رواية الندم مابعد الخطيئة الفصل الثلاثون بقلم رونق
وجان يجره مني رسول حيل عفيه بس
خلي ابوسه الله يخليج جان يخزر بيه
واخذه مني منطق ولا حرف بس اشرلي
روحي وضحك بوجهي كمت اصيح اصيح لحد ماكعدت لكيت نفسي ابجي واصيح صدك
كعدت لكيت الكانويلا بيدي ومغذي خاله يمي ودكتوره وممرضه
الحمد لله ع السلامه الدكتوره حجت
الله يسلمج اتلمس ابطني اخاف فقدت بنتي
اخاف اسال وتجيني الصدمه بعدين اتشجعت وسالت دكتوره بنتي شلونها
زينه لتخافين خافي ع نفسج هسه
شنو الي صار خاله فدوه احجي
ماكو شي خاله بس ينرادلج راحه وتحتاجين دم
الله عليج خاله بنتي بيها شي
لا والله خاله مبيها شي اجينه بالوقت المناسب الحمد لله
رد الدم بوجهي بس عمار اني الك مراح اسامحك والله ع الي سويته بيه
بقيت داخله يومين واجتي امي وايات وزوجة مهند والكل يسال ع وجهي كتلهم وكعت من الدرج عبرت ع الكل الحمد لله مااكدر اكول عمار والله اخاف ترجع المشاكل بين العائلتين بس خلي مرتضى يطلك روان ويصير خير
عمار مكلف نفسه ويزورني ابد ولا اطمان عليه
احتاجيت بطلين دم ومااعرف منو الي اتبرعلي ودارولي الدم
بعدها طلعنه من المستشفى ورجعت للبيت وحالتي زينه بس حذرتني الدكتوره من اي مجهود لازم ارتاح
اني حاليا بشهر السابع عمار ابد ملمحته نهائيا
روان بعدهي يمنه سالتها ع مرتضى كالت لهسه لا خبر عنه ولا شي صارله 5 ايام بدينه نقلق عليه
العصر نزلت جوه لان ضجت من النوم روان كملت امتحاناتها همزين حتى باقيه ويايه خطيه مخلتني كلشي اسوي
اجه عمار والكل كاعد جان يكول عيني انت اخوج المصون وانت رجلج الشفيه شمصخم وداخل سجن صارله 5 ايام وانتن تسترن اله وتكولن مسافر
اني وروان وحده تباوع بوجه الثانيه شنو الفلم شنو بالسجن اسيل واكفه متشمته بينه
روان : اتخبلت من شفت شهد هيج مسوي بيها مرتضى طلع الافندي متهمها بالسرقه طبعا مااشك ولا واحد بالميه بيها
حاولت استدرج اموري مااعرف شلون شكيت باسيل وفعلا ضحكت عليه بكلمتين وواعدته اشتريله طياره اعترف كال اني اخذتهن خليتهن بكنتور ماما هي طلبت مني وكالت اذا ماحجيت لبابا راح اجيبلك موطا ونوتيلا وطياره
طبعا عقلي وكف شلون تعلم الطفل ع السرقه باللحظه كتلهم لعمار واسيل بسرعه نكرت وحلفت يمين جذب وحرضت عمار كالتله اكيد ضحكت ع الطفل ع مود حماتها حسيت بعمار صدكها
عمار معقوله تصدك باسيل اني هيج اسوي ساكت عمار منطق ولا كلمه ابد مو معقول عمار
هاي شبيك عمار ماتحجي ليش ساكت
اني بطريقتي راح اعرف الحقيقه بس والله ياويلها وسواد ليلها الي اعرفها تجذب
خبرت امي وابوي واتخبلوا ورزلوا اسيل بس هي حقيره نكرت وعمار منطه مجال اخذها وراح للغرفه
رجعت للغرفه سولفت لشهد بس شفتها مهتمت حيل ضجت عليها خطيه احسها مدمره دمار واكيد من ورايه اني ومرتضى وافقت ع عمار احسها متندمه
دخلت للحمام بس خطيه كامت تنزف خبرت اهلي واخذوها للمستشفى عمار ولا كانو خبرته بس مهتم ابد
