رواية قيود العوف الفصل الرابع والعشرون بقلم ريتا
أيدي احس طبلة اذني انزرفت من قوة صوت الطلق الي اجتاح المكان وحدة ورة الثانية ومستمر رجفت بخوف وبصدمة وحدنا ومحد يمنا بالبيت وهذا الرعب فوگانا مسحت دموعي الي بللت كل مكان بوجهي بس ماكو فايدة ترجع دموعي توگع من أشوف أمي شصار بيها
رفعت أيديها للسما بدموع وحچت بخنگة وبصوت مبحوح
ام منار: أستر علىٰ وليداتي واحفظهم دخيلك اني ماا اريد بس تحفظهم إليه اخذني اني بس وليداتي خليهم عايشين
شهگت بدموع وغطيت وجهي بچت بصوت عالي وگالت
-منار: ماعاشوا شبابهم صح ولا تهنوا بيه حالهم حال الشباب ... لا بنيتي ولا وليداتي طلع شبابهم وعيشتهم سم عليهم من مشاكلة دخيلك أنتَ أعلم وأرحم بينة لا تحرگ گلبي عليهم وليداتي لا تاخذهم بذنب أبوهم وعربدتة
حضنتها وحچيت بصوت مليان خوف
منار: مَاما كومي ندخل جوة اخاف تجينة طلقة -
ام منار: ياريت تجي طلقة بگلبي وتريحني وتاخذني -
لزمت أيدي وبچت وگالت
ام منار: ولچ يمة اخوانج وين اخاف يكتلونهم-
حجت الكلمة وباد جسمها وگعدت بالگاع
گعدت ولزمتها وحچيت بصوت متحشرج
-منار: مَاما گومي وگولي يا الله انتِ دتفكرين هذا تفكيرج ديجيب ويودي لتگولين هيچ الله موجود
ضربت رجليها بأيديها بقوة وگالت
-ام منار: ولج ولد عشاير متعرفين شنووو يعنييي ولچ الحگ عندهم ينوخذ مربع ميعرفون لا ولد ولا بنت ولا اخووو
-ام منار:عوفج من العشاير يمة ثلث أرواح كاتل ولچ الله لا ينطييييي شسسوووووة بييييينة شلون راح نعيششش تسودت عيشتنا
-منار: حتىٰ ابوية .. ابوية شلون راح يعيش بعد وهو مجرم بسببة ثلاثة راحت روحهم !!
-ام منار: من حرمت عيشتة عساه بالموت الي يكرفة سود عيشتنا وشتتها شوفي اخوتج وين ماوين ماندري مننن وراااه
نزيييت بخوف واللتفت بسرعة من اندفر باب بيتنا بقوة
بلعت ريگ وباوعت بجمود علىٰ الباب من فاتن نسوان ثلاثة شادات عباياتهن علىٰ خصرهن والشال مشدود علىٰ الگصة وكل وحدة بيهة خشنة وجثلة
.. وگفن لثواني وهنة يخوزرن بينة بحقد وعيونهن تنط منهن شرار
اتقربت علىٰ امي لزمت ايدها ... اتقدمت وحده منهن وگفت باوعت الي لثواني .. وماا أحس أله جرتني حيييل وشمرتني بالگاع ولزمت أمي تعت بيها
:- ولج وييييينهم ويييينهم المايخافون الله وينهم
ردت عليها امي بدموع وهي دتحمي نفسها منها
:- محد هنا خيه محد
خزرت أمي بعيونها وحچت بصوت عالي يرعد
:- لا تگليلي خييية من خوت عظااامج
اللتفت عليهن وعاطت بصوت
:- روحنننننن گلبن البييت شوفن ماضامات نسوانهن جوة
رجعت نظرها النا فتحت عيونها حيل لثواني وگالت
:- لأن مو زلم لو زلم ما شردوا
غمضت عيوني ورديت عليها بتعب
:- محد هنا مانعرفهم وين ولا شفناهم
باوعتلي بخزرة واني كُل تركيزي علىٰ عيونها الحمر رفعت راسها وگالت
:- انتِ بنتة ؟؟؟؟
هزيت الها راسي بدون ماا احچي ، اللتفت بسرعة من سمعنا صوت تكسر الغراض داخل البيت ، چنت اباوع بقهر واسمعهن شلون ديكسرن
