رواية ذاري النجوم الفصل الواحد والثلاثون 31 بقلم زهراء السراي

​أَرَاكَ عَلَيَّ أَقْسَى النَّاسِ قَلْباً

وَلِي حَالٌ تَرِقُّ لَهُ القُلُوبُ

حَبِيبٌ أَنْتَ قُلْ لِي أَمْ عَدُوٌّ

فَفِعْلُكَ لَيْسَ يَفْعَلُهُ حَبِيبُ

:

:

:

:

:

:

ليل

✥━━━༺✦༻━━━✥

وبين المد والجزر هناك ثواني

من الهدوء

:

:

:

اسطنبول

تركيا

​حديقة إميرجان هدوء الصبح وجماله

تتمايل گدامي

زهور التوليب حواليه مثل بحر

من الالوان واگفة بنص الورد

والمنظر گدامي عبالك قطعة من الجنة

التوليب مد النظر أحمر وأصفر وبنفسجي

يتمايل ويه نسمات الهوى الباردة اللي تداعب وجهي الجو هنا بي ريحة مطر خفيف ونسمة ترد الروح والسما وغيومها حلوووة

لدرجة تخليك تحس إنك تگدر تلمس الغيم بإيدك

كل شي حوالية يگول ارتاحي

الطيور الهدوء العبير اللي يملي المكان

الناس تضحك وتصور مبهورة بهذا الجمال الخيالي بس آني

آني أحس اكو غيمة سودة جوه صدري 

ما تقبل تروح شگد ما المكان حلو

وشگد ما الطبيعة تحاول تلملم جروحي

تبقى كسرة گلبي هي الصوت العالي الوحيد

الجمال اللي حوالية يوجعني أكثر ما يريحني

لأن يذكرني بفرق الحال بين هدوء المكان وضجيج الوجع اللي بگلبي

الموقف

الكلمات

الخيبة

كلها حاضرة 

تمشي وياي وين ماامشي

وتمنعني حتى من إني أخذ نفس عميق

بلا غصة صعبة تعيش أجمل لحظاتك وأنت شايل بداخلك أثقل انكساراتك

اولاد اخواني حواليه وماما وبابا

بس بيبي رفضت تروح

وبقت يم بيت خالو علي

حسيت بكف صغيرة لمست كفي

باوعتلها ليل الصغيرة بنت فارس

مدتلي ايدها بقطعة ككاو

-ككاو عمة

شلتها ابوسها واجاني صوت فارس

-تروحون نتريگ بمطعم خارجي الجو

حلو

مشو وهو باطئ خطواته ومشى بصفي

لطالما كان فارس قريب مني

-حتى اليه ماتحچين

-مصدومة وأحس ممصدگة

-شصار

-كذب عليه

-حبيبة صديقة متزوج شعنده

-كلهن لا

-بالليل عدنه طلعة اني وياچ

حاوط اكتافي ممشيني گعدنا

بالجو الحلو والافطار التركي المتنوع

مالي الميز تجاوزت ازمتي واني انشغل بالسوالف

والضحكات والصور وصناعة الذكريات للسنين

الجاية

رجعنا بعدها للبيت توزعنا غطيت بالنوم

لحد مگعدتني ماما عالغدة مقبلت

اگعد بقيت بالفراش رن الجهاز برسالة

من حسابه الجديد اللي سوا بعد ماحظرته

كالعادة اغنية رياض احمد

-بحشاشتي سهمك مضى

وعگبك علي ضاگ الفضى

واللّي حضى بوصلك حضى

والماحضى لا والحظ

حظى ردي وعمره اخسرى

اللّي لشخصك مايرى

جفني معيّا من الكرى

مستلذ عگبك واغمض

ماغمض جفني ولا نشف

دمعي روى جمع السلف

ماچلّني غير الاسف

متسلّي ببهامي يعض

عضّي على حبك فرض

ولو لّامني شنهو الغرض

لو نوخّت نوگ الأرض

ماظن بهمي تنهض 

طلعت من الفيديو وحظرت الحساب

واجتني رسالة أديان الصوتية

-والله العظيم ماعرفت الا لمن

راحو للعملية انجبر مصعب يگلي

لأن شكيت عنده شي ورايح لبغداد

صدگيني ليل زعلچ على عيني وراسي

وفاقدتچ لأن منحچي

مارديت عليها نهائياً

بقيت بالفراش للعصر اجاني فارس

-گوووووومي لبسي يلا واخذي

جاكيت احتياط

لبست وهو وگف بالباب قبل لنطلع

يسوي بيده حركة غيرة لماما وزوجته

-ابقن هناااااا 

مطلع اختييييييي ادللها

ماما حضنت زوجته

-ولي انت واختك اني وچنايني

راح نطلع نتونس

ضحك وشمرلهن بوسة وطلع عالبحر

جلسات حلووووة گعدنا تركني

دقايق ورجع بيده كوبين گهوة

ودونات

-ايييي يامدللة البيت شكسرچ هيچ

-الكذب 

-شسوه

-شي خاص بي هو بس كذب عليه

والتف من وره ظهري وطلعني گدام

الكل بمظهر الغبية اللي زوجها ميأمن بيها

مااكذب وقت العتاب انفجرت بالكلام

بس حقي فارس حسيته ميأمني

على سر اذا شلون اني أامنه على حياتي

-بسبب عتبچ اله ضربچ

-وگدام الكل بساعة اللي صارو

وطن ونوح گدامي وهو يحاول

ياخذني من ايدهم ويتهدد عليه

حسيت بشعور اللي يهدمون بيته

على راسه

اني أماني هو بوقت اللي

يصيرلي شي الجأله واحتمي

بي شلون احس بالامان وياه

بعد ماانرفعت ايدة تضربني

ضربته وكلامه واسراره

خربو كل شي

-احاچي ارد علي كل يوم يتصل

مجرد يسأل واني بأقتضاب

اجاوبة

-لا احجي وياه عادي بس

مااااريد يعرف شي عني 

-تدرين شنو

-شنو

-شگد ماانتِ چبيرة بعيني زدتي اكثر

واكثر سرچ محافظة علي ومتقبلين احد

يعرفة عشتي

باس راسي وسحبني وياه

-هنا اكو بايسكلات تأجير ناخذلنه فرة

