رواية ذاري النجوم الفصل الثلاثون 30 بقلم زهراء السراي

كم خاب ظني بمن أهديته ثقتي

فأجبرتني على هجرانه التُّهمُ

كم صرت جسراً لمن أحببته فمشى

على ضلوعي وكم زلّت به قدمُ

فداس قلبي وكان القلب منزله

فما وفائي لخلٍ ماله قيمُ

:

:

:

:

:

:

:

ليل

✥━━━༺✦༻━━━✥

دهوك

اليوم الأخير للمؤتمر

الساعة العاشرة صباحاً

واگفة گدام شاشة العرض

اعرض صور اطفال مصابين

بالحصبة وجدري الماء

شلل الاطفال وغيرها من الامراض

افتتحت اليوم الأخير من المؤتمر

بالتوعية عن امتناع البعض عن تلقيح

الاطفال جليت صوتي وبديت القي

اللي كتبتة بسلاسة

الزملاء الأعزاء والحضور الكريم

أقف أمامكم اليوم ليس فقط كمتحدثة في هذا المؤتمر الطبي الموقر

بل كصوت يحمل أمانة أجيال لم تملك بعد حق الاختيار

المسؤولية الملقاة على عاتقنا گاطباء اطفال

عظيمة لأننا نتحدث عن لسان اطفال لا يتقنون

الكلام بعد

عندما نتحدث عن عدم تلقيح الأطفال

فنحن لا نتحدث عن مجرد قرار شخصي أو وجهة نظر عابرة

نحن نتحدث عن ثغرة في جدار الحماية العالمي

إن العلم الذي بين أيدينا اليوم لم يأتي بمحض الصدفة

بل هو تراكم لقرون من البحث لضمان ألا يضطر طفل في القرن الواحد والعشرين للموت بمرض كان بالإمكان تفاديه بوخزة صغيرة

عرضت صورة طفل مصاب بشلل الاطفال

وكملت

إن غياب اللقاح يعني ترك الطفل في مواجهة مباشرة مع أوبئة شرسة

والنتائج ليست مجرد تعب عابر

الطفل غير الملقح يعيش بجسد مكشوف أمام فيروسات مثل الشلل الحصبة والدفتيريا

بعض الأمراض التي ينجو منها الطفل قد تترك ندوباً لا تمحى

من فقدان السمع إلى تلف الأنسجة الرئوية وصولاً إلى الشلل الدائم

اعزائي الاطباء لا يمكننا تجميل الحقيقة

الأمراض المعدية التي نكافحها باللقاحات لا تزال قادرة على حصد الأرواح في غضون أيام قليلة

وخصوصاً لجهل بعض الاهالي لأهمية

اللقاح او تصديق البعض للخرافات السائدة

عندما يختار الوالدان عدم تلقيح طفلهما

فإنهما لا يخاطران به وحده بل يحولانه إلى حلقة ضعيفة في سلسلة المجتمع

اما عبر شاشة المؤتمر اقول عزيزاتي الامهات

إن تلقيح طفلك هو عمل من أعمال التضامن الإنساني فأنت تحمي طفلك

وتحمي معه الطفل الذي يعاني من ضعف المناعة ولا يمكنه أخذ اللقاح طبياً

الزملاء الأطباء واجبنا اليوم ليس فقط العلاج

بل التوعية الشرسة ضد سيل المعلومات المضللة

إن الخوف من اللقاح يجب أن يتضاءل أمام الرعب الحقيقي من عودة أوبئة ظننا أنها أصبحت جزءاً من التاريخ

دعونا لا ننتظر حدوث الكارثة لنعرف قيمة الوقاية أطفالنا يستحقون مستقبلاً خالياً من الأوجاع التي يمكننا منعها اليوم

