رواية هو لا يشبههم الفصل الواحد والعشرون بقلم تبارك الوائلي
أي عوض خبئ لنا
لنمضي ربيع اعمارنا غارقين في كل
هذا التعب 🤍.
#وبكيف الظروف نعيش محد #عايش بكيفه
جمانه : مشت حياتي و تكررت سالفه الخطاطيب
من جديد وامي واهلي يحاولون يقنعوني اقبل
واني مستحيل اقبل ادخل رجل غريب على بناتي جان ردي الهم الرفض وطبعا ، المضايقات الي ما اخلص منها كل عقلهم المرءه من تصير ارمله أو مطلقه تصير فريسه سهله الهم احمد ربي كدرت اصون نفسي واحافض عليها إلى أن فديوم
كاعده ايدي على خدي صافنه بضيمي
ودك المبايل باوعت المتصل انهار رديت .
انهار : شلونج جمانه اخبارج .
جمانه : الحمدلله انتو شخباركم .
انهار : حبيبتي احنه بخير جمانه عندي شغله وياج ضروريه تكدرين تجين عليه ابيتي وحدي اريد احجي وياج بشغله .
جمانه : صراحه اني تفاجأت وكلتلها ، ضل بالي كولي انهار اسمعج لتفكرين اشبيج .
انهار : يااااا ، خيه ماكو شي بس اريد وحده اساعدني بالصالون مالتي والصالون بصف بيتكم هم تغيرين جو وهم اطلعين مصرفج انتِ والجهال.
:- لا انهار ماكدر والله اني يادوبي الحك على البيت ماعندي مجال اشتغل .
:- لتشتغلين تعاي اشوفج شبيج جمانه .
:- اي ادللي اجي .
:- هاي شنو الصوت اليمج .
:- والله طفيت التنور كملت خبز .
:- يااا تعرفين تخبزين جمانه .
:- اي ليش لا اعرف .
:- لعد عليج الله جيبيلي كم كرصه وياج خلي اشوف خبزج .
:- صار بعيني .
كملت الخبز وسبحت وبدلت وطلعت 10كرص خبز بالعلاكه ورحت على عمتي كلتلها.
:- عمه انهار دكت عليه تريدني راح اروح عليها
ماتخر نص ساعه ورجع وراح اخذ امير ويايه .
ام بسام :- روحي عمه برراحتج بس اشعجب شعدها اول تالي دك عليج وتريدج ابيتها .
:- خلي اروح وشوف شكو .
وصدك رحت عليها وسلمت وكعدت طلعت من الخبز اكلت شويه وتعجبت بخبزي اخذته ضمته
واجتي بايدها كلاص ماي وكالت .
انهار:- والله عمي معدله انتِ هنياله الي ياخذج كلشي حاويته ادب واخلاق ونداره ونضافه وام بيت وفوك كل هذا جمال .
جمانه : تسلمين حبيبتي ، يا جمال يمعوده اخوج ماخله جمال ضيعه وراح .
انهار : اي ياعيني غير انتِ هامله نفسج لا حفافه لا صبغ لا ترتيب ليش هيج هامله شبابج والله بعدج صغيره .
جمانه : ياشباب فدوه ماريد هيج مرتاحه احسن
هو هيج اني ومخلصانه من حجي العالم .
انهار: زين هسه اشكلتي تشتغلين ويايه بالصالون .
جمانه : لا والله ماكدر انهار كتلج من الاول بس اجيت اشوفج لان طلبتي مني تجي .
انهار : كل الهله بيج .
كعدت شويه سولفنه سوالف عاديه بعدها كلتلها .
:- يله خيه خلي اروح هسه عمتي تنتضرني .
بعدني توني كمت وفززتني من صاحت .
انهار: يااااااا ، جمانه شنو هل جمال جسمج يخبل ولا يكول مخلفه 4 جهال ولج لا بطن لا شي يخبل عبالك منحوت عليج الله شلون خلفتي 4 وانتِ هيج .
جمانه : خجلت منها شبيها انهار اليوم متخبله كلتلها ، اجيج غير مره تأخرت .
لزمتني وكفتني فتحت العبايه عبالك طالعه كشف وكالت .
انهار: ولج اوكفي شنو هاي صد....ج ، انتِ مو ترضعين جهالج من صد...ج .
جمانه : رديت بخجل ، اي خيه كلهم رضعتهم
طبيعي .
:- ولج خيه وينه شو صغير عبالك طفله مراهقه
ممسوح مسح.
:- يا تقلدين عليه انهار .
:- لا والله العظيم بس تفاجأت وصراحه مجنت منتبها عليج ولج تدرين انتِ شيسمون جسمج يسمو المطاط هيج سامعه اشكد مايستعمل يرجع مثل قبل نادر هذا جسمج واكيد حتى ال ...... هسه عبالك مامخلفه مو عليج الله احجي .
