رواية تحت ظل السعف الفصل الثاني والعشرون بقلم ميار
:يحلو طول يسمر ياغزالي
يمن بل كون غيرك ماحلالي
اذا صفيت بالك وك صفي بالي
بعد معرف عمامي من خوالي
ـــــــــــــــــــــــ♕ــــــــــــــــــــــــــ
صبيت فاطمة الچاي وانطته لابوي
وابوي جاي يسولف عن فرات وراها جاي يسولف عن عمام ابوي ساكنين بغير محافظه ويا ما فاطمة جاي تنطي جاي لجهاد كبته بالگاع من ابوي گال....
-يردون فاطمة لابنهم
تبارك:: نصدمنه كلنه ظلينه واحد يدحك بوجه الثاني فاطمه ارتبكت كامت ركض جابت الوصله وكعدت تمسح
الجاي واحنه ما بينه واحد حجه جهاد عينه ما نزلها من فاطمة وخاصه هي ايديها ترجف كامت تريد تروح لزمها جهاد وسحب الوصله انطاها لريام وكعدها بسده ودار على ابوي وگال..
جهاد:: وانت يابه شكتلهم
احمد:: ما انطيتهم جواب الرأي رايها اذا تقبل خير على خير ما ترضى بيت ابوه الها هي سلطانته تأمر وتنهي حتى عليكم انتو اخوتها شوفي بابا فاطمه
فكري زين منا ليومين ورديلي جواب وما اريد أحد
يدخل بقرارج انتي شوفي قناعتج والولد خوش ولد
فاطمه:: ما جنت متوقعه احد يجي يخطبني صدمني ابوي
والخوفني حجي ابوي وملامحه توحي مقتنع بالولد وحتى
اخوتي ما واحد بيهم حجه بس جهاد وجهه نگلب بس ما كدر يحجي كامو كل واحد لغرفته وجديتي مددت تنام
واني ظليت افتر بالغرفه لا گلبي ولا عقلي يقتنع بغيره
اني رفضت فرات لان اخاف صدك ما يصير عندي خلفه
ليش اظلمه وياي كعدت بكاع حايره صافنه افكر شلون
ارفض وخربت افكاري تبارك من دخلت تركض خوفتني
-شبيج ولج
تبارك:: جهاد يريدج واكف باب البينه كال خلي تجي لبيتي
-زعلان امبين عليه عصبي لو طبيعي
تبارك:: والله واضح مفور مو بس عصبي يمكن يريد يكتلج
روحي انتي هسه واذا سأل عليه كوليله نامت تعبانه خوش
فاطمه:: تريدين تذبيها براسي شمسوين ذيج الساع جان
يتغزل ويضحك ليش تعصب امشي وياي على الاقل ما اترزل
وحدي
-اووي دادا دمشي يجوز علمود خطيبج يريد يسألج
فاطمه:: شبسرعه صار خطيبي
تبارك:: يمعوده دروحي هسه يجينه يكتلنه اهناي
فاطمه:: غميته وطلعت دخلت لحوشهم ماكو احد
وكفت باب المطبخ وما ظل سوره ما قريتها خايفه
دكيت الباب وهو من يمه صاح...
-فوتي تعالي فاطمه
-دخلت لكيت ريام مدده ولا يمها السالفه وتلعب بالموبايل
ضرب على مكان البسده رحت كعدت ادحك عليه مركز بملامحي عابلك يريد يختبرني ولا جت ابالي علمود سالفة
المشيه الكال عليها ابوي الا من حجه وكن خصمها بدون
نقاش او جاي ياخذ رائي گبل گال
جهاد: شوفي فاطمه منا لباجر ترحين تكولين لابوي
ما مقتنعه وما راضيه بهذا الولد بدون حجي زايد
-ليش بي شي الولد
-شنو مقتنعه تاخذينه؟
-درت وجهي على ريام اريدها تنقذني خايفه اكول لا يعرفني
من وره فرات وبنفس الوقت ما اريد اوفق دحكت عليه مركز ينتظر مني جواب كوه جمعت قويتي گتله..
-جهاد اني ما اريد اتزوج
دحك بوجهي مستغرب ردي عدل كعدته وشغل جكاره
سبح نفس وذبه دار عليه واني من التوتر رجلي يرجفن
جهاد:: فاطمه خصم الحجي الولد ما بي شي بس مال
افوت فرات مره ثانيه شيلوها من بالكم الزلمه حجي
وياي مرتين وما اشوف بي شي وبعدين هسه اجي واعلمكم على فرات تره سنتين عاقدين اسولف لو اضمهن انتي تعرفينه مثل ما اني اعرفه فشتكولين
-رفعت راسي كتله..بشنو ما افتهمت
جهاد: فاطمه لا تثولينها راضيه بفرات
-لا
-عجل بهذا الولد؟..
