رواية الندم مابعد الخطيئة الفصل الثامن والعشرون بقلم رونق
انصدمنه بعمار يسحل بشهد سحل ويريد ينزلها خطيه وهي حامل ماتكدر
اني وماما صعدنه اتخبله
بدينه نسحب شهد وهو يسحب بشعرها بنت الكلب بنت الكواد بنت ال ....
نريد نفهم شي ماكو شهد بس تبجي
كوه كدرنه نخلصها من عمار دخلتها للغرفه وسديتها علينه
بقه هو يصيح ويغلط مااكدر افهم شي
اباوع لوجه شهد كله دم واحمر
شكو شنو الي صار وعمار يضربج
روان فدوه اروحلج خابري بابا خلي يجي ياخذني مراح ابقى دقيقه وحده هنا
كولي يالله تعاي فهميني السالفه بالاول وعود باجر نخبر عمو خطيه بالليل نهبطهم اذا شافج هيج شراح يصير بي
كومي بس غسلي وبدلي وتعاي فهميني السالفه
جيبيلي دشداشه من غرفتي خلي اسبح
طلعت اجيب الدشداشه وجان اسمع عمار والحيه يسولفون
تكله ليش مدزيتها لاهلها وخلصتنه منها
هو يكلها لا اذا شافوها هيج شراح يكون موقفي ولتنسين اختي عدهم واخاف عليها
اني اتخبلت كتله عمار انت متخاف الله البنيه حامل اذا متخاف عليها خاف ع الي ابطنها ابنك
جان تكول روان انت متعرفين هاي الخبيثه شسوت
انت اسكتي ولتحجين ولا حرف اني احجي وي اخويه الافضل لتدخلين بيناتنه
بس هذااخوج نفسه زوجي واني ويا ماكو فرق
عمار ساكت
عمار اشو ساكت ماتحجي
شاحجي
لويش ضربتها لشهد
روحي اساليها هي تكلج
بس اني اسالك انت مااريد اسمع من غيرك
واني اكلج روحي اساليها هي وخلي تكلج وين ودتهن
عافنه وطلع
اخذت دشداشه لشهد ورحتلها
حالتها متنوصف ابد
سبحت وطلعت
تعالي سولفيلي بالتفصيل شنو الي صار وليش عمار ضربج
شاحجي وشاكول ياروان اكبر غلطه غلطتها من وافقت ع عمار
ليش شنو الي صار
مااريد ادوخج وياي
ياادوخيني ولج احس كلبي اتكطع عليج
تعالي سولفيلي بالتفصيل
طبعا كوه كدرنه نقنع شهد اني وروان حتى تحجي بلسانها قصتها لان شخص مهم بالقصه هي وهسه راح نترك شهد تحجي
شهد : اسمي شهد عمري بكد روان وتقريبا تعرفون قصتي بس اكو شكم شغله احب اوضحها
بالنسبه لعلاقتي بعمار بالبدايه مجرد اعجاب وشويه شويه تحولت نظرات الاعجاب الى حب ومو اي حب حب حقيقي وطاهر
حبيته لعمار حب بجنون وفوك متتصورون وهو هم جان يحبني دائما جنه نتخابر ونتراسل وواحد متعلق بالثاني وكلي بس تخلصين سادس راح اخطبج وجنت اسعد وحده
جنت حيل حذره حتى اهلي ميحسون بيه لان اهلي شويه صعبين
بس للاسف مرتضى حس بيه مثل متعرفون
حاربوني اهلي وجبروني ع ابن عمي واني الصراحه مااحبه ولا اريده
جان الله يرحمه حباب حيل وبالنسبه لشكله جان حلو وشكله رجولي وجان وحيد اهله
مرتضى هواي اذاني اكثر شخص بعائلتي وضحك عليه وخلاني ادز ع روان ومجنت اعرف بنواياه ابد
بعد الي صار بروان بديت احس بالندم وكمت اكل بنفسي اكل اني السبب لو ما دازه عليها مصار الي صار