طولوا اتصل بيهم ومحد يجاوبني طلبت من عمار يروح الهم بس مقبل اخر شي رجع بابا كال خطيه انغمه عليها والدكتوره اتخبلت من شافتها كالت الطفله مهدده ع ساعه تموت ابطنا ورادت تفتح محضر كوه قنعناها كنالها وكعت من الدرج كوه اقتنعت
وهسه شلونها
الحمد لله استقرت حالتها بس راح تبقى داخله
بقيت بين نارين نار مرتضى الي لاحس ولا خبر عنه ونار شهد ثاني يوم داومت وجان اخر يوم بالامتحانات بس مجاوبت زين لان مقريت اصلا خبرت اهل شهد خاله وعمو لان مو مالت نسكت بس كنالهم وكعت من الدرج والله ع اعصابنه من وره الحقيره اسيل بس بسيطه الها
من رجعت من الدوام لكيت اسيل مو طبيعيه مبينه ماكلتلها ضربه حيل بيها وحتى امير جان زعلان
اخذته للغرفه وسولفلي كل شي كال بابا ضربني وكلي احجي الحقيقه واني خفت خبرته كل شي وضرب ماما هواي
اي حيل هسه برد كلبي شويه بقيت احجي ويا لك عمه ميصير تكذب الله يذبك بالنار وميصير تسرق ابد خبرك ابوك كلشي حتى تدخل للجنه
شنو بيها الجنه
كل شي بيها ملاعيب وانواع الاكل
وموطا
حتى موطا بيها هواي وانواع الاكل
بقينه نسولف لحد منمنه
كعدت نظفت البيت كله
بقيت يومين اخابر ع مرتضى وماكو خابرت عمو سالته كال والله عمو اني هم قلق عليه ومااعرف اي خبر عنه
بقينه عايشين بقلق
طلعت شهدوجانت حالتها زينه بس طالبه منهم الدكتوره متتحرك هواي حجيت وي عمار كتله لازم تسوي حل لنسوانك اثنينهن ميصير وحده مغضوب عليها ووحده مرتاحه
اني لدخلني بشغل النسوان امي تجي وتقسم بكيفها اني ماعليه
زين ومنو يحاسب الي تقصر
اني احاسبها
اكيد لو تنحاز لوحده
لويش انحاز لوحده مثلا
اسال نفسك وتعال فهمني من شوكت اسيل صارت هي الكل بالكل
من تزوجت شهد حسيت الفرق
تحجي صدك عمار مو هاي شهد الي حبيتها وكتلت نفسك عليها
مو هي نفسها الي حبيتها
شلون يعني مو نفسها
انت لتدخلين بيناتنه معليج اطلعي من الموضوع
منطاني مجال وراح لمحله
العصر جنه كلنه متجمعين وفرحانين بشهد بس اجه عمار وفاجأنه من كال مرتضى بالسجن
شنو يعني بالسجن منو يكول
خابرني كرار وكلي احمد مخبره كال بالسجن صارله 5 ايام
اتخبلنه اني وشهد اكيد اكو غلط بالموضوع هو سافر شنو سجن
عمار اكيد متوهمين انتو عمار باربيل
لا ممتوهمين روحي خابري عيالج وافتهمي شوفي شمصخم ومسجون
بسرعه رحت خابرت عمو ينطيني رفض شهد هذا عمو ينطيني رفض
كالت راح اخابر مهند وافهم منه
اتصلت بي بس هم ينطي رفض
خابرنه خاله جان تكول منعرف اي شي بس كل الي عرفناه بالسجن
طلبت من عمار ياخذنه اني وشهد لان تحتاج راحه خطيه
مقبل ابد ع شهد بس ماما وبابا كاموا يحجون عليه اخر شي وافق وكال اذا صارشي بيها احملكم المسؤليه كلكم
اني اتحمل المسؤليه بس بداعت عزيز عندك خليها لمن تدخل بالثامن الله عليك
هاي هي خليها وشوكت مايعجبها خلي اهلها يجيبوها بس ها من هسه اكولكم والله اذا طلعت من الباب اكلب الدنيه
وينها وين الطلعه
رحنه لبيت مرتضى اخذنه عمار وبابا كال عيب خل اروح وياكم لكينه عمو ومهند وعمهم واحمد وابو هناك
لكينه خاله بس تبجي كالت خاله طلع واحد من جماعته طالب سيارته ورايحين بيها لبغداد وبالرجعه همه سكاره شاربين وداعمين شخص ومنهزمين وماخذين رقم السياره بالكاميرات وواكعه براس مرتضى
