسام : ها يمه اشبيج ليش هيج تبجين شكو ؟
:- مابيه شي عمه .
:- كافي بنتي هسه تشوفين مثل كل مره ينطو علاج ويتحسن .
واكفه عمتي تواسيني واجه ولد مطلع بسام بالسديه كال .
:- ها حجيه البقيه حياتج .
ام بسام: شو مغطي وجه ابني ليش يمه .
:- توفه حجيه ابنج الله يرحمه .
ام بسام : يممممه اسم الله عليه لا تحجي هيج وين ماخذه .
:- للثلاجات حجيه كولي يا الله وترحميله
اخويه الزم الحجيه خلي نفوت .
واكفه عمتي لازمه السديه وممصدكه تحجي وترجف واني خنست بمكاني من شفت منضرها مكدرت اتحرك صاحت بهيستريه . .
ام بسام: شنو شنووووووو مات منووووو ولك المات ابني بسام مااات ..لا ... لا.. عيني ماكو هيج حجي
لا يمه يمه اسم الله عليه وحيدي هذا لا لتكول هيج لا تكووووول .
محمد : ام بسام خاله شدي حيلج الله يرحمه اتوفه بسام خطيه تعب .
ام بسام: ولك خاله محمد شتحجي انتتتتتتت
عاطت بصوت رجت كل اركان المستشفى وشكت ثوبها وكعدت تلطم ملخت نفسها اني واكفه ابجي عليمن مااعرف على عمتي على بسام على جهالي الي تيتمو بهيج عمر لو هذا الطفل كله عمره 7اشهر بعده مااعرف اسمك ولا شكلك شكله من يكبر
رغم كل اخطاء بسام بس يسمه اب والاب لو بي عيوب الدنيا كلها يبقه اب رحت على عمتي كومناها اني ومحمد ورحنه بالحديقه كعدنه ننتضر صالح اخويه جاي بالطريق لان محمد بالغ الكل بوفاة بسام كل هذا واني مامصدكه عبالك حلم مو واقع.. معقوله بسام مات والله بعدني ممستوعبه و عبالي مثل كل مره يروح للدكتور ويرجع هاي خلص 3سنوات يروح للدكتور ويرجع بس هل مره اضاهر اكله المرض ومحد حس عليه ولا هوه حس على روحه اجه صالح هو و ساره حماتي وطارق ابني وكفت ساره مصدومه وتبجي وعمتي خطيه صعد السكر عدها وفقدت متدري بنفسها شتحجي كالت .
ام بسام : يله عمه صالح خلي انجيب بسام ليش عفته وحده بعد عمتك روح جيبه.
صالح : لا عمه لازم يبقه اليوم لان مريض باجر
اجيبه الج .
:- اي عفيه ابني .
باوع صالح و كال .
صالح : لحد تبجي اسكتن شوفن عمتي خطيه فقدت لتحجن اي حجي سمعتن .
حضنت طارق وبجيت بخنكه ، اويلي عليك يمه تيتمت بعمر 6 سنوات حبيبي شكد بجيت و ردت تجي ويانه لو دري يموت ابوك جان خليتك تجي ويايه .
كعدنه بالطريق وساره تسولف جايه حماتي ليلى وزينه من اول ماسامعات بدخول بسام المستشفى والعالم كلها مكلوبه يم اهلي رجعنه وره صلاه صلاة المغرب ولكيت بيت اهلي كله عالم وهوسه وبجي
وصياح اني طبيت كوه امشي حيلي راح وراسي من البجي احسه يريد ينفجر متحملت و صرت اتقيء وتخربطت واجه عمي ابو هدى غسل وجهي وابويه قاس ضغطي وكال .
أبو صالح : صاعد ضغطها جيبو عصير انطوها .
بعدها اجت كوكب لزمتني تواسيني وكالت .
كواكب : جمانه حبيبتي اكيد انتِ ما ماكله من طلعتي لهسه خلي اسويلج لفه.
جمانه :- لا ماريد كواكب نفسي تلعب ماريد شي شويه و سمعت صوت ايهم يحجي وياهم بعصبيه وكال .
:- خلي هسه نروح بالكي نكدر انجيبه .
واجه عمي وابويه كال .
أبو صالح : بابا جمانه تكدرين تروحين ويا اخوتج
لان مينطو لو امه لو زوجته وانتِ شفتي عمتج حالها روحي انتِ بالكي صدك ينطو الكم .