عمار قاطعته ولا فكرت بيوم راح احجي ويا
تم خطبتي لابن عمي وعقدة سيد ومحكمه واني عايشه بغير عالم ولا كانو عروسه عبالك عندي فاتحه لا جهزت مثل البنات ولا حضرت لعرسي ورفضت اسوي حنه هواي لحوا عليه بيت عمو وامي واختي بس اني بقيت مصممه ماردت لاحنه ولا زفه بس مترهم بلا زفه
اجه اليوم المشؤم بالنسبه اليه ورحت للصالون بدون روح بس جسد حتى ام الصالون لاحضت عليه الحزن وسالتني شنو مجبوره مسيطرت ع دموعي رغم المكياج وكتلها اي مجبوره
بقت تقنع بيه وتكول كلشي يهون والله وراح تتقبلينه لزوجك وراح يصير اعز من روحج وجنت اضحك بداخلي اكول مستحيل اكدر انسى عمار واتاقلم وي رسول الله يرحمه
زفوني لبيت عمو وجنت حيل خايفه وقلقه شلون راح انلمس من شخص ثاني غير عمار شعوري مينوصف
امي بقت تتوسل بيه يوم انسي وابدي حياتج من جديد وعمار صار من الماضي التفتي لزوجج ولنفسج ولتفكرين بغير شي هواي حجت بس اني فاصله عن العالم كله هدفي الوحيد هو رسول ميلمسني ابد
دخل عليه اول متقرب يمي دموعي نزلن لا اراديه
هو اتخبل خطيه كلي بس اهدئي اي شي تردي انفذه الج بس لتبجين
حاول يهدئني كوه هدئت
كلي تعالي بس نحجي ونتفاهم مراح اسويلج شي
كتله اهم شي لتتقربلي فدوه
مااتقربلج ابد بس تعالي نتفاهم
كعدت يمه
انت خايفه مني
اي خايفه
ليش خايفه
خايفه تجبرني ع شي واني مااريده ومااحبه
مراح اجبرج ابد
كومي غسلي وبدلي والله كريم
رحت للحمام بدلت وغسلت اباوع ع وجهي مينوصف ابد معبالك عروس ابد
طلعت لكيته الله يرحمه بس يشرب جكاير خطيه
عافني ودخل للحمام بعدها جابولنه العشه اني رفضت اكل لان مااشتهي ابد
بس هو اصر كلي اذا مااكلتي مراح اكل ابد
كعدت بالجذب ويا كوه كدرت اكل لكمتين
بعدها كلي شهد اني ابن عمج قبل لااكون زوجج وراح اكون الج صديق مقرب اكثر من كوني زوجج او ابن عمج اتمنى تفتحين كلبج الي وراح اتقبل كلشي تكولينه والله يشهد
ادري بيج مجبوره عليه جنت شاك بس هسه اتاكدت منج
زين اذا تدري بيه مجبوره ليش وافقت تتزوجني ليش مارفضت
ماجنت متاكد جنت شاك من رفضتي تسوين حنه ومن رفضتي تختارين الغرفه ويايه
شوف رسول ادري بيك راح تضوج مني وراح تكرهني بس لازم احجي
اني مجبوره عليك ومااكدر بسهوله اتقبلك اذا تريد اطلكني تسوي فضل عليه واذا تريد تتحملني تانيني وانطيني وقت اتقبلك
شوفي شهد مالت اطلكج هاي كطنه وطلعيها من اذنج
اني راح اصبر عليج واتانيج لمن تتقبليني اني مراح اجبرج بيوم ابد اريد من ذاتج تتقبليني
واذا اكوشخص ابالج غيري كولي خلي اتلافه المرضوع واتصرف وثقي بالله ووعد مني راح يبقى سر بيناتنه
لتفهمني غلط رسول ماكو اي شخص ابالي بس اهلي ضوجوني بطلوني من المدرسه لهذا السبب اني ضايجه