طلعن من الداخل وهنة يگولن الها
:- محد هنا ولا واحد
باوعت الهن وهزت راسها .. وهنة كفن ملابسهن واتقدمن علينا هنَة جثلات وخشنات حيل عبالك زلم خشنة
لزمت ماما بخوف ورجعنا خطوات ليورا بس سرعان ما هجمن علينا كلهن وصارن يضربن بينة بكل مابيهن من قوة ويصرخن علينااا
حسيت طلعن قهرهن كله بينة مابقىٰ مكان بجسمنا ماا انضربنا بيه هاي التدفرني بطني وهاي الي تجر بشعري وهاي تخرمش بوجهي ورگبتي
اريد اقاومهن بس مداگدر ثلاثتهن خشنات وضرباتهن تأذي متخلي الواحد يعيد نفسة بعد الضربة تأذيت كُلش ودموعي سابقتني باوعت بخوف وهزيت راسي من اثنين اخذن ماما وصارن ديضربن بيها
اتخبلت صرت ادفر واهتگ رجلية بالگاع بس اخذت ايدي ليورا ولزمتهن بأيديها أصابعي احس تكسرن من قوة الشد
اضرب رجلية بالگاع وابچييييي واعيططط
:- ماااامااااا
:- ولچن عوووووفنهااا الله لينطيجن امي معليهاااا
رجعت رجلي ليورا ورفعتها وضربتها حيل علىٰ رجلها حسيت رخت لزمتها لأيدي من ضربتهة نترنت أيدي حييل منها بس رجعت لزمتني وصارت تضرب بيه وتگول
:- گرة عينچ على هيج عائلة مجرمة ياااا مجررررميييييييين والله حگ ولدناا مايضيع والله لتشوفون نجوم الظهر
اتخبلت عيوني صارت براسي عضيت ايدها الي لازمتني بيها بقوة وركضت بسرعة جريت امي چانت أمي مابيها حيل وتجي بالايد الي تاخذها ، حچيت بدموع
:- الله لينطيجن عوفنهاا امي معليها معليهااااا مو احنه الي كتلناهم معلييييناااا احنننة
اتخبلت واتسودنت عليه بالزايد فتحت عيونها واجت تدفع بيه وتضرب وهي تصرخ وتبچي مثل المخبلة
:- ولچ كله منكم كلهه منكمممم ومن ابوكم ، ولكم كلنا راح نموت من هذا الضضيييييييم لوعتوا گلووبناااا
چانت تسولف بصووت عالي تصرخ وتضرب بينة وتبچي انگلب بيتنا گلاب بالعياط والصريخ كلهن يحچن وكلهن يفشرن ويسبن بينة ويلطمن
منين ماا اباوع كلها تصرخ هوسة بداخل بيتنا وهوسة برة عياط الزلم وكُل شوي صوت طلق ، شهگت بصوت علىٰ هاي الوضعية انهاريت
اندگ باب بيتنا وراحت وحدة منهن فتحتة اسمعها تگول
:- محد موجود هنا سيد بس نسوانهم
سمعت المقابل رد عليها وگال بصوت مبحوح
:- تعالن طلعن كافيي
هزت الها راسة واجت گالت لهاي الواگفة گدامِي
:- السيد يگول تعالن طلعن من البيت كاف
وجهت نظرها لأمي وگالت بغل
:- والله لنحرگ گلبج مثل ماا احترگ گلب امي وگلوبنا كلنا
گالتها بصياح وطلعن ، حضنت امي بوجع وهي تبچي
وتشهگ وتگول بتعب
:- الله لا ينطيك يا رائد ولك شسويت بينة ولك هجمت بيتنا
اسمعها وابچي واشهگ وجسمي كُلة يوجعنِي باوعت الها شعرها منفش عضيت شفتي بوجع ودموعي تنزل
وهي گاعدة تشهگ وتلطم علىٰ رجلها مديت أيدي لميت شعرها ولفيتة بستها براسها بدموع
:- يمه يوجعج شي هذن الچلبات اذنج
:- مو حقهن ولچ مناااررررر ابوچ الچلب هاي سوايتة محد مسويهة من قبل وتگليلي اذنج من طبنيييي مررررض انيييي ماا افكر بنفسييي
اتنهدت وسكتت واحس راسي يدُگ بيَه شيء ينگدني من الوجع هو وعيونِي ...
