رواية قيود العوف الفصل الثالث والعشرون 23 بقلم ريتا

أقنع روحي ما اريدك

و اجافي و ابتعد عَنك

مثل نَجمه احترك وحدي

و انه لو هَيست حزنك

بس تندهني مو تگرب

اطيح من السما لحضنك ..

لتنسون التصويت + التعليقات بين الفقرات + متابعة حسابي قلبي ❤️‍🔥

شبابات صوتوا دوسوا علىٰ النجمَة لتنسون مُهم🤏🏻

_______________________________

كلنا واگفين ومتحضرين بَعزم وناوينَها نزع رتبَتة ونزعت رتبتِي انه هم ، بالمهمة الرتب تنزع حتىٰ الضابط ما يسَتهدف ، 

مثل عادتنا اذا وگفنة كلنا سوىٰ وگفتنة ما تخلىٰ من السوالف والضحك والتصنيف واحد يختلف علىٰ الثاني محد صاف وي احد 

تحرك مصطفىٰ يفرك بأيدية بحماس 

-مصطفىٰ: بوية اليوم تشريب 

-قاسم: شبي گصاب العرب 

-مصطفىٰ: هلگد ما عنَدي حيل وقوة اذا اكضك اسويك وصلتين . 

-قاسم: وعلي ويكرم علي بيك زيج ، بس خليها ورة المهمة 

-أحمد: لا لا قاسم حسن أخلاقك هابطة 

-قاسم: شباب علىٰ كيفكم وياي ، ترىٰ صارن زيجين 

-أحمد: جر زيد بواحد خلي يصيرن ثلاثة 

-زيد: انتم صدگ سرسرية ، حتىٰ الساكت مايخلص منكم 

-مصطفىٰ: ليش هو الي يگابل قاسم يخلص

-قاسم: ليش وين گاعدين بعد روحي بالرحلة الاولىٰ وصايرين عقال ، شو وراكم ركض وملاطخ ضحكوا يابشر يجوز تموتون بعد شَوي 

-زيد: اني بالنسبة الي عار ما اموت

-مصطفىٰ: وانه هم عار 

-أحمد: اني شريف شباب

-مصطفىٰ: انچب لك منيلك

جريتة من ملابسَة حيل ورگعتة بوسَة قوية 

-قاسم: اويليييييي بس انتَ التحچِي صدگ 

عقچ وجهة ومسح خدة بقوة وگال 

-مصطفىٰ: من خرة علىٰ بوسَتك لا تبوسنِي 

-قاسم: بعد گلبي علىٰ راسِي

-زيد: كافي ولد الولدل طلعتونا من ط*** الچلب 

-أحمد: لأن ماعزمتنا 

-قاسم: هذا كارثة هذا طرگاعتة طرگاعة جيبة بيه عگرب بس يمد أيدة يگرصة

-مصطفىٰ: مايندي الندىٰ من الفگورية

-أحمد: ادري هسة اذا متت بعد شَوية بيش يفيدنك المن ضامهن متگلييي

-زيد: مرتي تريَد أحدث أيفون نازل ، وامي تريد ثلاجة سحب بلا شني عمتي جايبة مثلها وتريد كاونتر جديد هذا ماگام يعجبهة والفروخ چنهم امهم طلباتهم ماتخلص ولكم وييييين انطيييييي وجههييييييي 

                                            

              

                    

-قاسم: اهااا هناا السالفة طلعت المرة مضبطة عليك 

-مصطفىٰ: والله وسفة وهاي شواربك چا

-قاسم: شواربيش چنهن سرة مال نمل 

-أحمد: چنهن شوارب مراهق توه داچات هههههههههه

دنگ اخذ طابوگة چبيرة وشالها واحنة طگيناها بركضة ونضحك 

-زيد: أحمد چنة چيس ليدي ويعيب 

-أحمد: زيد احاول أحترمك بس من اشوفك أتراجع 

-أحمد: بس لاحظولي العوف

-مصطفىٰ: ولك ماتعب صار ساعة يعيد الهم نفس الحچي 

-قاسم: ومستعد يگعد يَومين يعيد الحچي والخطوات من تصير مهمة ، 

-زيد: لو يوم عرسة ما يركز ويفكر الهة

-أحمد: ادري بيوم عرسة عليمن يركز ويفكر شيرادلهة 

عدلت وگفتِي وصفنت وركزت وياه وبحركاتة وهَو يأشر ويسَولف ، وماا احس اله كفخة علىٰ علباتِي التفت بحرگة 

-قاسم: أشتعل ابوك 

-مصطفىٰ: يابعد روحي شفتك صافن گلت أخلي ينتَبه الصفنة للمطي 

-قاسم: احطك وانعل شيب الخلفك هسَة 

أتقدم وسد الدفتر وگال

-العوف: شبَاب مو تنسون ال

بعده ما مكمل الحچاية وگال مصطفىٰ 

-مصطفىٰ: ولكم راح اششششگ هدوووومييييييي واتصلخ هنااااا هلگد ماا عادها عليَنا 

-زيد: واني راح افتح راسِي وأترسة تراب لأن هلگد ماا انطبع الحچي بيَه بعد سنتين ما يروح 

-العوف: شبيكم سرسرية هتلية 

-أحمد: وداعة طليان يعقوب اني حفظت الكلام علىٰ گلبي أكثر من اسم امي . 

