رواية في ذمة الغريب الفصل العشرون بقلم كنوز
والفَرَح طَر المدينة
وانطة للناس التِريدة
ودكدك البيبان كِلهة
ومن وِصلنة نشَلَت ايدة
آخ يا حِزنَك يكلبي
جَمرة..
مضمومة بجريدة .
━━━━━━━━━ ⚖ ━━━━━━━━━
براءة :: كعدت أول وحدة بـ اهلي گبل الآذان بنص ساعة تقريبا بس بعدها الدنيا ظلمة بعدها الدنيا ظلمة گمت غسلت و شغلت قرآن
كلما اشغل القرآن ينملي البيت بطمأنينة غريبة سمعت صوت دگ م مديت راسي من الباب وشفت فطرس جاي يفلش حايط الحجرة البره سمعت من ترفة يريد يسويها مصلى
دار وجه صوبي وانا بسا غفلت الباب وگلبي يرجف.. توبة بعد اذا اطلع بليل
فزيت من نزل غفار الدرج بخطوات سريعة مستعجلة كل بايتين ينزلهم سوه.. يلبس بقمصلته وكاض نقاله بين جتفه و راسه يخابر.. مبين عليه مستعجل و قلق.
انخمش گلبي ذبيت كلشي بيدي وركضت اله انشده، والخوف يسبگ خطواتي
:: شكو غفار ليش طالع تركض خو ما قسيم بيه شي؟
أول ما اجه أبالي قسيم جي بعيد عنا هل فترة بين شغله وبين فراگ بنته وجنونه موش بعيد يسوي شي الخوف جان ينهش بيه وأنا أنتظر منه كلمة تبرد النار اللي اشتعلت بصدري
:: لا مابيه شي
جوابه مبهم جان.. خلى نقاله ع برميل النفط و وكف يغسل وجه و بلل شعره عدله بـ اصابعه وانا ورا بكل خطوة مثل ظله صرت
:: اذا قسيم مابيه شي جا وين رايح من غبشة صاير شي
اخذ نقاله و محفظته وانا اخذت شال من الحبل جان رطب من لاحتني البرودة كزبر جلدي طلعت ورا گبل لا يصعد سيارته رجع.. التفت عليه و بلهجة امر گالي
:: براءة سمعيني زين و الراح اگولن الج تطبقينه بالحرف الواحد خوش خيتي
أشرت اله ع عيوني ودموع الحيرة محبوسة بيهن متأكدة صاير شي وما يحجي
:: بهاي گبل هاي بس شكو والله قلقتني والف فكرة و فكرة اجت براسي
:: داخلين ع اهل رحمة و اخوها أزاد حالته خطرة بالعناية و حرمة ابوها متعارضة هم و لوحدهم بالمستشفى
دگيت ع صدري
:: دخيلك ربي شيردون منهم بلوهم بلوة
:: شوفي انا عايف عد رحمة نقال تروحين تسحبينه منها بدون ماتعرف واذا نشدت عنه سوي روحج ما تعرفين شي
:: اي اي هسه راح أخذه والله بس طمنه عليهم عليك الله
:: اليوم ماعندج امتحان مو ؟
:: بلا ما تكلي انا راح ابقى هنا ما اروحن لمجان ابد
حباني من راسي، جانت بوسته مثل الوداع لراحة البال..
:: ما أوصيج بعد براءة عينج عليها.
طلع وانا واكفة اتابع اثره من شافه فطرس طالع بهل ساعة ذب جاكوج التفليش من ايده وراحله يحجي وياه من الجامة النوب اخذ قمصلته جان مخليها ع سياج وصعد وياه.. راحوا
.
بقيت اعاين اثرهم وهم يختفون من امام انظاري الشارع موحش و خالي
طبيت وجدمي ثگيل،الدنيا الفجر بس السواد جان مغلف البستان دخلت بخطوات مستعجلة
انفذ الـ كالي عليه غفار رحمة نايمة والنقال حدر المخدة صاير.. مديت ايدي ع كيف أصابعي ترجف اخافن تفز وتشوفني وادخل بـ سين و جيم سحبته و ضميته ويا غراضي بالكتتور..
گعدت ع قنفة بره رجلي تهتز بتوتر دگات گلبي تسابگ عقارب الساعة ادعي الله يعدي هل محنة ع اهل رحمة و اخوها يگوم بسلامة فگد الاخوه موش هين چن يگصون قطعة من گلبك و ياخذونها
طلع جدي وياه الاذان شاف حالي وعاين بوجهي يعرفنه واحد واحد مثل الخطوط اللي ع راحة ايده
هاشم :: خيرج جدي اشوفنج قلقة و مخطوف لونج ؟
عاينت منا ومنا اتأكد ماكو احد يسمع وخاصة رحمة تگربت عليه اسولف اله وصوتي يادوب يطلع من بين سنوني
براءة :: غفار يگول داخلين ع اهل رحمة و طاگين اخوها وهسه وضعه موش زين بالعناية
طگ ايد بالآخرة بخسارة وهز راسه بأسى
:: لاحول ولا قوة الا بالله العلي العظيم الوادم طغت بعد مامش مخافة الله عدهم
طلع نقاله يخابر ع غفار ما يرد ما انتظر أكثر صد براسه الي وگال
:: حضرلي دشداشي الكحلي و عگالي جدي اصلي و امشي الهم صرنه اهل و لزوم نوگف الهم
راح يتوضى و يردد لاحول ولا قوة الا بالله العلي العظيم حضرت اله ملابسه مثل ما طلب كمل و عدل عگاله ع راسه گبل لا يطلع گتله
:: جدي عفية عود طمني من توصل ومن اخابر عليك رد موش مثل غفار تخليني اضرب اخماس بسدادس لوحدي
هز راسه اي و راح طر الصبح و الشمس نثرت دفى خيوطها ع الگاع راحن البنات للمدرسة اخذهن عمي ابو طالب نزلت سجدة بيدها أوراق رتبتهن بالتستسل و ضمتهن بالجنطة رادت تطلع وكفت بالعتبة عاگدة جبينها