شنو ع اي اساس براس مرتضى
القانون يكول اهم شي السياره باسم مرتضى وميهم منو الدعم
وشنو اخبار الشخص
الشخص رجال متوسط بالعمر وحالته خطره خطيه ميصير يطلع عمار اله يخرج من المستشفى لو اذا مات نفصله
وصديقه شنو اتبره من الموضوع
همه كاعد يتفاهمون ع هذا الموضوع خطيه فوك ماسيارته متاذيه وهم بالسجن وهم الرجال اتكربس براسه
شهد حجت ليش مكال الحقيقه ليش كال سافرت
ميريد احد يعرف بالموضوع سوده عليه 5ايام بالسجن منعرفه شياكل شيشرب هم معذبينه لا
كولي ياالله خاله ان شاء الله ماكو شي دموعي نزلن غصبا عليه حتى شهد تبجي
شهد انت ارتاحي روحي نامي مو زين عليج
حيل ضجت يعني مصارحني هسه موقفي ضعيف كدام الكل وفعلا من راحوا احمد وابو دخلو يمنه وجانت الانظار ادور حولي مهند كال معقوله روان متدرين برجلج
لاوالله ابد محجه كدامي ولا ادري بي
هذا مو صاحي مرتضى يعني حتى زوجته ممخبرها عجيب امره
زين عمو هذا صديقه شيكول
والله عمي رحنه لاهله وحجينه وياهم والعالم اتجاوبوا ويانه بس كالوا الولد مسافر هسه
كنالهم اتصلو بي خلي يجي ويسلم نفسه ولازم تحلون المساله عشائريه ميصير فوك سيارته وفوكاها بالسجن
كالوا يصير خير واحمد تكلف المساله
زين احمد شعجب ميعرف السالفه
لا يدري بس هو الي محلفه يمين ميحجي كدام احد بس يكول متحملت اسكت لان اهل الولد الظاهر ساكتين ومرايحين ولا سالين اهل الرجال وابنهم بعده شارد لهذا السبب لازم ندخل
باجر نسافر هم نروحله وهم نروح للمستشفى نستفسر عن الرجال
ثاني يوم راحوا عمو ومهند واحمد وعمه لمرتضى واهل الولد صديقه لمرتضى هم راحوا وياهم
قبل ليطلعون حجيت وي مهند الله عليك بس تروحون تشوفون مرتضى خل يحجي ويانه بجهازك
ان شاء الله
بقينه ننتظر مخابره من مهند
والله لل2 الظهر دك عليه باللحضه رفعت خط وجان يطلع مرتضى
الوووو
شلونج روان
مو زينه والله ليش هيج سويت
شنو الي سويته
ليش مخبرتنه الحقيقه
مو وكت هذا الحجي امي شلونها البنات
كلهن زينات وانت شخبارك
زين الحمد لله انطيني امي خلي احجي وياها
اي خاله خاله هذا مرتضى هذا الحجي اركض واحجي انطيتها الجهاز وجانت بس تبجي
حجت ويا وبعدين كالت هاج يريدج
ها مرتضى
ديري بالج ع امي خطيه لا يرتفع ضغطها
ميحتاج توصيني اصلا اجينه اني وشهد وراح ننتظر رجوعك ع نار
ان شاء الله مكضيه ماكو شي
الله كريم اترخص وطبكه
رجعو وكالوا الرجال بعده متعده مرحلة الخطر و همه زعلانين كالو لا احد منكم سال ولا شاف شكو ماكو بعدين فهمناهم كلشي واعتذرنه من عدهم
مهند كال كلفنه محامي والولد اذا رجع يسلم نفسه حتى يطلع مرتضى
وسيارته
تبقى بالحجز لمن تخلص كل الاجراءات ويطلع الولد من السجن يله
مرتضى : بعد زواجي اتغيرت حياتي لازم اتظاهر اني صدك متزوج ومتلهف ع زوجتي اصعب ايام جانت عليه بداية الزواج لان روان تلبس لبس مو عادي كله حصر وقصير ومالات مناسبه وتخلي مكياج جنت اتظاهر ممهتم الها بس بالحقيقه لا اني رجال جنت اضعف من اشوفها هيج بس مااكدر اتجاوز حدودي وياها لان ادري بيها متحبني ولا راح تتقبلني ابد
