رواية قيود العوف الفصل الثامن والعشرون بقلم ريتا
مِن شفتَك
عرفت الدِنيا ما تِنعاف
مِن شفتَك
لگيت الناس موش نظاف
و لگيت بدَمي شي منك
گبل لا اشوف الـ بروحِي
شِفت روحي احبنّك ..
گاعدة اضرب برجلي ضربات خفيفة علىٰ الارض نتيجة التوتر الي حاوطنِي ..
مر وقت هواية واحنة گاعدين وننتظر الدكتور شنو يگول بعد الفحوصات ألي اجرتها
رجعت ظهري علىٰ الكُرسي ووجهت نظري اله چان ديسولف وي ماما ماشاءالله عاد ماما غير مرتاحة اله بس تحسة گعد يمها تفتح وياه موضوع
اليشوفهم يحسهم عشرة عمر ماچنها قبل كم اسبوع متعرفة عليه رايحة بالسوالف وياه
صاحوا بإسم ماما گمت وهو أشر الي اگعد وراح ياخذ التحاليل شوي واجة وگف يمي مديت أيدي حتىٰ اقراهم وبعدهم عني
-عوف: لا تستعجلين هسة نرجع نفوت للدكتور
-جُمان: زين بس خلي اشوفهن ؟
-عوف: لا
اتنهَدت بقلة صبر ماگدرت ارادده أكثر چانوا الناس الي حولنا هواي
طلعت البنية من غرفة الدكتور ولزم عوف كُرسي ماما ودخل غمضت عيوني ودعيت من كُل گلبي ماكو شيء خطر علىٰ صحتها
دخلت وراهم لگيت الدكتور يسلم علىٰ بسلام حار ويحچي وياه والابتسامة واصلة لذاناتة سلمت عليه بهدوء وگفت يم ماما
-عوف: اي دكتور
زفر بخفة وهو يباوع علىٰ نتائج التحاليل من شفت شكلة بقيت سن يطگ بسن من الرجفة ماا اعرف من الخوف بس اني كُل شيء عندي ألا امي ماا أتحمل خبر مو زين عليها بعد
باوع الي وگال أم منو حضرتها
-جُمان: ام جُمان
-الدكتور: الوالدة ماتشوف صح ؟
-جُمان: اي دكتور
ابتسم الي بخفة ووجه نظره لأمي وگال
-الدكتور: ام جُمان فقدتي بصرج تدريجياً مو فجأة ؟
-امل: نعم قلت الرؤية عندي وصارت شوي شوي تقل أكثر الىٰ ان صرت ماا اشوف شيء بعد فقط ظلام
گام وأشر الي گال قربيها لهذا المكان اخذتها
قطر قطرات بداخل عيون ماما وبدأ يفحص عيونها بالجهاز چنت اباوع ومركزة حتىٰ حسيت وجهي اتشنج
وجهت نظري للعوف الي چان مرجع ظهرة علىٰ الحايط ومكتف أيديه وعيونة مثبتة علىٰ الجهاز
بعد فترة من الفحص رجع گعد وگال
-الدكتور: سبب العمىٰ هو ضغط العين الضغط مرتفع عند ام جُمان واصل مرحلة !! مو رقم طبيعي ولا عادي
الضغط الطبيعي للعين هو من ١٦ ويوصل ل٢٠ اما فوق هذا الرقم خطر علىٰ المريض ولذلك يسبب العمىٰ للمريض
وللأسف الوالدة متخطية مرحلة العلاج لو مراجعة ببداية الموضوع اول ماحست بيه چان گدرنا نعالجه بالادوية اما هسة فَ ماا تتعالج الحالة ألا بعد اجراء عملية ..
اتنهدت واخذت نفس وزفرتة رجع لزم نتائج التحاليل وزم شفتة وگال
-الدكتور: الوالدة متعرضة لجلطة دماغية سببت عندها شلل نُصفي في القدمين
-عوف: العلاج الطبيعي يساعد ؟
-الدكتور: نعم العلاج الطبيعي هو المساعد لحالة الشلل النصفي اذا تلقت العلاج الطبيعي ٨٠٪ ترجع تمشي
ابتسمت ولزمت ايدها عصرتها براحة من گال هيچ
باوع النا ولزم التحاليل وگال
-الدكتور: بس أكو مشكلة
سرعان ماتلاشت ابتسامتي من گالها
-الدكتور: المشكلة هي لازم تكون مناعتها قوية وعظمها قوي الوالدة عندها ضعف بالمناعة مو طبيعي وعندها هشاشة وضعف بالعظام وهذا الشيء نتيجة هذا العلاج الي جانت تستخدمة
كورت ايدي وعصرتها بغضب وغمضت عيوني ااااااخ ياااا ام علييي
-الدكتور: وهذا الشيء يسبب تأخر في علاج حالتها ويسبب رجفة بجسمها وماا راح تتحمل العلاج الطبيعي وتقاومة رجليها لأن ماعندها قوة وحيل حالتها وعظمها مايسمح
زفر بصوت وگال
-الدكتور: هذا العلاج سلبياتة كارثية !! شلون ياخذة صاحب الجلطة مو مناسب لحالتها بكميات وماخذتة بكميات عالية !! بسبب هذا العلاج ازدادت حالتها
باوع النة وضحك بخفة مثل المنصدم وگال
