رواية تحت ظل السعف الفصل الثامن والعشرون بقلم ميار
ولونَك مو دمع ماضمتك عيني ..
ولونك مو ڪحل ماشالتك عيني!
يلوموني واحسك تكبࢪ بࢪوحي ويلوموني،
وانه بلا شوفتك شينفعن عيوني؟؟
يشوفي ورجوتي ودنياي...
ودنياتي ولوني وعذابي!
وبسمتي وشكواي وضنوني
ـ
ــــــــــــــــــــــــ♕ـــــــــــــــــــــــــ
-جهاد اخذته الشرطه
امنه:؛ ياا يمه ليش شمسوي
عماد:: عمه والله مستعجل بس عرفنه ولد
حاكم مشتكين عليه هسه نروح نشوف واحنه
نفهمكم لا يظل بالج
امنه:: عجل يمه منو جابج
مسره:: غسان عمه مو لان راح وره عمو محمد
علمود جهاد ما اعرف ماخذينه الشرطه مدري شنو.
امنه:: اي والله عمه ما تشوفيني كاعده حايره
لا اكدر اروح خاف بعدهن ما يدرن واخوفهن
مسره:: لا عمه يدرون لان من جابني غسان
شفنه ابنهم هذا ابو خدود گال لغسان ما يكدر
يروح لان امه من درت ظاله تبجي وضغطها صاعد.
امنه:: سوده علي يمه اروح اشوفهم واجي
لا تفتحن الباب بين ما اجي خوش يلا رباب
تعالي سد الباب وره خلي اروح اشوف بيت خالج
ريتاج:: ضحكت على سالفة مسره ابو خدود عرفت قصدها زياد كامت رباب سدت الباب وره امي واحنه كعدنه نسولف شكد صارت امور ومشاكل عدنه بهاي السنه بحيث كمنا نفز كل ما دك الباب ظل بالي يم بيت خالي وخاصه على ريام شلون حالها هسه.
مروى:؛ جنه متحظرين نروح انشوف مسره جهاد
والولد بس تغدو وراحو للكيعان ويا ولد خوالي التمينه بيتنا حتى نروح كلنه نريد نطلع و ما نحس غير على معاذ جيه يركض يصيح على ابوي جان كاعد بالبيت طلع ابوي مستعجل يريد يفتهم زكح بمعاذ
احمد: شبيكك ولكك
معاذ:؛ الشرطه اخذو جهاد ولد الجلاب مشتكين عليه الحك يابه نروح وراهم.
احمد:: منووو ولكك منوو فهمني
معاذ:: ولد حاكم امشي يابه بالطريق افهمك
-شغل السيارة لاحگك
مروى:: طلعو واحنه نار وشبت بنص گلوبنه كلنه
نتباجه لان نعرف جهاد ما يتحمل هسه اذا واحد
بيهم يغلط عليه يضربه كعدت ريام بالكاع رايحه
روحه وبس الدموع تجري والخوف واضح على وجهه كومناها للبيت وجان تدخل فاطمه العيون حمر متروسه دموع تلكتها تبارك وهي تريد بس تعرف شكو كلنالها شگال معاذ كعدت وادك ايدها على رجله وتكول.
فاطمه: سوده علي الله لا ينطيهم
تبارك:: ادري همه شعدهم ويا جهاد وشتكو
عليه ما يحيرون بابوهم الضاع جعله لا رد
فاطمه:: انجبي تبارك لا تدعين شنريد منهم
بس الله يجفينه شرهم عسى ما شيسون خلي
يسوون اني هسه گلبي على اخوي بس لا يأذو
ريام:: شلون يأذو يمه هو حتى ظهره يوجعه
يمه فاطمه خايفه عليه خاف صدك يضربونه
-سكتت فاطمه وكعدت يمها وتهدي بيها
فاطمه:: لا يظل بالج ريام هسه انتي حامل مو زين
عليج تتوترين الولد وابوي راحو وره بلجي يجيبونه
وياهم انتن هسه بس ادعنله ان شاءالله يطلع
تبارك:: امين
فاطمه:: بنات امي وين؟
مروى:: بيت عمتي امل راحت من الصبح لهسه
ما جت .
فاطمه:: استلم هسه تخبلها بسوالفها شلون بينه هسه اووف امجن لو بس تبطل من بيت امل اني
ارتاح.
مروى:: ظلت فاطمه محموسه من القهر تحير شسوي ظلينه نفتر وعلى صوت بچي امي طلعنه
نتراكض كعدت بالحوش وتضرب هلى رجليه بقوه
وتنوح على جهاد وزياد مچلب بيها يفهمه بس وين
منهاره كعدنه گبالها وريام ظلت واكفه وفاطمه تحاجي بامي وما يفيد تبجي وتضرب على وجهه
ورجليها حضنته فاطمه تحاجيها.