-هم لا
جهاد:: شنو راح تكضيها لا عجل يا هو يعجبج ست
فاطمه يلا كوليلي ليش ترفضين انطيني سبب مقنع
فاطمه:: ما اريد اتزوج وابوي مو كال بكفيج
ريام:: شبي فرات فاطمه شبيج تره يحبج والله
جهاد:: نعممم سلاماتتت
فاطمه:: عاط بيها وهي سوتها زعله وظلت تعارك
ريام:: تره اكره تعيط عليه والله ارد لبيت عمي شنو تعيط
عليه
جهاد:: عجل هي هاي سالفه شكوو تكوليلها جدامي يحبج
حبته حيه وانتي ما عليج بسالفتها اسمعي فكري زين ورديلي جواب اني احاجي ابوي واذا ما مقتنعه تره عادي
فاطمه:: بعدني ما حاجيه ودخلت بالنص ريام تربعت جدامه
وشكلت ارداناتها تكول تريد تعجن مو تكاون واستلمته
ريام:: دحك جهاد سالفه حلال عليه وحرام على غيري ما احبه عجل انت مو لعبت بعقلي بسوالف الحب وهسه من
اخوي يريد اختك تصير ما ترضون تره ما بيها شي شبي فرات
جهاد:: ريام بعدج عروس لا تخليني اهفج بكفه ايدي اكب دبسج ادري بصخمان يريدها عجل شحجيت هسه مو جاي
ناكل وحل انكول صخمان حاجاني يريدها لو الا بالقلم العريض يلا تفهمهن بعدني سالفه لاعب بعقلج بطليها
-لا تعيط عليه اخابر عمي والله شنو جاهل وتعيط علي
جهاد:: هو انتي من اخذتج عرفت ما يفيد وياج بس صبر سيدنا ايوب كل سالفه والثانيه وكالت لعبت بعقلي شوكت لاعب بعقلج هو انتي منو يكدرلج
-جهااد
-ابتسم بوجهه وهي مبوزه عود زعلانه
جهاد:: هاا يابه
ريام:: تره زعلت رضيني..
-هههههههه تعالي يابووي زعلت مدللة گلبي يروحلج فدوه فرات وفاطمه اني ازعل أميرتي من وراهم
فاطمه:: اني ظاله فاتحه عيوني ما مصدكه هذا اخوي
من وفاة حارث ما شايفه جهاد يشاقي ويضحك هيج
وانوب هي تدلع علي منظرهم يخبل مثل ابطال الافلام
ريام:: يلا حبيب ورق 25
جهاد: ماليش؟
-غير زعلتني تنطيني 25 تبجيني 100 الف
جهاد:: لا يا قفاصه من 25 لل100 شلون رهمتيها
ريام:: ترهم ترهم بلغة المزوجين كل شي يرهم
-هههههههه ما اكدرلج خوش من استلم راتب عود انطيج
ريام:: عادي نتظر شوارنه
جهاد:: اي فاطمه
-شنوو
جهاد:: خويه من الاخير منا لباجر فكري وبلي تقتنعين بي احنه وياج وهاي حياتج وانتي تختارينها
فاطمه:: هزيت راسي وترخصت منهم ورجعت للبيت
ريام:: راحت فاطمه وجهاد تمدد يريد ينام ظليت افتر
ما جايتني النومه كمت للغرفه فتحت الكنتور كله معزل
ادحك على فساتيني بعدني ما لابسه منهن سديته ما ظلي
خلك تمددت على الجربايه ضايجه ما تحملت كمت يم
جهاد بيني وبين نفسي اريد اكعده وما اصخي بي خطيه امبين تعبان وساعتين اني بس افتر بالبيت استكشفه
طگت روحي هدوء مزعج كمت اخذت فستان نازك وبدلت
وحطيت مكياج خفيف ولفيت شالي وتعطرت وطلعت
كعدت يمه اكعد بي ما يكعد غرقان بالنوم مال واحد صار اسبوع ما نايم واهز بي ولا عبالك عصبني ردت اعضه بس استحيت شيكول عليه ظليت فوك راسه ادردم ما عبالي كعد
-ادري شلون عريس بس نايم والله لو ظاله بيت عمي احسن المن باقيه يمك بس نوم جهااااد دكوم كافي
جنك عمي حمدان لو ينهجم العراق ما يحس صدك
لو گالو ثلثين الولد على الخال حضي وين ما اروح الگه
حمدان جدامي دكوم تره طگت روحي والله كافي نوم
-جهاد جهاد جهاااااد الووو يمعود ادري شارب ڤاليوم
جهاد:: شكد تگرگين لخاطر الله دوختيني يابويا اكعدي
واسكتي ما تكولين رجلي تعبان اخلي يرتاح بس اتحومين جنج ذبانه.