-الدكتور: بختكم عند الله چبير يعني علاج بهيج كميات داخل للجسم وما مسبب أمراض ثانية
-العوف: بس انت تگول بسبب هذا العلاج حالتها تفاقمت أكثر وزاد الوضع ؟
-الدكتور: وچان ممكن يزود أكثر وينخلق مرض جديد بسببه
-ام جُمان شنو چنتي تحسين من بعد ما تاخذين العلاج شنو الاعراض الي تصير عندچ ؟
باوعت لماما الي اتنهدت بصوت وگالت
-امل: اون يادكتور من الوجع عظامي مثل التگصص بيه ومرات أيديه يخدرن ومثل اليوگفن بعد ماا اگدر ارفع أيدي وجع يلزم راسي وعيوني
-الدكتور: منو چان ينطي الهه ومنو چان يجيبة ؟
تلافينا سؤاله من اتقدم عوف اخذ الدكتور وصار يحچي وياه بهمس وهو يهز اله راسة اخر شيء ربت علىٰ ظهرة وابتسم اله ورجع گعد
-الدكتور: بس ماكو شيء خطير ان شاء الله كل شيء يسهل
باوعت لعوف هز الي راسة عرفتة خلاه يحچي هيج علمود ماما لأن بين علىٰ وجهة القلق والخوف من كلام الدكتور وشفتها رخت ملامحها من رجع گال هيچ
-الدكتور: راح اكتب الكم علاج بسيط وفيتامينات وابقوا علىٰ تواصل وياي حتىٰ نراجع حالتها ونشوف تقدم صحتها حتىٰ نقرر اجراء العملية والعلاج الطبيعي بأذن الله
كتب العلاج اخذناه منه واتشكرنا وطلعنا حسيت عيوني صارت بگصتي بعد ماسمعتة وعرفت حالة ماما مو سهلة ابد ووضعها زايد سوء بعد هذا العلاج
ومن غير السلبيات الي بينت بجسمها والهشاشة وقلة المناعة رفعت نتيجة التحاليل الي بأيدي ودمعت عيوني
-جُمان: سودة علية الي وثقتي بيها وسميتيها اخت الدنيا هيج تسوي بيج هيج تضُرج وتزيد وضعج سوء
باوعت الها وعضيت شفتي بحسرة والدموع ترست عيوني رفعت ايدي ومسحتهن
-جُمان: هلمرة مو اني الي تنزل دموعها لا الي تسبب بهذا وضعج هو الي لازم تنزل دموعة ويبچي دم علىٰ الي سواه
طلعنا وصعدنا ماما بالسيارة طول الطريق واني صافنة واعصر بأيدية گلبي انترس غضب عليها
احنة شسوينا الها ؟ بشنو ضريناها ليش الفلوس دتعمي عيون الناس وتمحي ضمائرهم ليش صارت الكُل بالكُل وكل شخص علمود كم فلس يأذي ويضر ويقتل ويسلب وينهب
ضحكت بحزن من اتذكرت أنُ بلهزمن صار الاخو صار يعادي اخو علمود الفلوس ومستعد يقتلة هم !!
فززني من تفكيري ورجعني لواقعي عوف من وگف السيارة گدام بابنا انصدمت شبسرعة وصلنا هيچ اني چنت سارحة وبالي رايحة بعيد لدرجة ما حسيت بالوقت ؟
نزلناها وحسيتة يفور وعينة تفتر بالمنطقة عرفتة علىٰ بيتها بس ميعرف بيت ام علي وين واني أريد بس ادخل ماما جوة دخلتها وطلعت منار اشرت الها تاخُذها تفوتها جوة
چنت اعيط مو احچي شفت عوف ديخابر اجتني بسُرعة
-منار: شبيييييج شنووو صاير ليش هيچي جاية شكلج مگلوب ومتتحاچين
ضربت ايد بأيد وگلت اله
-جُمان: ولچ تنطييي امي علاج غلط ولاعبة لعبببب بوضعيتها زايدتها فوك ماااهيي
ضربت علىٰ خدها بصدمة وگالت
-منار: ام علي !!
-جُمان: اييي ولچ ايي
گلتهن والتفت بسُرعة أريد بس اطلع واروح لزمتني من أيدي وگالت بخوف
-منار: اروحلج فدوه علىٰ كيفج مشايفة شكلج شلون صاير نار والله اذا ترحين الها بهذا وضعج تموتينها اني اعرفج
نترت ايدها عني وحچيت بصوت
-جُمان: هو اني اريد هيچ
وطلعت برة باوع الي عوف اشر الي بحاجبة وگال بحزم
-عوف: وينه بيتها هاي ؟
مشيت بسُرعة وأحس الطريق صار شطولة عليه سمعت صوتة من وراي
-عوف: بهداي بهداي
اتجاهلت كلامة وكملت طريقي وصلت ووگفت گدام الباب باوعت اله وصل يمي وطرق الباب بطرقات خفيفة فتحت عيوني وگلت اله
-جُمان: اضرب حيييل كسررر الباب ؟؟
اتجاهل كلامي ورجع طرق الباب طرقات خفيفة هم مسحت علىٰ وجهي بغضب واحس فورت اني مشتعلة وهو ابرد منه ماكو
-جُمان: منييين احصل برودددككك !!