-العوف: اروح فدوة لگلبك الخايس ، هو أهم شيء أنتَ لأن بيك طفرة أبو صابر 

-مصطفىٰ: غرد 

كتف أيديه وحچة بصوت جدي .

-العوف: تمشون علىٰ الاتفاقية سَيدة ، اي حركة غلط منا منا تتحاسَبون عليها .

أعرفكم شنو گدامي أبطال انه يوگفون بَوجه الموت ، بس هنا الاريدة مو هذا ، التركيز والتحرك الصح ماا أريد حركة غلط مرات مو مقصودة بس تلوص وتنحسب ،

-أحمد: وملازم اول ليال ؟ 

-العوف: جاهزة 

ألانتباه يا ابطال سهرنا ليالي تخطيط واتفاقيات داخل وخارج العراق وتعبنا علمود هاي المهمة ، مهمة تنقذ بيَها أختك وبنت عمك وأمك وابنك وابن اخوك 

بيها أرواح ، وبيَها حق أريدة يرجع ، عيونكم عشرة عشرة تنفتح ، أبطال وما عليكم خوف بس هذا الكلام واجبي .

            

              

                    

كل واحد موجود عرف وين مكانة ويمتىٰ تحركة ، صار وقتها عفنا الضحك علىٰ صفحة ، وصارت حركتنا وتصرفاتنا جديَة بحذر ، 

سمينا بأسم الله وعلىٰ راسَنا العوف وبديَناها . 

-رغد: اي وشصار كملت !! 

-قاسم: هه ماتبقىٰ معلگة عندنا طبعاً تكمل .

-رغد: واعتقلتوه ؟

-قاسم: اعتقلناهم قصدج لأن كل الگ*** ملتمين بوكتها

ولج غير وليناهم ولييية وحق علي احتارو شيسوون كلها مسلحة القانون كله فوگ روسهم بم*** السرية هههههههه وجوهم صارت صفر شوي ويبوسون قنادرنا

-رغد: ياا الله ههههههههههه غير اتونس من تسولفلي ياريت تسولف الي كلشي مو هيچ سطحي خلييي اعيش وياكم 

-قاسم: انچبي مو يمج 

-رغد: محد تصوب لو لا سامح الله صار شيء ؟ 

-قاسم: لا .. درسَها دراسة ، خطوة خطوة ، بتركيز بحذر بأتقان ، مهمة چانت عظيمة من ناحية كل خطوة بيَها بعد تعرفينَة شلون يصفن للشيء 

-رغد: هههههه أعرفة أعرفة .. ماغلطوا من سمَوه ابو العوف 

-قاسم: ارتااااح كلشش ما شايَفة يضحك هيچ من قبل ما تصير المُهمة هاي هههه دتعاي شوفيَه حتىٰ وجهة ورد 

-رغد: بيها نقذتوا العراق والي بيَه من أطفال ، نساء ، وحتىٰ والشباب المراهقين 

-قاسم: وهَذا شغلنا نفديهم بروحنا .

-رغد: روح أختك برغم خوفي عليكم بس فخورة بيكم حيل ابطالي عزوتِي شموخي ورفعة راسِي بين الناس كلها .. 

-قاسم: هههههه اگلج شلون يردون علىٰ هيچ حچي؟ 

-رغد: والله ماا ادري ، أنه أعرف اسولفة 

ضحك وسَكت حچيت وگلت . 

-رغد: اخابر علىٰ العوف مايجاوبنِي ؟ 

-قاسم: ما فارغ كلش ملتهِي وبعد يوميَن يحولهم للبصرة يم زبايلهم ، يايابة رغيدة استجوبهم بطريقة تدوخ فرهم فر ، مثل كل مرة خله الي گدامة يسولفون وما حاسين ، 

اخر شيء فتح الكاميرا تسجيل وتصوير ، وهمة يعترفون وما يدرون بالكاميرات ولا بالتسجيل وماكو اثر چان لأي كاميرا بالمكان الي همة بيه چانت الكاميرا صغيرة بگد الذبانة وخالهة بمكان مايخطر على بال الشيطان

-رغد: عَوف بشغلة وشلون ياخذ منهم معلومات يذكرني بشيء 

-قاسم: بشنو 

-رغد: شايفة من تخلي طعم للفارة وتجرها للقفص وهي تجي بكُل أريحية ماشايفة القفص ولا منتبهة عينها علىٰ الطعم

عَوف طريقتة هيچ يخليهم يركزون علىٰ الطعم يخليهم يتناسون القفص وماينتبهون اله ، ويدخلهم بالقفص ويصيد صيدتة وهَو مرتااااح  .. 

