رواية لست غجرية الفصل الثامن والعشرون بقلم روز الحيدر
رجعت رفعت عيني له بتردد
وردة : وباهر سويتله؟
رفع عينه بصدمة وختفت أبتسامته ماتوقع مني أذكر اسمه..
سكت ثواني يباوعلي بطريقة ضيعتني بين الخوف والحيرة... وبعدين كال
نسر : هااا...أبهير!
احتاريت شگول...
رفعت كتافي وسكتت
نسر : لا تخافين... سليم، مابي شي
رجع خزرني وكال
نسر : عزيز گلبج
عقدت حواجبي بسرعة
وردة : مو هيچ قصدي.
رفع راسه حتى عيونه تغيرت
نسر : شنو قصدج إذن؟
ارتبكت من نبرته. أول مرة أحس غيرته هيچ واضحة
وردة : بس سألت...
ضحك ضحكة خالية من الفرح وهز راسه
نسر : أي طبعاً ... مجرد سؤال عن رجال ظل سنين
وياج
وردة : أمير!
قرب خطوة وعينه بعيني مباشرة
نسر : أغار؟ اي أغار. ومن اسمع اسمه منج دمي يفور
لأن فكرة إن واحد غيري عاش وياج بنفس المكان
تخليني أختنگ.
دگ گلبي بسرعة نزلت عيني
نسر : بس اسمعيها مني زين... مهما صار ومهما كان بماضيج ناس، هسه أني موجود. وأي رجال يفكر ياخذ مكان بگلبج لو حتى ببالج...
رفعت راسي ابتسم ابتسامة خفيفة خطيرة
نسر : لازم يمر علي أول.
بتوتر
وردة : لا عبالي هم هيچ سويت ويا گلت ينتحر.
فتح عيونه يريد يستوعب كلامي
نسر : شنوو!.. أنتِ من كل عقلج هيچ تحجين بدون
تفكير؟
رفعت حواجبي ببراءة
وردة : يعني كلامي بي غلط؟
نسر : كله غلط... سدي حلڪج و الموضوع.
لف راد يمشي...
وردة : لا لحظة تعال، مو ماعرفت شكد نحكم؟ وصار
وياه؟
وهو يمشي حتى مالتفت
نسر : لاتعرفين، معليج.
وگف والتفتلي، عيونه غاصت بعيني.
نسر : هااا... ليكون تردين تنتظري عزيز گلبي؟
وردة : لا طبعاً... بس فضول.
هز راسه
نسر : الفضول كتال صاحبه... والزمي لسانج.
رجع مشى واني وراه.
وردة : لا له اللساني ماكدرله.
التفت بسرعة
نسر : هم صح...تعاي ولج شمصخمه البارحة؟
وردة : ماصخمت والله كعدت أتعرف عليهم وسألتهم شلون ضعت وضيعوني.
نسر : متأكدة؟
وردة : اي والله ليش؟
نسر : سمعت ميسر يكول ماعدها بريك فاتت عليهم
دمرتهم
وردة : لا والله ماحجيت بس سألتهم شلون تزوجوا
وعن ليلة عرسهم.
وكف فجأة والتفتلي بصدمة
نسر : وشعليج؟ عيب!
وردة : شني عيب؟ أني أعرف العيب بس الحرام.
نسر : هاي هي... بعد معليج.
وردة : شني معليج؟ مسولفو عن ليلة عرسك؟
التفت كامل إلي ورفع حاجبه
نسر : هي هاي الخايف منها... تفضحيني وتخزيني.
وردة : واني شكو؟
قرب بخطوتين وصار صوته واطي
نسر : لأنج تسألين ببراءة... وتخليني أتخيل شغلات المفروض ما أتخيلها هسه
بلعت ريڪي ضحك بخفة
نسر : شفتي؟ هذا اللي أقصده... بعدج ماتعرفين شتسوين بيّ
وردة : لا تبلش.
ابتسم بمكر ومشى ببطء حتى صرت أمشي يمه
نسر : والله أني بريء... هاي كلها من أسئلتج الخطيرة
وردة : لا والله انت لوتي وتفسر كلشي على كيفك
ضحك وهو يباوعلي بطرف عينه
نسر : لأن أي كلمة منج... گلبي ياخذها بمنحى ثاني
وردة : واني شعلية بيك؟
غمز
نسر : لان ليلتنا وحدة
عفطت عفطه خفيفة خزرني
نسر : اعلمج شلون تعفطين عدل
وردة : ليش هسه عفطت اعوج؟
وكف فجأة، التفتلي وكأنه يدرسني بعدين قرب شوي وهمس بنبرة كلها لعب
نسر : لأن هاي العفطة بيها دلع أكثر من الزعل
وردة : سخيف!
ضحك بصوت واطي وغمز
نسر : لا... خبير بيج
نزلت عيني حتى أخفي ابتسامتي
بس هو مد إيده ورفع طرف ذقني بخفة
نسر : من تعفطين صدگ... عيونج تكبر وشفتج ترتجف.
أما هسه؟
ابتسم بمكر
نسر : هسه بس مدللة تريد تتعارك وياي
حسيت وجهي حمى بسرعة
لفيت وجهي بخجل أمشي أسرع منه
ولحگني وهو يضحك
نسر : يمعودة أوگفي... بعدني ماعلمتج العفطة الصح!
وگفت أباوع للمكان
وردة : أهلي وين؟ ضيعناهم؟
مد ايده
نسر : تعاي اخذج ألهم
باوعت لأيده
وردة : شني زعطوطه واضيع؟.. هسه اخابرهم
ردت اطلع المبايل
نسر : يله امشي منا عندي شغلة وهم قريب عليهم
مشينا لزمت ايده
وردة : ياااء ...ولك طلع أبوي متزوج ثنين وهاي
الأيجة مرته اقصد طليقته
هز راسه بأستهزاء
نسر : جؤ جؤ ...شنو هل صدمة اول مرة أعرف
باوعتله
وردة : شلون عمك؟ وماتعرف!؟
لتفت بحدية
نسر : طبعاً اعرف
وردة : وليش ماحجيت.. وليش ماعرفتها؟
نسر : وين شايفها واعرفها يمعود!
وردة : اي هم صدك نسيت بس من باب صدمتي
ماعرف شكول
نسر : اهممم ...حقج ذكرتي عزيز گلبج وماكمتي تجمعين
وردة : لا أبهر شعلي
فتح عيونه ولتف
نسر : أبهر!؟ صلافةة وعرامةة شايلتها محد شايلها
غيرج
كتمت ضحكتي... اموت بي من يغار
رفعت عيني له بنظرةحُب ونبرة ودلع
وردة : أنتَ... عزيز گلبي
نسر : نجبي تضحكين عليه بوجهج البريء
وردة : شسوي... تعجبني من تغار
يباوعلي بصدمة خفيفة وكأنه مو مستوعب شنو
سمع
نسر : هاا؟
ضحكت بخجل تقرب خطوة وهمس
نسر : عيديها
عضيت شفتي أكتم ضحكتي
وردة : لا
نسر : جوري... لتخليني أتخبل
رفعت عيني له بخبث
وردة : شنو؟ مو أنت تكول صلافة وعرامة؟
حط إيده على صدره تمثيل
نسر : لا هاي مو صلافة... هاي شروع قتل
ضحكت عليه وهو ظل يباوعلي بنظرة كلها حب
وغيرة بنفس الوقت
نسر : يعني صدگ يعجبج أغار؟
هزيت كتافي بدلع
وردة : احب... احس نفسي مهمة عندك
ارتخت ملامحه فوراً... وكأنه هالجملة وحدها كفت
حتى تراضيه
لزم ايدي بخفة
نسر : مهمة؟
نزلت عيني على أيده
وردة : أهم من المهمة بعد
تنفس بعمق وكأنه يحاول يسيطر على نفسه بعدها
مال على أذني
نسر : إذا تبقين تحجين هيج... أنسى الناس وأخذج وأشرد بيج
وردة : احمم اريد أمي
ضحك بصوته الواطي
نسر : يله بس اشوف هذا المحل ونروكلهم
مشينا دخلنا محل ذهب سلم واني بقيت اباوع
مستغربة
نسر : أريد خاتم زواج
:: ذهب لو ماس؟
نسر : طلع الاثنين اشوف
رجال يطلع واني قربت منه
وردة : شتسوي بيهن؟
نسر : بنت عمي تزوج واخذلها هدية
وردة : ياء وتاخذلها ماس؟
بعد عينه عني
نسر : تستاهل عيوني الماس شنو!
عوجت حلگي
وردة : أمممم
توقعته يغورني لان ذكرت باهر لفيت وجهي عنه
بس عيوني صارت براسي اباوعله وأذني يم حلگه
طلع الخواتم ولرجال يشرحله اخذ الخاتم يشوفه
وردة : اععع... صارت صدك ولج وريدة!
تقربت مدري شبيه ألوي بروحي چني حيه واتحسر
بلكوة عضيت اللساني حتى مااحجي.. اخذ ايدي
نسر : الماس يلولك للماس
فتحت حلڪي
وردة : ألي؟
نسر : ماعندي غيرج.. شوفي عجبج واهم شي يصير
على أصبعج
لزمت الخاتم اباوعله مبتسمة
وردة : هذا مثل مالت يحيى ولميس لا والله هذا احلى
نسر : عجبج؟
بنبرة فرح
وردة : غير يخبل
نسر : شوفي على أصبعج
بدون تفكير لبسته
وردة : يااا هم بي كبر شوية
نزعته رجعه اخذ واحد مثله وقياسه مضبوط
وردة : هاي زاركون لو ماس حقيقي؟
نسر : ماس حقيقي
عيني على خاتم يجنن بعدها طلع سجل ونطى وصل
نطاني علبة ردت انزعه
نسر : خلي بأيدج شكو نازعته!
وردة : خاف توڪع الماسة
نسر : فدوتج حبيبي
رجعت باصبعي واخذت العلبة والورقة نطيتهيا
وردة : خليها يمك خاف أضيعها
اخذها وطلعنا مشينا شوي ولكيناهم منتظرينا
سناء : وين رحتي؟
قبل مااحجي رد
نسر : دخلت للحمام
فتحت حلڪي بدهشة شلون دبرها!.. مشينا طلعنا
للسيارة اخواني منتظرين
وأباوع للخاتم بالبوگه خاف يشوفوني رجعنا ونزلوا
الاغراض بعدما غيرت ملابسي كعدت
سناء : تصلين حبيبتي؟
وردة : اي
نهضت
وردة : شلون اعرف وقتها؟
سناء : نصلي وبعدين شوية شوية تتعلمين بس اهم
شي تحفظين الصلاة
وردة : هاي اللي اقراها بالصلاة؟
هزت راسها ورحنا توضينا لتفت لها
وردة : يصير مااحجي هذا اللي تحجي بالوضوء؟
هزت راسها تبتسم بحنية بعد ماكملت
سناء : اي حبيبتي...أدعية مو فرض تحفظيها كلها
هسه
وردة : يعني عادي إذا ماگلتها؟
سناء : عادي... الوضوء يصير صحيح حتى لو بس تغسلين وتتوضين بنية الصلاة بس هاي الدعوات
حلوة... تقرب العبد لربه أكثر
هزيت راسي..