بس انطيني وقت اتاقلم وياك والله اسلمك نفسي من ذاتي
واني راح انتظر هذا اليوم ع نار
عندي بعد طلب منك
اامري انت
مااريد اروح لاهلي بعد ابد
شنو انت شتكولين شلون هيج تحجين ع اهلج
مراح اعتبرهم اهلي لان هيج سووا بيه
هيج مطيقيني ولااطيقين الزواج بيه وقاطعتي اهلج ع مود هذا الشي
لا متوهم مو هذا السبب
اهلي جبروني اترك دراستي وجبروني عالزواج يعني شصايرلومتانيني اكمل دراستي ومبعد شي للامتحانات
اني ارجعج السنه التجي ولايهمج الله كريم
واعدني مراح تتقربلي لمن اتعود عليك
وعد مني ماالمسج ابد اله برضاتج امني
نمنه وثاني يوم اتظاهرت اني سعيده بس داخلي ينزف دم وبالي يم عمار هاطلع هابعد يعذبونه ها مرتضى متنازل
لمن صار وقت الكعده وفرحت لان عرفت عمار طلع
اجه رسول من الكعده كال اكلج مرتضى شعنده وي هذا الولد
مااعرف اي شي عنهم
اي صدكتج اذا ماطلع اكو سالفه وجبيره بينهم وكلبي حاس انت الج دخل بيهم
لااني شعليه بيهم روح لمرتضى واساله
لازم انتبه لتصرفاتي ولكلامي ميجوز رسول يعرف الي صار
شكد حاول وياي اتقبله بس اني ارفض لحد ماالتحق لسوريا
اجت امي وايات وبقن يحجن عليه ويقنعني
حرام هذا الي تسوينه ميصير تمنعين رجلج واكيد هسه عباله انت موبنيه
عوفني بحالي ماعليجن بيه
هواي حجن بس مااهتميت
بقه رسول يخابرني ويراسلني واني ساعه اتجاوب وياه وساعه لا
طلب مني بس يرجع يتامل يلكيني موافقه عليه
مكاعد اكدراتقبل يتقربلي لو يلمسني ابد
رجع باجازه واني نفس حالتي مااكدر اتقبله حسيت بي ضاج وعصب
حاول يستفزني وكلي انتي مو بنيه وتخافين اكتشفج حيل عصبت بوقتها وحبيت اثبتله العكس سلمته نفسي وحسيت بنهايتي قربت لمن اخذني وامتلكني
طبعا اعتذر مني وكال اقسم بزينب مشاك بيج واحد بالميه بس حجيت هيج حتى اكدر اخذج لان تعبت منج مكاعد تتقبليني
هو حس بيه مااتقبله وضاج وكام يهملني واكثر المرات ياخذ الي يريده وينام اجتي فتره لااني اطيقه ولا هو يطيقني بس استمرينه بحياتنه لان صارت روح ابطني واتغيرت حياتي تقريبا بديت اتاقلم وي وضعي وكلت لازم انسى الماضي لاجل الطفل خطيه مااله ذنب ابد
اهلي قاطعتهم نهائي بس ماما وهم علاقتي مو هاكد وياها هواي حاولوا بابا وعمو وحتى رسول بس اني رفضت
اتزوج مرتضى حماتي واني ولا مره حضرت لا بالعقد ولا بالحنه ولا حتى بالزواج لان كارهته لمرتضى بدت علاقتي برسول شبه طبيعيه بس هم مو دائما
اكثر المرات من يتقربلي اضوج ومااعرف السبب مكاعد اتقبله ابد بس كاعد احاول لخاطر ابني
طبعا الكل فرحان بحملي وهو اكثر واحد احسه طاير ومساعته الفرحه ابد كلت هم خطيه نظلم ويايه