رفعت أيدي شفت أثر ضربتها اليَه علىٰ أيدي نزلتها ومسحت عليها بأصابعي
رغم ضربهن النة وهجمتهن علينا بس مثل ما گالت امي
حقهن
ابوي دمرهم الله يعلم الي قتلهم أبوي متزوجين وعندهم أطفال ؟ يتمهم ابوي ورمل أمهاتهم ، حرگ گلوب اهلهم وأصدقائهم
كل ماا أفكر ابوية صار مجرم اتخبل شنو فكر بلحظتها شلون گدر ينهي حياتهم بهلبساطة مافكر شنو نتائج الشيء الي سواه وشلون راح يأثر عليه وعلينا وعلىٰ الكل !!
غطيت وجهي بأيدية وچيت بصوت من صارت أفكاري تاخذني وكل فكري صار بأخواني خفت عليهم هواية واني اعرف مستقبلهم انتهىٰ واتدمر
وخرت أيدية عن عيوني وصارت عيني علىٰ ألباب وصافنة واتمنىٰ الي عشناه قبل شوية يطلع حلم مو حقيقة ياريت ابوية ميكون مسوي هيچي
دخت حيل دخت وگف صوت الطلق لثواني ... رفعت عيني ليفوگ ورجعوا طلقوا ست طلقات بالسما بس مو سريع بين طلقة والثانية ثواني طويلة ...
بعدها سمعنا صوت سيارات عرفتهم راحوا .. نزلت راسِي بين أيدية وغمضت عيوني بضياع .
رجعتني للواقع المر امي من گالت
:- دزو نسوان علينا مافاتوا للبيت همَة ... هذول عشاير الحركة عندهم محسوبة .
:- هذول يفرهدون يگطعون نسلة ألي يوصل الهم اذا بهذا الوضع الي همة بيه وبنص مصيبتهم حسبوا حساب للكلمة الي تجيهم اذا فاتوا علىٰ نسوان للبيت لعد شنو راح يطلبون ويسوون علىٰ بليتهم هاي
رفعت عيني وحطيت أيدية علىٰ الگاع وگمت من شفت جُمان دخلت تركض وهي تصيح بأسمي بخوف
،وگفت واني مبرطمة وعيوني مورمة ودمعها يجري هزت راسها بأسىٰ واتقدمت حضنتني بدمووع
******
گاعدة علىٰ القنفة باوعت لمنار الي حاطة راسها علىٰ كتفي اخذت نفس عميييق وزفرتة
مو طبيعي شسوة بيهم عمو رائد ومحد لهسة مستوعب حجم هاي الكارثة ووين راح تأدي بيَهم كعائلة وشنو الي راح يصير !
أفكر بيهم وعيوني تتنقل بيناتهن بحسرة ... فززني صوت سيارات صارت ببابهم گامت بسُرعة خالة ام منار وگمت اني هم
بچت بصوت مسموع من شافت اخوانها دخلوا وگامت تشكيلهم وتحچيلهم شنو صار وهمة اتخبلوا ، ورة شوي اجو عمامهم كُلهم انترس بيتهم ترس ناس وصارت هوسة حيل وعياااااط
كلها قلقة وكل واحد يگول .. راحوا ولدي .. هاي مصيبة چبيرة مو هينة .. شلوون تنحل هاي شلوون !!
يفكرون بعوائلهم وبولدهم وشنو راح يصير وشلون تنحل محد يعرف كلها دايخة
.. فعلاً چانت مصيبة كارثية .. ثلث أرواح تنسلب منو يگدر يسويها
وألي چان يخوف أكثر وكل تفكيرهم بيه انوا هذول من عشائر ماتسكت وخصوصاً العشيرة الي مقتولين منها هذول الولد
ابد ميندگ وياها ويخوفون حيل من صغيرهم لچبيرهم چانوا محسبين الهم حساب خايفين من شيء راح يجر شيء وتروح الشباب بيها
طفر عمهم الچبير وگال
:- يابوووية بس اريد اعرف وين راح ووييييين سوة طرگاعتة وشرد ووگعنا بيها
رد عليه الثاني وهو حاط أيدة علىٰ راسة وگال بحرگة
:- وحق روح أمي اذا اللگاه بأيدي اخذه الهم
:- وينة وين المشاكل هسة احنة بيها عليها يجيب بهاي المشاكل ويوگع فوگ روسنا .. بلا ولدي إذا صار عليهم شيء اني منو يفيدني
گال عمهم الكبير اكبرهم هذا
:- خوفك لا تصير بالدم ساعتها محد يگطعة .. الله يسترنا بس!!