-عوف: يكلفج هواي
گال الكلمة وسمعنا صوت مشي قريب علىٰ الباب اشر الي انُ أسكت ورجع طرق الباب طرقات خفيفة هادئة وكأنما واحد بطران واگف ديدُگ الباب
فتحت الباب فتحة خفيفة ومدت راسها فتحت عيونها علىٰ وسعهن من شافتنا رمشت بسُرعة وتلبكت بكلامها
-عوف: الله يساعدج عندنا حچايتين وياچ
-ام علي: تفضل
-عوف: بالباب ؟
توترت وارتبكت حييييل وهزت راسها وگالت
-ام علي: م ماا اگدر اني مرة وحدانية شلون افوتك لبيتي ؟
لزمني من كتفي وحطني گدامها باوعت بصدمة عليه گال بسخرية
-عوف: ديلا ارتاحي مو وحدي
-ام علي: اعذرني ماا اگدر شنو عندكم سولفوا هنا
-عوف: يعني ما تفوتينا ؟
بقت تباوع وتهز براسها بتوتر طولت وگفتنا برة نفذ صبرة وزفر بصوت ابتسم ابتسامة جانبية ودفر الباب برجلة من قوة الدفرة عاطت بصوت ورجعت ليورا
-عوف: العيارة ماتمشي وياي
دخلت وراه بعدهي متصنمة بمكانها وتباوع علينا بصدمة مامستوعبة
تقدم عليها العوف وهي انحصرت بالمكان صفگ أيدي بخفة وگال
-عوف: اويليي علىٰ ام علاوي الدودة
بقت تباوع تلعثمت وردت بتردد وعيونها تتنقل بيني وبينة
-ام علي: ش شنو قصدك ؟
-عوف: لا يالله سوووده عليه ماتعرفين ؟
باوعلي وگال
-عوف: تعالي جمونة تعالي گليلها شمسوية
شديت علىٰ فكي واتقدمت وگفت گدامها ثبتت نظري عليها وباوعت الها
-جُمان: مو زحمة اوگف گدامج هاي الوگفة واحاسبج ؟ واني الچنت اگول الج دين برگبتي لو اموت ماا أوفي
عطت بصوت وكملت
-جُمان: دينيش دين الضيييم لچ خالة ليش هيچ سويتي ؟ شلون تأذين الي دخلتج بيتها وسلمتج إياه
بچت بصوت ونزلت دموعها
-جُمان: امييي الي تسميج اختي الي روحهة صارت بيچ وتعتبرج اخت ووثقت بيج لدرجة سلمتج كُل شيء
دمعت عيوني وگلت الهه
-جُمان: امي هاي العزيزة روحهة الي ترفض أحد يشيل خرزة لو وگعت من ملابسها سلمتج نفسها لأن ماچان الهة غيرج هيچ تسوين بيها هيج تجازين ثقتها بيج وحبها الچ ؟
بقت تبچي وتشهگ بصوت ومتحچي
هزيتها من كتفها وگلت بصووت
-جُمان: احچيييي ليش سويتييي هيج بيهاا ليش زدتي مرضها ليش أذيتيها بالزايد ليششششش تنطينها علاجات مو زينة عليها بجرعاات عالية
موتتني اتلفت أعصابي ماتحچي بس تبچي وتشهگ صرت اهززز بييها بقوة اريدها تسولف بس ماكوو !!
عاط بيها العوف بصوت قوي وگال
-عوف: طولتيها احچييي لچ
رفعت نظرها اله ورفعت أيديها گالت وهي تبچي
-ام علي: والله مو اني
-جُمان: ولچ شلووون مو انتِ محد غيييرج يفوت لبيتنا محد غيرج يجيب علاج لأميي !!
زمخ بيها بصوت وگال
-عوف: اش لچ لا تفكرين تنكرين كل شيء يثبت انتِ
-ام علي: والله اني احبهه واعزهه واعتبرهه مثل اختي واعز
-عوف: سوده عليه
-ام علي: مو بيددددي والله مووو اني جبرووووني جبروووني
گالتها وگعدت بالگاع تلطم وتبچي گعد لمستواها ونطط عيونه عليها وگال بصوت حاد
-عوف: طولتيها تحچين لو اخليج تحچين بطريقتي ؟
-ام علي: اي احچي احچي
-جُمان: گولي ليش چنتي دسوووين هيچ
-ام علي: جبروني انجبرت اسوي هيچ
-جُمان: انجبرتي ؟ انجبرتي تأذين روح فوگ ما هي متأذية ولچ شنو انجبرتييييي !!
-ام علي: والله اني مرة فقيرة وماعندي مضرة علىٰ احد واخاف الله ماا اعرف شلون سويتها والله
-عوف: هسة هذا التمسكن وين احطة بجيبي ؟ دسولفي وهاي أخر مرة ابقىٰ محترمج بيها الوراها اللزمج وانعل شرفج لو مو تطلعين مرة سولفي وخليني محترمج يلاااا
گال الكلمة بعياط وهي نزت حطت ايديها علىٰ وجهة وصارت تحچي بصريخ وبچي
-ام علي: علمود الفلوس لأن عندها راتب بنتها اختفت وعرفت بيها اتمرضت ومحد الها رحت اني وصرت كل يوم اروح الها لحد مابقيت ابات عندها وصرت اعتني بيها وعيني عليها لحد ماخلتني اني اتصرف بالراتب
-جُمان: خ** بالراتب ولچ اخذي لو باقية لهسة تاخذين بيه مايهمني مايهمني وما ترف الي عين بس ليش اذيتي امي ولچ بسببج أتأخر علاجها ولازم تاخذ علاج ثانية لحالة ثانيييية !!
-ام علي: جبروووني اني شسوي بيه اني راتبي كافي عليه جبروني انطيها غير علاج حتىٰ حالتها تزيد ومتتحسن گالوا الي بنتها بعد مترجع اختفت ماتت ماا ادررررري !!
-عوف: عوفي التمسكن والحچي الزايد مو لعبتي روحي بيه وسولفي الزبدة لمنو چنتي تبوگين وتنطين ؟
رفعت أيدها الي ترجف واشرت علىٰ باب الغرفة گام وگال
-عوف: ابقي يم هاي الدودة انتِ
راح وهي اخذت ايدي تبچي وتگول
-ام علي: جُمان خالة سامحيني فدوه اروحلج والله اني مو هيج انتِ تعرفيني من زمان اني فقيرة من اهل الله
نترت ايدي منها بغضب ورديت
-جُمان: من الله ياخذج لتجيبين طاري الله علىٰ لسانج وانتِ تعذبين بروح أنسان وتلوعين بيه
-ام علي: فدوه جُمان خال
دتسولف ودرت وجهي من سمعتة گال بصوت عالي
-عوف: يا يابه شيييل
عقدت حاجبي بأستغراب وشوية وطلع يعت بشخص فتحت عيوني علىٰ وسعهن بصدمة من شفتة گلت بصوت
-جُمان: عمووو رائد !!!