سجدة :: احسنج موش ع بعضج لا تريكتي لا رحت لحديقتج مثل كل يوم الصبح شني مريضة
براءة :: اي احسن مالي خلك يمكن فلاونزة
تراجعت خطواتها الي بساع رفعت ايدها تجيس جبيني
:: ماكو حرارة بس اذا وضعج مخربط و تحسين روحج موش زينة ابقى يمج ما اروحن
:: لا روحي لشغلج اليوم محكمة بنت قسيم مو
:: اي خابرته سبگني للمحكمة ما قبل يجي لهنا
:: احجي وياه سجدة هو يسمع منج تره السوا ويا البت غلط وموش عاداتنه الغدر بالضيف ولا نخون الأمانة
:: امس الليل كله اسولف وياه گال بعد مالي غرض بيها جي صارت حرمته لغفار
:: موش جي حرمة غفار البت صدك مفترين عليها شماله مايرضه يصدك
:: هسه خل امشي راح اتأخر عليه وهناك بعد احجي وياه اريدن انفض عگله نفض اليوم اخلي هو بنفسه يحميها والله
اخذت جنطتها و راحت قسيم شغلة مأثر عليه جي يشوف المجرمين دوم ينكرون جرائمهم يظن الكل سواسية
بقيت لظهر إداري بالخبر عن رحمة مثل ماي بالصينية واخافن لا يتبدى.. كل حركة كل نفس كل حرف يطلع مني احسب حسابه لا لساني يزل جدامها وتعرف
بس هي گلبها علمها البت من كعدت الصبح متكدرة لا رضت تاكل لا تسولف نظراتها جانت تايهة جنها تدور ع شي حتى هي ماتعرفه شني چن روحها حاسة بالشر اللي يحوم ع أهلها
بس صافنة و كل شوية تبجي.. سويت لفة و كوب جاي طلعت اشوفنها لگيتها گاعدة ورا البيت بظل شجرة الزيتون، لامة رجليها لركبها و ساندة راسها عليهن
مثل الحمامة و مغطية راسها بجناحها شكلها يكسر أكبر گلب
براءة :: سويتلج ريوك خفيف ياله اگلي ولو شوية لخاطري
رفعت راسها الي هذا حالها وهي ما تعرف لو عرفت شيصير بيها دفعت الاكل برفض تهمس بنبرة مكسورة
رحمة :: گلبي مقبوض براءة والله حتى دموعي وحدها دا تنزل احس الدنيا الواسعة دا تضيق ع صدري
:: اسم الله عليج حبيبة نطلع بره للبستان هلبت الله تشمين هواي و ترتاحين
:: لا ما اريد اطلع احس روحي مربطة و مخنوگة وايدي ما تاخذ ع شي
النوب لا عنبر لا ترفة هنا يكعدن يمها يلهنه شوية. لجحت سدرة شايلة اختها و تدور بعيونها، لوحت الها بيدي اجتنه..
سدرة :: غسلت و بدلت الها و انطيتها حليب بس مدري شبيها ما تسكت بس تصرخ.
خطية هي طفلة..وتحتاج من يرعاها ينطيها حنان موش العكس اخذت الطفلة منها و گتلها
براءة :: روحي نامي ارتاحي واذا تردين عاين تلفزيون شتردين تسوين سوي انا ادير بالي عليها
بيدها كبوس لبسته لاختها تمشي إصبعها ع خدها الترف و الطفلة تبتسم
سدرة :: لا انا اريدن اربيها احبن الجهال وحتى من تكبر تصيحلي يمه هم ما اريدنها مثلي تكبر بلا حنان و لا حضن دافي يلمها
سبحان من غرس بذرة الأمومة بالانثى حتى وهي طفلة..
عاينت لرحمة رايحة بغير عالم صافنة بالفراغ وجنها تسمع صدى صياح بعيد يغزز أمانها
تكربت وخليت الطفلة بحجرها ردت أشغلها بأي طريقة
براءة :: هاي سدرة خطية تكول ما اعرف اسكتها شوفيها شبيها انا عندي شغل
ما انتظرت ردها عفتهن سوه و مشيت وكل شوية اوكف اندار عليهن متگابلات عليها و رحمة تنطي نصائح لسدرة عن العناية باختها...
بديت اكف شغل البيت طبخت المركة و نكعت تمن هم، الساعة ما تمشي، الثواني صارت دهر. مديت راسي من الشباج شفتهن ع نفس كعدتهن..
طلعت نقالي اخابر ع غفار ما يرد.. رجعت نوبة لخ ثواني و رد گتله بلهفة
براءة ::: هاا بشر شلونه وضعه ما تحسن
سكت شوية صوت ناس يمه تحجي وبعدين خف جن ابتعد عنهم
:: هسه طلعوا من العمليات جان عنده نزيف بالدماغ و منتظرين الدكتور السوا العملية اله نشوف كلامه
:: دخيلك ربي شني من طك طاكينه وهيج مسوين بحاله
:: رحمة شلونها خو ما عرفت؟
:: لا ماعرفت بس خطية من الصبح وهي متگدرة عبالك گلبها يعلمها
:: يله انا راح اسد بعد ما اوصيج عليها براءة خليها بعيونج
:: والله من غلاتك صارت بدون ما توصي حاطتها بعيوني
سديت الخط والتفتت. شگهت بخوف من حسيت احد وراي نداريت جدة جانت واگفة سمعتني و نشدت بقلق
العلوية : شنهي حبوبة ياهو بالمستشفى حتى جدج طلع من الصبح مستعجل انشدنه ما يقبل يحجي
براءة :: أزاد خطية تذكرينه الولد اللي اجه ع...
:: يا أزاد تحجين عنه براءة!!!