ابويه يحجي واني بعالم ثاني ، راسي احسه ثكل
من شده الوجع ، رحت وياهم وكادني صالح وصعدني بسيارته ونزلنه بالطريق ابيت عمي
ابو حسان واجوي ولد عمي ويانه واجتي زوجه عمي صعدت ليوره يمي وحضنتني تبجي وصارت
تواسيني وصلنه نزلو همه حجو ويا الدكاتره واصرو يشرحون جثته لان عمره صغير وموته مفاجأة
رجعنه للبيت ساعه 1بالليل لكيت كواكب فارشه الجهالي معشيتهم ومنيمتهم بغرفه امي ولكيت عمتي وحمواتي نايمات بالصاله يم اهلي وجابتلي كواكب عشه وخطيه كعدت اسويلي لفات وتوكني واني صافنه وهيه صافنه مامصدكين ابد الي صار كله عبالك حلم اكلت شويه و جابت حبايه راس شربت كالت .
:- نامي لو ساعه يهود راسج جمانه ريحي نفسج باجر هم وراج تعب ترحين من الصبح وياهم ولازم انتِ ترحين لان راح يسالج القاضي .
جمانه : هزيت راسي مابيه حيل احجي ورحت بفراشي واني اسمع بجي اخوات بسام بصوت ناصي ونين عمتي يكطع الكلب وصالح كاعد كبال باب الغرفه يباوع عليه ويبجي رغم اشكد سوه بسام بس نحبه ومحد بينه كرها مادري لان ابن خالنه مادري احنه كلبنه طيب مادري خليت راسي وتبللت مخدتي من البواجي وماعرف شلون نمت ...كعدتني كواكب مسويه ريوك وانطتني لفه وجاي وكالت .
كواكب : يله استعجلي راح يطلع صالح .
كمت لبست الاسود وحشمت نفسي زين ورحت ركبت ويا صالح وايهم كاعد يم صالح بالصدر وصلنه يم بيت عمي خله سيارته صالح عدهم وركبنه ويا ولد عمي لان كوستر جبيره وقبطوها كلها وركبو كلهم ولد عمي اجه صالح كال .
صالح : ايهم اكعد يم ام نور اني لازم اكعد ليكدام لان ميندل المحكمه السايق راح ادلي الطريق .
جمانه : كعدت بصف الشباك وبالي يم حياتي شراح يصير بينه وجهالي شلون راح يكبرون يتامى اجه ايهم كعد يمي وكال .
أيهم : شدي حيلج ام نور عندج جهال صيري قوية تره من يشوفوج ضعيفه ينكسرون .
سكتت مكدرت احجي شي وصلنه المحكمه ونزلت وهم تاخرنه ننتضر القاضي ودخلت وكعد يسالني اشلون مات واحد ضاربه كتله لا ستاذ محد ضاربه لعد ليش تقرير المتشفى يكول مضروب بكصته صحيح هوى واكع جان السكر مرتفع عنده او وكع ونضرب .
:- زين بابا حطي ايدج عل قران وحلفي محد ضاربه ولا احد ماذي .
جمانه : حطيت ايدي على القران وقسمت للقاضي كملت و طلعت لكيت صالح وايهم واكفين بالباب كال .
صالح : ها سالوج .
:- اي وحلفت الهم .
:- يله لعد نتوكل .
ركبنه بالسياره ورحنه للطب العدلي نزلنه ودكتور صاح كال منو اخوه ومنو ابوه ايهم كله
:- اني اخوه كال تعال جوه الدكتور ايريدك طب
ايهم جوه واني وصالح و ولد عمي منتضرين سالني ابن عمي سعد كلي .
:- جمانه انتِ حاللتي واهبتي الـ بسام لازم تحاللينه وتوهبينه احنه نعرف السوه بيج مو قليل بس هوى مات بعد خطيه .
رديت اني علي وكتله .
:- ترى اني بالطريق ومجنت اعرف شراح يصير بي وحللته واهبته .
:- عفيه عليج انتِ معدله وماكو اطيب من كلبج الله يغفر ذنبه .
باوعنه من بعيد شفنه ايهم شايل بيده ليلون وكطن وطب للمستشفى واني كلشي ما اعرف بس ابوع سالت صالح وكتله .
:- هذا شله بي شايله بايده ، كال .
:- لازم ايلفونه بي.
اني بقيت ساكته وجسمي مبطل رجفه كلشي مشايفه بحياتي ولا اعرف هل سوالف اجوي شايلينه وصعدوه على السياره و رجعنه للبيت وجانت تقريباً الساعه بل وحده الضهر بـ 4/28/ 2013هل يوم هذا والتاريخ ما انسى طول عمري كل الطريق اسمعهم يحجون واني صافنه بيني وبين نفسي اكول معقوله هذا بسام الفوك السياره الميت وصلنه للبيت ولكينه الكل منتضرنه بالشارع البجي ولطم والصياح طبيت وحده من بنات عمتي حضنتني وحجت بصوت عالي مسموع وكالت .