ركض بيه واني ويا ورجعت لأيام الطفولة

من ياخذوني وياهم وين ميرحون

افتريينه بهالجو الحلو وتعشينا ورجعنا

ايدي مليانة ورد صورتهه ونزلته

عالستوري كاتبة

-تزعلني الدنيا ويراضيني الورد

ساعة واجتني رسالة صوتية من حساب

وطن

-مستمتعة مووو منو جابلچ ورررررد

مارديت حذفت المحادثة

ورجعت عاللمة والسوالف لحد

مكملت الخمس أيام ورجعنا

وداعنا بالمطار چان بدموع 

لأن چانو اهلي كل فترة يرحون يزورون

فارس او هو يزورهم

هالمرة ابتعد هوووايه

صعدنا الطيارة استقرينا بمقاعدنا

رجعت المقعد بتعب مستذكرة

الاسبوعين الفاتو من اول مطلعت

من البيت محملة بالخذلان 

ضرغام ابد ماحچة كلمة ماعدى

مدلي ايده بكلينكس لأن أبچي

اول موصلت البيت بابا

بالهول بس شافني اني

وضرغام تفاجأ وگعد ضرغام يحچيله

الصار بيبي يم خالو عبد الله

وماما گامت تلوب

-شصاااار

بابا التفتلها

-بلا عصبية گعدي خل نحچي

-بابا هاني گدام الكل

-شنووو السبب

-شي شخصي خاص بي هو

بس سمع بابا هالكلمة هز راسه بمعنى

بعد ميناقشني

اشرلي ارتاح رحت للغرفة

وماما لحگتني

-بردي گلبي لييييش ضاربچ

-تجادلنا ماما

-ويضربچ

گالتها وضربت خدها حضنتني واني

لازلت مصدومة من اللي صار تركتني

وره دقايق بعد ماصاح بيها

بابا واسمع صوت تلفونه دگ

طلعت اسمعه يحچي وية جدو

-لا عمي حشاك بس مو لمرحلة الضرب

وجههة احمر وحوالين عينها زراگ

ارررريد اعرف السوته شنو وليش

بنتي من ادبها وأصلها گالت شي خاص بينه

يعني شارية لاخر لحظة اكيد هلا بيكم

تشرفونا بأي لحظة

غلق الاتصال واني تركتهم راجعة

للغرفة تمددت بفراشي وگعدت أستجمع

كل تصرف مرت عليه سفراته لبغداد

بحجة مصعب الالام تصيرله كل فترة بالمثانة

وهواي شغلات يمكن لو مخونته واحد بالمية

چان عرفتها

بس نوح چان هو مكان سره

هو ومصعب بحيث طابخين كل

شي سوه وممخلين دليل نهائياً

اني لو اعرف من البداية

چان اني وگفت وياه بدون ميطلب

حتى لو اضطرني الوضع ابقى بلا

اطفال كافي علية اني أحبه

بس للأسف هاجس قراني غلط

ورغم الحب والعشرة ماعرف

شخصيتي وحكم عليه من موقف

انفجرت بي ولأول مرة اشكي

لبيبي حتى مو لأحد غريب

نمت تعبانة وقلقة حسيت على

ايد ماما الصبح تگعدني 

-گعدي ماما الساعة بالعشرة

وعيالچ هنا

فزيت اباوع بأستغراب للغرفة

وكأني فقدت ذاكرتي لدقايق

استقاميت بگعدتي

-منو هنا

-جدچ وعمچ وهاجس ووطن ونوح

گعدي عيب منتظرينچ

گعدت طلعت للحمام غسلت اباوع

جانب عيني اليمين زراگ واااضح

ونقاط حمرة متعددة منثورة

عالجهتين

طلعت للغرفة لبست حجاب

دگيت باب الصالة ودخلت سلمت

-السلام عليكم

وگف هو وجدو كذلك بست جدو وعمو

كمال اشرلي بابا اگعد يمه

رحت گعدت وبده جدو يحچي

-هسه ابو ضرغام هاي جيتي الك

مالها خاطر ابد

-قدرك چبير وعلى راسي

بس احلفك بالله اذا اجتك بنتك هيچ

وجهها شنو موقفك شراح يكون ظنك

بنتك مسويه شي مو زين

غلطانة متجاوزة لا سامح الله

-اشهد مابالله من دخلت البيت لليوم

لاتجاوزت ولا غلطت مؤدبة خلوقة

معدلة واكفة للكل حتى بزعلها

محافظة على حدودها 

باوع بابا لهاجس

-ها عمي هاي شهودك ابوك وجدك

اثنينهم شهدو انت شنوووو ردك

باوعلي عباله حاچية رد

-موضوع صار ………

رديت

-واني گلت لبابا الموضوع خاص بيك

واني ماعندي ذرة قصور ويااااك ولا ويه احد

عمو كمال اجه گعد بصفي

-لا والله حشاچ عمو بس انتم رجال

ومرة وتگولون موضوع خاص مادامة

خاص نريدكم ترجعون لبيتكم تحلونة

بينكم وماتخلونه يأثر على حياتكم

-انت تعرف عمو او متعرف اسأل

خالة ام وطن وگلها شنو الچانت تواجهة ليل

اسألها شكد تحملت

بعيداً عن هاجس ومشكلتنا

تدخلات أم يمنى

سوالف عمة ميعاد

الحچي اللي ينراد بي تحطيمي

كل شي عبرته وگلت ما أخلي أحد يخرب بيتي

كل مرة أبلع الإهانة وأگول مو مهم

المهم البيني وبين هاجس

بس الإنسان مو حجر عمو

واني فاض بييييه 

-هوووو غلطان ادري بي

رد جدو وهاجس يهز برجله بعصبية متوتر

تنفست بعمق ورديت والحرگة تاكل صوتي

-حتى لو أقر بغلطه الكف اللي انرفع عليه

ما أأمنله بعد ولا أخلي كفي بكفه مرة ثانية

المكان اللي انهانت بي كرامتي  مستحيل أرجعله

أني بعمري كله راح اصير ثلاثين سنة بهالبيت

لا بابا ولا إخواني رفعوا صوتهم عليه مو إيدهم

بابا قاطعني 

-ومو لأن هي وحيدة ولا احنه ما نعصب