شكراً لكم

بعد التصفيق نزلت اني وبعض الاطباء

للحضور اللي اغلبهم امهات

نوزع نشرات توعوية عن امراض المناعة

واللقاحات المطلوبة خلصت وطلعت

للغرفة أتجهز للرجعة

باوعت لملابسي وياهن قميصه

باقي گعدت لازمته بيدي

واسترجعت كلامه وهو يغلق الخط

وره ربع ساعة رجع

لگاني گاعدة اجهز جنطتي

وبعد كلامه مافتحت شفافي بحرف

مجرد سفطت ملابسه على جهة من السرير

وخليتهن وياهن عطوره وساعاته

وفرشة اسنانه وحتى منشفته

بلا كلام سحب كل شي وفهم

قراري بأني رايحة فعلا اكمل المؤتمر

كرامتي متسمحلي بعد اللعبة

اللي سواها اني اتغاضى وأنسى

سحب ملابسه خلاهن بجنطة صغيرة

چنت مخليه بيها احتياجاتي الشخصية

فتح محفظته طلع مبلغ خلا عالميز

وخطى خطوات حتى يطلع شلت الفلوس

وصحت وراه

-لحظة انتظر

التفت وگفت يمه بلا مااباوع

خليت الفلوس بالجيب الجانبي

للجنطة

درت وجهي ادخل جوه طلعت وره

ثواني على صوت الباب اللي انضرب

بقوة وهو يطلع والفلوس مشگگة

قطع صغيرة ومتناثرة عالأرضية 

انهاريت تعبانة عالسرير الموقف چان

مجحف بحقي هووايه طريقته بالتلاعب

بيه وخلاني أمنت واخر شي يقرر يتركني

لوحدي ويرجع كل شي عبالك حلم

ممصدگة شلون قبلها علية يتركني بوحدي

استجمعت قوتي وكملت الى أن طلعنا

بالباص طول الطريق تفكيري يعيد

ويزيد بالصار وليش هيچ كبرت الأمور

اليومين البعدها صارت عبارة عن

مجموعات توعوية

وسيمنار

وهواية امور تخص الصحة

العامة 

اليوم الاخير افتتحته اني بموضوع

اللقاحات ومدى تأثيرها عالاولاد

واخيراً اجاني الأتصال ان انزل

نزلت مثقلة بالتفكير وطلعنا راجعين

مجموعة احنه خلصت الطريق هدوء

مطبق ماناقشت ولاحچيت وهو ولا

اتصل واني كذلك بس ماما وبيبي

وغيد

وصلنا صار نزولنا بجانب المستشفى

ومنها اخذت تكسي راجعة للبيت

سيارته موجودة فتحت الابواب

گاعد بالمطبخ يتصل فتت بلا حتى

مااباوعله لأن دخولي چان بالليل

خليت الجنطة بالغرفة طلعت ملابس

دخلت الحمام سبحت وطلعت لگيته

متمدد عالسرير يتصفح سحبت مخدتي

وطلعت لحاف واحس نظراته تتابعني

طلعت وياي تلفوني وشاحنتي

سديت باب الصالة وبلا تفكير

نمت صحيت على صوته وهو يدگ

باب الصالة صحصحت وگمت

فتحت الباب وهو يحچي بالتلفون

-لا عمة مابيها شي بس رجعت نامت

وغلقت جهازها

دفعلي التلفون ومشى رديت

-ها حبيبتي

-ظل بالي ياماما ليش هيچ

غير تطمنيني

-ماادري بنفسي والله من التعب

جريتها نووووومة 

-تردين ادزلج اكل طبخت دولمة

وبرياني وتشريب لحم بيت ضرغام

يمنه اليوم

-ياريت مااگدر اسوي شي

هواية تعبانة

-هسه ضرغام يجيبة الچ انتظري

راح اصبلچ بسفريات

-ليش ماما بيش الساعة هسه

-ب١١ ونص ماما صحصحي لزوجچ عيب

الولد بلا ريوگ ولا غدة 

-ان شاء الله ماما هاي گعدت

غلقت الاتصال وطلعت للغرفة خليتلة التلفون

عالكومدي بصفه

واخذت منشفة وغسول رحت غسلت

ورتبت اموري رجعت للبيت على كيفي انظف

اندگت الجرس طلع هو واسمع صوت ضرغام

ماطول بس دخل سلم عليه وراح

گعدت ارتب الاكل بصحون هو گاعد

عالميز تلفونه بيده ويدخن ويدري بيه

اتنرفز من الدخان خليت الصحون گدامه

وگعدت اكل وهو ياكل مگدرت اكل اكثر

من كم لگمة كأن الصار صعد على بلعومي

خنگني متحملت تصرفه حمدت رب العالمين

وشلت الصحون فرغتهن وسويت چاي

هو كمل جاب صحونه فرغهن خلاهن

داخل الحوض

غسلتهن صبيت الچاي خليتله كوب

واخذت كوبي للصالة وياي سديت الباب

وتغطيت بعد ماشربت الچاي راجعة

للنوم

وهكذا مر اليوم البعده دوام

ودراسة واسبوع مر صمت مطبق لا اني

احچي ولا هو واجباتي قايمة بيها

وهو يتصرف طبيعي يتسوگ يطلب

اسويله ملابسه بس مااحچي ولا ارد

صارت ٨ أيام بالصالة دفع الباب بلا

كلام سحب اللحاف والمخدة بعصبية

وطلع رجع واگف بباب الصالة يلقي

كلماته بسرعة كأنه يأمرني 

-ممنوع الگه فراش بالصالة النوم بغرفة

النوم فقط 

مارديت وفعلا رجعت للغرفة

لكن عالقنفة بجانب الشباك وكأن شيئاً لم يكن

برود صابني بعد تصرفة رغم قهري بعدم

موافقته عالتحليل وكلامه الجارح بأني

اهنت كرامته بكلامي ويه بيبي

بس الجرحني اكثر شلون تركني ورا

ورجع بعد مچان يدري اني رايحة وياه

وفرحانة لأن سويه اجه لگاني عالقنفة

گاعدة مگال اي شي

بس اني چنت احسب فلوس

اتصلت بوطن 

-ابو ليان تگدر تجي هسة

اندگت الباب لبست عباية الصلاة

وطلعتله هو طلع ورايه يتابع شسوي

-هااااي فلوسك مقصرت والله

-اني گتلچ وگلت لغيد اذا رجعتيهن

تنسسسين عندچ اخو أسمه وطن

-والله ازعل منك كافي بس ركضتك

وانت تدور مكتب يحولي الفلوس

مقصرت 

گوة اخذهن وطلع التفتت هو واگف يستمع

بباب الغرفة

-شفهم من تصرفچ هذا

-اللي يجي على بالك افهمه

-عدلي اسلوبچ واحچي عدل مثل مجاي

احچي وياچ

-شفهمك مثلا عادي احتاجيت مبلغ

جوه ايدي علما ارجع دزيت على وطن

حولي وهسة رجعتهن

-وبنفس الوقت ترفضين المصرف مني

وتحقريني بتصرفچ

-شتشوف انت حلو لكرامتي اخذ منك

فلوس تعويض عن خذلانك وموقفك 

ويايه واني هناك

بفلوس تعوض مكانك وانت راجع 

وتاركني بحيرة 

-تحسبينه تعويض

-عالعموم ماكو شي يعوض الصار

لافلوس ولا اعتذار

-وتطالبيني بأعتذاااااااار رغم غلطچ

أنتِ

-تمام اني الغلطانة 

رجعت للغرفة رجع ويايه

-الغلط غلطچ لتحمليني اي شي

تبعات تصرفچ وانت رايحة تحچين

لأهلچ عن موضوع لازم يكون بينه

-مااعرف شگول ردة فعلك بحقي وانت تاركني

بعد ماأملتني چانت كسرة چبيرة لگلبي

عالعموم الموضوع محسوم ومبي نقاش 

-اكيد محسوووووووم ولو تنزل كائنات

تگول حياتك واگفة عالتحاليل مااسويها مدام

طلعتي سرنا خارج البيت

-تمام

دخلت تحت اللحاف هادئة ساكنة

بس صدري من البچي يرتفع وينخفض

واني حاصرة العبرة اللي تكسرت

بداخلي بعد كلامه

ومرت الأيام اتسع بيها البرود

وهاجس ماحاول ولو محاولة

للاعتذار عالاقل على موقفه وهو تاركني

لوحدي وفشلتي كدام زملائي وحتى اهله

اللي يعرفون بي اخذني بس تركني

وبيوم خفارة وفوضى اتصل بيه

نوح

-هاجس ماخابرچ

-لا مامتصل ليش صاير شي

-ماكو جهازه مغلق وحتى بدوامه

ماكو

-صدگ تحچي وين راح

-والله ماكو هاي احتاجيته بموضوع

ومن الصبح لهسه ماكو حتى بمصعب اتصلت

ودعت نوح واتصلت بي جهازه مغلق

اكو رقم خاص بالدوام محد يعرفه وهذا

لازم مفتوح على طول اتصلت بي

دگ دگ وماكو رد رجعت اتصلت

دگ وانرفع الخط اجه صوته مبين ضايج

-نعم

-انت وين ظل بالنا طول اليوم خطك مغلق

-عندي شغل ببغداد يومين وراجع

-تمام طمن اخوانك ظال بالهم

غلق الخط قبل لا اكمل كلامي

واليومين من اتصل يرفض الاتصال يدز

رسالة مضمومنها راجع ماكو شي

بالليل ثاني يوم فتح الباب سلم

رديت السلام دخل غير ملابسه وطلع

لبيت جدو وتأخر اني نايمة عالسرير دخل

سحب مخدة ولحاف وراح للقنفة بلا كلام

حتى من سألته يتعشى اشر براسه بمعنى

مااريد

احتاريت الغلط مني منه او تراكمات

وبدت هسه تظهر هسه

ثاني يوم اني ماعندي دوام بس هو دوام

گعدت اسوي وجبات للأيام الجاية تفيد

واوفر وقت على نفسي

وهم مارجع من الدوام الفجوة زادت

والبرد حل مكان الدفو وعزف البرود

لحنة بحياتنا لدرجة ترجف الأوصال

الصبح اني طالعة للدوام هو رجع تواجهنا

بالباب مثل الغرباء حتى ماباوع بوجهي

طلعت تاركته بطريقي للدوام

بعدني مواصلة ودگ عليه

استغربت شنو متذكر

-الو

-جدي ماادري شبي ومايقبل نروح للمستشفى ونوح بعده بالدوام اذا تگدرين رجعي

-تمام راجعة بس انت اتصل بالأدارة

رجعت للبيت مباشرتاً دخلت لبيت جدو

دگيت باب غرفته ودخلت هاجس مگنبص

گدامه يفحص رجلي ومتوتر

-جدي رجليك مورمة وكفوفك

قاطعة سلامي

-السلام عليكم هااااجدو شصاير

تقربت بسته وعيني علي

عيونه وارمة ايدي وارمة ورجلي كذلك

فحصت ضغطه عالي سكره طبيعي

-جدو ادرارك طبيعي

-اي جدي

-شماكل عالعشا

-طماطة مشوية وخس تدرين لا ملح

ولا شكر

-جدو لازم ناخذك للفحص

-مستشفى مااريد

-لا جدو للعيادة بس كم تحليل اخاف مرتفعة

اليوريا

باوعلي هاجس خايف عيونه مستفسرة

طلعنا جبت لجدو مي وهو ورايه

-شبي

-ممبين ومنعرف الا تحاليل وفحص

-اعرف بس انت شتحسين

-الاحتمالات هوووايه

طلعت وديت المي لجدو

ورجع مدد تركناه يرتاح ورجعت للبيت

اغير ملابسي دخل ورايه

-فهميني مافهمت شي

-ظهور التورم بالقدم والعين

والادين اشارة على احتباس سوائل

عام

-بس هو ماعنده لا صداع لا اعراض مرض

-مو شرط اعراض والام

اكو هوايه اسباب غير محسوسة مثلا

تسرب البروتين للدم مسبب الزلال اللي يخلي

الجسم يتورم بهالشكل اكل شي بي املاح مخفية

ممكن تراكم السوائل بسبب احتباسها بداخل الجسم

خمول الغدة الدرقية وهذا مستبعد

-ليش

-التورم بسبب الخمول من تلمسه وتضغطه ميبقى

اثر لأصبعك عالجلد

بس بحالة الضغط وامراض الكلى شفت من اضغط ايد جدو يبقى ثواني الجلد داخل مثل الحفرة ويرجع لطبيعته