:- جمانه ردتي تطلكين من عنده قبل ليموت بس الله طلكج طلاك البين منه .
هنا اني نزلت عليه الدموع مثل الشلال رادن اخوته ايشوفنه بس محد خلاهن اباوع عليهن اشلون ملخن نفسهن هنا وعمتي مهما كان اخوهن وحيدهن اجوي الزلم شالو الجنازه وطلعو وهنا نحكمت تقاليد عمامي النسوان متروح ويا الرجال يندفن النسوان يبقن بالبيت وكل الزلم راحت ويا بقت الفاتحه مستمره
3 ايام واني يوميه الصبح اروح البيت عمتي
وبالليل ابات يم اهلي بيوم الثالث بالليل بعد ماخلص العزه وكل عمامي والدهم اجوي يعزون عمتي وطبعاً اني كلت الزم العده ورى السابع سلمو كلهم وكالو العمتي .
:- احنى كلنه والدج وطلعو اجت تبارك بنت عمتي
ام يسر الجبيره كالت .
:- جومنه ليش مترجعين اتعيشين يم عمتج وطيبه ومابيها داعي اتعوفيهن وحدهن خطيه وهنا ايحبنج ومتعلمات عليج .
:- الله كريم ان شاء الله خير .
كملن وطلعن النسوان اجه ايهم سلم على عمتي وعلى خواته وكللهن بصوت حزين مبين التعب على أخو كال .
أيهم : اني اخوجن اي شي تحتاجنه تجني ولدكولن اخوجن مات مدامني اشم الهوه.
انهار اخته واكفه بصفه كالت .
انهار: اي شي تعتازون بس كلولي .
طيبه : متقصرون عيوني .
سلمو وطلعو وبقن بس عمتي وبناتها اجني حمواتي تلاثتهن وكالن .
:- جمانه عفيه ارجعي عيشي يم امي وطيبه وماعدهن احد غيرج تعرفين امي وطيبه اشكد ايحبونج .
:- الله كريم ان شاء بس احجي ويا اهلي واني ارجع هنا .
شلت امير ابحضني ورحت البيت اهلي رحت كبل ماعرف اشلون نمت من التعب ثاني يوم الصبح كعدت اتريكت اني وجهالي ومارحت عليهم اجه ابويه يتغدى وكعدت احجي ويا حجيتله وكتله ايريدوني ابقه يمهم وكلي .
:- بكيفج بابا اتريدن ترجعين يم عمتج ارجعي وانتِ اهنا قريبه عليه مو بعيده واذا متريدين هذا المشتمل اكعدي بي انتِ وجهالج .
جمانه: لا يابه هذا هوه راح اعيش يم عمتي ،
امي جانت كاعده ويا كواكب وكالو .
:- شترين اسوين سوي كتلهم ، هذا احسن قرار اخذته قابل افكر ازوج بعد اني مستحيل ، راح اكعد اربي جهالي او اسكت عدي ثنين رجوله امير وطارق رحت لميت ملابس جهال وغراضي وساعدتني كواكب ورحت على بيت عمتي بيناتنه بس بيتين شافتني عمتي وبناتها كلهم فرحو بجيتي ورحبوه بيه ولكيتهن منضفات كل البيت حتى الغرفه الفوك مرتباتها اليه والجهالي اجتي ساره صعدت فوك ويايه واخذت الملابس ورتبتهن اني وياها بالكنتور ونزلنه جوه اني وساره عمتي كالت .
ام بسام : يمه جمانه اني ماعدي احد بالدنيا غير انتِ وجهالج نساعد اني وياج ونربيهم .
:- ان شاء الله عمه .
زينه كالت .
:- جمانه انتِ تنامين فوك وحدج انتِ والجهال .
:- لاخيه اني اخاف انام وحدي فوك بس الغراض فوك انام جوه اني وعمتي وطيبه والجهال .
جاوبتها عمتي وكالت .
:- ولج يمه جمانه من اخذناها اتخاف وحدها تبقى بالبيت واذا تصعد اتشوف التانكي تاخذ نور وطارق وياها حماية وجنت اضحك عليها واكلها شوكت تكبرين ومتخافين بعد .
جاوبته ليلى وكلتلها .
:- يمه هيا اشكبرها وخذتيها .
ام بسام: جانت بنت 16سنه .