فاطمه:: يمه فدوة لا هيج تسوين بنفسج ما بي
شي هسه والله هسه راحو ابوي والولد شويه
ويجيبونه ما عليه والله شمسوي حتى ينسجن
ابتسام:: ولج يمه گايلن جهاد كاتل ابوهم ولج
يتهمونه يردون ابني ينسجن راح وليدي راح ما يردلي بعد امووت اني وراه سوده بوجهي يمهه
وليدي
فاطمه:: خلي يولون يمه شنو تصدكين كلامهم
والله ما عليه شي هسة زياد هاا هسه زياد يخابرهم
زياد:: اي يمه انتي بس لا تبجين هسة اخابرهم
واذا كدرت اخليج تحاجين جهاد بس لا تضربين نفسج يمه والله تأذين گلبي من اروح فدوه لهلوجه
مروى::شكد حاولنه وياها ما فاد زياد يدك على
الولد محد يرد وامي نهارت ضربت وجهه بقوه
كلنه خفنه عرفناها تخربطت حالتها وريام من حلات
روحه جلبت بيد امي تمنعها وتشهك مقهوره على امي بس كلنه صحنه وراحت رواحنه من امي دفعت ريام بقوة ويا يما دفعتها صاحت فاطمه
فاطمه:: لااا يمااا
-ما لحكنه نلزم ريام وامي صارت فوك ريام انصدمنه
انريدها بس تحلها ملخت ريام وزياد يسحب بأمي
بس من يسحبها وهي مچلبه بشعر ريام وتغلط عليه ما درينه شوكت عمتي امنه دخلت ومن شافت
امي مچلبه بريام تخبلت فاطمه وزياد اثنينهم لازمين ايد امي بس ما يكدرون يضغطون يخافون ياذوها بس عمتي ما تحملت من شافت ريام هيج
وريام اصلا من خوفها على طفلها حاضنه بطنها حتى
لا امي تضربها عليه تالي عمتي من شافت هيج ما نحس غير كرصت امي من ايدها ودفعتها وصاحت بيها.
امنه:؛ كاااافيي وخرري منهاا
-وكعت امي مصدومه وكامت وتأشر على ريام
وكالت.
ابتسام:: هي هي بسببها ابني بالسجن كالت
امل والله كالت من يوم الجت بي لبيتنه بس
المصايب حتىى اميي هيي موتتهاا الله يمووتهاا حتى حاررث هي موتته يمااااا وليديي
من وراهااا كتلوو اخوي ووليدي اخخخ يا يابه
اخخ ينارككك يا حارررث ولكك يماااا حاررث
شيطفي نارريي شيطفي نارر گلبي كتلوو كتلوو
راح وليديي راااااااححح كتللللتووو ماااااات
مروى:: حضنها زياد وبكل قوته سد حلكها من كامت تصرخ واني ويا وفاطمه سحبناها للبيت
دخلناها للغرفه وزياد حاضنها بكل قوته وهي
ترجف ادحك على زياد ما يحط عينه بعينها
وعيونه غورگن بالدموع ما تحملنه كلنه نبجي
على حال امي راحت فاطمه جابت موبايلها
وترجف واتصلت عرفتها بفرات حتى يجي
مرتين ثلاث يلا رد عليها واحنه نمرده مرد على حال امي وزياد بس وخر ايده عاطت بي وتضربه
وفاطمه من خوفها على زياد ذبت الموبايل وسحبت امي دنكت اخذت الموبايل ومن صوت امي وعياطها كوه اسمع صوت فرات كلت الووو
فرات:: شكوو خيركمم شنو شبيهاا عمتي
مروى؛؛ عفية فراتت تعالل امي تخربط وضعها
الحك بس زياد اهناا وما يكدر يسوي شي
فرات:: لا حول لله جايكم
مروى:: سديت الموبايل وكعدت يمهم وامي
ساعه تضرب نفسها ساعه تبجي شگت گلوبنه
من دارت على زياد وگالتله.
ابستام:: يمه حارث جيت انت ولك وين جنت
هاا ليش تخوفني عليك مو كتلك لا تطلع تعال يمه يمي تعال
فاطمه:: يابه مردت گلوبنه وزياد ما تحمل
شبكها ويشهك ويبجي بهضيمه سوده علي
وهي تحاجي عبالها حارث وخرته وتسأل بي
ابتسام:: يمه شفت خالك ما يجي هاا اني
والله احاجي امي وامي ما تزعل على خالد
بس غير هو عافنه من وره هل جلبه استبرق
اني ولا ازعل حتى مشتاكتله تعال يمه تعال
فاطمه:: ادحك عليه تجيبها مناي تلطشها مناي
واني بس اريد زياد يوخر زرفت گلبه بحجيها وزياد
عبنه اخونه الصغير وعاطفي ما نريده يتأذه شويه
ورجعت مثل الاول صياح وضرب غير لو يجي فرات
ظلينه مگابلينه ربع ساعه يلا جيه فرات بس سمعت
صوته بالبيت طلعت من الغرفه اصيحه هو من صوته دخل يركض بيده علاگة علاج فتحه وگال
فرات:: زياد مددها سريع والزمها زين تعاي فاطمه عاوني زياد بساع.