-شنسوي هسه وضعه مايطمن

-تحاليل وظائف كلى وتحليل زلال

صورة دم وهوايه امور ان شاء الله ماكو

شي

طلع راجع لبيت جدو ورجع وره نص ساعة

بيده دشداشة جدو

-تگدرين تكوينها ابوي ومرته رايحين زيارة

لأهلها

-يتدلل

كويت دشداشته ورتبتها شويه ودگت

غيد

-ها ليل شبي جدو هسه نزلت

ماادري بي وطن خابرني گال ديري بالج علي

لگيته نايم

-شويه مريض العصر ناخذه للدكتور

-شو خفت

-ان شاء الله ماكو شي

ليونة كاعدة

-خل تولي هالعرمة صار ساعة ونص من

نامت

-حديثي الولادة يشلعون الگلب

ودعتني وراحت واني طلعت فطيرتين

وسويت چاي هو گاعد بره يدخن

هالايام يدخن بشكل مفرط

مديت راسي من الباب

-تتريگ

-جاي دقيقة

دخل اكل ثواني دگ تلفونه عمو

-ها يابه لا لا ماكو شي مجرد ارتفاع بسيط

عليمن هو يوم كمله وتعال اني راح

اخذه للدكتور

ودع ابو واتصل بنوح خلا حجزله يم دكتور

معروف بكفاءته

الظهر مخلينا ياكل غير شي بسيط

للعصر اني وهاجس ووطن طلعنا بي

للدكتور وبعد تحاليل وفحوصات تبين

فعلا تسرب بروتين وزيادة لزوجة الدم

كلها الها تاثير كتب مجموعة علاجات

وتوصيات راح نتبعها بحذافيرها اني

والبقية حتى تعدي الأزمة

وصلنا للبيت دخلنا لغرفته

نسولف وياه ودخل عمو خطيه ماتحمل

رجع لوحدة تارك زوجته يم اهلها

عماتهم بعدهم محد مبلغهم

يمنى بالدوام لذلك مواصل الخبر

الكل قلق گعدت اني اشرحلهم 

-والله الموضوع بسيط العلاج واضح

-شلون عمو وهو منطي هالگد

-شوف عمو كثرة العلاج مو معناها المرض اشد

انطى مثبطات  ARBs

هو صح علاج ضغط لكن نگدر نگول يريح فلاتر الكلى

ويقلل كمية البروتين المتسرب للدم

مدرر حتى يتخلص جسمه من السوائل 

وعلاجات التهابات بسيطة تساعده يتخلص

من هالتعب بسهولة

-وبعد شگال

-بس ننظم اكله ملح قليل جداااااا

لحوم نقلل اللحوم الحمرة نعتمد عالدجاج

والسمچ قدر الامكان وهم نخففهن

خضروات فاكهة بس هم لازم نسيطر على

سكره وضغطه بمستوى واحد معتدل

وزيادة الدم طلب يتبرع جدو 

وممنوع اي مسكنات الم بروفين فولتارين ونابروكسين وهاي هي والله ماكو اي قلق

بقينه نسولف ويه جدو وهو مطمأن لكلامنا

غيد مجهزتله عشة خفيف انطيته علاجه

وتركتهم ورحت للبيت بعد ماوصيته عالاقل

من ينام يرفع رجلي ولو عشر دقايق

رحت غيرت ملابسي

وجهزت عشا لگيته هم بالحديقة

يدخن

-تعال تعشى

-مااشتهي اكلي انتِ

واني هم انسدت نفسي وگفت الم الاكل

خليته بالثلاجة ورحت للمكتب عالحاسبة

اشتغل

دخل هو طلع ملابس الدوام شال غراضه

مسدسه وتلفونه واي شي يحتاجه

وطلع وصل الباب تراجع وهو داير وجهه

گال

-اني رايح يم جدي ابات

-اخذ راحتك

سد الباب وراح واني استمريت اشتغل

بس تعبت سندت راسي عالميز

بعد وقت حسيت بأيده تريد ترفعني

فزيت واستمر هو شالني للفراش

-نامي بفراشچ

ماگلت لا غطيت بالنوم وگعدت

على صوته

-ليل ………ليل

فزيت صارت عيني بعينه لابس ملابس

الدوام

-روحي لجدي اذا تگدرين بس عينچ

علي

-تمام 

طلع لدوامه واني لبست ورحت لگيت

وطن ونوح ويمنى وغيد كلهم گاعدين

يمه صبحت علي وجهة احسن بس رجلي

بعدها وارمة

-شلونك اليوم جدو

رد نوح

-ضغطه طبيعي وسكره فحصتله

بعد الريوگ

اني انطيته العلاج والكل راح لشغله

واني وغيد يمه ودخلت نهاد واختها

-ياااااابه

شمرن نفسهن علي يبچن وهو يطبطب عليهن

تركتهم وصلت باب الترك واجاني صوت

نهاد

-شنو معناها لا انتِ ولا رجلچ حچيتو

شنوووو تضمووون علينا 

-مو بس اني ورجلي ندري عمة

ولأن انشغلنا وياه وانت موجودة دائما واكيد راح تعرفين

-شنووووو قصدچ موجودة دائما مثقلة عليچ

مثلاً

-ماكو قصد عمة وهاي عرفتو وان شاء الله ماعنده

غير العافية

تقربتلي عصبية

-شوفة الحال على عيالچ عيب لاتردين

من طرف خشمچ

-رديت من حلگي عمة محد يحچي

من خشمه من رخصتچ

تركتها ودخلت للبيت شگد مستفززززززة

استمريت اقرأ للظهر رجع هاجس بملابسه

راح لجدو اطمأن ورجع

وهيچ استمرينا لمدة اسبوع من تحسن

جدو وكل شي ضبط اتصلت ببابا

بعد مااسـتأذنت من جدو وعمو

وفعلا حددو موعد يوم جمعة يجون

لذلك هاجس وعمو كمال كالو نسوي غدة

لوجه الله تعالي عن سلامته

وبدينا التحضيرات واني ايدي 

وياهم شلت الشغل عن البنات خطيه

بسبب الاطفال رغم احس نفسي مالي خلگ

السمچ شوو بره

سوينه سوب لحم والبرياني

والمقبلات واني واگفة وياهم

لحد مااجو اهلي بابا وضرغام

وماما وبيبي وحتى خالو عبد الله

لأن علاقته قوية ببيت عمو كمال

والتمت العوائل سفرة الرجال بالصالة

واحنة بالهول بس بيبي يمهم

هي وجدو مخليلهم طبلة ياكلون

اكلهم خاص

اني انشغلت بالمطبخ بقيت اعزل

سويت الچاي ورتبت المطبخ بحيث

بس تجي الصحون اساعدهم بغسلها

شويه وصاحني هاجس يم غرفته

-بس العلاج اللي بعد الاكل

دخلت غرفة جدو وطلعت انطيته

اله رجعت يمهم للهول

يسولفون گعدت عالطرف يم

ماما

-ليش متاكلين ماما

-مااشتهي معدتي تأذيني احس فلاونزا عندي

ردت نهاد

-خاف حامل 

رجعت ميعاد من يمها

-لا مامبين عليها هسه

شوفي يمنى بس عرفت بين على

وجهها الشحوب

رفعت عيني ليمنى مبتسمة

ردتلي الابتسامة خجلانة وباحراج

حچت

-تفاجئت اول البارحة من حللت

-حبيبتي تتهنين يارب

-زيوني بعده صغير 

ردت امها