ليلى : وربت وياكم وانتِ هم ديري بالج عليها انت وطيبه ترى جمانه انضلمت اهواي يمنه
:- لا يمه اني شعندي غيرها هيا وجهالها
اجه يوم السابع وسوينه ثواب وعزمنه گرايبنه
الزلم ابيت ابويه والنسوان يمنه بالبيت كملت الثواب وراحو العالم وحمواتي كالو باجر نروح ونجيبكم قبل الاربعين كعدو يواسونه ويوصون عمتي عليه وعلى الجهال ...اني انطيت عهد ويا نفسي اربي جهالي واخلي كل واحد يشوفهم يتعجب بااخلاقهم ان شاءلله يارب ميخيب ضني ... وراحن البنات لبيوتهن وبقينه النسوان يجن ويرحن على عمتي واقربانه
هم واني لزمت العده ...
ومرت الايام __
وسوينه سبع جمع ثواب واجتي انهار وزوجت ايهم وكالو .
:- هاي الخميس الثواب على انهار والخميس الجاي على ايهم وانطن افلوس الثواب العمتي وراحن .
ومرت الايام
واجه يوم الاربعين واجني البنات قبل يومين وطبخن وحضرن كل شي للاربعين وعمتي اجرت سياره وراحو ويا الفجر واخذو الجهالي وياهم
بس اميڕ بقه يمي اني مارحت لان لازمه عده
رحت لبست بوشيه ورحت يم امي
قبل لا يجون حضرت الغده كملت وطبو كلهم
الجو حيل حار صيف صبيت الغده الهم تغدو
وبقن البنات يومين وراحن لبيوتهن وكامت عمتي العصر تروح يم اهلي تكعد ويه امي وتاخذ امير وياها واني ابقه اسمع قران واشتغل بالبيت وانضفه الهي نفسي ومن اكمل اكعد اقره قران وختمت القران كله البسام ومرات اضوج البس بوشيه بالليل وروح على اهلي ايهم كل فتره يدك على طيبه يجي عليهم يشوفهم من يخابره اني اروح يم اهلي ومن يروح البيته ارجع للبيت
خلصت العده مالتي 4اشهر وعشر ايام وكالت عمتي اخذج على قبر بسام ياخذنه صالح بسيارته وفعلا رحنه من الصبح اني والجهال وعمتي وطيبه نص
الطريق تخربطت وكمت اتقيء لان مامتعلمه اطلع
مكانات بعيده هاي جانت اول مره بحياتي ازور
مقبره بحياتي مشايفه قبر ، شكد خفت من منضر القبور حيل ومن اباوع مالكه لا بدايه ولا نهايه لهم يزيد خوفي كعدنه بنص المقبره باوعت الشمس والحر شلون نايم هل نومه بسام ، الله يرحمك برحمته كملنه وبالكوه جبنه عمتي ورجعنه للبيت
وبعد فتره صار العيد واجتي انهار وزوجت ايهم ونطت انهار افلوس بايدي وكالت اني ماعرف قياس بناتج هاي فلوس واشتري نور وملاك ملابس للعيد فرحوهم جهالي ميعرفون الحزن شنو رفضت اخذهم وكلتلها .
:- ليش كلفتي روحج والله ماكو داعي اني اشتريلهم
ازهار : لا جمانه هذوله اطفال اخويه معليج انتِ
عمتهم وحبيت اهديلهم شي .
زوجه ايهم كالت .
:- طارق وامير عمهم كال اني اشتريلهم من ينزل
من الدوام يجيبهن الهم .
:- تسلمون ماقصرتو ليش كلفتن نفسجن .
ام دينا : لا عيب هل حجي احنه اهل مابينه هل حجي .
ام بسام: اي والله يمه تسلمن ماقصرتن ويانه لا انتن ولا ايهم من مات بسام كل اسبوع يجيب حليب وحفاضات الامير ربي يحفظه الكم ان شاءلله ويحفض شبابه .
انهار : لا خاله غير عمهم من واجبه هذا .
بقن شويه سلمن وراحن طيبه كالت .
طيبه : والله وطلعو يعرفون الاصول خلفله عليهم من ماعافونه من دون كل اقربانه اجوي ونطو افلوس سبع جمع واثنينهم شاركو بثواب وشاركو بملابس عيدهم .
ام بسام: أي والله ايهم من اول اسبوع لوفاه بسام هوه كل اسبوع يجيب حليب وحفاضات الامير خلفله عليهم .
جمانه :- هم يحجون واني بالي وهمي كله جهالي
شلون راح اكبرهم بدون ما اخليهم بعازه احد
حسيت بهضيمه من اشوف احد ينطي الجهالي خصوصا من جمعو الفطره مال رمضان وانطوها الهم .
بعد فتره رحت اني وطيبه علمود نستلم شهاده الوفاة من الطب العدلي ..دخلنه يم الدكتور وفتح التقرير وقراه وكال .