فاطمه:: جيت يمهم وامي ادفر برجليها لان مددوها اخذت روحي بجيها وعياطه بس شنسوي
مضطرين حتى ينطيها ابرة المهدء ضربها وخر دقايق
ونامت واني واخوتي اثنينه عيونه مغوركه وزياد
مجلب بيد امي ويحبب بيها ويعتذر منه ودموعه
تجري سحبه فرات يحاجي.
فرات:: زياد كول ياالله يا خوي ما بيها شي هسة
بس ترتاح وهذا علاجه جبته خاف مخلصه
مروى:: لا عدها والله جهاد جابه البارحه
فرات ٠:: ميخالف خويا خلي للاحتياط
فاطمه:؛ غطيت امي طلعنه انشوف ريام دورنه
بالبيت ماكو وفرات من شافني مخبوصه يريد بس
يفتهم شكو وكفني گال.
فرات:: خير شبيكم وشبيها ريام؟
زياد:: امي ضربتها فاطمه خاف عمتي اخذته لبيتهم
مروى:: لالا ايانهن بيت جهاد تعالو
فاطمه:: رحت اركض بالي يمها لكيتهن كاعدات
وهمزين معدلات شالها لان الولد وكفو بالخوش
كعدت يمها عيونها منفخه وصافنه ما تحجي حاجيتها.
-ريام بيج شي يروحي خما تأذيتي
ما ردت علي صاح فرات من الحوش يريد يدخل طلعت تبارك صاحتهم دخلو زياد وكف يمنه ندك راسه يحاجي ريام.
زياد:: خويه اعذريني على الصار بس والله امي
مو بوعيها و ويعني اكيد مو قصدها تأذيج هي
من وفاة حارث تجيها نوبات عصبيه حتى احنه
من تفقد تضربنه لا تزعلين منه هاي اني اعتذر بمكانه.
ريام:: رفعت عيني عليهم مسحت دموعي واحاجيهم.
-لا ما يحتاج تعتذر خيي انتو شدخلكم عرفتها
مو بوعيها دحكت على فرات وهو عرفني شريد احجي گبل لا احجب گال.
فرات:: لا تخافين جهاد يطلع والله
-وكف زياد بسده وگال.
زياد: غير نفتهم هل جلاب عليش مشتكين
فرات:: متهمينه كاتل ابوهم گايلين جهاد اله فتره
طويله جان يهدد بكتل ابونه وابونه صار ثلاث اشهر
مفقود ماكو غير جهاد كاتله ودافنه ولا وين راح.
امنه:: صخام بوجوهم جهاد شعليه هذوله يدورون
مشاكل شمدرينه ابوهم وين راح يحطون مشاكلهم
براس ولد احمد.
زياد:: عمه همه مثل ابوهم يشترون المشاكل شرايه زين هسه شلون فرات شسويتو قابل يبات
جهاد بالسجن من وره حويكم ابو الطلايب.
فرات:: لا هسه خابرنه على واحد عرف بلجي يكدر
يطلعه ولد الـ.... استغفرالله دافعين فلوس وهذا
الضابط معند يدور دليل جهاد ما اله شغل بختفاء
حاكم
زياد:: اكول ابو علاوي خاف انطلعه منا تشتكون انتو عليه هم ابوكم مختفي خاف دورون ثارات
فرات:: زياد عيوني ليش ما تظل ساكت ولك ازمال
شكو نشتكي قابل ما نعرف جهاد وندور وثارات
اي قابل ميت وندور ثار امشي امشي لا اهفك بجسع
يعدل فجك.
زياد:: لا ما يحتاج والله هسه امي شبعتني راشديات
اذا تروح لجهاد اروح وياك اني هم اريد افتهم شسوو وياهم.
-تعال
ريام:: طلعو وكعدن البنات يمي عمتي شكد لحت
عليه اروح وياها ما قبلت رجعت لبيتهم وفاطمه
ظلت يم هي وتبارك ومروى تروح وتجي بس من
جت جده فرحه ظلت يمها بس ما تجينه كعده
راحت رواحنه لصلاة العشه ومحد بين منهم
صلت فاطمه واني ظليت هيني هلى الباب صاحت بيه فاطمه تحجي علي.
فاطمه؛: شوو كومي صلي لا تهملين صلاتج
بحجة مقهوره بلعكس صيري قريبه من الله
يلا جدامي صلي بين ما اجيب عشه النه واجي.
ريام:: هزيت راسي وكمت توضيت وهي راحت
لبيت اهلها وكفت اصلي بس كملت بقت على
كعدتي رفعت ايدي ادعي گلبي يوجعني تمددت
على مسجدي وايدي على بطني وفكره تاخذني
وفكره تجيبني اني من خوفي حتى ما اريد بنيه
حتى لا تعيش الي عشته رغم جهاد يدعي من كل
گلبه الله يرزقنه ببنيه صح ما عشت ولا شفت امي
وشلون عاشت فترة حملها بيه بس من شفت جهاد
وتخطيطاته وكل همه يكتل الي كتل اخوه احس
راح اعيش نفس الشي اني غمضت عيوني بوجع
واني احلف لو تنگلب الدنيا طفلي ما اتخلى عنه
تبارك:: كاعده ننتظر ابوي والولد راحت ارواحنه
مخلينه على نار فاتت صلاة العشا وهمه ماكو
جت فاطمه تصب عشه الها ولريام وتسأل على امي
گالتلها مروى.
