رواية اسود توب الفرح الفصل التاسع عشر بقلم خالد أسامه
ها منتصر شلونك
هله بخالد استغربت الصوت مابي رد واستقبال مثل كل مره من اخابره
خالد انت وين
ابيتي موجود تعال منتصر عليه
صدك تحجي انت يعني بالعراق
اي تعال انتظرك
جايلك مسافه الطريق
دكيت الباب .طلعلي خالد سلمت عليه ودخلنه جوه
شلونك اخبارك
اشوكت رجعت ليش ما انطيت خبر شو سكته راجع
لا والله بس تعبان حيل نفسيتي تعبانه وماردت اكلف احد
هاي شنو راجع من تركيا وتكلي نفسيتك تعبانه
لعد اني شكول من اشوف اختي اكبال عيني تمرد روحي مرد
صدك بان شلونها
شلونها مشلوله وخرسه متكدر اسوي شي وصافنه بوجهك طول الوقت
خالد . لا صدك تحجي .يعني هي هسه متحجي
اي بس تسمع
وهم متكدر تمشي الدكتور يكور صدمتها اثرت عليها وع اعصابها
خالد .احجي ويه نفسي هاي كلها ابسببي اني جلب اني حقير خربت حياه حبيبتي
والله ما تمنيتلج هالشي ياعشك كلبي
خالد وين اصفنت
لا وياك منتصر
يا وياي كلي شكتلك عالمعمل
هاااا مادري عيد
اكلك المعمل فشل مجاي نكدر نطلع انتاج
الناس كامت متنطي دهن محروك بالدين وانت ماعرف شبيك مغلس عالوضع
منتصر صدك تعبان راسي الف حسبه بي ياريت تغلق المعمل هسه لان مصافيله والله
منتصر .والديانه خالد الناس تريد فلوسها
لتخاف توصل فلوسهم يمهم
منتصر اني كايم اريد ارتاح حاس شايل الدنيا ع راسي
اخذ راحتك اني طالع
لا ابقه عالغده
دايم حبيبي اطلع هم اكمل كم شغله احسن من الكعده والصفنه
خالد .من حجالي منتصر ع وضع بان تمنيت اروح وحضنها ولمها بين ذراعي وغطيها برموشي
من حجه عنها عبالك جبل وطاح ع راسي
ماتمنيتلج هالوضع يا بنو
.........
مر اكثر من ٣ اسابيع ع وفاه الشاب واني ما واصل بيت عمي ولا شايف احد بيهم حتى منتصر صرت اتهرب منه
بس اليوم صحيت واني حلمان ابان حلم مو زين ظل بالي يمها كلت خل اروح اشوفها وريح نفسيتي بشوفتها
وصلت دكيت الباب طلعلي حسين
هله بخالد شعجب مريت بينه
هله بحسين والله مخنوك وكلت امر عليكم حتى ارتاح
خوما ضايقتكم
لا يابوي كل الهلا بيك
انت شعجب مطالع الشغلك
والله مو اخذت بان للعلاج وتونه رجعنه منه
اي وشلونها هسه
والله احسن من قبل بدت رجلها تستجيب ولو قليل بس نكول الله كريم
زين حسين اكدر اشوفها
والللللله شكلك
بس هالخدمه حسين ما انساها الك طول عمري
تعال تفضل
شلونج عمه
هله يمه شلونك انت شلون الاهل امك خواتك بنتك
كلهم زينين يبوسون راسج
تسلم وليدي
يمه خالد يريد يشوف بان
اي تعال شوفها والله حالها يصعب عالكافر
وصلت غرفتها اول الداخلين امها وبعدها حسين وبعدها اني
اول ما ادخلت الغرفتها حركت نفسها تريد تكوم او تعيط وفتحت عيونها ع وسعهن 👁👁
صراحه خفت من انفعالها
تأشر بيدها وجان تعيط وتوكف ع رجليها
امها كامت عليها وحضنتها وتبجي
حاولت تسندها
جتي عيني ع عمتي شفتها حيل فرحانه لان بتها نطقت وكامت ع حيلها
اني هم فرحت رغم الالم الي بداخلي لان فعلا حاس بتأنيب الضمير
صعبه حيل صعبه عليها اووووف ماكول غير السبب منج يابان
بان .اطلع برررررررررره اطلع جبان خسيس