-واني وين رحت سويهم عشرة ماما

يكبرون سوه وهم ولد ان شاء الله

شو غيد جابت بنية وليل لهسه مابينلها

خبر عاد انت كبري هالعائلة باطفالچ

ماما كفت ايدها من الاكل وحمدت رب العالمين

-الحمد لله سفرة دايمة

گمت ويه ماما تغسل

-هاي دائما هيچ بسامير وحچي

-ماما اني مااهتم مو طفلة حتى اهتم لهيچ تفاهات

-سممن عيشتچ ياامي

-ولا يمهن اني ببيتي

-لا تبقين تاكلين بنفسچ ردي عليهن

-اقلل من قيمة نفسي يعني

-لا اخذي حقچ

على صوت عمو كمال يصيح

-وين ليل تعاي بابا

دخلت مستغربة صاحلي جدو

-تعاي گعدي يمي

گعدت يمه باوع لهاجس

-ابوچ طلبچ من عدنا ياخذچ تشوفين

اخوچ بتركيا قبل ليروح لأوربا

باوعت لهاجس مواضح علي الموافقة

من عدمها جدو باوعله

-شگلت هاجس شو ماسمعتلك حس

-شتدري جدي امنعها من اهلها

طبطب بابا على كتفه

-ابن اصول احنا هم مانتأخر كلهن خمس أيام

وراجعين بالسلامة

سأله عمو كمال

-يمتى

-بعد اسبوعين ان شاء الله

طلعت تاركتهم ورحت للهول

الكل سامع والبنات يتشاقن

-لتنسين جيبلينه وياج مهند

-اااااخ لا لا جيبي حلووويات حلوياتهم

تجننن

الوجوه تگلبت ميعاد واختها

اني ماعرتلهم اهمية لان الموضوع خاص

غيد بنتها نايمة وزيوني يم نوح

والبنات گامن لمن الصحون بچت بنت غيد

-صعديلها اني اكمل يلا روووحي لتخليها

تبچي

اخذت الصحون بعد ما ماما راحت يمهم

بعدني مداخلة اسمع نهاد وميعاد ويمنى

دايرة وجهها للسنگ

-عفيييية بنية ماگاعدة بالبيت يادوام

يافرارة ومؤتمرات ياسفرات ادور الموديل

رايحة لتركيا واخر شغلة سوتلها حادث

من الدياحة

-چناين اخر زمن

بس ردت ميعاد اني دخلت بدون اي

صوت عالي رديت بهدوء

-شنووو عمة

التفتت ويمنى وجهها فلت من الخجل

وگع من ايدها الصحن للسنگ

-شنووو عمة طلعتي طبتي حياتي

مسبباتلچ ضرر مأثرات على حياتچ بحيث

لهالدرجة مشغولة بيه وتتبعين أخباري

رفعتلي حاجبها وتخصرت واگفة وتركت

الصحن من ايدها

-ممأثرات على حياتي مأثرات على حياة

رجلچ شتشوفين رجلچ رااااضي 

-مشتكيلچ هوو طالب منچ تعاتبيني

گالچ مرررراضي 

يمنى تسحب بيها تحاول تنهي الموقف

-ماما روحي يم الخطار عيب يلة 

دفعت ايد يمنى حيل وترجف عصبية

كأنها محملة بگلبها علية

-وخررري ايدج العيب على اهل العيب

شنووو عبالچ ولد اخويه هينين عليه

انيييي ربيتهم على ايدي وكبرتهم

شتلتي هاجس علمود الخلفة وگلتي لحد مااكمل

سنة وگالچ ميخالف

بچه زيون وصوت نوح يصيح

-تعاي يمنى نومي زين نعس 

يمنى احتارت اضطرت تطلع راكضة

واني رديت 

-شنو هالعشم البينه حتى تعاتبيني او

تحاسبيني شو من اول متزوجت انت كارهتني

ولا زلتي بعد شنو اساس كلامچ هاجس

موصيچ تكونين محامية عنة 

-هاجس مايحتاج يوصيني ولا اني محامية اني اعررف ابني اني ربيته انت لو بيچ خير گابلتي

من تمرض مو تتهزمين لأهلچ سفرات وعزايم

وتاليتها تكسرتي بحادث من الفرارة

دخلت يمنى راكضة ابنها بيدها خايفة

كممت حلگ امها تسكتها

-كاااافي ماما فدووووة كافي

صفنت بوجها

-اني تاركه هاجس مريض

يمنى تسد بحلگها وهي دفعتها وتقربتلي

تحچي بتشفي 

-لو بيچ خير گابلتي چان عرفتي شبي

انت واصلة مرحلة من الاهمال

بحيث راح سوه عملية عشر ايام

ورجع وانت متدرين مثل الثولة 

تغاضيت عن تجاوزها والتفتت ليمنى احس صوتي اختفى

-عملية لمنو

يمنى لطمت خدها خايفة

-والله ماكو شي ماكو يووووم فدوووووة

كاااااااافي

ولا اهتمت رجعت تحچي وتبث سمها

بحجة الاهتمام

-اصحي على زمانچ زلم اثنين

راحو وياه ويگولون يصيح ويستريح

من الالم عشر ايام ماحسيتي برجلچ بي

شي لو بس من تشوفينه يحچي ويه اليتيمة

روان تتحسسين

احاول اتمالك نفسي ويه طلعة ميعاد

من المطبخ وهي تسحبها شاحب وجهها

وتهمس

-شسوووويتي مو گالتلچ بتج لتحچين

طلعو وباوعت ليمنى وجهها تغير لزمتها من ذراعها

-احچي يمنى 

صوتي اختفى وهي حارت شترد

-والله يموتني نوح فدوة مااگدر والله

-بس ردي رد من راحو لبغداد علمود منو

- مو علمود احد ليل والله ……

-والله هسه اصيح الكل واواجههم ويه امچ

اذا مگلتي

كممت حلگها خايفة وردت بصوت مرتجف

-هاجس

-ليش

-فدوة ماادري كافي

بلعت ريگي بالگوه ورديت

-لهنا وتنتهي خوتنا اذا مارديتي

-التقارير بكنتور غرفة هاجس

القديمة بداعة امج لتگولين اني حچيت شي

طلعت بأحساس بشع يگطع اوصالي

دخلت الغرفة وقفلت الباب من وره

فتحت الخانات وگعت عيني على ملف

كامل بحافظة جلد شفاف بي اسمه

واسم المستشفى من اسم الخدمة

الطبية المطلوبة عالملف فهمت

سحبته واخذته طالعة للبيت خليته بجنطتي

مال الدوام ورجعت يمهم يمنى بس تريد تحاجيني

واني مصطنعة الضحكة لحد مراحو اهلي

تركت كل شي ورجعت للبيت

اخذت الاوراق ودخلت للحمام

گعدت اقرأ بيهن تقارير من أيام أصابتة

توضح بشكل كامل مشكلته من قبل حتى

علاقتنا گعدت صورتها كلها وبديت اقرأ

تقارير المستشفى من بعد عملية ارجاع

مسار الامعاء من تخربط بسبب تجمع

الادرار التقرير يگول

-أصابة في منطقة كيس الصفن لقوى ضغط فيزيائية عالية

مما أدى إلى حصر البربخ بين الجسم الضاغط وعظام الحوض أرتفاع مفاجئ في الضغط داخل الأنسجة مما سبب تهتكاً في الأنابيب الدقيقة دون وجود جرح خارجي بالضرورة