عتاه من قميصة وشمرة حييل بالگاع
-عوف: شكو گ*** وشكو گ*** ملفيهن هذا البيت
لطمت علىٰ وجهي بصدمة وباوعت الها
-عوف: خاف عليج عقوبة صارت عقوبتين ملفية مجرم وضامتة ببيتج فوگها خرب عرض الدودات
فتحت حلگي بصدمة !! باوعت الها وهزيت كتفها وگلت الها
-جُمان: هاي شنو !! هاي شنوووو شديسوي ببيتج ابو منار
-عوف: لا ونايم ومرتاح علىٰ التبريد والخيسة كلها يمه
اتقدم الها قلص عيونة وگال
-عوف: يابه تحت السواهي دواهي ماكو مختار ماحطوا اسمه عنده ماكو مركز ماخلوا معلوماتة يمه أخر شيء يطلع ببيتچ
صفگ أيده وضحك وگال
-عوف: نعلعلة شرفج غير مستهترة وملطلطة انتِ
هزت راسها بخوف وگالت
-ام علي: هو جبرني هو وهددني والله هذااا هو نفسة الي خلاني ابوگ فلوسكم وخلاني انطيي امچ علاج غلطط
من الصدمة الي دخلت بيها صرت ماا اعرف شسوي سرت رجفة بكُل جسمي بللت شفتي ونزلت مني دمعة بحزن تنقلت عيوني بيناتهم وگلت
-جُمان: ليش ولكم ابو صديقتي وصديقة امي اثنينهم متحالفين ومتفقين علينا
وجهت نظري اله چان واگع بالگاع وقميصة مشگوك لأن عوف جرة حيل وشگة عليه وصافن شكلة مو طبيعي مبين عليه سكران
-جُمان: بشنو ضريناك ليش هيچ الفلوس عمت گلبك ليش هيج دتسوي بحياتك تقتل وتبوگ ليش عمو !!
گلت الكلمة واجانا صوتها من ورانا بسرعة التفت شفتها واگفة متصنمة تباوع وگالت بصدمة
-منار: بابا !!!
*******
بقيت بقلق طولت خفت عليها تسوي بيها شيء لأن من راحت شكلها چان مو طبيعي وحيل عصبية ماخلتني احچي وياها حتىٰ
عضيت شفتي بقلق وأني اباوع شلون اعوف خالة وحدها وبنفس الوقت مدا اگدر ابقىٰ هنا حتىٰ
لزمت الجهاز وصرت اگلب بالتلفزيون بقلق داگلب بالقنوات وطَلع باسم اول مسمعت صوتة گالت
-امل: الله خلي خالة خلي
خليتة وعليت صوت التلفزيون وگلت الها
-منار: خالة متريدين شيء اني بالمطبخ ؟
هزت راسها بـ لا ...
استغليتها فرصة لفيت حجابي وطلع طكيتها بركضة أريد أوصل بسُرعة وأشوف عوف وجُمان شلون حصروها شسوو بيها ؟؟
خففت مشيتي من شفت صار البيت قريب عليه گدامي چان الباب مفتوح شوي منه تقربت عليه وشفت عوف واگف ومتخوصر ويباوع بغضب
أستغربت من سمعت جُمان چانت دتحچي بس مو ويَة ام علي چان دتلوم رجال رنت بأذني كلمة ليش عمو بشنو ضريناك ليش
فتحت الباب واحتلتني الصدمة من شفتة حچيت بصدمة وفزع
-منار: بابا !
رجفت أيدي صرت ماا اگدر اسيطر حتىٰ اوگف وابقىٰ ساندة نفسي بسُرعة اتقدمت الي جُمان لزمتني وگالت بصوت
-جُمان: انتِ شجااااابج وراييي شجابج
بس مچنت مهتمة الها بقيت مثبتة نظري عليه وهو صافن خرطت وجهي بأيدي وگلت بصوت
-منار: مستحييل مسستحيييل ولكم مستحييل أبوية شديسوي ببيتها !!
ماا أعرف شنو صابني بهلوقت اتهسترت أو چانت تصرفاتي أثر الصدمة من الموقف الي شفتة گدامي
وگعت بالگاع وصرت اضرب بروحي حيل وابچي واحچي
-منار: دمرتنا وشتتنا واخواني هذول اخواني شردوا واتدمرت حياتهم بسببك امي خذوها اخوالي وانحرمت منها بسببك واني يابه اني رادوا ياخذوني فصلية وهم بسبب الي سويتة
وهذا كُله كل ليلي ماا أنامة افكر بيك اگول أبوية وين صار أبوية شديسوي أبوية شدياكل شلون ديشرب
ضربت صدري بأيدي بكل قوتي وماحاسة علىٰ نفسي
-منار: وابوووووية كُل هلوقت ببيت وحدة لاهية مرتة ولا هية قريبتة ولكم بالحراااااااام ولچ شلون تدخلين رجال غريب لبيتج متخافين ربچ انتِ متخاااافييييييين
وانتَ يابه ماكفاك مو كافي كُل الحرام الي مشيت بيه وصرت مجرم مجرم قتلت ارواح مو روح وحدة وبعدك ماواعي علىٰ تصرفاتككك بعدككك تسووووي الحرام بعدددك تمشييي بيَه
حچيتها وحسيت ذاهت روحي انسحنت مابقت عندي طاقة ولا روح حتىٰ اكمل واحجي ولو كلمة وحدة بقيت گاعدة بمُكاني وجُمان حاضنتني
لزمة عوف وكومة طلعه برة يعت بيَه باوع لأم علي وصاح بيها بصوت
-عوف: تعاليييي لچ طلعييي
بسُرعة لزمني وجع براسي وعيوني صارت تأذيني بس سُرعان ماا التفت من سمعت صوت سيارة شرطة وگفت بالباب نزلوا منها شرطة وتقدموا يم عوف
اباوع اله بقىٰ يسولف وياهم فترة لحد ماطلعوا الكلبشات نزلت دموعي من لزم ابوية عتة حيل يسحل بيه سحل وابوية يروح ويجي بأيدة وحتىٰ صوت مينسمع اله وشكلة مبهذل عبالك نعسان بس للأسف أعرف ابويه من يصير شكله هيچي يعني شارب !!
