رواية ذاري النجوم الفصل التاسع العشرون 29 بقلم زهراء السراي

الثقة تُبنى في سنوات

وتُهدم في ثوانٍ

وتتطلب عُمراً كاملاً لتُرمّم

:

:

:

:

:

:

:

:

ليل

✥━━━༺✦༻━━━✥

هذه الروح تشتاق اليك

هده الروح لك تشتاق

ومضيت وكأنما أعجبك الفراق

وتركت الذي كان بيننا

للنار والاحتراق 

نزلت مقطع الڤيديو بستوري

مخصصة بس

اله وتركته ورحت سويتلي

وجبة اكلها اليوم السابع على

سفرته ويا نوح اسبوعين مرو

بعد اللي عرفته عن حالة نوح

بس نهائياً مسألته

لأن هو ميريد احد يعرف غير

هاجس كل اللي بالبيت يعرفون

ان هاجس ونوح راحو ويا مصعب

علمود عملية تخصه كنوع من التمويه

حتى يُمنى اللي اخذت زيوني وراحت

لبيت أهلها علما يرجع نوح

الكل عادي عنده الا اني لأن أعرف

خايفة هم على نوح وعلى هاجس

اللي طول الأسبوعين متوتر وخايف

واتصالاته بنوح واجتماعاتهم خوفتني 

مدام مگالو لوطن معناها شي يخوف

قبل ليروح بيومين تسوگ مسواگ كامل

من طلعنا اني ويا خضروات ولحوم

خاف احتاج شي يمشي يگعد يگوم

باله سارح

-والله احساسي يگول ماكو شي ليش هالگد

خايف

-اخوي ليل مو هين عليه

-ليش ميگل ليُمنى عالأقل تدعمه

وتوگف ويا

-يخاف عليها يدري بيها ماتتحمل

رجعني بيومها للبيت وطلع ويا

نوح مارجعو الا بالليل ثاني يوم

طلعني 

-ليش تتعب نفسك ياعيوني

-أريدچ تتونسين ومتضوجين

-وجودك كافي

بقينة نفتر لحد نص الليل

رجعنا للبيت الصبح طلعو

اثنينهم ودعتهم واني طلعت لدوامي

اول يوم اتصل بيه العصر وگضوها

راحة

ثاني يوم مااتصل اتصل ميرد للمغرب

يلا جاوبني

-ها حبيبي

-اعذريني حبيبتي شويه فرة وروحة

ورجعة ماالحگ

-نوح شلونه راسلته وماكو

-هذا يمي تحاچي

-اي

-ها دكتورة

-دكتورنا البطل شلونها المعنويات

-منخفضة

-صدگ تحچي نوح هووونها وتهون

-ليل ولو خاف تزعلين ابد لتحچين حتى

لغيد

-صدگ تحچي نوح غير وصيتني

شلون احچي

ودعته وراح وبقيت اني وهاجس ساعة

عالخط

وامتدت بعدها الأيام كل يوم

نتراسل لأن مشغول ومن عيادة

لمختبر لمستشفى

منلحگ نحچي لليوم السابع گال

راح يسوي الخزعة الصبح

طمني علي العصر واختفى مشغول

وياه هو ومصعب

لليل نزلت الستوري مخصص اله

بين ماتعشيت اجاني أتصاله

فتحت خط واضح چان نايم من صوتة

-الووو

-السلام عليكم ممكن نتحرش

-ههههههههههه اشتاقيتلك هاجس

-واني محترگ نار

-هووووف اطفى

-حقيرة

-شلونه نوح

-نايم واني ومصعب استغلينا الفرصة

نمنا

-تريد اجيكم

-لا حبيبتي اني ومصعب قايمين

بواجبه مااريد احد يحس بشي

-اووووف

-كل هالحسرة عليه

-اييي

-تبچين ليل والله ارجع هسه

-لا والله بس مدري شبيه يمكن هرموناتي

ضاربة

-بس ارجع اطيح حظچ وابوگلي منچ بوسة

-وليش تبوگ بينما تگدر تاخذها بالتراضي

ضحك ورد بخبث

-كل شي بالتراضي حلو الا البوسة حلاتها

مغافل وبوگ

-تروح ترتاح وتنام

-لا ابقي وياي ضايج احچيلي شسويتي

ماسويتي

-يوم خفارة من رحت سويتلي عركة بي

ورجعت منتصرة

_ليش

-هااااجس خبلوني عمة وعمة گلتلهم

احنة هنا اطباء وممرضين تعاملنا مهني

عمة شنو اتخبل من هالظاهرة اللي اكتسحت

المستشفيات والعيادات

-ههههههههههه وشگالو

-احنه تعودنا گلتلهم تعودو ويه غيري اني

اكره هالفقرة ومااحبها اني مو عمة أحد اسمي

دكتورة ليل حتى لو تضطرون گولو ليل بس بدون عمة ارررريد اللي اخترع هالشغلة اشوفه واسأله شچان يحس

-ليش ماتداومين كلية عسكرية

-وأنافسك بالميدان

-طبابة عسكرية حبيبتي وتجين تقيسيلي

النبض اوووووويلي

-همجي ماعندك مواهب غير الهمجية

-عندي مواهب بس المشكلة كلها قلة أدب

-ذئب مفترس

-دزيلي صورة

-متستحي

-انچبي صورة كتف رجل

شي منا منا

-ايييييي مو اني ذبيحة وادزلك صوري تفصيخ

-ااااااخ يابه نعم انا مشتاق وبي لوعةٌ

-ارجع

- والله ارجع بس خل اطمأن علي

وهو يحچي ارتفع صوت مصعب

-يلا تحرك لك

-يلا حبيبتي مصعب گعد نوح نمشي

شويه

ودعني وراح واني افتر بالبيت مدري

شبيه ماكو ساعة ودگ تلفونيي وطن يتصل

-الو عرااااق

-الحگييييييييييي ليل تعااااااي

لغرفتنا

يحچي وصوت بچي غيد بالخلفية

لبست وطلعت راكضة لگيت الباب مسدود

دگيته ودخلت مصدومة الگاع كلها مي

وغيد متمددة تبچي

-لييييييل لحگيها مدري شنووووو هذا وگع

ومتقبل تتحرك اخذها للمستشفى

-غيييد حبيبتي البسچ نرووووح عندچ ولادة

بچت

-لييييييل احس فد شييييييي حبابة خل يطلع وطن

مااااااعرف شبيييييه

طلعت وطن ورفعت ملابسها انصدمت براس

الطفلة متوجه ومقبل عالخروج

-اااااااااااخ ليل حبابة شلوووووون

عاطت والراس اندفع زيادة

واني انشدهت وركضتله

-وطن اركض للجنطة مال نوح بغرفته جيبها

وخلي خالة تجي هسسسسه

شويه جاب الجنطة ومرت ابو دخلت

مصدومة المشهد صار بلمح البصر والارتباك سيد الموقف

بس غريزة المساعدة خلتني أتحرك مثل الساعة

لازم انتبه لغيد وأطمنها لأن خوفها هو اللي يعطل الولادة

عاطت غيد عيطة هزت البيت

واني افتح بالجنطة بسرعة

عيوني تدور على اشياء معينة

طلعت كفوف لبستهم بسرعة واني أگول

لمرت عمو كمال

-خالة لزمي إيدها 

غيد حبيبتي لتكتمين النفس

ادفعي وي الطلوگة مو عكسها

صحت بيها واني مادة ايدي

للطفلة اللي بدأ راسها يظهر أكثر

-غيد النفس شهيق عميق وزفير

هسه تطلع قرررررربت

بدت التقلصات تزيد وغيد وجهها صار أحمر وعيونها غوربت

لزمت راس الطفلة بحذر جان الملمس ناعم ومبلل  من السائل الأمينوسي

- يلا غيد دفعي ويه النفس يلا

بدت تدفع وتبچي وصوتها من العياط اختفى

طلع كتف الطفلة واني صحت بيها لأن بردت عن الدفع

- دفعة أخيرة قوية عفية بالبطلة

ويه الصرخة الأخيرة انزلق جسم الطفلة المغطى

بالمادة الشمعية البيضة بين إيديه

چانت دافية بشكل يرجف الگلب رفعتها واني أرجف گلبتها على بطنها وعيوني تدور على المگص المعقم  والملاقط 

ثبتت الملاقط على الحبل السري تركت مسافة أربع أصابع وبأيد ترجف 

گصيت الحبل السري بوسطهم

صوت صرختها شگ سكون الغرفة

صرخة تعلن عن وجودها بهالحياة

غيد چانت تلهث ودموعها تنزل بس عينها مترمش وهي تباوع للكتلة الصغيرة اللي بين إيديه