مروى: لا كعدت تعشت وانطيتها علاجها ونامت
لا يظل بالج صدك ريام شلونها شفتي امي زالعه
وجهه.
فاطمه:: اي شفته شنسوي ريام خوفها مو طبيعي
احس اكو شي خو الي مخلي هلخوف بگلبها
تبارك:: وكفت يمها وعيني على مروى عرفتني
راح اسولف تعض بشفتها ما تصنتت صرت بسد
ولزمته گتله
-فاطمه تدرين ريام تعرف منو الي كتل ابوها وسالفة
البستان الي حجتها مو كلها صح جانو يتلاكون حتى
هي وجهاد يعرفون منو كاتل ابوها وحارث واكو شي
ضامته على جهاد حتى تدرين كالتله انت تزوجتني
وضحكت عليه حتى احجيلك بس اذا بطلت ما تگتله
وبس تسجنه اكولك
فاطمه:: هاي شتخربطين كل شي ما افتهمت يعني
هسه ريام وجهاد يعرفون منو كاتل خالي؟
مروى:: ما عليج بيها اصلا ما افتهمنه السالفه
صح بس ريام تخاف على جهاد كالتله اذا عرفتو
منو اسجنه مو تكتله وتنسجن فاطمه تره اذا
دره بينه تصنتنه عليهم والله يكتلنه
فاطمه:: بسيطه هسه مو وكتها خلي اشوف تالي
جهاد واني اعلمجن تضمن عليه وانتي نشرة اخبار
الدار ادواج عندي ان ما بطلتج من سالفة التتصنت
عاتبيني.
تبارك:: توه اريد ارد عليها فزينه كلنه على فتحة الباب طلعنه نركض طب ابوي واخوتي وراه تلكيناهم وعينه ادور جهاد بس ماكو دحكنه عليهم
وفاطمه بعد ما حاجيه حطت ايديها على وجهه تبجي وابوي سحبها لحضنه يحاجيها گال.
احمد::: اشش بابا لا تبجين شنوو تخافين على
جهاد وليدي السبع والله ما اخلي بس مناي لباجر وراح تشوفينه جدامج يلا بابا خواتج يدحكن عليج.
معاذ:: هاي لو اني جان ما بجيتي
فاطمه:: يمه اسم الله عليكم لا تحجي هيج والله كلكم اعزاز گلبي بس طمنوني شفتو
وشسويتو على موضوع ولد عمي
احمد:: لا سهله يابه هذوله يحتاجون فرگت
اذن منا لباجر اذا ما طلع جهاد اني اعرف شلون
اكسر اخشومهم عبالهم انساها الهم سهله يا ولد حاكم سهله.
تبارك:: ادحك عليه نار وتسعر ابوي شكد زين
بس اذا تعصب يصير يخوف وعلى راشدي اذاهف واحد الا يسطره دحك علينه كلنه موجودين استغرب دار على فاطمة وگال.
احمد:: امكم وجديتكم وين؟
مروى:: جده جوه عفناها تصلي
معاذ:: وامي
-ظلينه واحد يدحك بوجه الثاني وزياد يحك براسه
هو من شافنه ما ردينه زكح بينه جفلنه كلنه
احمد:: موو احاجيكمم امكممم بيها شي احجو
فاطمه:: يابه امي جانت بيت عمتي امل ومناك
سمعانه بجهاد وتخربط وضعها وفرات انطاها
الابره واخذت علاجها وهسه نايمه.
احمد:: لا وحول لله لو بس اتجوز من بيت امل
لو بسس تجوز الا تجلطني الا تجلطني هل حرمه
تبارك:: طب ابوي للبيت ردنه انطب ومعاذ گال
معاذ:: فاطمه خوي انتي ظلي اليوم اهناي
فاطمه:: خيرر صاير شي معاذ لا تخوفني
اكو شي ضامينه عاينه لا توكعون گلوبنا
معاذ:: هااي شبيج عمي جهاد گال حتى لا
تعوفنمرته ثبرنه ما مصدك روحه عنده مره
زياد:: هو هم صدك جهاد شوكت لحك يحبها
هيج والله اني جنت اجذب الحب احسه بس
الافلام بس من شفت جهاد لا صدك الحب موجود عدنه بالعراق.
-ضحك معاذ عليه وكعد على قريوله بالحوش
ودار على زياد وگاله.
معاذ:: اخوك مخبل والله اني من شفت تصرفاته گبل ما يمشي على ريام صدمني
تبارك:: كعدت گباله گتله ليش شسوه
زياد:: هههههههه كولي شما سوه
مروى:: ليش انتو جنتو تدرون بيه يريد يتزوج
گبل لا يكول لابوي من جنه كاعدين وسولفلنا
معاذ:: اي جنه ندري هو گاللنه گبل بيوم
فاطمه:: حمستوني سولفولي
معاذ:: اكعدي اسولفلج
-كعدنه وعيونه على معاذ ننتظر يحجي مسح
وجهه يضحك ورفع راسه وگال.