قطعت كلامي رحمة من نطقت وهي واكفة وراي التفتت عليها بساع عيونها تجول بوجهي تدور ملامح تنفي شوكها صوتها يترجف تتوسلين بعيونها
تتوسلني بكل ذرة بروحها انفي الي سمعته چن جوابي هو الي راح يحدد يعيش اخوها لو يموت
رحمة :: براءة ما تقصدين بكلامج أزاد اخويه مو؟ لاااا اكيد مو أخوية
ما انطتني مجال ارد هي جاوبت ع نفسها بجنون جن متخوفة من جوابي تريد تبني حاجز من الأوهام يحميها من الحقيقة
رحمة :: لا اكيد مو أزاد.. شيسوي اخويه بالمستشفى.. البارحة قبل لا انام حجيت وياه.. ضحكنة و سولفنه سوه.. لا مو هو!
كضيتها بساع من انهارت ع كاع جسمها فگد كل طاقته صارت مثل الخرگة عيونها غدت دم من البجي ودموعي نزلت وياها وأنا أحاول أچذب عليها بس حروفي طلعت تتعثر
براءة :: لا موش اخوج.. نحجي ع واحد گرابتنه رحمة عاينلي.. موش اخوج
شما حاولت اخفي عنها .. الملامح تفضح والدموع الي بعيوني جانت صك الاعتراف وهي اصلا متأكدة گلبها حاس اكو شي بس تحاول تقنع گلبها بهذا الكلام
گامت تدور بالبيت تطلع من حجرة تدخل الآخرة طلعت للحوش للحديقة جفصت بالطين من حلاة روحها ما تدري شسوي چن فرس مفزوعة واي صوت يزيد هلعها
بعد لطمت ع فخذها رافعة راسها لسما تنخى ربها
رحمة :: دخيلك ربي لا تمتحني بيه.. اخذ من عمري وايامي وانطي اخذ كلشي مني ولا تأخذه.. اخذ عمري.. عافيتي.. اخذ الضوه من عيوني ولا تأخذه
تعض بـ اديها حيل بلوعة و ندم عبالك تريد تشلع اللحم گعدت جدامها بساع كضيت اديها امنعها
براءة :: گولي يالله رحمة والله حرام الجاي تسوينه بنفسج
كضت ثوبي وهي تنحب تناشغ وتغص بدموعها
رحمة :: هذا وليدي براءة.. اني ربيته.. اول أولادي هو والله اموت لو صارله شي.. والله اموت
خوفه عليها موش محبة أخوة وبس لا غريزة امومة عاشتها وياه و الام تختلف عن الكل لو صاب ابنها شي.. صمت قبضات ايدها تدك ع صدرها
رحمة :: ولج يمه تعاليلي وينج يمه لحكيلي گلبي يوجعني
براءة :: مابيه شي رحمة والله عايش و غفار مشه اله هسه اخابرنه الج يطمنج عليه
گعدت جدة ترتكز ع عوجيتها جرت راسها لصدرها ضمتها تمسح عليها بجفوف حانية وتحجي وياها
العلوية :: ما يصلح البجي ع المعلول حبوبة گومي توضي و صلي ركعتين لربج يگومه بالسلامة الج
هزت راسها اي بطاعة بس تريد تسوي شي لاخوها گامت بخطوات مترنحة وكفت ع مغسلة بالماي البارد توضت و ركضت تريد تصلي عيونها تهمل تفتح حلگها و ترد تسده أكثر من نوبة وگالت بيأس
رحمة :: ما اعرف اصلي بعد والله حتى الفاتحة نسيتها خل اشوف اخويه بس وبعدين ابقى طول العمر اتعبد شكر لله
كامت تدور حدر فراشها ع نقال شالت الجودلية كلبتها ركضت انا طلعته الها من الكنتور أخذته بلهفة تتصل ويا ما جاوب عليها نشدته
:: غفار عليك الله عايش مو اخويه زين ؟
:: عايش والله
:: ليش نبرة صوتك باهتة و جوابك قصير گلي الصدك غفار لا تجذب عليَّه
:: والله عايش و داعتج عايش و راح يصير زين ان شاء الله و اجيبنج تشوفينه
هيهات تقتنع سدته منه ردت خابرت اخوها الجبير وهم نفس الكلام عايش.. بخير... لا تخافين... لا تجين ولا توصلين.... ماكو جواب يشفي گلبها كلمات متقطعة بس تزيد شكوكها طلعت شالها و صايتها تلبس بيهن و تحجي
رحمة :: يجذبون عليَّه كلهم حسيت والله من كعدت الصبح واني احس روحي مخنوگة عبالك بلوكة ع صدري و كابرت ع نفسي گلت ماكو شي طلع وليدي بين الحياة والموت واني هنا انام و اكعد براحة
براءة :: استهدي بالله و كعدي وضعج موش مال تطلعين والله وانا راح اكولن لغفار يفتح الج كامرة تشوفينه
:: گلبي يوجعني براءة والله لو العالم كله يگلي زين هم اصدك الا اشوفه بعيوني ياله ترتاح روحي
تمشي وانا وراها اريدن اقنعها تعدل عن قرار روحتها انفتح باب الحوش دخلت سجدة وراها قسيم مبين يعرفون بالموضوع من غفل قسيم المفتاح و سحبه ضماه بجيبة
سجدة :: ها اها توي سديت الخط جنت احجي ويا غفار گالي اخوها زين خل تبقى بالبيت وانا بس يهدا الوضع امر عليها أخذها تشوفه
چن غفار عرف خطوة رحمة القادمة بعد سدت الاتصال وياه تلبس عبايتها و تطلع لذالك وصى سجدة
رحمة :: انتوا ليش ما تفهمون عليَّه ليش تشوفوا الموضوع هين ولكم أخوية هذا و ابني الربيته بيدي فوك وجعي گلبي عليه الذنب ينهش بروحي من وراي صار بيه هيج اني السبب سودة بوجهي
سجدة :: شعليج انتِ حبيبتي أفعالهم كلها خارجة عن القانون حتى لو متهمة الهم حگ يدخلون تفتيش بس مالهم حگ يأذون اهلج وكل هذا راح يتحاسبون عليه
براءة :: والله لو مجرم ما ركضوا ورا هيج گدرتهم ع فقيبعو البريئ
عافتنه وراحت للباب تتماطل وياها تريد تفتحها وتدگ عليها صاح عليها قسيم
قسيم :: ووووووين امشي ردي لحجرتج تره راجع من المحكمة ومن الله رايدلي واحد اطلع حرگتي بيه هسه لا تنعادين وياي وتصير من نصيبج