            

              

                    

***** 

حكيت خشمِي وانِي اباوع للباب منتظرة ام علي تجِي حتىٰ اخليها يم ماما ولو هَي متقصر اساساً كل اليوم يمنا بس داريد اگلها حتىٰ متشك . 

مرت نص سَاعة تقريباً وانفتح الباب باوعت الها فاتت رحت بسُرعة عليَها سلمت عليَها ودخلتهة للمطبخ وهي تباوع الِي بتساؤل 

-جُمان: احم .. خاالة داريد منج خدمة .

عقدت حاجبَها وگالت 

-ام علي: اتفضلي خالة 

-جُمان: شسمة .. خالة داريد اروح يم مَنار كُلش مشتاقة الها وتعرفين بعد الي صَار متگدر تجِي وماما اذا اگُلها متقبل تخليني اروح . 

-ام علي: خالة لتروحين ابوها مو بشر لتصير الج بلوة هناك !! 

-جُمان: لا خالة أبوها الصبح مموجود متشوفيني داريد اروح يجي بالليل هي گالت . 

باوعتلي وصفنت .. ردت وهي ممقتنعة بس من اللحالِي عليها قبلت وگالت انِي اقنعها لأمج 

-جُمان: بس خالة اطول يمها شَوي تعرفين سوالف هواية 

ضحكت وگالت 

-ام علي: روحي خالة روحي

درت وجهي ومشيت ولبست ملابسِي اخذت جنطتِي واخذت فلوس وطلعت باوعت للمنطقة والناس تروش من الصبح وأول مطلعت باوعولي 

أمشي ويلاگينِي أحد واغمض عيونِي بقلة صبر من الكلام الي اسمعة ماا الي خلگ من الصباحيَات اسوي مشكلة بالمنطقة واني مرهمة طلعتِي بالويل اتغاضيت عن كُل الكلام واهمس لنفسي

:- ميخالف اتحملي ... لأجل عيَن تكرم ألف عيَن .

لخاطر امِي أتحمل كُل شيء عدي كلامهم لا تركزين بيه 

وگفت علىٰ الشارع واباوع علىٰ السيَارات ادور الي رجال چبير اصعد ويَاه .. والله وعبرت سيَارة بيها رجال چبير كُلش ..

اشرت اله ووگف صعدت وگلت اله

:- عمو داريد توديني لبناية ال*** لمكان العيادات الموجودة هناك .. 

ماگال شيء هز راسَة ووصلنِي هناك انطيتة الكروة ونزلت باوعت للمُكان واني اعصر بأصابعِي بتوتر وقلق ... 

اتنهَدت ومَشيت مِن مسَافة للثانيَة اكو عيَادة لفد دكتور ودكتورة .. 

دخلت علىٰ اول عيادة وطلبت احچي وي الدكتورة عندي أستفسار فتت الها وبديت احچِي وياها وأبلغها اني محتاجة كذا عمل وچان ردها الرفض وكلمة ، ممحتاجة موظف بالعيادة ، 

طلعت من العيادة ودورت علىٰ عيادة ثانيَة ورحت نفس الحچي وهم چان ردهم الرفض وممحتاجين 

انرفضت هواية بسبب مچانوا محتاجين موظفين بالعيادة

رجعت ادور واخذني الوقت واغلبهم رفضوا اصلاً أدخل احچي وياهم بسبب چان عندهم لود ومراجعين هواية فتت لكُل العيادات الي هنا باوعت اخذني الوقت وقرب يأذن 

            

              

                    

اتنهَدت ومَشيت وانِي محتارة مَشيت هواية عبرت الشارع وطلعت من المُكان أمشي واباوع علىٰ اللافتات ادور اسم عيادة او دكتور موجود هنَا 

أمشي واحس نظرات العالم دتنهش بيَه ابد مدارتاح للناس ولا اگدر أثق وأمن بأحد ومِن أمشي بصف أحد تصير عنَدي رهبة بس ! 

مو طفلة وأخلي هاي الأشياء تأثر عليَه اني مجبورة أعتمد علىٰ نفسِي وأحارب بمرحلة جديدة .. 

وهسَة بالذات اجة الوقت الي ارد بيَه معروف مَاما بكُل شيء قدمتَة ألي .. 

راح اعالجها واطيبها وأخذها عند احسن دكتور مراح أخلي احد غيري يتكفلها ويَمن علينا ..

صح أكو ناس تقدم الك معروف بس بالزمن راح يعايرك بيك ويگُلك ترىٰ اني سويت الك هيچ تذكر ؟ لو مَا اني چان مصار 

دامشي واجت عينِي علىٰ عيادة دكتور أسنان غمضت عيونِي ودعييت من كُل گلبييي هلمرة أحصل شغل بالعيادة .. 