فتحت ثاني تقرير اثناء عميلة المثانة

-لوحظ تضخم شديد في المنطقة التناسلية نتيجة الوذمة النسيجية 

وجود كدمات تحت الجلد واشتباه بوجود تجمع دموي داخل غلاف ال***

الوصف للحالة

ألم حاد يمتد إلى القناة الإربية وأسفل البطن

فتحت سونارات قريتها

- تظهر زيادة في التروية الدموية نتيجة الالتهاب الرضحي 

عدم انتظام في حدود المنطقة مع وجود مناطق تليفية أولية ناتجة عن هرس الأنسجة

لذى يجب التأكد من سلامة الجهاز كامل

واستبعاد وجود تجمعات دموية اخرى

وبعدها وصفات علاج التهابات هووووايه

تخص هالاصابة

وراها بسنة اثناء تعرفنا تقرير يشرح

تطور الخالة

-تحول المناطق المهروسة إلى نسيج ندبي Fibrosis مما يغلق مسار الحيوانات المنوية

كاتبين توصيات علاجية

- استخدام رافعات لتقليل الضغط الوريدي

وتطبيق بروتوكول الثلج والراحة

وعلاج كورس مكثف من مضادات الالتهاب غير الستيرويدية ومضادات التورم لتقليل فرص تكون

تليفات جديدة

وكاتب توصية 

- تتطلب الاصابة مراقبة دقيقة حيث أن الضرر الوظيفي قد يظهر لاحقاً بعد زوال الألم والتورم الظاهري

وتتابعت التقارير سنة تعارفنا وخطوبتنا وزواجنا

كلها الى اخر تقارير اقراهن بصدمة

اثناء سفراتنا لبغداد

اثناء كلامه ان راح يعالج التليفات اللي ببطنة

اثناء كلامه ان رايح ويه مصعب للعلاج

چان عايش تفاصيل كاملة بعيد عني

بشكل كامل بدون ماافهم ولا اعرف سبب

ابعادي عن حياته

وهنا اجت الضربة اللي قسمت حياتي

نصين التقارير الاخيرة اللي تنصح بأجراء

عملية سريعة بتوصية من دكتور ببغداد

حتى يجهزو للعملية

-بعد استنفاد محاولات العلاج التحفظي والدوائي لمدة سنتان للمريض الذي يعاني من تداعيات إصابة هرس وضغط في القنوات الدافقة تبين عدم استجابة الأنسجة للعلاج التقليدي

المريض لا يزال يعاني من أعراض انسدادية واضحة مع استمرار الألم واضطراب في الوظائف النقلية للسائل المنوي

الفحص السريري يؤكد استمرار وجود تليف ملموس وصلابة في منطقة القنوات الدافقة

التصوير المقطعي أظهر النتائج وجود تليفات نسيجية متقدمة أدت إلى انغلاق شبه كامل في مجرى القنوات

مع توسع احتقاني خلف منطقة الانسداد

مما يؤكد فشل المسار العلاجي غير الجراحي

بناءً على التدهور الوظيفي للأنابيب الناقلة وعدم الجدوى من الاستمرار في العلاج الدوائي

تقرر وجوب الانتقال إلى التدخل الجراحي العاجل

الهدف هو استعادة الاستمرارية التشريحية للقنوات المتضررة ومنع حدوث ضمور دائم في الأنسجة المنتجة

وبعدها تفاصيل جراحية كاملة

  -إزالة الأنسجة المتليفة والندوب التي تعيق المجرى

  أعادة توصيل الأنابيب لضمان نفاذية القنوات

  تصريف أي تجمعات سوائل أو ضغوط داخلية ناتجة عن الانسداد السابق

التوصيات 

يجب تحضير المريض للعملية بصفة عاجلة لتفادي حدوث مضاعفات غير رجعية في جودة النطاف أو كفاءة الجهاز التناسلي