بس لأن هاي تربيتها

هاي گدامكم حتى بزعلها محترمة

اني تعبت حتى أوصلها لهالمرحلة

وأمها وجدتها صقلوا شخصيتها وخلوها بنية ينرفع بيها الراس

ابتسم جدو ورد

-تعلمني شلون النفس العزيزة تكون

ماخذة انفة عذبة كلها 

ابتسمت لجدو وكمل

-جدي هسه ابوچ قبل لا تجين گال

هاي حياتها وهي تقرر

-وفعلا جدو واني مقررة

-شني جدي بس كون مو خراب بيوت

-ربي يجيركم من الخراب بس

منا وتفترق الطرق اني مالي

رجعة ابد

وگف هو عصبي ومتسائل

-للأبدددددد شنو شفهم يعني

-يعني ننفصل 

مسح وجها محتار وعمو رد

-لا لااااااا بابا مو هيچ الكلام

مو اول مشكلة تواجهكم تنفصلون

-ماعندي غير رد

جدو وگف وگام اشر للولد يطلعون

برة

-ابو ضرغام وانت بويه كمال گوم

منا وياي نشرب چاينا بالحديقة

خليهم يحچون بلكي نوصل لحل

بابا باوعلي محتار هز راسه وطلع

بس طلعو هو وگف سحبني وياه للقاطع الفاصل

الصالة عن غرفة الطعام دفعني ودخل غلق الباب السلايد

وگفت عيني بعينه

-ليل ليش تهدمين كل شي بلحظة غضب

-اني اليييي هدمت 

-اني اني بلحظة غضب مني اني

-گلتها منك انت

-بس انت…………

قاطعته اعصابي منهارة

-اني شنوووو غلطي شنو

-تگليلي عاااااااجز ليل گدام الكل

- گتلك عاجز ……

سألته مستنكرة

- اني گتلك عاجز عن حل مشكلتك

مو عاجز كرجل مثل ما سمعتها بمخيلتك

بس عندي سؤااااااال واحد

الأمينين اللي أمنتهم على سرك ياترى

شلووووون طلعو لعمتك اللي دايرة

تبسبس بي للبيت كله

شلون وصل لعمتك

شلون صارت تحچي بي للبيت كله

ليش انييييي مقصية من سرك ومـأمنة هنا وهنا

مسح وجها بمحاولة للرد بس

اني رديت بغصة بعد ماخانتني دموعي

-اني نلت كفايتي من الأذية بهالعلاقة

-اني مأذيچ

-هووووووايه هوووايه اذيتني

فتحت الباب اريد اطلع جرني يرجعني

-بعدنا ممكملين ليل نتفاهم

-اي تفاهم ماالي وياك مستحييييل ارجع

بعد ماخليتني بمنظر الذليلة واني احتمي

بأخوانك بساعة اللي المفروض

تكونلي سد تحميني وترد عني كلام

عمتك اللي مثل السم عممممممتك نفسها اللي

خططتلك ويا روان وعمتها العوووواهر

حتى تزوجك

عمتك نفسها اللي وگفت تگلي تروح قندرة

تجي الف فهاي اني جاي انفذ كلامها

واروح خل تجيبلك الألف

وسرك بعد خلي يمها لأن الظاهر الكل

أهل لثقتك الا اني 

طلعت بسرعة لحگنني

-ارجعي واني اطلع من البيت اذا هيچ ترتاحين

التفتت وسحبت ايده لوجهي

-امحي هالاثار من وجهي

واثر كلماتك من گلبي وتعال

بساعتها رجعني والله والله

لو الهوووووا يمك اگطع نفسي

وأموت مو اني الاعيش بمظهر

المغفلة ولا اللي اقبل الذلة على  نفسي

انسى هاااااااجس رجعة ماكو

ومنا وكلامنا ينتهي

طلعت تاركته بحيرته طلعلهم بره

وره نص ساعة راحو

بابا ابد مسألني بس كلمة وحدة گالها

-كلمة الانفصال شيليها هسه من بالچ

بس أي قرار يحفظ كرامتچ

سوي لأن هذا حقچ

رجعت للغرفة ودگ التلفون غيد

فتحت الخط اجاني صوتها

-اشششش ماما احاچي خالة 

-صباح الخير شبيهة لولو

-صباح الورررد اجوج الجماعة اخذتني

النووومة مالحگت اتصل

-اجو وراحو

ردت مقهورة

-يعني مارجعتي وياهم ليل

-هذا موضوع منتهي بس عندي طلب يمچ

-گولي حبيبتي 

-أريد ملابسي باجر دوام اذا تگدرين

تلگين بالمخزن جنط سفر كبار ثلاثة

وملابسي صيفي وشتوي مرتبات بتعاليگ

وملابس البيت مسفطات

جرارات العناية بالبشرة والمكياج

والحجابات كلة مرتب بس نقليهن بالجنطة

-ليييل حبيبتي ادزلج لبستين ثلاثة

وفكري الله عليج ليش تخلين نهاد تتشمت

-آخر همي والله خليها المهم 

جنط كبار اثنين او ثلاثة اريد كل شي

معتمدة عليچ غيد

-ميخالف استأذن من جدو وهاجس

-عادي بس لا تنسين اليوم اريدهن

ودعتني وراحت بعد ثلث ساعات اتصلت

بيه

-ها غيد 

-جايين اني ووطن نجيب الاغراض

-تمام

-هاجس مقبل گال لجدو بس تاخذ

كل شي من البيت بعد ماترجع اني اعرفها

وجدو گله

خلي الگلوب تصفى جدي وبعدين اني

اتصرف

ولميتلچ كل شي وجايين

-جيبي لولو

-جاييين بس نتأخر شويه بزونة وطن

فدعوس مريضة وراح نخليها يم العيادة

البيطرية ونجي

صدگ ساعة ونص اجو وطن دخل

الجنط ماما وجهها تغير وحست اني

فعلا رافضة الرجعة من شافت كل اغراضي

جايبيهن بقت غيد تسولف ولولو بحضن ماما

تلعب

ووطن بقى يحچي ويايه اجاني

صوت ماما الهامس لغيد

-احچيلي انت شصار

-مااعرف عمة محچو حتى النا يگولون