رحمة :: ما الك كلام وياي انت فهمت و انطيني المفتاح لا اصيح والم الناس عليك والله
قسيم :: مشهودتلج خاتون بس هم ما تطلعين
من شافها فرفحت و سجدة همست اله مغتاظة و تعتاتبه
سجدة :: شحجينه گبل شوية قسيم هو هذا وعدك اليه
مسح ع وجه بضيج تگرب يمها وهل النوبة حجه وياها بنبرة هادئة يفهمها بدون استفزار
قسيم :: الواء ماخذ نسخة من ملف قضيتج والجماعة شموا خبر راح يدخل بيها هل گاموا يخططون حتى يكضونج گبل لا يكض ثغرة عليهم
رحمة :: خل يخططون شيردون يسون هل يسون حتى لو يعدموني المهم اشوف اخويه واطمن عليه
قسيم :: انتِ ليش دماغج ثگيل ليش ما تفهمني الحجي ارطن انكليزي الج هلبت تفهمين لو شلون يا لغة تفهمينا
رحمة :: خل يصير شي بواحد من أهلك وعود انت اكعد هذيج الساعة
صفن عليها ثواني وهي تعاين اله بخزرة عود ما يخايفة منك تنهد يأس منها صد ع سجدة گالها
قسيم :: سجدة فهميها الگتلج عليه بالسيارة تره خلگي كلش گصير انا
تگربت عليها سجدة تحاول وياها
سجدة :: شوفي حبيبة سووا هيج حتى من تسمعين اخوج بالمستشفى تروحين اله واكيد هسه همه مراقبين العنايه بس توصلين يلقون القبض عليج
:: بس اشوفه بعيوني واطمن عليه واني اسلم نفسي الهم والله بس خلوني اروح اله
:: رحمة حبيبتي جاي تفهميني الواء بعده ما مشتغل قضيتج ولا نقطة بصالحج لو كضوج هسه تروحين بالرجلين
:: لعد ابقى هنا وأهلي يرحون بالرجلين
جر قسيم سجدة عنها يبعدها متعصب كلش
قسيم :: ميلي عنها سجدة هاي ما تعرفين شلون راسها يابس انا كعدت وياها واعرف دماغها يشتغل تك واحد
بس نهى كلامه و بدون تنبيه حتى ما تاخذ موقف دفاع جراها من عبايتها للحجرة وغفل الباب عليها
رحمة :: قسيم لا تسوي هيج والله أوقع الك ع كل الوراق وامشي وياك مثل الحبابة
ما رد عليها ندار ع سجدة انطاها المفتاح و واصاها گبل لا يطلع
قسيم :: لا تغرج تره ذكية تاخذج لشط و ترحعج عطشاتة موش تستعطفج بكلامها و تفتحين الها الباب
طلع و رحمة من ورا الباب تتوسل لسجدة
رحمة :: سجدة الله والله احبج لا اتفرفحيني هيج
سكتت سجدة حتى تخليها تسكت... بقت ادك ع الباب تتوسل لحد ما ملت بقى بصوت نحيبها بسكون البيت يتردد اجن البنات من المدرسة هم عرفن السالفة ما يتحملن يشوفن وحدة تبجي
ترفة :: البت راح تموت مدري يصير بيها شي وهي مريضة
عنبر :: سجدة عليج طلعيها والله حرام عليكم فوگ ضيمها حابسينها لوحدها
مشت ترفة للباب خلت اذنها تتصنت وگالت
ترفة :: اي والله تره حتى بعد ما الها حس مدري اختنكت مدري اغمى عليها والبت أمانة شنكول لأهلها
سدرة :: يله شني نبقى تتوسل فتحوا الباب وانا احجي وياها انطيها اختي تلتهي بيها
التمن عليها كل وحدة تغوغي من جهة يقنعن أكبر راس وعلي گامت وكفت يم الباب تحجي وياها
سجدة :: رحمة تسمعيني راح افتح الج الباب نتفاهم اول وبعدين اخذج للمستشفى
سمعت دبدبة رجلين و خطوات تركض صوب الباب وگال بلهفة
رحمة :: اي والله اسوي كلشي تريدي بس طلعيني
فتح الباب الها صدك طلعت كضتها سجدة من ايدها اخذتها غسلت الها وجه و اديها فتحت شالها عدلت شعرها كعدتها ع تخم و تسولف
سجدة :: عاينلي هسه براءة اسويلج لكمة تاكلين
رحمة :: ما اريد والله ريگي علگم
سجدة :: جا ماكو روحة
رحمة :: اي اكل والله اكل
سجدة :: تاكلين حتى تاخذين علاجج وما يصير اله شي لا سامح الله و بعدها اخذج بس رجلج ع رجلي موش تغافليني تروحين منا منا لو تشردين
:: لا والله اسمع كلامج و أيدي بيدج شتكولين اسوي
ركضت بساع الغدا صاير صبيت الها صحن و خليت خضرة و لبن هم حتى تاكل و ديته الها مدت ايدها اكلت اول لكمة
ظلت تمضغ بيها و دموعها تصب تريدها تعدي بعلومها ماكو اخر شي شالت اللبن شربت و نبرة مستهضمة گالت لسجدة تأسر ع رگبتها
رحمة :: ما اگدر والله لگمة نار واگفتلي هنا
سجدة :: هاي هي لا تضغطين ع نفسج
:: ما راح تاخذيني جيف ما اكلت مو
:: لا اخذج والله بس دقيقة البس شالي و عباتي
گامت بحركات سريعة هي هم لبست شالها و البنات عبالك متحضرات كل وحدة عبايتها حدر ابطها لسنه و طلعنه للباب گبلنه
عنبر :: خطية البت گوه تمشي اخافن تطيح يصير شي حتى نساعدها
ترفة :: و اخافن صدك شرطة هناك حتى كلنا نتغشه بعبينه و نضيعهم
ندارت ع سدرة شايلة اختها و لابسة العباية رايحة صفح بعدها ما متعودة تشيل طفل مخبوصة
سجدة :: وانتِ عليمن جاية و جايبة الطفلة وياج تتبهذل
سدرة :: اخوي الدكتور بنفس المستسفى انا احجي وياه حتى يدخلونها تشوفه
هزت ايدها سجدة جابت مفاتيح سيارة جدي الثانية گبل لانطلع صاحت عنبر
عنبر :: وين جدة خل ناخذها ويانه حتى إذا حجوا علينه هناك نگلهم جدة جابتنه
ترفة :: وهم ما نأمن نخليها لوحدها وياه عمة فضيلة تكرها لجدة وعلي تروح تكعد ع گلبها اموتها و...