اجه موعد ولادتي وجنت شايله هم مااريد اروح لاهلي ابد بس مقبلت ماما ابد فعلا ولدت ورحت لاهلي بس محجيت لا وي بابا ولا وي مرتضى جبت ولد وجان يخبل وحيل فرحنه بي اني ورسول
رسول طلب اجازه بس موفقوا بوكتها رفضوا وحيل ضاج خطيه
دائما يخابرني ويطلب مني صوره لابنه خطيه حيل فرحان بابنه
طبعا نزل اخر اجازه وجان شعوري غريب مااكدر اوصفه ابد اول مره اتفاعل وياه وجان حيل فرحان حسيت بنفسي انسانه ثانيه وياه مو نفسي شهد ابد يمكن كلبي حس هاي اخر اجازه اله
عشنه احلى ايام بعمرنه وجانن 7 ايام كوه التحق كال لو يطيح بيدي مجان تركتكم ابد لان ممصدك شهد ذايبه بين اديه حسيت بذنب اتجاها وكلت لازم اترك كلشي ورايه والتفتت اله ولابني راح انسى الماضي وانسى كلشي
راح التحق واخذ روحي ويا احس باحساس غريب مااعرف شنو
بده ابني يتخريط ويصير ازرك اخذته للدكتور وجانت الصدمه بانتظاري وهي بي فتحه بالقلب انجنيت واتخبلت مااتحمل ابني يصير بي شي ابد
اكيد الله عاباني بي بسبب معاملتي لابوه والله نذر عليه بس يطيب ارجع كلشي لوضعه اتقبله واحبه وانسى الماضي وانسى كلش
بس هيهات يصير هذا الشي
مرتضى وابويه طلبوا مني ياخذوني لدكتور بالنجف واني رفضت مااريد اي شي منهم
رسول حيل اتعطل ومااعرف لويش مو دائما نحصله ونخابره
اليوم جنت ضايجه حيل وكلبي مقبوض واحس الدنيا طالعه من عيني
ع فجأه يدك جهازي وجان رسول حيل فرحت وطفرت جني مخبله بسرعه جاوبته احس بنفسي مشتاقتله هواي
بس انصدمت بي من يحجي وهوبانفاسه الاخيره
الوووو شهد اسمعيني ولتقاطعيني ابد
اسف لان من ورايه انجبرتي ع الزواج واني ادري بيج مجبوره وسكتت لان جنت اناني واحبج ومتمنيتج تصيرين لغيري
ادري بيج تحبين الولد الي اتعارك وي مرتضى اني موغبي ومااعرف
الي اريده منج تبريني الذمه ومن اموت ديري بالج ع ابني امانه يمج لتاذي ولا تضربي واتزوجي بعدي انتي محلله وموهبه عن نفسي باريج الذمه بوسيلي ابني بوسيلي امي واطلبي منها السماح خل يسامحوني كلهم امي وابوي واخواتي
مااكدر احجي وي امي مااتحمل
اني هنا صرخت عبالي يشاقه ويايه
فدوه رسول انت شكاعد تحجي فدوه ارجعلي والنبي مشتاقتلك والنبي ابنك بامس الحاجه الك
بعد ميفيد هذا الحجي اني هذا حد يومي وانتهى كلشي
لا رسول لتكول هيج انت راح اطيب وتعيش وتربي ابنك ع ايدك
اشهد ان لا اله الا الله
كمت اصيح بعلو صوتي لا رسول فدوه لتموت ارجع خل اعوضك كلشي فات
اشهد ان محمد رسول الله
لك رسول فدوه لتتركني بوحدي محتاجتك اني وابنك رسول فدوه كول هذا مقلب الله يخليك
بهالاثناء اجه عمو وعمه ع صوتي
اشهد ان علي ولي الله
سمعته شخر شخرة الموت كمت اصيح لا رسول لتموت اهله يردون يفتهمون شي ماكو
اخذه صديقه وجان يبجي
البقيه بحياتكم الله يصبركم