:- انتو شتقربون لبسام .
:- اني اخته وهاي زوجته وهاي جناسينه دكتور .
:- لا ميحتاج شوفي بابا اخوج سبب وفاه اول شي عنده تشمع بالكبد وكبده خلصان من التشمع بسبب الشرب والسكر مرتفع عنده حيل والاهم من كل هذا قبل لايموت بيومين شارب حبوب هواي وهاي الحبوب من كد ماجرعتها قويه سوت عنده جلطة دماغيه حيل قويه بحيث من قوه الجلطه ادت نزف بدماغه ومالحكنه عليه ليش هيج مسوي بنفسه وهوه بعمر بعده بعمر الشباب .
الدكتور يحجي واني مادري انقهر مادري أفشل
كمل كلامه وكال .
:- التقارير تكول احتمال منتحر برضاته بهاي تصرفاته وين عنه اهله ابو اخوانه ليش هيج عايفي .
جمانه : دكتور ابو استشهد وهو بعده ماجاي للدنيا وخوان ماعنده بس واحد وشويه بعيد عليه .
:- الله يرحمه بابا ويغفر ذنبه عنده اطفال هو .
:- اي عنده 4 .
:- الله يكون بعونكم ويصبركم .
طلعنه اني وطيبه وحده تباوع بوجه الثانيه من الي سمعنا رحنه سلمنه التقرير لشيخ عمر علمود نستلم شهاده الوفاة وهم انطونه موعد رجعنه للبيت
وره كم شهر
هم انطونه موعد واخر شي بعد معاناه استلمت شهاده الوفاة وراحت امي وطيبه ويانه وسويت جنسيه ارمله وطلعت بطاقه سكن وحتى بطاقه التموينيه سويته بااسمي كل هاي وطيبه ويايه بكل مكان اروحله معافتني .. ورحنه للنفوس سوينه شهاده جنسيه للجهال وكل مكان اروحله يعرفون بيه ارمله يبقون يحجون والي يريد يساعد والي يريد يحجي والي ينطي رقمه شافو جمانه بس شكل كفر ميدرون كلبي وعقلي مغسول من كل جنس ادم. وكارهتهم كلهم لعبت نفسي من
كلشي بالحياة وحسيت الدنيا مالها طعم ابد
ومرت الايام __
والشهر وعمتي نخت ابن عمي يبيع سياره بسام جانت تعبانه حيل انباعت بمليونين وعمتي انطتنياهن وكالت بس اجيب منهن ضحيه اله انضحيله والباقي حقج انتِ وجهالج وصدك اني اخذتهن ورحت لسوك اني وطيبه واشتريت كنتور وبوفيه وجددت الفراش كله واشتريت ميز وتلفزيون للجهال فوك لان طيبه تباوع مسلسلات والجهال يحبون كارتون صعدتهم فوك يشوفون والباقي اشتريت تراجي ومحبسين كلت الذهب زينه وخزينه
للوكت اخليهن.
ومرت الايام __
وجه عيد الاضحى وجبنه الضحيه وقسمته اني وعمتي ورحت وزعتها اني وطارق وبعد فتره طلع راتب مال ارامل حيل فرحت بي على الأقل اكدر
اشيل نفسي وجهالي شويه
كاعدين عصريه واجتي جارتنه هم ارمله وكالت
:- جمانه تعالي اسجلج بجمعيه اسمها موسسه
العين بالكراده قريب سجن النساء وكالت راح يجون يسوون بحث لبيتكم ويسجلوج تقريبن 6 اشهر ويخابروج همن ويطلع اسم وتستلمين راتب شهري الاطفالج .
رحت وياها و صدك اجتي ابنيه صورت بيتنه واخذت فايل استنساخ مني للطفال وشاهده الوفاء سجلتني واخذت رقمي وكالت .. همه يتصلون بيج ...
وصدك بعد 6 اشهر اتصلو بيه ورحت ويا مجموعه مالت نساء للجمعيه واستلمت راتب وكمت اصرف على جهالي بالي يعجبهم وكل حتياجاتهم وفرتها الهم
كمت من اروح للجمعيه اشوف هواي نسوان يفكرن تفكير وصخ ماعرف شلون و مرات بالطريق اسمعهن يحجن بزواج متعه وغيره من هل حجي واكثرهن مسوياته بدون علم اهلهم واحد ... اني بالاول ماعرفت شنو معناته هل زواج بعدين وحده منهن شرحتلي الوضع كله واني بس اسمع واحس الدنيا كلها تلوثت وماكو واحد نضيف كترت نفسي على صفحة ما حبيت ادخل روحي بنقاش وياهن
بس انصدمت من حجتلي ام احمد جارتنه انو من حق المراءه هيج شغله وهيه هم متزوجة بالزواج المنقطع ومن تلتقي هيه وزوجها بالسر تكول الاهلها
اروح ازور وهيه تروح تعقد وتزوج بالسر ومحد يعرف بيها صارت تسألني .