لمست شعري بحنية بتسمت
سناء : لا تضغطين على نفسج شوي، شوي تتعلمين
وردة : أخاف أغلط؟
سناء : حتى لو غلطتي... الله مو ماطلب منج تكونين كاملة من أول يوم يكفي إن گلـبج متوجه إله
سكتت باوعتلها
وردة : وانتِ منو علمج؟
بتسمت
سناء : أبوج
فتحت عيوني
وردة : هااا!
بتسمت
سناء : أي والله كتلج هو رباني على أيده جان يكعد
يعلمني لحد ماتعلمت
وردة : زين مادرستي؟
سناء : لا بس اعرف اقرأ واڪتب.. ڪافي علية خليت
ولدي يوصلون وأفتخر بيهم
ضغطت على ايدي بخفة
سناء : وانتِ هم ان شاءلله اخليج تڪملين دراستج
بتسمت
وردة : يعني أڪدر؟
هزت راسها
سناء : طبعاً واحنا وياج
ضحكت وطلعنا للغرفة وكفت ارش عطر ورتبت شعري وخليت حمرة خفيفة هي صافنه علية اخذت سجادة
وجادر صلاة عطرتهم
سناء : شدسوين ماما؟
وردة : فشله من الله يشوفني مامرتبة
بتسمت هزت راسها
وردة : عادي مو؟
سناء :عادي جداً... النظافة والاهتمام بالنفس من الإيمان بس الأهم النية والخشوع..و هذا الشي الحلو بيج... إنج تحبين تكونين بأحسن حال حتى بين إيدين ربج
بتسمت.. وكفنا قبل ماتبدي لزمتها
وردة : لحظة... لحظة
سناء : ها...؟
وردة : من أسجد شكد وارفع راسي؟
بتسمت
سناء :تكولين بالسجود، سبحان ربي الأعلى، ثلاث مرات ولمن ترفعين راسج تكولين، الله أكبر..
بتسمت براحة
وردة : هااا هم زين
وكفت تردد واني اردد وراها كلمة...كلمة لحد ماكملنا
بقيت كاعدة على سجادة
وعيني على موضوع السجود أفكر..
شكد ...ضاع من عمري واني صلاة ماعرف أصليها!
رغم الله دائماً وياي حتى واني بعيدة عنه بقى وياي
هنا عرفت اني ماضعت بس عن اهلي ضيعت طريقي
الله وهذا أڪبر ضياع عشته بحياتي
لا ارادياً عيني دمعت مسحتها وتنفست بعمق التفت
على أمي شفتها تباوعلي
وردة : هواي اني عايفة الله بس هو ولا مرة عافني
بتسمت
سناء : المهم رجعتي
وردة : بس تأخرت شلون اعوض عشرين سنة؟
سناء : تردين تعوضين؟
وردة : يصير؟
سناء : طبعاً يروحي... تكدرين تصلين قضاء مافي
الذمة
لفيت جسمي عليها
وردة : هاا شلون؟
سناء : لما نرجع اكعد احسب اللي فاتج وشكد ويطلع
حتى تقضي الصلاة
وردة : اي اهم شي الله يرضه عني
بتسمت.. سمعت الصوتهم اجو من الجامع نهضنا
بايدهم مسواك
محمد :،أم ياسر حبيبتي اريد العشا من أيدج الحلوة
باوعتلها بتسمت قبل ماتحجي ندستها
وهمست
وردة : هااا سوسو كلبج رفرفر؟
ضحكت بخجل... كرصتني بخفة
وردة : ياااء... شبعتيني كرصات
سناء : لا على كيف كرصتج..
رفعت ردني
وردة : شوفي هاي كرصات البارحة
باست الأثر
سناء : سودة بوجهي بعد مااسويها والله
وردة : لاا فدوتج ام ياسر حبيبت محمد
ضحكت.. رحت اخذت من ايده
سناء : بعد وقت للعشا
محمد : اي بس تعرفيني مااحب الأكل الجاهز الولد
اذا يردون يطلبون بس اني من أيدج
حبيت كلامه وياها ونظراته ألها
وردة : شهل رومانسية حمودي
نظر لبابا وضحك
ياسر : اويلي حمودي
ضحك وهز راسه باوع لأمي
محمد : ها سناء صرت حمودي
سناء : غير بنتج ودلعك
وردة : اي انت هم دلعها سوسو!
ميسر : متعودين هو دائماً هيج يعاملها
وردة : اي يعوضها جفا السنين العاشتهن
عدل كعدته
محمد : احمم
قبل مااحجي كال
نسر : جوري ... تغدينا وماشربنا چاي
ياسر :أي والله اريد چاي من أيدج الحلوة
وردة : صار
رحت خليت الچاي وبقيت واكفه هم يسولفون
بينهم واللي يتصل... اجه يمي
نسر : شبيج؟
رفعت كتافي
وردة : شنو؟
نسر : لا... بس مو كلشي تفكرين بيه تحچين
وردة : ليش؟ شحچيت؟
نسر : مو قصدي بس بعدهم ما متعودين على أسلوبج
وردة : وأني شنو ذنبي؟ هذا طبعي
نسر : جوري... مو كل الناس تتقبل الصراحة
باستغراب
وردة : ليش سويت شي غلط؟
سكت لحظة... وبعدين تنهد
نسر : المهم بس انتبهي مو كل كلمة تنحچي
وردة : ما فهمت؟!
سكت.. رفعت عيني له
وردة : ليكون مو عاجبك؟
بتسم بتسامتة ترد روحي وطمن گلبي
نسر : كلشي بيج عاجبني
وردة : متأكد؟
حجيتها ولفيت.. أرتب صينية الچاي
نسر : وبَطل صفين... متأكد وعندي استعداد اتحمل
كلامج وأسلوبج العمر كلة
تنهد
نسر : بس خليج وياي هيج ويا الناس لاتحجين شي
كتلج مو كلها تتقبل
رفعت راسي له وباوعت الأهلي
وردة : حتى أهلي؟
هز راسه وسكت...
هنا فهمت سكوته أڪثر من الف ڪلمة
وردة : صح... يمتى صاروا أهلي غير البارحة!
نسر : مو هيج قصدي
رحفت ايدي
وردة : لا صح اني شنو؟ وهيج احجي وياهم يمكن
لازم ـــ
نتبه الأيدي اخذ الكواب من أيدي
نسر : خلي عنج
وردة : بس اني هيج مااشوف كلامي بي غلط غير
الحقيقة؟
وهو يرتب الكواب والخواشيك
نسر : اي حبيبي مابي غلط وهاي الحقيقة تذكرهم
بماضي يردون ينسوا، وصح كلامج لان اعرف عمي
يحفر بالصخر حتى يعوضها
ترك من ايده باوعلي
نسر : عمتي تعذبت خاصة بعدج لذلك عمي يسوي
المستحيل حتى يشوف ضحكتها
وردة : وبكلمة وحدة مني ذكرته؟
هز راسه
نسر : بالضبط
سكتت...خليت الشكر
وردة : بعد مااحجي شي
نسر : هههههه.. ماعندج حل لو طخه لو طشر مخه!
سكتت ...صبيت الچاي وقدمته واني ساكته وبس
أمير وابوي ويسار يسولفون عن الشغل وأيسر طلع ماعرف وين
وميسر كاعد يم امي هم يسولفون... كعدت يم ياسر
ياسر : چايچ يعدل الراس
بتسمت
وردة : عوافي
طلع مبايله
ياسر : تعاي شوفي علوشي
تقربت نطاني المبايل اشوف صورت طفل ابيض مدبدب
وشعره أسود.. بتسمت
وردة : حلو الله يحفظه الكم
ياسر : ويحفظج يبعد بيتي
بتسمت
وردة : بس ولد عندك؟
شرب الچاي ونزله
ياسر : اي بس علاوي والثاني بالطريق ان شاءلله
وردة : زوحتك اقارب لو غريبة؟
ياسر : لا غريبة
وردة : ها شلون تزوجوا؟
خفت يفهموني بسرعة صححت
وردة : يعني حب لو تقليد؟
ياسر : لا والله تقليد بس بالخطوبة وبعد الزواج
صارت احلى حبيبة وزوجة
بتسمت
ياسر : تعاي خلي اتصل فيديو وشوفيها هي هم
كالت
وردة : لااا... لاا بعدين
ياسر : لاتستحين هي كلش جتماعية وتتاقلم بسرعة
على شخص
وردة : حتى لو خليها اذا رجعت اشوفها
ياسر : هاي هي بكيفج
وردة : شسمها؟
ياسر : تحرير.. بس ادلعها حرة، حرورة
وردة : عفية عليك... احب الرجال اللي يحب مرته
قصدي احترمه
ضحك
ياسر : ام علاوي هاي شعندي غيرها
وردة : الله ييدمكم
بتسم
ياسر : احجيلي عنج؟
رفعت كتافي
وردة : شحجي؟
ياسر : مادري بكيفج شيكول گلبج؟
سكتت وصفنت ثواني ماعرف خاف احجي كلام
مو بمحله.... فزيت من صفنتي على لمست ايده
ياسر : وين رحتي؟
وردة : مارحت
ياسر : لا بحرتي بأفكارج
بتسمت... خفت احجي اجه يسار كعد يمي
يسار : شتبسبسون؟
ياسر : أتعرف على شموخنا
هز راسه
يسار : اخا ...شموخنا سويتي بينا!
ندسه
وردة : مافهمت؟
يسار : أمي.. شموخ أمي وأبوي دمروا حتى علاقتهم
نتهت
بلعت ريكي بتوتر
وردة : شلون؟
يسار : أمي نفسيتها دمرت وكرهت حياتها لدرجة
كالوا تخبلت.. جانت تاخذ ملابسج تحضنها وتطلع
دور
ياسر.. ندسه يريد يسكته
وردة : خلي يحجي.. ليش ميحقلي اعرف؟
ياسر : ماانريد نزعلج
وردة : ماازعل بس ازعل من تعاملوني وتحسسوني
مالي حق اعرف صار وشلون عاشوا
يسار : صح لذلك اني احجيلج أمي وصلت مرحلة
الجنون واحنا صغار الله وڪيلج كبرنا قبل عمرنا..