وگف اله وگال للشرطي
-عوف: كلبشة للكلب هذا
باوع لأم علي وگال بصوت حاد
-عوف: تعالي لچ حيوانة
******
حطوا الكلبشات بأيديهم ثنينهم وهييي تصرررخ بصوووت التفت عليه وهي تصرخ
-ام علي: جُمان خاااالة لتخلييينهم ياخذونييي والله اني متندمة غلطانة وادري بنفسي بس لتخلينهم ياخذوووني
ولزموهم شمروهم بالسيارة حيل وسدوا الباب ماا أعرف شنو گال الهم بس ضربوا اله تحية وگالوا
-حاضر سيدي ..
أسوأ موقف يصير گدام اي بشر هو هذا يشوف أبوه بهيج موقف مذلول وعدم مسؤوليتة وتفكيرة وصلة لهيچ حالة
اذا اني مااجاي اگدر أستوعب هي شلون !! الي يأذي كل هلوقت هو ببيتها وعندها وحتىٰ مانكرت الحچي وبالحرام !!
مسحت وجهي بقوة كل ماا أفكر بالموضوع
دخلنا لبيتنا إنسانة مُزيفة خليناها تگعد ويانة وضحكنة وسولفنا وياها واكلت بنفس الماعون تاليتها تطلع أخس منها ماكو
درت وجهي علىٰ منار الي مووتت روحها وحتىٰ صار شكلها أحمر من البچي والصدمة الي تعرضت الها مشت ووگفت يم عوف وحچت بدموع
-منار: بداعة كل عزيز عندك ساعدك ابوية فدوه اروحلك ساعدة
اتنهد وزفر وگال
-عوف: بـ أي حق أساعد مُجرم شلون ترضينها انتِ
بسرعة مشيت لزمتها من أيدها واخذتها امشي بيها وصلت لبيتنا دخلتها وهي تبچي بصوت وتشهگ سمعتها امي وتخبلت واني ماا ردت احچي بالموضوع گدام ماما بس انجبرت وگعدت حچيت كُل شيء
بقت امي مصدومة وماا أنطت ردة غير كلمة وحدة گالتها
-امل: حسبي الله ونعم الوكيل
گالتها وسكتت ساعات واحنة نسولف ونهدي بمنار بس ماكو كأنُ المصايب ماتندل طريق غيرنا تنزل علينا وحدة ورة الثانية صارت تعبنا حييل
******
دخلت للمطبخ سويت چاي وگعدت انتظر قاسم الي من أمس وصل بس ماقبل يجي بالبيت الچبير راح لبيتهم هو وعوف
فتحت جهازي دزيت اله رسالة
-رغد: وين صرت ؟
بسُرعة اجتني رسالة منة فتحتها وچانت صورة لباب البيت دزها وگال
-قاسم: گدام البيت الابيض
ضحكت ورحت فتحت إله الباب سلمت عليه ودخل جوة يم الحجية چانت گاعدة تتفرج علىٰ مسلسل
-قاسم: إيابه جميلة رجليها بالگبر وتشوف مسلسلات
باوعت اله وضحكت بصوت عالي وفتحت أيديها حضنته وچانت يمها العصىٰ رفعتها عليه وگالت
-جميلة: شني ولك تستهزأ بيه ؟
-قاسم: بس نزليها خلي نتفاهم
-جميلة: لااع إله تگول
-قاسم: عمي حشىٰ انا استهزأ بيج بس نزليها خلي نسولف
نزلتها وگالت
-جميلة: ولك انا بشبابي من امشي اردف الگاع ردف
صاح بصوووت وگال
-قاسم: ااحممم والنعمم
-رغد: هههههه هسة دكافي من هلسوالف وگول شلونك شنو بغداد حالية الكم شو تجون منا ترحون منا غير شغل هذا بعد اخذوا بيوت هناك
باوع النا وقلص عيونة وگال
-قاسم: والله انه عندي موضوع وياكم بس شو چني مستحي منكم
-جميلة: شمسوي من فاينة ولك قوووويسم
-قاسم: هسة دگولي يا الله يا حجية غير تفتهمين بالاول
بقيت اباوع اله حسيته صارت ملامحة جدية حك خدة بخفة وگال
-قاسم: انه خطبت
شهگت بصوت الحجية وگالت
-جميلة: ياااااع وياهي هاي وليييك قوووويسم
باوعت اله وبقيت صافنة ما حچيت شيء
-قاسم: من بغداد حجية خوش بنية راح تحبينهة سوالفهة راح تذكرج بشبابج
-جميلة: ولك لا تصير لوتي قويسم وگول ياهي هاي منين شني اصلها شني فصلها ولك چا هيج گبل تگلي انه خطبت چا انه وين صرت ؟؟؟
اخذ نفس عميييق وسولف النا السالفة من أولها لأخرها
-قاسم: وانا ابنج يمة تربيتج لا يمكن اخليها تروح فصلية وانا اگدر اساعدها وروحي تريدها
ضربتة بخفة علىٰ زندة وگالت
-جميلة: لو مامسوي هيچ چا گلت هذا مو وليدي ولا من تربيتي بس أنتَ وأخوك الشهامة تمشي بدمكم يمة زلم والنعم منكم أرفع راسي بيكم يَبعد حبوبتك
قاسم: حجية يعني ما ماخذة بخاطرج منا منا
رفعت أيدها وگالت
-جميلة: أبد يمه انا شني الاريدة ؟ غير راحتكم واذا انت البنية روحك رايدتهة عمت عيني اذا يتكدر خاطري عليك بس انا عندي طلب
ضحك وگال الها
-قاسم: بوية جميلة تاخذين راسي اشلعة وانطي الج امري انتِ
-جميلة: تاخذني الها ولك يمه انا گلبي طاگ علىٰ جمونة عبالك بنيتي ماچنها بقت يمي فترة عبالك العمر كله عاشتة وياي فد مرة تاخذني أشوف مريتك واشوف بنيتي
-قاسم: سهلة علىٰ النزلة الجاية حجية اخذج وأريدج تقنعينها تجي للبصرة وياچ حجية انا جاي بس وعلي بالي يمها ولا مرتاح أبد
باوعت الي وگالت
-جميلة: ولج هذا الفاگس مچفي علىٰ وجهة
ضحكت بصوت ورديت