اني هنا مبقى عقل براسي
شمرت الجهاز وكمت املخ بشعري كوه لزموني عمو وخاله مكاعد يفتهمون شي
احجي عموشكو شصاير ليش هيج تسووين بروحج
عمو رسول استشهد
هنا عمو رجع لوره وخاله فقدت
اكيد فاهمه الموضوع غلط
لا والله عمو مات وهو يحجي وياي
كال مااكدراحجي وي امي مااتحمل ولا هي راح تتحمل
هنا البيت انكلب بالصايح عمه والبنات
كام يصيح عمو صلو ع محمد اكيد اكو غلط خل اخابر واتاكد
فعلا خابر وجان يكعد بنصه وكام يبجي ويانه خطيه اكثر شخص متاثر هو اكثر من عمه ومني همين
الصراحه جانت اصعب ايام مرت بحياتي هنه ايام الفاتحه ادمرت ع الاخير والي زادها عليه ابني زادت حالته من سوء لاسوء
خلصت الفاتحه ورجعت لاهلي مدمره ع الاخر لزمت عده بس ابني مكاعد يصير زين اضطرادخل بي مستشفى بس مبوشه ومااسمع صوتي لاي بشر
خلصت العده واخذنا للنجف وجان يكول مااكدر اسويله العمليه اله لمن يكبر
مانكدر نعوفه هيج يموت الف موته باليوم
بعدين قرروا نسافر للهند نسويله عمليه
رحنه اني وبابا اخذنا وبعد الاجراءات والفحوصات سويناله العمليه ونجت وحيل فرحنه وبقينه لمن استقرت حالته واتاكدوا منه يله رجعنه
وجنت حيل فرحانه وحتى عمو وعمه يوميه يجون يكولون من نشوفه كانو شايفين ابو خطيه حيل ضايجه عليهم
بقينه اسبوع بعد رجوعنه وجان يتخربط علينه دخلت بي مستشفى وجانت الصدمه الثانيه بانتظاري وجان يموت بين اديه مااكدر اوصف شعوري بعد التعب والضيم اخسره لابني
هنا نفسيتي ادمرت ع الاخير اتحطمت تحطيم
كرهت كل شي بالدنيا ع فجأه خسرت كل شي خسرت رجلي وخسرت ابني وخسرت حبيبي
انطويت ع نفسي وتركت الكلام واكلي قليل
امي حاولت اطلعني من جو الكابه بس فشلت ماكدرت بعدها اتوفت مريم زوجة مرتضى وهاي جانت صدمه بالنسبه النه
دزوني يم الطفل وفرحت حسيت الله عوضني بابني وقررت اني اربي بس مدامتلي الفرحه ومات حيل اتاثرت بي وحسيت ابني كانو هستوه توفى
طبعا عرفت الي صار بينه اني ومرتضى رغم ماهو قضاءوقدر ومكتوب علينه بس بسبب روان اكيد لان هواي انظلمت من مرتضى وهم بسبب رسول الله يرحمه لان شلعت كلبه ومتقبلته بسهوله
من رحت لايران حسيت نفسيتي اتغيرت هواي وحاولت ارجع لحياتي
كدرت اتغلب ع حزني وقررت احاول انسى ولازم ارجع لدراستي حتى التهي بيها
فعلا رجعت للدراسه واتحسنت علاقتي باهلي ومرتضى
كلشي كدرت انساه اله صديقتي روان ابد مانسيتها واتمنيت ترجع علاقتي بيها بس هذا حلم بالنسبه الي
مرتضى حس بغلطه واتندم بس بعد فوات الاوان
بمرور الايام مرتضى رجع علاقتي بروان بس مو مثل الاول بس شويه شويه رجعت علاقتنه مثل الاول واكثر
حيل فرحت ورحنه خطبناها بس هذا عمار خبيث ابد موافق