- ليل طمنيني هي زينة 

لفيتها بالخاولي النظيف بسرعة حتى أحافظ على حرارتها وقربتها من صدر غيد

- مثل الوردة شوفيها هادئة وقوية مثلچ

بس المهمة منتهت لازم أنتظر المشيمة تطلع

بديت أدلك بطن غيد بحركات دائرية خفيفة حتى أساعد الرحم يتقلص ويطرد المشيمة وما يصير عندها نزف

طلعت المشيمة وبديت ارتب وضعها وانظفها

خلص كل شي بعد ساعة ونص لميت كل شي

بكيس نفايات ورحت بستها

-الحمد لله عالسلامة يابطلة

وگعت دموعها وهي تهمس

-شفت ماما واگفة يمچ

-ياحبيبتي اكيد تدعيلچ بتسهيل الأمر

لميتها وغطيتها وعقمت الغرفة ودخل وطن

ويا خالة بيدها صينية بيها حليب حار

وعسل

-خالة بعد متشرب خليها ترضعها الصمغة هذا هو اللي يخلي الرحم يرجع لمكانه ويحمي الطفلة من الأمراض

باوعت لغيد قبل لا اطلع 

-حبيبتي لازم ترتاحين بين ميجيب

وطن العلاجات اللي وصيته عليها ارجعلچ تمام

هزت راسها چانت تعبانة بس ملامحها نورت بضحكة مكسورة وهي تلمس أصابع بنتها الصغيرة

طلعت واني مصدومة من اللي سويته

بس فخورة اني گدرت اسوي واجبي

رغم الامكانيات الضعيفة داخل البيت

ساعة ورجعتلها ابرة توقف النزف محلول

متعادل لسكرها وضغطها

ابرة فيتامين k للطفلة وأخيراً

الأثنين غطو بنوم عميق وطلعت تاركتهم

ووطن ويايه مقلل اضاءة الغرفة

جدو وعمو كمال تطمنو عليها

گعدنا يمهم بالهول جدو مبتسم

-سبعة جدي

-تسلم جدو

-عاشت ايدج عمو ماقصرتي

-اختي غيد وخالة انت ماقصرتي وگفتي

وياها وگفة ام

-تستاهل غيد خوش بنية صوتها مينسمع

استأذنت ووطن ويايه وكفنا بباب الترك

-شصاااار وطن

-والله مااعرف تگول بطني تاذيني

وكل شويه داخلة الحمام طلعت بس تلوب

وهاي گدامچ صار اللي صار

-الحمد لله على سلامتهم ويارب تتربى بعزك

ودلالك باچر عندي دوام تعال نكمل اجراءات

البيان الولادي

-ماقصرتي ظلام وتعبتچ اني وعائلتي الصغيرة

-تتدللون كلكم بس بششر راح تسموها

ليل مووووو

-شبينا تخبلنا نسميها ظلام

-هااااااااا قلبت عليييه

-غيد تريدها ليان

-ليااااان يجنن الأسم

-شكراااااا ليل ومااعرف شلون ارد

معروفچ

-صمملي دريسنگ روم والغيلي الممر اللي

يودي على الترك وندخللكم

من الممر الداخلي

-يابه تتددليين بس اشري وشوكت متحبين

انفذ

-اريدك للصعبات ابو ليان

ابتسم عالاسم وتركني راجع لعائلته

رجعت واتصلت بهاجس ثواني ورد

-ها حب

-وطن صار بابا

-الله عليچ

-والله هسه ولدت غيد

-يااااااابة بطلتي شلوووون گدرتي

-سبحان الله مكتوب لهالطفلة تنولد بالبيت

الحمد لله ربنا سهل

نوح شخباره

-الحمد لله جاي يحچي ويه زوجته

-شتتوقع يمتى ترجعون

-گالوله أرتاح عالاقل ثلث أيام

هو يگول تطلع النتيجة واطمأن يلا

تقريباً عشر ايام

-خييير أن شاء الله ترجعون بالسلامة

يارب يلا حبيبي روح ارتاح اني

راح انام ورايه دوام

نمت بتعب بس تعب حلووو بعد مانورت

الدنيا ليان على ايدي

الصبح اطمأنيت على غيد وطلعت للدوام

اجاني وطن كمل الاجراءات وطلع للبيت

لأن اخوات غيد جاياتهم راح ياخذونها

وياهم يديرون بالهم عليها كم يوم 

اتصلت بيها الظهر چانو اخواتها جايين

يتغدون ودعتها وراحت

واني استمريت بشغلي

بين هدوء الممرات وضجيج الاجهزة

بين ثانية والاخرى

چانت ليلة خفارة طويلة 

واخيرا اجتني فرصة أستراحة

نزعت اللاب كوت وكأني انزع

عن اكتافي أعباء هاليوم

فتحت الشال وتحررت من حجابي

حتى اتنفس براحة تمددت على السرير

غمضت عيوني ادور على غفوة قصيرة

بس وميض شاشة تلفوني وصوت الرسالة

بددت الهدوء اللي يلف الغرفة وبعز اشتياقي الة

وصلتني الكلمات مثل مطر مفاجئ

نص الرسالة نبضلة گلبي وخفق بسرعة

-أأموت مغترباً وصدرك داري

بعدها انفاسي ماهدأت من اول رسالة

تبعتها الثانية بجملة هزت ثبات گلبي

-مشتاقلچ حيييييل

ماانطيت للهفتي اله فرصة أتصلت بي

فتح الكاميرا فوراً التقت عيوني بعيونه

وحطت نظراتي على وجهه اللي يسطع بضوه الغرفة خافت وسط الظلام

تماما مثل مايسطع حضوره بزوووايا روحي

المشتاقة

دقايق محتاجينه نعبر بيها بالكلام

عيني بعيني وايده امتدت تلمس الشاشة

ذب نفس مرتاح وابتسم هدوء الغرفة

ويا الراحة بملامحه كونن دفو يلف روووحي

-ارجع هاجس

-تحبيني القرچ

-مااريد ارجع للبيت لأن انت مموجود

-ومن ارجع تتخالف دواماتنا

-مجرد وجودك بنفس المكان الاني

بي حتى لو منلتقي يحسسني بالراحة

-منين اجيتي لگلبي

طرح السؤال مبتسم وكأنه يعرف

الأجابة اللي اگولها اله كل مرة

رد قبل لاارد

- هندسة إلهية غلقت كل الأبواب

بوجهي حتى أركض للباب الوحيد المفتوح

ابتسمت واني اشوفه حافظ حتى كلماتي

كملت وهو عينه مني

-اكتشفت بعدها ان هذا مو مجرد باب يقودني

لمكان محدد الباب چان يقودني لوطن

تأخرت بالوصول اله لأن چنت مشغولة

بطرق ابواب خاطئة

-وبهذا كلامچ الفاهي خليتيني اهواچ

-مرغم حبيتني

-لا مغرم مو مرغم

-هاجس اني خايفة

-من شنو حبيبتي ليش الخوف

-تأخر الحمل خلاني بشك

-من أرجع نروح للدكتورة وشوفي

-اليوم فحصت وگالت كل شي طبيعي

-اتركيها تجي بوقتها لا تبقين تفكرييين

يلا حبيبتي

نامي شويه اني طافي ورانه باچر

فرة خاف اتأخر عليچ بالاتصال

-ان شاء الله حبيبي اگلك راح اروح

لأهلي من الدوام اطلعلهم

-روحي ارتاحي

-تصبح على خير

شمرلي بوسة واختفى واني نمت

الطابق هدوء الحمد لله للصبح كملت

شغلي وطلعت لأهلي بلا كلام نمت

صحيت بعدها بوقت على صوت ضرغام

-وووووينها التافهة بعدها نايمة

-الگاااااطع

سمع صوتي ودخل للغرفة شمر عليه علبة

الكلينكس

-گعدي ثولة

-مشتاقتلك والله

گعدت سلمت علي وطلعنا للمطبخ

يم ماما اللي اتصلت بفارس فاتحة

الكاميرا

-يمتى أشوفكم مجتمعين ياماما

-بأذن الله يوم شنسوي الحياة تتطلب المجازفة