جمانه : متتتت بدمي من الخجل كلتلها يضحك .
:- يااا شلون عليج سوالف انتِ فاسده انهار خلي اروح احسلي .
سلمت عليها ورجعت للبيت مستغربه تصرف انهار لكيت طيبه جايه وضايجه حيل أول مطبيت كالت .
طيبه : اشعدها انهار شتريد منج .
حجيتلها السالفه وهي كالت .
طيبه : بكيفج اذا تردين اشتغلي .
:- لا عيني ماعندي وكت اني .
:- ماسالتيها على ايهم شو هل ايام مختفي ميجي علينه .
:- يااااا ، نوب شكو اسال عليه اني شو عندج مبايل خابري واسالي على اخوج خلي اكوم اسوي العشه احسن .
عفتها ورحت وره كم يوم هم خابرت انهار وكالت
" تعالي اريد احجي وياج "
" اعذريني ماكدر تردين احجي بالمبايل "
" جمانه اذا تقدملج احد وخطبج تقبلين " .
" لا انهار والله ماكدر ولا افكر بهل شي ابد "
" ليش هيج بعدج صغيره المن مضيعه شبابج تخدمين بالعالم وياريت يقدروج "
" لا انهار ماكدر "
" هسه غير تعرفين منو اول "
" ولا اريد اعرف اصلا "
" هسه اسمعي تعرفين ايهم خويه شنو سبب طلاكه الصحيح "
" ولا اريد نحجي بي لان هاي خصوصيه تخصه "
"بس اني اريد ازوجه وكلما اشوفله وحده يطلع بيها عيب وميقبل اخويه مزاجي ومتعجبه حي الله مره اخر شي جبتله معلمه وطلع عذر وكال مازوج موضفه وكل يوم عذر شكل .
جمانه : هيه تحجي واني المبايل باذني واشتغل واكول بكلبي هسه اني شعليه باخوها جايه تشكيلي حاله شنو تريدني ادور وياها مره كملت كلام وكالت .
" جمانه هو همه الوحيد يريد بنيه شريفه ومؤدبه وبس وصراحه انتِ كلهن حاويتهن عندج ومايلكه احسن منج .
جمانه : وكعد من ايدي الجدر همزين فارغ من الصدمه الصدمتني بيها انهار حسيت جسمي
رجف من كلامها ماعرف شنو احساسي بس
محبيت هل كلام رديتها وكتلها .
" تره ايهم مثل اخويه شلج بهل حجي انهار "
" جمانه بس هو مو خوج هو ابن خالج وحماج
يحل عليج والاهم من هذا عم جهالج يعني تأمنين عليهم وهو اكيد ما راح يعوفهم فكري لتستعجلين بالرد جمانه زين .
" اني ماريد انهار عفيه سدي الموضوع .
" لا ما اسده فكري زين منتضرتج اريد جواب .
ماعرف شصارلي مصدومه خجلانه خايفه كلهن التمن كلتلها .
" والله مادري شكلج الله كريم أن شاء الله يلكه بنت الحلال .
" انتِ بنت الحلال وصراحه من كتله عليج اخويه سكت وافق بدون تردد .
سلمت عليها و سديته منها وبقيت افكر ودورها
يمنه يسره شفتها مترهم ابد ايهم طبعه صعب ومو مثل طبعنه متفتح حيل وحتى طريقه كلامه مو مثلنه ويختلف علينه بكلشي استصعبتها حيل وكلت بكلبي لا عيني اني ويا مانتوالم ابد وعفت السالفه
ونسيتها ومر اكثر من اسبوع ولاحضت ايهم ماجه
بعد علينه معقوله يعرف او حاجيتله انهار مادري ومره على السالفه اقل من شهر واجه ايهم كل عاده
لازم يجيب مسواك ويا خجلت اطلع بس سمعتهم يسولفون حجيهم واضح ، عرف من طيبه كلمن عازل الاكل وحد وكالتلها عمتي .
طيبه : عزلنه جمانه وجهالها لان راتبس ميكفي يادوب مصاريفي ومصاريف الدكتور وهيه هم عده جمانه راتب تكدر تعتمد على نفسها .
سمعته يكللها
:- بس ميصير يعني هيه تسوك الكم وتطبخ الكم والها وعازليها وحد لا يمه عيب مترهم اني بعد اسوك الجهالها وحد كل اسبوع مادام عدها جهال تبقه محتاجه ومتلحك عليهم .
طيبه : شعليه اني ايهم امي هيه الي عزلتهم .
مبين ضاج من تصرفهم وسمعته يكللهم .