تحجي و عنبر تدغ بيدها و تكرص بخاصرتها حتى تسكت انتبهت علينه انا وسجدة ضمت حلگها بيدها و ركضت لسيارة ختلت
لا انا ولا سجدة اهتمينه و صدك امي و لو ما جدي يحاسبها تطشرنه كل واحد تحت نجمة طلعن البنات كلهن و طلعت لجدة
جانت يم حجية سلوى تنطيها فلوس الزرع الولد قايمين بكلشي الها بعد ابنها اخذتها و صعدت
براءة :: گتيله لغفار راح نجي
سجدةه:: حتى يجي يحبسنه كلنا بالحجرة وياها و يوكف حراس ع بيت
عنبر :: والله زين ما سوين خل هيج نروح سكتاوي وهناك نصدمه
وصلنه المستسفى سجدة طلعت كمامة من الجكمجة خلت رحمة تلبسها و نزلنه محاوطينها و نمشي بخطوات سريعة محد يدقق النظر علينا
وكفنه بجهة فارغة و اتصلت سجدة ع غفار تنطي خبر
ابتسمت من سدت النقال
براءة :: هاا شو تضحكين
سجدة :: گام يغلط بالانكليزي
دقايق واجه من بداية الممر شال ايده بحركة شتم و مسبة و سجدة تضحك اله تزيد عصبيته عاين النه يحسبنه براسه و حجه من بين أسنانه
غفار :: مگصرة لو جايبة كزار وياج بعد
سجدة :: غبينة موش ابيته لو لاگيته جا جبته وياي الك خوش عنده هوسات يربد المستسفى ربد و احنه ندخل رحمة لاخوها
طگته جدي بالعوجية ع كيف ع ايده و بلهجة امر گالت اله
العلوية :: خل البت تشوف اخوها غفار راسي ثوه من الصبح لسه تنحب
هز راسه اي تگرب من رحمة واكفة بالزاوية واحنه كلنه جدامها معطينها عن العين
غفار :: بعده بالعناية ما يخلون احد يفوت اله بس يتحسن وضعه اجيبنه وعلي
تگربت منه تكض جفه بين جفوفها رافعة راسها وتحجي وياه جي أطول منها بجثير
رحمة :: بس المحه من بعيد والله ما اتقرب..... رفع اصابعها تأسر اله ع طرف إصبعها... بس هيج شويونة اباوع اله اشوف زين اطمن وارجع
رفع جف ايدها لثمه بحنان و مسح دموعها بـ ابهامة يشرح الها الوضع
:: وعلي ثنين من الصبح لسه يفترون ع عناية وعرفتهم من الأمن بس توصلين ياخذونج رحمة اغديلج فدوة سمعي كلامي و ردي
سحبت ايدها من ايده تزيد بالبجي و بجزع گالت
:: ماطول هيج توسي يعني دا تجذب عليَّه و اخويه بيه شي بس ما تگلي
:: شوكت جذبت عليج انا
:: ذاك اليوم گتلي راح اخذج لاهلج و اخذتني للكاظم ع
:: استغفر الله رحمة بـ
قطعت كلامه بحركة محد متوقعها من ندفعت الها شبگته وتشهك
:: شوف انت مو تريدني احبك والله احبك بس خليني اشوفه
غمض عيونها حاوطها بثنين اديه وحباها من راسها ابتعدت عنه و كضت اديه تريد تقنعه
:: ما دا اجذب عليك والله ولا دا استغلك احجي صدك و النبي محمد الك خانة خاصة بگلبي احس بالأمان وياك والله.... ها راح تخليني اشوفه مو
نهت كلامها تسبل طرفها الناعس كضاها من ايدها كعدها ع كرسي جي گامت ترتجف و تجر النفس گوه بيده بطل ماي فتحه صب بجف ايده و غسل وحهه
:: ع كيفج جر نفس رحمة عاينلي
طبقت كلامه تتنفس وياه نفس قوي
:: وعلي تجرين هروش گلبي عرجها من تشهگين بس اهدي و التردينه يجرالج
شربها ماي شربت و كعدته يمها ما ترضه تهد ايده تخاف يروح و يعوفها بلا ما يحقق طلبها
:: هاي اخذت نفس و هدات وانت تحبني راح تخليني اشوفه و ابقى طول العمر اسمع كلامك هاا
:: كومي هسه نشوف النه ردهة اخلسح بيها و اشوفن عون هو يدبرها
سدرة :: اي اي شوف اخوي الدكتور صدت براسها علينا وگالت بفرح... شفتنه موش گتلجن اخوي يساعدها
البت تفتخر بـ أفعال اخوها فرحانة من تسولف عنه من تنطق لعب دكتور جدام اسمه
دخلنه حجرة فارغة ننتظر و رحمة گاعدة و رجلها تهتز بتوتر فتح الباب ورا عون ركضت اله سدرة عود تحجي وياه بس كلنه سمعنه
سدرة :: تنومست بيك جدام البنات لا تفشلني خليها تشوف اخوها
ابتسم الها و دنك حب الصغيرة هم و عقج وجه
عون :: ليش جبتيها وياج مشتسفى كلها أمراض لا تلگط عدوى وهي بعدها مناعتها صفر
غفار :: عون انا عليمن جبتك وانت عليمن واكف تخرط
عون ::: هسه عشر دقايق يتبدل الشفت وتصير هوسة ادخلها مناك من جهة الدكاترة
أخذها هو و غفار و سجدة ع اساس باب ثاني داخلي يدخلون منه الدكاترة و الممرضين بس يدخلونها منه نص ساعة اجت مبتسمة
براءة :: هاا بشري شفتي
رحمة :: اي شفته و فتح عيونه عاينلي و ابتسم هم
اجه عون وراهم هم گال الها يطمنها اكثر