هز راسه
ياسر : صار همنا نخليها بس تعيش
يسار : الي منها وبيها كالوا تخبلت خلاص وصار لوم
عليها
وردة : هي شعليها غير ثقت!
هز راسه
ياسر : الناس ماترحم واللي يقهر تسمعين الحجي
من اهلها خواتها وخوانها ماوكفوا وياها ابد ڪأنهم
غرب
يسار : لا والله الغريب احسن على اقل اذا مايوكف
وياج مايذب حجي
ياسر : اي والله لسه اذكر خالي وخالاتي يسولفون
بينهم وكلامهم اجه ترس أذني من كالوا خطية سناء
تخبلت هسه محمد هم يعوفها ويتزوج عليها ولدها
يضيعون
تحسر
ياسر : وحدة من خالاتي كالت تستاهل ومحمد اذا
يريد اني اشوفله مرة
فتحت عيوني
وردة : عزااا بعينها شـ
سكتت.. وكملت
وردة : شكد حاقدة
يسار : اكلج شي بس لاتحجين بي
وردة : كول
سكت...ڪأن الكلام صعب رفع عينه ألي وبصوت
ناصي
يسار : وحدة من خواتها صارت تتودد على ابوي
ضربت وجهي بقوة نتبهوا بسرعة
سناء : أسم الله ماما شبيج؟
بلعت ريڪي
وردة : ذبانةة كتلتها
سناء : يااء منين اجت البيت يلمع!
وردة : هاي بعد حظي
ضحكت ورجعت تسولف وي ميسر... رجعت التفت له
همست
وردة : وأبوي شسوه؟
ياسر : صرنا اني ويسار نراقب حركات خالتي من
تجي
وردة : هي هاي نفسها الكالت اشوفله مرة؟
ياسر : لا هاي الجبيرة بس الي صارت تتوددله الأكبر
من أمي
وردة : امي تعرف؟
هز راسه وتحسر
ياسر : تعرف
وردة : وسوت؟
ياسر : ماسوت شي ولا هتمت اصلاً ماعدها اي مشاعر
صارت عبارة عن جثة متحركه
رفع عينه عليها وكال
ياسر : أمي حيل فقيرة مو صاحبت مشاكل ولو تاخذين
حقها من ايدها ماتحجي
وردة : وأبوي؟
ياسر : حتار شلون يرجعها
وردة : لا قصدي ويا هل مفلفلة اللي خلت عينها على
رجل اختها
ياسر : شيسوي غير منعها ماتجي بعد.
وردة : الرجال بيا حال وهاي حايرة بـد****
ضحكوا ودفعوني
وردة : اكلك عفية لاتزعلون من حجي بس انقهر
اغلط اذا اكتمها اختنك احس ثگل يصير بصدري
واموت
يسار : هههههه...
لا اغلطي خوية تستاهل صدك الزلمه بياحال وهاي
تحوم فوكه
وردة :زين ليش تجي؟
ياسر : على اساس حنينه تهتم باختها ولد اختها
وردة : هي مامتزوجة؟
ياسر : متزوجة وعدها ولد وبنات ثنين بس رجلها
مفقود بحرب أيران
وردة : اممم وتالي؟
يسار : لما امي شوية رجعت النفسها وألنا اول شي
طلبت الطلاك
بدهشة
وردة : ياااء
يسار : اذا تبقين بصياحج نسكت
وردة : لااا كمل...كمل
ياسر : كومي صبيلي چاي
اخذته وركضت صبت ورجعتله
صاح
محمد : حبيبتي بابا ولو ازحمج جدديلي الچاي
وردة : من عيوني.. منو يريد بعد؟
نسر : اني واخاف ازحمج
وردة : ولو دلل ابن عمي
ابتسم واخذت الكوب جددتلهم الچاي وقدمته
ورجعت كعدت يم ياسر ويسار
وردة : كمل بعدها صار؟
ياسر : عاشت ايدج
وردة : بالعافية وبعدها صار
شرب الچاي يستمتع بي واني صافنه على حلڪه
غير يحجي
وردة : اكلك لاتذلني كمل؟
ضحكت
ياسر : اي طلبت الطلاك وابوي تخبل ماقبل اخر شي
كال اني اطلع وصدك اخذ ملابسه وعاف البيت
وردة : وتالي؟
يسار : بقينا وحدنا بس بيت عمي وبيت جدي قريبين
علينا وماعافونا وابوي يمهم لو يخلص وقته بالدوام
ياسر : اذكر جان يتسوك وينطينيا يكلي لاتكول لأمك
بتسم
يسار : بس هي تعرف
وردة : وشلون رجعوا؟
ياسر : بعد شهر من طلعت ابوي من البيت أمي تمرضت
وردة : شبيها؟
يسار : ماتحملت فراك بتها وزوجها ولا أكل ولا شرب وكعت فد مرة اجه ابوي يركض اخذها المستشفى دمها
مصفر
ياسر : ومنها ابوي صار يهتم بيها مثل عيونه لا والله
هم ازيد
تحسر
ياسر : وبقى يصبرها على فراكج
يسار : صار يحبها حُب كل من يشوفهم يحسدهم على
علاقتهم
وردة : تعبوا يله وصلوا لهل مرحلة
هز راسه
ياسر : اي بالله واحنا شاهدين ونتذكر كل شي وأمي
تستاهل تعيش ملكة على شافته
صفنت باوعتلهم
وردة : تدري اكو مثل حبوبتي الله يرحمها
:: الله يرحمها ويغفر لها
وردة : امين ... جانت تكول جدة ألكتب لأمي گتبلي
يعني البنية شلون امها عاشت حياتها، بنتها هم نفس
العيشة
رفعت عيني لأمي.. ميسر كاعد يمها وماعرف شتشوف بالمبايل ويسولفون
صفنت بيها وذكرت حالي، شلون تحملت أختها من دمها ولحمها تاكلها؟!
رفعت كتافي
وردة : تدرون اشوفها صعبه حيل والخاين حشاكم
يبقى نجس مايطهر لويسبح بزمزم
ياسر : صح والله لان النجاسة نجاست الروح مو
البدن
ضربته بخفه على رجله
وردة : لاعاب حلڪڪ يخوي
ضحكوا
وردة : اني حاسه بيها واعرف شنو يصير بالمرة من تتعرض للخيانة من الي تحبهم
تحسرت
وردة : لذلك صرت مااثق حتى بنفسي
يسار : شلون؟
وردة : هم جنت اعتبر رند أختي
ياسر : اووو بنت سلطانة
هزيت راسي
وردة : وباهر اللي جنت اشوفة المنقذ شفتهم سوه
فتح عيونه
يسار : شنوو؟
وردة : شفتهم سوه بأسوء حال
يسار : وين شلون شفتيهم؟
تحسرت
وردة : هواي مرات هي تصورلي ودزلي ومن اواجه
يكول جنت شارب.. مااصدك بس اسايره لحد ما هي
تصلت صوت وصورة وشفتهم يمارسون الرذيلة
نزل الچاي من ايده
ياسر : هاي من حركتي سيارته؟
فتحت عيوني بدهشة وتقربتله
وردة : شـ...شـ.. شنـووو؟
رفع حاجبه يحجي برود
ياسر : من حركتي سيارته
هزيت راسي واني مامستوعبة
وردة : سيارة منو حركت؟
عقد حاحبه بأستغراب
ياسر : شبيج سيارت باهر مو حركتيها!
وردة : منو كلك؟
لتفت على امير ورفع حواجبه...فتحت عيوني
همست النفسي
وردة : يعرف؟ شلووون!؟
رجع التفتلي
ياسر : عاشت أيدج والله سباعية
سكتت من الصدمة ماعرفت شكول
ندسني
يسار : بشش
وردة : ها؟
غمز
يسار : تحبي؟
وردة : منو؟
يسار :طليقج.
وردة : ايع تلعب نفسي منه بس شجابرك على مر
غير الأمر منه ...شفته بهاي عيني صورته ماتروح
من عقلي شلون يخوف الخايس
يسار : ليش حضنتي قبل مايتم طلاگ؟
وردة : شوف ...حتى هسه مقهورة عليه وماتمنيت
يصير له الصار هم عنده زينات وياي بس شيناته اكثر
يسار : يعني؟
وردة : مايعني شي لا بحياتي ولا بگلبي مو بس
لأن خان... لا لأن قبل لا أخسره... جنت شايفته
الأمان
تحسر
يسار : الله لا يعلق گلـبج بعد بناقص
رفعت كتافي بابتسامة
وردة : بعد گلبي تعلم... مايثق و يشك حتى بظله
ياسر : باهر مو بس خانج دمر نفسه بافعاله ودمر
الشباب ...شنو هل شباب بعمر الورد والله ماشاف
من حياته شي تلزمي يطلع يتعاطى
يسار : هذوله حثالة المجتمع بسببهم يصير التحرش
والقتل والتخريب
وردة : باهر يتعاطى؟
هز راسه
ياسر : لا سليم سويتله تحليل
رفعت حواجبي
وردة : هااا... يمك قضيته!؟
هز راسه
ياسر : اي
يسار :يبيع السم ومايتسم
تحسرت
وردة : من گلبي اتمناله الخير وربي يصلح حاله
سكتت ثواني ... وسألت بفضول
وردة : هو شكد نحكم؟
ياسر : باهر؟
وردة : اهمم
ياسر : خمس سنوات بس ابو ابد ماعافه يركض
حتى يخفف الحكم
يسار : أي واللي شفعله تعاون ويانا
ياسر : شبيك هسه يطلع قبل مايخلص الحكم
بدهشة خفيفة
وردة : شلون؟
ياسر : اكو حسن سيرة وسلوك ...واسطات
وردة : يعني ممكن يطلع؟
ياسر : أي وارد
بخوف
وردة : اذا طلع ودورني شلون؟
ياسر : بصراحة؟ إذا بي ذرة عقل مستحيل يرجع يدورج بعد اللي صارله
ظل الخوف بعيني رغم كلامهم يمكن لأن اللي عشته وشفتع باقي الوجع نغزة بگلبي ماينتهي
همست
وردة : بس مرات الإنسان من يخسر... يتجنن أكثر
سكتوا ثواني بعدها ياسر قرب مني أكثر
ياسر : اسمعيني زين... هسه عندج أهل، ظهر، بيت ورجال يدفنون نفسهم قبل لا ينخدش أضفر من
أضافرج
غمز بخبث
يسار : خاصة واحد اسمه أمير هذا ينگلب وحش ومن
هسه جاهز يحفر گبر أي واحد يزعلج
غصب عني ابتسمت بخجل
وردة : انتو تبالغون
يسار : لا والله مقصرين بعد
وردة : احمم...