-شهكت وحطيت ايدي على صدري انييي ذبانه الا اكوم
ارجع لبيت عمي وظل انت نايم ظل ولا ارجع بعد لو شيصير
بس كمت هو سحبني من معصم ايدي بقوه وذبني على صدره واني حرت اعيط من ايدي هو عباله اتشاقه وياه
الا من وخرت وبالغلط ضربت ايده المخيطه صاح موجوع
جهاد:: اخخ بويا على كيفج
-يمه گلبي اذيتك والله ما ادري لزمت ايده اريد اشوفها
ولان فستاني اردانه يصير جوه النص امبينه معصم ايدي
سحبني بقوه مستغرب يدحك على ايدي سحب الثانيه
يگلب بيهن امبين الدم مخنگ بيهم صايرات لطع زرگ
دحك عليه مستغرب گال.
جهاد: منو هيج مسوي بيج؟
-كمت أتاتأ ما اريد يدري بأمه هي الي أذتني سحب ايدي منه
گتله. لا محد بس البارحة جنه نتشاقه اني وبنات عمي وكل
وحده لزمتني من ايد ويجرن بيه واني جسمي ما يتحمل
جهاد:: بلا جذب ريام
-شبيك جهاد ما اجذب والله هو جسمي شي بسيط يزرگ
نازكه الله يسلمني ويخليني الك من يوم يومي برز نستله
جهاد:: هههههههه صدقه لله دكومي ساعديني ابدل دشداشتي وهم ابدل الشاش واعقم الجرح حتى اروح
اشوف ابو علاوي شلون صار.
ريام:: وييين واني اظل وحدي صدك تحجي جهاد تره كعدك تره لان ضايجه خما ابقى وحدي وانت من تشوف الولد تنساني.
جهاد:: ما اطول عيوني بس اشوفه واجي وانتي روحي يم البنات بين ما اجي.
-سكتت بيني وبين نفسي هم كلت اروح اشوف فاطمه كمت وياه اساعده ذب دشداشته وفتح الشاش منظر الخياط ما ينطاق گلبي يوجعني من اشوف جرحه اني حطيتله معقم
بالگطنه وهو يعقم اني دايره وجهي حتى لا اشوف وهو يضحك عليه بس جسمي كله كزبر الا بدا يضمده يلا كمت
اساعده كمل واني جبت الدشداشة ساعدته حتى يلبسها
كمل وكف يمشط شعره و كوه لف الشماغ على ارگبته
وكفت اني يمه البس معاصم حتى يغطن ايدي حتى اروح يم البنات واني متشوقه اعرف قرار فاطمه بعده ما طالع من
البيت اني ركضت لبيت اعيالي ظل جهاد يصيح وراي واني
اضحك دخلت صارت مروى بوجهي.
مروى:: هلاو كلت انهزت بعد ما تجي تعالي نكعد يم فطو
-هو اني جيت حتى اكعد وياجن اخوج راح لفرات يشوفه
من النوم لفرات شالع گلبي هلزلمه بس شنسوي قسمتنا
مروى: ضحكت عليه هي يلا صارلها اربع ايام متزوجه شبسرعه شلع گلبها عافتني ودخلت للبيت واني رحت
ترست المبرده ودخلت يمهن لكيتهن مگابلات فاطمه
ويسألن وهي بس تريد تخلص من لسنتهن.