خلصت الهوسه والناس كفت هواي ارتاحيت لان هم بديت اطلع للمحل والتهيت بي كمت اقضي معظم وقتي بالمحل وصدفه التقي بروان بدت اداوم واجرتلها خط قمت بواجبها وانطيها مصرف هي ترفض بس مهتميت
الصراحه قايمه بواجبي كدام اهلي اكلي وملابسي وكل شي يخصني تسوي روان بس طبخ ابد متعرف كلت لامي علميها ع الطبخ كالت لا يوم عوفها خلي تكمل دراستها وبالعطله عود اعلمها هسه البيت كله عليها تنظف وممقصره ابده حتى غرفتنه اني وابوك تنظفها
فرحت من سمعت امي راضيه عليها
اكثر المرات منلتقي اكعد الصبح الكيها بالدوام والظهر ماارجع للبيت لان شته ومتسوه ارجع وارجع بالليل الكيها نايمه لان اني اراسلها واكلها لاتنتظريني واحاول ارجع متاخر ع مود الكيها نايمه
علاقتي بيها عاديه ابد منحجي سويه احسها هي تحاول تبتعد واني هم مبتعد ادزها لاهله كل اسبوع وابد مباتت هناك
اكو ولد صديقي علاقتي بي هم قويه هو نفسه الي راح ويايه لايران طلب مني سيارتي راد يروح لبغداد مترددت ابد انطيته السياره بس ثاني يوم اتفاجات من رجع السياره وجانت مضروبه وضربتها قويه الضربه بالبنيد والجاملغ جابها صديقي الثاني كال محمد مستحي منك لان ضاربها يسلم عليك ويكول شنو الي يريده اني حاضر تريد تبيعها والخساره عليه تريد تصلحها ع ذوقك واني اتكلف كلشي اعترف حيل ضجت واتندمت لان انطيت سيارتي لان محاول هو يجي ويعتذر بنفسه
زين محمد وين ليش مااجه بنفسه غير يجي ويفهمني شلون اندعمت هيج وهاي ضربه قويه شلون هيج صار بيها
مااعرف والله بس الي ادري بي هو خجلان منك وسافر لاربيل عنده شغله ضروريه وكلفني بالموضوع
هو هذا حجي بربك شلون يسافر هيج هو العتب مو عليه العتب عليه اني الي امنت بي وسلمته السياره
دزيتها لحي الصناعي السياره حيل متاذيه ومعرف شنو السبب اكيد مو دعمه عاديه الجامه الاماميه مكسره يعني السياره بيها اضرار هواي بس بنفس اليوم الدزيتها لحي الصناعي اجاني ولد صديقي كلي راح اكلك شي بس الله عليك بيناتنه خليها
جان يكلي محمد دعمله شخص وانهزم وجان سكران ميدري بروحها وهسه خايف وانهزم
اوكف وحده وحده خلي افهم شنو الفلم شنو دعم شخص شنو نهزم
شوف من نزيد نرجع من بغداد جنه شاربين بس ممثكلين طلعنه من فرع وجان يطلع رجال بوجهنه منين طلع منعرف ظربه محمد بدون قصد بس خفنه انهزمنه وجان الفرع فارغ من ابتعدنه مسحنه الدم ومنعرف الرجال مات لو لا
اني ضميري يانبني مكدرت اسكت رحت لبغداد وبديت اسال بالمستشفيات الي عرفته ماخذين رقمك من الكاميرات الرجال حالته خطره خطيه
تحجي صدك بربك لعد هذا محمد النذل شلون ينهزم هيج
والله مااعرف هواي حجينه عليه بس هو مهتم ولا كانو سافر لاربيل
اتخبلت الى شويه تعال كلي الحل شنو
والله مااعرف خل نروح لمحامي وخلي نستفسر
خابرت احمد اجه ورحنه للمحامي وخبرناه السالفه كلها
يابه هسه بالقانون انت المذنب لان السياره باسمك وماكو دليل مو انت الي تسوق
والحل
الحل تروح تسلم نفسك ولازم اهل صديقك يضغطون ع ابنهم خلي يجي يسلم نفسه وهمه يرحون للعالم يتراضون وياهم