رفعت عيني عليهم بخجل
وردة : يعني تعرفون؟
يسار : غير كلها تعرف
ياسر : اني عرفته يحبج اول ما سولف عنج من نبرت
صوته فهمته
ضحكت ونزلت راسي بخجل
بس ذكرت كلام الشخص اللي بالمكتب رفعت راسي
وردة : زين ممكن سؤال؟
:: كولي
لتفت لـ يسار
وردة : لما اجيت بالمركز..
هز راسه
وردة : سمعت واحد يحجي ويا
يكله مافكرت بسمعتك تاخذ وحدة كاولية
ياسر : اي هذا يصير اخ مرت اخو
يسار : هذا شعلي؟
ياسر : يمعود سالفته تعبانة مايستحي حاشر روحه
بكلشي
وردة : مافهمت شيقربله؟
ياسر : اخو الجبير علي متزوج وهذا يصير اخو مرت
علي يعني نسيبهم
وردة : فهمت
ياسر : بس شلون عرف نسر ابد مايطيقة ومستحيل
يسولف له
يسار : يجوز عمتي
وردة : قريبه؟
يسار : اهمم اللي اعرفه مرت علي تقربلهم بس ماعرف
شنو بالضبط أمي تعرفهم
وردة : اممم...
صفنت شوية... بعدها سألت بتردد
وردة : يعني الناس راح تبقى تشوفني هيج؟
عقد حاجبه
ياسر : شلون يعني؟
نزلت عيني
وردة : يعني... "كاولية" وكلام الناس هذا
سكتوا يسار باوعلي باستغراب وكأنه مو مستوعب
شلون أفكر هيج
يسار : شبيج؟
رفعت كتافي بخفة
وردة : مادري... بس هي هاي الناس تحكم قبل لاتعرف
تنهد وحط الكوب من إيده
ياسر : اسمعيني زين الناس لو ترد تحچي... تحچي
حتى على الملائكة. لا تربطين نفسج بكلام عالم فارغة
يسار : وبعدين انتي مو غلطانة حتى تخجلين من شي انفرض عليج
سكتت... بس داخلي بعده يرجف من الفكرة
همست
وردة : بس مااريد اجيبلكم حجاية
ياسر : ليش منو عنده الجرأءة يفتح حلكة ويحجي
وياج
يسار : لأن محد عاش اللي عشتيه حتى يحقله يحكم
دگ گلبي بهدوء غريب... لزم أيدي
ياسر : وانطيج كلمة مني؟ أي واحد يشوفج "أصل" أو "فصل" ومايشوف روحج... هذا أعمى
نزلت عيني بخجل... وهو كمل بنبرة أخف
ياسر : وانت لا كاولية ولا غجرية ولا أي اسم الناس تلزگه... انت شموخ محمد. وانتهى الموضوع
ماعرف ليش... بس هالجملة وحدها حسيتها لفت
بطانية دافية على كل الخوف اللي بداخلي.
سكتت وأيدي بأيد ياسر صار يلعب بالمحبس بأصبعي
وعينه عليه
ياسر : شنو هذا؟
ارتبكت لا إرادياً...سحبت أيدي بسرعة ضميتها بحضني
وردة : ها؟ شنو؟
رفع حاجبه وباوعلي بمكر
ياسر : المحبس... لا تسوين روحج ماتعرفين
بلعت ريگي ونزلت عيني
وردة : عادي...شبه
مد إيده يريد يشوفه أكثر
ياسر : عادي؟ هذا مو شكل "عادي"
عيني لا أرادياً راحت على أمير كاعد يم أبوي ويسولفون
بخصوص الشغل ياسر ويسار نتبهوا على عيوني واحد
باوع للثاني
ضيق عيونه بخبث
يسار : لاا...لا يكون؟
ابتسم ببطء وهو بعده يباوع على المحبس
ياسر : صرحة ذواق عرف يختار محبس يناسب اميرتنا
فتحت عيوني بسرعة
وردة : شنو فهمتوا؟
غمز
يسار : أكو واحد سابق الأحداث
نزلت عيني بخجل وعضيت شفتي حتى ماابتسم
وردة : لا يعني ماكو شي
ياسر : غير كلها تعرف
وردة : قصدي مموافق بعدني
يسار : والمحبس شنو؟
رفعت كتافي
وردة : اي بس خايفة اخطي هل خطوة
ياسر : اذا خايفة من نسر فتأكدي هو خلقة واخلاق
ربينا سوه واعرف يمكن أكثر من نفسه، شهم وغيور
ومحترم
بلعت ريڪي.. وعيني بالارض
وردة : يعني ماعنده سوالف مو زينة؟
ياسر : لا ابد
يسار : أصلاً عمتي شكد خطبتله ولا يقنع أيست
وماتوقعنا يحب
نظروله وهو مندمج يحجي وي ابوي
ياسر : هههههه ومو بس حب ولك نوب ستخف فد
مرة
يسار : اي خوية هذا علامات الحب
أمير رفع عينه بوجهي شافني سارحة بتفاصيله..
بتسم وبانت حفرة خدة... ورجع باوع البابا خفت
يسوي حركة بسرعة رجعت عيني الأخواني اللي
شافوا ضحكته
لتفت ع يسار
ياسر : شفته ضحكلها؟
يسار : يراد نربي ضحك الأختنا واحنا يمها!
ندسني
ياسر : ها ست شموخ
بتوتر وخجل
وردة : هاا
ضحك
يسار : شوف الهااا تحجيها بنعومة
ماعرفت شكول
وردة :أعرف زين بس خايفة من نفسي
بأستغراب
يسار : ليش؟
رفعت عينه بوجهه خايفة احجيلهم ويكون كلامي
غلط ومايصير ...بس هم اخوتي... لا لااا أمير كال
لا تحجين شي
بس هم ضباط ومارة عليهم مثل حالتي يعني موعيب
ولا حرام اذا احجيلهم شنو عشت او شنو مريت وشنو
صار وياي بالضبط..
فزيت على صوته
يسار : شبيج؟
بتسمت بتوتر
وردة : مابية فرحانة بيكم والله
سحبني باسني براسي
ياسر : من عسا دوم فرحتج يبعد أخوج
بتسمت بتعدت عنه
وردة : انتم فرحتي ربي يديمكم
رجع يسار حضني
يسار : اويلي شلون كلام يخبل
ضحكنا ميسر انتبه التفت علينا ونهض
ميسر : خيانة هاي
اجه كعد بيني وبين ياسر وامي تباوع علينا وعيونها
غركت بالدموع
مد ايده ألها
يسار : تعاي ست الكل
بتسمت ودمعتها بعينها اجت ضنتني وتشمني بكل قوة
سناء : يابعد روحي... يبعد عيوني
عفتهم وحضنتها ماعرف ليش دموعي نزلت بتعدت
عنها...ومسحت عيونها
وردة : ماما... أحبج
نهضمت ورجعت حضنتني
سناء : فدوة تروحلج ماما يابعد عمري
بتعدت امسح دموعها
وردة : كافي... كافي لايكتلني محمد يكول ليش زعلتي
حبيبتي
رفعت عينها عليه وضحكت شفته يباوعلنا هو وامير
صافنين علينا.. بعدها أبوي التفت على أمير مدري
شكاله وضحكوا
وردة : يمكن حجوا علينا؟
سناء : شحدهم
ميسر : يابا يمتى نرجع
محمد : من ناخذ التحليل... خير شبيك مليت؟
ميسر : لا والله بالعكس...بس حتى أصمم غرفة
الشموخ
محمد : أي بابا من نرجع
ياسر : يابا اني باجر أرجع ان شاءلله دوامي والبيت
خالي
محمد : اي انت واخوتك
لتفت لياسر
يسار : نرجع بالسيارة
ياسر : هاي هي نطلع الصبح
سناء : ماما ...مااوصيكم بعد مااريد ولا شخص يعرف
ياسر : عرفوا بس دايخين لان ماوصلهم الكلام من واحد
من عدنا
هز راسه
يسار : عبالهم مثل كل مرة
لتفت على أمي
وردة : شنو يعني مثل كل مرة؟
سناء : ماكو شي حبيبتي
قاطعها بتوضح
يسار : اكو ناس يحبون يلعبون بأعصابنه هاي قبل
تجي اتصالات نطونه فلان مبلغ بتكم موجودة حتى
نوصلكم الها ومن هل سوالف هاي
سكتت واخذت ايدها بستها
وردة : حلم مااريد اصحى منه
بتسمت
سناء : خلينا عايشين احلى حلم بالحقيقة
ضحكت وخليت راسي بحضنها وهي تمسد على شعري
يسار : أيسر وين؟
ميسر : طلع ابوي كلفه بشغلة
وي كلامهم دخل أيسر سلم وكعد يمهم
محمد : ها بابا شكال؟
أيسر : رجال محترم ماكال شي تشكرت منه ونطيته
الفلوس ماقبل ياخذهن بس اصريت وكتله عتبرها هدية
كونك شخص حريص وصادق
بتعدت عن حضن امي وسألت بفضول
وردة : منو؟
لتفت
محمد : صاحب البيت المستأجرته
عقدت حاجبي
وردة : شبي؟
محمد : مابي. بس دزيت أيسر يسأل عنه ودفع أجار
شهر
وردة : بس اني دفعت مقدمة
هز راسه
محمد : أعرف باباتي ...بس نطيته كونه شخص أمين
وماسوه سوايت ذولاك ولا استغل وضعج من شافج
بنت وحيدة... حتى يعرف أنتِ موحدج ولو غيرج مر
بهذا الموقف مايستغلها
بتسمت
نزلت عيني بخجل... كلام بابا دفى مكان بگلبي طول عمري ماعرف شلون شكل الأمان، بس هسه؟ حسيته
نفسي محاطة بأمان عمري مافكرت اعيش ولو ربعة
وبابا مافكري بس بية فكر بغيري خاف يمر باللي مريته
هل شي ثبتلي الله رزقني بعائلة حنونه وتحسب حساب
غيرها قبل نفسها..