أيهم : زلم عليها اعتماد مدبرها مسؤاليه بيت وجهال الله يكون بعونها.
بقى شويه وراح ، مبين حاجيتله انهار لان جياته قلت النه اني هم غلست و بعد ماحجت انهار ولا دكت عليه واني هم استحيت وماحجيت الا اي احد بالسالفه لان مامقتنعه بيها ابد .
كاعده العصر واجتي كواكب طبت سلمت ولحكتني للمطبخ وكالت .
كواكب : جمانه تدرين اليوم اجه واحد خطبج من ابوج ولو تعرفين .
جمانه : صدك والله منوووو ؟
كواكب : اي والله شبيج .
جمانه : ومنو باله .
كواكب : ايهم ابن خالج .
جمانه : يااا صدك عود .
كواكب : اي والله خطبج من ابوج وابوج كله
ان شاءلله خير اشوف والله كريم .
جمانه : شنو يشوف ابويه هو مو يعرف اني رافضه الزواج من الاساس .
كواكب : جمانه اقبلي احسن لج متلكين احسن من ايهم الج والجهالج والله العظيم وخالي اني راح اقنعه يقبل لان انتِ من حقج تعيشين عمرج انتِ ماشفتي شي ويا بسام اقبلي ولتترددين .
جمانه : كواكب والله محتاره ومستصعبتها حيل ومااعرف شكلج .
كواكب : لا تكليلي ولا اكلج فكري زين .
راحت كواكب واجتني فرح هم عارفه بالسالفه من امي واجتي عليه وكعدت تقنعيني .
فرح : اقبلي ولصيرين عوبه تره ايهم ميت الف وحده تتمنا كامل من كل شي رجال ونعم منه ولتنسين عم جهالج والعم اب وراح يحبهم ويربيهم جمانه عندج ولد باجر عكبه يكبرون يحتاجون اب على راسهم انتِ متكدرين الهم تره تربيت الولد صعبه مو مثل البنيه تكعديها يمج هذوله يكبرون ويطبون مراهقه ومتكدرين الهم والله .
جمانه : ما اكدر فرح والله ماكدر وكارها الزواج وبناتي أخاف عليهن والله .
فرح : بناتج حتى اذا نامن بحضنه انتِ مامنه منه عمهن ولج اقبلي انتِ اشفتي بس كليلي شو صارلج كم سنه شابعه ضيم .
جمانه: على كيفكم فرح عليه اشبيجن انتِ
و كواكب .
فرح : اي غير علمودج وعلمود مصلحتج احنه شيهمنه فكري واقبلي احسن ولتحجين هسه الاي احد زين بالذات عمتي وطيبه لتحجين ابد كدامهن.
راحت وبقيت افكر بلي كالته معقوله ارجع ازوج واعيش حياه زوجيه ثاني مره
مادري محتاره بلي حجو شلون اقبل با ايهم زين هو صح ابن خالي بس اني كلشي ما اعرف عنه وعن حياته وشنو سبب انفصاله عن زوجته هم مااعرف
و اني مامتعوده عليهم وعلى طبعه هوه يختلف عن طبع اخو بكلشي يختلف و اني شايفته اخ واحترمه اشلون نزوج واني هم احب مثل بقيه البنات واعيش هيج حساس مستحيل اني بنيه ما حبيت
يردوني هسه احب ، و اعيش حياه زوجيه لا لا والله اني هيج مرتاحه حيل وكل وقتي الجهالي وبيتي وعمتي وطيبه ماريد ماريد ارفض احسن ،
زين اذا عرفت طيبه وعمتي شنو رايهم يقبلون لا مااعرف معقوله ياربي اخاف ايهم مثل طبع بسام يطلع لان احنه بالاول هم ماعرفه بسام ولا عرفنه طبعه وبعد الزواج ياله عرفنا يارب ابعده عني
يارب ولتخلي يصير نصيبي ، بالليل كاعده انيم الجهال واجتي فرح وطبت بالغرفه جوه يمي كالت .
فرح : ها جمانه شكلتي ولج لتبقين صافنه بوجهي الثوله شمنتضره يجيج احسن منه .
جمانه : والله فرح محتاره وخايفه .
فرح : على شنو تخافين يا حضي .
جمانه : خايفه ارجع اعيد نفس الغلط وكدامج بسام ماعرفنا اله من عاشرنا .
فرح : اي صح كلامج بس ايهم هم عاشرنا وشفنه طبعه لتغشمين نفسج شجاب اشودا عليه شي مايشبه شي تقارنين بسام با ايهم جمانه .
جمانه : هزيت جتفي وكلتلها كلشي يصير.
فرح : يعني مامنتبها على الفرق بينهم وشكد أيهم مختلف عن أخو .
:- اي صح وفاهمه قصدج .