شي خاص بينه

طلعو مودعينه ودخلت جنطي للغرفة

ارتبهم فتحت الجنط ولگيت صورتين الية

والة بعرسنا وحدة والثانية اخذتها النا أديان

من رحنا لبغداد سويه اني وياه گاعدين

مبتسمين اتصلت بغيد

-الو غيد هاي انت مخلية الصور

-لا والله هاجس طلعهن من الاطارات خلاهن

-تمام

طلعتهن شمرتهن بالخانة وكملت شغلي

ممهتمة لهالحركة اشتغل وانفتحت الباب

دخلت بيبي

-ليلة هنا يابعد روحي

مشيتلها بسرعة حضنتها باست راسي

تحچي بهدوء

-ولچ شمسوي المسودن

-اذاني بيبي 

-ولچ ضرغام جابني وياكل بروحه أكل

ضاررربچ شلووون ضربچ

-صارت بيبي تراكمت المشاكل والعتاب

وانفجرنا واحد بالثاني

-ارتاحي وانا اروح لأمچ هالتاكل بروحها سودة عليه

مشى هاليوم بتعب وتفكير لثاني يوم

دوام لبست ملابس خفيفة مريحة

شمرت الشال شلون ماكان بابا گال

سيارتي اخذيها اني اتمشى للمجمع

طلعت بالي سارح واحس بخنگة بعد الصار

اول مطبگت بگراج المستشفى لگيتة

واگف كالعادة بباب سيارته مشيت وكأني

مااشوفه سرعت خطواته وصار گدامي

-رجاءاً گراج المستشفى مليان كاميرات

واني دكتورة الي وضعي هنا لتسووووي تصرفات

المراهقين هنا 

جر حجابي يعدله رجعت عدلته مثل ماكان

- مرررراهقين موووووو هينة

المهم اذا زعلانة مني مو معناها تزعلين حتى

عالحجاب عدلي ضمي شعرچ

-هذا شي خاص بيه شي شخصصصصصي

وابتعد ورايه التزامات مجاي العب

مشيت مسرعة مشى گدامي ودخلنا

المصعد سويه حرك ايده متعمد

نزيت مبتعدة وارتفع صوت ضحكته الحقيرة

بصمت للحضور ودخلت المكتب

زميلتي طلعت تاركة المكتب وهو 

باوع للباب القفل مكسور سحب الكراسي

اثنين خله واحد وگعد علي مسنود عالباب غالقة

واشرلي

-گعدي نحچي

-مابينه حچي انسى 

سحبت الكرسي وره المكتب

طلعت الملفات اتابع الحالات الجديدة

جاب كرسيه واجه گبالي بده يسولف

-عودتيني من نختلف بشي نگعد نحچي بي

ماعودتيني عالسكوت نتناقش بكل شي احنه ليل 

راح احچي وسمعيني هسه اعتبريني اني الغلطان……

قاطعته بحدة 

-اعتبررررك ……لا انت الغلطان فعلا بدون

اي اعتبااااارات انت ممستوعب حجم غلطك

اني اللي اشرفت على علاجك من الألف للياء

برغم عنجهيتك وعدم احترامك وتطاولك

هاااااي واني چنت غريبة عنك

فما بالك واني زوجتك

اببببد مفكرت تحچيلي 

زين انت تگلي همزين ماعرفتچ بموضوعي

لأن أنت لمجرد تحليل بسيط حچيتي

لأهلچ زييين قبلها حب خطوبة زواج

صدر مني فعل يخليك تضم عليه هيج

شي مهم اني زوجتك وشريكتك سويت

شي يخليك تبعدني ومتحچيلي أسبابك

شنوووو قدمها اريد أفهم

باوعلي مرتبك والكلام ضايع بشفافه

رد 

-حسيته موضوع خاص

-ههههههههه خاص لأي درجة

هذا موضوع شراكة بينه مو شي عابر

-مثل المانع اللي اخذتي 

-وقدمتلك اسبابي واعتذرتلك 

وجافيتني وحاسبتني وتركتني

اصارع افكاري لفترة طويلة

ماكو مقاااارنة بين اللي سويته

اني واللي انت مقرر تمشي بي

بدون مترجعلي كااااااافي الملامة

اللي حملتنياها بينما انت چنت تراجع

وتتعالج ………

-ارااااجع علمودچ

-هههههههههههههه وبالله مصار وتعالجت

چنت راح تبقى مخليني تحت المقصلة

وكل ماحللالك تلومني لأن ماحملت

بينما احتمال منك السبب انت قصيتني بفترة

مرضك بينما كان المفروض اني اوگف وياك

-لتگولييين مرض 

- ليش كلمة مرض عيب فسلجياً انت مريض

بينما تخفي عني هالشي

انت مبلغ مصعب وزوجته اكيد تعرف

نوح يمنى وامها وميعاد والله اعلم منو بعد

يعني خجلك بسسسس مني 

وگف مقبل عالكلام مسح وجهه

وباوعلي بعتب 

-كلامي جارح مو هو نفسه كلامك اللي

چنت توجها اليه بس بشكل أقسى 

رد متعصب يحاول يغلطني بأي طررريقة

-انت مشفتي نفسچ بساعة العصبية شحچيتي

-لكل فعل رد فعل يساويه في المقدار

ويعاكسه في الاتجاه قاانوووون هذا

شنووووو موقفي فوگ غلطك بحقي تضربني

وتسمح لعمتك تجرحني وتتجاوز علية وتنعتني بأبشع الالفاظ بدون اي رد منك انسى 

مااارجع لا لشخص اهان كرامتي

ولا لمكان انذليت بي وانضربت انتتتتت ممتخيل

غلطك انت محتقرني ومستخف بعقلي

لدرجة مرت مصعب البنية الغريبة تخطط وياكم

علية ومن تتصل تگلي خايفة على زوجي

شووووف لأي مرحلة واصلين لذلك

انت ماعندك مبررر واي شي تگوله مرررفوض

-اني ماردت اخليچ تشوفيني

بضعفي ردت احل الموضوع يلا احچي وياچ

بي

-هههههههه شهالتناقض

ساعة تگول هذا شي خاص