نهضت وكفت كدامه
وردة : عادي احضنك؟
ضحك وفتح حضنه
محمد : من تحضنين ابوج لاتستأذنين أصلاً شبعيني
حضن
ضحكت كعدت يمه حضنته ضمني بحنينة وباس راسي وشمه..
سناء : يريد شُميم
ضحك وشم راسي
محمد :ترد الروح
أيسر : ست شموخ جبتلج جنط خلي اغراضج
سناء :اي عفية نسيت اشتريلها
أيسر : جاهزة الحياتج الجديدة؟
بتعدت عن بابا ونزلت راسي متوترة وخايفة احجي
هل كلام.. بس بالعت خوفي
رفعت عيني لبابا وكأن الكلام له
وردة : لا
كلهم سمعوها وصار هدوء صدمة
بأستغراب
محمد : ليش حبيبتي؟
بصوت مسموع
وردة : ماعرف اذا انتم جاهزين تتقبلون بنتكم اللي
اجت من أرض غجرية ربت بينهم وطبعت بأطباعهم
بأستغراب
محمد : نتقبلج؟ ولج بابا احنا نفديج بروحنا
هزيت راسي بخوف خفيف
وردة : مو قصدي هيچ... قصدي أطباعي، أسلوبي
يمكن متعودين
تنهد ومسد على شعري
محمد : اسمعيني زين... انتِ مو ذنبج شلون تربيتي
ولا وين عشتي. الذنب على الزمن اللي حرمنا منج
سكت ثواني وباس راسي
محمد : واحنا مو ما نريد نسخة غيرج... نريدج انتِ، بكلشي بيج
وردة : يعني صدگ ما مستحين مني؟
سكتوا وكأن السؤال وجعهم تحسر
محمد : اني أستحي من نفسي لأن بنتي كبرت بعيدة عني... مو أستحي منج انتِ
دگ گلبي بقوة... حسيت هاي أول مرة بحياتي أحد
يدافع عني بدل مايحكم علية
وردة : والناس؟ اذا سمعوكم كلمة
ضحك واخذ أيدي باسها سحباها
وردة : لااا... باباا أني ابوس ايدك
ردت اخذ ايده منعني ورفع راسي
محمد :أسمعيني زين...
نظر بعيني مباشرة
محمد : الناس وكلامهم واقوالهم وافعالهم كلهم تراب
تحت رجلج
ياسر : منو يكدر يحجي عليج واحنا خوتج!
كلمة اخوتج هزت گلبي
سناء : الناس ماعاشت اللي عشنا بغيابج ولا تعرف
شنو عشتي واذا نحسب حسابهم مرح نعيش لان مستحيل ترضيهم حتى لو صرتي ملاك هم يحجون
محمد : اسمعيها مني يابابا...
العار مو بالبنية اللي انظلمت، العار باللي ظلمها وخذلها وتركها تواجه الدنيا وحدها
غرگت عيني دموع أكثر... نزلت راسي ماعرف شلون أستوعب كل هالحچي الحنون
وردة : بس... أخاف يكولون عني تربيت شوارع
سكتوا... مو لأن كلامي عيب.. لا
كأنهم انصدموا شكد الخوف متروس داخلي لهسه
محمد : اسمعيني زين باباتي الأرض اللي تربى بيها
الإنسان مو هي اللي تحدد قيمته... الأخلاق والروح
هي اللي تحدده
سكت لحظة يباوع بعيوني
محمد : وانتِ لا طبعج غلط ولا وجودج غلط بالعكس
رغم كل اللي عشتيه بعدج نظيفة من داخل احسج
مثل طفلة صغيرة لازم امها وابوها يعلموها شلون
تمشي
ارتجفت شفايفي لا إراديًا
وردة : يعني اني تعودت احجي اللي افكر بي مثل
ماهو..و أخاف كلامي يحرجكم... أسلوبي مو مثل
البنات اللي تربوا يمكم
ابتسم ابتسامة هادئة
محمد : وأحسن شي بيج إنج مو مثلهم أحنا منريدج تتغيرين حتى تصيرين مقبولة نريدج ترتاحين وتكونين
انتِ
دگ گلبي بقوة...
غرگت عيني دموع
وردة : حتى لو غلطت؟
ضحك بخفة
محمد : حتى لو هسه انتِ مثل الطفل اللي هستوه بدا
يستكشف الحياة لازم تغلطين حتى تتعلمين شوي شوي هيچ تصير العائلة
بمزح
يسار : وبعدين إذا أكو شي مايعجبنه نكتلج علمود تتعدلين
امي فتحت عيونها وضربته بخفة
سناء : بس اسمع واحد بيكم يكوللها "ولج" وشوفوا شلون اعيد تربيتكم
ضحكوا كلهم.. ابتسمت غصب عني
سناء : لا عبالكم كبرتوا وصرتوا ضباط ومااكدرلكم
حضنها يبوس رأسها ويضحك
يسار : رتبتي وتاج راسي انتِ... كلنا فدوة نروح الضحكتج
ضحكت لضحكتهم وعيني راحت على أمير اللي عايف
كلشي ومركز بية ويضحك الضحكتي
باوعلي
أيسر : صدك ...شنو تحبين نصيحلج شموخ لو ورد جوري؟
نزلت راسي بخجل وعيني على اضافيري
وردة : شموخ كلش حلو وعجبني
رفعت راسي باوعت البابا
وردة : بس ...ورد جوري ذكرى من حبوبتي اختارتلي
هل أسم
فهم قصدي بتسم وماحجى شي
وردة :يعني اذا تقبلون وتحبون صيحولي بأسم ورد
جوري حتى مااكون ناكرة جميلها
كأنهم كلهم استوعبوا شكد هالاسم غالي عليو مو مجرد دلع..
باوعلي بابا بحنان وهز راسه
محمد : وليش منقبل؟ هذا اسمج وريحة انسانة سوت
علينا فضل من هتمت بيج وبأختيارها للأسم نطتج حقج
رفعت عيني له وابتسمت
وردة : صدك بابا يعني قبلت؟
ضحكت هز راسه
محمد : اي باباتي كتلج نتقبلج مثل ما أنتِ بأسمج
وأسلوبج وكلامج
تنهد وباوعلي
محمد : ولو عايش الله يرحمها انزل على راسها ابوسها
وابقى ممنون ألها طول عمري لان هتمت بيج ربتج بنص
ضباع وطلعتي لبوة
بتسمت ونزلت راسي فتخرت بنفسي وتمنيت جدة بعدها
وياي وتشوف شلون وريدتها نزرعت بحديقة كلها أمان
وكلها تهتم بيها وتريد رضاها
الدمع غرغر بعيوني لا أرادياً..
فزيت من ذكراها على لمست أيده مسح دمعه
بطرف عيني
محمد : شبيها أميرتي؟
نهضمت
وردة : شتاقيت الجدة ومحاجيها.. تمنيت تشوف وردتها شلون صارت بنص أهلها وبأمان
سحبني الحضنه باس راسي
محمد : لاتخافين اكيد تشوفج وتعرف
شهكت شهكة خفيفة
وردة : أرتاحت مو؟ هي عاشت حياتها كل همها راحتي وضحكتي
ضميت وجهي بصدره صرت أبجي و اشهك أيد حاوطني
وايدي يمسد على شعري
محمد : كافي باباتي... كافي يروحي
لمحت امير اشرله بمعني دلك شعرها... بابا ماتردد ولا
ثانية بسرعة.. صار يدلك شعري لحد ماهدأت وبقيت
بحضنه حسيت بنفسي غفيت
هم أمان وحنان وراحة ...حضن مليان حنية بسرعة
غفيت واني مطمأنه
فزيت على صوت بلكوة فتحت عيوني بعدني على
صدره.. بتعدت
وردة : غفيت؟
محمد : عشر دقايق مو أكثر
بتسمت
وردة : احلى عشر دقايق مليانة حنية
ضحك.. باوعت الولد ماكو بس امي
وردة : وينهم؟
سناء : حيصلون ماما
وردة : شنو مو هستنا صلينا؟
سناء : اي حبيبتي لأن صلينا صلاتنا متأخرين
وردة : يله نصلي؟
بتسمت
سناء : يله منتظرتج
نهضت بسرعة وبابا نهض
محمد : الحكهم وشنو تحتاجون خابريني
سناء :تمام الله وياك
طلع واني وياها توضينا وكفنا نصلي.. بعدما كملنا صلاة
جابت جنطة جبيرة
سناء : حبيبتي..
هاي جمعي اغراضج بيها واكو بعد وحدو خاف تختاجين
وردة : تمام..
اخذتها منها
وردة : اول شي اخلي هذول لي شتريناهن اليوم
سناء : اساعدج؟
بتسمت
وردة : يله...
كعدت ساعداتني بترتيبها ونسولف بعدها طلعت اغراضي
وهم خليتهن بالجنطة ومن ضمن الاغراض طلعن صوري
اني وحبوبتي حتى من جنت صغيرة...
وردة : ماما.. شوفي
مديت الصور ألها اخذتهم تشوفهم عيونها غرغرت بالدمع
صارت تبوس بيهم
وردة : ماما لاتسوين هيج...
بعدين هاي رند وياي بصورة لاتبوسيها ختولي أصلاً مدري ليش لسة مخليتها
رجعت تباوع للصور ودمعتها بعينها مامصدكة
سناء : هاي انتِ! ...حلوة حيل
بتسمت
وردة : جدة جانت هواي تاخذلي صورة ودوم تكلي
تبقى ذكرة حلوة ...