-رغد: والله انه هم صافنة حجية هههههههههه مدري شسالفة أشو من يسولف تحسينة متندم جاي للبصرة يريد يرجع لبغداد
-قاسم: لا وعلي گلبي طاگ عليكم انا ماگدر بدونكم
باوعت اله وگالت بحرشة
-جميلة: وما تگدر بدونها هم
-قاسم: چا شلون غير أم العيال ياحجية
حيل فرحت اله وباركت اله وروحي احسها مفرفحة من اشوفة هيج فرحان اتمنىٰ مايلوحهم غير الخير وينسعدون بحياتهم ياما عانوا قاسم وعوف أريد الدنيا تضحك الهم بس
فززني من صفنتي من ضربني علىٰ ظهري وگال
-قاسم: وانتِ شعندج شنو الموضوع حرگتيني حرگ عليه
-رغد: احم يعني انا قررت قرار
-قاسم: شنو القرار ؟
-رغد: قاسم انا قررت ارجع أشتغل
حسيتة رخت ملامحة وبانت ابتسامة علىٰ وجهة رجعت كملت
-رغد: ومثل ما گلت الي انتَ انا مادرس كل هلسنوات وتعبت بيهم واخر شيء ابقىٰ مگابلة الاربع حياطين وگاعدة وانا الحمدلله تخطيت الأزمة الي مريت بيها عشتها وتمرمرت بيها وانطيتها وقتها بس تخطيتها أريد ابدي بداية جديدة وان شاء الله بداية خير
چان يباوعلي ومبتسم حسيتة ارتاح ضحكت بخفة وگلت اله
-رغد: بصراحة انا لعبت روحي من وجه غرور ههههههه أريد أطلع اشوف وجوه جديدة شو مليت كلش
-قاسم: هي غرور تلگينها لعبانة روحها من لسانج
-رغد: أنوب هلگد ماا اعاركها صرت اطب وأطلع اتعارك حتىٰ وي ذبان وجهي
-قاسم: بعد لسان محامية
رفعت حاجبي وگلت أله
-رغد: اي چا شعبالك جاي اتدرب واطبق بيها
-قاسم: واضح النتيجة قوية لدرجة شافتني اجيت بالكاميرات ولهسة ماشفت وجهة
-رغد: ختولي عوفها هاي دواها يمي بس انه أريدك تاخذني أشتري ملابس وبعدين اشوف شغلتي شلون ومنين ارجع أبدي بيها
گام وگال
-قاسم: سهلة هاي بس عندي بس باچر لأن عگبة التحق
اتفقت وياه علىٰ الوقت وراح واني رجعت فتحت اللابتوب ورجعت أبحث وأطبق بقوة معلوماتي وقوة لباقتي ودفاعي علىٰ الحايط
********
بديت بعلاج ماما وماا انسىٰ حبة وحدة ومع ذلك بديت اني احرك برجليها وبجسمها حتىٰ لو ماتگدر بس چنت اجبرها حتىٰ ماا أخلي جسمها يموت
لازم يتحرك حتىٰ لو متگدر ويصعب عليه هذا بس كل شيء بالي چان هو النتيجة وانُ كل هذا راح يعدي
عوف رجع للبصرة لأن راح يلتحلق للموصل بس بقيت علىٰ تواصل وياه كل اليوم يتصل بيه ويسأل علىٰ وضع ماما
أهل الولد الي قتلهم عمو رائد عرفوا بيه لازمتة الشرطة والي عرفنا انُ لازمين باب المحكمة ويردون يصعد للحكم ومنار تعبت وألي تعبها أكثر هو تحچي وي قاسم وهو قافل ومستحيل يقبل تحچي وياه بهذا الموضوع كُل مرة بدموع تخابرة وتشهگ
-منار: اروحلك فدوه ساعد ابوية والله ميعيدها بعد ميعيدها يخاف
وبكُل مرة نفس هلكلام يجيها صوتة وهو يگلها
-قاسم: انا لو أساعد مجرم بعد المن باقي بمكاني وأنا اساعد مجرمين
ومرة عاط بيها بصوت بعد مالحت عليه وكتلت روحها بالبچي والصريخ وگالها
-قاسم: لا تخبلينييي ولچ انتِ شلون ترضينها تطلبين من أحد يساعد ابوچ ولچ حتىٰ لو أبوج انا مفتهمج مفتهم حرگان گلبج عليه بس ابوج مجرم وقاتل منار قاتل مو نفر واحد قاتل ثلاثة ثلاثة
شلون أساعده شلون ترضاها روحي أساعد مجرم ويروح دم الي قتلهم هدر والمجرم يبقىٰ عايش وين هاي بيا قانون وين صايرة ؟؟
سدتة بوجهة ورجعت اجت گعدت يمي تتوسل بيه اخابر عوف واطلب منه اني يساعدة فتحت عيوني ورفضت جرت أيدي وصارت تبوس بيها وهي تشهگ
-منار: ولچ والله ادري بكُل شيء بس والله ماا اگدر جُمان گلبي يأذيني هو ابوي لو مهما سوىٰ أبوي يحز بگلبي وخاطري ولچ روحي تنمرد
اروحلج فدوه بس حاولي وياه والله عوف يسوي كُل شيء تردينة ميرد الج طلب خلي يتوسط النة عند معارفة لو اي شخص بالقانون جُمان
اتنهدت وخابرتة وحاچيتة بالموضوع اجاني ردة ببرود من گال
-عوف: الموضوع يم المحكمة والقاضي الي يحكم ماكو اي حل بعد
-جُمان: يعني محد يگدر يساعدة
-عوف: والله ماا أدري اذا جاي تغشمين روحچ بس جاية تطلبين مني انا اساعد مُجرم جُمان شگلتي لروحچ من گلتي هذا الحچي؟
بوقتها أبد ماقبل بكل حچاية گلتها چان ينزعج ومايقبل بهذا الموضوع وأي كلمة زايدة تنضاف أحس الغضب يتملكه
سمعت كلامة هي واني سديت هذا الموضوع لأن منين ماا اجيبة مو شيء سهل ولا شيء عادي كل أنسان لأفعالة حكم وعمو چان لازم يتلقىٰ حكم أفعالة
منار تعبت حيل بهاي الفترة والمشكلة حتىٰ هي اقتنعت انُ مستحيل اكو احد راح يساعد ابوها لأن الجرم الي سواه ماينغفر اله لا بالقانون ولا بالشرع ...