وساعة تگول گلت اتعالج واحچيلچ بي

عالعموم انت ردت تخليني عايشة بدائرة

الذنب وباحساس خوف من المجهول

ردت تبقى محسسني ان السبب مني

للأخير وحتى لو متعالجت چنت مستعد

تتركني عايشة الذنب لذلك رفضت التحليل

وهسسسه لو سمحت تتفضل عندي شغل

وگف لبس بيريته وطلع بشكل عاصف

من الغرفة مخلف وراه بس صوت الباب

وهو ينضرب بقووووة

گعدت مرهقة تعبانة فكررررياً ردت اعرف

الحيثيات وشلون بده الموضوع وشلون عرفو

بس كرامتي مسمحتلي اسأل نوح ويمنى

وهمة اساساً من البداية قررو يخفون هالشي 

گعدت اباوع للتلفون ماكو سكوت

حضرت الكل نوح هاجس يمنى

أديان بس وطن وغيد تركتهم

البقية من الرقم ومن المواقع

ومر هالاسبوع بين بيبي اللي داعمتني

رغم متعرف سبب المشكلة

وبين بابا وماما اللي اشوفهم محتارين

بنهاية الأسبوع طلعو ماما وبابا

اخذو بيبي لأبو المفاصل دگت عليه

غيد بس چانت تحچي بسرعة 

-شبيچ ولچ غيد

-جدووووو البارحة هجم البيت على راس الكل

-شصار 

-جدوووو گاعد وصوت نوح ارتفع بالخلاف

ويه يمنى وحلف يمين متبقى بالبيت بعد

اللي صار

-شنو متذكر بس هي شعليها يمنى ليش

-هسه يلا حچتله اللي صار لذلك

اتصلت بأمها واجت امها تعرفين بعد ميحتاج

احچيلچ شسووووت 

-غيد قبل كل شي اريد منچ شي بداعة ليان

-عيوني الچ

-الله عليچ عرفتي يمنى شلون عرفت

-جايتج بالحچي

-عليچ الله انت تدرين

-وروح ماما ولا ادري دسسسمعي السوالف

عمة نهاد انهدت 

-الله ليوفقها خربت البيت وطلعت

نووووح بنتي شعليها وتنطرد

-هييييي تعرف السبب اني من لگفتها تقره

التقارير حلفتلي بعافية زيوني متحچي

شيييييييي تاليها حتى التقاررررير مشوفتها الچ

ولعمتي ميعاااااااد اللي تسوووي هيچ

مووووو امينة على حياتنا ومتبقى ببيتي

-شسوووووت دادة شووو كبرتوها

وانطيتوها حجم شگد هالليل

بس عليمن تطلع جدتها عذبة

هي گالت هيچ ويه دخول جدو للبيت

من بره سمع الكلام عن بيبي

اشرلها راحت للصالة ويمنى ونوح

خلاهم اتصلو حتى بهاجس

اجة من بيتكم وعمو كمال وزوجته

گعدو الكل وجدو بلش بيهم واحد واحد

-نهااااااد ماتكبرررررين بوووويه

هذا عمرچ ماتستحين من توگعين الگوم

عالگوم وتسوين مشااااكل

-انيييييي بويه اني ام المشاكل

ليش ماتگول مررررت هاجس ……

صاح هاجس

-عممممممممة كفي شرچ عنييييي

وكااااااافي  كافي تجاوزچ وكلامچ سكتت

احتراما لجدي

-هاااااي جززززاتي هااااجس فوگ مادافعت

عنك

رد جدو

-اسكتيييي بويه انت عيشتچ عالعرك والطلايب

وانت يالشفج ماحچيت بساعتها مارديتها

حتى تكبر بعين مرتك لو عماك الغضب

حقها البت شتسوي حقها وزايد

-تصصصصير وياهن عليه بويه

هااااااي مجااااازاتي اني وبتي

-طفح الكيل منچ بوووويه

گالهه جدو جر تلفونه من جيبه واتصل بزوج

عمة وعمة گامت تلطم

اجه الرجال وتعرفي شگد مؤدب

عمة گبل گامت تبچي

-تعااااال اسمع بتك طردها نووووح

بلا سبببببببب

جدو صاح بيها

-تسكتين لو شلووووووون

ابو يمنى سأل مستفسر

-شصاير عمي

-اسمع واحكم شغلة سر بين الاخوان

نوح وهاجس وبتك درت وحلفها نوح السر

يهجم بيوت تروح بتك تحچي لأمها هسه

غير سر وطلع يسكتتتن لااااااا نهاد

ماارتاحت لمن هجمت بيت ابن اخوووووها

مرتك وصلت الحچاية لمرت هاجس

وكبرت السالفة وصلت لمدة الأيد

وانا ماعندي زلمة ببيتي يمد ايده

على مرة ترضاها

-شلوووون ارضاها خراب بيوت هذا

حتى لو مرتي وبتي اطيح حظهن

-هاااااي گدامك مرتك تسوووودنت

تاخذها انت تأدبها لو انا اتولى الامر

عمة بچت ووگفت زوجها وگف خجلان

-هاي بتك يمك عمي سوي التسوي اني

الحال المايل مااعدله اكسسسسره

ربيها ورجعها الي

طلع ابو يمنى وهي نهاد انهدت

-انيييييي تهيني گدام رجلي يابه شلووون

اجاك گلب

-سمعي نهاد انت واختچ

شلت سمچن لسنين واگول مايخالف بناتي

ولو اختچ سمها اهووووون

ميعاد ردت 

-انيييييي يابه

-اسكتتتتتتتتن بوووويه حويتن سم

خالاتچن حوووووووووي ماطلعتن على

صفحتي هاي عذبة تتوزن حچاياتها بميزان

وريحانة البزون تاكل عشاها تستحي ترد

على سوالفچن وليل مأدبة حبابة ومثل هبة ريح

وماخليتن لبت الناس سكة ترى انا مو اعمى

ولا هاجس اعمى يشوف ويسمع ويشتكيلي

التسونه بمرته وانت عاتبتج مرة مرتين يانهاد وگلتي هاي هي بس تشوفين البت وحدها تردين لطبعج الردي مايفيد بس هي معدلة گالتله لتدخل