عله صوت بيبي وهي داخلة للمطبخ

-هذا فريس ولك بيبي گطعت من عرس اختك

لهسه

-بيبي تعاي ويه ابوية من يجي

-خايب الطيارة تخمط گلبي مااتحمل

ماشفتني هاي ثالث عمرة اروح بالسيارة

توبت من بعد الحجة من رحت بالطيارة ردت اموت 

-مشتاقلكم بيبي بس دوام وشغل يادوب

نلحگ

ترقق صوت ماما وهي تعاتبه

-هو بس انتم الثلاثة عندي وتطشرتو ياماما

طلعت من المطبخ ماما وبيبي راحت وراها

تعرف بيها راح تبچي

ووجه فارس تغير

-ماااعرف شلون ابلغهم طلع

لجوئنا وراح نروح لأوروبا

-أرجع يااخي او عالاقل ابقى بتركيا شوكت

مانشتاقلك نگدر نجي

-اني رجال قادر اروح وارجعلكم بس زوجتي

حتى تمرضت علمود أهلها وابوها مات وهي

هنا صارت عدها فوبيا الفراق لذلك

اريدها تتقرب لأهلها

باوعتله هو هذا فارس لطالما چان جنتلمان خلوق

-حبيبي ربي يخليك الهم ويسعدك مثل

مجاي تدور سعادتهم

-انت بالذات اشتاقلچ

-لدرجة سميت بنتك ليل

ابتسم وعيونه تغيرت وضرغام الخبيث

صاح

-ها بچه بچه

مسح عيونه فارس وخزره

-عبالكم مااشتاقلكم اني واصل مرحلة

مرات افتح اللابتوب على صورتنا الجماعية

الاخذناها قبل لا اسافر واطلب اكل بالشغل

واگعد اكل گبالكم

انسابت دموعي وضرغام حضن راسي يسكتني

وفارس بصوت مخنوگ ودعني

-كاااافي لچ گلبتيها دراما يلا خلي ارووووح

يم الحلوات اكمل شغلي

انغلق الأتصال وضرغام باس راسي

-ام دميعة اطلعكم اليوم اذا باقية هنا

-خل نروح للگاع

-نروووووح مادام الاطفال وامهم يم بيت جدهم

اخاف عليهم من الشط

-نتعشى هناك

-نتعشى ليش لا اطلبي ليولة

-سلامتك بس روح لماما تلگاها شبعت بچي

واني اذا اروحلها ابچي وياها

طلع لماما دقايق ودخلت بيبي گعدت بصفي

ودارت وجهي الها

-ليلة شضامة عليه بيبي

-ماضامة شي حبيبتي

-المسودن مسويلچ حاجة

-لا والله بيبي

-لا تخافين اول وتالي تحبلين يابعد روحي

سحبت ايدها ابوسها 

-فاهمتني حتى واني ساكتة

-طالعتلي يابيبي چنت اكل بروحي اكل

ومااحچي كلمة بس انا محد چان ينشدني

انت لا عندچ انا والمسودن وسولفيلنا لا

تظلين تاكلين بروحچ وتتمرضين

-لا بيبي والله ماعندي شي بس خايفة

شو تركت المانع ورحت للدكتورة زميلتي

سويت كل شي احتاجه تگول كل شي

طبيعي لتخافين

-كل تأخيرة بيها خيرة

دخلت ماما وقطعنا الحديث

ضرغام محاوطها وحاضنها يشاقيها

-هسة اني مو بعينچ مااكفيچ

شو اني وفارس نفس الچهرة والصوت

-ياماما كلكم خير وبركة بس مكانه فارغ

هاي سنين واني بعدني مامصدگة

ابني بعيد عني ياماما الغربة تاخذ الروح

واني مااريد ابني يتغرب

-امشششي حجية ريحانة اووونسچ

انت وعذابي وليل

-وين تاخذنا بيبي خايب مابيه حيل

-للگاع شتگولون

-يالله مشتاگتلها 

-صااااارت مهرة عذبة ركضت للگاع

-انچب خايب وامشنه

غيرنا ملابسنا واتصلنا ببابا گال روحو

اني بالمجمع بالطريق اخذنا اكل وتوجهنا

للگاع عصرية دخلنا للخضار والزرع

فرشنا وماما طلعت تتمشى ويا ضرغام

واني متمددة على رجل بيبي

فاتحة حجابي وهي تدلك براسي

بهدوء

-بيبي

-يابعد روحي

-هسه بالمكان الگاعدين بي احنه شچان اكو

-هنا چانت حجرتي ونص الحوش والگاع الباقية

-وجهة بيت جدو

-حجرته هو وعمي والمطبخ والربعة

ونص من الحوش هم وباقي الگاع

من ذيچ الصفحة

-عشتي مرتاحة بيبي

-صدگ هي تعب بتعب بس اي يابيبي مرتاحة

عمي سالم ماخلاني بعازة

صارلي ابو واخو وام وعم

-ليش احسچ تحبي حتى اكثر

من اخواتچ

-اخواتي عزيزات بس عمي رباني صدگ

حتى هاي غسلة الهدوم يگعد يمي

عالطشت ويعلمني

سودة عليه وهو ضرير مايشوف

اخواتي ماقصرن بس ماعشت

وياهن بگد ماعشت ويه عمي

-وجدو هاجس

-ابن عمي وگرايبي

-بس

-اي بس چا شني بيبي اخليله جناحات

بس ابن عمي عوفي سوالف رجلچ المسودن

هاااي سويلفاته واحچيلي البت

شصار عليها بت صاحبة

گعدت اسولف لبيبي وهي صافنة سوالف

ستوريات مدري شنو متفهمها بس عرفت

هي دازة صورة مو حلوة وبدت تشرحلي

بطريقتها

-هاي لعبت بروحها يابيبي وأستعجلت

ماقرت زلمتچ ولا صاحبه عدل چانو

واگفيلها ومستعدين يظلون واگفين

طول عمرهم لخاطر صاحبهم

بس تعلوم عمتها خلاها تريد تعبر مسافة سنة

بساعة بلكي واحد منهم يلمها حدر جناحه

-يعني هي صح

-لا ياهو الگالچ هي لو تفتهم ماترضى

بهالسالفة وتگول راح اخسرهم وهالخسرت

-بيبي شلون ينطن بكرامتهن ونفسهن

ويقبلن بهيچ تصرفات تنزل من قيمتهن

-يابيبي هاي الدنيا أرزاق

حتى الكرامة رزق المرة من تسخى

بروحها تنداس ومااگلچ دوم تتمرد

بس اكو اوكات لازم تقدم بيها كرامتها

حتى على روحها

-بيبي مريتي بهالموقف

-اووووووه وتعديته وهاياني گدامچ مايگدرلي

بس الخلقني يابيبي انا شفت ماشفت

وبكل الشفته حطيت كل شي حدر

رجلي ورفعت كرامتي فوگ من راسي

اكو ناس چانت فاهمة چيف أنا يتيمة

وترملت راح ارضى بالذل لروحي

بس هيهات الله موجود رفعني فوگ

چتافهم خلاني لحت النجم وعليت

مو بفلوس ومنصب وجاه لا

عليت بصيتي الطيب هالماطخيت

لأحد دووووم وربيت امچ حدر جناحي

ومااعتازيت هاي الابرة من بشششر

ابتسمت واني اتذكر كلام جدو

-بيبي

-بعد روحي

-تدرين جدو ابو كمال شيگول

-شيگول بالله

-يگول عذبة ماعاشت الحياة

مثل الناس

-چا شسويت

-يگول عاشت ملحمة مال كبرياء

وماطخت ولا تنازلت لهالعمر بعدها

مثل ماهي

انرسمت ضحكة على وجهها وكأنها چانت

منتظرة هالأعتراف طبطبت على ايديه

-ليلة

-ها بيبي

-ماتمشينه لراگ الشط

-يلا حبيبيتي

وگفت وسندتها تگوم وطلعنا للشط گبالنا

گعدنة عالمفرش الجبته وبيبي عينها انمدت للقارب

اللي يمشي بالنص ذبت حسرة

-چنت هنا اگعد اتاني ابوي وعمي

يجون جيوبهم معباية بيض اللگلگ

وگرگري وضروگ الفار

-تحنين لأهلچ ولمكانچ هنا