معاذ:: اخوجن گبل ما يحاجي ابوي بيوم دز
علينه احنه الشباب ولد خوالي جنه كاعدين
بالليل بالساحه جاي نشرب جاي وننتظر جهاد
يحجي تالي زكح بي فرات يريد يعرف شكوو
گاله.
فرات:: ما تسولف شنو لامنه وتتصفن بوجوهنه
جهاد:: لا شوفي راح اجيكم بالتي هي احسن
لميتكم حتى احجيلكم ولا تكولون فاتنه هاي
جيت وكتلكم اني اريد امشي على بنت خالي
خالد والي يفتح حلكه وينهي حلكه اشكه
عمر:: هاي جاي تاخذ رائينه تهددنه
جهاد:: ما اهدد بس مو ابوك يلعب بروسكم
وتجون تنهون والله بنت خالي خالد ما تصير
لغير
فرات:: على كيفك يابه ومنو فاتح حلكه تريدها ان رضت البنت ففرحتنه بيك جبيره انت اخونا
وهي اختنا اذا ما نفرح بيك بيمن نفرح
تبارك:: يعني محد منهم حجه ورفض
زياد:: لا حتى عمر شكد يتكاونون هو وجهاد بس
جذاب والله يموت على جهاد وجهاد ما يكدر بدونهم.
فاطمه:: الله لا يفرق بينهم اني احب خوتكم
معاذ:: امين الحمدلله محد كدر يخرب لمتنه
بس هاي الفتره المشاكل صايره ما تخلص
فاطمه:: ان شاءالله يطلع جهاد وترجع لمتكم
-ان شاءالله
فاطمه:: اني راح اروح يم ريام وانتو طبو جوه حتى
تتعشون.
تبارك:: هز روسهم وكلنه غوركت عيونه مقهورين
على جهاد راحت فاطمه وره ما اخذت صينية العشا
وطبينه احنه للبيت صبينه عشانه وكعدنه ابوي ما مد ايده واكل معاذ اكل لكمتين واحنه مثلهم
جديتي ادحك على ابوي وشلون وجهه مختنك
من القهر تالي عافنه وكام لغرفته مدري عليمن
ننقهر امي من جهه ومن جهه جهاد شلنه الاكل
وبس غسلنه المواعين رحنه لغرفتنه زياد الوحيد
الي ينام يم جديتي ما تحب احد ينام يمها بس لان
زياد تحبه حيل من يضوج تنومه يمها هو حيل متعلق بيه تمددنه بفراشنه ما تاخذ عيونه نوم
صافنه بالسگف واتخيل جهاد هسه بدون اكل
ويجوز نايم على الكاع لو يضربونه غطيت راسي ابجي بجيت لحد ما احس نفجر راسي وخرت الغطى ادحك مروى حاطه فطوشه بنت معاذ
بحضنها واني هم جريت حروثي يمي واثنينه
ما كدرنه انام صفنت وبالي مسره گلبي عصرني
خطيه من جدام عينها اخوها انمرد وجهه وتوفى
غمضت عيوني بوجع وادعيلها الله يصبرها ويفرج عن اخوي.
مسره:: كل ما اغمض عيني موقف الحادث
يصير كدام عيني دا احاول اكون قويه لخاطر
غسان بس كل ما اباوع بوجهه اشوف كسره
جبيره يمكن الي صبرنه وكفت بيت عمامي
ويانه بحيث 10احنه بيت عمو محمد وراها
يلا قبلو نرجع لبيتنه ويوميه يجون البناات وخاصه
ريام لان نعرفه وقريبه منه اكدر احجي وياها وميسون يوميه تخابر عليه وره ما جابلي غسان تلفون بيدت اتحسن بس شغل البيت قليل اشتغل
والاكل ما يلحك يجيبلنه من بره مرت عمو محمد
دزلنه ويا ولده غسان هليومين ملتهي ويا جهاد
ما كدرت اروح اشوف ريام كاعده وساكته وغسان
يطلع من الصبح ما يجي لل2الظهر بس يتغده ويطلع ما مرتاحه احس اكو شي ضامه عليه
كمت من فراشي بس غسلت وجهي وطلعت لكيت
غسان امبدل وجاي يلبس حذائه وكفت يمه اسأله
-وين رايح غسان؟
غسان:: لا تخافين رايح ويا فرات حتى نشوف بلكت
نكدر نطلع جهاد انتي تريكي واذا ضجتي خابري عمه
امنه تجيج خوش حتى ترحين يمهم لو اخذج هسه اني يمهم.