تنهدت
وردة : بس اليوم عرفت حتى خاف يجي يوم اشوفكم
وألتقي بيكم الصور تكون شاهدة
باوعتلي
سناء : حايرة شلون اردلها المعروف.. شلون اجازيها
بتعب عشرين سنة
اخذت صورة لجدة اني وياها وبستها
وردة : هاي روحي من الدنيا ماتتجازى
باوعت لأمي
وردة : نطتني حُب وحنان واهتمام ماخلتمي احس
بنقص وماتنيمني له بحضنها وعلى ايدها
سناء : أقل شي اسوي ألها صدقة جارية بأسمها
وردة : شلون يعني؟
سناء : ماينفع الانسان الميت غير ثلاثة ولد صاح يدعليها وصدقة جارية واعمل صالح
وردة : وهي عدها.. عمل صالح اللي سوته وياي وراح
اكون الولد اللي يدعيلها
ضميت صورتها الصدري
وردة : لو ما الله وهي جان هسه سلطانه مخليتني قذرة من حضن الحضن اعوذ بالله
سناء : لذلك بس نرجع ان شاءلله أسوي كل شي حتى
اردلها ربع السوته
وردة : اني هم اسويلها ثواب دائماً وادعيلها ماتمر لليلة
ولاتغمض عيني قبل مادعيلها
سناء : عفية عليج هيج يبين أصلج
بتسمت ورجعت أباوع للصورة
سناء : هي هاي رند!؟
وردة : أي وهذني بنات صديقاتي كلش حبابات
سناء : وصورت طليقج وين؟
وردة : باهر! ياااء... شكو مخليتها غير اذا شافها أمير
يطلعني من الكلجية
ضحكت
سناء : يغار
ضحكت بخجل رجعت ارتب الاغراض
وردة : هاي رند اللي ابوها وامها حاولوا يدمروني وهي
خلت الشخص اللي احبه وامن له يخوني
سناء : الاصيل واللي يحبج مايخون حتى لو شاف الاحلى
بس اللي يريد يخوف لو انتِ ملكة جمال هم يطلع بيج
الف عيب ويتعذر بألف عذر
رجعت اخذت صورتها
وردة : أبد ماتوقعتها تسوي هيج
تحسرت وعيوني على صورة
وردة : لو جاية وكايلتلي اني أحب باهر عوفي والله
اعوفه بس هي لعبت بأعصابي وخلتني صافنه على
سوته باهر يروح ويولي بس انت عتبرتج اختي هيج
تسوي!
رجعت رفعت عيني على أمي
وردة : زين هي اخذته ليش تتغيرين علية وتصير تشوفني قذارتهم!
سناء : شفتيهم؟
هزيت راسي
وردة : اسوء شعور ممكن تعيشة المرة هو الخيانة
يخليها رماد.. خاصه اذا الخاين قريب وحبيب وشخص
تثق بي
نزلت راسها.. وتنهدت
سناء : حاسه بيج
وردة : شلون؟ ليكون محمد خانج؟
هزت راسها بنفي بتسمت
سناء : بنت أمي وأبوي حاولت تخرب حياتي أكثر
مماهي خربانة
وردة : شلون؟
سولفتلي كلشي صار وياها
وردة : وسويتي؟
سناء : ابد ولا بينت لها.. وهي جانت تعرف اني اعرف
بس ماحجيت وياها ولا عاتبتها ولا بينت
وردة : وبعدين؟ شنو هي تعوفيها عادي؟
هزت راسها
سناء : أي عفتها شنو أكلها قابل؟ ليش خليتي عينيج
على رجل أختج؟ مااريد اسمع تبريرها
وردة : وبابا؟
سناء : هم مابينتله رغم يعرف اني اعرف بس ماواجهته
ابوج مابي ذنب الذنب منها حتى أكثر من مرة منعها اخر شي منع أهلي كلهم بذيج الفترة كلهم مرتي اني اهتم بيها
وردة : زين شنو بعدج تحجين وياها؟
سناء : اي عادي گلتلج مابينتلها وهي بعدها تزوجت
وخلفت
وردة : وعفتيها هيج ومابردتي گلبج بيها؟!
بتسمت ولزمت أيدي
سناء : أكلج شي عن تجربة ويقين بالله
هزيت راسي بأيجابية
سناء : ثقي الخاين الله ميوفقة مهما صارت حياته
حلوة اكو شغلة الله يعلك روحه بيها ومايحققها اكو
ثغرة بحياته تبقى ناقصة بسبب افعالة
صفنت بكلامها
وردة : صح هسه شوفي رند وين وأني وين!
بتسمت
سناء : شفتي؟ هذا الفرق
ضميت راسي الصدرها
وردة : تدرين الوجع العشته حسيت هدم روحي وجع
ماينوصف...
سناء : شنو شفتي؟
بتعدت عنها وسولفتلها كل شي بالحرف الواحد فتحت
عيونها بصدمة.. ماستوعبت اللي عشته ورجعت سولفتلها
عن سلطانة وشلون تستغل البنات وشلون رادت تستغلني وتزوجني بعدين سولفتلها من باهر اخذني ونطاني كاكاو
ضربت وجها
سناء :صخام بوجهي كل هذا عشتي؟!
وردة : لا اكو بعد هواي سوالف ناسيتهن
سناء : يايمة ...الله يساعد گلبج شلون تحملتي
وردة : الله وكيلج لو ماوگاحتي وحيلتي لا انداس
برجلين بس اعرف شلون اتصرف وياهم
سناء : سباعية بنت محمد
بتسمت
وردة : ماما ... اكلج شي حبوبتي علمتني مااضم عليها
ولو اسوي شي بسيط اكعد اسولفها لذلك تعودت احجي
واسولف بصراحة
سكتت ثواني باوعتلها ببراءة
وردة : خو ما تزعلين؟
بتسمت
سناء : ماازعل سولفي اللي تردينه بدون تردد وخوف
وردة : يعني عادي احجيلج لان جدة تكلي الماتسولف
لأمها كـ***
ضحكت
سناء : لا يروحي لاتفكرين هيج
ضحكت
وردة : لا كون تسمعج حبوبتي جان كالتلج هااا تردين
طلعين عين الفرخة..
سناء : حبيبتي احجي اللي تردي وياي مثل ماتحجين
وياها
وردة : هههه عاد سوالفها كلها فشك اقل كلمة او فعل
كالت ولج وريدة ترديلج فحل
ضحكت
سناء : ليش هيج تسوي..؟
صرت اسولفها بحماس
وردة : مرة كتلها على شغلة حان تكلي الفحل واكف
بالباب ينتظرج.. نقهرت منها كتلها انت ترديلج فحل
ما تشوفين مايوكع من اللسانج.. جان تكول اني قـ**
ماعرفت اربيج تعاي اربطج للتوثه
سناء : شنو ردتي منها؟
حجيتلها ضحكت
سناء : لمفروض تفهمج بغير طريقة
وردة : هههههه لا هي اذا خلي حمرة تكلي هاا طلبين
فحل
امي خربت ضحك
وردة : تدرين هي تسولف تكول جدة قبل اهلنا البت
اذا تشر ثوبها يعني تريد تتزوج
كتلها وين تودي؟ تخلي يعفن غير تشره تكلي لا قبل
يختلف وحدة منهم شارة ثوبها اهلها كبل مزوجيها
سناء : هي موغجرية صح؟
هزيت راسي
وردة : اي بدوية حتى مرات تحجي حجي مافهمه له
اسألها شنو يعني
سناء : وشلون اجت ويا الغجر؟
وردة : مطلوبين ثار وتعرفين ثار البدو مايبرد لذلك ضيعوا نفسهم ويا الغجر
سناء : ربي يرحمها ويغفر لها ويجزيها تعب عشرين
سنة بالجنة
بتسمت
وردة : امين يارب.. ماما
رفعت عينها
سناء : يفدوة تروحلج ماما
بتسمت
وردة : لا استحي لاتحجين هيج وياي
ضحكت
سناء : فدوة للبنيات اليستحن
نزلت عيني
وردة :احمم ...خاف مرات احجي كلام مو بمحلى عادي
تعلميني لو اجي اسألج اكول هيج صح لوهيج
لزمت ايدي
سناء : تعاي واحجي اللي تردي واني اعلمج
رفعت عيني عليها
وردة : مساع ردت اسولف لاخواني عن شفته رند وباهر
فتحت عيونها
سناء : لا يروحي امج تعاي الية
وردة : ليش يعني غلط؟
سناء : اي حبيبتي عيب
وردة : ليش عيب؟ هم خواني
سناء : صح بس مو بالتفاصيل السولفتيها اللي لا عيب
يسمعوها
وردة : زين هو العيب الحرام.. اني أعرف الحرام الزنا والغيبة والنميمة
تنهدت هزت رايهة
سناء : أدري يروحي... وأدري نيتج صافية بس مو كل شي ينحچي بالتفصيل خاصة ويا الرجال حتى لو كانوا خوتج
عقدت حاجبي باستغراب
وردة : ليش؟ هم مو أهلي؟
سناء : أهلج ... بس أكو سوالف المرة تستحي بيها
مو خوف لا، بس حياء
وردة : مو حبوبتي تكول البنية مايصير تضم شي عن
اهلها لذلك اني احجي كلشي بالتفصيل
هزت راسها
سناء : تكدرين تحجين وياي مثل ماجنتي تحجين وياها
وتسولفيلي بالتفاصيل بس مو كلها مثل حبوبتج
وردة : هممم... يعني أكدر أكول خانني وخلاص؟
ضحكت بخفة
سناء : إي حبيبتي مو تشرحين شلون خانج
فتحت عيوني فجأة واستوعبت قصدها
وردة : آآآ هسه فهمت مااحجي بالقلم العريض
ضحكت وهي تهز راسها بأيجابية
سناء : هاي البراءة شراح نسوي بيها؟
ضحكت لا إرادياً
وردة : زين حتى ويا ابوي وامير؟
سناء : خاصة وياهم
بعدت شعري عن ركبتي
سناء : مو لأن غلط... لا، بس لأن بعض الوجع يحفظ كرامة أحلى
صفنت بكلامها ثواني
وردة : زين إذا بالغلط حجيت؟
ضحكت بخفة
سناء : نتفاهم ونعلمج شوية شوية... مو نلومج
ضحكت
وردة : خوش لأن لساني سابق تفكيري مرات
سناء :كُلش اي... ماعندج بريك
نزلت عيني بخجل
وردة : لأن متعودة أحچي كلشي براحتي ويا حبوبتي
لزمت ايدي
سناء : اني موجودة وتعاي سولفي اسمعج حتى لو
كلامج غلط
هزيت راسي
وردة : صار تدلل سوسو
رفعت عيني عليها
وردة : عادي ادلعج سوسو؟
سناء : كُلش احب.. من اول يوم محمد دلعني سوسو
ضحكت تركت من ايدي وصفنت عليها
وردة : اي شلون؟
بتسمت بخجل
سناء : لا يعني دائماً يصيحني تعاي بوية سوسو
حجيت كلمة امي ضمت وجها وخربت ضحك لدرجة
عيونها دمعت رفعت راسها وبلكوة تحجي
سناء : يااااا ولج ماما هسه شحجيت وياج؟!