:- ام طارق انتِ شكد عمرج .
:- ليش تسالين ام احمد .
:- هيج مجرد اسال .
جمانه : 25 سنه عمري .
ام احمد : ياااا .. عدج صغيره وبعز شبابج ليش متسوين مثلي وترحين كدام اهلج عود لزياره وهناك تزوجي ومحد يعرف بيج اشبيج يحضي شو ماشاء الله تخبلين بجمالج .
جمانه : جسمي رجف الكلامها ومن يمي خفت وكلتلها .
:- لا عيني اني ميعجبني اصلن الزواج كله مو عاد بالسر .
ام احمد : شبيج ميقصر وياج يصرف على جهالج
وعليج .
جمانه : كمت وكفت وكلتلها .
:- لا عيني تسلمين جهالي مامحتاجين احد يصرف عليهم واني ما محتاجه اي رجال بحياتي ورجاءً لتعيدين هل حجي ويايه بعد زين .
صرت عصبيه وحجيت وياها بحده كالت .
:- اي خيه شكلنه تره ماصار شي خبصتي روحج
شبيج معقده .
نرفزتني حيل عدها شغله عاديه شويه علت نبرت صوتي وكلتلها.
:- اي قابله بنفسي معقده ولا أرخص روحي لليسوه والميسوه .
درت وجهي منها وابدعت عليها و قررت بعد ماروح وياهن ابد لو اعرف اموت من الجوع .. على كلامهن الي سمعته وقرفهن ورخصهن توبه اذا اروح وياهن اني صارت عندي خوفه من اصحاب السوء من بسام وتاثيرهم على شخصيته قررت لازم ابعد نفسي عن كل شخص احسه ميعجبني ليش احط ايدي بنار واكول انجويت ومن رحنه ننتضر دورنه حتى ماكعدت يمهن كعدت وحدي بعيد عليهن لان هيه قاعت انتضار حيل جبيره وتعرفت على وحده جايبه وياها 4 اطفال واحد بيهم معوق على عربانه واحد يعني من ذوي الحتياجات الخاصه اثنينهم وبنات اصغار وحده منهن بكد مليكه اجت باوعت عليه مبتسمه وكالت .
:- خاله اكعد بصفج .
:- اي حبيبتي اكعدي
تعرفت على امها طلعت من سكنت منطقتي وعدها
5 اطفال وحالتها حيل تعبانه وسالتها .. ليش جايبه اطفالج كالت .
:- همه طلبوهم بس هل مره بعد ماجيبهم اجي وحدي .
جمانه : ايي خطيه يتبهذلون .
:- اذا تحبين اجي اني ياج مادامج نفس منطقتي اخذي رقمي ونتخابر ونجي سوه كل شهر .
جمانه : اني كل مره اجي ويا جماعه بكيه بس اتخر هواي لازم ننتضر كل البنات واكو يطلع اسمهم بعيد حيل ونتأخر .
اتفقنه نروح سوه ام معتز وام الاطفال ام علي جانن اكبر مني اثنينهن واخذن رقمي علمود نبقه نتواصل من نلتقي هنا فكرت اروح وياهن وكتلهن .
:- اذا رحت وياكم اني اخابر عليكم ، كالت ام علي .
:- الجمعيه راح تأجر كيه اليه والجهالي اعلان
اركبن ويايه ورجعن .
اني فرحت لان كرهت لمت السياره ويا جارتنه ام احمد رحت كتلها .
:- اني مارجع وياكم ام احمد راح ارجع بغير سياره .
:- يا ليش وانتِ دافعه كروه الرجعه .
:- ميخالف ماريد تسلمين
ورحت ويا ام معتز وام علي وصلوني البيتنه و العصر رحت حجيت الامي والصالح كتلهم بعد ماروح ويا ام احمد راح اروح ويا اثنين نسوان نفررات وما مانعو اهلي وصرت كل ڜهر اروح وياهن سوه ونرجع سوه حيل حبابات وارتاحيت وياهن وخلصت من نسوان الكيه وسوالفهن وبمره من روحاتنه هم كعدن بصفنه نسوان وهم حجن نفس السالفه وصرنه
نعزل نفسنه اخر شي قررنه ننطلع اكو مطعم مقابيل الجمعيه نروح انسجل الاسماء ونكعد نتريك ونشرب جاي على كيفنه بس انضيع الوقت ومن نكمل نروح نلكاهم بادين يوزعون الرواتب ننتضر نص ساعه هيج ونستلم ونرجع
استمر الوضع هيج أشهر نروح ونرجع سوه ومره
من المرات اجتني ام احمد جارتنه وكالت .