بقيت يومين دايخ شلون افاتح اهلي بالموضوع بقيت دايخ واحاول اتهرب من الكل حسيت بروان خايفه عليه وكل شويه وسالتني جنت اتمنى افتح كلبي واحجيلها بس فضلت السكوت
رغم حزني ودوختي بالموضوع كعدت يوم جمعه صادف وروان ماعدها دوام طلبت منها تسويلي بيض سلك بس اشو هذا طلع مو بيض يمكن باجه وماادري اني اراقبها من بعيد خلصت سيت البيض كله والريوك مجاهز ضحت عليها كلت لو ادري اني مسويهن احسن بس حبيت افضي خلكي وياها حبيت اشوفها شراح تسوي بالنهايه مره طلعن ممستويات ومره مكسرات وواكعات بالمي ومره احتركن غير الي ماادري بيهن اخر شي طكيتها بضحكه متحملت وطلبت منها اطلعلي جبن وكيمر لو اي شي حسيتها خجلت بس عادي
اتريكت ورحت لاحمد كال اتفقت وي ضابط ابغداد بس تروح اله باجر الصبح هو يتكلف الموضوع راح تنسجن لمن يجي محمد ويسلم نفسه
رحنه لاهله واتفاهمنه وياهم لازم ترحون وتسالون ع الرجال كتلهم اني مااكدر اخبراهلي راح اكلهم مسافر
هاي هي انت سلم نفسك واحنه علينه الباقي
رجعت لاهلي وخبرتهم اريد اسافر والكل اتفاجئ كتلهم وي صديقي مريض اسافر لاربيل وطلبت من روان تروح لاهلها الحمد لله اقتنعوا ومحد شك بيه طلبت من احمد ابد ميخبر اهلي لو شيصير لان خايف من ردة فعلهم خطيه يوميه مبهذلهم
اتوقعت هذا النذل محمد من يعرفني انسجنت راح يجي ويسلم نفسه بس طلعت متوهم
رجعت للبيت وحضرت جنطتي اخذت تراكات الي وشكم شغله ورحت الصبح اني واحمد للظابط سلمت نفسي واخذوا اقوالي وانسجنت اخذوا مني جهازي بقيت بدون جهاز احمد ودعني وراح
بقيت بالسجن اني وشكم واحد ويايه
اتعرفت عليهم وعرفت صدك ياما اكو مظلومين بالسجن لكيت اكو اخوان اثنين واحد منهم شويه جبير والثاني صغير سالتهم ع سبب سجنهم كال اني زوجتي اتسممت وماتت وتهموني اني واخوي
شلون تسممت
والله مااعرف بالتشريح طلع قبل اسبوع منطينها عشبه او شي ومفعوله بطيئ والله علاقتي بيها قويه وعندي 4 اطفال واخر طفل عمره سنه ونص اني شاك باهلها لان قبل اسبوع هي عدهم وبايته جانت
لعد مذكرت بالتحقيق
ذكرت كلشي والله بس دليل ماكو
ع اي اساس تهموك انت واخوك
يكولون لان احتمال انتوا تردون تتخلصون منها وماتت ابيتكم
زين عدها عداوه وي احد من اهلها
والله شريد اكلك مااعرف قبل فتره كالت اني شاكه بمرت اخويه عدها علاقه غير شرعيه وي اخويه الثاني يعني وي حماها ومن حجت عقلي وكف كتلها مستحيل هذا الشي كالت والله اني متاكده وحجيت وياهم ونكروا واني اخاف احجي كدام اخوي الثاني وتصير السالفه مو زينه وتصير كاتل ومكتول اني متاكد همه الي مسمميها
اني حجيت لاهله السالفه ومحد صدكني ابد ونكروا هذا الشي وهمه الي تهموني بس المحامي الي كلفناه شاطر كال اني اخذ حقكم وحق المرحومه
تعرف اني هسه اريد اموت من وره هاي السالفه يعني لاكدرنه نحظر الفاتحه وجهالي خطيه هم فقدوا امهم وهم اني مو يمهم
الله كريم ان شاء الله اطلعون براءه ويظهر الحق
الله يسمع منك
سالوني عن سبب دخولي السجن سولفتلهم السبب