فرح : ولج خلي نححي واقع بسام وين وهذا وين شوفي ثكله ورزانته وعوفي كل هذا انتِ الي متوقعته ومنتضرته من عيالج شنو اشو طيبه ذاك اليوم تكول بس ازوج اخذ امي تعيش يمي ونعوف البيت .
جمانه : باوعت عليها بحيرة فرت دماغي ضربتني على رجلي وكالت .
فرح : كليلي انتِ وين تروحين اذا صدك ازوجت طيبه تردين ترجعين يم اهلج الي تروحين ربع
ساعه جهال اخوج يملخوهم من دلال ابوج وامج الهم شفتي بعينج امي
ماتقبل على ولد صالح والي يحجي وياهم تزعل حتى كواكب مامرتاحه من سوالف اهلج لا عبالج ساكته لان طبعهم مو حلو .
جمانه : أي صح خطيه كواكب هواي متحملتهم .
فرح : أي والله ، زين اشلون تبقين عايشه يمهم
حتى غرفه ماعندهم زايده شفتي امي ماعولت بسام يموت وكالتلج ارجعي اكعدي ويا عمتج علمود تطبك المشتمل الي شترا ابويه ويا بيتهم .
جمانه : فرح صعبه عليه والله العضيم انتو ليش متحسون .
فرح : عوفي كلشي و عيشي حياتج جمانه مثل بقيت البنات ولج انتِ حتى حياه زوجيه مافتهمتي منها شي مادري اشلون خلفتي من بسام هل 4اطفال
بس كليلي شلون وهو جان مامعبرج ولا شايفج كدامه وكل جمالج ماهمه لان نعرف احنه دربه شنو حتى هذا الحساس حرمج منه .
جمانه : يوووو ... فرح كافي وربج ولا عندي اي مشاعر الهل شي ابد لان بسام موت كل احساسي ومشاعري وماريد اي رجال بعد بحياتي .
فرح : اقبلي وعيشي حياتج .
دك مبايلي كواكب .
:- هلو كواكب .
" هلو جمانه بشري فكرتي .
" هاا والله مادري كواكب "
" لتدرين ولا شي راح انطي موافقتج الخالي اقبلي واسكتي كافي حجي .
فرح : اي عفيه بكواكب بس انتِ تكدريلها ، هذا هوه كليله قبلت وخلص معليج بيها .
كواكب : اي عيني الله وياج .
فرح : هذا هوه انحل كل شي خلي اروح اني .
جمانه : تعالي وين ، زين فرح وعمتي وطيبه شلون نكللهم وصراحه اني بعدني مموافقه وخايفه .
فرح : لتخافين ولا ابد ومو هسه نكول لعمتي اصبري .
راحت فرح واني افكر شلون اذا عرفت عمتي اخاف تزعل او تنقهر هيه الاسواد من نزعته قبل شهرين اسوت بيه وبقت تبجي يومين لان نزعته وهذا الحجي اني لبسته 3 سنوات على وفاة بسام
وامي تكول هيه بس دارت السنه مالت خالي نزعته وعلى ابنها ماقبلت نذبه ، والله مادري خليها على الله بقيت افكر ودخت ونمت كعدت الصبح بين الطبخ والتنضيف والجهال اجتي امي العصر وكالت .
ام صالح : اليوم ابات يمج بغرفتج .
:- هلا بيج يمه .
اصلن امي من مات بسام ورجعت اني يم عمتي ماجايه عليه ولا بايته يمي هل مره مدري شعجب نامو الجهال وصارت تحجي وتقنعني لازم اوافق
با ايهم .
ام صالح: وتلكين احسن منه ولتحجين هسه الهم وهذني غراضج الي شتريتيهن كلهن بيعيهن واخذي افلوسج لان عمتج عدها غراض اقلها تستفادين من افلوسهن احنه مدايميلج يمه فكري بنفسج وبجهالج .
بقيت سهرانه اني وياها كلتلها .
:- أخاف يمه بسام سوه عندي عقده وكرهني بالزلم.
:- صدكي راح يدللج لان اني اعرف طبعهم وطبع امه يختلف عن طبع صفحتنه عدهم المراه يحترموها ويحبوها يمه همه هذولة الدليم يقدرون المره ومتنذل عدهم .
جمانه : الله كريم يمه ما ادري مادري والله خايفه يطلع مثل بسام .
ام صالح: لا أيهم غير وكولي امي كالت .
سكتت وضلت امي تقنع بيه واني ساكته ثاني
يوم راحت امي و دك مبايلي اتفاجأت من الرقم
طلع اسمه اني حافضته بجهازي كوه رديت .