-البشر من عدنا للموت يظل يحن

لأهله

بس الگاع شگد مااحبها مااريد ارد

اسكن بيها يابيبي اوووووووف اوووف

خسرت ناسي هنا صويحبتي وزلمتي

وهواي عزاز من اشتاگ اجي وارد

مااگدر اظل تتراولي طيوفهم

ويشت عقلي لو ظليت

-حبيبتي هيجت عليچ المواجع

-اسم الله عليچ من الحسرة

انا ماناسية يابيبي دوم اذكر

اهلي

واحنة نحچي دگ تلفوني

-ذاكرني الحبيب

-مشتاق

-المشتاق يرجع

بيبي فهمت هذا هاجس وردت

بصوت مسموع

-يالمسودن رد شني چلبت غاد

مرتك حضنها برد

ضحك ورد بس اني سمعته وگمت ابتعدت شويه من بيبي

-اوووويلي عذبة تريد حضن حفيدتها

دوم حامي

-سخيييف

-شلونچ حبيبتي

-الحمد لله منتظرين النتيجة فد يومين

ونرجع

-معنويات نوح شلونها

-طلعنا اني ومصعب شويه

اتصل بعائلته شاف زيوني شويه

ارتاح

-ميستاهل نوح والله بالي يمه

-الله كريم شتردين اجيبلچ وياي

-بس سلامتك حبيبي

شمرلي بوسة وراح ورجعت يم بيبي

نسولف لحد مارجعو ماما وضرغام 

گعدنه نتعشى وحلت السوالف بأتصال فارس

وتصورينا للگاع 

-شگد مشتاق لگاعنا

-رد يابيبي والله وابنيلك بيت هنا اذا تريد

-ها عذبتي تصخين بگاعچ اليه

-واصخي بروحي يابيبي امك عينها

ماتسكت كل غروبية تذكرك وتبچي

بعدها ودعنا وطلعنا مناك بحدود

التسعة بالليل راجعين للبيت 

ماما ليگدام يم ضرغام واني وبيبي

وره علمود بيبي تاخذ راحتها يمي

نسولف اني وبيبي وضرغام تلفونه

على اذنه يحچي ويه زوجته

الأمر مااستغرق بس اجزاء من الثانية

بين غفلة ضرغام عن الكلب اللي جاي يعبر

الطريق وصرخة ماما وانحراف السيارة

روحي وبسرعة غريزية امتدت احتضنت

بيبي بين ايديه بينما السيارة انقلبت من الجهة

مالتنا اني وضرغام وانضربت

بالحاجز الكونكريتي على جانب الشارع

بكل هالحدث اني واعية وصراخ

ماما گايم بيبي لافتها بحضني

واني احس بألم قوي بصفحتي

ووجهي ضرغام اسمع صوته يصيح

بيكم شي

بنفس الدقايق سيارات توقفت وطلعو ماما

وضرغام وبيبي واني

بيبي روحها رايحة واني الالم بده

يزداد بصفحتي بين مااتصلو بالاسعاف

اللي تأخر فأضطر واحد ياخذنا للمستشفى

بعد ماطلعو جنطتي وجنطة ماما وتلفون ضرغام

من السيارة الدم احس بي يتدفق

من زندي وصفحتي وجهة وجهي اليسار

تحرگني وبيبي متمسكة بيه

گوه تحچي

-ولچ بيبي احچي

خليت راسي بحضنها وغمضت

مااگدر احچي علما وصلنا

ركضو الاطباء بينه وتبينت اصابتي

زندي من الجام اللي تكسر

صفحتي الباب من تكسر ضربني وجرحني

ماما جبينها مضروب بالجامة

بيبي مترضرضة وضرغام ايده مكسورة

وسنه مكسور

بابا اجه بسرعة بعد مااتصلت ماما

بي وانخبص بينه لوحدة

الدكتورة تعالج الجروح العندي وتعقمها

واني احس بغثيان شديد

اشرتلها جابت سلة نفايات يمي

بس متقيأت بس الغثيان اذاني

-راسچ انضرب

-لا الضربة كلها بصفحتي

-للأطمئنان نسوي أشعة

خلصت تعقيم الجرح وضمدته ميحتاج خياط

ووجهي كذلك بس زندي غرزتين بسيطات

وگوموني بابا يفتر ويايه

سوو الاشعة ماكو اي اثر للأرتجاج

مجرد هبوط ضغط من الخوف

بقينا للفجر بالمستشفى بابا اسمعه

يتصل بعمو كمال يبلغه

ل٨ الصبح الكل صار يمنا ودگ تلفوني

هاجس بصفي عالميز سحبته رديت

-ليل شصار بيچ شي

-لا بسيطة

-راجعين هسه بالطريق

-توصل بالسلامة

-لييييل صوتچ شبي طمنيني

-بس خفت

تذكرت الهبطة وبچيت غلقت الخط

وبابا وعمو كملو الاجراءات

ووطن قطر السيارة من الطريق

ورجعنا ماما جبينها مضمد

بيبي وجها لهسه مخطوف من الهبطة

اني گوه اتحرك متضعضعة والالم بصفحتي

اذاني وجهي مضمد ويحرگني

اخذنا عمو كمال بسيارتة للبيت

اني وماما وبيبي ويانة جدو 

وبابا وضرغام ويه وطن

ماما رغم التعب تفتر عليه خلوني بالغرفة

غيرتلي ملابسي وغسلت ونمت عالمسكن

مدريت بشي بعد غير على همس هاجس

-ليل حبيبتي

فتحت عيوني احس ريگي ناشف

فتحت ايدي طبگ الباب هو ودخل وياية

بالفراش تمدد رافعني بهدوء لحضنه

بلا كلام ولا سؤال سند راسي

بصدرة يمسح على ضهري بهدوء نص ساعة

واندگت الباب وصوت بيبي

مرتجف بعده

-بيبي ليلة ماگعدتي

گعدت وهو سندني مخليني گاعدة

گام فتح الباب لبيبي دخلت

وهو باس راسها

-الحمد لله عالسلامة جدة لگيتچ

نايمة

-الله يسلمك بعد روحي

سندها موصلها اليه جرتني حضنتني وبچت

-خايبة انا مصبحة مروحة شلون تذبين روحچ عليه

وتنصابين

-لا تبچين ياحبيبتي واني شعندي غيييرچ

-شتهجسين 

-كل شي تمام والله لتخافين عليه تحسنت

تعدل بشعري وتحاچي هاجس

-ظل يم مريتك بات هنا اذا ماعندك شغل

-عيوني الها

طبطبت على كتفه وطلعت رجعت توجعت

سندني علي وگعد

-اخذچ للدكتور تحسين بشي

-لا الم يروح بالمسكن

بس خفت

عيوني اعلنت النفير وبدت تتساقط

دموعي بعد الصدمة

-خفت مااشوفك بعد

حضني يهديني

-الحممممد لله دفع الله ماكان

أعظم شو بالله رفعي راسچ أشوفچ

شنووووو هالجمال اليندعم يخرب

انت زااااايدة حلا القرچ

ضربتة بوهن على كتفة وبقى يسولف

ويايه عن نوح واللي صار

-طلعت نتيجة الخزعة

-لا بعد يومين ان شاء الله

-يارب ميكتبله بس الخير والعافية

-تعبان ماخليته يجي وياي راح للبيت يگول

يمنى تلح عبالك شاكة بشي 

-وانت اجيت من التعب ليجاي

-شلون ترديني اصبر وانت بهالحال

بست زنده اللي مستندة علي

وهي سند راسه على راسي

-اريد خذچ للبيت بس مشكلتي

الدوام راح انلزم عالاجازة الاخذتها اسبوع

يادوب الحگ انزلچ

-عمو كمال وبابا اخذولي اجازة

راح ابقى يم ماما لتحتار والله مبيه

شي

-شلون اتركچ

-تعالي هنا كل متصيرلك فرصة

دخلت ماما حبيبتي جبينها مزرق

-گوم ماما تغده ويه عمك 

-لا عمة راجع للبيت يادوب اسبح

وارجع اخذها للدكتور

-والله مابيه شي عيوني تغده وارتاح

-هنا عمة ولو نتعبچ اكل وياها

-لا گومني وياك  جسمي متضعضع خل اتحرك