توقيع الدكتور وختم بالتاريخ والوقت اللي

گال بي نوح مريض

مسرحية عملاقة عاش تفاصيلها ومثلها عليه

وخفى حالته عني لأسباب مااعررررفها

اني ويييين من كل هذا اني اللي

حبيييييته وراح احبه واسنده حتى

لو عررررفت وراح اختاره حتى لو مبلغني

قبل الزووووواج لأن مو مهم اني حبيييته

بكل خلية بييييييه شلوووون عايش دور

المظلوم بعد ماعرف منعي للحمل

وهو السبب الاول حتى لو تررررركت 

طلعت مرجعة الجنطة للغرفة

بس سرعان مارجعت راكضة

شعور سيء صاب معدتي خلاني

ساكنة الحمام تقيأت حتى شعووووري

اسمع صوته يتذبذب وهو يدگ الباب

مطلعت گعدت بالحمام استجمع

شتات روحي الضايعة لربع ساعة

فتحت باب الحمام شفته واگف

ملامحه اللي چنت أشوفها قوة وسند صارت هسه بنظري لغز مخيف

عبارة عن حايط مبني من أسرار

​باوعت بوجها

چان يحچي وخايف عليه

بس صوته چان يجي من بعيد

كأنه صدى ببير عميق مديت ايدي

لمست ذراعه سندني تجمعت الغصة ببلعومي

وگلت بصوت مهزوز

​- هاجس

نطقت اسمه وحسيت بحرارة اجتاحت بلعومي

تسكتني

- ليش عيونچ هيج ذبلانة

سألني وهو يتقرب راد يلمس گصتي

رجعت خطوة ليوره

هاي اللمسة اللي چانت تطمني

هسه صارت غريبة عليه

​مشيت للغرفة لحگني

-بيچ شي امچ تگول مااكلت ليش هيج

معدتج

-تعبانة اعتقد

دخلت للفراش غطاني واجه تمدد بالفراش بعد

جفاء ايام بينه تقرب اخذني لحضنه

لأول مرة مااحس شي من يحضني

مجرد حركة روتينية بلا مشاعر حرك ايده

على راسي محتار شيگول ردد

- ليش ترجفين

-بردانة

-بحضني وبردانة

مارديت بس هالمرة لأن بحضنه بردت ذاك

الدفو تطاير ويه اول سر خفى عني

غمضت عيني بعد ماحاوطني اقرب

وحضني اقوى محكم قبضة ايدي

ورجلي عليه حتى ابطل رجفة

غطيت بنومة قلقة احس بيها

بكل شي بس مالي خلگ اگوم

اسمع صوته يتصل

-نوح مدامك موجود انطي لجدي العلاج

ليل مريضة مااعرف معدتها وتقيؤ ورجفة

الله كريم هسه اگعدها

ثواني وصار گدامي على كيف يحرك كتفي

-ليل گعدي

فتحت عيوني واستقاميت گاعدة

-غيري ملابسچ اخذچ  نجيب علاج

-لا ممحتاجة شغلة بسيطة بس بنادول وخلص

-غيري ملابسچ بلا عناد 

لبست وطلعت ويا توقف يم صيدلية ونزلني

وياه

گلتلهم شريد خلولي الكانولا وطلعنا

راجعين للبيت خلالي العلاج وطلع رجع بعد

ساعة بيده علاگة بيها اكل شوربة ونواشف

مشويات

-اكلي

-مااگدر اكل شي 

فتح الشوربة رفع الخاشوگة لحلگي

غصيت بعبرتي شربتها ووگعت دموعي

بعدت ايده بقى ساكت يستغفر مد ايده

بوحدة ثانية وثالثة بالرابعة ماتحملت

اشرتله بسرعة جاب سلة خلاها يمي تقيأت

ثواني ورجعت مرة ثانية من گد الألم اللي لزم

معدتي انكفيت على نفسي منحنية وحتى

النفس اللي يدخل صدري شح عليه

-لييييييل

رفعني لحضنه يعدلني يمسح وجهي

اللي تعرق فتح المحلول وگومني ويا

للحمام غسلت بلا طاقة ورجعت للفراش

رجع المحلول وعلى اثر تعبي غطيت بنومة

عميقة صحيت منها بمنتصف الليل باوعت

ساعة ثلاثة گمت من مكاني لزمتني

دوخة گعدت بسرعة عالسرير اللي تحرك

مفززة ويايه

-ليل

گعد واجه من ناحيتي

-شبيچ

-اريد اغسل واشرب مي عطشانة

گومني وياه طلعت للحمام غسلت

ورجعت للمطبخ بيده گلاص المي شربت

-جوعانة تاكلين شي

-اريد شي بارد

-اكو كاسترد من الغدة

-اي

طلعة خلا يمي جاب خاشوگة

وگابلني وگعد يباوعلي بأستغراب

-ليل

-هممم

-احد محاچيچ بالعزيمة اكو أحد مضوجچ

-لا بالعكس

-ليش تخربطتي

-توتر ذيچ الايام بين عليه

هسه

وگفت تاركة كل شي راجعة لفراشي

ثواني واجه بصفي بلا كلام مد كفه

محتضن كفي ضاغط علي بهدوء

رفعة باسه ونزل ايده اثنينه صافنين

بالسگف بلا كلام بس صوت انفاسنا

يصدح بالغرفة اثنينه مگدرنة ننام

حركت نفسي التفتت نايمة مقابيله

هو عدل نفسه صرنه وجه بوجه

امتدت ايده ترسم ملامح وجهي

بدقة مرت على اجفاني ورموشي

وخدودي وشفافي تلمسها برقة

وطبع بوسة سريعة عليها وابتعد

بعد ماشاف مني عدم استجابة

انطيته ظهري ادعي النوم الى

أن صار الصبح صافنة باللي

شفتة والحيرة مالية صدري احنه

مو شركاء حياة مااكذب ولا انكر

اني بعدته بوقت من الاوقات 

من تصرفت بوحدي بمسألة المانع

بس اللي مسوي هو متجاوزني

شخصياً وقاصيني من حياته

كأني عدو

طلع لدوامه واني بالبيت

لهيت نفسي بالشغل بس گلبي

احسه مقبوض والسكوت راح يموتني

الى أن رجع العصر اطمأن عليه

وطلع لبيت جدو اللي الكل مجتمع

يمه نهاد وميعاد وبناتهم والاحفاد

اجتني غيد حتى اروح يمهم رفضت

شويه ودخل هاجس

-راح نجيب عشا يم جدي مجتمعين

شتگولين

-مااگدر اخذ راحتك يمهم

دخلت الغرفة لحگني سحبني

گعدني لازم كفوفي

-اللي صار بينه هو ذبلچ هيچ

وطفاچ

باوعت لعيونه شلون ممكن العيون اللي

نحبها تباوع لداخل ارواحنا وتكذب بسهولة

-لا بعد نسيت الموضوع خليها

للوقت اذا اراد ربنا اراد الحمد

لله واذا لا فكل خطط رب العالمين

النا حلوة والسويته انت تشوف نفسك

الك حق بي اذا منتهين

وجهه تغير وضاج وگفت سحبني مرجعني

-السويته مجرد رد فعل للي سمعته

تظنين مااحس وانت رايحة تحچين

لأهلچ موضوع خاص بينا ماراح تنجرح

كرامتي ماراح اتأذه من اشوف نظرات 

الاستهزاء او الشفقة بعين الكل

باوعت بعيونه واجت لحظة الحقيقة

ماعاد للسكوت مكااااان بحياتي

مديت ايدي مسحت على خده

ابتسم بظن منه اني راح اعتذر

-وانت مااذيتني من كل عائلتك تعرف

انت مريض

صفن مستغرب نزلت ايدي من خده

وعيني بعينه

-مااذيتني واني اسمع من الاخرين

انك رحت سويت جراحة بالايام اللي

اني وبكل غباء اظنك ويه نوح

وانت ماتحس بنظرات الشفقة اذا عائلتك

صغار وكبار تعرررف بحالتك واني لا

وگف يريد ينتفض

بكل هدوء وگفت گباله وخانتني دموعي

و بلغت القسوة منتهاها

وتحول العتب لصرخة مكتومة بحنجرتي

-الملامة واحساس الذنب والخيبة

والبرود والتلاعب ………

قاطعني عصبي

-منيييين جايبة هالكلام ………

اشرتله واني التقط انفاسي

-اشششش الكلام اليه مو الك هاجس

تلومني وأنت تباوع بوجهي وتگلي تحملي نتيجة

خطأج وتخليني أحس بنقص بانوثتي

وتخليني أطوي الليالي وأني مكسورة الخاطر

ألوم نفسي بسبب تسرعي

وطلعت انتتتتتتت السچين اللي تذبحني

بملامتك وانت القاتل

تجمدت الدموع بعيني من شدة القهر

صار الكلام يطلع همس متعب

-چنت تمثل دور الصابر المحتسب

وتخليني أعيش بدور المقصرة الذليلة

كم مرة شفتني أبچي لأن جرحتك

شلون گدرت شلون گدرت تباوع بعيوني وأني أحترگ وتزيد النار حطب بلومك وزعلك وبرودك وجفاك

گعد مو گادر يرد اصلاً

-بعت سرك لأهلي يا سر

أنت بعت شرف الكلمة وأمانة العشرة

خليتني أروح لأطباء وأدخل بفحوصات

وعلاجات وأنت ساكت تباوع عليه

وأني أتعذب بسبب احساسي بالذنب ناحيتك

وحتى من انحل الموضوع واساسا

تأخير الحمل لا يذكر مكملنا سننننة

اكو ناس تتنظر لأعوام

رغم هذا قسيييت ويايه لدرجة

خليتني اسأل نفسي معقولة

ذنبي چبير لهالدرجة

يخليك متسامحني

وبكل صلافة تعااااااتبني

طلعت بره احس روحي طلعت

ركض ورايه فرني علي بسرعة عيونه

محمرة غضب اصابعه نبتت بذراعي

-خليتچ بررررراحتچ تحچييييين وتخربطيييين

يامرض ياعمليييية

-بعدددددك مصر تكذب هااااااااااجس

اني زوووجتك اني الاولى بمعرفة كل شي

يخصصصصك

-لتقلبين الطاولة خلافنا كله لأنچ اهنتي رجولتي يم اهلچ هالخرابيط اللي تحچيها منين جايبتها