:- جمانه اكو هنا بالسوك جمعيه مسويه هم للايتام
امشي ويايه هم ينطون رواتب وملابس .
رحت مرتين وياها و صدك ستلمت مبلغ حيل قليل وملابس بس جان يفيد جهالي ورحت ثاني شهر شفت الموضف الي يوزع النه رواتب صار يمشي ورايه بكل مكان اوكف بي ..
طنشت ومرت 3 اشهر استلم اتفاجأت بطريق الرجعه ام احمد كالت .
:- عيني ام طارق شافج ابو غيث وعجبتي وكال تبقل نزوج بعقد قطعي واصرف عليها وعلى جهالها .
تخبلت من جرءتها وعود اني محذرتها متحجي ويايه هيج صرت اعصاب وكلتلها.
:- ام احمد عيب عليج هل حجي انتِ تعرفين كلش زين اني مو ثوبي هيج سوالف رجأءً ممنوع بعد تفتحين وياي هيج موضوع .
:- جمانه تره ما سويت جريمه وخبصتينه .
: لا بعد ممنوع تعيديها وحتى المساعده ماريدها
ولا اريد شي ولتجين عليه ابد على هيج شغلات
سمعتتتتي .
ام احمد : تره بعدج شابه شنو ماعندج مشاعر مامحتاجه رجال اشبيج خبصتي الدنيا تره ماكلنه شي .
عفته ورحت هاي ضايع وياها الكلام قررت احضرها
من مبايلي وما روح ابد وياها بقيت بس على جمعيه العين بس كل شهر ياخذنه جيران اهلي وعشره عمر اني وام علي وتعرفنه على وحده حيل حبابه ام رقيه اسمها وام عبدالله هم وناس معروفه ونروح ونجي سوه كل شهر وعلاقتي بيهم محدوده على كد نروح ونرجع سوه .
ومرت الايام __
حياتي عاديه عمتي رجعت فتحت محلها تبيع بي احنه لحينه عليها تلهي نفسها والضهر اقفل الباب علمود ميطلعون الجهال نوبات يرحون البيت اهلي العصر اسبحهم ومشط شعر نور ومليكه ونروح يم اهلي نبقه يمهم للمغرب ونرجع ..
.. نور طلعت بدرس لان بفاتحت ابوها محد قراها صف ثالث متحنت دور ثاني ونجحت وراحت صف رابع ابتدائي وسجلت طارق صف اول صارو يرحون سوه للمدرسه قريبه علينه وتبقه مليكه وامير يمي
ايهم ماكطع ويانه بقه كل اسبوع يجي يجيب حفاضات وحليب الامير ويجيب علاكه حلويات لجهال انهار متجي علينه اله اكو شي
طارق شاف الجهال عدهم بايسكل كام يبجي ابويه
شافه راسا راح اشتراله واحد ابويه حيل يحب اطفالي وحنين عليهم كل يوم ينطيهم مصرف ويخاف عليهم وميقبل واحد يقهرهم اني وطيبه
ناخذ الجهال ونروح مرات على بيت عمي ابو هدى ونكعد ساعه يم عمتي ونرجع ترحب ومرات نروح على هدى لان شالت من يم اهلي واجرت بعماره بصفهم اجر اسامه هو و زوجته هاجر وصار عنده ابنيه و ولد ... خطيه هدى محتاره بيهم تغسل وسبح وتمشط والي يتمرض تسهر عليه لان جانت هاجر حيل ماعدها مسئوليه ولا ام بيت ابد بس حايره بنفسها ..... هدى محرومه من الخلفه مسكينه
3 مرات اصير حامل ويموت الطفل بطنها ولكت اطفال اسامه يمها مكيفه شقهم بصف شقتها
و نزل حمودي هم وياهم بصف شقتهم وصار
عنده 2 ولد ومرات نروح انزورهم وينزلن البنات
يم هدى بشقتها يكعد ويرحبن بينه وعلاقتنه طيبه وياهن زوجه حمودي تدرس بالكليه وهم تعوف جهالها يم هدى من تروح وهدى مكيفه بيهم خطيه ولامتهم ومرات اروح على عمتي ام يسر وبنتها نازله بصفه هم حيل نحبها نكعد ونسولف ومرات تحجيلنه على زواجها قبل وتحجيلنه اشلون .