رجعت ارتب الاغراض
وردة : اي محد اكو بس اني وياج، بعدين هاي الحقيقة
تمنيت حبوبتي تحجبلج كله مفشك
ضحكت
سناء : يااا ياااا ولج ماما مو كلشي ينحجي
وردة : يله بينه محد سمع وين اكو بنية مثلي ماتضم
حتى بگلبها
مسحت دموع الضحك
سناء : بس ديربالج تحجين اي شي كدام غريب حتى
لو مرة فهمتي
وردة : صار بس اذا وحدة قهرتني ماضمن لالساني ولا
افعالي
ضحكت
سناء : هنا انطيج الاشارة الخضرة
رفعت كفي
وردة : طگيها
سوت مثلي ضرينه كف بكف وهي تضحك بقينا نسولف
طلعتلها اغراضي شافتهم والبست حجولي لحدما سبقهم صوت سوالفهم وضحكم..
امي طلعت من الغرفة واني بين ماكملت اغراضي قبل مااطلع عدلت شعري
طلعت ...
ورنة خلخالي تسبقني
أمير اول من نتبه والتفت بدهشة خفيفة كأن الرنة ذكرته
بشي...
نظرلي بدهشة ونزل عينه على خلخال وكفت مقابيلهم
وردة : شنو تحبون اسويلكم عشا؟
ميسر : تعرفين طبخين؟
وردة : ولو بعدك ماشفت شي
أيسر : شكلج مال اندومي
وردة : لا أيع ولااحبه شفت فيديو يجعصون كتاكيت
ويسوه منه
ضحكوا.. ستغربت وعدت الكلام بعقلي همست
وردة : والله مابي غلط!
ياسر : هههههه هاي اني من اضحك على علاوي
ومااريد انطي شغله
وردة : مافهمت؟
سناء : قصدهم موحقيقي يعني مو مثل ماشفتي
وردة : لا والله شفته الفيديو نوب خطية عايشات
ويجعصوهن
أيسر : صدك جذب خوية مو كلشي تشوفي تصدكين
وردة : يعني مو كتاكيت؟
يسار : لا بس هو مضر
رفعت عيني عليهم
وردة : اي المهم هسه شنو تردون عشا؟
محمد : بكيفج باباتي
وردة : ليكون متحب له من ايد محبوبتك؟
محمد : لا والله انتِ هم محبوبتي وفرحت وين ألكها بنتي تسالني شنو اريد عشا!؟
وردة : زين شنو تحب؟
تقرب اخذ ايدي باسها صحت
وردة : لااا باباااا
محمد : شنو تسوي هل أيد أكلة حتى لوسم
وردة : جعل السم العدوينك والعافية ألك والمحبينك
خله ايده على گلبه
محمد : ولكم مو بنية عسل
هزيت كتفي بخفه
وردة : غير العسل نصنع من رحيقك
ضحك
محمد : لا لااا هيج اني مااتحمل
ضحكنا.. تحسرت بعز ضحكتي وراحت عيني على
أمير اللي شارد بفكرة وعينه مانزلت عن خلخالي
وكل حركة ورنة تشتته أكثر...
بس رفع عينه ألي
نسر : سويلنا المخلمة اللي سويتيها
لتفت لبابا
نسر : عمي انت تحب هاي الأكل وجوري تسويها تخبل
محمد : هاي هي
وردة : من عيوني
عفتهم والفيت وكل حركة تصدر رنة تشتت انتباه أمير
بديت اجهز الأكل اجت امي
سناء : اساعدج يروحي؟
وردة : لا ريحيلي نفسج وروحي لحموداتج
ضحكت
سناء : خاف تعبين حبيبتي
وردة : ماكو تعب اصلاً مامسوية شي روحي اكعدي
وخليني اكمل ترا اذا تلهيني يخرب الأكل وشيخلصكم
مني
سناء :هههه لااا رحت
ضحكت وراحت كعدت رجعت اكمل شفت لحم مفروم
جهزت الاكلة لي سويتها اني وأمير بالشقة حتى يكفيهم
ويا المخلمة بدت الريحة تترس البيت صاروا يفترون
ياسر : شتسوين؟
وردة : قوزي.. ماتشوفه لحم
ياسر : شو اضوك هاي ريحتها تشهي
وردة :هههههه كول اريد
نطيته خبزه اكلها غمض عيونه
ياسر :اويلي دهينة تخبل
صاح
ياسر : ولك يسار تعال شوف
اجه قسم الخبزة ونطى
يسار : والله طلعت موهينة وريدة
ضحكت
وردة : ذكرتني بجدة ماتصيحلي غير وريدة
يسار : بروحها كثريلنا من هاي تخبل
وردة : تعال ساعدني بس حركها لا تلزك
اجه وكف يم الطباخ
يسار :دللي يبعد اخوج
بتسمت
وردة : اذوب اذوب لاتحجون هيج وياي
اجه أيسر وميسر
أيسر : شطبختي؟
ياسر : قوزي ماتشوفوها شبيكم؟
باوعتله وضحكت غمز
أيسر : لا اريد اضوك
وردة : فهمت من تردون شي ماطلبوا
يسار قسم ماتبقى بينه وبين أيسر وميسر
ياسر : مو حرة وفاطمة يتخبلن اذا ندخل للمطبخ
وردة : فاطمة منو؟
ياسر : مرت يسار
وردة : كتلي عندك اطفال؟
وهو ياكل
يسار : بالطريق تقريباً اذا الله راد اربعة أشهر ويشرف
وردة : ولد؟
هز راسه
يسار : اي الحمدلله رغم بنفسنا بنية بس الله عوضنا
برجعتج
وردة : وأيسر يمتى تتزوج؟
أيسر : بعد اذا الله سهل السنة لو لبعدها
وردة : عروستك حاضرة؟
أيسر : ان شاءلله واريدج تشوفيها
وردة : قريبة لو غريبة؟
أيسر : غريبة مانحب ناخذ قريبة
وردة : ليش؟
ضحك
ميسر : الاقارب عقارب
وردة : يعني؟
ايسر : يعني ماناخذ من بنات خلاتنا وماعدنا بنات عم
عقدت حواحبي همست
وردة : يعني امير ماعنده خوات؟
أيسر : لا عنده بس نعتبرهن خواتنا
ميسر : ربينا سوه وأمي دائماً تكول خواتكم لاتزعلوهن
تحبهن وماتقبل عليهن
يسار : مانشوفهن غير خواتنا
أيسر : مرة ضربت وحدة منهن أمي تخبلت شردت رحت
لعمتي ختلت يمها عن امي
وردة : ام امير؟
أيسر : اي
وردة : بس عم واحد؟
أيسر : اي وعمه وحدة
وردة : عدها بنات؟
ميسر : اي
وردة : زين ليش ماتاخذون من بنات الخالة؟
ميسر : هنَ الخالات لخاطر امي متحمليهن نوب ناخذ
بناتهن!!
أيسر : غديي كش وبره
ضحكوا
جهزت الچاي ولتفت على ايسر
وردة : عروستك وين شفتها؟
ضحك عض شفته
أيسر : بعدين.. بعدين اسولفلج
رجعت غمزلته
وردة : وميسر شنو؟
ميسر : الله وكيلج حديقة ومامفكر ادخل لافراشة
ولاعصفورة الحديقتي لحد مااهتم بيها واطورها
ضحكت
وردة : جوابك مثل شخصيتك
أيسر : احس صار بينكم رابط قوي بسرعة!
خله ايده على كتفي
ميسر : شعبالك هاي روحي ونبض گلبي ولك مامصدك
صارت عندي اخت
أيسر : على اساسا احنه مصدكين ونوب ناكل من ايدها
ميسر : اي والله
يسار مركز خاف الطاوة تحترك
يسار : ست جوري هيج صح
وردة : اي ستوت طلعها
طلعها رجعت اكمل الباقي
وردة : شعجب كل هل جمال والشخصية ماخطفت
گلب وحدة؟
بتسم
ميسر : والله يااختي مو فارغ والحُب يرادله وقت
وتعب واهتمام... واني حالياً مكرس حياتي وقتي
لمستقبلي ومستقبلها
وردة : صح بس الحب لو اجه مايستأذن
سحب نفس
ميسر : صح بس اني ابتعد عن هل سوالف من الجامعة
للشغل ومن الشغل للبيت ادرس وبيوم الدوام اروح اداوم
وردة : ها هم داوم؟
ميسر : اي
وردة : وشلون تروح وترجع تتعب؟
ميسر : لا نقلت دوامي من طلع قبول جامعتي بكربلاء
وردة :مرتاح؟
ميسر :اي هدوء مو دائماً هوسة
ياسر : شكد بعدلج؟
وردة : جعت؟
ياسر : والله ماجنت جوعان بس ريحة وشكلها يشهي
وردة : يله كملت مابقى اخر ثنين،و المخلمة بس تلجع
رجع كعد وايسر وميسر واحد جهز صينية الچاي والثاني
فرش السفرة ويسار نقل الأكل
التمينا كلنا ناكل بطاوة وحدة وصينية بيها خبز لحلم
سمينا وبدينا فرحتي بجمعتهم وضحكاتهم وسوالفهم
ماينشبع منها...
يعاملوني چن مامفاركيني عشرين سنة ولا مرة خلوني
احس اني مفاركتهم
محمد : يكولون اكل البنات بي العافية هسه عرفتوا
شنو يقصدون
رفعت عيني له عيونه تلمع وهو يباوعلي
محمد : مو بس عافية،طعم السعادة والفرح
دمعتي ترست عيني من حنيتة بتسمت
وردة : لاتبجيني
سناء : ها محمد انتَ حتبجيها
ضحك
محمد : لا وردت ابوها ماتبجي
سناء : صدوك طيب عاشت أيدج حبيبتي
وردة : عافيات على گلبج
رفع راسه مبتسم
نسر : بعد مااكلتوا الدولمة مالتها
ياسر : تعرفين؟
وردة : اي
يسار : وردتنا ماانصحج طبخين لان ياسر يتعبج
ذوقة صعب وماايحب طبخ ياهو الجان لو امي لو
حرة
ياسر : هسه صارت بقائمة المفضلات
ايسر : يووو الله يساعدج
ضحكت
وردة : يدلل
ياسر : هاي الاخت الزينة
ضحكوا
سناء : اي نفسها طيب على اكل
ياسر : اي بالله مثل طبخج
هنا ذكرت كلام أمير رفعت عيني له بسرعة غمز احس
نفسي ذبت بالكاع من الخجل وهذا صاير فد مرة مدري
شبي كل ماشافني وغمز باوعت الحمدلله محد نتبه بعد
مارفعت عيني له
كملنا اكل وكمل الچاي بعده مباشرة قدمته الهم وبابا أشر كعدت يمه...