اخذت نفس عمييييق وزفرتة ودخلت چانت العيادة فارغة رحت للسكرتيرة

-جُمان: مرحبا حبيبتي 

-السكرتيرة: أهلاً وسهلاً تفضلي ؟ 

-جُمان: ليش العيادة فارغة ؟ 

عقدت حاجبها وردت بأستغراب 

-السكرتيرة: توة فتحنا والناس تجي علىٰ المواعيد لأن حاجزين اونلاين تفضلي أفيدج بشيء ؟ 

-جُمان: الدكتور موجود ؟ لو هم مجاي داريد احجي وياه فدوة

-السكرتيرة: موجود توة اجة بس لحظة دابلغة 

راحت دخلت بقت شوي واجت گالت تفضلي .. 

مشيت واني لسانِي مابطل لهج بأسم الله تعرفنِي شگد محتاجتة سهلها يسرها .. 

طرقت الباب طرقات خفيفة وفتحتة ودخلت چان گاعد علىٰ الكُرسِي وگدامة الأدوات باوعلي وابتسَم وگام وگال

-الدكتور: ياا اهلاً وسهلا 

ابتسَمت اله بتوتر وهزيت راسِي وگال 

-الدكتور: اتفضلي ؟ 

بلعت ريگ وگلت بدون ماا اطولها ويَاه خليني احچيها ليگدام 

-جُمان: احم .. دكتور اني محتاجة شغل .

باوعلي وعقد حاجبَة وحرك راسَة بتساؤل رجعت حچيت

-جُمان: ياريت تگدر تشغلني بالعيادة عندكم . 

-الدكتور: بس ممحتاجين انتِ شفتي سكرتيرتي موجودة وفراش موجود ممحتاج شيء بعد ؟

اتنهدت وگلت 

-جُمان: دكتور اني محتاجة الشغل كُلش .. ياريت اذا تعرف وين ممكن احصل شغل تگُلي 

باوعلي وصفن وگال 

-الدكتور: زين .. تصيرين مُساعدتي بالغرفة ؟ 

            

              

                    

باوعت اله بأستغراب وعدم فهم اللتفت علىٰ الادوات وگال 

-الدكتور: يعنِي تحضريلي الادوات .. وينغسلن ويتنظفن .. ومثلاً من يجيني مريض واحتاج شيء مموجود يمي اگلج عليه وتجيبينة وتلزمي وتوگفين يمي فهمتِي ؟

هزيت راسَي برضا وگلت 

-جُمان: ياريت دكتور اني قابلة 

ماسَولفت ويَاه هواية اتفقنا علىٰ المبلغ وچنت راضية بيَه كُلش وفرحانة بعد تعب اليوم ... 

-الدكتور: اذا تحبين بلشي من اليوم 

تلبكت ورديت بتردد 

-جُمان:  دكتور .. اليوم ماا اگدر ممضبطة وضعي من باچر ابلش ان شاء الله 

هز راسَة برضا وگال .. براحتج بس باچر تجين قبل هذا الوقت 

هزيت راسي اله واتفقت علىٰ الوقت وطلعت من العيادة واخذت نفَس بيَه راحة ارتاحيت كُلش .. 

لا عندي معرفة بالصالونات ولا بالخياطة ولا بالصبغ ولا شيء ثاني شلون اشتغل لعد ملگيت نفسِي غير دافكر بالعيادات .. 

باوعت للشارع واني اريد احصل سيارة وهم اريدة حجي جبير بالعمر .. أشر ويوگف اليه شاب وأرجع أشر اله روح 

ماوگف الي رجال جبير .. بقيت امشي بالشارع واني ادور بالسيارات دامشي ومركزة وعيني عليهن 

فزيييت بخرعة وخوف من دامشي وعكست الي سيارة سَودة مُضللة گدامِي مو غريَب شكلها عليَه بس دايخة مداذكرها 

فتحت عيونِي علىٰ وسعهن مصدوووومة من شفتة نزل منَها وسد الباب بقوة لابس بدلتة العسكرية ولابس طاقيتة أتقدم الي عاقد حاجبَة ومنطط عيونَة همسَت بصَدمة ....

:- عَوف ! 

*****

گاعدة بالكافتريا والبنات كُلها دتفكر بالتخرج ودتحضر واني دافكر بحياتي وضيمي وابوية .. 

حطيت راسي علىٰ الطاولة ولفيت ايدية عليه 

حسيت الكُرسي الي يمِي اتحرك وگعد شخص عليَه رفعت راسِي بسُرعة باوعت 

عقدت حاجبي بأستغراب من شفتة قاسم 

-قاسم: لو مكملة نومتج 

رديت عليه بصوت ثگيل وتعبان 

-منار: هاي شدتسوي هنا ؟

-قاسم: وعليكم السلام انتِ شلونج ؟

ضحكت بتعب وحكيت خشمِي رديت عليه وگلت 

-منار: اعذرني .. ما أنتبهت 

مسح طرف عينة وگال 

-قاسم: چانت عندي شغلة يم العميد وگلت خلي فد مرة اشوف ام الحدود 

باوعت اله وضحكت بصوت خفيف 

-منار: بعدك ماناسي الموقف ؟ 

-قاسم: عار الينساه

            

              

                    

باوعلي بنظرات حيرة صفن عليه وگال 

-قاسم: ام الحدود شو ذبلانة ! ولسانج مبلوع وصايرة هادئة ؟ 

-منار: لا بس مالي خلگ 

-قاسم: يگلك كثرة الكتمان تموت الأنسان 

-منار: علواه 

باوعلي وفتح عيونة وگال

-قاسم: واصلة مرحلة انتِ .. زين خو مو هم واحد من الجامعة مضوجج لو وياج ؟ 

هزيت راسِي بالنكر وگلت 

-منار: تؤ 

-قاسم: خاف راسبة بالامتحان ؟

-منار: تؤ 

-قاسم: ادري حمامة انه وگضيتيها عليه تؤ و وتؤ !! 