سوالف نسووووان هااااااي هسسسسه فهمني

السويتي انت نهاد بيش فادچ

هالخرب بيت هاجس وبيت بتچ

-هيچ تشوفني بويه خرابة بيوت

-شني بووووويه نسيتي من سنين

سويتليج مصيبة بريحانة وتهمتهنا باطل

حتى مرت اخوچن كمال سودنتنها

ولوما سلطان معدل چان طلگها بعد

كلامچن عليها بالدائرة مالتها 

وماتت مرت اخوچن واجت هاي بت الناس

مأدبة مرتبة لمتهم وربت وطن وگايمة

بواجبي وواجب البيت وتسمع وتعدي

بسوالفچن 

-ساااااكتة هاااااي من جوووه لجوه

السكووووووتية تكرهنا ادري بيها

حتى اخونا تغير من وراها وهاي حتى

انت غيرتك علينا

راد يحچي عمو كمال زوجته وگفت

-اني سكوتية شمسويه بالله بشنو

مأذيتچ انت اللي متدخله بكل شي

حاطة نفسچ حتى بأبسط الأشياء

-لأنچ متعرفيييين تديرين بيت

مال ناس راقية الچناين كل وحدة براحتها

مخليتها

ردها عمو كمال اللي چان هادئ

-احسن بنات عدنا ومن ضمنهن بنتچ

يدرسن ويداومن واطفالهن وقايمات بواجب

البيييت كامل وانت ماساكتة

ليل حفيدة عذبة غيد تقرب لعذبة ومخبلة

الناس بسوالفچ وتدخلاتچ

-طبعا اتدخل انت زووووواجتك فااااااشلة

من هيچ نمووووذج عربية همجية

وگف عمو كمال يريد يضربها وجدو

صار گدامه

-تريد تضربني كمااااااال واني الصار عمر 

قايمة بوووواجب بيتكم

-واطيح حظج هممممممممم

-بهالعمر وتتجاوز عليه

-الچبيييير يحشم نفسه نهاااااد

انت منزلة قدرچ بأيدچ من تتدخلين

بسوالف الجهال ذووووله جهال هاجس

ومرتة ونوح ووطن جهااااال الچبير يحشم

نفسسسسسه فهمتي ومنا ومتدخلييين البيت

بعد

-تطردننننننني كمااااال

-اطردچ ونص كااااافي عليه موتت ام هاجس

خليتها تخبلت وانجنت بسوالف ماصايرة

لحد مااتعاركنا وتمرضت وتركت هاليتيم بگماطة

لذلك متدخليييين بعد بيت هاجس هجمتي

وبيت نوح وبنتچ وعينچ على وطن وغيد

-يااااابه ترضاله هالكلام

-ارضى ونص اذا طبتچ بيها خراب مانريدها

بيت قايمة بواجبه مرت كمال وغيد

ويمنى بس خربتي بيتها وترى نوح مايردها

وحقة ماالومه ومرت هاجس ماترد

مادام انهانت وانتم تعررررفون جدتها ياهي

وشلونها بالعناد وهاي اگلك هاجس

لو تموت لو تحطلها جسر من ذهب تمشي علي

حتى ترد لهنا ماراح ترضى 

-وتحملوني اني ذنب كل شي

-ايييييييي بويه تحملي شغل ايدچ هذا

روحي بويه لبيتچ واختچ وياچ هم انا ماقصرت

كل وحدة حطيتلها بيت شكبره گعدن ببيوتچن

عود مرلي السلام عليكم وعليكم السلام

ومن واحد يتمرض گولي الحمد لله عالسلامة

يلا بوووويه لبيوتچن الصار كافي

طلعن اثنينهن يبچن رادت تاخذ يمنى صاحلها

-يمنى ماتروح انا اريدها صاح يمنى

وبلش بيا

-هاجدي چا البت مو صويحبتچ من گبل

شلون تطين بيها گدام امچ وتطلعين سر زلمتچ

-غلطت جدووووو والله غلطانة بس مو قصدي

اشرلها نوح

-تصعدين تلمين نفسچ الچ ساعة اصعد

ماالگالچ اثر

صعدت وسحبتني وياها وهي تبچي

اني لازمة زيوني يبچي وهي تطلع بالغراض

سألتها

-يمنى انت عاقلة شلون طلعت منچ

غطت عيونها تبچي

-والله بالغلط مو قصدي مشاكل وحتى

حلفت ماما متحچي 

حضنتني تبچي

-والله اني صرت بالنص ماما سببت المشكلة

وهاي خسرت نوح ووگعت من نظر ليل

-يمنى انت من البداية تعرفين

-اني چنت اشوف دائما تقارير ومراسلات

وكلام بين نوح وهاجس

-يعني هسه بالجديد

-لا وره زواج هاجس بشهر تقريباً

نوح جايب اوراق مخليهن عالميز والله

مجرد فضول فتحتهن قريت البيهن

دخل نوح تعصب ورزلني گال حرف واحد

اذا طلع متبقين بالبيت لا لليل ولا لأمچ ولا لغيد

وحتى بينچ وبين نفسچ متحچين

-زين امچ شعرفها

-چانو هاجس ونوح مرات يرحون

لو هاجس وصديقه ونوح على اتصال ويه

الدكتور ببغداد وماما متعرف لمن راحو يسوي

هاجس العملية هم فهمو ليل على اساس نوح

يريد يسوي فد اجراء طبي لذلك رحت

يم ماما من رحت بقت تلح ليش زوجچ عشر ايام

ببغداد شعدهم خاف سالفة نسوان خاف مدري

شنو مليت منها گلتلها راح احچيلچ والموضوع سر

وحلفت متحچي سولفتلها بس والله ماادري بيها

راح تحچي فمن رجعو من العملية جابلي نوح

الاوراق گال خليهن

بغرفة هاجس رحت للترك صاح بيه

-وديهن لهاي غرفته 

رحت اخليهن وماما اجت ورايه شافتهن

وبقت تلح شنو مرته تاركته وشنو تفرفر

وهو مريض كلتلها ماما سدي المووووضوع

والله اذا سمع نوح يطيح حظي وهو گال بس

يطلع كلام واتخارب اني وهاجس انت مالچ

گعدة يمي 

مسحت دموعها ولزمت كفي

-اني ادري بماما طبعها مو حلو تتدخل

وتسويلكم مشاكل بس شسوي تبقى امي

وطبعها حدي

-مع احترامي لعمة بس يمنى انت قصرتي

ويه ليل عالاقل لو گايلتلها وتعرفين ليل

عاقلة مستحيل تقحمچ بالمشكلة

يعني نتيجة الموضوع عمة طرحته بطريقة

غلط خلت هاجس مد ايده على ليل واذاها

المهم كملت غراضها واجت اختها اخذتهن وياها

من الباب ليل بعد السمعتي والله واضح راد

يحافظ على مشاعرچ من القهر رجعي والله

صاير تراب بس جگاير يدخن

-مع الأسف عليچ غيد واهين نفسي

بعد الصار

-ربي يهديكم والله مااكدر اشوف البيت

فارغ منكم اثنينكم هاجس ساكن الدوام