بقينه نسولف اول يوم محسيت بالسجن عادي كضيناها بالسوالف ثاني يوم جابولنه واحد مبين عليه فقير بس خطيه مأذينه بالضرب
اني جايب ويايه معقم وكطن وبلاستر بالجنطه ضامهن بجيب سري
كعدنه عقمنه جروحه وانطيناه مي وجان جوعان حيل خطيه انطيناه اكل بعدها نام بقه لثاني يوم نايم بعدها كعد الصبح خطيه اتشكر من عدنه سالناه عن السبب الي مخليهم هيج معذبينه
كال ماادري راح تصدكوني لو لا
احجي فوخ كلبك واكيد راح نصدك
شوفوا اني شرطي فقير اروح بدربي وارجع بدربي انسجن واحد من المسؤلين الكبار بتهمة تزوير ماادري غير شي كاموا يطلعوا لاهله والحمايه تبقى بالباب تلزم خفاره ينام يم اهله ومكضيها كلها يم اهله يجي خطار للسجن
قبل يومين كالوا الاستاذ مريض ولازم تاخذوا للمستشفى بس ديروا بالكم خلوا عينكم عليه وانتبهوا زين
رحنه صدك واول ماوصلنه انطوني عصير اشو اول مشربته بعد ماادري بالدنيه شبيها مبيها بعد فتره كعدت ع الضرب بكل مكان وجان يتهموني اني الي اهملت واجبي والمسؤل هارب من المستشفى
زين انت شلون نمت
والله ماادري يااخي اكيد منطيني منوم وهاي اتفاقيه بينهم وحبوا يكربسوها براسي
دزوني للمكافحه زوعوني العافيه بس اعترف اعترف لاخلوا كهرباء تعتب عليهم ولا مي حار ولا ضرب ولا كلشي يعتب عليهم خلوني اعترف ع اشياء ممسويهن اريد بس اخلص من التعذيب
تصدكون اذا تشوفون المكافئه تخترعون بس من الصايح عبالك فلم رعب واكيد تعترفون ع اشياء ممسويها بس حتى تخلصون من العذاب وهذا الي صار وياي
زين محجيت بالتحقيق كل شي
يمعود منو الي يسمعني وحجيت مفاد اصلا مدستريها للشغله وناهيها ذبوها براس الفقير لان يدرون بيه حتى محامي مااكدر اكلف حالتي الماديه مو شي
زين انت متزوج لا
والله متزوج وعندي بنيه
والله خطيه حيل ضجت عليه وكرهت الدنيا من وراه يعني هاي دولتنه هيج تسوي الفقير ينداس بالرجلين والحراميه معززين مكرمين
ثاني يوم الاخوان طلعوهم براءه خطيه صارلهم شهر ونص مسجونين واخيرا ثبتت براءتهم بس معرفت شلون وليش اتبادلنه الارقام قبل ليطلعون بقينه اني وهذا الشرطي خطيه بقينه نسولف وحجالي قصته هو ومرته وشلون يحبها واهلها رافضينه لان فقير وكوه بعد حب خمس سنوات يله متزوجين كضه اليوم وثاني يوم موعد المحكمه باسرع وقت خطيه نحكم اخذوا وبعد مرجعوا بقيت وحدي حسيت بالسجن شنو معناه والله جنت ضايج ومااحس اله ابويه ومهند واحمد اجوني فرحتي متنوصف ابد
خطيه ابد ملاموني ولا حجوا شي مهند طلب مني اخابر روان كال لان حيل قلقه وطلبت منه بس يوصلني اخابرها الصراحه مجنت متوقع منها هذا الشي حيل فرحت لان لازم نمثل كدام الكل اتصلت بيها وحجيت وي امي خطيه حيل كسرت كلبي وضجت عليها
جابولي بيومها اكل وفواكه وعصائر اشكال واللوان استفسرت من احمد عن النذل كال لهسه بعده باربيل واهله هسه يله راحوا للجماعه وسالوا عن الرجال
تحجي صدك لعد وين جانو قبل هسه يشدون ويانه ومراح يتنازلون
باجر راح اسافر اني واخو محمد وراح نجبره يجي يسلم نفسه بمكانك
يابه مو مهم يسلم نفسه اهم شي خل يتراضون وي الناس حتى يتنازلون
زين شخبار السياره