عون :: هسه جنت احجي وياه الدكتور السوا العملية الا گبل لايطلع گال العملية ناحجة و النزف توقف واذا بقى لباجر وضعه مستقر يطلعونه لردهة
تشكرت منه فركت ايدها وحدة بالآخرة بتوتر و ندارت ع غفار
رحمة :: صدك عروة وين ما شفته... ابويه و رانيا هم و الصغار
:: عروة طلع يجيب علاجات من بره هسه ع جية و حرمة أبوج طلعوها للبيت اجوه بيت عمج اخذوها يمج و أبوج راح وياها يوصلها و يرد لهنا
وضح الها كلشي لا تبقى تفكر بأفكار سودة صدك اجه اخوها سلم عليها و احنه نطلع جان اخوها يخابر و غفار سمعه يريد سلاح نشده شكو مدري ع شني اتفقوا
رجعنه للبيت العصر كلش طلعت انش بالدجاج للگن عاينت ع زرع بدا يطلع توه خضار طاش ع گاع كلها منظره حلو الشمس جاي تغرب
عنت ع بالي اختي بينة جانت تحب هيج وكت تكف كل شغلها و دراستها حتى تركض لنهر جي مناك ماكو نخل تكدر تشوف الشمس من تغرب
رجعت للبيت بساع كتبت رسالة للأمام المهدي عج طويتها ع تربة و طلعت بخطوات مستعجلة زتيتها باانهر
مسحت دموعي و كمت اريدن ارجع
:: هااا علوية شنهي لسه ما تحققت امنيتج
فزيت ع صوت فطرس اعرفنه گبل لا ادير وجهي اله جي نبرة صوته تختلف.. عاينت اله و صديت ع نهري وراي وهو چن قرأ أفكاري بقى بعد خطوات عني و يسولف
:: لا تخافين الجنية ماتصيح براسي بس بليل... يسولف و دنگ يلم الفطر الطالع بصحن ... رفع راسه الي ونشد بستفسار.... ما گتيلي لسه ما تحققت امنيتج
:: ماعليك انت لاتدخل
ابتسم نهض جذعة وتكرب صوبي بقى بعيد و مد لي صحن الفطر
:: هاج موش جنتِ تحبينه حتى اذكر جانت شجرة ع جرف وهو طالع يمها اجيتي تلمينه و طحتي بالنهر وانا طلعتج و لفيتج بخاجية ابوي
بقى ماد ايده اخذته منه و خزرته عود اخوفنه ردت امشي اعترض جربي رافع اديه بستسلام بمعنى ما اذيج
:: علوية اريدن تسويلي حرز
:: حزر شني
:: اكو بت تجي يمي من انا نايم اكعد ما ألكاها و نوبات اسمع حتى صوتها تهمس براسي
:: هاي مس عاشق
:: انخوووك جا خفي ايدج سويلي حرز حتى لو ورقة تشخبطبن بيها و اشيلهنا وسام ع صدري
:: شننننني
:: شمالج كل شوية و فزيتي ما گصدت شي عودن اتبرك بيها جي انتِ علوية
:: يعني تريد اكتبلك ايات حتى بعد ما تشوفها ولا تحس بيها
:: لاااا
:: شبيك خرعتني والله گلبي اله يوم من وراك يوگف
:: اسم عليج علوية اشعلج گلبي من هروشة لو صارلج شي بس هاي البت الگتلج عليها اريدنها موش بالحلم بس اريدنه بالواقع كون تطلعلي
:: شبيك تخبلت تره تاذيك
:: لو تكطعني وذر هم اريدنها اعشكتها بعد يله خفي ايدج و كتبيلي ايات كون تصير اللي
:: عود باجر اكتبلك
عفته و مشيت بساع و اتلفلت ليوراي اعاين لا يجيني گبل لا ادخل بيتنه لجحت دخان يطلع.. عگدت جبيني مستغربة ياهو شال نار بهل وگت
توي دخلت و اشوفن امي مكومة ملابس بينة.. حواجيها و غراضها كلشي يخصها حتى العباية و تحرگ بيهن
ركضت مثل المخبلة عبالك جاي تحرك بخيتي موش بهدومها بلا وعي اطگ النار بـ اديه اريدن اطفيها طلعن البنات ع صوتي
ركضت سجدة غرفت طاسة ماي و تدير ع نار و عنبر شكلت الصوندة ترش عليها هم
طفت النار بس اشتعلت بگلبي اگلب بيهن مايعات كلهن باقي بس شال جان حدر الملابس كلها مايعة أطرافه بس
شلته اشمنه مامش ريحة لاختيه باقية بس ريحة حرگ.. دخان و نفط
براءة :: ليش هيج سويتي بشني غاتثج هدومها مثگلة عليج شايلتهن ع جتافج
فضيلة :: خل تولي عار كسرة وجهي من وراها صرت سالفة بحلوگ شمات التسوه والما تسوه تنشدني عنها و تعيرني
:: وما تعرفيني انتِ بنتج ما تعرفيني ابوي شني مربي من بنات حتى يدفعج حجي الوادم
ما اهتمت ابد تلوعت روحي وانا اشوفن اخر ذكرى منها احترك هيج چن اخر باب جنت اشوفنها منه انسد بوجهي احسن ضيعتها مرتين
گومتني رحمة تمسح الصخام ع جفوفي بشالها و جابت مرهم حطت ع الحرگ شكد الناس توصف ألم الحرگ و شكثر يوجع
انا بهل لحظة ما احسن الجويات بـ اديه لا والله چن واحد كاض عطابة و يلسع بگلبي من جوه
عنبر :: رحت لبيتنه ربع ساعة و اجيت لگيت فطرس واگف يعاين باب بيت عمي مفتوح شوية دخلت اشوفن صخام و هدوم محروگة
انشد شكو محد يرضه يحجي بس عرفت فضيلة مسوية الها دگة اجتني ترفة