-رجولتك اللي خايف على كرامتها

چنت تبنيها على حساب حطامي ونفسيتي

من بداية هالزووووواج

-صووووووووتچ

رفعت صوتي منهارة

-ايييييييي صووووت هذاااااا اللي محد

سمعه كم جرح وكم كلمة قاسية وكم تجاووووز

من عماتك وحتى منك واني اعبره بهدوئي واگول لااااااا لتطلعين صوتچ

بسسسسس لا الا هالمرة مااسامح ولا اتجاوز

شي بالادب انتتتتتتتت عماتك اخوووووك مرت اخووووك صديييييقك محدددددددددد يستحق

احترررررامي بعد

بكل قوته دفعني اثر هالكلمة وگعت عالقنفة

بنفس الوقت دخلت عمته نهاد وغيد ويمنى

وجهها مرعوب

-شبييييكم عمة شصار

وگفت عدلت شعري اللي انخبص

-اي عمة انت احچي شصاااااااار

الصااااااااار يمكم انتم انت وبنتچ ونسيبچ

صاح بيه

-صووووووتچ لچ

وعمة من رخصتكم طلعووووو

-لا ليش تطلع تعاي عمة

اني مو مهملة تاركة زوجي المريض وافرفر

خزرها هاجس وهي ولا كأنه يمنى سحبتها

ويه دخول نوح ولا انتبهت لحجابي

لمن شمرت غير المنشفة على راسي

-شبيك هاجس البنية مريضة

التفتتلة بعتب

-اي بالله نوح شلونها الخزعة مالتك

اشوف يمنى مرتاحة ومو خاااايفة

التفت ليمنى مستفسر واني عيني بعين العمة

-بالله وجهتي هالكلام ليمنى بما ان الكذبة مشت

وگالو نوح مريض رايح يسووووي خزعة سألتيها ليش زوجها بوحدة بينما هي يمچ لو لا

حفظتي سرها بينما اني سري مكشوف

اوووو سرك انت مكشوف

للكل بس لزوجتك لا

-نوووووووووح

صاح عصبي ونوح جر يمنى

-شمسووووووويه يمنى

بچت هي وردت امها

-اترررررك ايدها ممسويه شي اني الحچيت

هاجس اشرلهم

-اخذ مرتك نوح واطلع يلا محد يبقى

-لاااااا ليش خل يبقون كلهم واني اللي اطلع

بما ان اني الغريبة بالنص الكل يعرف

بيك والكل متفق يمثل هالمسرحية بس اني………

لزمت شهكتي حتى ماانهار

-بس اني خارج هالحسبة

بشنووو غلطانة وياك حتى متأمني على شي

بيك انيييييي اللي شهدت قوتك وضعفك

ومرضك وبرحلة الموت الخضتها چنت شراع

يوجهك لبر الامان شنووو تقصيري حتى

تقصيييييييني من وضعك شنوووو اعتقدت رااااااح اعيرك بشي انت زووووجي شلون تظن هالظن وتخليني بمنظر المتفرجة