اطللللللللع طلعوه
وكامت كوه تمشي وتريد تجي عليه وجان توكع
ركضت الزمت يدها
جان تنفض يدي قوي
وكالت بصوت مهزوز
لتلزمني يا قاتل يانكس
بان هاي شبيج احترمي ابن عمج جاي يشوفج ويسلم عليج
كله خل يطلع بره ماريد اشوفه او اسمع صوته حسين خلي تطلع بره
تأشر عليه وتكلي
انت قاتل انت قاتل
حسستني فعلا قاتل وهي شافتني علمود تثبت هاي الكلمه عليه
خليت وطلعت من غرفتها
بس شكلها ولا هو بان ضعفانه وجسمها صاير نحيل
وجوه عينها اسود لليل فعلا متغيره صايره تخوف
حسين .يابه امسحها بيه تره بان متهستره مو قليل بيوم عرسها ينكتل زوجها
خالد .معذور حبيبي اكيد معذوره صعبه وحده بيوم عرسها تكون ارمله
رغد .خابرتني امي وكالتلي بان رجعت تحجي ومشت خطوتين بس مو حيل
يعني يراد متابعه الها
اجيت اني ومهيمن ع بيت اهلي
دخلت ع بان بستها وحضنتها
شفتها مطلعه تلفونها وتباوع عالصور
وبصوت يرجف
رغد باوعي حبيبي بكل وكت وجهه يضوي نوره ماينطفي رغد اريده محتاجته اريده رغد 😭😭😭😭
حبيبتي ميصير هيج اضلين تأذين نفسج
رغد المن اظل عايشه اذا عمري كدامي انكتل والحقير عايش ومتهني
المن تقصدين عايش ومتهني
خالد اكو غيره
لا بان خالد شله علاقه بموت اسامه الله يرحمه
هذا قضاء وقدر
لا رغد وعيونج اسامه مات مقتول اني كلبي ميكذبني
حتى احلمت بأسامه جاي عليه وراه خالد واكف وشفت اسامه وكع واني حسيت واحد لزم ظهري وكسره
بان هذا حلم
رغد حلم بس حقيقه ولازم اخلي خالد يعترف بأن هو الكتله
ميخالف حبيبتي لتتعصبين .اذا صدك خالد اله يد بالموضوع لازم يجي عليه يوم وينفضح وينكشف
بس صدكي ما اصور موته قتل لان عرس وصار رمي من عمامه واصدقاءا كلهم
اني اكول هاي طلقه تايهه بسبب الرمي
رغد شوفي شكاتبلي اقري وتكليلي انسي وكافي الم وحزن وترديني انزع الاسود
ياثوب بعد
الالبسه ما يحله بعيون ابد
صارت حياتي سوده مثل سواد الليل الخالي من الدفه
روحي صارت شته مليانه بروده وخاليه عاطفه
اقري رغد وسمعيني شكاتب عفيه اريد احسه هو الديقره الي ويسمعني كلامه
اي راح اقره
دخيلك ياترف ماظل عــقل عـــندي
حاير شحجي منين الك ابــــــــدي
بعيونك اوصف لو بالرمـــــــــــوش
هواي اوصاف عندي خاف متكفي
بحر هنة العيون ويغرك من شــــاف
وسر العشك بيهن ربك مـــخــــــلي
ويل وجهك ينور ظلمة اللــــــــــــــيل
اظــــــــــــن حتى الكمر منك مضــوي
ومن تهمس الشفة وتلاعب الكلمات
شعر احــــــــــلى من العسل تنطي
دخيلك مرجحنا الهوى يجيب ويودي
تفاح الخدود ومرمر الوجــــــــــــنــات
ولون الشفة احمر ينطي على الوردي
مجــــــــــنون بجمـــالك اعترف والله
لان كل ما اشوفك ميظل عقل عندي
اوووف اسامه اشتاقيتلك حبيبي
رغد اباوع عليها مغمضه عيونها وتحجي وياه دمرت كلبي حتى دموعي نزلت بس سكته ماريد ادهر اعصابها اكثر وسمعها تكول اله
ااااااااااااااااخ ...يا اسامه
يانسمة شبابي ...الغربت ...
ياهو اليردها ..؟
اورسمت اجروحي الچـثيره ...
و حاير...ابيا صوره اخليها و اشدها ...
عاد ...يالچـتفت روحي ...