-منار: اي لعد شگول ماكو شي 

-قاسم: خاف جايتج الشهرية ومفولة الهرمونات

فتحت عيونِي ورديت عليه 

-منار: انتَ صدگ ما تستحي .. بلا هاي حچاية !!

-قاسم: هو انه ماا استحي هاي منتهين منها .. 

بس الحچاية شبيها ؟ 

-منار: عيب بابا عيب 

-قاسم: اذا بالدراسة تنذكر واذا بالقران مذكورة وبالواقع موجودة بعد العيب منين طلعتي 

اتنفست بقووة وگلبت عيوني 

-منار: عيب بابا اسكت 

ديجاوبني ودگ موبايلة باوعلي وقلص عيونة فتح خط وبقىٰ يگول 

:- اها .. اي اي ... عُلم .. اي .. 

باوعت أله بأستغراب وعقدت حاجبي من طريقة كلامة ختمها وگال

:- اي جاي جاي .. 

سد الموبايل وگام وگال 

-قاسم: انه هسة رايح ام الحدود  ... بس بعدين اعرف الدالغة هاي 

گرص خدي بخفة وگال 

-قاسم: كلش ما يلوگ الزعل عليج منار .. ضحكي هلوجة ضحكي ..

بقيت صافنة بوجهة وفور أنتباهي لحركتة ضربت أيده وگلت 

-منار: لتمدها بعد 

-قاسم: بوووية الحدود مايخلص بووووووية

دار وجهة وراح ضحكت بخفة احس مودي تغير شوي أتصل عليه ابو الخط شلت جنطتي وطلعت صعدت عيني علىٰ الطريق واحس گلبي انقبض وبسَرعة اتكئبت واتغيرت نفسيتِي توة ارتاحيت !! 

عقدت حاجبِي بخوف وأستغراب من نزلت مشيت وصلت قريب علىٰ بيتنا وصوت الصريخ الي طالع من بيتنا تارس الشارع 

خفق گلبي بخوف رجفت شفتِي أريد رجلية يمشَن بيَه ماكو خصوصاً من أشتد الصريخ والصايح

ركضت بقوة واني بالي يم اهلي خايفة واحد منهم صار بيَه شيء شفت باب بيتنا مفتوح دخلت امشيء بخطوات ثگيلة كلها خوف ودموعي نزلت قبل ماا اعرف شصاير

            

              

                    

وگفت بصدمة وجموود من شفت امي واگعة بالگاع وتلطم علىٰ رجليهة ووجهة مخرمش وصوتها مبحوح من الصريخ

ركضت بسُرعة وگعدت بالگاع لزمت وجهة بأيدي واني ابچي واشهگ بخوف وارجف

-منار: مَاما شنو هذااا حالج شصايييييررر 

ردت عليه وهَي تشهگ وتحچي بتقطع

:- ولچ يمهة ضع ضعنة انهجم بيتناااا هجم بيتنا الله لا ينطي ولا يوفقة ولچ سود عيشتنا 

بقيت صافنة ارمش ودموعي تصُب وشفتِي ترجف ممفتهمة شيء من كلامها لطمت علىٰ صدرها وگالت بصريخ 

:- ولچ يمه ابوچ كاتل ثلاثة وشارد والولد ميتين ثلاثتهم

صاعقة وضربت جسمِي فتحت عيوني علىٰ وسعهن ممستوعبة الي سمعتة وممستوعبة حجم المُصيبة الي وگعنا بيهة سرت رجفة بكُل جسمي ايدية صارت ترجف بشكل مو طبيعي تهز تهز

الخوف الي دگ بصَدري ماا اعرف اوصفة .. رجفت شفتي وبچيت بصوت اول ماا استوعبت المصيبة الي صابتنا شاغت روحِي 

هذا الي چنت خايفة منه تايهة من ابوية اتدمرنا وتنهينة ..

******

رمشت بعدم أستعياب من الموقف گلبي صار يُدگ بسُرعة من صار گدامي قلص عيونة وباوع الي بجمود حرك راسة وگال بحدة 

-عوف: جُمان ؟ 

صفنت عليه وارمش بصَدمة رديت بتقطع وتردد 

-جُمان: عوف !