ومرت الأيام واليوم چان يوم محكمتة من الصبح سادة علىٰ نفسها الباب وماينسمع الها صوت ومتقبل تفتحة وگفت يم الباب للمرة الي ماعرف شگد لأن من الصبح اني كل دقيقة اوگف كدامه طرقت الباب
-جُمان: منار افتحي الباب فهميني ليش سادتة عليچ !!
اجاني صوتها وهي تحچي بتقطع
-منار: عوفيني معليييج بيَه
-جُمان: علىٰ الأقل أخذي مي اشربي اكلي شيء من الصبح مفايت شيء لبطنج حرام !!
-منار: ولچ ماااا ارييييد شيء بس عووفينيييي عووفيينييي
تحچي وتبچي خليت ووخرت عن الباب دقايق وفتحت الباب شفتها وانصدمت
شعرها امشعتة ومنفوش ووجهة خارطتة خرط باصابعها واثارهن بيه بعدهن ووجهة احمر باوعت وگالت بصوت ضعيف يرجف
-منار: الحكم إعدام
غمضت عيوني بتعب كُلنا چنة نعرف حكمة هذا بس هي چانت منتظرة تسمع الكلمة حتىٰ تقتنع..صح انحكم اعدام بس لسه ماتنفذ الحكم .
ومشت الأيام ومنار دخلت بحالة اكتئاب فضيعة وچانت الكلمة تنسحب منها بالگوا وقاسم اتخبل عليها يخابرهة متجاوب لحد ما بيوم گلت الها اني
-جُمان: ليش مدتجاوبينة شنو ذنبة هو ؟
بس احچي وياها تنتر بيَه وتعيط
-منار: وخرو عني مالي خلگ لأحد بيكم فهمتوا لتلحون عليه عوفوني بحالي اعتبروني ميتة
-جُمان: شلون نعتبرج ميتة شنو هلحچي انتِ شلون تگولينة
-منار: لتلحيييين گلت الچ لتلحييييين جُمان وخري عنييييي
عافتني وفاتت للغرفة وسدت الباب صاحت عليه ماما
-امل: عوفيها يابعد امچ خليها تعيش حزنها ويرتاح گلبها بعده موجر بعدهي تحترگ
-جُمان: خايفة عليها اني لا دتاكل لا دتشرب وبس تبچي ومتقبل تحچي وي أحد اخاف يصير بيها شيء
-امل: حتىٰ لو يمة عوفيها تعيش حزنها ترىٰ ألم الفقدان مو سهل ولا شيء ينمحي بسُرعة وشوفي وجعها شلون يختلف أبوها راح إعدام وعائلتها متشتتة وهي ماتدري شنو مستقبلها
اتنهدت وحطيت راسي علىٰ رجليها
-جُمان: الله يهون عليها يمة بس ماا اگدر شسويي گلبيي مينطيني اعوفها بهيچي حالة حتىٰ لو متريد
مر اليوم ردت انام حطيت راسي علىٰ المخدة ولزمت جهازي شفت عوف دازلي رسالة
-عوف: اذا موجودة جاوبيني
استغربت رسالتة وجاوبتة
-جُمان: موجودة أكو شيء
-عوف: شگد مشتاقلج أول مرة أحس روحي هلگد تريد قربج
خفق گلبي وبقيت ارمَش بسُرعة وصافنة علىٰ الرسالة الي دزها الي بدون ماا اجاوب رجع دز
-عوف: ليش سكتيي ؟؟
-جُمان: ماا أعرف عوف حسيت بيك شيء ليش هيج كتبت الي
رجع دز الي
-عوف: ههههههه إذا احد گلج مشتاقلج يعني بيه شيء ؟ چا هاي شعليها
-جُمان: اوووف عوف ماا أدري هيچ حسييت وإني احساسي نادرًا مايخيب
-عوف: أروح فدوه لأحساسج الي مايخيب ماتحسين بشيء ثاني بعد
-جُمان: بشنو يعنيي ؟؟
بقىٰ شوي ورجع دز الي
-عوف: ماكو شيء بس انتِ زينة جُمان وعلي بالي يمج كلش امج شلونها وي العلاج
ابتسَمت من قريت رسالتة صايرة من أشوف منه اي رسالة ابتسم لا اراديًا ومرات اللگاني فاتحتها وصافنة بيَها ماا أعرف شبيه وشجاي يصير ألي
-جُمان: كُل شيء بخير عوف من ناحية أمي وعلاجها گلبي مرتاح هلمرة جاي احسها تتحسن شوي شوي وبطلت تگول عندي وجع بكذا مكان بجسمي
-عوف: الحمد لله
-جُمان: بيني وبينك مرات تسولف وتحن لأم علي بس متبين هذا الشيء
-عوف: راح تخيس بالسجون راح تتربىٰ عدل ام علي
-جُمان: اوووف هي سجن وعمو رائد اعدام
-عوف: طبة مرض
-جُمان: يمعوود الرجال راح يموت !!
-عوف: طبة مرض تربيع
دزها وحال السكوت بيناتنا بس ماا أعرف ليش گلبي يدُك سريع هلمرة حسيت اكو شيء
-عوف: جُمان انه طالع بمُهمة بعد ساعات
-جُمان: بالموووصل !؟
-عوف: اي
لزمني گلبي وخفت كُلش اوضاع الموصل حيل مو زينة وتخوف أني اول ما گال رايح للموصل خفت عليه بس ماگدرت انطق بكلمة وياه ...