ابسلسله حسرات ...فدوه هدها
ونجان الك عنوان.... الي روحي ردها
بفراكك يامحبوب....صرت للموت روحي اودها
لا تذوبها ابلهيب موتتك
من كونك تودها
كون ابلحظه الي روحك تردها 😭😭😭😭😭
بنو حبيبتي كافي والله كطعتي كلبي فدوه
المات مايرجع هاي اخذ نصيبه من الدنيا
صدكي الله يحبه واخذه من عذاب الدنيا
هاج مو دشوفين بعينج شباب مثل الورود يوميه يموتون بنفجار واكو الما تلكين الهم اثر حتى مالهم كبر حتى اهلهم يجون ويزوروهم
لازم تنسين وتعيشين تره خطيه والله دا يتعذب بكبره
اقريله فاتحه ختميله قرأن احسن من لبسج للاسود
وياعمري الحزن بالكلب مو بالشكل ياعمري انتي
رغد اعرف هذا كلامج واعرف الحزن بس بالكلب
بس اني ما اكدر اتصنع وابين للناس اني مابيه شي
رغد تعرفين شنو من تفقدين حياتج وانتي ع قيد الحياة
والله اعرف وفاهمتج
هسه ماعلينه انتي هسه لازم تشدين حيلج حتى ترجعين تمشين وصوتج يرجع مثل الاول
اي ميخالف
اني يوميه راح اجي عليج حتى نتمرن ونتحسن
عفيه رغد اكدر اطلب منج طلب
اي حبيبتي طلبي
اريد اكعد وحدي عفيه محتاجه اختلي مع نفسي
اوك بس لترجعين تبجين وتتاذين فدوه
اي ميخالف
😭😭😭😭😭😭تكلي لتبجين هو اني اكدر ما انزل دمعه
وينك ياعمري بس تعال وشوف حالي من بعدك
.........
رغد بعد مرور اربع شهور ع وفاه اسامه وحاله بان
تحسنت وكامت تمشي بس بعكاسه حتى تستند عليها
ورجع صوتها .وبدت تطلع من غرفتها وتلتقي بينه وتكعد ويانه .ورغم هذا كله بس اتحس في ملامح وجها الحزن والالم
منتصر .خالد تره ميصير هالحجي انت كل مره توعدني ومسوي شي
شبيك منتصر بس تشكه
شنو اشكه .اكلك الديانه كامت تجي للبيت تريد فلوسها
منتصر بس كلي شكد ديانتك
مو ديانتي خالد هاي ديانه المعمل الفتحته انت بس المشكله مجنت انت التشتري الدهن اني الي اشتري واسجل ع اسمي
منتصر يصير خير انسدده كلها بس اصبرلي
ميخالف خالد اصبرلك
بان .ماما عفيه اريد اروح لنجف الله يخليج
شعدنه بالنجف بنتي والجو بارد
ماما اريد اروح ازور حبيبي
بان بنتي انسي لازم تشوفين حياتج
لازم تزوجين وتعيشين
كااااااافي سكتي سدي الموضوع ما ازوج ما اكون مره لحد
اني زوجه حبيبي وبس .ما اسمح الاحد يملكني غيره
بنتي
كااافي ماما .ماريد ماروح لتلحين عليه
ميخالف اشوف ابوج واخوج واذا قبلوا نروح
ماما خلي باجر عفيه حيل مخنوكه والله
الام .سويت جاي وصبيته ورحت لابو منتصر
طلبت منه نروح لنجف خطيه الزلمه ما اعترض
بقه بس منتصر والله كريم
انتهاء .اكلك عمتي تريد تحجي وياك
اي وينها امي
هسه اشوفها وين
منتصر كاعده بغرفه بان اصيحها
لا اني رايح يمهم
السلام عليكم
وعليكم السلام تعال ماما ادخل
شلونج بنو
الحمدلله احسن
ان شالله دوم حبيبتي
اي يوم انتهاء كالتلي انتي محتاجتني
لا منتصر مو امي اني الي محتاجتك
عفيه فدوه اروحلك عندي طلب ولا تردني
اي كولي بنو
اريد اروح لنجف باجر
شنو
فدوه كتلك لا ترفض
زين اله باجر خليها الاسبوع الجاي
لا منتصر والله روحي مخنوكه حيل محتاجه اروح
بس منو يوديكم
الام .من الكراج نصعد
لا يمه شلون
هسه اخابر خالد وكله باجر ما افتح المعمل واني اخذكم
يله اني اترخص
منتصر باجر نروح
ان شالله
كمت حضنته وبسته لان فرح كلبي وراح اشوف حبيبي
الووو شلونك خالد
هله منتصر
اكلك الباجر مافتح المعمل
ليش خيرك
عندي روحه لنجف اخذ الاهل
المن تاخذ
امي وبان
ليش خير
والله بان تريد تزور تحس نفسها مختنكه
اوك اني هم جاي وياكم اريد ازور وعندي موضوع اريد احجي بي وياك والوحدنه
هله بيك
بس لتكول كدام الاهل اني جاي
ليش متريدني اكول وشنو موضوعك
لا تستعجل باجر تعرفه