شد علىٰ اسنانة حيل وگال بحدة

-عوف: صار سَاعة اباوع الچ من تمشين وما مستوعب وسَاعة اگول هيَ وارجع اگول مو هية شجابها هنا وحدها 

گال الكلمة وشد عليَها ، بلعت ريگ وما عرفت شنو اگول وشلون ارهمها واني ماا اريدة يعرف دادور شغل هنا بقيت ساكتة واباوع الة 

حك طرف حاجبة ودار وگال 

-عوف: تعالي صعدي موحلوة وگفتنة بنص الشارع 

-جُمان: هاا 

التفت باوعلي وهَو شاد علىٰ وجهة لوىٰ شفتة وگال 

-عوف: جُمان شبيج ؟ 

-جُمان: اي اي 

دار ومشىٰ واني رحت وراه صعدنة بالسيارة وحركها صافنة وأفكر شلون حظ هذا شلون شافني !! 

سمعت صوت الجداحة شغلهة ورث جگارتة وهو يسوق وگال 

-عوف: اي منتظر ردج 

عصرت أصابعي ورديت بتقطع 

-جُمان: اجيت هنا لأن .. 

باوعلي وگال 

-عوف: اي لأن ؟ 

حركت أيدي اهز بيها واني اجمع بالكلمة 

-جُمان: داجيب علاج ... اي داجيب علاج لماما علاجهة خلص !! 

            

              

                    

ابتسَم ابتسامة جانبيَة ساخرة وگال 

-عوف: أكو شارع بمنطقتكم هذا الشارع بس تعبرينة گدامج أكو صيدلية چبيرة .. ماا أتوقع ما تعرفينهة وماشايفتهة

-جُمان: اي شسمة .. مموجود مالگيتة علاجهة 

-عوف: اي انبلع

-جُمان: اي مموجود يعني 

باوعلي ورفع حاجبهة عض شفتة من داخل وگال

-عوف: زين نگول علاج امج ممتوفر بهذيج الصيدلية ؟ جيتج لهذا المكان شنو ؟ 

وتفترين وحدج هنا ؟ انتِ شلون جاية لهنا 

باوعت الة ورمشت بوجهة درت وجهي وحكيت گصتي بتوتر ورديت

-جُمان: اي مو داگول مالگيت علاجهة اجيت لهنا داجيبة 

ضحك ضحكة قصيرة بتقطع وگال 

-عوف: اي وجبتي ؟ 

-جُمان: اي جبتة هذا بالجنطة 

باوعلي بنظرات خاطفة هز راسة وسكت .. بقيت اعصر بأصابيعي ماا أعرف اذا صدگنِي لو لا .. 

-جُمان: شچنت دتسوي انتَ هناك ؟ 

زفر دخانة ورد عليه وهو ديسوق 

-عوف: شغل 

لويت شفتي وسكتت باوعت بأستغراب من ركن السيارة وگفها باوعلي وگال 

-عوف: ليش جاي تچذبين ؟ 

رمشت ورديت بصوت ثابت حتىٰ ميشك بيَه 

-جُمان: مداچذب !

ميل راسة وثبت نظرة عليَه ذبلت عيونَة وگال بهدوء 

-عوف:- يعني عبالج هاي الفترة الي بقيتي بيها عندي عبرت هيچ ؟ حافظج شبر شبر .. أعرفج من نبرة صوتج من ما تحچين الصدگ 

اشر علىٰ عيوني بأصابعة وگال 

-عوف:- عيونج من تچذبين اعرفهة ونظرتج حافظها حفظ  

حسيت حرارة گامت تطلع منِي من اتنفس وترني بنظراتة بكلامة الي حچاه ووضح اليه انوا عرفني داچذب واحس شَوي وابچي ..

-عوف: انه ماراح اضغط عليج بس هذا المكان بالذات ماا اريد اشوفج بيَه بعد ولا تطلعين بتكسِي وحدچ تفترين 

ثبت عيونة بعيوني وگال

-عوف:- بنص شغلي وعقلي وروحِي يمچ أفكر بيچ .. بس اتذكر وصيتچ علىٰ نفسج وگلت الچ انه أخاف عليچ لا تطلعين وتطبين لكل مكان وحدچ 

:- لا تصعدين وي الرايح وي الجاي 

سكت وزفر ضرب الستيرن وگال بحدة 

-عوف: المكان الچنتي بيه اخيس مكان كل الشارع گ*** وتفترين وحدچ ولچ جُمان ليش ماتگعدين ليش تدوخيني انتِ ملاحظة نفسج من يا كارثة طلعتي 

            

              

                    

وتفترين وحدچ محد وياچ والمكان الرايحة اله بعيد عن بيتكم !! 

بللت شفتِي وباوعت اله ورديت 

-جُمان: يعني أكسر روحي بالبيت احنة نسوان نحتاج كُل شيء احتاج اطلع واجيب احتياجاتنا يعني بسبب الي مريت بيه ابقىٰ مقفلة علىٰ نفسي وگاعدة وانوب !! 