گومني وطلعنا يم بابا وجدو وعمو كمال

وضرغام تغدينا

بس خلصنا غده خليته راح للبيت ويه عمو وجدو يرتاح وضرغام اخذة بابا لبيته

ورجع جايب ذبيحة لوجه الله عن سلامتنا

گال يومين ونسوي غدة نعزم بيت

جدو كلهم ماطول لليل رجعلي ويا

جنطة صغيرة بيهة ملابس الدوام

وتراك يلبسه

-بايت الحبيب اليوم

-ماتحملت اخليچ اليوم

الكل بغرفهم وهو ساندني لصدره

ويسولف

-ضحيتي بنفسچ لخاطر عذبة البربوگ

بالله هاي لو اني تخافين عليه هيچ

-لو انت موجود أحتمي بحضنك من الخوف

حضني باس راسي

-تحسين بألم

-بسيط اخذت علاج

سيارتي انمردت وضرغام مقهور يگول

اني عرضت الا اني اسوق

-فدوة الچ

-متحلف يعوضني گتله اذا سويتها صدگ

تنساني والله

-واني وين رحت بس تحسني

وشتختار عيونچ تجي احلى سيارة جوه

رجليچ

-بالله اني شمسويه بحياتي حتى ربنا

خلاك بطريقي

-اكيد ذنب عظيم واني عقابچ

ضحكت علي وهو مستمتع بالسوالف

-تعرفين وضعيتچ هاي وانت متكسرة تخدمني

-فساد اخلاقي

-تشكيلة فساااااد اليعجبچ تلگينه

طبي وتخيري

-أحبك

گلتها بكل قناعة بوسط هالهدوء

والسكينة واني مسنودة علي مرتاحة

-واني مااحبچ

-ادري تعشقني

-همزين تدرين

سحبني بحضنه متمددين يحرك بشعري بهدوء

-هاجس نروح للدكتورة نشوف غيرها

-تمام بس تحسني وعلى معرفتچ

نروح

-شفت النونو ليان

-حلوووووة وناعمة

-تجنننننن تدخل الگلب

-غيد تريد تجي علمودج

-خابرتني گلتلها لتجين مابيه شي

-باچر كلهم يجوچ

-ينورون هلا بيهم

-والله حسيتهم حرجو عمي گال باچر

اسويلهم غده

-ماكو احراج گال اخلي طباخ يطبخ

ماعدنه شي

شال كفي خلا على عيونه مغمض

-تعبان نام عيوني

-دلكي حواجبي

ضحكت وهو يحچي بجد

-بين عيوني الالم

دلكت المكان وهو مغمض ثواني وسحب

كفي يبوسة

غمضت وياه واخذني النوم للصبح حسيت

علي يغير ملابسه ويرتب بقيافته

-ها حبيبي

-رجعي نامي اني جايكم عالغدة

-اريد اصلي

گمت بالگوة ماما زينة بالمطبخ لگيتها

مسويه ريوگ تريگ هو بسرعة وطلع

لدوامه واني تطمنت على بيبي وصليت

وافتر على كيف ويه ماما

بابا ضحوية فتح الباب على كبره

ودخل هو ورجال جداري مال اكل

وجهزنا الصالة بالنگدرله وبدو يجون

اقربائنا واخر شي بحدود ال١١ اهل هاجس

عماته والبنات يمنى والولد اثنينهم

دخلو للهول سلمو عليه نوح

تقربلي همست

-شلون صرت

-الحمد لله المهم انت

ابتسم وطلع حتى محد يسمعنا ووطن كالعادة

يحشش عليه يمنى وزيوني بحضنها

تسولف ويه ماما

امها وخالتها ماخذات جهة لوحدهن

بيبي تحچي ويه مرت عمو كمال واقربائنا

منا ومنا خالو عبد الله وعائلته

انملى البيت گمت وماما رجعتني

بناتنا بس فرشن السفرة

ونقلن الغده للهول

الطباخ ووياه ولد يصبون والرياجيل

تغدو ومنا ومنا تم الغدة وخلينه الچاي

وبده سم الافاعي يتغلغل بالحديث

من أم يمنى مخليه زيوني بحضنها

تلاعبة وتسولف

-هاي خلفة الوسطاني شحلاتها

منتظرين خلفة الچبير

يمنى ندستها وهي كملت

-يطلع على ابو معدل اكيد

لو يطلع يشبهني

بيبي متحملت ردت

-يطلع على ابو على امه اهم شي مايطلع

عليچ بعد عمتچ

رفعت حاجبها مستنكرة

-وشبيه عمة

-يا عمة شحلاتچ بس شني يطلع

عليچ بت عم الخياط الخيط بدلة العرس

خو يطلع لأمه وابو

-يلا خل تتشطر وحتى لو تجيبه

يشبهچ

-حبوبتها انا وتجيب بت تشبهني

تسميها عذبة حتى تارثتي تظل تسحگ روس

توتر الوضع مرت خالو عبد الله حسمت

الجدل

-اهم شي تمام الخلقة

شيحجي انعم الله

ردت نهاد بأستهزاء

-هسة دخلينه نسمعها حامل وعود

نتعارك عالشكل والاسم هاي چناين

كمال اثنينهن خلفن ومرت الچبير

بعدها

ماصبرت بعد رديت

-عمة احنه مو بسباق هذا رزق

رب العالمين يودي بالوقت المناسب

سواء اليه او لغيري

-هههههههههههه والله صدگ رزق بس انت

سديتي باب الرزق سنة بالمانع

ماما تنرفزت وردت بدون

متعرف اساس الموضوع

-مهما يكون ام يمنى الشغلات هايه

بين المرة ورجلها يعني مو شي نتداوله واحنه

نشرب چاي عصرية

سكتت بس بقت تحچي ويه اختها نص ساعة

وگامت راحت لماما بيدها ضرف

-الحمد لله عالسلامة

ماما رجعت الضرف

-بس جيتكم كافي عيوني

دفع الله ماكان اعظم

-هاي عن سلامتكم لترديني

خلت الضرف وطلعت وكلهم راحو

يمنى باستني بأحراج

-لمات النسوان وسوالفهن

ضحكت بلا نفس وراحو هاجس

بقى ساعة اطمأن عليه وراح

دخلت ارتاح والبنات قامو بالواجب

وللعصر البيت فرغ من الخطار

وهيچ عشر أيام مرت هاجس يجيني بالليل

محمل مسواگ وحلويات يخلي ماما وبابا

يتنرفزون ميقبلون بس هو يستحي

واني اعرفه

والحمد لله شلت الخيط بزندي

والجروح طابت وصار وقت رجعتي

للبيت العصرية غيرت ملابسي واجاني

هو اتصل فتحت الخط وصوت قرآن مشتغل

-منتظرچ بره حبيبتي مستعجل

مااگدر انزل سلميلي عالحجيات

سلمت على ماما وبيبي وطلعت

واگف مسنود عالسيارة مبتسم

بس مو سيارته نظاراته الشمسية

وطوله واناقته ضايفات سحر فوگ

سحر حتى للكاريزما مالته

فتح الباب وصعدت

-اليوم مجدد حضرتك

-سيارة ابو صعبة سيارتي بالتصليح

رجع شغل القرآن ومشى بينه

-يابه راح ينور البيت شدعوووة هالغياب

-انتتتت متقبل ارجع مشغول بدوامك

هسسسه تلگيك متزوج عليه

-اي وضام مرتي الجديدة بالكنتور

افتر بينه وگف يم محل ورد جاب وردات

برتقاليات جميلات وياهن كارت حلو

ويم محل حلويات كيكة صغيرة

عليهة مكتوب الحمد لله عالسلامة

وطلع للبيت اباوع سيارته بالباب

التفتت ابتسم رافع السويچ

-هدية سلامتچ تروحلچ فدوة السيارة

ابدلها بأحلى وأرقى

-اريد ابوسك بس الشارع منا

غمز وهو نازل

-خليها لليل وسهرررررر الليل

نزلت وهو ويايه دخلنا البيت بعدني ستوني خطيت

للهول اخذ الورد والكيكة وجعصني بحضنه

منزل راسه يباوعلي