فاطمه:: ولج عوفني بكيفي اني ما اريد اتزوج شني كوه
تبارك:: لا اكو سبب فاطمه تريدين اتضمين علينه كلنه
نعرف وندري بيج تحبين فرات ويحبج عليش هسه قفلتي
ريام:: صدك فاطمه اذا تعرفينه يحبج ليش ترفضين وهاي
الله كتبلكم فرصه ثانيه تنجمعون بيها الا اكو سبب لرفضج
فاطمه:: ما اريد اتزوج اخاف صدك ما يصيرلي ضنه واظلم
فرات وياي تره صعبه ارجع اعيش نفس الشعور انتن ما تفهمني تدرن شكد صعبه من كل شهر يمر ليلة التجي بيها
ادمر دمار صح ما جنت مرتاحه ويا بسام بس الخلفه وحده
من الاسباب الي جان يأذيني بسببها اول سنتين بسام جان
زين وياي وراها مل من الانتظار خاصه من شاف معاذ وسراب صار عدهم طفلين واحنه گبلهم تزوجنه فرات هم
يجي يوم ويمل وكل واحد يتزوج بس اول فتره وراها يكوم
يريد جهال.
ريام:: زين ليش ما تحاجين فرات وتكوليله سبب رفضج
تبارك: اني ويا ريام صدم كوليله حتى اذا رضى ما تظله حجه
مروى: اني هم وياهن ناخذ رقمه من تلفونات الولد وحجي
وياه بالليل فاطمه خطيه تكسرين بخاطره مره ثانيه والله
اهلي يظلون وراج ويزوجونج ومازال جهاد راضي محد يكدر
يحاجيج حتى اذا امي ما رضت هو يقنعها مو صح بنات.
-صح
ريام:: اني اجيبلج رقمه ابوكه من موبايل جهاد وادزه الج
فاطمه:: هاا لا ما اريد ما يحتاج خلني افكر بالاول
تبارك:: اوو فاطمه والله ما يحتاج تفكير هو راح يبين من
نبرته اذا تردد امبين واذا ما تردد معناها هو اهم شي انتي
عنده.
ريام:: شوفي بالليل انسب شي اني. هسه بس يجي جهاد
احاول اخذ رقمه خوش.
تبارك:: اي خوش نلتم بالسطح وخابري
فاطمه:: احم لا مو اني عندي رقمه
ريام:: عليج الله واحنه صار ساعه عود نتوسل
تبارك:: اكص ايدي اذا ما متخابرين
مروى:: نصبنه عليها ظلت تبرر تالي عافتنه وطلعت من الغرفة واحنه لحكناها كعدنه بالحديقه ويا جديتي نسولف
للمغرب ريام راحت لبيتهم واحنه طبينه نصلي وره الصلاه
وكفنا اندير العشه جانت فاطمه طابخه معلاك وتگلي كبه
تبارك:: اني احب المعلاك من يصير بي مرگه قليله
-اي والله اني هم واحبه مصباح العيد جده حسنه غير
طيب تسوي.
فاطمه:: اي صدك تره جده حسنه هي طبخها طيب وتدرن
جان جدي سلمان ما يرضى غيرها يطبخ شكد ما يحب اكلها
مروى:: اكول جهاد وريام ما يتعشون ويانه؟
تبارك:: لا والله صدك نسيتهم تره اروح اصيحهم
- المعدله نسيتهم طلعت تركض وفاطمه تحجي عليها
شويه وجت تنفض بديها وتصيح.
تبارك:: عززززاااا عزااا شعيببب يماااا يا فضيحتنااا
فاطمه:: عزاا ولج شكوو اشفتي غير ادكين الباب
-هههههههه
تبارك:: كل شي ماكو بس ردت اضحك عليجن يلا وخرن
هسه يجون العرسان تره متت جوع شوكت تصبين العشه
-ذبت من ايدها وجتني كفختني لازمه بيدي وعلى اكتوفي
ايدها دكول جاكوك واني غير فضحت الامه بصوتي.
-اخخ يمااا اخخخ ولكم خلعت جتفي ياا يمااا يا بوياا
فاطمه:: اششش ولج حسج مالت العمى
جهاد:: و وجع شنو هلصوت
تبارك:: غير فاطمه تره كسرت ظهري شنو جهال وتضربني
والله فلا اشتغل وياهن ظلو بلا عشه عفتهم ورحت يم جده
انوب بس كعدت جرتني من اذني وابوي كمل صلاة السنن
ودار عليه واني سويت نفسي فد عاقله اشرلي اروح يمه
احمد:: بابا شنو هل صوت مو عيب وج شكبرج بعد تصيرين صوتج واصل نهاية الشارع شيكولون علينه
-تره فاطمه مشبعتني كتل يعني واذا شاقيتها عمي زوجوها
نخلص منها امي ما كتلتنه بكدها مو بنتكم اني شو ما ادافعون الي اهج واخليكم البس عبايتي واهج ما ارد بعد
معاذ:: لا لاا اا عليج الله ظلي يمعوده لا ينكطع الاؤكسجين
زياد:: اخخ يمااا اختنكت ولج تبارك اوكفي لا اموت وراج
خاااب طيرررري هو منو بحالج تره وجودج زيادة عدد سكان
العراق العظيم وزياده على الكرة الأرضية بس شنسوي
من لا چاره بعد رزق الله وجيه ما نتبطر قابل نذبج للجلاب
تبارك:: درت وجهي على ابوي يضم بضحكته واني انتظر
من يدافعلي جهاد كعد وهو وريام ويضحكون من جوه
لجوه توه عدلت كعدتي وسحبني ابوي لحضنه اذا افتح
الساني شيسكتني وزياد يكول لابوي.