:- والله وسفة بين الناس نصير اخوان مجرم .. يافشلتنا
حچت خالة ام منار بدموع وهي تگول
:- وليداتي وين وليداتي وين صار بيهم الوكت ماا الهم اثر
گعدت بالگاع تبچي وهي تگول
:- اريد وليداتي ولكم بس ريحوا گلبي عليهم يمه علييي يمه حيدر وينكم يابعد امكم
رد عليها اخوها وگال
:- وينهم يعني هذول هم ابتلوا بمصايب ابوهم ولا يوم ارتاحوا منه .. الله يعلم تلگينهم وين همة هسة هذول لا يجون ولا يوصلون لحد ما تنحل هاي الطركاعة
صار واحد يرد علىٰ الثاني
:- شتنحل ياخوية قضية ارض هية وتنحل ارواح هااااي اروووووواح شلونننن تنحل قضيتهااا موووو بسهولة ابدددد ؟
شرودا وبعدين يعني عبالك يعوفونهم !! خوية هذول يبقون مطلوبين دم لأخر يوم بعمرهم
دگت علىٰ صدرها خالة ام منار
:- يايمهه ولدييييي
حيل أشتد الوضع ومحد يطمن بيها وهي گلبها علىٰ ولدها وهذول كل واحد حاير بروحة وبولدة ووين يودونهم من ولد العشائر خايفين لا تصير دم بدم
شفت وضعية خالة أم منار وبنتها صارت للأسوء خصوصاً من صار صوت عالي بين الخوال والعمام وكُل واحد يحچي شكل وكل حچيهم يزيد خوفهن
حسيت راح تصير مُشكلة بيناتهم لأن صار صوت عياطهم مو طبيعي وكله ملامة من گال خال منار
:- لزموا اخوكم يمتىٰ مانجيه مسوي مشَكلة حتىٰ ملينا منه ومن مشاكلة
جاوبة عمها وگال
:- واحنة اخونا جاهل ونلزمة ؟ زلمة شكبرة شگدة خلفتة بطولة .. لزمنا يوم يومين وبعدين اذا اخونا گ*** شنسوي
باوعت اله خالة ام منار وطلعت من صمتها عنهم من باوعت لأخوه الكبير وگالت بصوات متحشرج تعبان
:- شگد شكيت الكم منه شگد گلتلكم اخوكم علىٰ يوم يسويلي مصيبة يوگع وليداتي بيهاا ردوه لزموه حاچوه خلوه يگعد ويركد
ولا واحد منكم باوعلي ولا چنتوا تسمعوني ولا تفكرون بعواقب سوالفة الي يسويها كلشي عاااادي عندكم وملتهين بحياتكم
محد فكر بينا ومحد فكر بهذا اليوم ولكم كلها تنحل إلا اني ووليداتي شلون عيشتنا واحنة اهل المجرم احنة اهل المصيبة
انتوا چنتوا مأيدينة علىٰ الغلط چنتوا راضييين محد چان يرده ولا يحاسبة
هنا صار واحد يلوم بالثاني وخوالها عاطوا حييل وهمة يگلولهم
:- اذا هو مخلصها يشرب ويرافگ وين السا** شتردونة يطلع ادري هو اخونا لو أخوكمممم اذا ماكو رقابة وماكو احد يردة طبعاً يسوي مكسورة
:- اگلك زلمة چبير شيباتة تارسات وجهة ونجي احنة نعلمة وين صايرة هاي
:- واذا دبييييير لو چبيرر وينها كبرتة تحچيييي صدگ انتتت
تقرب لعمهم وهو يگول
:- انت تغشم روحك لو شنو أخوك مو اول مكسورة يسويها وتطمطمون اله وما تردونة حچاية حچايتين وطمطمتوا سوالفة بالفلوس ياخيييي ردوا علموه فد مرة گعدوا بيه وهددوه گعدوا بيه وردوه !!!