شرب چاي ونوله من ايده ومعرف شطلع من جيبة علبة
جبيرة اخذ ايدي وفتح العلبة ويفتحتها فتحت عيوني
وضحكت من الصدمة ماعرفت احجي
طلع ملاوي ثنين وبتوت لبسهم بأيدي واحس اللساني
نربط
محمد : قليل بحقج باباتي
عجزت عن الكلام حضنته بقوة وبست ايده وراسه
وردة : مشكور
محمد : تدلل بنيتي شعندي غيرها
شعور ماينوصف عيني عليهن ومبتسمة چن اول مرة
بحياتي ألبس ذهب
وردة : شعجب ماخلفتوا بعد؟
رفعت عيني بخوف، خفت يكون كلامي مو بمحلة
بس ضحك وباوع لأمي كاعده بصفه
محمد : نكول أمج عاقبتني
قربتله همست
وردة : شلون؟
بتسم ورجع همسلي بنفس الطريقة
محمد : كالت ضيعت بنتي بسببك ولاتفكر اخلفلك
بعد واذا تريد تزوج روح الله وياك درب الصد لا رد
ضحكت
وردة : هي هيج كالت؟
ضحك وهز راسه بأبجابية
وردة : وسويت؟
محمد : كتلها انعل ابو الخلفة انتِ بنيتي
ضحكت بقهقة
وردة : عفية عليك عجبتني
محمد : شسوي يابابا عندي أمج والهوى سوه
وردة : الله يديم المحبة بينكم وبين كل محب
محمد : امين يارب
ميسر كسر الجو طلع غنية كال
ميسر : اسمعواا ...اسمعوا
رفع الصوت يردد وياها
ميسر : وخلخاله يلالي بساكه
ضحكت
ميسر : اي خفت انا وجفلني البرق وثاري عيونه البراكه
كملها وهو يعدل شعري
محمد : مختلف على عباد الله الشمس تنور بظله...
بعينه عود الماصلى من تمر هاي الناگة
ضميت وجهي حسيت وجهي حمر من الخجل
ميسر طك اصبع كمل
ميسر : تتمايل مثل الناگة خلخاله يلالي بساكه
بعدت ايدي شفت امير رفع عينه الي وكمل.. كأنه
منتظر هل بارت هذا كال
نسر : مابي نقص الله مكملة بس لو ادري منين أصله
لنصب خيمة كبال اهله مانام احرس هلناگة
يسار وأيسر صابتهم كحه فجائية
الضحكه مافاركت وجهي والخجل اكلني بابا سحبني
الحضنه يردد
محمد : يهنياله بحبه الفاز
همستله بخجل وجهي بصدره
وردة :بابا كافي ستحيت
ضحك وضمني بحنية
محمد : فرحانين بيج وبخلاخيلج
ضحكت وميسر نصى الصوت بتعدت عن بابا
محمد : تدرين عندج خلاخيل اشتريتهن بس
تحسر
محمد : مالبستيهن
فتحت عيوني
وردة : والله!
محمد : اي والله
سناء : لسه موجودات هن وكلادة محمدية
وردة : ماعندي صورة من جنت صغيرة؟
سناء : اي عندي اول مانولدتي
مسد على شعري
محمد : ثاني يوم جبت كامرة اخذتج كوم لقطات
وردة : بالله اشوف موجودات؟
سناء : اي عندي بالبيت ومصورتهن بالمبايل
طلعت مبايلها ونطتنيا اشوف صورتي مامصدكة ضايعة بينهم صغيرة كلش ..اني نايمة و اخواني اربعتهم داير مدايري
بعدها لقصة ولد واكف متخصر ويباوعلي ولقطة ثاني
يضحك بيها وحفرة خده مبينه
رفعت عيني له نفس الضحكة ماتغيرت
وردة : هذا انت؟
بتسم
نسر : گلبج عرفني
يسار كح
نسر : ماتشرب ماي لاتموت
يسار : لا اكو واحد واكف بزردومي
بحدية صاح
محمد : يسااار
فهم من نبرة صوته هز راسه
يسار : صار يابا صار
رجعت اشوف باقي الصور
وردة : هذا منو؟
محمد : هذا ابن عمج علي وهذا كرار اصغر واحد
وهذني رشا ورنا
رجع صورتي يباوعلها
محمد : امج ماقبلت تلبسين كلادتج كالت تخليها
بحلكها كتله لا كد الصورة
ضحكت
سناء : واخذج هو لبسج صارت بطولج وكعد يعدل
ويكصر بيها
محمد : جان كل همي بنتي تعيش مدللَ
سناء : ان شاءلله تبقى مدللَ بزودكم
نظرلي وايده نزلت على شعري
محمد : وعد وعيونج الحلوة اعوضج عن كل لحظة
بتسمت
وردة : ماريد غير لمتكم وحنيتكم
ميسر : نشبعج حنان
ضحكت وغيروا المواضيع وبقيت اباوع الصورة أمير
وافكر بالحظتها من شافني شنو كال وليش يباوعلي
وهو متخصر ليكون موعاجبه!
فتحوا موضوع رند وصار وياها
ياسر : لا ولك يسار نقيب علي بس شافها نسطر
ضحك وكمل
ياسر : كلها سودة بوجهي منو مسوي هيج بيج؟
وردة : قصده على جرح بوجها؟
ياسر : اي كالت نجرحت بالغلط
وردة : يعني ماجابت اسمي؟
ياسر : لا ابد
يسار : وليش هذا زحفلها؟
ياسر : حلوة
يسار : صدك؟
وردة : اي تخبل
ياسر : لا مو تخبل بس حليوة مقبول وجها
يسار : صدك هنَ الغجريات حلوات؟
وردة : اي بالله خو سمر وسهام يجنن
ميسر : هم منين الغجر عشيرة لو شنو؟
محمد : مو عشيرة بالمعنى المعروف... يعني أكو بيهم عوائل وجماعات يلفون سوه من مكان لمكان ...بعضهم يشتغلون رقص وغنى وعزف وبعضهم تجارة وهيچ
ميسر : اصلهم منين وشلون صاروا؟
نظرت لبابا
وردة : عادي اجاوب؟
هز راسه
وردة : حسب الحچي اللي جانت تسولفه حبوبتي الله يرحمها... تكول اكو روايات قديمة يتناقلوها الناس عن أصل الغجر
كلهم بقوا يسمعون بهدوء... واني كملت
وردة :جان من نكعد ويصير حديث هي تسولف تكول
قبل اهلنا يكولون الغجر شغلهم بس دك ورگص ومره
من المرات مر عليهم سيدنا علي رضي الله عنه وارضاه
سكتوا و سكتت باوعت لأمي
خفت كلت شي غلط فهمت عليه هزت راسها
سناء : كملي حبيبتي
وردة : اي فتكول راجع من حرب وسمع دك وركص راحلهم وسالهم كلهم ليش دكون وتركصون؟ كالوله
ماعدنا وهاي شغلتنه احنه عايشين عليها
كلها تستمع بتركيز وبابا على كل كلمة يهز راسه
وردة : فأنطاهم كاع ونطاهم حبوب للزراعة وكللهم
هاي الكاع ازرعوها وفلوس واردها الكم هذول كيفوا اخذو الفلوس والحبوب وكاللهم رضي الله عنه ارجع للموسم الثاني واريد اشوف محصولكم
كالوله صار وراح...هم خوان واحد اسمه هميم والثاني تميم وخواتهم كا والثانية لية
هميم وتميم اخذو الحنطة والشعير طحنوها واكلوها
والفلوس صرفوها وبقوا على شغلتهم دك وركص ولما
صار الموعد رجع رضي الله عنه سالهم كلوله اكلناهن
والفلوس صرفناهن
فدعى عليهم كلهم اللهم لالكم الدار ولا الكم الجار لذلك
لحد هذا اليوم هم مامستقرين ومنبوذين محد يريدهم
من سمعتهم حتى الزين تبقى الناس تحجي وتصيت
عليه
ولهذا البعض يسميهم كاولية على اسم خواتهم كا ولية
ميسر : يعني السالفة كلها موروث قديم؟
هزيت كتافي بخفة
وردة : اي... ويمكن صدگ ويمكن بس سوالف ناس تناقلوها، الله أعلم
محمد : المهم بالنهاية الإنسان بأفعاله مو بأصله لا نعمم على ناس بسبب حچي قديم أو تصرفات فئة
هزيت راسي بسرعة
وردة : اي والله اني هم شفت بيهم الزين والشين مثل
أي مكان
ميسر : احس بيج روح منهم
وردة : طبعاً عشت وياهم عمر مو شوية وهناك اذا
مايصير عندك لسان وشخصية ياكلوك أكل
أيسر : ولهذا طلعتي سباعية
وردة : يمكن عتمدت على نفسي اكثر من غيري لدرجة
اللي ياذيني اردها له ضعف
ياسر : كفو والله
بقينا نسولف ونضحك لحد الفجر صلينا ونمنى شوية
بعدها ياسر ويسار وايسر اخذو سيارتهم ورجعوا واني
وأمي وبابا وامير وميسر بقينا
ملابسي جمعتهم وبقوا بس غراض البيت اللي شتريتهم
وزعتهم كلهم بثواب حبوبتي
بقينا ننتظر لحد يوم النتيجة طلنا امير يسوق وميسر
يمه...
بابا كعد يمنا صرت بنصهم ماعفوا ايدي يطمنوني وكأنهم متأكدين من النتيجة...
اتمنى اكون متأكدة مثلهم ...بس گلبي بين الخـوف والطمأنينة وكلما نقرب الخوف يڪبر...
وصلنا المستشفى نتظرنا شوي وبعدين بابا راح يشوف
التحليل رحنا ويا وكفنا بالباب طلع بأيده الورقة اللي
تثبت أصلي وهل فعلاً اني بنتهم اولا
رجف گلبي والدمعة صارت بطرف عيني اجه بابا ملامحة
باردة مابيها اي تعبير
رفع عينه عن الورقة... باوعلي مباشرة بدون أي تعبير
محمد : شلون يعني...؟
ماعرفت شلون بقيت متماسكة ورجلية حاملتني
نسر : عمي لا تخوفها سُكرها
ظل ساكت ثواني حسيتها أطول من عمري كله بعدها
قرب خطوة ومد الورقة بيدي
محمد : ليش مكتوب... تطابق النسب 99.9%
مافهمت بالبداية بس من شفت دمعة لمعت بعين بابا رجلي خانتني.
شهكت شهكة خفيفة جسمي وگلبي رجفوا... وقبل لا اوكع سندني بحضنه بسرعة
محمد : يابعد روح أبوچ... بنتي
وهنا انهارت بالكامل ..