-لا ما اروح هسه عمه يجوز بيت اخوها والبنات
بالمدرسة اضوج وحدي خليني اهنا بس لا تتاخر
هز راسه وباس راسي وطلع واني ظليت افتر بالبيت خابرت على ميسون حجينه شويه وسديته
منها ايدي لهسه مجبسه اكون هليومين يوديني
غسان بس ألتهه ويا الولد كعدت بالمطبخ صافنه
واتذكرت لمتنه قبل عرس ميسون البيت متروس
هسه صفينه بس اني وغسان بي وغسان هتي الفتره كله قليل يتواجد بالبيت ما اعرف وين يروح
حطيت راسي على الطبله وابجي احس بعدني ما شابعه من حنان اهلي ضايعه مالي احد بجيت الا
ما تعبت كمت تمددت على القنفه وبداخلي اكول
-معقوله خطية ريام طلعت بينه ابوي هواي أذاها
وحتى امي وفراس صح احنه البنات محد منه أذتها
بس ابوي جاي يكتلها كتل يورم جسمها امي جانت
تتحسف تنطيها ملبس جديد من دخلت لبيتنه لحد
ما طلعت ما اشترولها ملبس والي جان يجيبه غسان امي او تشكه لو تحركه ما اعرف ليش هل كره وشسوه عمو خالد حتى هيج أذو بنته كعدت فازه على صوت دكت الباب رفعت عيني للساعه
اباوع يااا الساعه 11ونص كمت سحبت الشال
من التعلاكه وحطيته على راسي احنه عادي نطلع
بالتراك مو مثل البنات من سألتهن كالن ما يقبلون
يلبسن بنطرون فتحت الباب لكيته وسام منطيني
ظهره گتله.
-تفضل وسام
هو دار وجهه تكول تكهرب خرزني ونتر بيه
وسام:؛ شلوون هيج طالعه
-شكو شبيه
وسام:: اكفي وره الباب من تحاجيني نعل على
تربيتك حمدان بنت الـ... استغفرالله شلون
تطلعين بالتراكسوت ما تستحين بالله احد شافج ولمي شعرج زين الا اطيح حظج.
مسره:: هييي احترم نفسك وشعليك بيه واني
متربيه احسن منك يلااا روح منا شكو جاينه.
وسام:: بالقرآن اذا افوت اكسر راسج بنت الاوادم ما اكول غيرها وهاج الزقنبوت حتى نولي.
-باوعت عليه شلون اخذ الجداري هو ظل ينافخ
دكول شايفله بنت شارع حيل ضجت منه وانوب
اني ضايجه ما تحملت كعدت بالباب ابجي مقهوره
وهو دار عليه مصدوم حط الاكل بالكاع ويصيح عليه.
وسام::كومي كومي شسالفه صدك تحجين
كومي يابه شجحيت هسه ما مستاهله تبجين
مسره:: امسح بدموعي واحجي بقهر مدري لان اني مقهوره وانوب هو زادها عليه كتله
-تره انت دتحجي عليه ودتصرخ بوجهي شمسويتلك تقبل احد يحجي على اختك هيج
نرسمت الضحكه على وجهه وحك شعره وگال
وسام:: ما قصدي احجي عليج بس ما يرهم وين
عايشين احنه لابسه تراك وطالعه تفتحين الباب
بهلبس ما راهمه دكومي يرحم والديج هسه الي
يفوت مناي شيكول علينه استري علينه يلا كومي
مسره:: كمت وانفض بيد وحده توه رفعت راسي
اريد ارد عليه وكفت عمه امنه ومن شافتنه هيج
جت تركض خايفه وصلت يمي وتسأل بيه
امنه:: يا يمه خما بيج ولج وكعتو گلبي شصاير
وسام:: ما صاير شي بس شفت عينج العينتين
بنت حميدان الموسقف طالعه بالبجامه والشعر يهف.
مسره:: نرفزني كلش درت عليه ضربته على صدره
واحجي بقهر.
-هيي شقصدك لك اريد اعرف طالعتلك مصلخه
تحجي عليه بعدين منو انت وتجي تحجي وياي هيج والله اخلي غسان يكسر راسك حيوان ما محترم بلا ادب.
كام ينافخ لان غلطت عليه وما احس غير يريد
يلزمني وعمه واكفه بينه تدفع بي وهو صاير شراره
هو شطوله عمه يلا راسه واصل لمعدته هو من وراها يهدد ويغلط.
وسام:: وراس ابوي الغالي اذا عديتها وغلطتي اكسر راسج تمدين ايدج انعل والديج بنت حمدان
الجلب والله الا اندمج بنتتت الجلاابب تغلط وتمديها وخررر يمه خلي اعمله الادب والاحترام
عمه تدفع بي وتتوسل يروح تعبه كوه مسيطره عليه كالتله.
امنه:: ولكك وسام روح يمه شلعت گلبي ميخالف
ما قصدها بنت عمك ولكك جدامي تريد تضربها
وسام:: يمه جدامج اني تغلط عليه زعطوطه بكد قندرتي نعللله على تربيتكك حمدان نعللله.
-قهرني بالزايد من يغلط على ابوي وكف بسد الباب
حتى خاف يجيني اسد الباب واشرد للبيت وكفت گتله.