-البيت فاااارغ والله بدونچ

باسني وذب نفس مرتاح

-نورتي مكانچ القرچ

-منوووور بيك ممكن تشيلني باعتباري

صار هواي ممددلني

شالني ضاحك

-اگلچ اني انطرحت زوج

بهالزواج هذا

خزرته

-ليش بالله

دفع باب الغرفة ودخل شايلني

ويضحك يتلاعب بأعصابي

-طلعتي معصگلة واني رجال احب الربربة

والدهون

-هسه ادهنلك نفسي ببطل زيت حتى

تتكيف حضرتك

نزلني من بين ايدي

-عليمن يابه احبچ ناشفة بلا زيييت تنفعين للرجيم

حضنته وباوعلي يضحك

-ادري بنفسي وسيم رجاءاً لتتحرشين

-ليش كلفت نفسك چان مشيت اموري

بتكسي منا لمن اشتري غيرها او اصلحها

-بابا انچبي واخليچ تصعدين سيارة مسكربة

شنو قحط وبعدين التكسيات شنو

مات رجلچ حتى اخليچ بتكسي ترحين

-اسسسم الله عليك

عضيته وضحك يكفش بشعري

-لچ مچلوبة

-ربي يخليك اليه وتعييييش وتدللني

-طلباتك اووووامر حبيبي

تركتة يطلع ملابس راح للحمام

واني غيرت ملابسي

وگعدت اعدل بالبيت منا ومنا طلعت

فاكهة من الثلاجة وسويتلنا كهوة وانتظرته

طلع بس بتراك بلا تشيرت وينشف بشعره

صوفرتله وهي يلعبلي عضلات زنده

-شهالحلا مرتك شلون تخليك تطلع

هيچ گدام المعجبات

-عدها ثقة عميييياء بيه

-اكيد 

-نگريني بوسة قبل لاتجي

وگفت بسته وگعد بصفي خليت بحلگه

قطعة تفاح

-ارتاحي وفد شويه اخذچ نتسوگ

البيت فارغ

-تمام واني اريد ملابس

-وبعد

-سلامتك حبيبي

-وهم سوي هاي الحركة مال تدفعين بمحل

الملابس قبل لااجيج

-مااسويها اريد افلسك

-عيوني الچ بس كل شي بثمن

-متستحي 

-ليش يابه الحياة عرض وطلب

ضربته على صدره وهو يضحك

-لبسي يلا حتى نتعشى بره

لبست وهو لبس وطلعنا بين مسواگ

واشتريت كم قطعة ملابس رحنة

نتعشى واكو على شفافة كلام

واضح مسألتة اريده يحچي وحده

-ليل

-حبيبي گول

-خطبو روان لأبن خالها

-اممممم جيد واخيراً راح تتزوج

-اتصلو ويردون احضر الخطوبة

-وليش لا روح

-اني موافق وگلتلهم اجيكم بس الصار

لعب نفسي اجاني اتصال منها 

صفنت بوجها

-شتريد بالله

-شو بچت وگعدت تخرط كلام

-كلاميش بالله

فتح تلفونه وخلا گدامي تسجيل اتصال

فتحته مدته دقيقتين او اكثر بس بكل جرأة

تحچي

-هاجس اني راح اتزوج

-اي عمو وصلني الخبر عالخير

بچت ورجعت تحچي

-بس من وراااااااك تسرعت وراح اتزوج

شخص مااحبه انت تلاعبت بمشاعري

-بابا يامشاعر يايوم اني حچيت لو اعترفت

يايوم اني گايلچ كلمة

-مااااااعرف تصرفاتك اهتمامك كله يگول

مو تحبني بس عالأقل معجب بيه

-اهتمامي بيچ من حياة ابوچ الله يرحمه

كبنت صديقي كبنت اليه كأخت صغيرة

عمره ما چان بأطار الحب والعلاقات

-يعني تتركني اتزوجه هاي اخر فرصة گلي

اذا تريدني اتزوج حتى اگطع الأمل منك

-تزوجي عمو الله وياچ

على صوت بچيها

-علموووود الدكتورة تناسب برستيجك

لأن دكتور علمووووودها مووووو

الله ليريحها الله ليهنيك وياها

ان شاء الله مترتاحون والله والله مااسكت

عنها وكل شي راح احچي 

انغلق التسجيل وصفنت علي

-مترووووووح والله وتخابرهم تعتذر

الحيوووووووانة الحقيرة شترييييييد مني

-هاي سمعتچ الصار وردت تعرفين خاف تتصل

تدز رسالة يكون واضح كدامچ كل شي

متنفهم ومتنعرف شتريد

-شنو قصدها احچيلها كل شي

-اكيد فيلم من افلام النسوان

تنفست متضايقة باوعلي

-مااروح وحتى الرقم الجديد حضرته

ليش ضجتي

-والله ماعندي اي شي غير القرف من تصرفاتها

لاحاسة بتهديد ولا حتى شاكة بيك بس السوته

كافي ترجمت اهتمامكم اعجاب وحتى عمتها

فهمت غلط والله ولتزعل بس انتم مخليتولها حدود

وهاي النتيجة بنية مدللة بغباء وتريد

كل شي يصيرلها حتى البششششر 

-گوووومي نكمل دياحة وانسي الموووضوع

گومني لازم كفي طلعنة نفتر بالسيارة

ورجعنا للبيت نص ساعة واتصل بي نوح

راحلة وره شويه رجعلي وجهه يضحك

-بشرني طلعت نتيجة الخزعة

-وسليمة الحمد لله هسه طمنه االدكتور 

-يستاهل نوح يمه العافية يارب ميشوف شر ابد

تلاعبت عيونه عليه وباوعلي

-واني مااستاهل الخييييير

فهمت علي واستغبيت واستخدمت أقدم حيلة

نسائية نستخدمها احنه الاناث للتهرب 

-ااااااااي راسي عندي صداع قوووووي 

رفعلي حاجبه بمعنى سوالفچ متعبر عليه

مد ايده بجيبه طلع براسيتول طلعلي حبايتين 

-تفضلي حبيبتي

سحب گلاص المي من يم الميز

-شربي حتى الصداع يروح يلا حبابة

شربتهن وخليت ايدي على جبيني 

-ماادري شبية هاجس

رفعني شالني بين ادي 

-صدگ چذب تعبانة اني أشيلچ حبيبتي 

-نعسانة حيل احس بوهن 

تنفس بنفاذ صبر ورد

-اني اصحصحچ

ضحك وهو ينزلني بتعب

-لو أگلج انچبي وطلعي گدامي للغرفة مو أحسن من هالفلم الهندي

وگفتله متخصرة 

-خاف الگه زوجتك الثانية بالكنتور

-ماعندي غيرچ گمر

غمز وطلع بره بين ماغيرت ملابسي

ورجع بيده تلفونه ويحچي عينه مني

تفتر على ملامحي 

-اي والله بعد الصار صار عذروني

الف مبروك خويه باركيلها بدالي

غلق الجهاز وشمر نفسه عالسرير

اشرلي بأصبعه

-تعاي

-شتريد

-عندي موضوع وياچ

مشيتله بخطوات ثگيلة وبلمحة بصر جرتني ايده  صرت محبوسة بين صدره والسرير

أنفاسه بوجهي وصوته تغير 

-كذاب

ابتسم بمكر وتقرب أكثر لحد ما تلاگة جبيني

بجبينه

-أكيد ومليان حيلة ومكر وإذا تطلب الأمر أصيرلچ إبليس بنفسه بس حتى ما تطلعين من هالحدود

اشر على ايدي وصدره ذبيت نفس مرتاح 

-بعد لتغيب هالگد

-لازگلچ شاااايفة لزگة العلچ بالشعر

ضحكت بخفة واني اضيع بتفاصيله

-لااااا گول هيچ

وأنك جار الوريد رغم البعد وانك المبتدأ والخبر بحكاياي

-اوووويلي يابه

گالها وحضني يمحي كل مسافة

بعد عشناهة بذيچ الأيام

بهالليلة ماچان اقترابة مجرد استجابة لنداء الجسد

چان شي أعمق

لمساته وايده وهي تتحرك على شعري وكأنها تقرأ أفكاري ودائما أحساسي لمن يسحبني لحضنه