منو النة ! عوف 

-عوف: انه الچ ... ولچ لو تردين نجمة من السما انزلهة الچ لو انه بأخر الدنيا وتردين شيء أجي ألج وهو بيدي 

:- ولچ انه جبتج بس ما مرتاح عايفج لوحدج گلبي وروحي يمچ أفكر بيچ وانه بنص شغلي اللگاج بالشارع وحدج وطالعة بتكسي وترجعين بتكسي وحدج 

مسح وجهة وگال 

:- والله راح اتسوودن يعني شلون اكضج أربطج اصمغ رجليج اگمطج ولچ شسويلج وتبطلين عناد !!

-جُمان: عوف والله مايصير شيء بعد اصلاً هاي اول مرة اطلع بيهة وطلعت منتبهة 

ضرب رجلة وگال 

-عوف: خرب بالگ*** ولچ يا منتبهة وگفت السيارة ووگفتي تباوعيلهة وانتِ ماتعرفين منو بنصهة صفنتي

-جُمان: لعد شسوي غير الشارع متروس ناس !! 

-عوف: ولچ يعني اذا الشارع متروس ناس أمان 

-جُمان: لعد شلون 

-عوف: ولچ هاي العيارة بطليهة

فتحت حلگي وعيوني

-جُمان: اني عيارة !! 

-عوف: عيارة ونص 

درت وجهِي عنة وحچيت بغيظ

-جُمان: عزا عزا والله متستحي شحچي وياك بعد 

عم الهدوء بيناتنة درت وجهِي والتفت عليه شفتة صافن عليَه ويباوع الي بعيون ذبلانة ويرمش بثگل خفق گلبِي وصار يدگ سريع

-عوف: وين اضمج حتىٰ يرتاح گلبي عليچ ؟ 

:- حتىٰ من اضمج بروحِي هم ماا ارتاح 

بلعت ريگ رمشت بثگل وحچيت 

-جُمان: عوف 

-عوف: لذَة عيَونِة وروحَة أنتِ .

خجلت احس أريد افتح باب السيارة واشرد گلبي ما وگف وهو يدگ سريع توترت حيل 

-جُمان: عوف لا تحچي هيچ 

ضحك بثگل وشغل السيارة وگال

-عوف: عيارة 

حصرتنِي الضحكة ودرت وجهِي علىٰ الجامة اخذت نفس عميييق ابتسَمت ابتسامة واسعة من رجع شغل اغنية هيثم وهو يدندن ويَاه ويغنِي 

أضعف گدامَك بس أنتَ .... وأتمَالك نفسِي بهل سَكتة 

نظراتَك تحرجنِي وانسىٰ ... وين تودينِي ليا مرسَىٰ ؟ 

            

              

                    

غمضت عيونِي وانِي مستمتعة بصَوت هيثم واحساسة وبالأكثر بصَوت عوف الي يغنِي ويَاه بصَوتة الخشن المبَحوح 

صافنة وسارحة بالاغنية والكلمات ودگ الموبايل من الجنطة چانت خالة ام علي دتتصل رفضتة ودزيت الهة رسالة 

:- خالة اني جاية 

باوعلي وگال 

-عوف: ليش رفضتي ؟ 

-جُمان: خالة ام علي دزيت الهة رسالة هسة تسمع صوت السيارة واني گلت الهة رايحة لمنار 

ضحك وگال 

-عوف: حلو انتِ اعترفتي بچذبتج مال العلاج بس بشكل مو رسمي 

بلعت ريگ من أنتبهت اني شچفصت لعد اني مو گايلة الهم داروح اجيب علاج مَاما ياربيييي احس اريد اطم نفسي هنا من الفشلة .. لا وهو ديسلك الي

اخذت نفس من وصلنة لشارع منطقتنا گلت اله 

-جُمان: عوف اوگف هنا لتفوت للمنطقة واني وياك بالسيارة مناقصنِي بعد يحچون 

عقد حاجبة وگال 

-عوف: منو يحچي عليج اكسر سنونة بحلگة 

-جُمان: محد عوف محد بس داگول لتدخل جوة نزلني هنا واني اروح لحد يشوفك .. يعني 

باوعلي بنظرات مطولة وهز راسة ، اتنهدت وفتحت الباب توني دانزل لزم أيدي من النُص التفت أله بأستغراب وگال 

-عوف: بعد لا تعيدينها جُمان 

رديت واني داسوي نفسِي مافاهمة شيء 

-جُمان: شنو عوف ؟ 

قلص عيونة وانرسمت علىٰ وجهة شبه ابتسامة وگال 

-عوف: هاي العيارة بطليها ، تعرفين شنو 

گلبت عيونِي  وزفرت بقلة صبررر 

-جُمان: لتگُلي عيارة !! 

-عوف: اي زين .. 

خزرتة وهو ضحك بخفة درت وجهِي ونزلت ، مد نفسة من الجامة وگال 

-عوف: من تردين شيء تخابريني متفقين ؟

باوعت وعضيت شفتِي من الداخل واتنهدت 

-جُمان: متفقين . 