ماسكت عم منار وصارت مكافخ بين العمام والخوال باوعت الهم واني فاتحة عيوني بصدمة !!
فوگ البلوة الي صايرة هذول محتارين يتعاركون وواحد يلوم بالثاني محد گعد يفكر صح وشنو يسوون ومحد حط گلبة علىٰ گلب الثاني وگعدوا يفكرون عدل !
محتارين يتعاركون وأهم شيء محد ينلام ومحد ينجاب طارية بالسالفة !!
صدعت كُلش منهم طگت روحي من الوضع حركت روحي ورحت گومت خاله ام منار وگلت لمنار
:- منار جيبي عباية امج بسرعة
بسرعة فهمتني شنو أقصد هزت راسها وراحت جابت عبايتها واجت لبستها الها وگلت الها
:- خالة امشي وياي لبيتنا هسة
هزت راسها بالرفض ولا قبلت تگوم ولا قبلت تمشي وياي وهي تباوع عليهم بعدهم يتعاركون وتعصر بعيونها بخوف
:- خالة بس باعي لمنار شلون خايفة وترجف أمشي وياي علىٰ الأقل بين مايهدون اذا كلها دتعيط وتتعارك هم زلم بيناتهم شكو باقين هنا
راحت عينها علىٰ بنتها ودموعها تنزل بصمت هزت راسها بتعب وگامت لزمتها منار واني مشيت گلت الهم
:- بس من رخصتكم شوية خلي نطلع
عاط واحد بيه وگال
:- وين رايحات انتننن انطمن جوووة ماتشوفن الوضع
اتنهدت وباوعت الة بقلة صبر
:- يعني مدتشوفهن ؟ نسوان روحها رايحة من المصيبة الي هنة بيها وانتم هنا تعيطون وتتعاركون وتخوفون بيهم بالزايد گعدتهن هنا شنو بيناتكم
باوعوا الي ورجعت گلت الهم
:- احنة جيرانهم !! خلي يجن يمنا خو مايبقن هنا يمنا بالبيت أحسن
رد اخوها الچبير وگال
:- اختي تروح ويانة ماتبقىٰ هنا شعندها باقية هنا
باوعت لمنار الي بقت فاتحة عيونها بصدمة وتباوع
حچة اخوه الثاني وگال
:- هذا الحچي مو وكتة هسة بس اله وكت
باوعلي وگال
:- روحي عمي اخذيهم يمكم
درت وجهي عنهم اتنهدت بقلة صبر منهم واخذتهن
مرت يومين من أصعب الايام الوضع تأزم فوگ ماهو متأزم وصارت أحداث هواية
بهاي اليومين الي عرفنا انوا اهل الولد هذول كل ليلة يدگون عمام منار .. وبيوم سمعت صوت طلق قريب طلعت سألت واحد من جهال المنطقة وگال الي ..
:- هاي علىٰ بيت رائد الطلق زرفوا البيت زرف وكتبوا علىٰ البيت من برة مطلوب دم
دگت ولطمت خالة ام منار مچانت تفكر بزوجها كل تفكيرها بأولادها الي محد يعرف عنهم شيء لا يعرفونهم عايشين ميتين مخطوفين أبد ماكو عنهم خبر
وأبوهم نفس الشيء بس يعرفون الأب شارد من بعد الي سواه والشرطة والناس هذول ديدورون عليه
بهاي الايام نسيت نفسي بيهم ونسيت الشغل وجهازي مطفيتة ومفاتحتة أبد ملتهية ومشغولة طول اليوم
وبنفس الوقت خايفة علىٰ مَاما وصحتها أخاف تدهور بسبب توتر الوضع بالبيت وأبو الايجار بعد مشفتة من هذاك اليوم
وبيوم چنة گاعدين كُلنا دگ جهاز منار وچان المتصل زمن بنت عمها استغربنا كُلنا اتصالها لأن من صارت المشكلة لهسة محد أتصل منهم أبد
جاوبتها منار وفتحت مايك كُلنا دنسمعها سلمت عليها وگالت الها منار
-منار: زمن شنو الأخبار يمكم ليش محد ديجاوبنه من نتصل ومحد يتصل علينا هم باقين بقلق وكلُ شيء منعرف !