وانت هناك

-الله كريم حبيبتي دوختچ اني بوسي لولو

وتعاليلي مو تغيبين

ودعتها وگعدت افكر معقولة الانسان

ممكن ويه كل الحب الشايله لشخص

ممكن يخفي عنه شي مهم يمس حياتهم

سوية معقولة الانسان يلبس ويه

اللي يحبه وجهين وقناعين

گمت تاركة الغرفة طالعة للحديقة

الدنيا شارفت عالغروب اندگت الباب

لبست حجاب وطلعت هاجس واگف

بالباب مسنود على سيارتي

بلا كلام تقدملي سحب ايدي

خله بيها السويچ وطلع يتمشى بملابس

الدوام دخلت شمرت السويچ عالميز بالحديقة

واني ادعي القوة بس مااستغرق الموضوع

ثواني حتى اغط ببكاء مرير

تحشرج على اثرة صوتي بحزن

الى أن رجعو بيبي وماما وبابا

لزمتني بيومها بيبي سحبت مني

اعتراف بالمشكلة وخلتني افضفض

بكل شي يجول ببالي

-والله يابيبي ماادري شگووول

-بيبي هاجس جرحني مااظن راح انسى

بيوم

-الوكت ينسي يابيبي اطي لروحچ وكت

وشوفي

الأيام تمشي بتتابع غريب دخلنا

موسم الامتحان الاولي للسنة الاولى

من البورد العراقي اخذني

بابا للأمتحان بس حسيت نفسي

بدوامة وغير متأكدة من اجوبتي

لذلك عرفت راح احتاج امتحن دور

تكميلي بشهر التاسع وهيچ 

ولازال الورد كل دوام يوصلني

ووويا كارد بكل مرة مكتوب أحبچ

اعرفه خطه الاعوج ووالورد البرتقالي

اللي حببني بي غصباً عني 

وغيد كالعادة اتصالاتنا قائمة اما يمنى

فدواماتنا مختلفة واني دائما احرص على

ان مانلتقي ابدا ولو صدفة الى أن

أجتني بيوم لمكتبي بعد ماحان موعد

خروجها واني ستوني دخلت

اجبرت عالبقاء بمكاني گعدت گبالي

عيونها تلمع بدموع

-شلونچ ليل

-مخذولة مثل متشوفين

-والله سمعي اسبابي

-اي عذر ماالچ وانت صديقتي واختي

الظاهر عجبچ دور حافظة السر وعجبتچ

اللعبة اللي تديروها انت ونوح وهاجس

-والله نوح ربط حياتنا بهالسرر گال

بس يطلع تنسيني

-اها وانت بس يمي متگدرين تگولي

بس لأمچ عادي تحچي وخل اكون صريحة

انت تدرين امچ تكرهني لسبب مااعرف شنو

هووووو وتعرفين انها ممكن تضربني بصمييم

حياتي من تعرف مع ذلك مخفتي تطلع

السر وتخرب حياتچ بس خفتي

مني اني اللي صاحبة الحق بمعرفة هيچ

كلام بس شنگول يممممكن انت هم تكرهيني مثلها

-انييييي شلووون والله انت اختي

-وين حق الاخوة تعتقدين اذا حچيتيلي

رااااح اطلع الكلام تعرفيني هذا مو اسلوبي

بس عالاقل مااعيش دور المغفلة

بعد كلاااااام عمة عني

-والله مگدرت خفت ترددت بس مو كرهاً بيج

وداعة زين

-للأسف هوووواي فرص چانت عندچ

بس انت قررتي التفرد بالخبر

غطت وجهها باكية قدمتلها الكلينكس

-والله نوح گال انتهت ليل وهاجس اذا

انفصلو انت مالچ رجعة ويايه

-لتربطون حياتكم بينه اني وهاجس

منتهين 

دگ تلفونها امها وگفت معتذرة

-اني اسفة الصار خارج سيطرتي واعتذر

بالنيابة عن امي وكل شي صار ادري

بسببنا

طلعت حزينة وحقها تفرقت عن زوجها

وهي عدها طفل وحامل بالثاني

فرق شهرين عن ولادتها بيومها

رفعت الحظر عن نوح وبس اتصلت

بي فتح خط

-الو ليل

-ماعندي شي وياك نوح

رجع زوجتك ابنك صغير ششاف منك

وزوجتك حامل ومتأثرة هوووايه بفراقكم

بسبب الصار ارجعو لتروح تتأذة خطية

-احچيلچ وسمعيني

-لا ماعندي اي كلام هو زوجي اللي هو شريك

حياتي ماحچه اعتب عليك انت عموما

برووووح والدتك احلفلي ترجعها اليوم

-الله كريم

سديت التلفون اتصلت بجدو

بقيت احچي ويا وگال يمي الموضوع

بالليل خابرتني غيد گالت راح جدو

جاب يمنى وزيوني وهيچ طلعت من ذنبهم

وره يومين بعد هالكلام اجاني

جدو وهالمرة چانت گعدة بوجود

بيبي وماما جدو يحچي بحذر

عبالة بيبي متدري بس گامت ماما

للچاي تجيبة بيبي حچت

-ابنك ان چان عبالك تردله هيچ

غلطااااان ماعندي بت تنضرب وتسكت

وانت أدرى وسالفته طايح حظها وسهلة

شماله سواها مثل البالع موس

ماكو شي ماله علاج مخلي الرايح

والراد مستسرة وضام عليها

-ها عذبة قويتيها عالوليد

-ماقويتها هي قوية من گاعها

والله دمي اليسري بعروگها مخليها

ماتطخ الا من تغلط صدگ

وانا اگلك مادام ماطخت يعني

ماغلطانة گله لهويجس ………

بس گالت هيچ جدو ضحك من گلبه

وباوع لبيبي

-وين رديتينا هووويجس طالعة

من نص گلبچ

-اييييييي مااختلفت البارحة عن اليوم

بسسس گله سالفتهم صارت يمي اااااانا

وانت تعرفني انا شلوووني بالعناد ويباسة الراس

وردتها بيدي انا ومااااخليها ترد لما ترضى

وگفت من صاحتلي ماما واجاني

صوت بيبي الهامس وضحكت

على كلامها اليدخل الگلب

-بس ها على كيفك ويه الوليد خطيه وجهه

صاير هاگداته

-ووووين شفتي

-اجاني حچيت وياه من راحت هي للدوام خطيه 

هو صدگ مسودن بس احبة 

مشيت لماما واني مبتسمة هايه

بيبي حقانية ومتنطق حرف زيادة

وصح اللي بگلبها على لسانها بس

بأدب وحدود

طلع جدو بعد مايأس مني

ومرت الأيام بصعوبة وروتين

هو اختفى واني اختفيت 

وبديت أذوي هالكلمة مو مجرد وصف 

هالكلمة چانت تنهش بروحي كل ليلة

الفراق يذبل الملامح 

المراية صارت عدوتي

والملامح اللي جانت تضج بالحياة

بدت تنطفي تدريجياً