بعدهي بالحجز ميصير تطلع اله بعد مايتنازلون
زين الرجال شلونه
خطيه والله متاذي ولهسه بالانعاش هسه راح نرجع للمستشفى ونحجي براحتنه وياهم لان قبل شويه اهل محمد ويانه منطونه مجال نحجي
اكلك احمد متحاجيلي هذا الشرطي بلكي يسلمني جهازي والله صوجه وفوكاها بوحدي
هسه اشوفه بلكي يقبل حتى اذا قبل اشتريلك هسه الشاحنه الخارجيه واتفق ويا ياخذها يشحنها الك بسكوت
ياريت والله
راح احمد ورجع كال ميقبلون ابد وقافلين ممنوع الجهاز يدخل وي المسجون
بقوا فتره وراحوا بقيت بوحدي يومين وبدت حالتي النفسيه تدهور حيل لان ضوجه فول لا موبايل لا بشر تحجي ويا حيل ضجت واتندمت ع الساعه الفكرت انطي بيها سيارتي
صارلي اسبوع بالسجن اجاني احمد ومهند جايبيلي كليجه وكيك وعصائر انواع ودولمه وخبز ودجاج شوي وكبه وكباب صادف شتا همزين يبقى الاكل بره لان صادف الجو حيل حيل بارد
كال هذا النذل مااله اي اثر وخطيه اهله انشلع كلبهم وحايرين بالرجال بس الحمد الله اليوم الرجال اتعده مرحلت الخطر
هسه اتفقوا راح يطلعونه للخارج وراح يطلع وياهم واحد من اهل محمد
زين واني بس لا ابقى بالسجن لمن يصير الرجال زين
لا راح يتنازلون احتمال باجر الخميس كالوا راح نتنازل
ياالله ياريت لان متتصورون حالتي النفسيه زفت متنوصف ابد
فدوه احمد حاول وي ذوله الخفر بلكي ينطوني جهازي كللهم هو بس اليوم
هسه اشوفهم
تعال قبل لتروح تعال انطيهم من هذا الاكل لان هواي
صدك اخذلهم وراح اجه يضحك كال واخيرا وافقوا راح اطلع اشتريلك الشاحنه وارجع
اي اخيك استعجل وجيبلي وياك رصيد وفعلي النت اهم شي
صار تدلل
صدك راح شويه وجابلي الشاحنه والجهاز حيل فرحت ع الاقل اقضي بي وقت
ودعوني وراحوا
جنت متلهف باجر اطلع واخيرا
اخذت الجهاز وفتحته ووصوني اخلي صامت والضوه خافت وفعلا درت وجهي ع الحايط حتى محد يحس بيه جنت مرتاح اليوم هم سمعت خبر حلو عن الرجال وهم راح اطلع باجر وهم جهازي عندي
اًول شي سويته راسلت روان
هلو روان
طولت يله جاوبت
هلو مرتضى شلونك شخبارك
الحمد لله زين انتوا شخباركم
زينين كلنه الحمد لله
امي شلونها
زينه والله لتشيل هم انت شخبارك
الحمد لله ع كل حال
شوكت رجعتي
قبل 4 ايام رجعت بالليل
تعال اكولك اني زعلانه عليك
ليش زعلانه شسويت اني
لويش عود مخبرتني شكد طلبت منك تخبرني وانت ولا كانو
والله محبيت اقلقج ابد
بس انت بهذا تصرفك حسبتني غريبه عنك ولا كانو زوجتك واخاف عليك
حيل فرحت بهذا حجيها
لا والله مو هذا قصدي ابد اصلا انت تعنيلي هواي اشياء
لو صدك مجان ضميت عليه هيج شي مهم وخليتني بموقف محرج كدام عمو ومهند
والله محبيت ازعجكم ابد وعبالي تنحل المساله بسهوله وتعبر عليكم سفري
عوفج من هذا الحجي تعالي كوليلي شي
شنو هالشي
ردت اسالها هم اشتاقيتي الي بس كلت اخاف افشل نفسي وتجاوبني جواب يصدمني
ها لا بطلت
احجي ليش بطلت
هيج شي مو مهم
وان يكن احجي
منو اشتاقلي منو فرحان بغيابي
شنو قصدك بفرحان بغيابك يعني منو الي تتوقعه فرحان
اتوقعج انت فرحانه
تحجي صدك انت ودزتلي 👈😠😠😠😡😡😡
اعصابج حبابه اخاف تنفجرين ومنو ياخذج للمستشفى