-جُمان: شنوووو شلووون الموصل تخوف كُلش شلون !
-عوف: ههههههه شني بوية واذا تخوف چا جايين نلعب احنة ؟
-جُمان: ليش تحچييي هيج مو گلبييي راح يوگف عوف !!
-عوف: اويليي احترگ گلبيي تخافين عليه جُمان
انتبهت لروحي شنو كاتبة شچفصت اني هسة شلون الزگها وارهمها شكتب !!
-جُمان: مهمة شنو زين ؟؟
-عوف: مو شيء بس ادعيلنا انتِ ادعيلي ارجع بسلامة هلمرة لأن عندي شيء لازم اخلصة من أرجع
-جُمان: يمةةةة ليشش ليشش تحچييي هيچ شبييك انتتت
-عوف: شبيه انه
-جُمان: خوفتنيي عوف خوفتنييي ولتگُلي لتخافين لأن وضع الموصل دنشوفه بالتلفزيون صاير طحين ميفوت الها أحد ويطلع اله بقدرة قادر !!
-عوف: ماكو شيء ان شاء الله سهلة
-جُمان: انتبه لنفسَك فدوه لتصيير متهاون عوف أني اعرفك متهاون انتَ متهمك نفسك وشفت بعيني من تصاوبت عندكك شغلك فوك كل شيء
-عوف: ميخالف هلمرة راح انتبه الها لخاطرج
-جُمان: قاسم وياك ؟
-عوف: اي قاسم وياي
-جُمان: الله يحفظكم يارب ويسلمكم من كُل شر
دز الي قلب وسديت الجهاز واحس گلبي فرفح من گلي شلون بيَه
انتبهت لنفسي ولأهتمامي المفرط بيَه شبيه اني ؟ شنو صاير الي عوف عندي صاير كُل شيء بكلامي بتفكيري حتىٰ بخوفي هسة هم هَو !!
وأرجع اگول شنو هلكلام !! هو مو اي انسان بحياتي مو انسان عابر لاا عوف الي بكُل موقف هو وياي الي بكل مرة يحميني ويساعدني
اني اصلاً بهلدنيا صرت أمن بيَه وأول مرة بحياتي ادخل رجال لحياتي وأمن بيَه بس مو بيدي ماا اعرف شلون هيچ صار وياي
بعدت أفكاري عن راسي وحاولت أنام بالگوة جبرت عيوني تغمض غصباً ماعليها
گعدت الصبح وانطيت علاج ماما ورجعت سويت نفس الروتين وياها ومنار رحت حچيت وياها وبوستها بچت يمي خليتها تبچي وما منعتها ومسحت دموعها
لأن أعرف شگد الأنسان يرتاح من يبچي
يحس حمل علىٰ صدرة وخف كُلش
لحد ما حسيتها تعبت من البچي مسحت دموعها
-جُمان: عشتي حزنج لأيام طويلة بس ونوب ؟
ابوج يحتاج تقرأين إله القرآن ويحتاج تدعين اله
مو تبچين عليه يحتاج تدعين الله يغفر اله يخفف ذنوبة يخلي يتوب .
-منار: جُمان اني الي اذاني وتعبني شلون صار مصيرة حكم أبوية هد حيلي متتخيلين شگد صعبة عليه أبوها قاتل محكوم اعدام .
اتنهدت وبقيت اباوعلها وهي تسولف رجعت گالت
-منار: ومرات أفكر شنو چان احساسة من انحكم من فكر بحبل المشنقة
شنو شكل الندم الي احتلاه وعلىٰ شنو أكثر شيء ندم .
-جُمان: هذا الي صار الله ارحم بيه الله يهدي ويغفر اله كافي انتِ كافي علىٰ نفسج منار انتبهي لصحتج ماعندج اهم منها بعد
-منار: ابوية قتل صحتي وروحي قتل حبي للحياة وعيشتي والله من أصفن واشوف وين وصلنا اگول اني ليش بعدني عايشة ولشنو ؟
باوعت الها وهزيت راسي بعدم رضا
-جُمان: لو كُل مصيبة تصيبنا نفكر هيچ محد گدر يكمل الحياة وظروفها ومصايبها ومحد عاش اذا هلشكل كُلنا نعصي ربنا ونقتل روحنا ونفتك بعد
بس والاخرة ؟ وكلام الله لعبده المسلم ؟ وامتحان الدنيا والأعمال هاية وين تروح ؟ شگد ضعفاء احنة لعد أبد مراح نصير أقوياء ولا راح نرضي ربنا علينا راح نعصي ونتذمر ومانصبر حالنا حال اي كافر
من تضيق بيه وتصير عنده مُصيبة ميعرف وين يروح وشنو يسوي ! يكبت علىٰ نفسة ويأذيها ومرات يقتلون نفسهم وينتحرون لأن ماعندهم إيمان وصبر هذا خسر نفسة وخسر ربه
دمعت عيونها واتقدمت حضنتني حيل بكُل قوتها
-منار: والله من اشوف وجهج أرتاح ماا اادري شنو اگول الج بس شكراً من كل كلبي جُمان الله نعمني بيَج
ابتسمت الها وبستها
-جُمان: دگومي غسلي وتعالي نسوي شي ناكلة ماما هم خطية جوعانة
هزت راسَها وگامت طلعت وطلعت وراها غسلت وجهة ودخلت اسوي أكل دزيت الة رسالة راحت خط واحد بس ويقيت أفتر وبالي كُله يمة صار كُل خطوة اخطيها ماا اباوع للي گدامي
اجة الليل وماوصلتني منه ولا رسالة لزمت جهازي والرسالة الي دزيتها بس خط واحد وماكو عندة ظهور مخفي ميطلع أبد
مرت ساعات هواية ورسائلي نفس الشيء خط واحد ماا اتحملت ابقىٰ انتظر يصير عنده نت دخلت علىٰ رقمة واتصلت عليه علىٰ الخط