هواي جرحني بكلام ودزلي رسائل حيل ضجت رغم كلشي كلت مستعده اتحمل اي شي مقابل سعادة روان ومرتضى
جان يباوعلي بنظرات استحقار وجان حيل يضوجني
اني مجان الي رد ع تصرفاته
خلصت السادس وانقبلت جامعه وداومت
اكو زميل الي ذبح نفسه عليه بس اني جنت ارفض الزواج جربت مره وجانت تجربتي فاشله وخلص مراح اكرر هذا الشي
رفضته رفض نهائي
كام عمار يتردد للجامعه وجان يباوعلي باستهزاء مكدرت افسرنظراته الي
مره جنت كاعده بوحدي منتظره روان وديما وجان يجيني ولد مااعرفه من ياقسم سلم عليه اني رديت السلام اشو هذا راد يكعد
اني باللحظه كمت ردت اروح جان يسحبني من ايدي اني نشفت بدمي
كتله منو سمحلك تلمسني بعدني ممكمله وجان اشوف عمار فوك راسي كام يخزر بيه وجان يسحل الولد من ياخته
التفت عليه لحضه وحده والكيج مختفيه من كدامي
اني حيل خفت معرفت شنو الي صار ولا اتجرات احجي كدام البنات
لليل اجتني رسائل من رقم غريب
انت شنو من طينه طينتج شلون تسمحين لشخص غريب يلمسج لو عادي صار هذا الشي عندج
منو انت وشنو هذا الحجي
يعني اصدك معرفتيني ولو حقج متعرفيني
بدون لف ودوران منوانت لا احضرك
عادي احضريني لان ميشرفني احجي وي وحده ساقطه مثلج
اني هنا فقدت اعصابي
ماكو ساقط غيرك انت ياحثاله
باللحظه انطيته حضر طبعا عرفته عمار وحيل ضجت منه ومن نفسي همين
شكد جنت احبه عمار هسه احقد عليه واكرها لان كاعد يفرق بين مرتضى وروان المفروض ميسوي مثل مرتضى من فرقنه المفروض يكول خطيه مااعيشهم نفس المعاناة
حيل ضايجه ع مرتضى وابويه خطيه هواي ذلوا نفسهم لعمار وهومعند
اخرشي اتعاركوا من جديد عمار ومرتضى وجان مرتضى يموت بيده لو ما الله التفت اله
اني هنا قررت احجي ويا وشيريد يصير خلي يصير
اتصلت بي مرتين يله جاوب
الووو
الووووو
شلونك عمار
هلو عيوني انت شلونج
تمام الحمد لله وانت
الحمد لله بس ممكن اعرف منو حضرتج
معقوله نسيت صوتي
والله الصراحه مااتذكر صوتج ابد
اني شهد
شهد منو
معقوله نسيت شهد
شتردين شعندج متصله
عمار حابه احجي وياك بس رجائي الوحيد تسمعني للاخير
احجي اسمع
عمار ليش معارض ع مرتضى
غيري السيره لا اطبكه
لا مااغيرها لازم تسمعني للاخر
انت شلون تكدر تخلي اختك تعيش نفس العذاب الي مرينه بي اني وياك
شكد تعذبنه شكد نشلع كلبنه
انت شكو عليج اتزوجتي ونسيتي عمار بكل سهوله
مااريد احجي بهذا الخصوص ابد
ليش يابه متحبين
لان اني خابرتك مو حتى احجي بهذا الخصوص
لعد عليمن خابرتي
ع مود روان ومرتضى
لتجيبين طاري هذا العار كدامي
بس لتنسى هذا العار هو نفسه اخويه
طز بيج وباخوج
طبكه بوجهي حتى منطاني مجال احجي
اتندمت لان اتصلت بي
ثاني يوم اجاني اشعار ع الفايبر
هلووو
طلع عمار وجان مخلي صورة ابنه
مجاوبته ولا الي نيه اجاوبه