ترفة :: خطية البنات تعبن من ضيم امهن خل نغسل الحوش انا وياج
عنبر :: شمالها شسوت ولج ياهو انشد يريد وجه
:: حرگت هدوم بينة ع اساس نساوين السلف مسمعاتها حجي احترك گلبها الشلنفص
:: اويلي احترگ گلبها ليش هي هم عدها گلبها احلف عليها حاطين الها صخرة
سحبت الصوندة و فتحت الماطور انا ارش و سجدة تسحب الماي بالماسحة غسلنه الحوش كله اجو الولد و سجدة
گبل لا يجون وصت ما نحجي الهم عبن تعرف راح تصير طلابة و البت رحمة تعبانة غفار بدل ملابسه بساع و صاح لسجدة
غفار :: سجدة جيبلي ام حسن بساع تلگينها بالصندوگ فوك الكنتور
صعدت سجدة بساع و رحمة تنشد ياهي ام حسن كل ظنها يحجي ع حرمة.... عاين بوجوهنه وحدة وحدة عگد جبينه
غفار :: جا براءة وين
ترفة :: تعبت خطية من الصبح گاعدة دخلت تنام
هز راسه اي نزلت سجدة شايلتها بـ ايد ولافة شريط الجيلات ع ذراعها أكثر من مرة
أخذها منه و قسيم يدخن جكاير و ينفخ الدخان من الشباك حتى لاتختنك سجدة وگال
قسيم :: ما عليه بيك انا رجل قانون ما ادخل بهل سوالف
غفار :: وياهو طلب منك فزعة انت
طلع غفار شمر الگطف من الشباج و صعد لطابق الثاني دقايق ونزل ع جتفه الساو ضحكت سجدة
سجدة : : هاا رجل القانون ع خير
:: كله من ورا تزوجها وصارت محسوبة علينا
:: اممم
:: سجدة لاتخليني اختلف عليكم و اخرطكم هسه
طلعوا كلهم اجتمعوا بالحوش اجه فطرس بيده صندوگ رمان
فطرس :: محضرهن لنعنانة و ابوي ردت اطكطكهن حدر رجليهم بس طلع واحد اسگط منهم
غفار :: توك طلعت انت عليك العين رد
فطرس :: ع بختك مولاي شني شايفني اخافن من سجن ... تره مشتهي العرك من زمان وعلي
جراح جاب سلاحة الخاص هم و آخر شخص متوقعينه يكض سلاح و يعارك ع شي بعد اخته هو عون اجه بيده التفكة
عون :: دكتور انا ومن وراكم راح اكض سلاح اليوم
طلعوا كلهم و البنات التمن ع براءة يخففن عنها حزنها عود ابتسمت الهن تكابر بس انا اعرفها گلبها ملجوم
ساعتين و رجعوا الولد فرحانين عبالك رادين من حرب رافعين العلم منتصرين كعدوا بالديوانية يسولفون و سجدة سوت النه لفات للعشه
ورا العشة رجعت لبيتنه ويا جراح عبن الفجر يلتحق طلعت ملابسه انا غاسلتهن اكوي بيهن و الكتاب يمي اراجع اشمن ريحة عطاب
عفت الاوتي و ركضت للمطبخ جنت حاطة القوري ع نار خلصان كله و محترك طفيت و رجعت لكيت دخان يطلع من حدر
الاوتي ركضت شلته انشالت وياه قطعة من البنطرون لاطشة بيه طفيته من الكهرباء اشلع بيها اريدن ارجع اخيطها لازگة عبالك طمغة
جراح :: حرگتي مو
فززني من حجه من وراي عاينت ورا أجول بعيوني ادور ع ابوي اختفى گبل لا يتحرك خطوة تجاهي صرخت
:: بوووويه الحگني
ركض صم حلگي وانا اخرمش بيه و اصرخ
:: وسم شمالج تسودتني وصوت الليل مسموع هسه شيگولون الوادم حاط اخته و يطگ بيها
:: يعني ما تريد اطگني
:: ع بنطرون اطگنج موش هاي نص هدومي محرگة من وراج يا يوم طكيتج انا
:: هم صدك بس انت من تعاينلي هيج اخافن منك
دمغني بخفة ايده و راح مدد ينام شوية كويت باقي الملابس سفطتهن بالجنطة اله و طلعت كليجة عزلت بعلاگة و خليت هم
نمت وحطيت الكتاب يم راسي كل شوية اتذكر سؤال افتح الكتاب اشوفن جوابه و ارد انامن لحد الغبشة ندهني جراح
:: انا راح امشي گومي روحي يم بيت عمي لا تظلين لوحدج
:: جا وابوي ما رجع امس
:: لا بعده بالنجف عنده محاضرات هل جم يوم يبقى هنام
گمت اتطوطح لبست عباتي وامشي ورا وهو بيده نقاله يخابر مبين ع سجدة ما ترد عليه
:: عنبر دخلي شوفي سجدة اذا كاعدة خل تطلع اريدن احجي وياها گبل لا امشي
هزيت راسي اي بس انا كلشي ما سمعت منه اسمع بس وشة گبل لا ادخل جراني من ايدي وما احس الا ماي بارد ع وجهي فزيت
:: هاي ليش والله الا اكولن لأبوي عليك اخـ
قطع كلامي من طلع جفية من جيبة مسح وجهي من الماي كضاني منقذي جتافي و نزل لمستواي يحجي
:: سمعتيني گبل شوية شحجيت
:: هاا
:: فوتي شوفي سجدة اذا گاعدة گلها جراح يريدج
ركضت للبيت فتحت حجرة البنات ما لگيتها وياهن صعدت لطابق الثاني لگيتها گاعدة بيدها نقالها صافنة عليه
عنبر :: اذا گاعدة ليش ما تردين عليه تره والله اخوي ما يستاهل هيج تسوين بيه