زياد:: اخنكها يابه اخنكها اذا اذا انفتح البيكيسي ما سكت
جهاد؛: والله صدك ولا يمهج توته الج محبس من حصة
زياد شتريدين بعد شعدنه غيرج صدك جذب اختنا الصغيره
تبارك:: سكتت لخاطر ابوي وجديتي والمحبس
-لا يااا خبله مو صوجج صوجي ادافعلج
-انت حاير بمرتك زين دافعتلي
ضحك ابوي وجرني يبوسني براسي وجن البنات جايبات
العشه كعدنه نتعشه ادحك رجعت الضحكه لبيتنه جهاد
يشاقي ويضحك واخوتي وفاطمه حتى امي بس تجنب تحجي ويا ريام بس والله احس اتريد تحاجيها بس مدري
شنو الي يمنعها ولو وضع امي مو غريب علينه ونعرفه
وره العشه ابوي والولد طلعو وامي وجديتي راحو لبيت
خالي محمد واحنه لمينه البيت وصعدنه للسطح فرشنه
وريام راحت جابت حلويات وبباسي من ثلاجتهم وكعدنه
نسولف وفاطمه كعدت تسولف لريام على ايامها هي وفرات
ريام:: اوييي فدوه يعني يحبج من جنتي اصغيره
فاطمه:: هو من جنت اصغيره يعني 9اسنين اقل
جنت ما اجي يمه بس مره جان بيده جبس واني
رايحه ركض عليه وذاب روحي بحضنه وادلع علي
وهو من ذاك اليوم وهو صار يوميه من يجي يجيبلي
حلويه شكل لحد ما كبرت وهو ما بطل بس من كملت
سادس بعد ما قبلت اطلع وصرت ما اواجه ولد خوالي
ريام:: عجل شلون بعد ما شافج لحد ما نخطبتو
فاطمه:: لا مره گبل لا ننخطب دز مهى حتى يشوفني بالبستان .
-ورحتي لو لا
فاطمه:: هههههههه لا ما رحت بوكتها سمعنه حارث وهو
گال ظلي اني اروحله وراح تعارك وياه وثاني يوم تقدملي
وحتى وره ما نخطبنه جان حارث ورانه كل ما يريد يشوفني
يجي يگابلنه ويكعد ويخلي فرات يشب بنار يغار عليه منه.
مروى:: مسحت دموعه شكد صعبه بكل مكان اله ذكرى
وبكل كعده نفتقده غيره السالفه وظلينه نسولف ونضحك
ما حسينه على الوقت الا من دك تلفون ريام شالته ترد على
جهاد ضحكتنه من گالتله.
ريام:: هلاوو ابو جهالي
جهاد:: ابو جهالج ينتظر امهم ولج وينج شو ناسيتني
- مثل ما عفتني ورحت لفرات اني اهم عفت وجيت
يم خواتك نكسب حسنات من الناس تعرف كعداتنه
عباره عن حسناتها متطايره.
جهاد:: اي تعلميني بكعداتجن انتن النسوان يلا بويا
تعالي تاخر الوكت ورانه دوام باجر من الصبح.
ريام:: جايه بس خمس دقايق.
-ولا دقيقة يلا تعاي
مروى:: سدته ونزلت تركض وفاطمه تحجي عليها لان نزلت
ركض من الدرج بقينه احنه نشجع بفاطمه حتى تتصل على
فرات.