ان هذا مو مجرد حضن عابر هذا 

احتواء كامل وكأنه يطمني بأني هنا ينتهي خوفي

ويبدي أماني 

بساعات الفجر ايده تتلاعب بأصابع

أيدي متسائل

-بالله لو من البداية محترمة نفسچ

وجارة عدل 

باوعتله صفح كفخني

-هالنظرة العرررررمة مااحبها

-بس تحبني اني

-انچبي نعسان اليوم نضرب الدوام

ونروح للدكتورة مو گلتي

-اي نروح

-اگلچ بربوگ ليش متعالجين نفسچ

-ههههههههههه مو معناها اني دكتورة

يعني اعرف كل شي اختصاص النسائية

دقيق ومتفرع واني اعرف اشياء بسيطة

عنه مو معناه اعرف اعالج نفسي

-انطمري شگد تلغين

-هيچ صااااااارت

-اي هيچ

نگرني كلة وحضني نايمين حسيت

الصبح على صوته يدندن

-مجرد كلام حچيته ومشيت

حبيبي حرام على الحب جنيت

هيچ انتهينا كلام ومشييييت

-صباح الصوت المزنجر

-صباح الانتصارات العظيمة صباح الهزييييييمة

الچ طبعا

-متكبر

نزل راسة باسني ووگف يلبس

-مو معطل وين طالع

-موضوع عند مصعب اشوفه وارجع

طلع تاركني بين مسبحت گعدت اتريگ

بهدوء على اتصال غيد وهي تشوفني النونو

-شوفيها والله تشبه ماما

-ياحبيبتي وين لاگينها تطلع على خالة سهامة

سولفيلي شخبارچ

-بابا ماقبل ابقى يم اخواتي گالهن تجي يمي

وتعالن زورنها

-ومنو يساعدچ

حچت بصوت ناصي

-مرت ابويه وأخويه الصغير حتى سهر يسهرون

ويايه

-حبابة مو

-يعني بالمرات الشفتها بيها ماعدها نحاسة

وتستقبل الخطار ومن تحچي تگول هذا بيت امچن

وأبوچن لتترددن بالجية اله

-الحمد لله يعني مرتاحة

-الحمد لله بس راح اجي وطن خطيه

لوحده

-رجعي والله اني هم مشتاقتلچ بس اذا

تشوفين نفسچ زينة

-الحمد لله تعودت عالطفلة وبديت اعرف

ادير اموري وياها بس خمس ايام

وبابا يوصلني

-ترجعين بالسلامة حبيبتي

ودعتني وگمت اني للبيت ترتيبات بسيطة

وغدة بين مارجع وجهه مگلوب

-ها حبيبي

-مصعب وضعه كله مخربط

-شصار غير نفتهم

-متصلة عمة روان بمرته لاعبة لعب

تگلها بسببكم خربت حياة البنية انتن النسوان

صابتچن غيرة منها وسويتن سالفة

الصار واليصير لروان ذمة برگبتچن

وماسكتت لحد ليجاي تگلها الزلم الفرحانات

بيهم هاي سوالفهم

-سوالف شنو

-شغلة صارت بمكان طايح حظه

-مكانيش

-ملهى

-وتالي

-صورتنا ثلاثتنا ويا راقصات

رفعتلة حاجبي خزرني

-سمعي لچ ستوني حلفت حتى بالتراب لمرت

مصعب حتى تصدگ هذا شغل مو صدگ

رايحين

-وشصار

-مامقتنعة واني اتصلت بالعمة

من خطي الثاني تگلي اني ممسويه

شي مجرد گلتلها تهمتن بنت اخوي وية

مصعب وهاجس لعد متشوفن بالصدگ

شيسون حرت شحاچيها

-ومنيلها الصورة

-بتلفون مرحوم ثائر

بس للأسف أديان عقلها صغير وتصدگ

بكل شي

-لا مو عقلها صغير بس كل وحدة من عدنا تعالج

امورها حسب طريقتها اديان انفعالية

وتغار غيرة مفرطة على زوجها وهالغيرة متجي

الا من تجربة خيانة سابقة

صفن بوجهي وسحب ايدي نگعد

-اكبررررررر بربوگ وشلون عرفتي

-يعني كلامي صح

-صح الصح ببداية زواجهم بولادة جود

هي يم اهلها وهو منسق ويه وحدة

ولگفته

-شوف لذلك اي كلمة تهز ثباتها

-وانتِ

-اني واثقة ومتأكدة متسويها ولا راح

تسويها بس هذا مايمنع غيرتي عليك

بس غيرتي مانابعة من قلة ثقة نابعة

من حب مفرط

-اويلي 

اشرتله تقربلي بست خده

-نتغده

-لا لنفعل الفاحشة والرذيلة بعد هالكلام الحلو

-احچيها لغيري حبي

ضحك وراح غسل رجع تغدينا 

وبين صلاة وسوالف العصر توجهنا للدكتورة

دخلت شرحت وضعي فحوصاتي

تحاليلي سوناراتي كل شي تحتاجه

رجعت طلبت اشياء ثانية كملت كل

شي ورجعتلها

-كل شي نظيف المبايض نشطة حجم البيضة

طبيعي انابيبچ مفتوحة اي خلل هرموني ماكو

يعني نگدر نگول كل شي طبيعي

-ليش التأخير

-تصير عادي بس بنفس الوقت خلي

زوجچ كذلك يسوي تحاليل

للتأكيد

-ضروري يعني

-اي حبيبتي يعني انت هسه ماعندج شي

خلي هو يشوف نفسه ورجعولي

كتبتلي انواع التحاليل اللي محتاجها وطلعتله

صعدنا بالسيارة وهو طلع

-شنو الاخبار

-كل تحاليلي واشعتي والسونار نظيف

ماعندي اي اشكال الحمد لله

-تمام شنطتچ

-منطتني شي گالت كل شي طبيعي

هرموناتي فيتاميناتي وكل شي

-يعني ننتظر

-الله كريم

ماگدرت احچي شي ماااعرف خجلانة

خايفة من ردة فعله اغلب الرجال يرفضون

هيچ أشياء خوفاً على كرامتهم

وصلنا للبيت قبل لا انزل من السيارة

اجاني أتصال من ادارة االمستشفى 

نزل هو واني احچي لحد مكملت

ونزلت قفلت السيارة

-شصاير

-مؤتمر طب الأطفال ببغداد ودهوك

بعد يومين

-كم يوم

-خمس أيام يومين ببغداد وثلاثة بدهوك

اطباء اقامة قدمى واختصاص

-مجموعة ترحون لو شلون

-باص ينقل الأطباء واللي عاجبه

يروح بسيارته عادي

-اذا اكو مجال اني اخذچ

غمز وهو ماشي

-نجدددد شهر العسل

طلع لبيت جدو يشوفهم نص ساعة

ورجع واني گاعدة اجهز ملابس 

اطقم على عدد الأيام

-دبرتها جهزيلي ملابس وياچ

-تتدلل

اشتغل وماكو ببالي غير فكرة شلون

اطرح علي الكلام وشگوله

كملت وهو يشتغل عالحاسبة واتصالات

عندة بعد العشا توجهنا للنوم اثنينا عدنا

دوام الصبح هو طلع واني وراه طلعت

بالي مشغول بس بهالموضوع

وثاني يوم رجعت من خفارتي هو

يرجع بالليل حتى نطلع الصبح لبغداد

رجع ماله خلگ وتعبان

-تتعشى

-معدتي تعبانة

-مدخن مو

-هاااااسكي

-اعترف

-لعبت نفسي من الوضع فوضى الشغل

وهواي امور متعطلة

-والحل التدخين

-جزء من الحل

سحبته من ايده دفعتة للمطبخ

-غسل وتعال شويه اكل ويايه

-شمسويه

-چلفراي وشوربه شوفان خفيفة

-بس شوربة خليلي

گعدنا ناكل وأحس الحچاية مثل عظم ببلعومي

جليت صوتي وحچيت

-اگلك عيوني الدكتورة طلبت طلب بسيط

-شطلبت

-هيچ تحليل سهل بس للتأكيد

-محتاجة تحاليل تردين اسويهن الچ

ببغداد لو بدهوك سهلة

-التحاليل ألك

نزل ايده تارك الأكل مستغرب

-واني شنو علاقتي بالتحاليل

-بس گالت ان اني حالياً كل شي عندي

تمام ويمكن …………

ضرب ميز الطعام خلاني فزيت

ارتجفت الصحون على الميز من قوة الضربة

وهدوء الگعدة انهار بلحظة

گامت عيونه تجدح نار

مو بس عصبية نظراته

بيها نوع من الخيبة الممزوجة بأهانة

ووگف منتفض

-وگالت العيب من زوجچ مووووووووو

-لا مو هيچ هاجس بس هو طريق

نقطعه سويه يعني حتى نشوف الاشكال وين

-وشنوووووو منظري واني رايح اسوي

تحاليل تثبت رجولتي من عدمها

-ليش تفكيرك مثل تفكير المتعصبين اللي

يرفضون اي شي يفكرون ممكن يمسهم

-تررررريد تحليل يثبت رجولتي من عدمها

ليل أنتِ واعية للكلمة اللي نطقتيها

صرنا بمرحلة نناقش بيها بديهيات وهاي انت

اللي تگووووولين افهمك من نظرررررة

شوووووفي نظرااااتي شتحسسسسين 

حاولت الملم شتات نفسي وتقربت منه بخطوات حذرة

-فدوة لعينك لتفسر الكلام بهيج تفسير

العلم ميعرف رجولة ونقص العلم يعرف أرقام وهرمونات

شنو اللي تغير مو انت ردت طفل وعاتبتني عن التأخير الصار بالتالي حتى اني صارت رغبتي بطفل وهسه الموضوع بيدنا والدكتورة بس تريد تشخص الحالة صح

-وتشخيصها لازم يهييييين كرامتي

-ليش تسويها معركة كرامة وهي مجرد ورقة وفحص……

قاطعني بضحكة استهزاء وهو طالع للهول تاركني ورا

-ورقة وفحص أنتِ تشوفينها هيچ سهلة 

بس موقفي شنو گدام أهلي

وحتى أنتِ بداخلچ راح تظلين تنظرين لهالورقة

على أنها صك غفران أو صك إدانة

تريدين تخليني تحت مجهر المختبرات حتى باجر إذا طلع خلل بسيط تمنين عليه بصبرج وانتظارچ