-زمن: اووف ياا منارر شحچي الچ !! صايرة قيامة هناا ولدنا وولد عمامي كلهم طلعوهم من البيوت
-منار: ليشش !!
-زمن: كُل يوم يخابرون يهددون بينا ومرتين شخلوا بيوتنا شخل بالطلق محد ديصدگ منهم انوا احنة هم منعرف مكان عمو رائد وولده
-منار: اي كملي زمن !!
-زمن: ديگولون كذابين تعرفون مكانهم وانتوا الي ضامين اخوكم وولده وننطيكم مهلة ٢٤ ساعة اذا متطلعونهم الثار يصير مضاعف
-واحنة ولا واحد يعرف مكانهم وين وعمامي خافوا علىٰ ولدهم وسفروهم كلهم لحد ميلگون حل وصدگ جُمان ورة يوم كامل شخلوا بيوتنا شخل بالطلق
-وهسة خابروا انوا علىٰ اساس حتصير گعدة بعد يومين وتحضر بيها شيوخ من الطرفين وضباط وهووواية نااس بعد
باوعت لمنار الي نزلت منها دمعة مسحتها وگالت
-منار: وعود هاي الگعدة الي راح تصير المن ؟
-زمن: منها ونعرف شنو يردون وشنو راح يصير وشلون تنسد السالفة بس الي عرفتة منار انوا عمو رائد الدولة نفسها طلبته قبل العشيرة والدوله دتدور عليه
لطمت امها علىٰ رجليييها بقوة وصاحت
-ولك ليششش هيييييج سووويت ليشش دولبتنا
نزلت الموبايل حطتة بالارض مسحت وجهة وگالت
-منار: زين واخواني محد عرف عنهم شيء لو شنو راح يصير الهم
-زمن: محد يعرف عنهم شيء ... ومو هذا الي خابرتج عليه اني منار خابرتج علىٰ شيء ثاني
بقت صافنة علىٰ الموبايل وجاوبتها بأستغراب
-منار: علىٰ شنو لعد زمن شنو صاير ؟
-زمن: منار اني سمتعهم يحچون بيه بيناتهم بالصدفة ويتهامسون بالسالفة وهذا يجر طول وهذا يجر عرض ماگدرت ابقىٰ ساكتة وگلت اگُلج بلكي تلگين حل قبل ليوگعونج انتِ هم عمامي وتصير المصيبة مصيبتين
بقينا وحدنا تباوع للثانية بأستغراب وفاتحين عيونة
-منار: زمن احچي شنو أكو بعد !!
نكست عيونها عن الجهاز وباوعت النا بصدمة اول ماحچت زمن أحس سرت رجفة بجسمي أخر شيء چنت اتوقع يسوونة عمامها هذا !!
صرختتت بصوت وهي تضرب بنفسها وتعيط احتارينا شلون نهدي بيها اتخببببلت من سمعت
-منار: يمههه والله احررررگ روحيييييي اموووت نفسيييييي اذا سوووها بيه اموووت نفسي وماااقبل
لزمتها من أيديها احچي وياها
-جُمان: منارر اصحيييي ماكو ماكو هيچ شيء مراح يصير !!
-منار: اقتللل نفسييييي جُمان والله امووت وماا ترف الي عين اذا يسوون بيه هيچ امووت
-منار: حرررام عللليييييهم والله حررراممم ولكم ليشششش ليشش
دمعت عيونِي بست راسَها وهي تبچي صرت ادگُ علىٰ ظهرها بخفة لحد ما تعبت من البچي والعياط حسيتها رخت حطيت راسها علىٰ المُخدة
وباوعت لأمها الي تبچي سكتة وجهت نظرها الي وگالت
-ام منار: نشررررد اخذ بنتي واشرد بيهاا
فتحت عيونِي علىٰ وسعهن وجاوبتها
-جُمان: لا خالة طبعاً لا شلون تسوووين هيچ !
حطيت ايديها علىٰ وجهة واهتز جسمها أثر الشهگة جاوبتني بدموع بصوت متقطع
-ام منار: لعد ماكو حل اعوف بنتي ياخذونها بذنب ابوها ولكم والله اموت واني عايشة اذا يسوون هيچ !
بلعت ريگ وعضيت شفتِي ما گدرت اتجاهل هذي الحقيقة واگول ما راح تصير تعبت حيل أتعب من اكون عاجزة بشيء أتعب هواية واحتقر نفسِي ...