فاطمة:: واذا احد يمه شلون تريدن تفضحني
تبارك:: ما نفضحج بالاول دزيله رساله تأكدي وحده لو اكو
احد يمه يلا فاطمة گبل لا يجون الولد اني راطح اكف بالبيتونه خاف احد يجي انطيج خبر يلا خليج سباعيه
فاطمة:: لعبن صدك بعقلي طلعت رقمه متردده بس
لازم انهيها وارتاح وحتى باجر اعرف شجاوب جهاد دزيته
-السلام عليكم وظليت انتظر يرد عليه دقايق و رد كاتب
-وعليكم السلام تفضلي
-ظليت اكتب وامسح والبنلت ينگن فوك راسي تالي جرته
تبارك وهي كتبتله واني ادحك وياها كتبتله.
عندي موضوع وياك عادي اخابرك
-ضربتها انجبي تبارك مو عيب هيج تكتبيله هسه يفتهم غلط
تبارك:: ما يفتهم لا تظلين هيج فاهيه ولج والله سمعت
ابوي يكول لجديتي مقتنع بهذا ابن عمه مدري شسمه
فاطمه:: سكتت خاف صدك وهم يجبروني اتزوج غير
اموت اني ما صدكت خلصت من بسام ارجع اخذ هذا
اهتز الموبايل عرفت دز رساله فتحته كاتب.
فرات:: خير فطوم صاير شي قلقتيني
-فرات
-عيونه
- خجلت انوب بعد ما اعرف احجي عفية فرات تره
ما اعرف احجي لا تحاجيني هيج مو عندي موضوع وياك مهم.
فرات:؛ هههههههه هسه اني شكلت يلا عمي سكتنه
كولي فاطمة شنو الموضوع واضح اله علاقه بيه
-دحكت البنات يشجعني احجي شويه واتصل ردت
وجاني صوته يمه غير احس گلبي بماع وايدي يرجفن
فرات:: الوو فاطمة وين رحتي تره ظل بالي شصاير
احد محاجيج اهلج بيهم شي قلقتيني والله العظيم
-فرات تعرف ابن عمنه هذا الي ساكن بمحافظة.....
-يا هو منهم همه اثنين وشبيهم ما افتهمت شلج
علاقه بيهم اكو شي الموضوع يخصهم احجي
-اي اليوم ابوي حاجيني علمود واحد اسمه صباح
او مدري هيج اسم اني ناسيته ما اعرفهم زين
فرات:: قصدج صلاح
-اي صلاح
-اي شبي؟
-هاا مو
فرات:: اي مو شنو سولفي تره خوفتيني شلهم علاقه بيج وابوج شگالج شليتي حالي فاطمة حتى جرحي
وجعني.
فاطمة:: لا لا بس مو هو هذا صلاح طالبني من ابوي
لابنه الجبير هذا الاعزب واني ردت....
-شنوووو شتحجين انتي والقران انعل ابهاتهم فاطمة
وحك ذاك العزيز لو تصير بعد الدم للرچاب لغيري ما
تصيرين وحتى لو انتي ترفضين ولككم مو اني جيتتت
وكلت اريدددهاا شبيييه وترفضوني ليش تلوعون گلبي
فاطمة:: اششش فدوه فرات لا تفضحني خلي افهمك
فرات: شفضحج فاطمه والله احبج شنو الي تردينه اني حاظر حتى اذا من وره اهلي اشيل مناي انروح للمدينة لو حتى تدرين انروح لغير محافظه بس لا تكسريني گلبي رايدج وغلاة عيونج .
-شبيك فرات هو اني خابرتك علمود احاجيك جهاد حجي
وياي علمودك فرات اني خايفه اخاف ما يصير عندي طفل
وتمل مني وهذا حقك من حقك تريد يصير عندك أطفال
فرات:: هذا بسبب رفضج عمي ما اريد جهال هذا علاوي
ابني وابنج نكبره والحمد لله وبعدين الجهال رزق لا بيدي
ولا بيدج ان شاء الله كتبلنه الحمدلله نعمه وتزيد سعادتنه
وان ما رزق ف الحمدلله علاوي كافي اهم شي انتي تصيرين
الي والله ما اريد غير اشوفج ابيتي اكمل حياتي وياج انتي
بالنسبة الي حلم كضيت عمري اسعى حتى احققه بيوم
الي تزوجتي ما كدرت والله اكطع نفسي فاطمه اني مو بس احبج هايم بيج وعيونج.
فاطمه: احس وجهه يبخ نار ما اعرف شحجي سديت الموبايل بوجه والبنات يضحكن عليه عفتهن ونزلت
لغرفتنه سحبت جرجفي وتمددت غطيت حتى راسي
وغمضت واني انتظر الصبح بفارغ الصبر وما جنت
اعرف وره هذا اليوم راح تتغير حياتي بالكامل......