سجدة : : توي كعدت ما جنت ادري شكو شريد
:: منتظرج بره ما يرضه يمشي گبل لا يشوفج لخاطري نزلي اله لا تخلي يروح وهو ضايج خلگه
هزت راسها گامت لبست شال و عباية نزلت وانا بقيت اعاين الهم من الشباج حجه وياها وحباها من راسها وراح
بينت اله مغتاظة منه و زعلانة بس من مشه ابتعد طلعت طاسة ماي تطش ورا و تدعي اله
فززني صوت فضيلة تصيح يبووو كعدت الوادم كلها تلطم ع راسها الهايشة ملتها مالها أثر گلبت السلف عليها وماكو
محد دار الها بال ولحد ساعدها لو شفق حتى عليها طلعت راحت لبيت اخوها صارت هدوء بدلت ملابسي اريدن امشي للمدرسة اجه فطرس جاب النه لحم
فطرس :: هذا ثواب لحرمة ابوي رحااب الف نعلة ع روحها
من شاف براءة وراي ابتسم الها و همس الها سمعته عبن حشرت روحي بينهم
فطرس :: طلعت الجنية تحبج امس شايفة فضيلة من حرگت گلبج و وزتني عليها حتى احرك گلبها
ما انتظر راها راح يوزع لحم ع سلف بقيت بمجاني افكر بكلامة
عنبر :: يا جنية هاي اليحجي عنها ولج بس لا صدك ممسوس
براءة :: ماكو شي ياله روحي موش تأخرتي
رحمة :: طلعن البنات كلهن لدوام اتصلت ع عروة گال بعده ما جاي الدكتور بس الدكتور المقيم طمنه ع حالة أزاد وحتى دخل اله
البستان يصفر كلها بالشغل و الدوام جدو راح للمحكمة عنده تعقيب سندات و بيبي راحت هي و إصالة لسوك أخذن سدرة واختها يشترن كاروك لطفلة
و غفار اخذ مجموعة أوراق و مدري وين راح نظفت البيت وياه سجدة و طبخنه الغدا هم صار الاذان صليت
و خابرت ع عروة
رحمة :: هاا بشر ما اجه الدكتور ما گلك شي
من نبرة صوته و الفرح بيها عرفت اكو اخبار زينة
:: اجه و الحمد لله طلعوا لردهة و كعد حجه ويانه والله
:: الحمد لله يارب الحمد لله كاعد هسه خل احجي وياه
:: لا رجع نام من الادوية بس يكعد اخلي يحجي وياج والله بس ديربالج تجين لهنا رحمة
:: لا والله ما اجي بس انت طمني عليه كل شوية
شكرت رب العالمين ع رحمته ويانه گلت لسجدة هم فرحت النه كعدت شوية ضوجة و تجيني أفكار بسببي اهلي دا يتأذون گاعدة و اجلد بروحي.... نفضت راسي من الأفكار و گمت فتحت الباب شفت حجية سلوى بالكاع ملتها تحوش زرع
رحمة :: سجدة بين ما يجن البنات راح اطلع اساعد حجية سلوى خطية وهم شوية التهي وياها لان اذا ابقى گاعدة الأفكار تنخر عظم راسي
سجدة :: زين تسوين والله وهم الج عند الله مثل تساعدينها يوگف الج
بقت هي تشتغل ع قضية واني طلعت وياه الحجية تعلمني شلون احوش و تسولف وياي لمحت سيارة غريبة اجت نزلت منها عمة فضيلة راحت گبل ع بيت عمة انعام
و السيارة بقت واگفة بمكانها شوية و نزل السايق من يمشي يعرج بمشيته مبين مضروب ع رجله و راح دخل للبيت بدون ما يدك الباب بدون ما يسأذن او حتى يرفع صوته ينبه اهل البيت
..گلبي نغزني ليش دخل للبيت وهو غريب وهم ناس عرب ما يقبلون
رجال يدخل بيوتهم اذا رياجليهم ما موجودة... خفق گلبي من تذكرت سجدة وحدها بالبيت شي يدفع بيه عبالك
كف القدر يحودني للبيت خطواتي صارت هرولة بعد متر عن الباب اسمع صوت صريخ مكتوم كأن واحد دا يصيح و واحد ثاني مكمم حلگه
ركضت ليجوه بساع و الصدمة شلتني واني اشوفه فوگاها حاشر راسه برگبتها يبوسها غصب و بأيده الثانية ساد حلگها
وهي عبالك مذبوحة و الروح دا تطلع منها الساق ملتفة بالساق و تضرب بالگاع
بلا تفكير اندفعت اله ادفعه عنها اضرب بيه ع ظهر بـ اديه وادفر برجليه واصرخ
نهض منها لزمني من شعري من فوگ حجابي و لطخه بالحايط افترت الدنيا بيه كلشي گام يدور و سجدة
گامت تركض جرت سجينة بس هو جان أقوى ضربها وگعها منها ورجع انقض عليها مثل خنزير
ما فكرت بهذة اللحظة غير بنية دا تغتصب گدامي واذا بقيت واگفة وخليت هذا الوحش يسبلها شرفها اعيش بندم كل عمري
دنگت ع سجينة وثواني بس غرستها بظهره توقفت حركته و تشنج كل جسمه سحبتها من ظهره اندفع الدم مثل بوري ملطخ أيدي
ذبيت السجينة من ايدي بساع وهو لزم ظهرى يتلوى زحفت سجدة جرتها و نبتتها بصدره جرتها و رجعت مرة ثانية و ثالثة و رابعة تغرس بيها بصدره و ابطنه
و الدم يطفر ع وجهه و اديها و دشداشتها و تردد بجنون
سجدة :: ما اخليك تذبحني مرتين.... ما اخليك تذبحين مرتين