" الو
" الو هلا ام نور شلونج
" هلا بيك
" عادي احجي وياج شويه
" كول ايهم
" احم احم شلون ابدي
" اكو شي
" لا بس سؤال واريد اسمع جوابه منج
" هاااا .... اي كول تفضل
" ممكن اعرف شنو سبب رفضج اليه ؟
" لحضه صمت مجنت اتوقع منه يتجرء ويخابرني
بنفسه مكالمته صدمتني وخلتني اعيد كل قراراتي
بعد ما جنت قافله عليه كتله .
" بس اني مرافضتك انت شخصيا اني رافضه كل
جنس ادم .
سمعته جر نفس مبين يدخن وكال .
" ام نور اتمنى متحكمين عليه وانتِ متعرفيني
وصراحه انهار عرضتلي هواي بنات ورادت تخطبهن
الي بس اني ماعرف ليش صرتي انتِ بالي يا بنت عمتي اني شاريج وصدكي مراح اخذلج واحطج
انتِ وجهالج بعيوني فكري وردي جواب منتضرج.
" كلشي مكدرت ارد بعد سلم وراح واني دماغي
سافر مني وكل فكري صار مو اليه وشلون اقبل
وخاف ما ارتاح وخاف اضلمه وياي لان اني ماعندي
أي حساس لجنس ادم وكارهتم كلهم بعدها دكت فرح ورجعت تقنع بيه عفتها على الله وكلتلها
كولي الابويه هاي هيه فرحت و راحت انطت خبر الاهلي ومن صارت صدك اجه الوقت الي لازم
عمتي تعرف وفعلا دكت كواكب وكالت .
كواكب : جمانه راح اجي احجي العمتج وطيبه
خلي يعرفون .
جمانه : والله مادري كواكب خجلانه حيل اني .
:- ليش تره مابيها شي وبعدين تذكرين قبل من خطبوج طيبه ما مانعت هسه تمانع وعرفت اخوها يخطبج يله باي راح اجي .
:- هلا بيج تعالي .
كاعدين كلنه وطبت كواكب واني من خجلي طبيت جوه وكفت اسمع الهن وحجت كواكب الهم
:- اكو شخص جاي خاطب جمانه من خالي وخالي وافق عليه وقرر يزوج جمانه .
ام بسام : ياا تحجين صدك كواكب .
:- اي والله ام بسام .
:- اشلون وليش ابو صالح ليش موافق اني ما قبل وماريدها تعوفنه هيه والجهال ومنو النه احنه
غير خادمتنه هيه وقايمه بوجبنه لا لا ماقبل ولا ارضه .
عصبت كواكب من عمتي وردت كالت
كواكب : يعني لان خادمتكم ام بسام للخدامه تردوها
مفكرتو بيها هيه هم حقها تعيش بعدها شابه وصغيره و ماشافت شي حلو بحياتها ابد ويا ابنج الله يرحمه خلوه من تالي بلكي ترتاح وتعيش مثل بقيت البنات ليش توكفين بطريقها .
ام بسام : لا اني ماقبل كلت ماااا اقبل جمانه تزززوج .
طيبه : يمه على كيفج ليش معصبه هيج تره جمانه اول وتالي تزوج حجيتي انتِ او لا ابوها قابل تكلج ومنطي موافقته يعني مامنتضر رايج او رايي اني .
كواكب : وليش ينتضر رايكم هيه بنته ومن حقه يزوجها الي يعجبه .
طيبه : اي صح بنته بس هيه جنتنه وعايشه ويانه .
كواكب : اي ولتنسين جانت جمانه جنتكم وخلفله عليها من عاشت يمكم هل 3 سنوات وصبرت عليكم غيرها من زمان تعوفكم بس كلنه نعرف جمانه شنو وشنو اخلاقها .
طيبه : اي ماكلنه شي وبس اريد اعرف منو سعيد الحض هذا الي خاطبها .
كواكب : ايهم اخوج .
طيبه : شنو ايهم عاف النسوان كلها يخطب جمانه شلون وليش ماكال النه .
كواكب : عيني اني اروح بس حبيت يكون عدكم
علم وتره مابيها شي اذا ازوجها ايهم طيبه ايهم اخوج ولد بسام راح يربون عنده وميمنعهم من
الجيه عليكم ولا يمنع جمانه عليكم المفروض تفرحين .
طيبه : لا مافرح وعلى شنو افرح ولا اريد اشوف وجها بعد الأستاذ ايهم .
طلعت كواكب وراحت ونار كبن بالبيت عمتي تغلط وتسب باايهم وطيبه هم وياها ويعيطن وعمتي تصيح .
:- ليش خطبها هيه ايهم شمعنه بس اريد اعرف مثل امه قبل اخذت زوجي مني وزوجته وتعرف بي عنده زوجه وبنات وهسه ابنها يريد ياخذ زوجه ابني مثل حقاره امه سبحان الله .