ليش تتوقعني فرحانه بغيابك
مااعرف هيج مجرد احساس
احساسك مو بمحله ابد والله اصلا ضايجه حيل والبيت عبالك فارغ بدونك الكل مشتاقلك والله
زين وانت هم مشتاقه لو لا
خاله تصيحني حروح اشوفها شتريد وارجعلك
اني متاكد جذابه حبت تتهرب من السؤال بس الصراحه اتمنى اعرف جوابها
طولت ومرجعت اخذتلي فره بالفيس بس مطولت اخاف يخلص شحن خلي يفيدني الشحن اتراسل وي روان
اتعشيت وجابلي الشرطي الشاحنه شاحنها خطيه وعافني وراح
دزيت الوووووو
باللحظه جاوبتني الوووو
وين صرتي تدرين منتظرج ع نار مو كلتي شويه وارجع
نسيت التهيت سويت عشه واجوي ايات وزوجها وبيت عيالها والتهيت وياهم
مو اكول اتاخرتي هواي
هسه راحوا لو بعدهم
راحوا
شكاعد تسوين
مااسوي شي بغرفتنه
منو يمج
شهد يمي
شعجب جايه يمنه
مريضه شويه وخليتها يمي احسن
شبيها خطيه
مبيها شي بس الحمل متعبها شويه
عبالي غير شي
تكدرين تكتبين لو نعسانه لو اضايقج كاعد
لا بالعكس متضايقني ابد اصلا ماعندي شي
ممكن اعرف جواب لسؤالي
ياسؤال
معقوله نسيتي
مااتذكر اي شي
مو مشكله راح اعيده
هم مشتاقتلي لو لا
احتفظ بالجواب لنفسي
ليش عود
احسن
بس اني حاب اسمع جوابج
انت شتتوقع
اتوقع ممشتاقه ابد
دزتلي 😡😡😠😠
اليوم شبيج معصبه
كاعد تظلمني اليوم هواي
افهم من كلامج انت مشتاقتلي
مراح اجاوبك 😏ودزتلي هاي الصوره 👇
يمه فديت الزعلان
هاي ع منو تقصد
احتفظ بالجواب لنفسي
لتقلدني 😤
منو كلج اني اقلدج
اني من هسه دايخ بشغله
شنو هاي
من راح نتشاوف كدام اهلي شراح نسوي
مراح نسوي شي
شلون اكو اثنين متزوجين عن قريب وينسجن الزوج ويشوف زوجته وكلشي ميسوي
لعد شتريد تسوي مثلا
بوكتها راح اكلج شاسوي بس من هسه اكلج اتصرفي طبيعي ديري بالج تعيطين بيه كدام اهلي وتفضحيني
خصم الحجي انتظرك فوك ومراح ننحرج
هاي مو خوش سالفه راح تطلعي بيها احجي بيني وبين نفسي
لج اكو وحده يطلع رجلها من السجن وهي تبقى بالغرفه متوكف بالباب تنتظره
اكلك سد الموضوع عود بوكتها يحلها الحلال
وهو كذلك
روح نام لان باجر وراك كعده اخاف يطلعونك
بس حاب نسهر سويه
شلون نسهر
نبقى نسولف سويه
لعد وشهد هم خطيه مشتاقتلي هواي ومنتظرتني نسولف سويه
يعني شهد اهم مني عندج
انت زوجي وهي صديقتي المقربه
روحي لعد لصديقتج
شويه وارجعلك
تمام راح انتظرج
راحت والروحه راحه
هواي طولت وهواي راسلتها بس ماكو جواب
ضجت حيل لان من صدك مهتمت الي ابد كوه كدرت انام
كعدت الصبح لكيتها هواي مراسلتني بعد نومتي بشويه حرامات لو باقي شويه ومنتظرها
طلعت نايمه ومتدري بروحها واتاسفت واعتذرت مني وهم هواي مراسلتني بس اني الغبي نايم ومحسيت بشي لان اصلا الجهاز صامت
راسلتها بس ماكو جواب الظاهر نايمه
كعدت انتظر شوكت يطلعوني صارت 10 ماكو صارت 11هم ماكو صارت 12 واي خبر ماكو حتى الجهاز تركته ماالي خلكه
صارت ب1 واخيرا اجوي دزوا عليه كالو زياره رحت ولكيت مهند واحمد هاي وين صرتوا تدرون باقي ع نار منتظركم جان يفاجئني احمد بشي لا متوقعه ولا حاسب حسابه ابد احسه حطمني ع الاخير
جان يكول .......