اللي الكل يضحك عليها لأن زوجها مستغفلها

گوووووووووووووول

ضربت التحفية عالميز تطشرت للگاع

ويمنى ونوح وغيد طلعو والعمة راحت

ثواني رجعت هي وميعاد وياا جدو سأل ومارديت علي

-شبيكم جدي

-احچي گليييييي لييييش ام يمنى

تتشفى بيه ومخليتني بمنظر الغبية

اللي زوووووجها قرر يسر الكل الا هيييييي

عطت بي وهو رفع راسه تقدملي بسرعة

جدو صار گدامه

-لأن فعلاااااااااااا چان مووووقفي صح

وچان قرررراري صح مجرد كلام تحاليل رحتي

بعتي بيه گداااااام اهلچ شحال العملييييييية

شرررراح تحچين هاااااااي ستوچ عرفتي الصار

فضحتييييني 

انهاريت بكلام چنت غافلة عنه

-آني فضحتك نوح امين ويمنى أمينة وعماتك

اميييينات ومصعب امييين وزوجتك لا 

عمليات ومراجعات وعلاجات 

وفحووووووووصات عبالك بس العمليييييية

جدو التفتت گوه يحچي

-ياعملييييييية

-اسأله جدووووو اسأل حفيدك الچبير

اللي متزوجني بس واجهة اجتماعية

وممشي حياته من وررررررررايه

ركضت للغرفة شايلة بيدي ملف الاوراق

اول ماشافه سحبة ومزق الاوراق نثرها بالگاع

-شني هاي جدييييي

-من بداية الانفجار لحد الان كل فحوصاته

وتحاليله

وجهتله الكلام

أخذتُ نفس عميق  وكأني أطرد بقاياه من صدري

-العملية اللي سويتها ما حلت موووضوعك

بس شالت القناع عن وجهك

الكرامة اللي تحچي عنها 

أنت ذبحتها يوم اللي خليتني مضحكة بحلگ

الرايح والجاي وهم يعرفون

عن زوجي اكثر مما اعرف

-تلوووووميني وانت نص المشكلة

اشوووووف ماسويت اللي سويتي هسة

من عررررفت مانعة الحمل بدون علمي 

-اللي سويته يعتبر لا شيء بجانب اللي مسوي انت

ثلث سنوات بين حب وخطوبة وزواج وانت مخليني بخانة اللاشيء اللي سويته لمت نفسي علي

وصححته رغم انت صاااااحب الذنب الاكبر 

صارت عمته گدامي وترجف وتحجي

-كاااااااافي مصختيييييييها شنو عمة

اول واحد اخر واحد جان شي بسيط وحلة

واول تالي تخلفين عظمتيها وكبرررررتيها

لسانچ شطوله وصوتچ شعلوه

-انتتتتتتتتت بالذات لتتدخلين كااااافي

اسلوبچ الفج وكلامچ السممممم هسة

صرت مستعجلة عالخلفة بس بساميرچ

الية وشماتچ عادي تجرعت وسكتت

لخاطر جدو وبيبي وخراب بيتي وطلاگي

راح يتم على ايدج والله والله مالي گعدة

بالبيت بعد وتطلگني وانت الممنون 

-وشنوووو انت فدد قنددددددرة

تروح مرررررة تجي الف

بس گالت عمته هيچ وهو ساكت

حسيت ببشاعة موقفه

اكثر واكثر ردت عمته بعد ماجدو صاح

-اكلللللللي تبن نهاااااد

تقدملها جدو ضربها وهي انفجرت

والكل رجع عالصوت 

-العاهرة حفييييييييدة العاهرة

دخلتج لهالبيت خرررررراب ماردتچ ولا اريدچ

سووووويتيلچ لعبة تخربين بيتنا اني يابه

تضربني علمودها انيييييييييي

باوعتله ينفث نار ومارد على كلامها وهي تتجاوز

عليه هالشي قتل نص احساسي ناحيته

والباقي راح يقتله تصرفة الاخير

جدو دفعهم كلهم

-اطلعو رجال ومررررررة يحلون مشاكلهم

بينهم يلا برررررررة وانتتتتتتت روحي لبيتچ يلا 

بعدهم بالباب وهو تقربلي عيونه تنطق

بالخراب ويهمس

- كل كلمة وتجاووووووز تتحاسبين علي

ومو اني اللي تهيني مررررررة گدام اهلي

واسكت

واجه وقت الحساب والرد الاخير وبلغ

القهر منتهاه

- انت اللي چنت تستر مرضك بوجعي وملامتي 

وتغطي عجزك عن حل مشكلتك بدموعي

أخوك ومرته وصديقك يدرون بخصووووصياتك

واني اللي شريكة حياتك خليتني وراك ………

بنفس الثانية صرخ وهو يرفع ايده

-عجزززززززززي…………

رجعو راكضين على صوته وهو يرفع كفه

يضربني راشدي تراجعت على اثره ليوره

وجرته لشعري بقوة موگع المنشفة اللي على

راسي ناكش شعري اللي اجة بيدة تحت صدمتي

كل شي صار بثواني بس هدم ويا أمان ومشاعر سنين

وطن ونوح ركضو صارو گدامي وجدو اللي دفعه

بساعتها كل ذرات حب تطايرت ومابقى

بس الخوف والوجل من اللي سوا ذبحني

منظره وهو يتهدد عليه يحاول يجرني بينهم

حتى يضربني او يحاسبني مااااعرف شعور قاتل

استأصل حتى گلبي منظري واني بدون حجاب

بضفيرتي المگطعة والكل يحاول يهدي واني اشوفه

وبسرعة خاطفة دفعهم ساحبني من بينهم

ويا صوت بچي غيد وعياط يمنى

راكض بيه لغرفتنا وداخل بيه چنت

من خدر الموقف والصدمة مستسلمة

واگفة والولد يدفعون الباب بعد مقفلة

-انيييييي تهينيني گدام الكل

گالها وبكل قوة ضربني كف ثاني على وجهي

اجة بنص وجهي بين عيني اللي حسيت

شرارة جدحت بيها لثواني وبين خدي ثبتت بمكاني

شعري اللي منثور اثر فتح ضفيرتي لميته

وصمت ساد بعد ماوگف گبالي يتنفس

بصعوبة مستغرب نفسه وهو طالعلهم

وجدي يصيح

-افتح الباب طلع البت اخليها يمي

يرد صوته مرتجف

-ماكو شي جدي والله طببتها نتفاهم

گاعدة ذيچ

-ميل من الباب خل اطب اشوفها

-وروح امي ماكو شي جدي شنو السالفة

روحو كافي رحمة لموتاك جدي اخذ الكل

سألة نوح

-هاااااااجس فهمنه

رد بقهر

-أسأل مرتك وعمتك لهنا وتنتهي الخوة نوح

اختفت اصواتهم ودخل اني بمكاني

جامدة احس نفسي عارية تماماً

مو من الملابس لا من كل المشاعر التي بنيتها

اله من كل كلمة أحبك گالها 

هسه صارت بعقلي تهمة موجهة ضده

وگفت بمكاني عيوني مثبتة على الباب المقفول وأصواتهم بدت تبتعد تدريجيا 

رجع  دخل چان يتنفس بصعوبة 

صدره يعلى وينزل مثل واحد طالع من معركة

خسران بيها كل شي

بس آني آني اللي خسرت صدگ

الوجع اللي بخدي من أثر إيده چان أهون

بهوايه من الوجع اللي بصدري

هذا الكف ما نزل على وجهي وبس

نزل على كل صورة حلوة رسمتها إله بخيالي

هدم هاجس اللي بين بسوء ظنه بيه

وبسرعة وبنفس الثواني ادرك غلطة

والندم حل على ملامحة وحاول يسدد الموقف

ويصححة بس هييييييهات 

تقرب خطوة وردت أصرخ لا تتقرب بس صوتي چان مختفي راد يلزم خدي جفلت مبتعدة

ردت أحچي أگوله إنو الوجع مو بالضربة

الوجع انك استكثرت عليه أكون شريكتك

واستغليت موقف غلطت بي ضدي

حتى تخفي كذبتك من البداية

بس شيفيد الحچي

لميت شعري المتناثر بـأيد ترجف

باوعت لعيونه اللي چان يحاول يداري بيها ندمه أو خوفه ماااعرف مااعرف شيريد بالضبط

ما أدري بس اللي أعرفه إنو بذيچ اللحظة

روحي اللي حبته ماتت

مد أيده يحاول يلمس كتفي

نفضت نفسي منه وكأني جاي أنفض نار

مشيت للكنتور طلعت جنطة اخلي

بيها ملابس مشالي بسرعة لزم

ادية يحاول يحاچيني

-ليل والله غمامة غضب حطت على عيوني

ماباوعتله جر ايدي حتى انتبهله

-خل نحچي اني انفعلت……

​سحب الجنطة حيل يجرني للكرسي

اگعد تمايلت بين ابديه كأنه يجر جثة هامدة

يريد جلسة تفاهم بساعة مات بيها

الفهم وانتحر الصبر دفعته بكل ما أوتيت من رفض صرخت بصوت رايح

​- انتهى كل شيء

سحبت الجنطة منه وتحركت 

وكأن الحروف تطايرت

مني ونسيت الأبجدية 

گلتها واني اسحب تلفوني من الشحن

والبس عباية بسيطة على

ملابسي واسحب حجاب لا على التعيين

جزداني وبالشبشب مالتي رحت للباب طلع

وياي صار گدامي يوگفني

ابتعدت منه رفع ايدي يوگفني

-اوگفي ماالمسچ بس اوگفي

هزيت راسي بالرفض

مشيت بسرعة للباب لحگني

قفله وسحب المفتاح

مشيت لباب الترك مناك اطلع بره

سبقني اله قافله اسمع صياح وهوسة

ببيت جدو بس آخر همي مايعنيني

اي شي حالياً غير اني اطلع منا

واختفي من حياته

طلعت للهول گعدت عالقنفة لزمت تلفوني

اتصل بضرغام بسرعة سحب التلفون

غلقه وگفت احس گلبي يرجف بقوة

مااسيطر علي

-شتريد

الكلمة طلعت متكسرة بحنجرتي

وسبقتها دموعي متساقطة بالتتابع

-نحچي بكل شي غلطي وغلطچ………

مشيت تاركته راجعة للغرفة

بسرعة قفلتها عليه ماااريد اسمع

لازال يقارن غلطته بحقي

يريد يقارن بميزان عدل مايل

يقارن خذلانه واسراره وكلامه الجارح

بزلتي البسيطة لازال يخلي السواه بكفة

ويه غلطة اعتذرت عنها ودفعت ثمنها

باوعت لتلفونه عالميز فتحته بسرعة

اتصلت بضرغام بدون اي شي گتله

يجيني هسه مااريد أبقى ماناقش ولا

سأل بس سمع صوتي المخنوگ بالبچي

گال انتظريني 

دگ الباب من سمعني ابچي واحچي

ويه ضرغام مارديت ثواني بس اندفرت

الباب متكسر القفل وتناثرت قطع الخشب

الصغيرة حواليه ويم رجليه مثل متناثرت

اخر ذرات حبي وثقتي بي 

خليت التلفون بيده باوع للمكالمة ممصدگ

نص ساعة اندگت الجرس وهو

منزل راسه بين ايدي محتار شيسوي 

طلع فتح الباب ورجع وياه ضرغام

اللي دخل بس شافني فتح عينه

بصدمة بسبب الأثر الاحمر اللي نثر

نقاط حمرة كثيفة حوالين عيني 

وعيني اللي الدم انحسر داخلها وخدي

الثاني مشالي بسرعة رفع راسي

-منو ضاربچ

رفع راسه لهاجس

-انتتتتتتت ضاااااربها 

-سوء فهم ضرغام وان شاء الله محلولة

لتاخذها اريد احچي وياها

-هي هاي المراجل هااااااجس تضربهاااا

گالها وسحبني وياه بعصبية صار گدام ضرغام

گام ضرغام دفعة بقوة من صدره ومشى متمسك بيدي

-امششششششي ويااااااي

گالها ضرغام  وسحبني

بسرعة طالع بيه من الغرفة وگعت عيني

بعينه وباوعلي نظرة

أخيرة كأنما عرف ان النهاية حلت 

وبدت لعنة الخذلان تاكل بروحي

الفصل الواحد والثلاثون من هنا