طيبه : أي والله نفس الشي الله لا ينطي ويحرك كلبه كون .
ام بسام: ماريد بعد طبته عليه ابد هل حقير النذل .
اني خفت اطب عليهن لان شفت عصبيتهن .
طيبه : هسه ادك عليه اريد اعرف شلون هيج سوه هل النذل الحقير
سكتت مبين دتتصل شويه وصاحت .
:- ها ايهم مبروك سمعنه خاطب جمانه
..........
:- اي وليش ماجيت وكلت النه بالاول وليش تروح تخطبها من ابوها
..........
:- و شعلي خالي احنه اعيالها المفروض تجي علينه بالاول وتحجيلنه مو تروح تخطب وبعدين نعرف احنه .
ام بسام: كليله امي تكول بعد لطب علينه ابد ولا اريد طبتك عليه خوش ليش هيج تسوي مالكيت اله جمانه احنه منو يخدمنه ويقوم بطلباتنه غيرها اكو هواي نسوان عفت كل العالم اله جمانه جيتها .
طيبه : اي حضنه احنه والله لتكول عندي بعد اخوات ولا نعرفك ولا تعرفنه ابد فهمت وراح حتى رقمك احضره زين .
سدته واني مصدومه من كميت العصبيه مالتهن عبالك نار وشبت عليهن يمه اسوت بي وشكالت عليه بدون خجل .
ام بسام : اي هيج ريحتي كلبي هل نذل الحقير والله اليوم اروح البيت اخويه ابو حسان اخليهم يخزو بالشارع ليش هيج سوه .
طيبه : كافي كافي يمه شتكولين البيت اخوج مالج حق تحجين خطبها بالحلال وابوها قابل بعد شكو اكعدي واسكتي .
جمانه : عزه بعينج طيبه تعرف ماسوه شي غلط وبالحلال بس ماخلت حجي ماحجته عليه شلون ياربي والله اخجل اطب عليهن واودي العشه الهن
شويه وشجعت وطبيت انطيتهن العشه وكبت بيه عمتي أول مطبيت .
ام بسام: اي جان كلتي لو انتِ هم اضمين علينه
جمانه : عمه اشبيج ليش كبرتيها هيج تره المفروض تفرحين احسن ماخذ غريب و يبعدني عنكم اني وجهالي اقلها ايهم ابنكم ومنكم وبيكم
كلت احجي هيج حتى متاكلني وتشربني بالحجي بس هم ما خلصت وكالت .
ام بسام: لا لا عيني مو ابنه اني ماعندي غير ولد واحد ومات الله يرحمه .
طيبه : أي والله ماعدنه اخ غيره .
جمانه : ليش طيبه مو جنتي تكولين اخويه ايهم وخلفله عليه من يجي ويسال عنه .
طيبه : اي اي هسه عرفت ليش يجي ويسال اثاري علمودج طلع حاط عينه عليج .
جمانه : يااا عزه بعينج طيبه مو عيب هل حجي
الي يسمعج شيكول هوه من زمن زوجته جان
يجي ويتواصل وياكم هوه واخته ليش هيج
تحجين خافي ربج .
طيبه : لا مو عيب انتِ مو كلتي ماجيب زوج ام البناتي شلون قبلتي هسه ها شلون .
جمانه : هذا عمهم طيبه مو زوج ام لو تنام نور بحضنه اامن عليها اشبيج طيبه تره اني ماعوفكم والله من يروح لدوام اجيب جهالي وابات يمكم واطبخ وانضف الكم واروح والله ماعوفكم تره
هوه هم اخوج واني مقبلت اله بعد ما ايست وانتِ
كلتي اخذ امي واروح اذا صارت ورحتو اني منو الي منو الجهالي .
طيبه : لا لا عيني ماريد جيتج علينه ولا جيته علينه ولا الكم دخل بينه بعد زين ابد مالكم علاقه بينه اني ماعندي اخ اسمه ايهم اني بس بسام اخويه هذا هو جمانه مالنه علاقه بيج ولا حتى بجهالج اخذيهم
بعد منريدهم .
ام بسام: أي جمانه اذا تزوجتي بعد منريدج لا انتِ ولا الجهال و وبعد منريد نشوفج
{جمانه }
عفتها وطبيت جوه ابجي على الي سمعتها معقوله هيج حجن حجي عليه وليش كل هذه الي سونه يعني همهن الوحيد منو يخدمهن واني مافكر بيه اجوي الجهال كعدو يبجون وياي وكالو.
:- ماما لتبجين كافي حبابه.
:- لا مابجي بس اكعدو احجي وياكم اكيد سمعتو عمكم ايهم خطبني .
:- ماما سمعنه .