صعد الجامة وبعد مشفت منة شيء من التظليل ، التفت ومشيت ، احس بفشلة من نظراتة وعدم تصديقة الية ، اتنهدت ووگفت ضربت رجلي بالكاع وعقدت وجهِي 

:- امددددده حظيييييييييييي لو بيدي اللزمة واشمرة بنص الشارع واخلي السيارات تدعمة سليمة تصكة من حظظظ 

حكيت طرف خشمي وزفرت بصوووت ... 

باوعت بجمود وصدمة .. من وصلت لبيتنا وشفت أبو الايجار واگف ديعيط وي ام علي واصواتهم تارسة الشارع اثينهم يعيطون 

مشيت بسُرعة واني بس أريد افتهم شصاير ، وصلت يمهم باوعت لأم علي بلعت ريگ من شافتنِي بقت تباوع بصدمة ... 

            

              

                    

درت وجهِي عنها وباوعت لأبو الإيجار 

-جُمان: عمو خير شصاير ليش اثنينكم تعيطون بنص الشارع ؟ 

راد يحچي وقاطعتنِي أم علي وگالت 

:-عوفي خالة اني أتفاهم وياه فوتي جوة انتِ 

رفعت حاجبي وباوعت الهة ، رجعت التفت عليه من جاوبني بعياط وهو ماباقي عنَدة صبر 

:- يعني الله يرضىٰ لو محمد ثلاث أشهر ماتنطوني الإيجار ترى اني صاحب عائلة وأطفال مو تاجر عايش علىٰ هذا الإيجار ومحلي !! 

فتحت عيونِي علىٰ وسعهن مصدومة بكلامة ، بسرعة التفت لأم علي الي گامت تبلعم ، 

-جُمان: خالة شنو هذا الحچي ؟ شنو ثلاث اشهر مامنطينة الإيجار ؟ 

جاوبنِي قبل متسولف هي وگال

:- والله ياعمي كل شهر تگلي ماعندنا عندنا مريض ، واگول دفعة بلة هذا الشهر ميخالف علىٰ الشهر الجاي ، بس هاي ثلث اشهر علىٰ هلحالة اني هم محتاج !!

ردت أم علي وگالت 

:- اي عيني ماعندنا غيرر عندنا مريض شو هم مدري شلونك يعني واذا ثلث اشهر ماا انطيناك خلصت الدنيا 

جاوبها وگال

:- يعني تگولين ماعندي هذا الشهر وماعندي الي قبلة زين هذا الثلاثة اشهر شلون راح تنطينهن دفعة وحدة وانتِ ماعندج !!

صار منها صوت ومنه صووت واحس دخت عيوني صارت تروح منا ومنا وانِي اباوع بصدمة أخر شيء چنت محسبة حسابة هذا !! 

عطت بصوت وگلت 

:- كاااااافيييي !! 

باوعت للرجال وگلت اله ، من رخصتك عمِي شوية ، اخذت ام علي وفتت جوة وهي تباوعلي 

:- خالة شنو هذا السمعتة لعد وين راتب ابوية ؟ 

ردت بتلبك وتردد وهي تگول 

:- راتب أبوج علاج امج ومصاريف البيت يعني يطير ؟؟

فتحت عيوني وضحكت بصدمة 

:- خالة تحچين صدگ ؟ اني عبالي من تگليلي احط فوگ علاج امج عبالي دتنطين الإيجار لأن بس بهاي الحالة راتب ابوية ميكفي !! 

راتب ابوية هواي چنة عايشين عليه اني وماما إيجار وبيت ومصاريف شهر كامل خااااالة !!!!! 

بقت تبلعم وترمش وهي تباوعلي ، فزيت من ضربة الباب وهووو يعيييييط 

:- حتىٰ إيجار مااا أريد هسة تفررررغون البييييت وتطلعووون هسسسسسةة

لزمت راسِي فركتة بحيرة وطلعت اله باوعت عليه وگلت

:- عمو گول يا الله وين نطلع مدتشوف الوضع !

:- طلعووو من بيتي أريد اجر البيت لغيركم غيركم يريدة 

:- عمو كم سنة احنة صارلنة هنا ؟ فد يوم قصرنا عليك بالإيجار بس هلمرة صار ظرف واوعدك كُل فلوسك تجيك وتستلمها بس لتعيط عمو بنص الشارع ! 

ديحچي ويجاوب ومنسمع اله صوووت الطللققققق ترررس المنطقة ترس 

مو طلقة ولا ثنين لاا مثل الجماعة الي ترمي سوىٰ

 حيل أشتد فتحت عيوني وعقدت وجهي بخوف من سمعت صوت الصررررريخ والطلق سوىٰ صار أكثر مداعرف صريخ منو هذا 

وشديصير هنا واگفين وفاتحين عيونة بعدم فهم مثل الاطرش بالزفة

علىٰ نفس وگفتنة ودخلت سيارات عالية هواية حاوووطت منطقتنا كُلهااا سيارة منا وسيارة منا وكُلها تعيط ومدنفتهم ومدنعرف شصار