اختنگت وصوتي طلع مقهور

-اني أمن عليك شلوووون وانت رغم خطأي غفرتلي

وبديت وياي رحلة انتظار حتى لو قصيرة

بس صبرت عبالك اذا طلع شي مراح اصبر

شلووون شايفني هاجس

-شايفچ جاي تضغطين عليه كأنما تأكدتي وأجزمتي

ان السبب مني

-هذا تفكيرك أنتَ أنتَ اللي جاي تحكم على نفسك قبل لا تروح ليش تعتبر رغبتي بتكوين عائلة وياك

هجوم على شخصك ليش الأنانية هاجس

بوقت اللي عرفت تأثير الموانع عليه

مو گعدت وياك وشرحتلك وتعرضت

لكل انواع الملامة منك ومن الحواليه بگلب

راضي لييييش انت يمك اختلف الموضوع وخليته

بخانة الأهانة

التفت عليه وعيونه غايرة

-أنانية ……

ألأنانية إن تردين تكسرين خشمي بحجة الطب ترديني اني أروح أوكف بسرة عيادة

وانتظر نتيجة تگول إذا زوجج كفؤ 

لو لا أنسي ليل لو يكون ثمن هذا الطفل هو كرامتي فما أريده سامعة ما أريده

-تمام مو ضروري

وگعت دموعي واني ماشية تاركته ورايه

مشالي بسرعة سحبني من كتفي

-انتظري

-شنو بعد باقي شي مگلته

هز راسه ومشى تاركني 

گعدت بالغرفة اراجع كلامي اريد المس

النقطة اللي زعلته وخلته ينتفض ماكو

ليش لهالدرجة زعل ليش هيچ حس

رجع بعد ساعة باوعلي

-جهزتي ملابسنا

-اي كل شي جاهز

-تمام

خله راسه عالمخدة ونام

اني بالمحصلة مگدرت أنام

طلعت بره ولا ارادياً اتصلت ببيبي

ردت وصوت ماما بعيد

-هلا يابعد روحي

-مشتاقتلچ بيبي

-شصاير بيبي

بچيت وهي ردت 

-يابعد روحي شبيچ اخلي ابوچ يجيبني يمچ

-لا حبيبتي

-انا رايحة لحجرتي يمه ريحانة 

سمعت صوت ماما ردت عليها

وصلت غرفتها وردت

-ها ولچ شمسوي المسودن

-بيبي اسمعي وحكمي اذا اني گلت شي

غلط بس بيبي بينه مااريد ماما تعرف

-حدر نعالچ

-حشاچ حبيبتي

بديت احچيلها الصار وهي تسمع لحد ماكملت

-هاي الزلم كلها هيچ يابيبي

مرحوم بشير جدچ بسبب التعذيب ماخلف بس ابوچ وكلما اميرة تگله نروح للطبيب يگب بوجهها

-وشسوي يابيبي

-بالاسلوب والكلمة الطيبة خوش

-الله كريم بيبي آسفة لأن زعجتچ بهالليل

-خلي عينچ بعين الله وبكل ساعة لساعة

فرج

-ان شاء الله تصبحين على خير حبيبتي

-اجمعين يابعد روحي

راحت بيبي ودخلت للغرفة هاجس ماكو

استغربت وين راح

تأخر عرفته ببيت جدو

ساعة ورجع تمدد سحبني بحضنه

ساكتين اثنينه

لحد مدگ المنبه وگعدنا غيرنا ملابسنا

وطلعنة بالطريق توقف تريگنا هدوء وسكون

لحد موصلنا للفندق اللي بي المؤتمر

حجزنا موجود ملحگت اني يادوب رتبت

مكياجي وانطلقت للقاعة هو قرر

ينام

للمغرب يلا خلصت بس رجعت تعبانة

وضغطي احسه صفر فتحت الغرفة هدوء

نايم واضاءة ماكو تمددت بصفة بملابسي

مااگدر ارفع ايدي

-هاجس تگدر تجيبلي شي اشربه لبن

مالح شي

فز ورجع سألني رجعت حچيت

-جيبلي اي شي مالح

رفع التلفون باوع الساعة ستة

-ولهسسسه باقية بلا اكل

-وانت هم

-اني مرتاح نايم

وگف لبس وطلع نص ساعة رجع

ورا اندگت الباب خدمة الغرف دخل الاكل

وگومني ويا

-اكلي يلا

-بس اغير ملابسي

-تركيهن واكلي

بلشت اكل صدگ چنت جوعانة

خلصت واجو اخذو الصحون دخلت سبحت

وهو يتصل بشغلة بدون مااحس نمت

ماصحيت الا وقت صلاة الصبح عالمنبه

گعد ويايه صلينا

-نطلع للكاظمية

-ياريت

لبسنا وطلعنا الجو حلو افترينا شوية ودخلنا

زرنا بهدوء الفجر والطيور اللي تلتقط

حبات الحنطة من الگاع المرشوشة بالمي

ويه ريحة العطور الممتزجة بالعطور اللي

تطلع من الضريح خلصنا زيارة

وطلعنا لمرقد أبي حنيفة قرينه قرآن

بالداخل وتبركنا بوجبات الأفطار اللي يوزعوها

وطلعنا راجعين ب٩ بلشو المؤتمر هالمرة

هو اجه وياية لل٢ الظهر رجعنا كذلك تغدينا

واخذنا استراحة المغرب طلعنا لأبو

نؤاس الحدايق اللي تطل على دجلة

وهدوء المكان ويا نغمات الاغاني

البغدادية القديمة هو صح يحچي وياية

بس هادئ سألني

-بيش الساعة ننطلق باچر

-الباص بحدود ال٤ العصر بعد منخلص اخر

سيمنار

-تمام

باوعلي ونظرة غريبة اعتلت وجهه

ونطقها بشكل غير مقنع

-نسوي التحاليل

ابتسمت واني المس كفه

صفن على دجلة لحد متعشينا ورجعنا

نمنا وگعدت الصبح ملگيته بالغرفة

اتصلت بي

-ها عيوني شو ماكو

-موجود

-وين

-جوة جاي اسوي چيك آوت

-بعد وقت 

-شعدنا بعد

-ماعدنا شي بس مستغربة ليش مستعجل

-اني راجع اذا حابة ترجعين ويايه هلا بيچ

واذا حابة تكملين المؤتمر روحي ويه الباص

ومن ترجعين نتفاهم

-لييييش هاجس مو اتفقنا وگلت اجي

وياچ هناك اسوي التحاليل 

-ردت اشوفچ معنى الانكسار شنو

واني اسمعچ بعدنا ببدايتها رحتي

تحچين بيه لأهلچ

صفنت وتذكرت كلامي لبيبي

-سكتتتتتتي تدرين بنفسچ غلطانة

للأسف مو أمينة على سر وهو أساساً

مووووو سر اني واثق من نفسي مابيه

شي والا بوقت الانفجار ووقت عملياتي

عرفت واني مچيك نفسي الاف المرات

-يعني چنت منتقم لأن حچيت لبيبي

حچيت مووو افشي سرك ولا انتقص منك

بيبي هي الوحيدة اللي احس نفسي

وياهة كأنما احچي ويه نفسي

مجرد ردت نصيحتها

-مهما كان افشيتي سر بينه بوقت اللي

اني احترمت كلامچ وماانطيت بيچ

رغم غلطچ

-يعني سويتها وحدة بوحدة هاجس

وصدگ تاركني لوحدي أرووووووح 

- رووووحي لييييل روووووووحي

مسيتي كرامتي بتصررررفچ الخطأ

-يعنييييي انت جاي تسد باب

الحياة بووووجهنا بهذا كلامك 

بوقت اللي اني اعتذرت عن غلطي

وسويت اللازم حتى اصححه من طلبتك

طلب بسيط انتفضت 

- اكيييييد انتفففففض

وأسد بدال الباب عشرررر أبواب

إذا شفت بفتحهن ذلة لـنفسي

أبيع الدنيا واللي بيها

ولا أشوف كرامتي تنهان بلحظة

-حتى لو الثمن اني

-اعتبريني بااااايع 

گالها وغلق الخط

بس بغلق هالخط راح تنفتح هوووواية أبواب

أبواب مچنت أدري بوجودها أصلاً

الفراغ اللي تركه صوت الخط وهو ينغلق

چان هو الهدوء اللي يسبق العاصفة

العاصفة اللي راح تقتلع كل شي بنيته ويا

وتبني على أنقاضها حقيقة جديدة

الفصل الثلاثون من هنا