:- ماما انتو سباع وتفتهمون وقراري يوكف عليكم انتو شتكولون اني اسوي وهسه شكلتو .
نور : اني موافقه ماما وفرحت الج لان اني جبيره واذكر زين عيشتج ويا ابويه شلون جانت وموافقه على عمو ايهم احنه انحبه .
:- وانت طارق شتكول ماما .
طارق : اي قابل ماما زوجي واحنه انحبه العمو ايهم
هو حباب .
جمانه : يعني مضوجون مني بيوم من الايام .
:- لا ابد وموافقين تزوجين .
:- واني عمري ماراح اعوفكم وابقه الاب والام الكم لحد ما اموت اني وياكم .
نور :- نعرف ماما اشكد اتحبينه وعمرج مافكرتي بروحج وعفتينه احنه قابلين على عمو .
:- هسه الله كريم خلي اشوف الله سبحانه شقاسم النه ، شفتو عمتكم وبيبي شسوو .
نور : اي ماما لتنسين همه يحبوج ومن حبهم الج هيج حجو يردوج تبقين يمهم متعوفيهم يرضون بعدين من كيفهم.
جمانه : اباوع نور ماشاء الله شكد واعيه وتفتهم وتحجي حجي أكبر من عمرها كلتلهم .
:- يله راح انام نعست انتو هم روحو نامو
راحو وبقيت افكر بكلام عمتي وطيبه من حركه كلبهن هيج حجن لو شنو الحد مانمت ومادريت بروحي وثاني يوم الصبح رحت لاهلي واجتي فرح ونجمعنه وحجيت الهم كلشي دار بينه كالت .
فرح : مو كتلج جمانه اعيالج انانين ميفكرون بس بنفسهم ومنو يخدمهم يردوج ويحبوج بس للخدمه .
جمانه : اني الي معجبني التناقض العدهم شفتي اشلون حجت على اخوها ايهم ماخلت كلام ماحجته وقبل تمدح بي واخويه واخويه .
فرح : اي والله عوفيهن واسكتي عنهن زين مامسويه شي غلط ، وطيبه من غيرتها حجت هيج مبين تريد رجال ، تكلج جمانه صارت ارمله وراح تزوج وهيه لسه مازوجت ضاله تحلم تزوج .
جمانه : والله عليج سوالف فرح هيه وينها وين الزواج كلاص ماء مجيب الروحها كله تصخر الجهال .
فرح : اي ادري بيها ، اكلج جمانه اليوم بالليل اجيبين جنسيتج وتجين لان ايهم كال الابويه
يريد يجيب سيد ويعقد .
جمانه : حسيت بطني مغصتني جنها السالفه صارت صدك كتلها.
:- فرح شكو مستعجل خلي ينطي مجال .
فرح : لا ... ماكو مجال أيهم يحب الشي كن فيكون ميحب الف والدوران .
:- اسكتي هسه الله كريم .
كواكب : اي اني اخابرج من يجي .
جمانه : خوش هسه خلي اروح .
فرح : كواكب انتِ من يجي خابري عليه واني اروح اجيبها واجي بالليل بحجه امي تريدها منريد عمتي تعرف هسه .
كواكب : اي خوش لان ايهم دك على خالي البارحه وكله بابليل اجي بـ 8 اجيب السيد ونعقد .
جمانه : والله ماعرف الجاي اسوي صح لو غلط .
كواكب : لا مو غلط سمعي جمانه ايهم كايل الخالي
يريد طارق ونور يبقون يمنه بس اول ايام عرسكم وخالي قبل .
جمانه : اشلون هيج يحجس بجرءه وجهالي ماعوفهم هذا تفاقي من اول .
جمانه : منو كلج عوفيهم تره الولد كال بس اول ايام يبقون يمنه وخالي كال الرجال مامجبور يتحملهم
وهو عريس .
جمانه : ضجت حيل وكتلها ، اشون يعني فرح شو اختلف الكلام .
فرح : جمانه ماعليهم شي يبقون ابيت جدهم كم يوم .
جمانه : لا اني ماقبل والله .
فرح : واذا هوه مصر شلون .
جمانه : شسويله مشكلته .
فرح : اوف منج جمانه .
جمانه : خلي اروح هسه عمتي الكاها معصبه اصلن هيه وطيبه ميحجن ويايه وحتى ويا الجهال ميحجن بس لصخره يصخرنهم .
كواكب : عوفيهن ماسويتي جريمه انتِ .
{ جمانه }
رجعت للبيت واني بالي كله يم جهالي اشلون اعوفهم يم اهلي لا لا ابد ماقبل لو اخرب الخطوبه
واخرب كلشي ما اعوفهم ماقبل وخلص رجعت للبيت وكل معتاد ميحجن ويايه زعلانات مني صبيت الغده ورحت بالغرفه نيمت امير وفتحت كارتون لجهال يمي وهنه ينامن الضهر دك مبايلي باوعت ايهم ياربي اشلون ارد عليه والله اخجل جمعت كل قوتي ورديت .