:- حبت ابن عمي سعد وهو حبها وخطبها واخوها ماقبل ينطيها وعاند واجا سعد وكله احب اختك وهيه تحبني هنا عاند بيهم ورفض يزوجهم ونطاها الابن عمها خطيه سعد من سمع عقدت وكف باب المحكمه ضرب زوجها وبالكوه فكو منه و بالاخير .
جمانه :- يا باجي هم تذكرين سعد هم بعدج تذكري وتحنين .
:- لا جمانه نسيت وحبيت جهالي بس ولج من اشوفه كبالي مادري ليش تصير غصه بكلبي مافهمها .
جمانه : ههههه ياااا باجي صدك تحجين .
:- والله العظيم اشبيج تذكرين من خالي مهند اجا ولد وسوه عزيمه شفتي من كاعد بالصاله واني جوه .
:- اسكتي باجي هاي بعيني شفتكم وهوه الوتي سمعته باذني يكول كلولها مااكلها وماكل بشر اني
ليش متطلع تتغده ويانه هههه .
ام يسر:- اي ولج صدك اذكر اني استحي اطلع واشوفه ومن حرجني خالي طلعت وهو ياكل على السفره شافني وضحك عليه اشكد خجلت اي والله ايام شبابنه .
جمانه : اي باجي وزوج سعد وراج بكم سنه .
ام يسر : جان قافل على الزواج وبعدين قبل وزوج وخلف الله يسعده هم اخذ بت خالتي مو غريبه .
جمانه : اي الله يسعده
اليوم اخذتنه السوالف اتخرنه اني وطيبه .
:- ولج كعدي جمانه منو شايفج انتِ قبل من زوجتي بسام منعج من الكل هسه كمنه نشوفج .
:- لا والله باجي نجيج انوب .
ام يسر : ها طيبه خوما زعلين من كلت بسام قبل ميخليه تطلع .
طيبه : لا باجي ليش ازعل تدرين جمانه فاطمه امير من الحليب وهاي يوميه انطلعها نفرها ولهلي علمود نضيع الوقت عليه ونسي ههههه .
ام يسر : ولج جمانه جايه عليه علمود ابنج .
:- لا والله اشتاقيت لج وتعرفين احنه اشكد انحبج من دون بنات عمتي بس انتِ عدنه علاقه بيج .
: - الله وياجن حبايبي لتكطعن عود مرو انوب .
:- ان شاءلله مع السلامه .
رجعنه اني وطيبه ومليكه وامير ويوميه الهي امير بس اريده يتعلم والحمد لله واخيرا نفطم وصارو الكل يتواصلن ويايه بالمبايل ونتخابر اني وياهن وخالتي خطيه تجينه على طول شوف كواكب
وتمرلنه قررت طيبه اجيب مبايل وشترت وصرت اسمعها كل النهار تحجي بي وتبتسم ومن اسألها .
:- طيبه ويامن تحجين .
:- ماكو هيج صديقتي اشبيج جمانه .
مرتاحيت المخابراتها واخر شي سمعتها تحجي ويا شباب بالمبايل حجيت عليها وحاولت انصحها .
:- طيبه عيب انتِ مو صغيره مواليد 78 عيب مني انصحج لان اكبر مني بس عيب وميصير هيج تصرفين .
:- وليش عيب مابيها شي الهي روحي وين اروح .
جمانه :- صدك تحجين طيبه هاي بس انتِ اسلين روحج بهل سوالف مو عيب ونور تسمعج وتتعلم .
طيبه : اهووو جمانه صدك معقده انتِ .
عفتها لان طيبه عنيده حيل ومتقتنع بالحجي
بعد فتره قررنه انشيل من المشتمل الي بصف اهلي لان صغير حيل وخانكنه ولكينه شقه حيل جبيره ونضيفه بالشارع الثاني على اهلي مو بعيد عليهم
و طيبه كالت
:- خلي ناخذ ايجار بيتنه الجبير ندفعه للشقه وهذا المشتمل هم اناجره وندفع خط المولد .
وبعد فتره نقلنه غراضنه وشلنه وقفلنه المشتمل مالتنه ورحت عزلت الشقه ورتبتها جبيره ويرادلها غراض هواي
وبعد كم يوم فرح اختي هم اجتي ادور بيت لليجار وتريد تعزل من اعيالها و اجرت بيتنه المشتمل العفنا كامت تاخذ الايجار عمتي تدفع للشقه وتدفع مولد وهيه تسوك المخضر بس للبيت واني اصرف عليه وعلى جهالي وبعد فتره تغيرت حياتي وبديت اغير .....
تعبت واني اكتب بنات قدرو تعبي لو تعرفون شلون
هل ايام تعبانه وجاي اضغط على نفسي واحاول ما أقصر بالتنزيل وياكم