دزلي ليش متجاوب ياحلوووو
جاوبي ولج عندي شغله وياج مهمه
ع راحتج بس انت الخسرانه
جاوبته
شتريد خيرك
انت متعرفين الاصول تكول سلمي بالبدايه يله تحجين
عمار ادخل بالموضوع كبل
هيج صار الحجي شهد
اكو شي لو اروح اقره
روحي ع راحتج بطلت مااحجي عبالي اسوي بيج خير واحجيلج بس طلعتي مطيه متستاهلين
عمار ماكو داعي لهذا الكلام عيب هيج تحجي غير اسلوبك ويايه
اسف حبيبتي اعتذر منج يعمري سامحيني يروحي بليز
هيج تحبين احجي وياج مثلا
اني استاذن منك راح اسد الشبكه واروح انام
منطيته مجال يجاوبني فعلا سديتها الشبكه حيل ضوجني
قريت ونمت كعدت ثاني يوم داومت ومن رجعت فتحت الشبكه جان تجيني الاشعارات
بسيطه شهد تسدينه بوجهي الله كريم
عبالي اوافق ع زواج روان واخوج العار بس مو لازم
حيل اتندمت لان هيج سويت هسه لو سامعته الغسل اليه بقيت اكل بنفسي
بقيت حايره اخابره لا اخابره لا بقيت لليل اخر شي قررت اتنازل واخابره
دكيت بعده مداك فصلته كلت اخاف اخابر ويطلع وي زوجته
خلي اراسله احسن
راسا اجاني اشعار قبل لاارسل شي فتحته
ها ام فليس ترمشين تخافين ع الشبكه لتخافين ميصرف هو مجاني
دزيتله مساء الخير
هله والله واخيرا سلمتي منج من ابليس
اني مرمشت قطعت الاتصال كلت اخاف نايم لو زوجتك يمك واخاف ازعجك
من هاي الناحيه معاج حق حيل ازعجتيني
اسفه ع الازعاج اترخص
وين ترحين تعالي
روح اخذ راحتك
هي وين الراحه حتى ارتاح
سكتت
ع شنو خابرتي
خابرتك ع مود اطلب منك توافق ع زواج روان واخويه
بهاي البساطه وانسى الي سواه اخوج العار
زين خلي نفرض اريد انسى شنو الي انساه باعتقادج
انسى من جبروج ع ابن عمج لو انسى من سجني ومقبل يتنازل لو انسى ذل اهلي وهمه يتوسلون بيكم لو انسى ال100 مليون
فدوه اروحلك انسى كلشي لخاطر سعادة اختك
ومنو كلج سعادة اختي بالزواج من العاراخوج
والله راح يعيشها ملكه
شنو الضمان
اني الضمان
ههههههههههههههههههههههههاي ضحكتيني والله
شنو الي يضحك بالموضوع
حجيج كله يضحك شلون يعني تضمنين
مدام حجي كله يضحك اني اترخص منك
تعالي خبله لا ترحين
مجاوبته
هاي وينج زعلتي تعالي خل نحجي
اذا حجيي كله يضحك ع ويش تريد تحجي وياي
حتى اذا حجيج يضحك ارتاح من احجي وياج
سكتت مااعرف شاجاوبه
ليش ساكته احجي
شاحجي
اي شي احجي
ماعندي اي حجي
بس اني عندي حجي وهواي كمان
مثل شنو احجي واني اسمع
بس مااريد بس تسمعين اريد تشاركيني بالحجي وتنطيني رايج
احجي وخل اشوف
راح اتصل ارفعي خط
اوك
اتصل ورفعت خط
والله مشتاق لصوتج موت يبذات
شلون انطاج كلبج وخليتي غيري يبمسج يعني متعرفين وقعتي ع موتي من قبلتي يلمسج
اني معرفت شاحجي سكتت وهو خلي يفسر سكوتي ع راحته
اشو ساكته