" الو السلام عليكم.
" وعليكم السلام
" شلونج ام نور
" الحمدلله بخير
" اكيد بلغوج اليوم بالليل اجيب السيد ونعقد
" اي كالو اهلي
" احم .. جمانه عندج شي تردين تكولي كولي اسمعج طلبات شي كولي بدون خجل .
" هااا ... اي .. ردت اسالك على .. قاطعني وكال .
" اعرف على جهالج تسألين وشون فكرت اخطبج مو صح .
جمانه : اي صح .
أيهم : شوفي جمانه من حقج تعرفين هل شي انتِ بت عمتي وارمله اخويه واعرفج واعرف اخلاقج كلش زين وكتلج جانت انهار ادور زوجه اليه وكلما جيب وحده متعجبني صراحه اني اهم شي عندي الشرف والاخلاق اخر شي كالت انت حيرتني كلما اجيب وحده اطلع بيه عيب انت ادور شرف واخلاق ولكيتلك كلهن بهل وحده وعرفت منها تقصدج ماعترضت عليج لان فعلن انتي بت اصل وهذا همي وموضوع جهالج اني ماراح اثقل منهم ابد لان هذوله جهال اخويه دمي ولحمي وراح اربيهم بايدي لان باجر عكبه هذوله يشيلون كبرتي طارق وامير ولدي وماريد تدخلين بتربيتي الهم ابد من الاول اكلج اني عم معناته اب الهم واني من كلت ابقي نور وطارق يم اهلج قصدت بس بدايه زواجنه يبقون وبعدين يجون يعيشون وياج كلامي بي غلط يا بنت الناس.
جمانه : هاا لا مابي واني هم ماكدر اعوف جهالي وهذا العارض الوحيد والشرط الوحيد الي جنت واكفه عليه .
أيهم : خلص لعد مدام تفقنه بالليل اجي يم اهلج
ويصير خير .
سلم وسده واني صافنه لسه خجلانه حجه وسده على السريع واختصر كل كلامه بدون ميلف ويدور الحمدلله هسه ارتاحيت من سمعت جهالي يعيشون يمي امنت الحمدلله يارب اجه الليل واجتي فرح ورحت وياها لكيت بت انهار صغيره جايه ويا خالها سلمت وكعدت بغرفه امي جوه وايهم كاعد يم ابويه بالاستقبال وكلت ابويه صار وكيلي و كملو العقد وطلعو اجه وكف سلم على الكل وكال .
أيهم : يله خالو دنروح امشي .
:- اي خالو اجيت مع سلامه بيبي .
ام صالح: الله وياكم بيبي .
طلعو همه واني كلتلهم راح اروح للبيت هسه تبقه عمتي بالها عليه عبالك طفله وخايفه من امها هيج حسيت نفسي مرتكبه جريمه ، طلعت ورحت للبيت واني كلبي يدك سريع من الخوف من عمتي وطيبه رحت انام واني افكر ياربي هم رجعت على ذمه رجال يعني هم يحكم ويعصب وهم يجاوز هم مثل حياتي ويا بسام للحضه حسيت نفسي تسرعت وندمت ، ياربي اتمنا تنصفني هل مره مثل كل بنيه وارتاح بحياتي اني وجهالي يارب وكلتك امري بعد انت بكيفك ، نمت واني مااعرف شضامتلي بعد الحياه وشنو بعد اشوف وشنو المقسوم اليه هم يجي يوم وعيش سعيده والكه رجال مثل ابويه اشلون يحب امي ويحترمها ويخاف على زعلها وماياكل اله يشوفها كباله .
فزيت الصبح اذكرت جان عندي موعد الجنسيه امير لان بيها غلط ورحت للمحكمه وصيت عمتي وطيبه على الجهال ورحت رغم هنه ميحجن ويايه زعلانات رحت وكملت ورجعت تقريبن وره ال 11 الصبح كلت امر اشوف امي واطلع للبيت لان رجعت المحكمه من يم فرع اهلي طبيت الفرع واشوف امي بالباب خير هاي امي شعدها هيه وجيرانه مخبوصين وصلت يمهم وكلتلها .
:- ها يمه خير شكو .
ام صالح: اسمعي بدون متخبصين نفسج .
جمانه : شكو يمه خوفتيني احجي .
ام صالح يمه بنتج مليكه ........
إلى هنا ونختم بارت اليوم دعمكم حلوات لتقصرون
وياي بتصويت وتوقع حلو مثل وجوهكم الحلوه