مسره:: تروح فدووه لابوي و تربايته وانت القندره
متستحي تغلط على بنت يلا ولي منا لا اخابر غسان
عليك
وسام:: خررب والله شوفي عوفيني يمه شوفي
بنت حمدان گصي السانج انعل خيرج والله اذا
احطج براسي اشوفج انجوم الظهر حييواااانه
-خير خير شكوو اهناي
وسام:: ناس ما متربيه يردون اربيهم
مسره:: انت الما متربي ما تحترم النساء يلا برره
عمر:: ولللج سدي حلكج الا اكسره الج بنت
الذين هييي ولج شلون طالعه هيجج ويا وين
اخوج المكرررن طبييي جووه من نعله على صفحة اخوج الدايح طبيييي لا اجيج شكد صلفه.
-ما خلصت من ذاك جاني هذا عمتي ظلت تدفع بيهم تالي بزعت يصرخت بيهم كالت.
امنه:: ولكك يمه دخذ اخوك وروحو فضحتونه
الدنيا ظهر لا يجي احد دمشي عمر يمه ما مستاهله السالفه اني اني افهمه بس روحي شليتو حاليي.
-باوع عليه العيون نصبغت احمر وحتى بكصته
شريان طلع رفع ايده يحاجيني بتهديد.
وسام:: والله لو ما امي وتمنيتج مو بنيه اذا ما اكسر راسج ما اتسمه وسام بس هينه يبنت حمدان هينه
امنه:: روح يمه روح فدوه لعينك
مسره:: سحبه عمر وراحو وعمتي من كد ما تعبت
كوه نزلت شالات الاكل الي نصه انكب من وراه
طبينه للبيت حطت الاكل بالمطبخ وجت كعدت يمي اني من شفته خجلت منها بس هو قهرني
حطيت ايدها على جف ايدي وابتسمت وكالت
امنه:: يمه مسره لا تحسبيني كلامي لان وسام
ابني ومو دفاعاً عنه بس يمه انتي هسه وحده
من بناتنه وما اريد احد ياخذ نظره مو حلوه عليج
الضنا يا يمه هو الي يجيب الرحمه لاهله وهو الي
يجيب حشاكم وحشا اهلج انعله لاهله ويمه البنت
حلاتها بالسانها ويزيد من جمالها هو خجلها مو حلوه تكفين وتغلطين على ولد عمج ما اكولج ابني
ما غلطان بس يايمه الزلمه ما ينغلط عليه من شفتي
تعصب اسد بابي واكعد بيتي بس ما يصير تكفين
بالباب وتغلطين وتحاجي هيج حجي خوش يمه.
مسره:: هزيت راسي اي بس عمه هو ما يصير يسب ابوي وهو ميت قهرني وحسيني اني طالعه
بلا ملابس شبيهم ملابسي اني دوم متعوده البس
هيج.
امنه:: حكج يمه بس ولدنه ما يرضون بهذا اللبس
شفتي بنياتنه غير النفانيف ما يلبسن من حرصهم
عليجن مو قصده شي ثاني بس بنواتنه كلها لابسات
عبي وانتي يمه ما يرهم طلعين شعرج جدام احد
مسره:: ما قصدي والله عمه بس من وره ايدي
ما أكدر ألف الشال هاي هي عمه بعد ما احجي
عليهم وما افتح الباب انتي لا تزعلين عليه من وراه.
-ضحكت وگالت
امنه:: لا يمه ما ازعل دكومي خلي ابدلج والبسج
حجابج واخذج يمي هسه البنات جن لا تظلين وحدج.
مسره:: هزيت راسي وكمت حظرت ملابسي بس
هي ساعدتني بدلت ولفت شعري وحجابي كملنه
قفلت الباب وطلعنه للبيت بس وصلنا لكينه البنات
جايات من المدرسه تلكني وصبن الغده وكعدنه نتغده ونسولف على شغلة جهاد.
مهى:: ضجت اليوم من ما داومت ريام بقى بالي
يمها مدري من الضوجه شلون مر الوكت خلص
الدوام وجيه زياد رجعنه اني ومروى وطول الطريق
اثنينهم ساكتين وواضح القهر على وجوهم بس وصلنه بيوتنه كتله لزياد.
-نزلني اهناي خويا اني اروح انتو اخذو راحتكم
زياد:: براحتج خويا يا هلا بيج
مهى:: نزلت هو لف السياره وراح مشت عبرت
بيت عمي محمد وشفت زلمه واكف باب بيتنه
ما اهتميت عبالي واحد من اخوتي ويا ما وصلت
دار وجهه علي معاذ واكف دنكت ومشيت وصلت
بابنه سلمت علي وردت اطب وكفت وصديت عليه
من صاحني.
-مهى
-هاا
معاذ:: بلا امراً عليج ما تصيحيلي عمر
مهى:: هزيت راسي وادحك على وجهه مختنك
عكس كل مره جان يضحك ويعارك امبين عليه
ما اله خلك اشىلي اطب عفته وطبيت للبيت
ماكو احد مشيت لغرفة عمر ماكو طلعت ادور
عليه سمعت صوت بغرفة ابوي رحت توه فتحت
الباب فز عمر من شافني جر نفس وغمني واني بقيت عاكده حواجبي ما مفتهمه فال الغرفة مدري
شيدور طبيت يمه كتله.