شوفي شهد اول شي اني راح اوافق ع زواج اخوج من روان بس بشروط اذا توافقين عليهن اني اوافق واذا متوافقين اني ارفض
بس الجواب مو هسه تنطينيا ابد الج مهله يومين تفكرين بعدها اريد قرار نهائي
شنو شروطك
شروطي هي اول شي اخطبج ولازم توافقين عليه واهم من كلشي اريدج اتركين دراستج مااريدج تكملين ابد والاهم من كلشي اذا وافقتي ع الزواج لو شيصير بيناتنه ميطلع خارج الغرفه ابد ومااريد تفكرين ولو تفكير تباتين يم اهلج ومااريد مشاكل ابد بينج وبين اسيل ابد اذا رجعتها ومااريد اسمع وديني لاهلي اذا صارت مشكله بيناتنه ابد تزعلين عادي ازعلي بغرفتج
الصراحه اتفاجأت وجنت مصدومه بحيث ماكدرت انطق ولا حرف سكتت احس عقلي اتبنج ووكف عن التفكير مكدرت اعرف شنو غايته من هذا الكلام
احجي اشو سكتي
انت فاجئتني الصراحه
اتوقعتج تكونين فرحانه بهذا الكلام
مااكدر احجي ولا كلمه هسه عمار
روحي الج مهله يومين وبعدها انطيني ردج النهائي واعتبري ردج راح يكون حاسم بالنسبه لروان واخوج
نهينه المكالمه وبقيت افكر بكل كلمه وكل حرف لمن تعبت من التفكير
اخرشي قررت اوافق واتحمل العواقب كلها حتى اذا تركت الجامعه مو مهم اهم شي روان ومرتضى يتزوجون صحيح اكو خوف بداخلي من طريقة كلام عمار بس مجبوره اضحي لخاطر روان حتى تنستر وارتاح ع الاقل اكدر اريح ضميري من ناحيتها لان تانيب الضمير دمرني دمار
رجعت موافقتي اله بس ماكدرت اترك السنه لان ع وشك تنتهي وكوه قنعته وفعلا تمت خطبتنه بس ماكو فرح بداخلي ابد احس بخوف موطبيعي من المستقبل
بيوم العقد لبست فستان بسيط وخليت ميك اب خفيف الكل كام يحجي عليه بس اني مهتميت احس بذنب اتجاه بيت عمو وحيل اخجل منهم
اجه عمار ولبسني الذهب وهمس باذني بس مجنت مركزه ابد شحجه وشكال بالي يم مرة عمو الي دمعتها بطرف عينها واضح عليها الحزن حسيت بذنب جبير والله حتى فرحتي راحت
لليل اتصل بيه
هلو شهوده
هلو عمار
شلونج شخبارج
تمام الحمد لله وانت
اني موزين ابد
ليش خيرك
احسج مفرحانه بزواجنه ابد واحسج بعيده عني ولا يمي ابد
متوهم اصلا يتهيالك اصلا فرحانه
لا والله ابد ممتوهم واي فرحه مشفت منج واليوم ضوجتيني احجي وياج وانت احسج بعالم ثاني
جنت خجلانه لان هذا زواجنه الثاني
واذا زواجنه الثاني يعني مومن حقنه نفرح ونعيش حياتنا
احنه لازم نعوض الايام الفاتت بعمرنه لازم نعيش ايامنه مثل منريد احنه ومعلينه لا بالناس ولا بغيرهم
بديت اجهز اني وروان وهواي اشياء من عمار جان يعارض اطلع للسوك وكوه يخليني بالتواسيل
اتحدد موعد الزواج وقررنه نروح لتركيا نبقى شهر طبعا رفضت اسوي حنه ولا زفه هيج اتزوجنه سافرنه لتركيا وصلنه وجنه تعبانين اشو بعدنه هستونه دخلنه وجان اتفاجئ بشي مجان ع البال ابد ......