مشت الأيام وصار يوم گعدتهم خابرتنا زمن وبلغتنا
ومنار القلق التوتر الخوف صارن ياكلن ويشربن وياها ...
تحط راسها علىٰ الحايط وتبچي وتعصر بأصابعها بقلق
گعدت يمها علىٰ القنفة الي برا وحطيت راسِي علىٰ راسها ساكتات محد قابلة واثنينة گلوبنا تحترگ ..
سمعنا صوت سيارة يم بابنا عرفتهم عمامها الي گالت النة عليهم زمن طفرت من مكانها وباوعتلي بدموع .. درت وجهي ورحت فتحت الباب وفعلاً طلعوا هَم ..
دخلوا وگعدوا وسَولفوا هواية سوالف مو مهمة بس چانت كلها مثل التمهيد للمقابل حچة واحد منهم وگال
-والله لو ميت ولا گاعد هيچ گعدة مي وجوهنا وگع بالگاع شتسوالنا هاي البلبلة وهذا الخراب !!
-ام منار: شصار خوية سولف
مسح وجهة واتنهد وگال
-شسولف خوية السالفة چايدة رائد القانون طالبة وولدج أكو تصوير بيه همة وي ابوهم من صارت المشكلة وهم اتعاركوا وي الولد
دگت خالة علىٰ صدرها وگالت
-ام منار: شلوووووون !!
-خوية هي صايرة العركة علىٰ فلوس ورائد يتجاوز علىٰ الولد يسكتون اله مايسكتون شباب هذول وهذا لسانة شطولة ومايحترم
گاموا وهدوا عليه وولدج مهما يكون هم شباب ودمهم حار ويشوفون ابوهم گدامهم ينضرب يسكتون هم متعاركين وياهم ومشتدة بيناتهم وصايرة من هذا ومن هذاك گوم يا رائد طلع مسدسك واخرطهم ثلاثتهم واشرد
وولدج هم شردوا من شافوهم هيچ وهسة القانون قبل العشاير يريدوهم بس ينلزمون بعد
-ام منار : اي بس ينلزمون شنو !!
-الي يقتل ثلث ارواح شنو حكمة اعدام اول ما ينلزم ان لزمهم القانون او العشيرة الحچي نفسة
غمضت عيوني اول ماگال الكلمة ماا اگدر اشوف شكل منار وامها شنو بعد ماسمعن بالخبر نفخت بقهر وما فتحت عيوني ألا من گال
-وما انحلت بهاي ياخوية بعد هواي ومن الاشياء الي انطلبت من عندنا بهاي السالفة هي بنيتي منار
-ام منار: شلون يعني
تلبك بكلامة وصار عين علىٰ منار وعين علىٰ أمها تتنقل
-فصليه ..
شهگت وگالت
-ام منار : شنووووووووو هذا الحچي !!
-اي والله ياخوية لو فصلية لو ٣ مليارات واحنة منين نجيب ال٣ مليار تجار احنة وبعدين هاي مشكلة أبوها وهمة خوش ناس والبنية اول وتالي تتزوج يعني مامسوين شي غلط احنه
اجاهم الرد الصادم الي خلاهم يضحكون ويسكتون بنفس الوقت وتعابير وجوهم صارت مختلطة والي خيب كل شيء چانوا مفكرين بيه من منار گالت
-منار: بس اني متزوجة عمو
گام عمها الچبير وگال
-شنوووو ولچ تضحكين علينا شنو متزوجة !!
وجهت نظرها الي وهزيت الها راسِي دخلت جوة وهم گالوا بصوت واحد
-تعاااالي وين رايحة
-جُمان: لحظة عمو دتجيب شي وتجي
بقوا واگفين بصدمة وخيبة واضحة علىٰ وجوهم ... اجت منار اتقدمت بخوف وخطوات مترددة والرجفة مبينة بأيديها
وگفت گدام عمها وانطتة الاوراق فتح عيونة علىٰ وسعهن من قرأ الي بيهن اخذوهن منه واحد واحد وقروهن
ابتسمت ورفعت راسة وثبتة من شفتها تنقلت عيونها بيناتهم وبين وجوهم المصدومة
-منار: شرعاً وقانوناً اني متزوجة .