مثل شمعة خلص خيطها وبقت تصارع النفس الأخير

شهيتي للأكل للضحك وحتى للحچي انعدمت

صرت أمر من يم السفرة وأحس بريحة الأكل تخنگني

مو لأن الاكل بي شي

بس احس احساس اكو شي واگف ببلعومي مثل اللگمة اليابسـة لا هي النزلت وريحتني

ولا هي الطلعت وخلتني أتنفس

جوابي دائما مو جوووعانة

بس بالحقيقة اني أجوع لكل شي چان يجمعنا

والعن نفسي بالساعات وبالدقايق

لأن گلبي بعده يدگ اله

العن غبائي اللي خلاني أصدگ ان بالحب

تكون مراية حبيبك ليش ويايه صار

العكس چان عبارة عن بير أسرار

صرت أگعد بغرفتي أباوع للسقف

وأحسب الثواني وكل ثانية تمر واتذكرة احسها

طعنة بذاكرتي ألوم روحي

-ليش فكرتي بي 

ليش هسة هو نايم مرتاح وأنتِ تاكلين بنفسچ أكل

المصيبة مو بس بالزعل

المصيبة إني تركت البيت حتى أنهزم منة ومااشوفة

لگيت روحي جايبته وياي بوسط أفكاري

البيت اللي عفته چان حيطان

بس السجن الحقيقي هو هذا

التفكير اللي ميسكت كلما أكول خلص

يجي طيفه يهد كل بنياني

أصعب شعور هو من تحس نفسك 

جاي تنتهي علمود شخص

هو أصلاً محسب حساب

للكل الا انت جاي اذوي وأذوب

وأني أدري إن الحطب

اللي جاي يحرگني هو ذكرياتي وياه

فزيت واگفة متهسترة للكنتور

طلعت الورد اللي مالي

كنتوري ببيت اهلي والذكريات

من حبنا للخطوبة والصور اللي مخليهن بجنطتي

وطلعت بره خليت الصور والورد والذكريات بطاسة

حديد بالحديقة وشعلت الجداحة وگعت دموع

وغصت بحزن يقتل بعدما رجعت صورتة ببالي

وهو يضربني ويوگع شعري بين ايدي

-شوف النار شلون تاكل بضحكتنا 

مثل ما السويته أكل روحي 

النار مااكلت بس الورق

اكو نار بصدري صارت تاكل بكل حرف وكل وعد وعدتني بي

كلما تحترگ صورة أحس جمرة جديدة

توگع بوسط گلبي

ريحة الحرگ ملت المكان

بس ريحة خيبتي بي علقت بروحي

للأبد

وگفت منهزمة من مشااااعري

- احترك أنت وصورك وسوالفك

يارب مثل ما اختفت ملامحك بهالورق

تختفي من بالي وما يبقالك أثر 

حسافة المشاعر تاليتها

صينية رماد

رجعت وبگلبي ناااار متنطفي

ضرباتة وكلامة الجارح مااانسى

وهو يملخ شعري بين اددي

گدام الكل تجاوز عمته بحقي

وعدم ايقافها ماااانسى طول عمري

الأيام البعدها انكفيت عالقراية

حتى امتحن تكميلي والاسابيع

مرت مسرعة جهازي اغلب الوقت

مغلق وخط جديد عندي

غيد احچي وياها انستغرام من

حساب جديد ووطن كذلك

بيبي صارت كل يوم تسولف ويايه

عن الصبر وان الانفصال مو دائما

حل خصوصاً اذا بعدنا واحد

يحب الثاني

بعد هالكلام وبداية شهر التاسع

بديت التقييم السريري والعملي أول شي

​قبل مااروح للأمتحان 

يعني لازم المستشفى تقر بأن الطالب مؤهل للانتقال أو دخول الامتحان

نبدي بجانب سريري فحص مريض أخذ تاريخ مرضي أو امتحانات نظرية بسيطة

​استيفاء وتأكد من إكمالي لجميع الروتات المطلوبة بالسنة الأولى

وانطلقت وية مجموعة

زملاء للأمتحان التكميلي 

يعتمد نظام الأسئلة على MCQs

ويركز على 

​النمو والتطور

علامات النمو الطبيعي والمقاييس الجسدية

​التغذية والرضاعة مشاكل سوء التغذية

الرضاعة الطبيعية وفيتامين D

​السوائل والمحاليل

و​الأمراض الشائعة مثل الإسهال التهابات الجهاز التنفسي واليرقان الولادي

توكلت على الله واتفقنا بعد الأمتحان نلتقي

بمطعم نتغدى ونرجع

دخلت الأمتحان بهمة حتى اعوض

الفات وبديت بهدوء

اكتب كل شي اعرفه

الى أن كملت طلعت عالموعد

انتظر البقية تأخرو

اتصلت ماكو طلعت للبوابة انتظر

بعدني ستوني اطلع

وحسيت بكف تشابكت

ويا كفي التفتت وشفته

واگف بملابسه الأنيقة

ووجهه التعبان سحبت ايدي بسرعة

وتراجعت حتى ادخل للجامعة

ضغط كفي حيل رافض يتركني

ومشة بية ويا للسيارة اللي واگفة

عالجانب من الشارع

همس واحنه ماشيين

-منتظرج من الصبح هنا

فتح باب السيارة وگفت متكتفة

رافضة اصعد

-صعدي حاااااارة بس ارتاحي

-ماااصعد ومنتظرة زملائي

- زملائچ شلوووون زملاء

لگف 

گالها وبخفة دفعني للسيارة

و قفلها اول مگعدت

دخل بسرعة ورجع قفلها

ماباوعت حتى بوجها درت

وجهي للشارع متكتفة تعبانة

وكل مشاعر الغضب معتريتني

-باعيلي ليل فهميني شتردييين طلباتج شنووو

ما ردت أباوع بوجهه

بس عيونه جانت تلاحگني مثل لعنة

السيارة انترست دخان 

الهوى البارد مال التكييف چان يضرب بوجهي بس ما يبرد النار اللي بصدري

چانت تحرگني حرگ

ثلاث أشهر وأني أذبل

وهو هسة جاي يسأل عن طلباتي

عباله السالفة قائمة مسواگ

لو شروط تنكتب على ورقة

مل من سكوتي ورجع يسأل

-يعني نبقى بلا تفاهم

هاي ثالث شهر غيييير افتهم شتردين

مارديت على سؤاله بس سألته

-ويييييييييين موديني

-ماااااااارجعچ لحد ماتفهميني شتردين

-نتطلگ

هاي الكلمة جانت مثل الطلقة

اللي استقرت بنص كبريائه

شمر الجگارة وبأنفاس محروگة

داس بانزين وخلاني أحس السيارة راح تطير بينا التفت عليه وعيونه تجدح نار

وصوته رعد بصوت بين العتب والزعل 

-طلاگ ماااااكو لو لحضني لو لجهنم

الفصل الثاني والثلاثون من هنا