-عمر معاذ واكف بالباب يريدك
عمر:: خوش مهاوي عزلي الغرفه گبل لا تجي امي
خوش اني طالع وانتي تغدي لا تنتظرين احد
مهى:: زين اصبرر امي وين؟
-بأستعجال...
عمر:: بيت خالتج ويجوز تبات يلا في امان الله
مهى:: ما لحكت ارد طلع واني ظليت ادحك على
الغرفه ما الي خلك بس مجبوره عزلته واخذت
جطنتي وطلعت لغرفتي اخذت ملابس سبحت
وطلعت كوه مسيطره من الجوع صبيت غده
تغديت وغسلت مواعين واخذت موبايلي خابرت
على فاطمة اسأل وين يلا ردت وين اريدها تحجي
ملتهيه ويا علاوي ربع ساعة اني انتظر بيها يلا كالت
فاطمة:: الووو هلا مهاوي
مهى:؛ همزين خيه حايره بابنج وعايفتني على الشحن
فاطمة:: ولج شسوي ساعه يلعبون ساعه يتمالخون
هو وحروثي المهم شلونج شسوين ما تسوين
مهى:: والله زينه الحمدلله كاعده وساكته انتي بشريني شصار على موضوع جهاد ما طلعو
فاطمة:: والله مهى شكولج هل يومين ولا كعدو
بس هسه گبل شويه خابرت فرات كال جايهم
ضابط ويا ليث ابن سيد محمد وان شاء الله للعصر
بلجي يطلعونه والله مهى گلوبنه راحت وهذوله
جلاب ينخاف منهم والله كريم بلجي هذا الضابط
يطلع خوش ضابط ويساعدهم رجليهم راحت من الروحه والرده اكل مثل الناس محد ياكل
مهى:: اي والله حقكم حتى گبل شويه شفت معاذ
وجهه اصفر ومختنك حيل انقهرت عليه امبين شكد تعبان.
فاطمة:: معاذ نوم ما نايم صارله يومين
مهى:: الله يساعدكم وريام زينه
فاطمة:: لا والله وضعها ما عاجيني مدري شبيها
مهى:: الله يساعدكم گلبي انتي اخذي راحتج اني
والبنات يجوز نجيكم العصر حتى نشوف ريام والبنات.
-كل الهلا بيجن حياتي
-مع السلامة
-الله وياج.
مهى:: سديته منها وخابرت رحاب وتسولفنه هم
شويه وسديته بعد ما اتفقنا نروح لبيت عمي احمد
كمت لغرفتي لزمت ملزمتي وقريت محاضراتي
لل3 العصر كمت رتبت نفسي وخابرت البنات
جن عليه وكفن بالباب اخذت عباتي وقفلت البيت
وطلعنه حسين يمشي جدامنه بس وصلنه وراح
طبينه تلكنه البنات سلمنه رحنه لبيت جهاد لكينه
عمه امنه يم ريام سلمنه عليها وكعدنه وجهه اصفر
تعبانه امبين عليه كلش مسره لزكت بيها وهي
سحبتها حضنتها ظلينه نسولف ونحاول نغير من جوهم بس ما كدرنه ضوجتهن وقهرن حيل مأثر عليهن جهاد للمغررب ظلينه يمهن كمنا نريد نرجع
واكفين كلنه بالحوش ونسمع صوت سيارات ريتاج
ما صدكت گبل فتحت الباب شويه توايج عليهم
وعمتي تحجي عليه.
مهى:: سديته منها وخابرت رحاب وتسولفنه هم
شويه وسديته بعد ما اتفقنا نروح لبيت عمي احمد
كمت لغرفتي لزمت ملزمتي وقريت محاضراتي
لل3 العصر كمت رتبت نفسي وخابرت البنات
جن عليه وكفن بالباب اخذت عباتي وقفلت البيت
وطلعنه حسين يمشي جدامنه بس وصلنه وراح
طبينه تلكنه البنات سلمنه رحنه لبيت جهاد لكينه
عمه امنه يم ريام سلمنه عليها وكعدنه وجهه اصفر
تعبانه امبين عليه كلش مسره لزكت بيها وهي
سحبتها حضنتها ظلينه نسولف ونحاول نغير من جوهم بس ما كدرنه ضوجتهن وقهرن حيل مأثر عليهن جهاد للمغررب ظلينه يمهن كمنا نريد نرجع
واكفين كلنه بالحوش ونسمع صوت سيارات ريتاج
ما صدكت گبل فتحت الباب شويه توايج عليهم
وعمتي تحجي عليه.
امنه:: ولجج فضحتينه سدي الباب
ريتاج:: دصبري اشوف
مهى:: ما فاد بيها صوت الزلم بالساعه همه واكفين
سحبنه البنات وكعدنه على قريوله بالحوش وفزن
البنات على فتحت الباب ودخل جهاد......
